| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೨. ಉದಯಸುತ್ತವಣ್ಣನಾ
2. Udayasuttavaṇṇanā
೧೯೮. ಏತಂ ವುತ್ತನ್ತಿ ‘‘ಓದನೇನ ಪೂರೇಸೀ’’ತಿ ಏತಂ ವಚನಂ ವುತ್ತಂ। ‘‘ಗಹೇತುಂ ಸಮತ್ಥೋ ನಾಮ ನಾಹೋಸೀತಿ ಭಗವತೋ ಅಧಿಟ್ಠಾನಬಲೇನಾ’’ತಿ ವದನ್ತಿ। ತಂ ಬ್ರಾಹ್ಮಣಂ ವಿನೇತುಕಾಮತಾಯ ಕಿರ ಭಗವಾ ತಥಾ ಅಕಾಸಿ।
198.Etaṃ vuttanti ‘‘odanena pūresī’’ti etaṃ vacanaṃ vuttaṃ. ‘‘Gahetuṃ samattho nāma nāhosīti bhagavato adhiṭṭhānabalenā’’ti vadanti. Taṃ brāhmaṇaṃ vinetukāmatāya kira bhagavā tathā akāsi.
ಉಪಾರಮ್ಭಭಯೇನಾತಿ ಪರೂಪವಾದಭಯೇನ। ಅವತ್ವಾವ ನಿವತ್ತೋ ‘‘ಅಬ್ಭಾಗತೋಪಿ ಪಾಸಣ್ಡೋ ವಾಚಾಮತ್ತೇನಪಿ ನ ಪೂಜೇತಬ್ಬೋ’’ತಿ ಬ್ರಾಹ್ಮಣಧಮ್ಮೇ ವುತ್ತತ್ತಾ। ಪಕ್ಕನ್ತೋತಿ ಬ್ರಾಹ್ಮಣಸ್ಸ ಧಮ್ಮಂ ಅವತ್ವಾ ಪಕ್ಕನ್ತೋ ಬ್ರಾಹ್ಮಣಸ್ಸ ನ ತಾವ ಞಾಣಂ ಪರಿಪಕ್ಕನ್ತಿ। ಏತಂ ವಚನಂ…ಪೇ॰… ಮಗಮಾಸಿ ‘‘ಪುನಪ್ಪುನಞ್ಚೇವ ವಪನ್ತಿ ಬೀಜ’’ನ್ತಿಆದಿನಾ ಧಮ್ಮಂ ಕಥೇತುಂ ಅವಸ್ಸಂ ಆಕಙ್ಖನ್ತೋ। ಪಕಾರತೋ ಕಸ್ಸತೀತಿ ಪಕಟ್ಠಕೋ, ರಸತಣ್ಹಾಯ ಪಕಟ್ಠೋತಿ ಅತ್ಥೋ। ತೇನಾಹ ‘‘ರಸಗಿದ್ಧೋ’’ತಿ।
Upārambhabhayenāti parūpavādabhayena. Avatvāva nivatto ‘‘abbhāgatopi pāsaṇḍo vācāmattenapi na pūjetabbo’’ti brāhmaṇadhamme vuttattā. Pakkantoti brāhmaṇassa dhammaṃ avatvā pakkanto brāhmaṇassa na tāva ñāṇaṃ paripakkanti. Etaṃ vacanaṃ…pe… magamāsi ‘‘punappunañceva vapanti bīja’’ntiādinā dhammaṃ kathetuṃ avassaṃ ākaṅkhanto. Pakārato kassatīti pakaṭṭhako, rasataṇhāya pakaṭṭhoti attho. Tenāha ‘‘rasagiddho’’ti.
‘‘ಪುನಪ್ಪುನಞ್ಚೇವ ವಪನ್ತಿ ಬೀಜ’’ನ್ತಿ ಇಮಂ ದೇಸನಂ ಆರಭೀತಿ ಸಮ್ಬನ್ಧೋ। ಬೀಜನ್ತಿ ಚ ಇತಿ-ಸದ್ದೋ ನಿದಸ್ಸನತ್ಥೋ ವಾ। ತೇನ ಅವಯವೇನ ಸಮುದಾಯಂ ನಿದಸ್ಸೇತಿ। ಓಸಕ್ಕಸೀತಿ ಸಙ್ಕೋಚಸಿ। ವುತ್ತನ್ತಿ ವಪನಂ ಕತಂ। ತಸ್ಮಾ ವುತ್ತಂ ‘‘ಅಲಮೇತ್ತಾವತಾ’’ತಿ। ‘‘ವಸ್ಸಿತ್ವಾ’’ತಿ ವುಟ್ಠಿಂ ಪವತ್ತೇತ್ವಾ।
‘‘Punappunañceva vapanti bīja’’nti imaṃ desanaṃ ārabhīti sambandho. Bījanti ca iti-saddo nidassanattho vā. Tena avayavena samudāyaṃ nidasseti. Osakkasīti saṅkocasi. Vuttanti vapanaṃ kataṃ. Tasmā vuttaṃ ‘‘alamettāvatā’’ti. ‘‘Vassitvā’’ti vuṭṭhiṃ pavattetvā.
ದೇಸನಾ…ಪೇ॰… ದಸ್ಸೇತಿ ಬ್ರಾಹ್ಮಣೇನ ವುತ್ತಂ ಅಯುತ್ತವಚನಂ ಪರಿವಟ್ಟೇನ್ತೋಪಿ ದಿವಸೇ ದಿವಸೇ ಭಿಕ್ಖಾಚರಿಯಾ ನಾಮ ಭಿಕ್ಖೂನಂ ಕಾಯಗತಾ ವುತ್ತೀತಿ। ಖೀರಂ ಹತ್ಥೇನ ನಯನ್ತೀತಿ ವಾ ಖೀರನಿಕಾ। ಕಿಲಮತೀತಿ ತಂತಂಕಿಚ್ಚಕರಣವಸೇನ ಖಿಜ್ಜತಿ। ಫನ್ದತೀತಿ ಅನತ್ಥಸಮಾಯೋಗವಸೇನ ವಿಪ್ಫನ್ದತಿ। ಅಪುನಬ್ಭವಾಯಾತಿ ಆಯತಿಂ ಅನುಪ್ಪತ್ತಿಯಾ। ಮಗ್ಗೋ ನಾಮಾತಿ ಉಪಾಯೋ ನಾಮ ನಿಬ್ಬಾನಂ, ತಸ್ಮಿಂ ಲದ್ಧೇ ಪುನಬ್ಭವಾಭಾವತೋ। ‘‘ಪುನಪ್ಪುನ’’ನ್ತಿ ವಚನಂ ಉಪಾದಾಯ ಬೀಜವಪನಾದಯೋ ಪುನಪ್ಪುನಧಮ್ಮಾ ನಾಮ ಜಾತಾತಿ ಆಹ ‘‘ಸೋಳಸ ಪುನಪ್ಪುನಧಮ್ಮೇ ದೇಸೇನ್ತೇನಾ’’ತಿ।
Desanā…pe… dasseti brāhmaṇena vuttaṃ ayuttavacanaṃ parivaṭṭentopi divase divase bhikkhācariyā nāma bhikkhūnaṃ kāyagatā vuttīti. Khīraṃ hatthena nayantīti vā khīranikā. Kilamatīti taṃtaṃkiccakaraṇavasena khijjati. Phandatīti anatthasamāyogavasena vipphandati. Apunabbhavāyāti āyatiṃ anuppattiyā. Maggo nāmāti upāyo nāma nibbānaṃ, tasmiṃ laddhe punabbhavābhāvato. ‘‘Punappuna’’nti vacanaṃ upādāya bījavapanādayo punappunadhammā nāma jātāti āha ‘‘soḷasa punappunadhamme desentenā’’ti.
ಉದಯಸುತ್ತವಣ್ಣನಾ ನಿಟ್ಠಿತಾ।
Udayasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೨. ಉದಯಸುತ್ತಂ • 2. Udayasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೨. ಉದಯಸುತ್ತವಣ್ಣನಾ • 2. Udayasuttavaṇṇanā
