| Library / Tipiṭaka / तिपिटक • Tipiṭaka / सारत्थदीपनी-टीका • Sāratthadīpanī-ṭīkā |
९. उक्खित्तसम्भोगसिक्खापदवण्णना
9. Ukkhittasambhogasikkhāpadavaṇṇanā
४२४. नवमे पयोगगणनायाति दानग्गहणप्पयोगगणनाय। संवासे कम्मपरियोसानवसेन, सहसेय्याय एकस्मिं निपन्ने इतरस्स निपज्जनपयोगवसेन आपत्तिपरिच्छेदो वेदितब्बो। एत्थ च पदभाजने ‘‘एकच्छन्ने’’ति अविसेसेन वुत्तत्ता नानूपचारेपि एकच्छन्ने निपज्जन्तस्स आपत्ति। तेनेव मातिकाट्ठकथायं (कङ्खा॰ अट्ठ॰ उक्खित्तसम्भोगसिक्खापदवण्णना) वुत्तं ‘‘सह वा सेय्यं कप्पेय्याति नानूपचारेपि एकच्छन्ने निपज्जेय्या’’ति। पण्णत्तिं अजानन्तेन अरहतापि किरियाब्याकतचित्तेन आपज्जितब्बत्ता ‘‘तिचित्त’’न्ति वुत्तं। यं पन केनचि वुत्तं ‘‘तिचित्तन्ति एत्थ विपाकाब्याकतचित्तेन सह वा सेय्यं कप्पेय्याति एवमत्थो दट्ठब्बो, अञ्ञथा सचित्तकत्ता सिक्खापदस्स किरियाब्याकतं सन्धाय न युज्जती’’ति, तं न गहेतब्बं। न हि सचित्तकसिक्खापदवीतिक्कमो अरहतो न सम्भवति। तेनेव पथवीखणनादीसु सचित्तकसिक्खापदेसु तिचित्तमेव वुत्तं। सेसमेत्थ उत्तानमेव। अकतानुधम्मता, जानना, सम्भोगादिकरणन्ति इमानि पनेत्थ तीणि अङ्गानि।
424. Navame payogagaṇanāyāti dānaggahaṇappayogagaṇanāya. Saṃvāse kammapariyosānavasena, sahaseyyāya ekasmiṃ nipanne itarassa nipajjanapayogavasena āpattiparicchedo veditabbo. Ettha ca padabhājane ‘‘ekacchanne’’ti avisesena vuttattā nānūpacārepi ekacchanne nipajjantassa āpatti. Teneva mātikāṭṭhakathāyaṃ (kaṅkhā. aṭṭha. ukkhittasambhogasikkhāpadavaṇṇanā) vuttaṃ ‘‘saha vā seyyaṃ kappeyyāti nānūpacārepi ekacchanne nipajjeyyā’’ti. Paṇṇattiṃ ajānantena arahatāpi kiriyābyākatacittena āpajjitabbattā ‘‘ticitta’’nti vuttaṃ. Yaṃ pana kenaci vuttaṃ ‘‘ticittanti ettha vipākābyākatacittena saha vā seyyaṃ kappeyyāti evamattho daṭṭhabbo, aññathā sacittakattā sikkhāpadassa kiriyābyākataṃ sandhāya na yujjatī’’ti, taṃ na gahetabbaṃ. Na hi sacittakasikkhāpadavītikkamo arahato na sambhavati. Teneva pathavīkhaṇanādīsu sacittakasikkhāpadesu ticittameva vuttaṃ. Sesamettha uttānameva. Akatānudhammatā, jānanā, sambhogādikaraṇanti imāni panettha tīṇi aṅgāni.
उक्खित्तसम्भोगसिक्खापदवण्णना निट्ठिता।
Ukkhittasambhogasikkhāpadavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / महाविभङ्ग • Mahāvibhaṅga / ७. सप्पाणकवग्गो • 7. Sappāṇakavaggo
अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / महाविभङ्ग-अट्ठकथा • Mahāvibhaṅga-aṭṭhakathā / ९. उक्खित्तसम्भोगसिक्खापदवण्णना • 9. Ukkhittasambhogasikkhāpadavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / ९. उक्खित्तसम्भोगसिक्खापदवण्णना • 9. Ukkhittasambhogasikkhāpadavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / ९. उक्खित्तसम्भोगसिक्खापदं • 9. Ukkhittasambhogasikkhāpadaṃ
