| Library / Tipiṭaka / திபிடக • Tipiṭaka / ஸுத்தனிபாத-அட்ட²கதா² • Suttanipāta-aṭṭhakathā |
7. திஸ்ஸமெத்தெய்யஸுத்தவண்ணனா
7. Tissametteyyasuttavaṇṇanā
821. மேது²னமனுயுத்தஸ்ஸாதி திஸ்ஸமெத்தெய்யஸுத்தங். கா உப்பத்தி? ப⁴க³வதி கிர ஸாவத்தி²யங் விஹரந்தே திஸ்ஸமெத்தெய்யா நாம த்³வே ஸஹாயா ஸாவத்தி²ங் அக³மங்ஸு. தே ஸாயன்ஹஸமயங் மஹாஜனங் ஜேதவனாபி⁴முக²ங் க³ச்ச²ந்தங் தி³ஸ்வா ‘‘குஹிங் க³ச்ச²தா²’’தி புச்சி²ங்ஸு. ததோ தேஹி ‘‘பு³த்³தோ⁴ லோகே உப்பன்னோ, ப³ஹுஜனஹிதாய த⁴ம்மங் தே³ஸேதி, தங் ஸோதுங் ஜேதவனங் க³ச்சா²மா’’தி வுத்தே ‘‘மயம்பி ஸொஸ்ஸாமா’’தி அக³மங்ஸு. தே அவஞ்ஜ²த⁴ம்மதே³ஸகஸ்ஸ ப⁴க³வதோ த⁴ம்மதே³ஸனங் ஸுத்வா பரிஸந்தரே நிஸின்னாவ சிந்தேஸுங் – ‘‘ந ஸக்கா அகா³ரமஜ்ஜே² டி²தேனாயங் த⁴ம்மோ பரிபூரேது’’ந்தி. அத² பக்கந்தே மஹாஜனே ப⁴க³வந்தங் பப்³ப³ஜ்ஜங் யாசிங்ஸு. ப⁴க³வா ‘‘இமே பப்³பா³ஜேஹீ’’தி அஞ்ஞதரங் பி⁴க்கு²ங் ஆணாபேஸி. ஸோ தே பப்³பா³ஜெத்வா தசபஞ்சககம்மட்டா²னங் த³த்வா அரஞ்ஞவாஸங் க³ந்துமாரத்³தோ⁴. மெத்தெய்யோ திஸ்ஸங் ஆஹ – ‘‘ஆவுஸோ, உபஜ்ஜா²யோ அரஞ்ஞங் க³ச்ச²தி, மயம்பி க³ச்சா²மா’’தி. திஸ்ஸோ ‘‘அலங் ஆவுஸோ, ப⁴க³வதோ த³ஸ்ஸனங் த⁴ம்மஸ்ஸவனஞ்ச அஹங் பிஹேமி, க³ச்ச² த்வ’’ந்தி வத்வா ந அக³மாஸி. மெத்தெய்யோ உபஜ்ஜா²யேன ஸஹ க³ந்த்வா அரஞ்ஞே ஸமணத⁴ம்மங் கரொந்தோ ந சிரஸ்ஸேவ அரஹத்தங் பாபுணி ஸத்³தி⁴ங் ஆசரியுபஜ்ஜா²யேஹி. திஸ்ஸஸ்ஸாபி ஜெட்ட²பா⁴தா ப்³யாதி⁴னா காலமகாஸி. ஸோ தங் ஸுத்வா அத்தனோ கா³மங் அக³மாஸி, தத்ர நங் ஞாதகா பலோபெ⁴த்வா உப்பப்³பா³ஜேஸுங். மெத்தெய்யோபி ஆசரியுபஜ்ஜா²யேஹி ஸத்³தி⁴ங் ஸாவத்தி²ங் ஆக³தோ. அத² ப⁴க³வா வுத்த²வஸ்ஸோ ஜனபத³சாரிகங் சரமானோ அனுபுப்³பே³ன தங் கா³மங் பாபுணி. தத்த² மெத்தெய்யோ ப⁴க³வந்தங் வந்தி³த்வா ‘‘இமஸ்மிங், ப⁴ந்தே, கா³மே மம கி³ஹிஸஹாயோ அத்தி², முஹுத்தங் தாவ ஆக³மேத² அனுகம்பங் உபாதா³யா’’தி வத்வா கா³மங் பவிஸித்வா தங் ப⁴க³வதோ ஸந்திகங் ஆனெத்வா ஏகமந்தங் டி²தோ தஸ்ஸத்தா²ய ஆதி³கா³தா²ய ப⁴க³வந்தங் பஞ்ஹங் புச்சி². தஸ்ஸ ப⁴க³வா ப்³யாகரொந்தோ அவஸேஸகா³தா²யோ அபா⁴ஸி. அயமஸ்ஸ ஸுத்தஸ்ஸ உப்பத்தி.
821.Methunamanuyuttassāti tissametteyyasuttaṃ. Kā uppatti? Bhagavati kira sāvatthiyaṃ viharante tissametteyyā nāma dve sahāyā sāvatthiṃ agamaṃsu. Te sāyanhasamayaṃ mahājanaṃ jetavanābhimukhaṃ gacchantaṃ disvā ‘‘kuhiṃ gacchathā’’ti pucchiṃsu. Tato tehi ‘‘buddho loke uppanno, bahujanahitāya dhammaṃ deseti, taṃ sotuṃ jetavanaṃ gacchāmā’’ti vutte ‘‘mayampi sossāmā’’ti agamaṃsu. Te avañjhadhammadesakassa bhagavato dhammadesanaṃ sutvā parisantare nisinnāva cintesuṃ – ‘‘na sakkā agāramajjhe ṭhitenāyaṃ dhammo paripūretu’’nti. Atha pakkante mahājane bhagavantaṃ pabbajjaṃ yāciṃsu. Bhagavā ‘‘ime pabbājehī’’ti aññataraṃ bhikkhuṃ āṇāpesi. So te pabbājetvā tacapañcakakammaṭṭhānaṃ datvā araññavāsaṃ gantumāraddho. Metteyyo tissaṃ āha – ‘‘āvuso, upajjhāyo araññaṃ gacchati, mayampi gacchāmā’’ti. Tisso ‘‘alaṃ āvuso, bhagavato dassanaṃ dhammassavanañca ahaṃ pihemi, gaccha tva’’nti vatvā na agamāsi. Metteyyo upajjhāyena saha gantvā araññe samaṇadhammaṃ karonto na cirasseva arahattaṃ pāpuṇi saddhiṃ ācariyupajjhāyehi. Tissassāpi jeṭṭhabhātā byādhinā kālamakāsi. So taṃ sutvā attano gāmaṃ agamāsi, tatra naṃ ñātakā palobhetvā uppabbājesuṃ. Metteyyopi ācariyupajjhāyehi saddhiṃ sāvatthiṃ āgato. Atha bhagavā vutthavasso janapadacārikaṃ caramāno anupubbena taṃ gāmaṃ pāpuṇi. Tattha metteyyo bhagavantaṃ vanditvā ‘‘imasmiṃ, bhante, gāme mama gihisahāyo atthi, muhuttaṃ tāva āgametha anukampaṃ upādāyā’’ti vatvā gāmaṃ pavisitvā taṃ bhagavato santikaṃ ānetvā ekamantaṃ ṭhito tassatthāya ādigāthāya bhagavantaṃ pañhaṃ pucchi. Tassa bhagavā byākaronto avasesagāthāyo abhāsi. Ayamassa suttassa uppatti.
தத்த² மேது²னமனுயுத்தஸ்ஸாதி மேது²னத⁴ம்மஸமாயுத்தஸ்ஸ. இதீதி ஏவமாஹ. ஆயஸ்மாதி பியவசனமேதங், திஸ்ஸோதி நாமங் தஸ்ஸ தே²ரஸ்ஸ. ஸோ ஹி திஸ்ஸோதி நாமேன. மெத்தெய்யோதி கொ³த்தங், கொ³த்தவஸேனேவ சேஸ பாகடோ அஹோஸி. தஸ்மா அட்டு²ப்பத்தியங் வுத்தங் ‘‘திஸ்ஸமெத்தெய்யா நாம த்³வே ஸஹாயா’’தி. விகா⁴தந்தி உபகா⁴தங். ப்³ரூஹீதி ஆசிக்க². மாரிஸாதி பியவசனமேதங், நிது³க்கா²தி வுத்தங் ஹோதி. ஸுத்வான தவ ஸாஸனந்தி தவ வசனங் ஸுத்வா. விவேகே ஸிக்கி²ஸ்ஸாமஸேதி ஸஹாயங் ஆரப்³ப⁴ த⁴ம்மதே³ஸனங் யாசந்தோ ப⁴ணதி. ஸோ பன ஸிக்கி²தஸிக்கோ²யேவ.
Tattha methunamanuyuttassāti methunadhammasamāyuttassa. Itīti evamāha. Āyasmāti piyavacanametaṃ, tissoti nāmaṃ tassa therassa. So hi tissoti nāmena. Metteyyoti gottaṃ, gottavaseneva cesa pākaṭo ahosi. Tasmā aṭṭhuppattiyaṃ vuttaṃ ‘‘tissametteyyā nāma dve sahāyā’’ti. Vighātanti upaghātaṃ. Brūhīti ācikkha. Mārisāti piyavacanametaṃ, nidukkhāti vuttaṃ hoti. Sutvāna tava sāsananti tava vacanaṃ sutvā. Viveke sikkhissāmaseti sahāyaṃ ārabbha dhammadesanaṃ yācanto bhaṇati. So pana sikkhitasikkhoyeva.
822. முஸ்ஸதே வாபி ஸாஸனந்தி பரியத்திபடிபத்திதோ து³வித⁴ம்பி ஸாஸனங் நஸ்ஸதி. வாபீதி பத³பூரணமத்தங். ஏதங் தஸ்மிங் அனாரியந்தி தஸ்மிங் புக்³க³லே ஏதங் அனரியங், யதி³த³ங் மிச்சா²படிபதா³.
822.Mussatevāpi sāsananti pariyattipaṭipattito duvidhampi sāsanaṃ nassati. Vāpīti padapūraṇamattaṃ. Etaṃ tasmiṃ anāriyanti tasmiṃ puggale etaṃ anariyaṃ, yadidaṃ micchāpaṭipadā.
823. ஏகோ புப்³பே³ சரித்வானாதி பப்³ப³ஜ்ஜாஸங்கா²தேன வா க³ணவொஸ்ஸக்³க³ட்டே²ன வா புப்³பே³ ஏகோ விஹரித்வா. யானங் ப⁴ந்தங்வ தங் லோகே, ஹீனமாஹு புது²ஜ்ஜனந்தி தங் விப்³ப⁴ந்தகங் புக்³க³லங் யதா² ஹத்தி²யானாதி³யானங் அத³ந்தங் விஸமங் ஆரோஹதி, ஆரோஹகம்பி ப⁴ஞ்ஜதி, பபாதேபி பபததி. ஏவங் காயது³ச்சரிதாதி³விஸமாரோஹனேன நரகாதீ³ஸு, அத்த²ப⁴ஞ்ஜனேன ஜாதிபபாதாதீ³ஸு பபதனேன ச யானங் ப⁴ந்தங்வ ஆஹு ஹீனங் புது²ஜ்ஜனஞ்ச ஆஹூதி.
823.Ekopubbe caritvānāti pabbajjāsaṅkhātena vā gaṇavossaggaṭṭhena vā pubbe eko viharitvā. Yānaṃ bhantaṃva taṃ loke, hīnamāhu puthujjananti taṃ vibbhantakaṃ puggalaṃ yathā hatthiyānādiyānaṃ adantaṃ visamaṃ ārohati, ārohakampi bhañjati, papātepi papatati. Evaṃ kāyaduccaritādivisamārohanena narakādīsu, atthabhañjanena jātipapātādīsu papatanena ca yānaṃ bhantaṃva āhu hīnaṃ puthujjanañca āhūti.
824-5. யஸோ கித்தி சாதி லாப⁴ஸக்காரோ பஸங்ஸா ச. புப்³பே³தி பப்³ப³ஜிதபா⁴வே. ஹாயதே வாபி தஸ்ஸ ஸாதி தஸ்ஸ விப்³ப⁴ந்தகஸ்ஸ ஸதோ ஸோ ச யஸோ ஸா ச கித்தி ஹாயதி. ஏதம்பி தி³ஸ்வாதி ஏதம்பி புப்³பே³ யஸகித்தீனங் பா⁴வங் பச்சா² ச ஹானிங் தி³ஸ்வா. ஸிக்கே²த² மேது²னங் விப்பஹாதவேதி திஸ்ஸோ ஸிக்கா² ஸிக்கே²த². கிங் காரணங்? மேது²னங் விப்பஹாதவே, மேது²னப்பஹானத்தா²யாதி வுத்தங் ஹோதி. யோ ஹி மேது²னங் ந விப்பஜஹதி, ஸங்கப்பேஹி…பே॰… ததா²விதோ⁴ . தத்த² பரேதோதி ஸமன்னாக³தோ. பரேஸங் நிக்³கோ⁴ஸந்தி உபஜ்ஜா²யாதீ³னங் நிந்தா³வசனங். மங்கு ஹோதீதி து³ம்மனோ ஹோதி.
824-5.Yaso kitti cāti lābhasakkāro pasaṃsā ca. Pubbeti pabbajitabhāve. Hāyate vāpi tassa sāti tassa vibbhantakassa sato so ca yaso sā ca kitti hāyati. Etampi disvāti etampi pubbe yasakittīnaṃ bhāvaṃ pacchā ca hāniṃ disvā. Sikkhetha methunaṃ vippahātaveti tisso sikkhā sikkhetha. Kiṃ kāraṇaṃ? Methunaṃ vippahātave, methunappahānatthāyāti vuttaṃ hoti. Yo hi methunaṃ na vippajahati, saṅkappehi…pe… tathāvidho. Tattha paretoti samannāgato. Paresaṃ nigghosanti upajjhāyādīnaṃ nindāvacanaṃ. Maṅku hotīti dummano hoti.
826. இதோ பரா கா³தா² பாகடஸம்ப³ந்தா⁴ ஏவ. தாஸு ஸத்தா²னீதி காயது³ச்சரிதாதீ³னி. தானி ஹி அத்தனோ பரேஸஞ்ச சே²த³னட்டே²ன ‘‘ஸத்தா²னீ’’தி வுச்சந்தி. தேஸு சாயங் விஸேஸதோ சோதி³தோ முஸாவசனஸத்தா²னேவ கரோதி – ‘‘இமினா காரணேனாஹங் விப்³ப⁴ந்தோ’’தி ப⁴ணந்தோ. தேனேவாஹ – ‘‘ஏஸ க்²வஸ்ஸ மஹாகே³தோ⁴, மோஸவஜ்ஜங் பகா³ஹதீ’’தி. தத்த² ஏஸ க்²வஸ்ஸாதி ஏஸ கோ² அஸ்ஸ. மஹாகே³தோ⁴தி மஹாப³ந்த⁴னங். கதமோதி சே? யதி³த³ங் மோஸவஜ்ஜங் பகா³ஹதி, ஸ்வாஸ்ஸ முஸாவாத³ஜ்ஜோ²கா³ஹோ மஹாகே³தோ⁴தி வேதி³தப்³போ³.
826. Ito parā gāthā pākaṭasambandhā eva. Tāsu satthānīti kāyaduccaritādīni. Tāni hi attano paresañca chedanaṭṭhena ‘‘satthānī’’ti vuccanti. Tesu cāyaṃ visesato codito musāvacanasatthāneva karoti – ‘‘iminā kāraṇenāhaṃ vibbhanto’’ti bhaṇanto. Tenevāha – ‘‘esa khvassa mahāgedho, mosavajjaṃ pagāhatī’’ti. Tattha esa khvassāti esa kho assa. Mahāgedhoti mahābandhanaṃ. Katamoti ce? Yadidaṃ mosavajjaṃ pagāhati, svāssa musāvādajjhogāho mahāgedhoti veditabbo.
827. மந்தோ³வ பரிகிஸ்ஸதீதி பாணவதா⁴தீ³னி கரொந்தோ ததோனிதா³னஞ்ச து³க்க²மனுபொ⁴ந்தோ போ⁴க³பரியேஸனரக்க²னானி ச கரொந்தோ மோமூஹோ விய பரிகிலிஸ்ஸதி.
827.Mandova parikissatīti pāṇavadhādīni karonto tatonidānañca dukkhamanubhonto bhogapariyesanarakkhanāni ca karonto momūho viya parikilissati.
828-9. ‘‘ஏதமாதீ³னவங் ஞத்வா, முனி புப்³பா³பரே இதா⁴’’தி ஏதங் ‘‘யஸோ கித்தி ச யா புப்³பே³, ஹாயதேவாபி தஸ்ஸ ஸா’’தி இதோ பபு⁴தி வுத்தே புப்³பா³பரே இத⁴ இமஸ்மிங் ஸாஸனே புப்³ப³தோ அபரே ஸமணபா⁴வதோ விப்³ப⁴ந்தகபா⁴வே ஆதீ³னவங் முனி ஞத்வா. ஏதத³ரியானமுத்தமந்தி யதி³த³ங் விவேகசரியா , ஏதங் பு³த்³தா⁴தீ³னங் அரியானங் உத்தமங், தஸ்மா விவேகஞ்ஞேவ ஸிக்கே²தா²தி அதி⁴ப்பாயோ. ந தேன ஸெட்டோ² மஞ்ஞேதா²தி தேன ச விவேகேன ந அத்தானங் ‘‘ஸெட்டோ² அஹ’’ந்தி மஞ்ஞெய்ய, தேன த²த்³தோ⁴ ந ப⁴வெய்யாதி வுத்தங் ஹோதி.
828-9.‘‘Etamādīnavaṃ ñatvā, muni pubbāpare idhā’’ti etaṃ ‘‘yaso kitti ca yā pubbe, hāyatevāpi tassa sā’’ti ito pabhuti vutte pubbāpare idha imasmiṃ sāsane pubbato apare samaṇabhāvato vibbhantakabhāve ādīnavaṃ muni ñatvā. Etadariyānamuttamanti yadidaṃ vivekacariyā , etaṃ buddhādīnaṃ ariyānaṃ uttamaṃ, tasmā vivekaññeva sikkhethāti adhippāyo. Na tena seṭṭho maññethāti tena ca vivekena na attānaṃ ‘‘seṭṭho aha’’nti maññeyya, tena thaddho na bhaveyyāti vuttaṃ hoti.
830. ரித்தஸ்ஸாதி விவித்தஸ்ஸ காயது³ச்சரிதாதீ³ஹி விரஹிதஸ்ஸ. ஓக⁴திண்ணஸ்ஸ பிஹயந்தி, காமேஸு க³தி⁴தா பஜாதி வத்து²காமேஸு லக்³கா³ ஸத்தா தஸ்ஸ சதுரோக⁴திண்ணஸ்ஸ பிஹயந்தி இணாயிகா விய ஆணண்யஸ்ஸாதி அரஹத்தனிகூடேன தே³ஸனங் நிட்டா²பேஸி. தே³ஸனாபரியோஸானே திஸ்ஸோ ஸோதாபத்திப²லங் பத்வா பச்சா² பப்³ப³ஜித்வா அரஹத்தங் ஸச்சா²காஸீதி.
830.Rittassāti vivittassa kāyaduccaritādīhi virahitassa. Oghatiṇṇassa pihayanti, kāmesu gadhitā pajāti vatthukāmesu laggā sattā tassa caturoghatiṇṇassa pihayanti iṇāyikā viya āṇaṇyassāti arahattanikūṭena desanaṃ niṭṭhāpesi. Desanāpariyosāne tisso sotāpattiphalaṃ patvā pacchā pabbajitvā arahattaṃ sacchākāsīti.
பரமத்த²ஜோதிகாய கு²த்³த³க-அட்ட²கதா²ய
Paramatthajotikāya khuddaka-aṭṭhakathāya
ஸுத்தனிபாத-அட்ட²கதா²ய திஸ்ஸமெத்தெய்யஸுத்தவண்ணனா நிட்டி²தா.
Suttanipāta-aṭṭhakathāya tissametteyyasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஸுத்தனிபாதபாளி • Suttanipātapāḷi / 7. திஸ்ஸமெத்தெய்யஸுத்தங் • 7. Tissametteyyasuttaṃ
