| Library / Tipiṭaka / તિપિટક • Tipiṭaka / ચૂળવગ્ગ-અટ્ઠકથા • Cūḷavagga-aṭṭhakathā |
તિવિધસલાકગ્ગાહકથા
Tividhasalākaggāhakathā
૨૩૫. સઞ્ઞત્તિયાતિ સઞ્ઞાપનત્થાય. ગૂળ્હકન્તિઆદીસુ અલજ્જુસ્સન્નાય પરિસાય ગૂળ્હકો સલાકગ્ગાહો કાતબ્બો, લજ્જુસ્સન્નાય પરિસાય વિવટકો, બાલુસ્સન્નાય સકણ્ણજપ્પકો. વણ્ણાવણ્ણાયો કત્વાતિ ધમ્મવાદીનઞ્ચ અધમ્મવાદીનઞ્ચ સલાકાયો નિમિત્તસઞ્ઞં આરોપેત્વા અઞ્ઞમઞ્ઞં વિસભાગા કાતબ્બા. તતો તા સબ્બાપિ ચીવરભોગે કત્વા વુત્તનયેન ગાહેતબ્બા. દુગ્ગહોતિ પચ્ચુક્કડ્ઢિતબ્બન્તિ ‘‘દુગ્ગહિતા સલાકાયો’’તિ વત્વા પુન ગહેત્વા યાવતતિયં ગાહેતબ્બા. સુગ્ગહોતિ સાવેતબ્બન્તિ એકસ્મિમ્પિ ધમ્મવાદિમ્હિ અતિરેકજાતે ‘‘સુગ્ગહિતા સલાકાયો’’તિ સાવેતબ્બં. યથા ચ તે ધમ્મવાદિનો વદન્તિ તથા તં અધિકરણં વૂપસમેતબ્બન્તિ. અથ યાવતતિયમ્પિ અધમ્મવાદિનોવ બહુતરા હોન્તિ, અજ્જ ‘‘અકાલો, સ્વે જાનિસ્સામા’’તિ વુટ્ઠહિત્વા અલજ્જીનં પક્ખભેદત્થાય ધમ્મવાદિપક્ખં પરિયેસિત્વા પુનદિવસે સલાકગ્ગાહો કાતબ્બો. અયં ગૂળ્હકો સલાકગ્ગાહો.
235.Saññattiyāti saññāpanatthāya. Gūḷhakantiādīsu alajjussannāya parisāya gūḷhako salākaggāho kātabbo, lajjussannāya parisāya vivaṭako, bālussannāya sakaṇṇajappako. Vaṇṇāvaṇṇāyo katvāti dhammavādīnañca adhammavādīnañca salākāyo nimittasaññaṃ āropetvā aññamaññaṃ visabhāgā kātabbā. Tato tā sabbāpi cīvarabhoge katvā vuttanayena gāhetabbā. Duggahoti paccukkaḍḍhitabbanti ‘‘duggahitā salākāyo’’ti vatvā puna gahetvā yāvatatiyaṃ gāhetabbā. Suggahoti sāvetabbanti ekasmimpi dhammavādimhi atirekajāte ‘‘suggahitā salākāyo’’ti sāvetabbaṃ. Yathā ca te dhammavādino vadanti tathā taṃ adhikaraṇaṃ vūpasametabbanti. Atha yāvatatiyampi adhammavādinova bahutarā honti, ajja ‘‘akālo, sve jānissāmā’’ti vuṭṭhahitvā alajjīnaṃ pakkhabhedatthāya dhammavādipakkhaṃ pariyesitvā punadivase salākaggāho kātabbo. Ayaṃ gūḷhako salākaggāho.
સકણ્ણજપ્પકે પન ગહિતે વત્તબ્બોતિ એત્થ સચે સઙ્ઘત્થેરો અધમ્મવાદિસલાકં ગણ્હાતિ, સો એવં અવબોધેતબ્બો – ‘‘ભન્તે, તુમ્હે મહલ્લકા વયોઅનુપ્પત્તા, તુમ્હાકં એતં ન યુત્તં, અયં પન ધમ્મવાદિસલાકા’’તિ અસ્સ ઇતરા સલાકા દસ્સેતબ્બા. સચે સો તં ગણ્હાતિ, દાતબ્બા. અથ નેવ અવબુજ્ઝતિ, તતો ‘‘મા કસ્સચિ આરોચેહી’’તિ વત્તબ્બો. સેસં વુત્તનયમેવ. વિવટકો વિવટત્થોયેવ.
Sakaṇṇajappake pana gahite vattabboti ettha sace saṅghatthero adhammavādisalākaṃ gaṇhāti, so evaṃ avabodhetabbo – ‘‘bhante, tumhe mahallakā vayoanuppattā, tumhākaṃ etaṃ na yuttaṃ, ayaṃ pana dhammavādisalākā’’ti assa itarā salākā dassetabbā. Sace so taṃ gaṇhāti, dātabbā. Atha neva avabujjhati, tato ‘‘mā kassaci ārocehī’’ti vattabbo. Sesaṃ vuttanayameva. Vivaṭako vivaṭatthoyeva.
તિવિધસલાકગ્ગાહકથા નિટ્ઠિતા.
Tividhasalākaggāhakathā niṭṭhitā.
Related texts:
તિપિટક (મૂલ) • Tipiṭaka (Mūla) / વિનયપિટક • Vinayapiṭaka / ચૂળવગ્ગપાળિ • Cūḷavaggapāḷi / તિવિધસલાકગ્ગાહો • Tividhasalākaggāho
ટીકા • Tīkā / વિનયપિટક (ટીકા) • Vinayapiṭaka (ṭīkā) / વિમતિવિનોદની-ટીકા • Vimativinodanī-ṭīkā / અધિકરણવૂપસમનસમથકથાદિવણ્ણના • Adhikaraṇavūpasamanasamathakathādivaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / પાચિત્યાદિયોજનાપાળિ • Pācityādiyojanāpāḷi / તિવિધસલાકગ્ગાહકથા • Tividhasalākaggāhakathā
