| Library / Tipiṭaka / ਤਿਪਿਟਕ • Tipiṭaka / ਅਪਦਾਨ-ਅਟ੍ਠਕਥਾ • Apadāna-aṭṭhakathā |
੩. ਤਿਸਰਣਗਮਨਿਯਤ੍ਥੇਰਅਪਦਾਨવਣ੍ਣਨਾ
3. Tisaraṇagamaniyattheraapadānavaṇṇanā
ਨਗਰੇ ਬਨ੍ਧੁਮਤਿਯਾਤਿਆਦਿਕਂ ਆਯਸ੍ਮਤੋ ਤਿਸਰਣਗਮਨਿਯਤ੍ਥੇਰਸ੍ਸ ਅਪਦਾਨਂ। ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭવੇ વਿવਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ વਿਪਸ੍ਸਿਸ੍ਸ ਭਗવਤੋ ਕਾਲੇ ਬਨ੍ਧੁਮਤੀਨਗਰੇ ਕੁਲਗੇਹੇ ਨਿਬ੍ਬਤ੍ਤਿਤ੍વਾ ਅਨ੍ਧਮਾਤਾਪਿਤਰੋ ਉਪਟ੍ਠਾਸਿ। ਸੋ ਏਕਦਿવਸਂ ਚਿਨ੍ਤੇਸਿ – ‘‘ਅਹਂ ਮਾਤਾਪਿਤਰੋ ਉਪਟ੍ਠਹਨ੍ਤੋ ਪਬ੍ਬਜਿਤੁਂ ਨ ਲਭਾਮਿ, ਯਂਨੂਨਾਹਂ ਤੀਣਿ ਸਰਣਾਨਿ ਗਣ੍ਹਿਸ੍ਸਾਮਿ , ਏવਂ ਦੁਗ੍ਗਤਿਤੋ ਮੋਚੇਸ੍ਸਾਮੀ’’ਤਿ ਨਿਸਭਂ ਨਾਮ વਿਪਸ੍ਸਿਸ੍ਸ ਭਗવਤੋ ਅਗ੍ਗਸਾવਕਂ ਉਪਸਙ੍ਕਮਿਤ੍વਾ ਤੀਣਿ ਸਰਣਾਨਿ ਗਣ੍ਹਿ। ਸੋ ਤਾਨਿ વਸ੍ਸਸਤਸਹਸ੍ਸਾਨਿ ਰਕ੍ਖਿਤ੍વਾ ਤੇਨੇવ ਕਮ੍ਮੇਨ ਤਾવਤਿਂਸਭવਨੇ ਨਿਬ੍ਬਤ੍ਤੋ, ਤਤੋ ਪਰਂ ਦੇવਮਨੁਸ੍ਸੇਸੁ ਸਂਸਰਨ੍ਤੋ ਉਭਯਸਮ੍ਪਤ੍ਤਿਯੋ ਅਨੁਭવਿਤ੍વਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾવਤ੍ਥਿਨਗਰੇ ਮਹਾਸਾਲਕੁਲੇ ਨਿਬ੍ਬਤ੍ਤੋ વਿਞ੍ਞੁਤਂ ਪਤ੍ਤੋ ਸਤ੍ਤવਸ੍ਸਿਕੋવ ਦਾਰਕੇਹਿ ਪਰਿવੁਤੋ ਏਕਂ ਸਙ੍ਘਾਰਾਮਂ ਅਗਮਾਸਿ। ਤਤ੍ਥ ਏਕੋ ਖੀਣਾਸવਤ੍ਥੇਰੋ ਤਸ੍ਸ ਧਮ੍ਮਂ ਦੇਸੇਤ੍વਾ ਸਰਣਾਨਿ ਅਦਾਸਿ। ਸੋ ਤਾਨਿ ਗਹੇਤ੍વਾ ਪੁਬ੍ਬੇ ਅਤ੍ਤਨੋ ਰਕ੍ਖਿਤਾਨਿ ਸਰਣਾਨਿ ਸਰਿਤ੍વਾ વਿਪਸ੍ਸਨਂ વਡ੍ਢੇਤ੍વਾ ਅਰਹਤ੍ਤਂ ਪਾਪੁਣਿ। ਤਂ ਅਰਹਤ੍ਤਪ੍ਪਤ੍ਤਂ ਭਗવਾ ਉਪਸਮ੍ਪਾਦੇਸਿ।
Nagare bandhumatiyātiādikaṃ āyasmato tisaraṇagamaniyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle bandhumatīnagare kulagehe nibbattitvā andhamātāpitaro upaṭṭhāsi. So ekadivasaṃ cintesi – ‘‘ahaṃ mātāpitaro upaṭṭhahanto pabbajituṃ na labhāmi, yaṃnūnāhaṃ tīṇi saraṇāni gaṇhissāmi , evaṃ duggatito mocessāmī’’ti nisabhaṃ nāma vipassissa bhagavato aggasāvakaṃ upasaṅkamitvā tīṇi saraṇāni gaṇhi. So tāni vassasatasahassāni rakkhitvā teneva kammena tāvatiṃsabhavane nibbatto, tato paraṃ devamanussesu saṃsaranto ubhayasampattiyo anubhavitvā imasmiṃ buddhuppāde sāvatthinagare mahāsālakule nibbatto viññutaṃ patto sattavassikova dārakehi parivuto ekaṃ saṅghārāmaṃ agamāsi. Tattha eko khīṇāsavatthero tassa dhammaṃ desetvā saraṇāni adāsi. So tāni gahetvā pubbe attano rakkhitāni saraṇāni saritvā vipassanaṃ vaḍḍhetvā arahattaṃ pāpuṇi. Taṃ arahattappattaṃ bhagavā upasampādesi.
੧੦੬. ਸੋ ਅਰਹਤ੍ਤਪ੍ਪਤ੍ਤੋ ਉਪਸਮ੍ਪਨ੍ਨੋ ਹੁਤ੍વਾ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍વਾ ਸੋਮਨਸ੍ਸવਸੇਨ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਨਗਰੇ ਬਨ੍ਧੁਮਤਿਯਾਤਿਆਦਿਮਾਹ। ਤਤ੍ਥ ਮਾਤੁ ਉਪਟ੍ਠਾਕੋ ਅਹੁਨ੍ਤਿ ਅਹਂ ਮਾਤਾਪਿਤੂਨਂ ਉਪਟ੍ਠਾਕੋ ਭਰਕੋ ਬਨ੍ਧੁਮਤੀਨਗਰੇ ਅਹੋਸਿਨ੍ਤਿ ਸਮ੍ਬਨ੍ਧੋ।
106. So arahattappatto upasampanno hutvā attano pubbakammaṃ saritvā somanassavasena pubbacaritāpadānaṃ pakāsento nagare bandhumatiyātiādimāha. Tattha mātu upaṭṭhāko ahunti ahaṃ mātāpitūnaṃ upaṭṭhāko bharako bandhumatīnagare ahosinti sambandho.
੧੦੮. ਤਮਨ੍ਧਕਾਰਪਿਹਿਤਾਤਿ ਮੋਹਨ੍ਧਕਾਰੇਨ ਪਿਹਿਤਾ ਛਾਦਿਤਾ। ਤਿવਿਧਗ੍ਗੀਹਿ ਡਯ੍ਹਰੇਤਿ ਰਾਗਗ੍ਗਿਦੋਸਗ੍ਗਿਮੋਹਗ੍ਗਿਸਙ੍ਖਾਤੇਹਿ ਤੀਹਿ ਅਗ੍ਗੀਹਿ ਡਯ੍ਹਰੇ ਡਯ੍ਹਨ੍ਤਿ ਸਬ੍ਬੇ ਸਤ੍ਤਾਤਿ ਸਮ੍ਬਨ੍ਧੋ।
108.Tamandhakārapihitāti mohandhakārena pihitā chāditā. Tividhaggīhi ḍayhareti rāgaggidosaggimohaggisaṅkhātehi tīhi aggīhi ḍayhare ḍayhanti sabbe sattāti sambandho.
੧੧੪. ਅਟ੍ਠ ਹੇਤੂ ਲਭਾਮਹਨ੍ਤਿ ਅਟ੍ਠ ਕਾਰਣਾਨਿ ਸੁਖਸ੍ਸ ਪਚ੍ਚਯਭੂਤਾਨਿ ਕਾਰਣਾਨਿ ਲਭਾਮਿ ਅਹਨ੍ਤਿ ਅਤ੍ਥੋ। ਸੇਸਂ ਸੁવਿਞ੍ਞੇਯ੍ਯਮੇવਾਤਿ।
114.Aṭṭha hetū labhāmahanti aṭṭha kāraṇāni sukhassa paccayabhūtāni kāraṇāni labhāmi ahanti attho. Sesaṃ suviññeyyamevāti.
ਤਿਸਰਣਗਮਨਿਯਤ੍ਥੇਰਅਪਦਾਨવਣ੍ਣਨਾ ਸਮਤ੍ਤਾ।
Tisaraṇagamaniyattheraapadānavaṇṇanā samattā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਖੁਦ੍ਦਕਨਿਕਾਯ • Khuddakanikāya / ਅਪਦਾਨਪਾਲ਼ਿ • Apadānapāḷi / ੩. ਤਿਸਰਣਗਮਨਿਯਤ੍ਥੇਰਅਪਦਾਨਂ • 3. Tisaraṇagamaniyattheraapadānaṃ
