| Library / Tipiṭaka / తిపిటక • Tipiṭaka / అఙ్గుత్తరనికాయ (టీకా) • Aṅguttaranikāya (ṭīkā) |
౩. ఉగ్గహసుత్తవణ్ణనా
3. Uggahasuttavaṇṇanā
౩౩. తతియే సబ్బపఠమం ఉట్ఠానసీలాతి రత్తియా విభాయనవేలాయ సామికే పరిజనే సేయ్యాయ అవుట్ఠితే సబ్బపఠమం ఉట్ఠానసీలా. సామికం దిస్వా నిసిన్నాసనతో అగ్గిదడ్ఢా వియ పఠమమేవ వుట్ఠహన్తీతి వా పుబ్బుట్ఠాయినియో. కింకారన్తి కింకరణీయం, కింకరణభావేన పుచ్ఛిత్వా కాతబ్బవేయ్యావచ్చన్తి అత్థో. తం పటిస్సుణన్తా విచరన్తీతి కింకారప్పటిస్సావినియో. మనాపంయేవ కిరియం కరోన్తి సీలేనాతి మనాపచారినియో. పియమేవ వదన్తి సీలేనాతి పియవాదినియో.
33. Tatiye sabbapaṭhamaṃ uṭṭhānasīlāti rattiyā vibhāyanavelāya sāmike parijane seyyāya avuṭṭhite sabbapaṭhamaṃ uṭṭhānasīlā. Sāmikaṃ disvā nisinnāsanato aggidaḍḍhā viya paṭhamameva vuṭṭhahantīti vā pubbuṭṭhāyiniyo. Kiṃkāranti kiṃkaraṇīyaṃ, kiṃkaraṇabhāvena pucchitvā kātabbaveyyāvaccanti attho. Taṃ paṭissuṇantā vicarantīti kiṃkārappaṭissāviniyo. Manāpaṃyeva kiriyaṃ karonti sīlenāti manāpacāriniyo. Piyameva vadanti sīlenāti piyavādiniyo.
తత్రుపాయాయాతి తత్ర కమ్మే సాధేతబ్బఉపాయభూతాయ వీమంసాయ. తేనాహ ‘‘తస్మిం ఉణ్ణాకప్పాససంవిధానే’’తిఆది. అలం కాతున్తి కాతుం సమత్థా. అలం సంవిధాతున్తి విచారేతుం సమత్థా. తేనాహ ‘‘అలం కాతుం అలం సంవిధాతున్తి అత్తనా కాతుమ్పి పరేహి కారాపేతుమ్పీ’’తిఆది. సేసమేత్థ సువిఞ్ఞేయ్యమేవ.
Tatrupāyāyāti tatra kamme sādhetabbaupāyabhūtāya vīmaṃsāya. Tenāha ‘‘tasmiṃ uṇṇākappāsasaṃvidhāne’’tiādi. Alaṃ kātunti kātuṃ samatthā. Alaṃ saṃvidhātunti vicāretuṃ samatthā. Tenāha ‘‘alaṃ kātuṃ alaṃ saṃvidhātunti attanā kātumpi parehi kārāpetumpī’’tiādi. Sesamettha suviññeyyameva.
ఉగ్గహసుత్తవణ్ణనా నిట్ఠితా.
Uggahasuttavaṇṇanā niṭṭhitā.
Related texts:
తిపిటక (మూల) • Tipiṭaka (Mūla) / సుత్తపిటక • Suttapiṭaka / అఙ్గుత్తరనికాయ • Aṅguttaranikāya / ౩. ఉగ్గహసుత్తం • 3. Uggahasuttaṃ
అట్ఠకథా • Aṭṭhakathā / సుత్తపిటక (అట్ఠకథా) • Suttapiṭaka (aṭṭhakathā) / అఙ్గుత్తరనికాయ (అట్ఠకథా) • Aṅguttaranikāya (aṭṭhakathā) / ౩. ఉగ్గహసుత్తవణ్ణనా • 3. Uggahasuttavaṇṇanā
