| Library / Tipiṭaka / તિપિટક • Tipiṭaka / કઙ્ખાવિતરણી-અભિનવ-ટીકા • Kaṅkhāvitaraṇī-abhinava-ṭīkā |
૬. તૂલોનદ્ધસિક્ખાપદવણ્ણના
6. Tūlonaddhasikkhāpadavaṇṇanā
ચિમિલિકં પત્થરિત્વા તૂલં પક્ખિપિત્વાતિ મઞ્ચપીઠાનં ઉપરિ ચિમિલિકં પત્થરિત્વા તસ્સ ઉપરિ તૂલં પક્ખિપિત્વાતિ અત્થો. ઉપરિ ચિમિલિકાયાતિ ઉપરિમભાગે ચિમિલિકાય.
Cimilikaṃpattharitvā tūlaṃ pakkhipitvāti mañcapīṭhānaṃ upari cimilikaṃ pattharitvā tassa upari tūlaṃ pakkhipitvāti attho. Upari cimilikāyāti uparimabhāge cimilikāya.
સીસપ્પમાણન્તિ (ચૂળવ॰ અટ્ઠ॰ ૨૯૭; સારત્થ॰ ટી॰ ચૂળવગ્ગ ૩.૨૯૭) યત્થ ગલવાટકતો પટ્ઠાય સબ્બસીસં ઉપદહન્તિ, તં સીસપ્પમાણં. તઞ્ચ ઉક્કટ્ઠપરિચ્છેદતો તિરિયં મુટ્ઠિરતનં હોતિ, દીઘતો દ્વિરતનન્તિ દસ્સેતું ‘‘યસ્સ વિત્થારતો તીસુ કોણેસૂ’’તિઆદિમાહ. દ્વિન્નં અન્તરં વિદત્થિ ચતુરઙ્ગુલં હોતીતિ દ્વિન્નં કોણાનં અન્તરં મિનિયમાનં વિદત્થિ ચેવ ચતુરઙ્ગુલઞ્ચ હોતિ. મજ્ઝે મુટ્ઠિરતનન્તિ બિબ્બોહનસ્સ મજ્ઝં તિરિયતો મુટ્ઠિરતનપ્પમાણં હોતિ. અયઞ્હિ સીસપ્પમાણસ્સ ઉક્કટ્ઠપરિચ્છેદો. તતો ઉદ્ધં ન વટ્ટતિ, હેટ્ઠા વટ્ટતિ. અગિલાનસ્સ સીસૂપધાનઞ્ચ પાદૂપધાનઞ્ચાતિ દ્વયમેવ વટ્ટતિ. ગિલાનસ્સ બિબ્બોહનાનિ સન્થરિત્વા ઉપરિ પચ્ચત્થરણં દત્વા નિપજ્જિતુમ્પિ વટ્ટતિ.
Sīsappamāṇanti (cūḷava. aṭṭha. 297; sārattha. ṭī. cūḷavagga 3.297) yattha galavāṭakato paṭṭhāya sabbasīsaṃ upadahanti, taṃ sīsappamāṇaṃ. Tañca ukkaṭṭhaparicchedato tiriyaṃ muṭṭhiratanaṃ hoti, dīghato dviratananti dassetuṃ ‘‘yassa vitthārato tīsu koṇesū’’tiādimāha. Dvinnaṃ antaraṃ vidatthi caturaṅgulaṃ hotīti dvinnaṃ koṇānaṃ antaraṃ miniyamānaṃ vidatthi ceva caturaṅgulañca hoti. Majjhe muṭṭhiratananti bibbohanassa majjhaṃ tiriyato muṭṭhiratanappamāṇaṃ hoti. Ayañhi sīsappamāṇassa ukkaṭṭhaparicchedo. Tato uddhaṃ na vaṭṭati, heṭṭhā vaṭṭati. Agilānassa sīsūpadhānañca pādūpadhānañcāti dvayameva vaṭṭati. Gilānassa bibbohanāni santharitvā upari paccattharaṇaṃ datvā nipajjitumpi vaṭṭati.
તૂલોનદ્ધસિક્ખાપદવણ્ણના નિટ્ઠિતા.
Tūlonaddhasikkhāpadavaṇṇanā niṭṭhitā.
