| Library / Tipiṭaka / તિપિટક • Tipiṭaka / દ્વેમાતિકાપાળિ • Dvemātikāpāḷi |
૪. તુવટ્ટવગ્ગો
4. Tuvaṭṭavaggo
૧. એકમઞ્ચતુવટ્ટનસિક્ખાપદવણ્ણના
1. Ekamañcatuvaṭṭanasikkhāpadavaṇṇanā
તુવટ્ટવગ્ગસ્સ પઠમે તુવટ્ટેય્યુન્તિ નિપજ્જેય્યું. તાસુ પન એકાય વા નિપન્નાય અપરા નિપજ્જતુ, દ્વેપિ વા સહેવ નિપજ્જન્તુ, દ્વિન્નમ્પિ પાચિત્તિયં.
Tuvaṭṭavaggassa paṭhame tuvaṭṭeyyunti nipajjeyyuṃ. Tāsu pana ekāya vā nipannāya aparā nipajjatu, dvepi vā saheva nipajjantu, dvinnampi pācittiyaṃ.
સાવત્થિયં સમ્બહુલા ભિક્ખુનિયો આરબ્ભ દ્વિન્નં એકમઞ્ચે તુવટ્ટનવત્થુસ્મિં પઞ્ઞત્તં, સચે પન એકાય નિપન્નાય એકા નિસીદતિ, ઉભો વા નિસીદન્તિ, તાસં, ઉમ્મત્તિકાદીનઞ્ચ અનાપત્તિ. એકમઞ્ચતા, દ્વિન્નં તુવટ્ટનન્તિ ઇમાનેત્થ દ્વે અઙ્ગાનિ. સમુટ્ઠાનાદીનિ એળકલોમસદિસાનીતિ.
Sāvatthiyaṃ sambahulā bhikkhuniyo ārabbha dvinnaṃ ekamañce tuvaṭṭanavatthusmiṃ paññattaṃ, sace pana ekāya nipannāya ekā nisīdati, ubho vā nisīdanti, tāsaṃ, ummattikādīnañca anāpatti. Ekamañcatā, dvinnaṃ tuvaṭṭananti imānettha dve aṅgāni. Samuṭṭhānādīni eḷakalomasadisānīti.
એકમઞ્ચતુવટ્ટનસિક્ખાપદવણ્ણના નિટ્ઠિતા.
Ekamañcatuvaṭṭanasikkhāpadavaṇṇanā niṭṭhitā.
૨. એકત્થરણતુવટ્ટનસિક્ખાપદવણ્ણના
2. Ekattharaṇatuvaṭṭanasikkhāpadavaṇṇanā
દુતિયે એકં અત્થરણઞ્ચેવ પાવુરણઞ્ચ એતાસન્તિ એકત્થરણપાવુરણા, સંહારિમાનં પાવારત્થરણકટસારકાદીનં એકં અન્તં અત્થરિત્વા એકં પારુપિત્વા તુવટ્ટેન્તીનમેતં અધિવચનં. પાચિત્તિયન્તિ તંયેવ અત્થરિત્વા તં પારુપિત્વા નિપજ્જન્તીનં પાચિત્તિયં.
Dutiye ekaṃ attharaṇañceva pāvuraṇañca etāsanti ekattharaṇapāvuraṇā, saṃhārimānaṃ pāvārattharaṇakaṭasārakādīnaṃ ekaṃ antaṃ attharitvā ekaṃ pārupitvā tuvaṭṭentīnametaṃ adhivacanaṃ. Pācittiyanti taṃyeva attharitvā taṃ pārupitvā nipajjantīnaṃ pācittiyaṃ.
સાવત્થિયં સમ્બહુલા ભિક્ખુનિયો આરબ્ભ એવં તુવટ્ટનવત્થુસ્મિં પઞ્ઞત્તં, તિકપાચિત્તિયં, અત્થરણે વા પાવુરણે વા એકસ્મિં દુક્કટં, નાનત્થરણપાવુરણે દ્વિકદુક્કટં. તસ્મિં પન નાનત્થરણપાવુરણસઞ્ઞાય, વવત્થાનં દસ્સેત્વા નિપજ્જન્તિયા, ઉમ્મત્તિકાદીનઞ્ચ અનાપત્તિ. સેસં પઠમસદિસમેવાતિ.
Sāvatthiyaṃ sambahulā bhikkhuniyo ārabbha evaṃ tuvaṭṭanavatthusmiṃ paññattaṃ, tikapācittiyaṃ, attharaṇe vā pāvuraṇe vā ekasmiṃ dukkaṭaṃ, nānattharaṇapāvuraṇe dvikadukkaṭaṃ. Tasmiṃ pana nānattharaṇapāvuraṇasaññāya, vavatthānaṃ dassetvā nipajjantiyā, ummattikādīnañca anāpatti. Sesaṃ paṭhamasadisamevāti.
એકત્થરણતુવટ્ટનસિક્ખાપદવણ્ણના નિટ્ઠિતા.
Ekattharaṇatuvaṭṭanasikkhāpadavaṇṇanā niṭṭhitā.
૩. અફાસુકરણસિક્ખાપદવણ્ણના
3. Aphāsukaraṇasikkhāpadavaṇṇanā
તતિયે અફાસુન્તિ ‘‘ઇમિના ઇમિસ્સા અફાસુ ભવિસ્સતી’’તિ અનાપુચ્છા પુરતો ચઙ્કમનટ્ઠાનનિસ્સજ્જાદયો વા ઉદ્દિસઉદ્દિસાપનપરિપુચ્છનસજ્ઝાયં વા કરોન્તિયા ચઙ્કમને નિવત્તનગણનાય, ઠાનાદીસુ પયોગગણનાય, ઉદ્દેસાદીસુ પદગણનાય પાચિત્તિયં.
Tatiye aphāsunti ‘‘iminā imissā aphāsu bhavissatī’’ti anāpucchā purato caṅkamanaṭṭhānanissajjādayo vā uddisauddisāpanaparipucchanasajjhāyaṃ vā karontiyā caṅkamane nivattanagaṇanāya, ṭhānādīsu payogagaṇanāya, uddesādīsu padagaṇanāya pācittiyaṃ.
સાવત્થિયં થુલ્લનન્દં આરબ્ભ સઞ્ચિચ્ચ અફાસુકરણવત્થુસ્મિં પઞ્ઞત્તં, તિકપાચિત્તિયં, અનુપસમ્પન્નાય તિકદુક્કટં, ન અફાસુકામતાય, આપુચ્છા પુરતો ચઙ્કમનાદીનિ કરોન્તિયા, ઉમ્મત્તિકાદીનઞ્ચ અનાપત્તિ. ઉપસમ્પન્નતા, અફાસુકામતા, અફાસુકરણં, અનાપુચ્છનન્તિ ઇમાનેત્થ ચત્તારિ અઙ્ગાનિ. સમુટ્ઠાનાદીનિ અદિન્નાદાનસદિસાનિ, ઇદં પન કિરિયાકિરિયં, દુક્ખવેદનન્તિ.
Sāvatthiyaṃ thullanandaṃ ārabbha sañcicca aphāsukaraṇavatthusmiṃ paññattaṃ, tikapācittiyaṃ, anupasampannāya tikadukkaṭaṃ, na aphāsukāmatāya, āpucchā purato caṅkamanādīni karontiyā, ummattikādīnañca anāpatti. Upasampannatā, aphāsukāmatā, aphāsukaraṇaṃ, anāpucchananti imānettha cattāri aṅgāni. Samuṭṭhānādīni adinnādānasadisāni, idaṃ pana kiriyākiriyaṃ, dukkhavedananti.
અફાસુકરણસિક્ખાપદવણ્ણના નિટ્ઠિતા.
Aphāsukaraṇasikkhāpadavaṇṇanā niṭṭhitā.
૪. નઉપટ્ઠાપનસિક્ખાપદવણ્ણના
4. Naupaṭṭhāpanasikkhāpadavaṇṇanā
ચતુત્થે દુક્ખિતન્તિ ગિલાનં. સહજીવિનિન્તિ સદ્ધિવિહારિનિં. નેવ ઉપટ્ઠહેય્યાતિ તસ્સા ઉપટ્ઠાનં સયં વા અકરોન્તિયા, પરેહિ વા અકારેન્તિયા ધુરં નિક્ખિત્તમત્તે પાચિત્તિયં.
Catutthe dukkhitanti gilānaṃ. Sahajīvininti saddhivihāriniṃ. Neva upaṭṭhaheyyāti tassā upaṭṭhānaṃ sayaṃ vā akarontiyā, parehi vā akārentiyā dhuraṃ nikkhittamatte pācittiyaṃ.
સાવત્થિયં થુલ્લનન્દં આરબ્ભ દુક્ખિતં સહજીવિનિં અનુપટ્ઠાનવત્થુસ્મિં પઞ્ઞત્તં, અન્તેવાસિનિયા વા અનુપસમ્પન્નાય વા દુક્કટં, દસસુ અઞ્ઞતરન્તરાયે સતિ પરિયેસિત્વા અલભન્તિયા, ગિલાનાય, આપદાસુ, ઉમ્મત્તિકાદીનઞ્ચ અનાપત્તિ. ગિલાનતા, સદ્ધિવિહારિતા, અનુઞ્ઞાતકારણાભાવો, ઉપટ્ઠાને ધુરનિક્ખેપોતિ ઇમાનેત્થ ચત્તારિ અઙ્ગાનિ. સમુટ્ઠાનાદીનિ સમનુભાસનસદિસાનીતિ.
Sāvatthiyaṃ thullanandaṃ ārabbha dukkhitaṃ sahajīviniṃ anupaṭṭhānavatthusmiṃ paññattaṃ, antevāsiniyā vā anupasampannāya vā dukkaṭaṃ, dasasu aññatarantarāye sati pariyesitvā alabhantiyā, gilānāya, āpadāsu, ummattikādīnañca anāpatti. Gilānatā, saddhivihāritā, anuññātakāraṇābhāvo, upaṭṭhāne dhuranikkhepoti imānettha cattāri aṅgāni. Samuṭṭhānādīni samanubhāsanasadisānīti.
નઉપટ્ઠાપનસિક્ખાપદવણ્ણના નિટ્ઠિતા.
Naupaṭṭhāpanasikkhāpadavaṇṇanā niṭṭhitā.
૫. નિક્કડ્ઢનસિક્ખાપદવણ્ણના
5. Nikkaḍḍhanasikkhāpadavaṇṇanā
પઞ્ચમે ઉપસ્સયં દત્વાતિ સકવાટબદ્ધં અત્તનો પુગ્ગલિકવિહારં દત્વા. નિક્કડ્ઢેય્યાતિ બહૂનિપિ દ્વારાનિ એકપ્પયોગેન નિક્કડ્ઢેન્તિયા એકા આપત્તિ, નાનાપયોગેહિ પયોગગણનાય આપત્તિયો, આણત્તિયમ્પિ એસેવ નયો. સચે પન ‘‘ઇમઞ્ચિમઞ્ચ દ્વારં અતિક્કામેહી’’તિ આણાપેતિ, એકાય આણત્તિયા એવ દ્વારગણનાય આપત્તિયો.
Pañcame upassayaṃ datvāti sakavāṭabaddhaṃ attano puggalikavihāraṃ datvā. Nikkaḍḍheyyāti bahūnipi dvārāni ekappayogena nikkaḍḍhentiyā ekā āpatti, nānāpayogehi payogagaṇanāya āpattiyo, āṇattiyampi eseva nayo. Sace pana ‘‘imañcimañca dvāraṃ atikkāmehī’’ti āṇāpeti, ekāya āṇattiyā eva dvāragaṇanāya āpattiyo.
સાવત્થિયં થુલ્લનન્દં આરબ્ભ એતાદિસે વત્થુસ્મિં પઞ્ઞત્તં, તિકપાચિત્તિયં, અકવાટબદ્ધતો દુક્કટં, અનુપસમ્પન્નાય તિકદુક્કટં, સકવાટબદ્ધતો વા અકવાટબદ્ધતો વા ઉભિન્નમ્પિ પરિક્ખારનિક્કડ્ઢને દુક્કટમેવ, સેસં સઙ્ઘિકવિહારનિક્કડ્ઢનસિક્ખાપદે વુત્તનયમેવાતિ.
Sāvatthiyaṃ thullanandaṃ ārabbha etādise vatthusmiṃ paññattaṃ, tikapācittiyaṃ, akavāṭabaddhato dukkaṭaṃ, anupasampannāya tikadukkaṭaṃ, sakavāṭabaddhato vā akavāṭabaddhato vā ubhinnampi parikkhāranikkaḍḍhane dukkaṭameva, sesaṃ saṅghikavihāranikkaḍḍhanasikkhāpade vuttanayamevāti.
નિક્કડ્ઢનસિક્ખાપદવણ્ણના નિટ્ઠિતા.
Nikkaḍḍhanasikkhāpadavaṇṇanā niṭṭhitā.
૬. સંસટ્ઠસિક્ખાપદવણ્ણના
6. Saṃsaṭṭhasikkhāpadavaṇṇanā
છટ્ઠં ઉત્તાનપદત્થમેવ. સાવત્થિયં ચણ્ડકાળિં આરબ્ભ સંસટ્ઠવિહારવત્થુસ્મિં પઞ્ઞત્તં, સેસમેત્થ પઠમઅરિટ્ઠસિક્ખાપદે વુત્તવિનિચ્છયસદિસમેવાતિ.
Chaṭṭhaṃ uttānapadatthameva. Sāvatthiyaṃ caṇḍakāḷiṃ ārabbha saṃsaṭṭhavihāravatthusmiṃ paññattaṃ, sesamettha paṭhamaariṭṭhasikkhāpade vuttavinicchayasadisamevāti.
સંસટ્ઠસિક્ખાપદવણ્ણના નિટ્ઠિતા.
Saṃsaṭṭhasikkhāpadavaṇṇanā niṭṭhitā.
૭. અન્તોરટ્ઠસિક્ખાપદવણ્ણના
7. Antoraṭṭhasikkhāpadavaṇṇanā
સત્તમે અન્તોરટ્ઠેતિ યસ્સ વિજિતે વિહરતિ, તસ્સ રટ્ઠે. અસત્થિકા ચારિકન્તિ વિના સત્થેન ગચ્છન્તિયા, ગામન્તરગણનાય, અગામકે અરઞ્ઞે અદ્ધયોજનગણનાય પાચિત્તિયં.
Sattame antoraṭṭheti yassa vijite viharati, tassa raṭṭhe. Asatthikā cārikanti vinā satthena gacchantiyā, gāmantaragaṇanāya, agāmake araññe addhayojanagaṇanāya pācittiyaṃ.
સાવત્થિયં સમ્બહુલા ભિક્ખુનિયો આરબ્ભ વુત્તનયેનેવ દેસચારિકં પક્કમનવત્થુસ્મિં પઞ્ઞત્તં. સત્થેન સહ ગચ્છન્તિયા, ખેમે અપ્પટિભયે, આપદાસુ, ઉમ્મત્તિકાદીનઞ્ચ અનાપત્તિ. અન્તોરટ્ઠતા, અખેમતા, અનુઞ્ઞાતકારણાભાવો, ચારિકં પક્કમનન્તિ ઇમાનેત્થ ચત્તારિ અઙ્ગાનિ. સમુટ્ઠાનાદીનિ એળકલોમસદિસાનીતિ.
Sāvatthiyaṃ sambahulā bhikkhuniyo ārabbha vuttanayeneva desacārikaṃ pakkamanavatthusmiṃ paññattaṃ. Satthena saha gacchantiyā, kheme appaṭibhaye, āpadāsu, ummattikādīnañca anāpatti. Antoraṭṭhatā, akhematā, anuññātakāraṇābhāvo, cārikaṃ pakkamananti imānettha cattāri aṅgāni. Samuṭṭhānādīni eḷakalomasadisānīti.
અન્તોરટ્ઠસિક્ખાપદવણ્ણના નિટ્ઠિતા.
Antoraṭṭhasikkhāpadavaṇṇanā niṭṭhitā.
૮. તિરોરટ્ઠસિક્ખાપદવણ્ણના
8. Tiroraṭṭhasikkhāpadavaṇṇanā
અટ્ઠમે તિરોરટ્ઠેતિ યસ્સ વિજિતે વિહરતિ, તં ઠપેત્વા અઞ્ઞસ્સ રટ્ઠે. સેસં સત્તમે વુત્તનયેનેવ વેદિતબ્બં, નગરં પનેત્થ રાજગહન્તિ.
Aṭṭhame tiroraṭṭheti yassa vijite viharati, taṃ ṭhapetvā aññassa raṭṭhe. Sesaṃ sattame vuttanayeneva veditabbaṃ, nagaraṃ panettha rājagahanti.
તિરોરટ્ઠસિક્ખાપદવણ્ણના નિટ્ઠિતા.
Tiroraṭṭhasikkhāpadavaṇṇanā niṭṭhitā.
૯. અન્તોવસ્સસિક્ખાપદવણ્ણના
9. Antovassasikkhāpadavaṇṇanā
નવમે અન્તોવસ્સન્તિ પુરિમં વા તેમાસં, પચ્છિમં વા તેમાસં અવસિત્વા તસ્સ વસ્સસ્સ અન્તોયેવ. ઇધ સત્તાહકરણીયેન વા કેનચિ ઉબ્બળ્હાય વા આપદાસુ વા ગચ્છન્તિયા ઉમ્મત્તિકાદીનઞ્ચ અનાપત્તિ. સેસં અટ્ઠમસદિસમેવાતિ.
Navame antovassanti purimaṃ vā temāsaṃ, pacchimaṃ vā temāsaṃ avasitvā tassa vassassa antoyeva. Idha sattāhakaraṇīyena vā kenaci ubbaḷhāya vā āpadāsu vā gacchantiyā ummattikādīnañca anāpatti. Sesaṃ aṭṭhamasadisamevāti.
અન્તોવસ્સસિક્ખાપદવણ્ણના નિટ્ઠિતા.
Antovassasikkhāpadavaṇṇanā niṭṭhitā.
૧૦. ચારિકનપક્કમનસિક્ખાપદવણ્ણના
10. Cārikanapakkamanasikkhāpadavaṇṇanā
દસમે વસ્સંવુટ્ઠાતિ પુરિમં વા તેમાસં, પચ્છિમં વા તેમાસં વુટ્ઠા. છપ્પઞ્ચયોજનાનીતિ એત્થ પવારેત્વા પઞ્ચ યોજનાનિ ગન્તુમ્પિ વટ્ટતિ, છસુ વત્તબ્બમેવ નત્થિ. સચે પન તીણિ ગન્ત્વા તેનેવ મગ્ગેન પચ્ચાગચ્છતિ, ન વટ્ટતિ, અઞ્ઞેન આગન્તું વટ્ટતિ. ‘‘વુત્તપ્પમાણં અદ્ધાનં ન ગચ્છિસ્સામી’’તિ ધુરે નિક્ખિત્તમત્તે પાચિત્તિયં.
Dasame vassaṃvuṭṭhāti purimaṃ vā temāsaṃ, pacchimaṃ vā temāsaṃ vuṭṭhā. Chappañcayojanānīti ettha pavāretvā pañca yojanāni gantumpi vaṭṭati, chasu vattabbameva natthi. Sace pana tīṇi gantvā teneva maggena paccāgacchati, na vaṭṭati, aññena āgantuṃ vaṭṭati. ‘‘Vuttappamāṇaṃ addhānaṃ na gacchissāmī’’ti dhure nikkhittamatte pācittiyaṃ.
રાજગહે સમ્બહુલા ભિક્ખુનિયો આરબ્ભ વસ્સં વસિત્વા ચારિકં અપક્કમનવત્થુસ્મિં પઞ્ઞત્તં. અન્તરાયે સતિ, પરિયેસિત્વા દુતિયિકં ભિક્ખુનિં અલભન્તિયા, ગિલાનાય, આપદાસુ, ઉમ્મત્તિકાદીનઞ્ચ અનાપત્તિ. વસ્સંવુટ્ઠતા, અનુઞ્ઞાતકારણાભાવો, પઞ્ચયોજનાનતિક્કમોતિ ઇમાનેત્થ તીણિ અઙ્ગાનિ. સમુટ્ઠાનાદીનિ પઠમપારાજિકસદિસાનિ, ઇદં પન અકિરિયં, દુક્ખવેદનન્તિ.
Rājagahe sambahulā bhikkhuniyo ārabbha vassaṃ vasitvā cārikaṃ apakkamanavatthusmiṃ paññattaṃ. Antarāye sati, pariyesitvā dutiyikaṃ bhikkhuniṃ alabhantiyā, gilānāya, āpadāsu, ummattikādīnañca anāpatti. Vassaṃvuṭṭhatā, anuññātakāraṇābhāvo, pañcayojanānatikkamoti imānettha tīṇi aṅgāni. Samuṭṭhānādīni paṭhamapārājikasadisāni, idaṃ pana akiriyaṃ, dukkhavedananti.
ચારિકનપક્કમનસિક્ખાપદવણ્ણના નિટ્ઠિતા.
Cārikanapakkamanasikkhāpadavaṇṇanā niṭṭhitā.
તુવટ્ટવગ્ગો ચતુત્થો.
Tuvaṭṭavaggo catuttho.
