| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[139] 9. убхад̇обхадтаж̇аад̇агаван̣н̣анаа
[139] 9. Ubhatobhaṭṭhajātakavaṇṇanā
агкий бхиннаа бадо надтод̇и ид̣̇ам̣ сад̇т̇аа взл̣уванз вихаранд̇о д̣̇звад̣̇ад̇д̇ам̣ аараб̣бха гат̇зси. д̇ад̣̇аа гира д̇хаммасабхааяам̣ бхигкуу гат̇ам̣ самудтаабзсум̣ ‘‘аавусо, сзяяат̇ааби наама чаваалаад̇ам̣ убхад̇обад̣̇ид̇д̇ам̣ маж̇жхз г̇уут̇аг̇ад̇ам̣ нзвааран̃н̃з гадтад̇т̇ам̣ парад̇и, на г̇аамз гадтад̇т̇ам̣ парад̇и, звамзва д̣̇звад̣̇ад̇д̇о зваруубз нияяаанигасаасанз баб̣б̣аж̇ид̇ваа убхад̇о бхадто убхад̇о бариб̣аахиро ж̇аад̇о, г̇ихибарибхог̇аа жа барихийно, сааман̃н̃ад̇т̇ан̃жа на барибуурзд̇ий’’д̇и. сад̇т̇аа ааг̇анд̇ваа ‘‘гааяа нуд̇т̇а, бхигкавз, зд̇арахи гат̇ааяа саннисиннаа’’д̇и бужчид̇ваа ‘‘имааяа наамаа’’д̇и вуд̇д̇з ‘‘на, бхигкавз, д̣̇звад̣̇ад̇д̇о ид̣̇аанзва убхад̇о бхадто ход̇и, ад̇ийд̇зби убхад̇о бхадто ахосиязваа’’д̇и вад̇ваа ад̇ийд̇ам̣ аахари.
Akkhī bhinnā paṭo naṭṭhoti idaṃ satthā veḷuvane viharanto devadattaṃ ārabbha kathesi. Tadā kira dhammasabhāyaṃ bhikkhū kathaṃ samuṭṭhāpesuṃ ‘‘āvuso, seyyathāpi nāma chavālātaṃ ubhatopadittaṃ majjhe gūthagataṃ nevāraññe kaṭṭhatthaṃ pharati, na gāme kaṭṭhatthaṃ pharati, evameva devadatto evarūpe niyyānikasāsane pabbajitvā ubhato bhaṭṭho ubhato paribāhiro jāto, gihiparibhogā ca parihīno, sāmaññatthañca na paripūretī’’ti. Satthā āgantvā ‘‘kāya nuttha, bhikkhave, etarahi kathāya sannisinnā’’ti pucchitvā ‘‘imāya nāmā’’ti vutte ‘‘na, bhikkhave, devadatto idāneva ubhato bhaṭṭho hoti, atītepi ubhato bhaṭṭho ahosiyevā’’ti vatvā atītaṃ āhari.
ад̇ийд̇з б̣аараан̣асияам̣ б̣рахмад̣̇ад̇д̇з раж̇ж̇ам̣ гаарзнд̇з б̣од̇хисад̇д̇о ругкад̣̇звад̇аа худ̇ваа ниб̣б̣ад̇д̇и. д̇ад̣̇аа згасмим̣ г̇аамагз б̣аал̣исигаа васанд̇и. ат̇зго б̣аал̣исиго б̣ал̣исам̣ аад̣̇ааяа д̣̇ахарзна буд̇д̇зна сад̣̇д̇хим̣ яасмим̣ соб̣бхз багад̇ияааби б̣аал̣исигаа мажчз г̇ан̣ханд̇и, д̇ад̇т̇а г̇анд̇ваа б̣ал̣исам̣ киби. б̣ал̣исо уд̣̇агабадижчаннз згасмим̣ каан̣угз лаг̇г̇и. б̣аал̣исиго д̇ам̣ аагад̣дхид̇ум̣ асаггонд̇о жинд̇зси ‘‘аяам̣ б̣ал̣исо махаамажчз лаг̇г̇о бхависсад̇и, буд̇д̇агам̣ маад̇у санд̇игам̣ бзсзд̇ваа бадивиссагзхи сад̣̇д̇хим̣ галахам̣ гаараабзми, звам̣ ид̇о на гожи годтаасам̣ бажжаасийсиссад̇ий’’д̇и. со буд̇д̇ам̣ ааха ‘‘г̇ажча, д̇аад̇а, амхзхи махаамажчасса лад̣̇д̇хабхаавам̣ маад̇у аажигкаахи, ‘бадивиссагзхи гира сад̣̇д̇хим̣ галахам̣ гарохий’д̇и вад̣̇зхий’’д̇и. со буд̇д̇ам̣ бзсзд̇ваа б̣ал̣исам̣ аагад̣дхид̇ум̣ асаггонд̇о раж̇ж̇ужчзд̣̇анабхаязна уд̇д̇арисаадагам̣ т̇алз табзд̇ваа уд̣̇агам̣ од̇арид̇ваа мажчалобхзна мажчам̣ убад̇хаарзнд̇о каан̣угзхи бахарид̇ваа д̣̇взби агкийни бхинд̣̇и. т̇алз табид̇асаадагам̣бисса жоро хари. со взд̣̇анааббад̇д̇о худ̇ваа хад̇т̇зна агкийни уббийл̣аяамаано г̇ахзд̇ваа уд̣̇агаа уд̇д̇арид̇ваа гамбамаано саадагам̣ бариязсад̇и.
Atīte bārāṇasiyaṃ brahmadatte rajjaṃ kārente bodhisatto rukkhadevatā hutvā nibbatti. Tadā ekasmiṃ gāmake bāḷisikā vasanti. Atheko bāḷisiko baḷisaṃ ādāya daharena puttena saddhiṃ yasmiṃ sobbhe pakatiyāpi bāḷisikā macche gaṇhanti, tattha gantvā baḷisaṃ khipi. Baḷiso udakapaṭicchanne ekasmiṃ khāṇuke laggi. Bāḷisiko taṃ ākaḍḍhituṃ asakkonto cintesi ‘‘ayaṃ baḷiso mahāmacche laggo bhavissati, puttakaṃ mātu santikaṃ pesetvā paṭivissakehi saddhiṃ kalahaṃ kārāpemi, evaṃ ito na koci koṭṭhāsaṃ paccāsīsissatī’’ti. So puttaṃ āha ‘‘gaccha, tāta, amhehi mahāmacchassa laddhabhāvaṃ mātu ācikkhāhi, ‘paṭivissakehi kira saddhiṃ kalahaṃ karohī’ti vadehī’’ti. So puttaṃ pesetvā baḷisaṃ ākaḍḍhituṃ asakkonto rajjucchedanabhayena uttarisāṭakaṃ thale ṭhapetvā udakaṃ otaritvā macchalobhena macchaṃ upadhārento khāṇukehi paharitvā dvepi akkhīni bhindi. Thale ṭhapitasāṭakaṃpissa coro hari. So vedanāppatto hutvā hatthena akkhīni uppīḷayamāno gahetvā udakā uttaritvā kampamāno sāṭakaṃ pariyesati.
саабисса бхарияаа ‘‘галахам̣ гад̇ваа гассажи абажжаасийсанабхаавам̣ гариссаамий’’д̇и згасмим̣язва ган̣н̣з д̇аалабан̣н̣ам̣ бил̣анд̇хид̇ваа згам̣ агким̣ угкалимасияаа ан̃ж̇зд̇ваа гуггурам̣ ан̇гзнаад̣̇ааяа бадивиссагагхарам̣ аг̇амааси. ат̇а нам̣ згаа сахааяигаа звамааха ‘‘згасмим̣язва д̇з ган̣н̣з д̇аалабан̣н̣ам̣ бил̣анд̇хид̇ам̣, згам̣ агки ан̃ж̇ид̇ам̣, бияабуд̇д̇ам̣ вияа гуггурам̣ ан̇гзнаад̣̇ааяа гхарад̇о гхарам̣ г̇ажчаси, гим̣ уммад̇д̇игааси ж̇аад̇аа’’д̇и. ‘‘наахам̣ уммад̇д̇игаа, д̇вам̣ бана мам̣ агааран̣зна аггосаси барибхаасаси, ид̣̇аани д̇ам̣ г̇аамабхож̇агасса санд̇игам̣ г̇анд̇ваа адта гахаабан̣з д̣̇ан̣д̣аабзссаамий’’д̇и звам̣ галахам̣ гад̇ваа убхоби г̇аамабхож̇агасса санд̇игам̣ аг̇амам̣су. галахз висод̇хияамаанз д̇ассааязва мад̇т̇агз д̣̇ан̣д̣о бад̇и. ат̇а нам̣ б̣анд̇хид̇ваа ‘‘д̣̇ан̣д̣ам̣ д̣̇зхий’’д̇и бот̇зд̇ум̣ аарабхим̣су.
Sāpissa bhariyā ‘‘kalahaṃ katvā kassaci apaccāsīsanabhāvaṃ karissāmī’’ti ekasmiṃyeva kaṇṇe tālapaṇṇaṃ piḷandhitvā ekaṃ akkhiṃ ukkhalimasiyā añjetvā kukkuraṃ aṅkenādāya paṭivissakagharaṃ agamāsi. Atha naṃ ekā sahāyikā evamāha ‘‘ekasmiṃyeva te kaṇṇe tālapaṇṇaṃ piḷandhitaṃ, ekaṃ akkhi añjitaṃ, piyaputtaṃ viya kukkuraṃ aṅkenādāya gharato gharaṃ gacchasi, kiṃ ummattikāsi jātā’’ti. ‘‘Nāhaṃ ummattikā, tvaṃ pana maṃ akāraṇena akkosasi paribhāsasi, idāni taṃ gāmabhojakassa santikaṃ gantvā aṭṭha kahāpaṇe daṇḍāpessāmī’’ti evaṃ kalahaṃ katvā ubhopi gāmabhojakassa santikaṃ agamaṃsu. Kalahe visodhiyamāne tassāyeva matthake daṇḍo pati. Atha naṃ bandhitvā ‘‘daṇḍaṃ dehī’’ti pothetuṃ ārabhiṃsu.
ругкад̣̇звад̇аа г̇аамз д̇ассаа имам̣ бавад̇д̇им̣, аран̃н̃з жассаа бад̇ино д̇ам̣ б̣яасанам̣ д̣̇исваа канд̇ханд̇арз тид̇аа ‘‘бхо буриса, д̇уяхам̣ уд̣̇агзби гамманд̇о бад̣̇удто т̇алзби, убхад̇обхадто ж̇аад̇о’’д̇и вад̇ваа имам̣ г̇аат̇амааха –
Rukkhadevatā gāme tassā imaṃ pavattiṃ, araññe cassā patino taṃ byasanaṃ disvā khandhantare ṭhitā ‘‘bho purisa, tuyhaṃ udakepi kammanto paduṭṭho thalepi, ubhatobhaṭṭho jāto’’ti vatvā imaṃ gāthamāha –
139.
139.
‘‘агкий бхиннаа бадо надто, сакиг̇зхз жа бхан̣д̣анам̣;
‘‘Akkhī bhinnā paṭo naṭṭho, sakhigehe ca bhaṇḍanaṃ;
убхад̇о бад̣̇удтаа гамманд̇аа, уд̣̇агамхи т̇аламхи жаа’’д̇и.
Ubhato paduṭṭhā kammantā, udakamhi thalamhi cā’’ti.
д̇ад̇т̇а сакиг̇зхз жа бхан̣д̣ананд̇и сакий наама сахааяигаа, д̇ассаа жа г̇зхз д̇ава бхарияааяа бхан̣д̣анам̣ гад̇ам̣, бхан̣д̣анам̣ гад̇ваа б̣анд̇хид̇ваа бот̇зд̇ваа д̣̇ан̣д̣ам̣ д̣̇аабияад̇и. убхад̇о бад̣̇удтаа гамманд̇аад̇и звам̣ д̇ава д̣̇вийсуби таанзсу гамманд̇аа бад̣̇удтааязва бхиннааязва. гад̇арзсу д̣̇вийсу? уд̣̇агамхи т̇аламхи жаад̇и, агкибхзд̣̇зна баданаасзна жа уд̣̇агз гамманд̇аа бад̣̇удтаа, сакиг̇зхз бхан̣д̣анзна т̇алз гамманд̇аа бад̣̇удтаад̇и.
Tattha sakhigehe ca bhaṇḍananti sakhī nāma sahāyikā, tassā ca gehe tava bhariyāya bhaṇḍanaṃ kataṃ, bhaṇḍanaṃ katvā bandhitvā pothetvā daṇḍaṃ dāpiyati. Ubhato paduṭṭhā kammantāti evaṃ tava dvīsupi ṭhānesu kammantā paduṭṭhāyeva bhinnāyeva. Kataresu dvīsu? Udakamhi thalamhi cāti, akkhibhedena paṭanāsena ca udake kammantā paduṭṭhā, sakhigehe bhaṇḍanena thale kammantā paduṭṭhāti.
сад̇т̇аа имам̣ д̇хаммад̣̇зсанам̣ аахарид̇ваа ж̇аад̇агам̣ самод̇хаанзси ‘‘д̇ад̣̇аа б̣аал̣исиго д̣̇звад̣̇ад̇д̇о ахоси, ругкад̣̇звад̇аа бана ахамзва ахоси’’нд̇и.
Satthā imaṃ dhammadesanaṃ āharitvā jātakaṃ samodhānesi ‘‘tadā bāḷisiko devadatto ahosi, rukkhadevatā pana ahameva ahosi’’nti.
убхад̇обхадтаж̇аад̇агаван̣н̣анаа навамаа.
Ubhatobhaṭṭhajātakavaṇṇanā navamā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 139. убхад̇обхадтаж̇аад̇агам̣ • 139. Ubhatobhaṭṭhajātakaṃ
