| Library / Tipiṭaka / ತಿಪಿಟಕ • Tipiṭaka / ನೇತ್ತಿಪ್ಪಕರಣಪಾಳಿ • Nettippakaraṇapāḷi |
೨. ಉದ್ದೇಸವಾರೋ
2. Uddesavāro
೧. ತತ್ಥ ಕತಮೇ ಸೋಳಸ ಹಾರಾ? ದೇಸನಾ ವಿಚಯೋ ಯುತ್ತಿ ಪದಟ್ಠಾನೋ ಲಕ್ಖಣೋ ಚತುಬ್ಯೂಹೋ ಆವಟ್ಟೋ ವಿಭತ್ತಿ ಪರಿವತ್ತನೋ ವೇವಚನೋ ಪಞ್ಞತ್ತಿ ಓತರಣೋ ಸೋಧನೋ ಅಧಿಟ್ಠಾನೋ ಪರಿಕ್ಖಾರೋ ಸಮಾರೋಪನೋ ಇತಿ।
1. Tattha katame soḷasa hārā? Desanā vicayo yutti padaṭṭhāno lakkhaṇo catubyūho āvaṭṭo vibhatti parivattano vevacano paññatti otaraṇo sodhano adhiṭṭhāno parikkhāro samāropano iti.
ತಸ್ಸಾನುಗೀತಿ
Tassānugīti
ದೇಸನಾ ವಿಚಯೋ ಯುತ್ತಿ, ಪದಟ್ಠಾನೋ ಚ ಲಕ್ಖಣೋ।
Desanā vicayo yutti, padaṭṭhāno ca lakkhaṇo;
ಚತುಬ್ಯೂಹೋ ಚ ಆವಟ್ಟೋ, ವಿಭತ್ತಿ ಪರಿವತ್ತನೋ॥
Catubyūho ca āvaṭṭo, vibhatti parivattano.
ವೇವಚನೋ ಚ ಪಞ್ಞತ್ತಿ, ಓತರಣೋ ಚ ಸೋಧನೋ।
Vevacano ca paññatti, otaraṇo ca sodhano;
ಏತೇ ಸೋಳಸ ಹಾರಾ, ಪಕಿತ್ತಿತಾ ಅತ್ಥತೋ ಅಸಂಕಿಣ್ಣಾ।
Ete soḷasa hārā, pakittitā atthato asaṃkiṇṇā;
ಏತೇಸಞ್ಚೇವ ಭವತಿ, ವಿತ್ಥಾರತಯಾ ನಯವಿಭತ್ತೀತಿ॥
Etesañceva bhavati, vitthāratayā nayavibhattīti.
೨. ತತ್ಥ ಕತಮೇ ಪಞ್ಚ ನಯಾ? ನನ್ದಿಯಾವಟ್ಟೋ ತಿಪುಕ್ಖಲೋ ಸೀಹವಿಕ್ಕೀಳಿತೋ ದಿಸಾಲೋಚನೋ ಅಙ್ಕುಸೋ ಇತಿ।
2. Tattha katame pañca nayā? Nandiyāvaṭṭo tipukkhalo sīhavikkīḷito disālocano aṅkuso iti.
ತಸ್ಸಾನುಗೀತಿ
Tassānugīti
ಪಠಮೋ ನನ್ದಿಯಾವಟ್ಟೋ, ದುತಿಯೋ ಚ ತಿಪುಕ್ಖಲೋ।
Paṭhamo nandiyāvaṭṭo, dutiyo ca tipukkhalo;
ದಿಸಾಲೋಚನಮಾಹಂಸು , ಚತುತ್ಥಂ ನಯಮುತ್ತಮಂ।
Disālocanamāhaṃsu , catutthaṃ nayamuttamaṃ;
ಪಞ್ಚಮೋ ಅಙ್ಕುಸೋ ನಾಮ, ಸಬ್ಬೇ ಪಞ್ಚ ನಯಾ ಗತಾತಿ॥
Pañcamo aṅkuso nāma, sabbe pañca nayā gatāti.
೩. ತತ್ಥ ಕತಮಾನಿ ಅಟ್ಠಾರಸ ಮೂಲಪದಾನಿ? ನವ ಪದಾನಿ ಕುಸಲಾನಿ ನವ ಪದಾನಿ ಅಕುಸಲಾನಿ। ತತ್ಥ ಕತಮಾನಿ ನವ ಪದಾನಿ ಅಕುಸಲಾನಿ, ತಣ್ಹಾ ಅವಿಜ್ಜಾ ಲೋಭೋ ದೋಸೋ ಮೋಹೋ ಸುಭಸಞ್ಞಾ ಸುಖಸಞ್ಞಾ ನಿಚ್ಚಸಞ್ಞಾ ಅತ್ತಸಞ್ಞಾತಿ, ಇಮಾನಿ ನವ ಪದಾನಿ ಅಕುಸಲಾನಿ, ಯತ್ಥ ಸಬ್ಬೋ ಅಕುಸಲಪಕ್ಖೋ ಸಙ್ಗಹಂ ಸಮೋಸರಣಂ ಗಚ್ಛತಿ।
3. Tattha katamāni aṭṭhārasa mūlapadāni? Nava padāni kusalāni nava padāni akusalāni. Tattha katamāni nava padāni akusalāni, taṇhā avijjā lobho doso moho subhasaññā sukhasaññā niccasaññā attasaññāti, imāni nava padāni akusalāni, yattha sabbo akusalapakkho saṅgahaṃ samosaraṇaṃ gacchati.
ತತ್ಥ ಕತಮಾನಿ ನವ ಪದಾನಿ ಕುಸಲಾನಿ? ಸಮಥೋ ವಿಪಸ್ಸನಾ ಅಲೋಭೋ ಅದೋಸೋ ಅಮೋಹೋ ಅಸುಭಸಞ್ಞಾ ದುಕ್ಖಸಞ್ಞಾ ಅನಿಚ್ಚಸಞ್ಞಾ ಅನತ್ತಸಞ್ಞಾತಿ, ಇಮಾನಿ ನವ ಪದಾನಿ ಕುಸಲಾನಿ, ಯತ್ಥ ಸಬ್ಬೋ ಕುಸಲಪಕ್ಖೋ ಸಙ್ಗಹಂ ಸಮೋಸರಣಂ ಗಚ್ಛತಿ।
Tattha katamāni nava padāni kusalāni? Samatho vipassanā alobho adoso amoho asubhasaññā dukkhasaññā aniccasaññā anattasaññāti, imāni nava padāni kusalāni, yattha sabbo kusalapakkho saṅgahaṃ samosaraṇaṃ gacchati.
ತತ್ರಿದಂ ಉದ್ದಾನಂ
Tatridaṃ uddānaṃ
ತಣ್ಹಾ ಚ ಅವಿಜ್ಜಾಪಿ ಚ, ಲೋಭೋ ದೋಸೋ ತಥೇವ ಮೋಹೋ ಚ।
Taṇhā ca avijjāpi ca, lobho doso tatheva moho ca;
ಚತುರೋ ಚ ವಿಪಲ್ಲಾಸಾ, ಕಿಲೇಸಭೂಮೀ ನವ ಪದಾನಿ॥
Caturo ca vipallāsā, kilesabhūmī nava padāni.
ಸಮಥೋ ಚ ವಿಪಸ್ಸನಾ ಚ, ಕುಸಲಾನಿ ಚ ಯಾನಿ ತೀಣಿ ಮೂಲಾನಿ।
Samatho ca vipassanā ca, kusalāni ca yāni tīṇi mūlāni;
ಚತುರೋ ಸತಿಪಟ್ಠಾನಾ, ಇನ್ದ್ರಿಯಭೂಮೀ ನವ ಪದಾನಿ॥
Caturo satipaṭṭhānā, indriyabhūmī nava padāni.
ನವಹಿ ಚ ಪದೇಹಿ ಕುಸಲಾ, ನವಹಿ ಚ ಯುಜ್ಜನ್ತಿ ಅಕುಸಲಪಕ್ಖಾ।
Navahi ca padehi kusalā, navahi ca yujjanti akusalapakkhā;
ಏತೇ ಖೋ ಮೂಲಪದಾ, ಭವನ್ತಿ ಅಟ್ಠಾರಸ ಪದಾನೀತಿ॥
Ete kho mūlapadā, bhavanti aṭṭhārasa padānīti.
ಉದ್ದೇಸವಾರೋ।
Uddesavāro.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ನೇತ್ತಿಪ್ಪಕರಣ-ಅಟ್ಠಕಥಾ • Nettippakaraṇa-aṭṭhakathā / ೨. ಉದ್ದೇಸವಾರವಣ್ಣನಾ • 2. Uddesavāravaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಖುದ್ದಕನಿಕಾಯ (ಟೀಕಾ) • Khuddakanikāya (ṭīkā) / ನೇತ್ತಿಪ್ಪಕರಣ-ಟೀಕಾ • Nettippakaraṇa-ṭīkā / ೨. ಉದ್ದೇಸವಾರವಣ್ಣನಾ • 2. Uddesavāravaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಖುದ್ದಕನಿಕಾಯ (ಟೀಕಾ) • Khuddakanikāya (ṭīkā) / ನೇತ್ತಿವಿಭಾವಿನೀ • Nettivibhāvinī / ೨. ಉದ್ದೇಸವಾರಅತ್ಥವಿಭಾವನಾ • 2. Uddesavāraatthavibhāvanā
