Library / Tipiṭaka / తిపిటక • Tipiṭaka / సంయుత్తనికాయ • Saṃyuttanikāya |
౫. ఉజ్ఝానసఞ్ఞిసుత్తం
5. Ujjhānasaññisuttaṃ
౩౫. ఏకం సమయం భగవా సావత్థియం విహరతి జేతవనే అనాథపిణ్డికస్స ఆరామే. అథ ఖో సమ్బహులా ఉజ్ఝానసఞ్ఞికా దేవతాయో అభిక్కన్తాయ రత్తియా అభిక్కన్తవణ్ణా కేవలకప్పం జేతవనం ఓభాసేత్వా యేన భగవా తేనుపసఙ్కమింసు; ఉపసఙ్కమిత్వా వేహాసం అట్ఠంసు. వేహాసం ఠితా ఖో ఏకా దేవతా భగవతో సన్తికే ఇమం గాథం అభాసి –
35. Ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho sambahulā ujjhānasaññikā devatāyo abhikkantāya rattiyā abhikkantavaṇṇā kevalakappaṃ jetavanaṃ obhāsetvā yena bhagavā tenupasaṅkamiṃsu; upasaṅkamitvā vehāsaṃ aṭṭhaṃsu. Vehāsaṃ ṭhitā kho ekā devatā bhagavato santike imaṃ gāthaṃ abhāsi –
‘‘అఞ్ఞథా సన్తమత్తానం, అఞ్ఞథా యో పవేదయే;
‘‘Aññathā santamattānaṃ, aññathā yo pavedaye;
నికచ్చ కితవస్సేవ, భుత్తం థేయ్యేన తస్స తం.
Nikacca kitavasseva, bhuttaṃ theyyena tassa taṃ.
‘‘యఞ్హి కయిరా తఞ్హి వదే, యం న కయిరా న తం వదే;
‘‘Yañhi kayirā tañhi vade, yaṃ na kayirā na taṃ vade;
అకరోన్తం భాసమానానం, పరిజానన్తి పణ్డితా’’తి.
Akarontaṃ bhāsamānānaṃ, parijānanti paṇḍitā’’ti.
‘‘న యిదం భాసితమత్తేన, ఏకన్తసవనేన వా;
‘‘Na yidaṃ bhāsitamattena, ekantasavanena vā;
అనుక్కమితవే సక్కా, యాయం పటిపదా దళ్హా;
Anukkamitave sakkā, yāyaṃ paṭipadā daḷhā;
యాయ ధీరా పముచ్చన్తి, ఝాయినో మారబన్ధనా.
Yāya dhīrā pamuccanti, jhāyino mārabandhanā.
‘‘న వే ధీరా పకుబ్బన్తి, విదిత్వా లోకపరియాయం;
‘‘Na ve dhīrā pakubbanti, viditvā lokapariyāyaṃ;
అఞ్ఞాయ నిబ్బుతా ధీరా, తిణ్ణా లోకే విసత్తిక’’న్తి.
Aññāya nibbutā dhīrā, tiṇṇā loke visattika’’nti.
అథ ఖో తా దేవతాయో పథవియం పతిట్ఠహిత్వా భగవతో పాదేసు సిరసా నిపతిత్వా భగవన్తం ఏతదవోచుం – ‘‘అచ్చయో నో, భన్తే, అచ్చగమా యథాబాలం యథామూళ్హం యథాఅకుసలం 1, యా మయం భగవన్తం ఆసాదేతబ్బం అమఞ్ఞిమ్హా. తాసం నో, భన్తే, భగవా అచ్చయం అచ్చయతో పటిగ్గణ్హాతు ఆయతిం సంవరాయా’’తి. అథ ఖో భగవా సితం పాత్వాకాసి. అథ ఖో తా దేవతాయో భియ్యోసోమత్తాయ ఉజ్ఝాయన్తియో వేహాసం అబ్భుగ్గఞ్ఛుం. ఏకా దేవతా భగవతో సన్తికే ఇమం గాథం అభాసి –
Atha kho tā devatāyo pathaviyaṃ patiṭṭhahitvā bhagavato pādesu sirasā nipatitvā bhagavantaṃ etadavocuṃ – ‘‘accayo no, bhante, accagamā yathābālaṃ yathāmūḷhaṃ yathāakusalaṃ 2, yā mayaṃ bhagavantaṃ āsādetabbaṃ amaññimhā. Tāsaṃ no, bhante, bhagavā accayaṃ accayato paṭiggaṇhātu āyatiṃ saṃvarāyā’’ti. Atha kho bhagavā sitaṃ pātvākāsi. Atha kho tā devatāyo bhiyyosomattāya ujjhāyantiyo vehāsaṃ abbhuggañchuṃ. Ekā devatā bhagavato santike imaṃ gāthaṃ abhāsi –
‘‘అచ్చయం దేసయన్తీనం, యో చే న పటిగణ్హతి;
‘‘Accayaṃ desayantīnaṃ, yo ce na paṭigaṇhati;
కోపన్తరో దోసగరు, స వేరం పటిముఞ్చతీ’’తి.
Kopantaro dosagaru, sa veraṃ paṭimuñcatī’’ti.
‘‘కస్సచ్చయా న విజ్జన్తి, కస్స నత్థి అపాగతం;
‘‘Kassaccayā na vijjanti, kassa natthi apāgataṃ;
‘‘తథాగతస్స బుద్ధస్స, సబ్బభూతానుకమ్పినో;
‘‘Tathāgatassa buddhassa, sabbabhūtānukampino;
తస్సచ్చయా న విజ్జన్తి, తస్స నత్థి అపాగతం;
Tassaccayā na vijjanti, tassa natthi apāgataṃ;
‘‘అచ్చయం దేసయన్తీనం, యో చే న పటిగణ్హతి;
‘‘Accayaṃ desayantīnaṃ, yo ce na paṭigaṇhati;
కోపన్తరో దోసగరు, స వేరం పటిముఞ్చతి;
Kopantaro dosagaru, sa veraṃ paṭimuñcati;
తం వేరం నాభినన్దామి, పటిగ్గణ్హామి వోచ్చయ’’న్తి.
Taṃ veraṃ nābhinandāmi, paṭiggaṇhāmi voccaya’’nti.
Footnotes:
Related texts:
అట్ఠకథా • Aṭṭhakathā / సుత్తపిటక (అట్ఠకథా) • Suttapiṭaka (aṭṭhakathā) / సంయుత్తనికాయ (అట్ఠకథా) • Saṃyuttanikāya (aṭṭhakathā) / ౫. ఉజ్ఝానసఞ్ఞిసుత్తవణ్ణనా • 5. Ujjhānasaññisuttavaṇṇanā
టీకా • Tīkā / సుత్తపిటక (టీకా) • Suttapiṭaka (ṭīkā) / సంయుత్తనికాయ (టీకా) • Saṃyuttanikāya (ṭīkā) / ౫. ఉజ్ఝానసఞ్ఞిసుత్తవణ్ణనా • 5. Ujjhānasaññisuttavaṇṇanā