| Library / Tipiṭaka / திபிடக • Tipiṭaka / தே²ரீகா³தா²-அட்ட²கதா² • Therīgāthā-aṭṭhakathā |
4. திஸ்ஸாதே²ரீகா³தா²வண்ணனா
4. Tissātherīgāthāvaṇṇanā
திஸ்ஸே ஸிக்க²ஸ்ஸு ஸிக்கா²யாதி திஸ்ஸாய ஸிக்க²மானாய கா³தா². அயம்பி புரிமபு³த்³தே⁴ஸு கதாதி⁴காரா தத்த² தத்த² ப⁴வே விவட்டூபனிஸ்ஸயங் குஸலங் உபசினித்வா ஸம்ப⁴தகுஸலபச்சயா இமஸ்மிங் பு³த்³து⁴ப்பாதே³ கபிலவத்து²ஸ்மிங் ஸக்யராஜகுலே நிப்³ப³த்தித்வா வயப்பத்தா போ³தி⁴ஸத்தஸ்ஸ ஓரோத⁴பூ⁴தா பச்சா² மஹாபஜாபதிகோ³தமியா ஸத்³தி⁴ங் நிக்க²மித்வா பப்³ப³ஜித்வா விபஸ்ஸனாய கம்மங் கரோதி. தஸ்ஸா ஸத்தா² ஹெட்டா² வுத்தனயேனேவ ஓபா⁴ஸங் விஸ்ஸஜ்ஜெத்வா –
Tisse sikkhassu sikkhāyāti tissāya sikkhamānāya gāthā. Ayampi purimabuddhesu katādhikārā tattha tattha bhave vivaṭṭūpanissayaṃ kusalaṃ upacinitvā sambhatakusalapaccayā imasmiṃ buddhuppāde kapilavatthusmiṃ sakyarājakule nibbattitvā vayappattā bodhisattassa orodhabhūtā pacchā mahāpajāpatigotamiyā saddhiṃ nikkhamitvā pabbajitvā vipassanāya kammaṃ karoti. Tassā satthā heṭṭhā vuttanayeneva obhāsaṃ vissajjetvā –
4.
4.
‘‘திஸ்ஸே ஸிக்க²ஸ்ஸு ஸிக்கா²ய, மா தங் யோகா³ உபச்சகு³ங்;
‘‘Tisse sikkhassu sikkhāya, mā taṃ yogā upaccaguṃ;
ஸப்³ப³யோக³விஸங்யுத்தா, சர லோகே அனாஸவா’’தி. – கா³த²ங் அபா⁴ஸி;
Sabbayogavisaṃyuttā, cara loke anāsavā’’ti. – gāthaṃ abhāsi;
தத்த² திஸ்ஸேதி தஸ்ஸா ஆலபனங். ஸிக்க²ஸ்ஸு ஸிக்கா²யாதி அதி⁴ஸீலஸிக்கா²தி³காய திவிதா⁴ய ஸிக்கா²ய ஸிக்க², மக்³க³ஸம்பயுத்தா திஸ்ஸோ ஸிக்கா²யோ ஸம்பாதே³ஹீதி அத்தோ². இதா³னி தாஸங் ஸம்பாத³னே காரணமாஹ ‘‘மா தங் யோகா³ உபச்சகு³’’ந்தி மனுஸ்ஸத்தங், இந்த்³ரியாவேகல்லங், பு³த்³து⁴ப்பாதோ³, ஸத்³தா⁴படிலாபோ⁴தி இமே யோகா³ ஸமயா து³ல்லப⁴க்க²ணா தங் மா அதிக்கமுங். காமயோகா³த³யோ ஏவ வா சத்தாரோ யோகா³ தங் மா உபச்சகு³ங் மா அபி⁴ப⁴வெய்யுங். ஸப்³ப³யோக³விஸங்யுத்தாதி ஸப்³பே³ஹி காமயோகா³தீ³ஹி யோகே³ஹி விமுத்தா ததோ ஏவ அனாஸவா ஹுத்வா லோகே சர, தி³ட்ட²ஸுக²விஹாரேன விஹராஹீதி அத்தோ².
Tattha tisseti tassā ālapanaṃ. Sikkhassu sikkhāyāti adhisīlasikkhādikāya tividhāya sikkhāya sikkha, maggasampayuttā tisso sikkhāyo sampādehīti attho. Idāni tāsaṃ sampādane kāraṇamāha ‘‘mā taṃ yogā upaccagu’’nti manussattaṃ, indriyāvekallaṃ, buddhuppādo, saddhāpaṭilābhoti ime yogā samayā dullabhakkhaṇā taṃ mā atikkamuṃ. Kāmayogādayo eva vā cattāro yogā taṃ mā upaccaguṃ mā abhibhaveyyuṃ. Sabbayogavisaṃyuttāti sabbehi kāmayogādīhi yogehi vimuttā tato eva anāsavā hutvā loke cara, diṭṭhasukhavihārena viharāhīti attho.
ஸா தங் கா³த²ங் ஸுத்வா விபஸ்ஸனங் வட்³டெ⁴த்வா அரஹத்தங் பாபுணீதி ஆதி³னயோ ஹெட்டா² வுத்தனயேனேவ வேதி³தப்³போ³.
Sā taṃ gāthaṃ sutvā vipassanaṃ vaḍḍhetvā arahattaṃ pāpuṇīti ādinayo heṭṭhā vuttanayeneva veditabbo.
திஸ்ஸாதே²ரீகா³தா²வண்ணனா நிட்டி²தா.
Tissātherīgāthāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / தே²ரீகா³தா²பாளி • Therīgāthāpāḷi / 4. திஸ்ஸாதே²ரீகா³தா² • 4. Tissātherīgāthā
