| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೪. ಉದಪಾನದಾಯಕತ್ಥೇರಅಪದಾನವಣ್ಣನಾ
4. Udapānadāyakattheraapadānavaṇṇanā
ವಿಪಸ್ಸಿನೋ ಭಗವತೋತಿಆದಿಕಂ ಆಯಸ್ಮತೋ ಉದಪಾನದಾಯಕತ್ಥೇರಸ್ಸ ಅಪದಾನಂ। ಅಯಮ್ಪಿ ಥೇರೋ ಪುರಿಮಮುನಿವರೇಸು ಕತಾಧಿಕಾರೋ ಅನೇಕೇಸು ಭವೇಸು ಕತಪುಞ್ಞಸಞ್ಚಯೋ ವಿಪಸ್ಸಿಸ್ಸ ಭಗವತೋ ಕಾಲೇ ಕುಲಗೇಹೇ ನಿಬ್ಬತ್ತೋ ವುದ್ಧಿಪ್ಪತ್ತೋ ‘‘ಪಾನೀಯದಾನಂ ಮಯಾ ದಾತಬ್ಬಂ, ತಞ್ಚ ನಿರನ್ತರಂ ಕತ್ವಾ ಪವತ್ತೇತುಂ ವಟ್ಟತೀ’’ತಿ ಚಿನ್ತೇತ್ವಾ ಏಕಂ ಕೂಪಂ ಖನಾಪೇತ್ವಾ ಉದಕಸಮ್ಪತ್ತಕಾಲೇ ಇಟ್ಠಕಾಹಿ ಚಿನಾಪೇತ್ವಾ ಥಿರಂ ಕತ್ವಾ ತತ್ಥ ಉಟ್ಠಿತೇನ ಉದಕೇನ ಪುಣ್ಣಂ ತಂ ಉದಪಾನಂ ವಿಪಸ್ಸಿಸ್ಸ ಭಗವತೋ ನಿಯ್ಯಾದೇಸಿ। ಭಗವಾ ಪಾನೀಯದಾನಾನಿಸಂಸದೀಪಕಂ ಅನುಮೋದನಂ ಅಕಾಸಿ । ಸೋ ತೇನ ಪುಞ್ಞೇನ ದೇವಮನುಸ್ಸೇಸು ಸಂಸರನ್ತೋ ನಿಬ್ಬತ್ತನಿಬ್ಬತ್ತಟ್ಠಾನೇ ಪೋಕ್ಖರಣೀಉದಪಾನಪಾನೀಯಾದಿಸಮ್ಪನ್ನೋ ಸುಖಮನುಭವಿತ್ವಾ ಇಮಸ್ಮಿಂ ಬುದ್ಧುಪ್ಪಾದೇ ಏಕಸ್ಮಿಂ ಕುಲೇ ನಿಬ್ಬತ್ತೋ ವುದ್ಧಿಮನ್ವಾಯ ಸದ್ಧೋ ಪಸನ್ನೋ ಪಬ್ಬಜಿತ್ವಾ ನಚಿರಸ್ಸೇವ ಅರಹಾ ಅಹೋಸಿ।
Vipassino bhagavatotiādikaṃ āyasmato udapānadāyakattherassa apadānaṃ. Ayampi thero purimamunivaresu katādhikāro anekesu bhavesu katapuññasañcayo vipassissa bhagavato kāle kulagehe nibbatto vuddhippatto ‘‘pānīyadānaṃ mayā dātabbaṃ, tañca nirantaraṃ katvā pavattetuṃ vaṭṭatī’’ti cintetvā ekaṃ kūpaṃ khanāpetvā udakasampattakāle iṭṭhakāhi cināpetvā thiraṃ katvā tattha uṭṭhitena udakena puṇṇaṃ taṃ udapānaṃ vipassissa bhagavato niyyādesi. Bhagavā pānīyadānānisaṃsadīpakaṃ anumodanaṃ akāsi . So tena puññena devamanussesu saṃsaranto nibbattanibbattaṭṭhāne pokkharaṇīudapānapānīyādisampanno sukhamanubhavitvā imasmiṃ buddhuppāde ekasmiṃ kule nibbatto vuddhimanvāya saddho pasanno pabbajitvā nacirasseva arahā ahosi.
೧೮. ಸೋ ಅಪರಭಾಗೇ ಅತ್ತನೋ ಪುಬ್ಬಕಮ್ಮಂ ಸರಿತ್ವಾ ಸೋಮನಸ್ಸಜಾತೋ ಪುಬ್ಬಚರಿತಾಪದಾನಂ ಪಕಾಸೇನ್ತೋ ವಿಪಸ್ಸಿನೋ ಭಗವತೋತಿಆದಿಮಾಹ। ತತ್ಥ ಉದಪಾನೋ ಕತೋ ಮಯಾತಿ ಉದಕಂ ಪಿವನ್ತಿ ಏತ್ಥಾತಿ ಉದಪಾನೋ, ಕೂಪಪೋಕ್ಖರಣೀತಳಾಕಾನಮೇತಂ ಅಧಿವಚನಂ। ಸೋ ಉದಪಾನೋ ಕೂಪೋ ವಿಪಸ್ಸಿಸ್ಸ ಭಗವತೋ ಅತ್ಥಾಯ ಕತೋ ಖನಿತೋತಿ ಅತ್ಥೋ। ಸೇಸಂ ಉತ್ತಾನತ್ಥಮೇವಾತಿ।
18. So aparabhāge attano pubbakammaṃ saritvā somanassajāto pubbacaritāpadānaṃ pakāsento vipassino bhagavatotiādimāha. Tattha udapāno kato mayāti udakaṃ pivanti etthāti udapāno, kūpapokkharaṇītaḷākānametaṃ adhivacanaṃ. So udapāno kūpo vipassissa bhagavato atthāya kato khanitoti attho. Sesaṃ uttānatthamevāti.
ಉದಪಾನದಾಯಕತ್ಥೇರಅಪದಾನವಣ್ಣನಾ ಸಮತ್ತಾ।
Udapānadāyakattheraapadānavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೪. ಉದಪಾನದಾಯಕತ್ಥೇರಅಪದಾನಂ • 4. Udapānadāyakattheraapadānaṃ
