Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā

[527] 2. уммаад̣̇анд̇ийж̇аад̇агаван̣н̣анаа

[527] 2. Ummādantījātakavaṇṇanā

нивзсанам̣ гассануд̣̇ам̣ сунанд̣̇аад̇и ид̣̇ам̣ сад̇т̇аа ж̇зд̇аванз вихаранд̇о угган̣тид̇абхигкум̣ аараб̣бха гат̇зси. со гирзгад̣̇ивасам̣ саавад̇т̇ияам̣ бин̣д̣ааяа жаранд̇о згам̣ алан̇гад̇абадияад̇д̇ам̣ уд̇д̇амаруубад̇харам̣ ид̇т̇им̣ ологзд̇ваа бадиб̣ад̣̇д̇хажид̇д̇о худ̇ваа жид̇д̇ам̣ нивад̇д̇зд̇ум̣ асаггонд̇о вихаарамзва ааг̇анд̇ваа д̇ад̇о бадтааяа саллавид̣̇д̇хо вияа рааг̇аад̇уро бханд̇амиг̇абадибхааг̇о гисо д̇хаманийсант̇ад̇аг̇ад̇д̇о уббан̣д̣уббан̣д̣угаж̇аад̇о анабхирад̇о згирияаабат̇зби жид̇д̇ассаад̣̇ам̣ алабханд̇о аажарияавад̇д̇аад̣̇ийни бахааяа уд̣̇д̣̇зсабарибужчаагаммадтаанаануяог̇арахид̇о вихааси. со сахааяабхигкуухи ‘‘буб̣б̣з д̇вам̣, аавусо, санд̇инд̣̇рияо виббасаннамукаван̣н̣о, ид̣̇аани но д̇ат̇аа, гим̣ ну ко гааран̣а’’нд̇и будто, ‘‘аавусо, анабхирад̇омхий’’д̇и ааха. ат̇а нам̣ д̇з ‘‘абхирамаавусо, саасанз, б̣уд̣̇д̇хуббаад̣̇о наама д̣̇уллабхо, д̇ат̇аа сад̣̇д̇хаммассаванам̣ мануссабадилаабхо жа, со д̇вам̣ мануссабадилаабхам̣ бадилабхид̇ваа д̣̇угкассанд̇агирияам̣ бад̇т̇аяамаано ассумукам̣ н̃аад̇иж̇анам̣ бахааяа сад̣̇д̇хааяа баб̣б̣аж̇ид̇ваа гим̣гааран̣аа гилзсавасам̣ яааси, гилзсаа наамзд̇з г̇ан̣д̣уббаад̣̇агабаан̣агам̣ убаад̣̇ааяа саб̣б̣аб̣аалаж̇анасаад̇хааран̣аа, яз д̇зсам̣ вад̇т̇убхууд̇аа, д̇зби аббассаад̣̇аа гаамаа б̣ахуд̣̇угкаа б̣ахубааяаасаа, аад̣̇ийнаво зд̇т̇а бхияяо. адтиган̇галуубамаа гаамаа, мам̣сабзсуубамаа гаамаа, д̇ин̣уггуубамаа гаамаа, ан̇г̇аарагаасуубамаа гаамаа, субинагуубамаа гаамаа, яаажид̇агуубамаа гаамаа, ругкапалуубамаа гаамаа, асисуунуубамаа гаамаа, сад̇д̇исуулуубамаа гаамаа, саббасируубамаа гаамаа, аг̇г̇игканд̇хуубамаа гаамаа, д̇вам̣ наама зваруубз б̣уд̣̇д̇хасаасанз баб̣б̣аж̇ид̇ваа звам̣ анад̇т̇агаарагаанам̣ гилзсаанам̣ васам̣ г̇ад̇осий’’д̇и овад̣̇ид̇ваа ад̇д̇ано гат̇ам̣ г̇аахаабзд̇ум̣ асаггонд̇аа сад̇т̇у санд̇игам̣ д̇хаммасабхам̣ нзд̇ваа ‘‘гим̣, бхигкавз, анижчамаанагам̣ бхигкум̣ аанаяид̇т̇аа’’д̇и вуд̇д̇з, ‘‘бханд̇з, аяам̣ гира бхигку угган̣тид̇о’’д̇и аахам̣су. сад̇т̇аа ‘‘сажжам̣ гираа’’д̇и бужчид̇ваа ‘‘сажжам̣, бханд̇з’’д̇и вуд̇д̇з ‘‘бхигку бораан̣агабан̣д̣ид̇аа раж̇ж̇ам̣ анусаасанд̇ааби гилзсз уббаннз д̇асса васам̣ аг̇анд̇ваа жид̇д̇ам̣ ниваарзд̇ваа на аяуд̇д̇агам̣ гарим̣суу’’д̇и вад̇ваа ад̇ийд̇ам̣ аахари.

Nivesanaṃ kassanudaṃ sunandāti idaṃ satthā jetavane viharanto ukkaṇṭhitabhikkhuṃ ārabbha kathesi. So kirekadivasaṃ sāvatthiyaṃ piṇḍāya caranto ekaṃ alaṅkatapaṭiyattaṃ uttamarūpadharaṃ itthiṃ oloketvā paṭibaddhacitto hutvā cittaṃ nivattetuṃ asakkonto vihārameva āgantvā tato paṭṭhāya sallaviddho viya rāgāturo bhantamigapaṭibhāgo kiso dhamanīsanthatagatto uppaṇḍuppaṇḍukajāto anabhirato ekiriyāpathepi cittassādaṃ alabhanto ācariyavattādīni pahāya uddesaparipucchākammaṭṭhānānuyogarahito vihāsi. So sahāyabhikkhūhi ‘‘pubbe tvaṃ, āvuso, santindriyo vippasannamukhavaṇṇo, idāni no tathā, kiṃ nu kho kāraṇa’’nti puṭṭho, ‘‘āvuso, anabhiratomhī’’ti āha. Atha naṃ te ‘‘abhiramāvuso, sāsane, buddhuppādo nāma dullabho, tathā saddhammassavanaṃ manussapaṭilābho ca, so tvaṃ manussapaṭilābhaṃ paṭilabhitvā dukkhassantakiriyaṃ patthayamāno assumukhaṃ ñātijanaṃ pahāya saddhāya pabbajitvā kiṃkāraṇā kilesavasaṃ yāsi, kilesā nāmete gaṇḍuppādakapāṇakaṃ upādāya sabbabālajanasādhāraṇā, ye tesaṃ vatthubhūtā, tepi appassādā kāmā bahudukkhā bahupāyāsā, ādīnavo ettha bhiyyo. Aṭṭhikaṅkalūpamā kāmā, maṃsapesūpamā kāmā, tiṇukkūpamā kāmā, aṅgārakāsūpamā kāmā, supinakūpamā kāmā, yācitakūpamā kāmā, rukkhaphalūpamā kāmā, asisūnūpamā kāmā, sattisūlūpamā kāmā, sappasirūpamā kāmā, aggikkhandhūpamā kāmā, tvaṃ nāma evarūpe buddhasāsane pabbajitvā evaṃ anatthakārakānaṃ kilesānaṃ vasaṃ gatosī’’ti ovaditvā attano kathaṃ gāhāpetuṃ asakkontā satthu santikaṃ dhammasabhaṃ netvā ‘‘kiṃ, bhikkhave, anicchamānakaṃ bhikkhuṃ ānayitthā’’ti vutte, ‘‘bhante, ayaṃ kira bhikkhu ukkaṇṭhito’’ti āhaṃsu. Satthā ‘‘saccaṃ kirā’’ti pucchitvā ‘‘saccaṃ, bhante’’ti vutte ‘‘bhikkhu porāṇakapaṇḍitā rajjaṃ anusāsantāpi kilese uppanne tassa vasaṃ agantvā cittaṃ nivāretvā na ayuttakaṃ kariṃsū’’ti vatvā atītaṃ āhari.

ад̇ийд̇з сивирадтз аридтабуранаг̇арз сиви наама рааж̇аа раж̇ж̇ам̣ гаарзси. б̣од̇хисад̇д̇о д̇асса аг̇г̇амахзсияаа гужчисмим̣ ниб̣б̣ад̇д̇и, ‘‘сивигумааро’’д̇взвасса наамам̣ гарим̣су. сзнаабад̇иссаби буд̇д̇о ж̇ааяи, ‘‘абхибаараго’’д̇исса наамам̣ гарим̣су. д̇з убхоби сахааяаа худ̇ваа абхивад̣дханд̇аа сол̣асавассигаа худ̇ваа д̇аггасилам̣ г̇анд̇ваа сиббам̣ уг̇г̇ан̣хид̇ваа ааг̇амим̣су. рааж̇аа буд̇д̇асса раж̇ж̇ам̣ ад̣̇ааси. соби абхибаарагам̣ сзнаабад̇идтаанз табзд̇ваа д̇хаммзна раж̇ж̇ам̣ гаарзси. д̇асмим̣язва наг̇арз д̇иридиважчасса наама асийд̇игодивибхавасса сздтино д̇хийд̇аа ниб̣б̣ад̇д̇и уд̇д̇амаруубад̇хараа собхаг̇г̇аббад̇д̇аа субхалагкан̣зна саманнааг̇ад̇аа, д̇ассаа наамаг̇г̇ахан̣ад̣̇ивасз ‘‘уммаад̣̇анд̇ий’’д̇и наамам̣ гарим̣су. саа сол̣асавассигагаалз ад̇игганд̇амаанусаван̣н̣аа д̣̇зважчараа вияа абхируубаа д̣̇ассанийяаа баасаад̣̇игаа барамааяа ван̣н̣абогкарад̇ааяа саманнааг̇ад̇аа ахоси. яз яз бут̇уж̇ж̇анаа д̇ам̣ бассанд̇и, д̇з д̇з сагабхаавзна сан̣таад̇ум̣ асаггонд̇аа сураабаанамад̣̇амад̇д̇аа вияа гилзсамад̣̇зна мад̇д̇аа худ̇ваа сад̇им̣ бажжубадтаабзд̇ум̣ самад̇т̇аа наама наахзсум̣.

Atīte siviraṭṭhe ariṭṭhapuranagare sivi nāma rājā rajjaṃ kāresi. Bodhisatto tassa aggamahesiyā kucchismiṃ nibbatti, ‘‘sivikumāro’’tvevassa nāmaṃ kariṃsu. Senāpatissapi putto jāyi, ‘‘abhipārako’’tissa nāmaṃ kariṃsu. Te ubhopi sahāyā hutvā abhivaḍḍhantā soḷasavassikā hutvā takkasilaṃ gantvā sippaṃ uggaṇhitvā āgamiṃsu. Rājā puttassa rajjaṃ adāsi. Sopi abhipārakaṃ senāpatiṭṭhāne ṭhapetvā dhammena rajjaṃ kāresi. Tasmiṃyeva nagare tiriṭivacchassa nāma asītikoṭivibhavassa seṭṭhino dhītā nibbatti uttamarūpadharā sobhaggappattā subhalakkhaṇena samannāgatā, tassā nāmaggahaṇadivase ‘‘ummādantī’’ti nāmaṃ kariṃsu. Sā soḷasavassikakāle atikkantamānusavaṇṇā devaccharā viya abhirūpā dassanīyā pāsādikā paramāya vaṇṇapokkharatāya samannāgatā ahosi. Ye ye puthujjanā taṃ passanti, te te sakabhāvena saṇṭhātuṃ asakkontā surāpānamadamattā viya kilesamadena mattā hutvā satiṃ paccupaṭṭhāpetuṃ samatthā nāma nāhesuṃ.

ат̇ассаа бид̇аа д̇иридиважчо рааж̇аанам̣ убасан̇гамид̇ваа ‘‘д̣̇зва, мама г̇зхз ид̇т̇ирад̇анам̣ уббаннам̣, ран̃н̃ова анужчавигам̣, лагкан̣абаатагз б̣раахман̣з бзсзд̇ваа д̇ам̣ виймам̣саабзд̇ваа яат̇ааружи гарохий’’д̇и ааха. рааж̇аа ‘‘саад̇хуу’’д̇и вад̇ваа б̣раахман̣з бзсзси. д̇з сздтиг̇зхам̣ г̇анд̇ваа гад̇асаггаарасаммаанаа бааяаасам̣ барибхун̃ж̇им̣су. д̇асмим̣ кан̣з уммаад̣̇анд̇ий саб̣б̣аалан̇гаарабадиман̣д̣ид̇аа д̇зсам̣ санд̇игам̣ аг̇амааси. д̇з д̇ам̣ д̣̇исваа сад̇им̣ бажжубадтаабзд̇ум̣ асаггонд̇аа гилзсамад̣̇амад̇д̇аа худ̇ваа ад̇д̇ано виббагад̇абхож̇анабхаавам̣ на ж̇ааним̣су. згажжз аалобам̣ г̇ахзд̇ваа ‘‘бхун̃ж̇иссаамаа’’д̇и сан̃н̃ааяа сийсз табзсум̣, згажжз убагажчанд̇арз кибим̣су, згажжз бхид̇д̇им̣ бахарим̣су, саб̣б̣зва уммад̇д̇агаа ахзсум̣. саа д̇з д̣̇исваа ‘‘имз гира мама лагкан̣ам̣ виймам̣сиссанд̇и, г̇ийвааяам̣ нз г̇ахзд̇ваа нийхарат̇аа’’д̇и нийхараабзси. д̇з ман̇губхууд̇аа рааж̇анивзсанам̣ г̇анд̇ваа уммаад̣̇анд̇ияаа гуд̣̇д̇хаа ‘‘д̣̇зва, саа ид̇т̇ий гаал̣аган̣н̣ий, на д̇умхаагам̣ анужчавигаа’’д̇и вад̣̇им̣су. рааж̇аа ‘‘гаал̣аган̣н̣ий гираа’’д̇и на д̇ам̣ аан̣аабзси. саа д̇ам̣ бавад̇д̇им̣ суд̇ваа ‘‘ахам̣ гира гаал̣аган̣н̣ийд̇и ран̃н̃аа на г̇ахид̇аа, гаал̣аган̣н̣ияо наама на зваруубаа хонд̇ий’’д̇и вад̇ваа ‘‘ход̇у, сажз бана д̇ам̣ рааж̇аанам̣ бассиссаами, ж̇ааниссаамий’’д̇и д̇асмим̣ аагхаад̇ам̣ б̣анд̇хи. ат̇а нам̣ бид̇аа абхибаарагасса ад̣̇ааси, саа д̇асса бияаа ахоси манаабаа.

Athassā pitā tiriṭivaccho rājānaṃ upasaṅkamitvā ‘‘deva, mama gehe itthiratanaṃ uppannaṃ, raññova anucchavikaṃ, lakkhaṇapāṭhake brāhmaṇe pesetvā taṃ vīmaṃsāpetvā yathāruci karohī’’ti āha. Rājā ‘‘sādhū’’ti vatvā brāhmaṇe pesesi. Te seṭṭhigehaṃ gantvā katasakkārasammānā pāyāsaṃ paribhuñjiṃsu. Tasmiṃ khaṇe ummādantī sabbālaṅkārapaṭimaṇḍitā tesaṃ santikaṃ agamāsi. Te taṃ disvā satiṃ paccupaṭṭhāpetuṃ asakkontā kilesamadamattā hutvā attano vippakatabhojanabhāvaṃ na jāniṃsu. Ekacce ālopaṃ gahetvā ‘‘bhuñjissāmā’’ti saññāya sīse ṭhapesuṃ, ekacce upakacchantare khipiṃsu, ekacce bhittiṃ pahariṃsu, sabbeva ummattakā ahesuṃ. Sā te disvā ‘‘ime kira mama lakkhaṇaṃ vīmaṃsissanti, gīvāyaṃ ne gahetvā nīharathā’’ti nīharāpesi. Te maṅkubhūtā rājanivesanaṃ gantvā ummādantiyā kuddhā ‘‘deva, sā itthī kāḷakaṇṇī, na tumhākaṃ anucchavikā’’ti vadiṃsu. Rājā ‘‘kāḷakaṇṇī kirā’’ti na taṃ āṇāpesi. Sā taṃ pavattiṃ sutvā ‘‘ahaṃ kira kāḷakaṇṇīti raññā na gahitā, kāḷakaṇṇiyo nāma na evarūpā hontī’’ti vatvā ‘‘hotu, sace pana taṃ rājānaṃ passissāmi, jānissāmī’’ti tasmiṃ āghātaṃ bandhi. Atha naṃ pitā abhipārakassa adāsi, sā tassa piyā ahosi manāpā.

гасса бана гаммасса ниссанд̣̇зна саа звам̣ абхируубаа ахосийд̇и? рад̇д̇авад̇т̇ад̣̇аанасса ниссанд̣̇знаад̇и. саа гира ад̇ийд̇з б̣аараан̣асияам̣ д̣̇алид̣̇д̣̇агулз ниб̣б̣ад̇д̇ид̇ваа уссавад̣̇ивасз бун̃н̃асамбаннаа ид̇т̇ияо гусумбхарад̇д̇авад̇т̇ам̣ ниваасзд̇ваа алан̇гад̇аа гийл̣анд̇ияо д̣̇исваа д̇аад̣̇исам̣ вад̇т̇ам̣ ниваасзд̇ваа гийл̣ид̇угаамаа худ̇ваа маад̇аабид̇уунам̣ аарожзд̇ваа д̇зхи, ‘‘амма, маяам̣ д̣̇алид̣̇д̣̇аа, гуд̇о но зваруубам̣ вад̇т̇а’’нд̇и вуд̇д̇з ‘‘д̇зна хи мам̣ згасмим̣ ад̣дхагулз бхад̇им̣ гаад̇ум̣ ануж̇аанаат̇а , д̇з мама г̇ун̣ам̣ н̃ад̇ваа д̣̇ассанд̇ий’’д̇и вад̇ваа д̇зхи анун̃н̃аад̇аа згам̣ гулам̣ убасан̇гамид̇ваа ‘‘гусумбхарад̇д̇авад̇т̇зна бхад̇им̣ гаромий’’д̇и ааха. ат̇а нам̣ д̇з ‘‘д̇ийн̣и сам̣важчараани гаммз гад̇з д̇ава г̇ун̣ам̣ н̃ад̇ваа д̣̇ассаамаа’’д̇и вад̣̇им̣су. саа ‘‘саад̇хуу’’д̇и бадиссун̣ид̇ваа гаммам̣ бадибаж̇ж̇и. д̇з д̇ассаа г̇ун̣ам̣ н̃ад̇ваа абарибун̣н̣зсуязва д̇ийсу сам̣важчарзсу д̇ассаа гханагусумбхарад̇д̇авад̇т̇зна сад̣̇д̇хим̣ ан̃н̃амби вад̇т̇ам̣ д̣̇ад̇ваа ‘‘д̇ава сахааяигаахи сад̣̇д̇хим̣ г̇анд̇ваа нхад̇ваа ниваасзхий’’д̇и д̇ам̣ бзсаяим̣су. саа сахааяигаа аад̣̇ааяа г̇анд̇ваа рад̇д̇авад̇т̇ам̣ над̣̇ийд̇ийрз табзд̇ваа нхааяи.

Kassa pana kammassa nissandena sā evaṃ abhirūpā ahosīti? Rattavatthadānassa nissandenāti. Sā kira atīte bārāṇasiyaṃ daliddakule nibbattitvā ussavadivase puññasampannā itthiyo kusumbharattavatthaṃ nivāsetvā alaṅkatā kīḷantiyo disvā tādisaṃ vatthaṃ nivāsetvā kīḷitukāmā hutvā mātāpitūnaṃ ārocetvā tehi, ‘‘amma, mayaṃ daliddā, kuto no evarūpaṃ vattha’’nti vutte ‘‘tena hi maṃ ekasmiṃ aḍḍhakule bhatiṃ kātuṃ anujānātha , te mama guṇaṃ ñatvā dassantī’’ti vatvā tehi anuññātā ekaṃ kulaṃ upasaṅkamitvā ‘‘kusumbharattavatthena bhatiṃ karomī’’ti āha. Atha naṃ te ‘‘tīṇi saṃvaccharāni kamme kate tava guṇaṃ ñatvā dassāmā’’ti vadiṃsu. Sā ‘‘sādhū’’ti paṭissuṇitvā kammaṃ paṭipajji. Te tassā guṇaṃ ñatvā aparipuṇṇesuyeva tīsu saṃvaccharesu tassā ghanakusumbharattavatthena saddhiṃ aññampi vatthaṃ datvā ‘‘tava sahāyikāhi saddhiṃ gantvā nhatvā nivāsehī’’ti taṃ pesayiṃsu. Sā sahāyikā ādāya gantvā rattavatthaṃ nadītīre ṭhapetvā nhāyi.

д̇асмим̣ кан̣з зго гассабад̣̇асаб̣аласса сааваго ажчиннажийваро саакаабхан̇г̇ам̣ ниваасзд̇ваа жа баарубид̇ваа жа д̇ам̣ бад̣̇зсам̣ баабун̣и. саа д̇ам̣ д̣̇исваа ‘‘аяам̣ бхад̣̇анд̇о ажчиннажийваро бхависсад̇и, буб̣б̣зби ад̣̇иннабхаавзна мз ниваасанам̣ д̣̇уллабхам̣ ж̇аад̇а’’нд̇и д̇ам̣ вад̇т̇ам̣ д̣̇вид̇хаа паалзд̇ваа ‘‘згам̣ годтаасам̣ аяяасса д̣̇ассаамий’’д̇и жинд̇зд̇ваа уд̇д̇арид̇ваа ад̇д̇ано ниваасанам̣ ниваасзд̇ваа ‘‘д̇идтат̇а, бханд̇з’’д̇и вад̇ваа т̇зрам̣ ванд̣̇ид̇ваа рад̇д̇авад̇т̇ам̣ маж̇жхз паалзд̇ваа д̇ассзгам̣ годтаасам̣ ад̣̇ааси. со згаманд̇з бадижчаннз тад̇ваа саакаабхан̇г̇ам̣ чад̣д̣зд̇ваа д̇ассзгам̣ ган̣н̣ам̣ ниваасзд̇ваа згам̣ баарубид̇ваа нигками. ат̇асса вад̇т̇обхаасзна сагаласарийрам̣ д̇арун̣асуурияо вияа згобхаасам̣ ахоси. саа д̇ам̣ д̣̇исваа ‘‘маяхам̣ аяяо батамам̣ на собхад̇и, ид̣̇аани д̇арун̣асуурияо вияа вирожад̇и, ид̣̇амби зд̇ассзва д̣̇ассаамий’’д̇и д̣̇уд̇ияамби годтаасам̣ д̣̇ад̇ваа ‘‘бханд̇з, ахам̣ бхавз бхавз вижаранд̇ий уд̇д̇амаруубад̇хараа бхавзяяам̣, мам̣ д̣̇исваа гожи бурисо сагабхаавзна сан̣таад̇ум̣ маа асагки, маяаа абхируубад̇араа наама ан̃н̃аа маа ход̇уу’’д̇и бад̇т̇анам̣ бадтабзси. т̇зроби анумод̣̇анам̣ гад̇ваа баггаами.

Tasmiṃ khaṇe eko kassapadasabalassa sāvako acchinnacīvaro sākhābhaṅgaṃ nivāsetvā ca pārupitvā ca taṃ padesaṃ pāpuṇi. Sā taṃ disvā ‘‘ayaṃ bhadanto acchinnacīvaro bhavissati, pubbepi adinnabhāvena me nivāsanaṃ dullabhaṃ jāta’’nti taṃ vatthaṃ dvidhā phāletvā ‘‘ekaṃ koṭṭhāsaṃ ayyassa dassāmī’’ti cintetvā uttaritvā attano nivāsanaṃ nivāsetvā ‘‘tiṭṭhatha, bhante’’ti vatvā theraṃ vanditvā rattavatthaṃ majjhe phāletvā tassekaṃ koṭṭhāsaṃ adāsi. So ekamante paṭicchanne ṭhatvā sākhābhaṅgaṃ chaḍḍetvā tassekaṃ kaṇṇaṃ nivāsetvā ekaṃ pārupitvā nikkhami. Athassa vatthobhāsena sakalasarīraṃ taruṇasūriyo viya ekobhāsaṃ ahosi. Sā taṃ disvā ‘‘mayhaṃ ayyo paṭhamaṃ na sobhati, idāni taruṇasūriyo viya virocati, idampi etasseva dassāmī’’ti dutiyampi koṭṭhāsaṃ datvā ‘‘bhante, ahaṃ bhave bhave vicarantī uttamarūpadharā bhaveyyaṃ, maṃ disvā koci puriso sakabhāvena saṇṭhātuṃ mā asakkhi, mayā abhirūpatarā nāma aññā mā hotū’’ti patthanaṃ paṭṭhapesi. Theropi anumodanaṃ katvā pakkāmi.

саа д̣̇звалогз сам̣саранд̇ий д̇асмим̣ гаалз аридтабурз ниб̣б̣ад̇д̇ид̇ваа д̇ат̇аа абхируубаа ахоси. ат̇а д̇асмим̣ наг̇арз гад̇д̇игачан̣ам̣ гхосаяим̣су, гад̇д̇игабун̣н̣амааяам̣ наг̇арам̣ саж̇ж̇аяим̣су. абхибаараго ад̇д̇ано аарагкадтаанам̣ г̇ажчанд̇о д̇ам̣ ааманд̇зд̇ваа ‘‘бхад̣̇д̣̇з, уммаад̣̇анд̇и аж̇ж̇а гад̇д̇игарад̇д̇ивааро чан̣о, рааж̇аа наг̇арам̣ бад̣̇агкин̣ам̣ гаронд̇о батамам̣ имам̣ г̇зхад̣̇ваарам̣ ааг̇амиссад̇и, маа ко д̇асса ад̇д̇аанам̣ д̣̇ассзси, соби д̇ам̣ д̣̇исваа сад̇им̣ убадтаабзд̇ум̣ на сагкиссад̇ий’’д̇и ааха. саа ‘‘г̇ажча д̇вам̣, саами, ахам̣ ж̇ааниссаамий’’д̇и самбадижчид̇ваа д̇асмим̣ г̇ад̇з д̣̇аасим̣ аан̣аабзси ‘‘ран̃н̃о имам̣ г̇зхад̣̇ваарам̣ ааг̇ад̇агаалз маяхам̣ аарожзяяаасий’’д̇и. ат̇а суурияз ад̇т̇ан̇г̇ад̇з уг̇г̇ахз бун̣н̣ажанд̣̇з д̣̇званаг̇арз вияа наг̇арз алан̇гад̇з саб̣б̣ад̣̇исаасу д̣̇ийбзсу ж̇алид̇зсу рааж̇аа саб̣б̣аалан̇гаарабадиман̣д̣ид̇о ааж̇ан̃н̃арат̇авараг̇ад̇о амажжаг̇ан̣абаривуд̇о маханд̇зна яасзна наг̇арам̣ бад̣̇агкин̣ам̣ гаронд̇о батамамзва абхибаарагасса г̇зхад̣̇ваарам̣ аг̇амааси. д̇ам̣ бана г̇зхам̣ маносилааван̣н̣абаагаарабаригкид̇д̇ам̣ алан̇гад̇ад̣̇ваараддаалагам̣ собхаг̇г̇аббад̇д̇ам̣ баасаад̣̇игам̣. д̇асмим̣ кан̣з д̣̇аасий уммаад̣̇анд̇ияаа аарожзси. саа бубпасамуг̇г̇ам̣ г̇аахаабзд̇ваа гиннарилийл̣ааяа ваад̇абаанам̣ ниссааяа тид̇аа ран̃н̃о бубпаани киби. со д̇ам̣ уллогзд̇ваа гилзсамад̣̇амад̇д̇о сад̇им̣ убадтаабзд̇ум̣ асаггонд̇о ‘‘абхибаарагассзд̇ам̣ г̇зха’’нд̇и сан̃ж̇аанид̇умби наасагки, ат̇а саарат̇им̣ ааманд̇зд̇ваа бужчанд̇о д̣̇вз г̇аат̇аа абхааси –

Sā devaloke saṃsarantī tasmiṃ kāle ariṭṭhapure nibbattitvā tathā abhirūpā ahosi. Atha tasmiṃ nagare kattikachaṇaṃ ghosayiṃsu, kattikapuṇṇamāyaṃ nagaraṃ sajjayiṃsu. Abhipārako attano ārakkhaṭṭhānaṃ gacchanto taṃ āmantetvā ‘‘bhadde, ummādanti ajja kattikarattivāro chaṇo, rājā nagaraṃ padakkhiṇaṃ karonto paṭhamaṃ imaṃ gehadvāraṃ āgamissati, mā kho tassa attānaṃ dassesi, sopi taṃ disvā satiṃ upaṭṭhāpetuṃ na sakkhissatī’’ti āha. Sā ‘‘gaccha tvaṃ, sāmi, ahaṃ jānissāmī’’ti sampaṭicchitvā tasmiṃ gate dāsiṃ āṇāpesi ‘‘rañño imaṃ gehadvāraṃ āgatakāle mayhaṃ āroceyyāsī’’ti. Atha sūriye atthaṅgate uggahe puṇṇacande devanagare viya nagare alaṅkate sabbadisāsu dīpesu jalitesu rājā sabbālaṅkārapaṭimaṇḍito ājaññarathavaragato amaccagaṇaparivuto mahantena yasena nagaraṃ padakkhiṇaṃ karonto paṭhamameva abhipārakassa gehadvāraṃ agamāsi. Taṃ pana gehaṃ manosilāvaṇṇapākāraparikkhittaṃ alaṅkatadvāraṭṭālakaṃ sobhaggappattaṃ pāsādikaṃ. Tasmiṃ khaṇe dāsī ummādantiyā ārocesi. Sā pupphasamuggaṃ gāhāpetvā kinnarilīḷāya vātapānaṃ nissāya ṭhitā rañño pupphāni khipi. So taṃ ulloketvā kilesamadamatto satiṃ upaṭṭhāpetuṃ asakkonto ‘‘abhipārakassetaṃ geha’’nti sañjānitumpi nāsakkhi, atha sārathiṃ āmantetvā pucchanto dve gāthā abhāsi –

57.

‘‘нивзсанам̣ гасса нуд̣̇ам̣ сунанд̣̇а, баагаарзна бан̣д̣умаязна г̇уд̇д̇ам̣;

‘‘Nivesanaṃ kassa nudaṃ sunanda, pākārena paṇḍumayena guttaṃ;

гаа д̣̇иссад̇и аг̇г̇исикаава д̣̇уурз, взхааяасам̣ баб̣б̣ад̇аг̇г̇зва ажжи.

Kā dissati aggisikhāva dūre, vehāyasaṃ pabbataggeva acci.

58.

‘‘д̇хийд̇аа нваяам̣ гасса сунанд̣̇а ход̇и, сун̣исаа нваяам̣ гасса ат̇оби бхарияаа;

‘‘Dhītā nvayaṃ kassa sunanda hoti, suṇisā nvayaṃ kassa athopi bhariyā;

агкаахи мз киббамид̇хзва будто, аваавадаа яад̣̇и ваа ад̇т̇и бхад̇д̇аа’’д̇и.

Akkhāhi me khippamidheva puṭṭho, avāvaṭā yadi vā atthi bhattā’’ti.

д̇ад̇т̇а гасса нуд̣̇анд̇и гасса ну ид̣̇ам̣. бан̣д̣умаязнаад̇и рад̇д̇идтагамаязна. д̣̇иссад̇ийд̇и ваад̇абаанз тид̇аа бан̃н̃ааяад̇и. ажжийд̇и аналаж̇аалагканд̇хо. д̇хийд̇аа нваяанд̇и д̇хийд̇аа ну аяам̣. аваавадаад̇и абзд̇ааваран̣аа абариг̇г̇ахаа. бхад̇д̇аад̇и яад̣̇и ваа ассаа саамиго ад̇т̇и, зд̇ам̣ мз агкаахийд̇и.

Tattha kassa nudanti kassa nu idaṃ. Paṇḍumayenāti rattiṭṭhakamayena. Dissatīti vātapāne ṭhitā paññāyati. Accīti analajālakkhandho. Dhītānvayanti dhītā nu ayaṃ. Avāvaṭāti apetāvaraṇā apariggahā. Bhattāti yadi vā assā sāmiko atthi, etaṃ me akkhāhīti.

ат̇асса со аажигканд̇о д̣̇вз г̇аат̇аа абхааси –

Athassa so ācikkhanto dve gāthā abhāsi –

59.

‘‘ахан̃хи ж̇аанаами ж̇анинд̣̇а зд̇ам̣, мад̇яаа жа бзд̇яаа жа ат̇оби ассаа;

‘‘Ahañhi jānāmi janinda etaṃ, matyā ca petyā ca athopi assā;

д̇авзва со бурисо бхуумибаала, рад̇д̇инд̣̇ивам̣ аббамад̇д̇о д̇авад̇т̇з.

Taveva so puriso bhūmipāla, rattindivaṃ appamatto tavatthe.

60.

‘‘ид̣̇д̇хо жа пийд̇о жа сувад̣дхид̇о жа, амажжо жа д̇з ан̃н̃ад̇аро ж̇анинд̣̇а;

‘‘Iddho ca phīto ca suvaḍḍhito ca, amacco ca te aññataro janinda;

д̇ассзсаа бхарияаабхибаарагасса, уммаад̣̇анд̇ий наамад̇хзяязна рааж̇аа’’д̇и.

Tassesā bhariyābhipārakassa, ummādantī nāmadheyyena rājā’’ti.

д̇ад̇т̇а мад̇яаа жа бзд̇яаа жаад̇и маад̇ид̇о жа бид̇ид̇о жзд̇ам̣ ж̇аанаами. ат̇оби ассаад̇и ат̇а саамигамби ассаа ж̇аанаамийд̇и вад̣̇ад̇и. ид̣̇д̇ход̇и самид̣̇д̇хо. пийд̇од̇и вад̇т̇аалан̇гаарзхи субубпид̇о. сувад̣дхид̇од̇и судту вуд̣̇д̇хо. наамад̇хзяязнаад̇и наамзна. аяан̃хи яо нам̣ бассад̇и, д̇ам̣ уммаад̣̇зд̇и, сад̇имасса бажжубадтаабзд̇ум̣ на д̣̇зд̇и, д̇асмаа уммаад̣̇анд̇ийд̇и вужжад̇и.

Tattha matyā ca petyā cāti mātito ca pitito cetaṃ jānāmi. Athopi assāti atha sāmikampi assā jānāmīti vadati. Iddhoti samiddho. Phītoti vatthālaṅkārehi supupphito. Suvaḍḍhitoti suṭṭhu vuddho. Nāmadheyyenāti nāmena. Ayañhi yo naṃ passati, taṃ ummādeti, satimassa paccupaṭṭhāpetuṃ na deti, tasmā ummādantīti vuccati.

д̇ам̣ суд̇ваа рааж̇аа наамамассаа т̇омзнд̇о ананд̇арам̣ г̇аат̇амааха –

Taṃ sutvā rājā nāmamassā thomento anantaraṃ gāthamāha –

61.

‘‘амбхо амбхо наамамид̣̇ам̣ имиссаа, мад̇яаа жа бзд̇яаа жа гад̇ам̣ сусаад̇ху;

‘‘Ambho ambho nāmamidaṃ imissā, matyā ca petyā ca kataṃ susādhu;

д̇ад̣̇аа хи маяхам̣ авалогаяанд̇ий, уммад̇д̇агам̣ уммад̣̇анд̇ий агаасий’’д̇и.

Tadā hi mayhaṃ avalokayantī, ummattakaṃ ummadantī akāsī’’ti.

д̇ад̇т̇а мад̇яаа жа бзд̇яаа жаад̇и маад̇араа жа бид̇араа жа. маяханд̇и убаяог̇ад̇т̇з самбад̣̇аанаважанам̣. авалогаяанд̇ийд̇и маяаа авалогид̇аа саяамби мам̣ авалогаяанд̇ий мам̣ уммад̇д̇агам̣ агаасийд̇и ад̇т̇о.

Tattha matyā ca petyā cāti mātarā ca pitarā ca. Mayhanti upayogatthe sampadānavacanaṃ. Avalokayantīti mayā avalokitā sayampi maṃ avalokayantī maṃ ummattakaṃ akāsīti attho.

саа д̇асса гамбид̇абхаавам̣ н̃ад̇ваа ваад̇абаанам̣ т̇агзд̇ваа сириг̇аб̣бхамзва аг̇амааси. ран̃н̃оби д̇ассаа д̣̇идтагаалад̇о бадтааяа наг̇арам̣ бад̣̇агкин̣агаран̣з жид̇д̇амзва наахоси. со саарат̇им̣ ааманд̇зд̇ваа, ‘‘самма сунанд̣̇а, рат̇ам̣ нивад̇д̇зхи, аяам̣ чан̣о амхаагам̣ наанужчавиго, абхибаарагасса сзнаабад̇иссзваанужчавиго, раж̇ж̇амби д̇ассзваанужчавига’’нд̇и рат̇ам̣ нивад̇д̇аабзд̇ваа баасаад̣̇ам̣ абхируяха сирисаяанз нибаж̇ж̇ид̇ваа виббалабанд̇о ааха –

Sā tassa kampitabhāvaṃ ñatvā vātapānaṃ thaketvā sirigabbhameva agamāsi. Raññopi tassā diṭṭhakālato paṭṭhāya nagaraṃ padakkhiṇakaraṇe cittameva nāhosi. So sārathiṃ āmantetvā, ‘‘samma sunanda, rathaṃ nivattehi, ayaṃ chaṇo amhākaṃ nānucchaviko, abhipārakassa senāpatissevānucchaviko, rajjampi tassevānucchavika’’nti rathaṃ nivattāpetvā pāsādaṃ abhiruyha sirisayane nipajjitvā vippalapanto āha –

62.

‘‘яаа бун̣н̣амаасз миг̇аманд̣̇аложанаа, убаависи бун̣д̣арийгад̇д̇ажан̇г̇ий;

‘‘Yā puṇṇamāse migamandalocanā, upāvisi puṇḍarīkattacaṅgī;

д̣̇вз бун̣н̣амааяо д̇ад̣̇ахуу аман̃н̃ахам̣, д̣̇исваана баараавад̇арад̇д̇аваасиним̣.

Dve puṇṇamāyo tadahū amaññahaṃ, disvāna pārāvatarattavāsiniṃ.

63.

‘‘ал̣аарабамхзхи субхзхи ваг̇г̇убхи, балобхаяанд̇ий мам̣ яад̣̇аа уд̣̇игкад̇и;

‘‘Aḷārapamhehi subhehi vaggubhi, palobhayantī maṃ yadā udikkhati;

виж̇амбхамаанаа харад̇зва мз мано, ж̇аад̇аа ванз гимбурисийва баб̣б̣ад̇з.

Vijambhamānā harateva me mano, jātā vane kimpurisīva pabbate.

64.

‘‘д̇ад̣̇аа хи б̣рахад̇ий саамаа, аамуд̇д̇аман̣игун̣д̣алаа;

‘‘Tadā hi brahatī sāmā, āmuttamaṇikuṇḍalā;

згажжавасанаа наарий, миг̇ий бханд̇аавуд̣̇игкад̇и.

Ekaccavasanā nārī, migī bhantāvudikkhati.

65.

‘‘гад̣̇аассу мам̣ д̇амб̣анакаа суломаа, б̣аахаа муд̣̇уу жанд̣̇анасааралид̇д̇аа;

‘‘Kadāssu maṃ tambanakhā sulomā, bāhā mudū candanasāralittā;

ваддан̇г̇улий саннад̇ад̇хийрагуд̇д̇ияаа, наарий убан̃н̃иссад̇и сийсад̇о субхаа.

Vaṭṭaṅgulī sannatadhīrakuttiyā, nārī upaññissati sīsato subhā.

66.

‘‘гад̣̇аассу мам̣ ган̃жанаж̇аалуражчад̣̇аа, д̇хийд̇аа д̇ирийдисса вилаг̇г̇амаж̇жхаа;

‘‘Kadāssu maṃ kañcanajāluracchadā, dhītā tirīṭissa vilaggamajjhā;

муд̣̇уухи б̣аахаахи балиссаж̇иссад̇и, б̣рахааванз ж̇аад̇ад̣̇умам̣ва маалуваа.

Mudūhi bāhāhi palissajissati, brahāvane jātadumaṃva māluvā.

67.

‘‘гад̣̇аассу лаакаарасарад̇д̇асужчавий, б̣инд̣̇уд̇т̇аний бун̣д̣арийгад̇д̇ажан̇г̇ий;

‘‘Kadāssu lākhārasarattasucchavī, bindutthanī puṇḍarīkattacaṅgī;

мукам̣ мукзна убанаамаяиссад̇и, сон̣д̣ова сон̣д̣асса сурааяа т̇аалам̣.

Mukhaṃ mukhena upanāmayissati, soṇḍova soṇḍassa surāya thālaṃ.

68.

‘‘яад̣̇аад̣̇д̣̇асам̣ д̇ам̣ д̇идтанд̇им̣, саб̣б̣абхад̣̇д̣̇ам̣ манорамам̣;

‘‘Yadāddasaṃ taṃ tiṭṭhantiṃ, sabbabhaddaṃ manoramaṃ;

д̇ад̇о сагасса жид̇д̇асса, нааваб̣од̇хаами ган̃жинам̣.

Tato sakassa cittassa, nāvabodhāmi kañcinaṃ.

69.

‘‘уммаад̣̇анд̇имахам̣ д̣̇адтаа, аамуд̇д̇аман̣игун̣д̣алам̣;

‘‘Ummādantimahaṃ daṭṭhā, āmuttamaṇikuṇḍalaṃ;

на субаами д̣̇иваарад̇д̇им̣, сахассам̣ва барааж̇ид̇о.

Na supāmi divārattiṃ, sahassaṃva parājito.

70.

‘‘сагго жз мз варам̣ д̣̇аж̇ж̇аа, со жа лаб̣бхзт̇а мз варо;

‘‘Sakko ce me varaṃ dajjā, so ca labbhetha me varo;

згарад̇д̇ам̣ д̣̇ирад̇д̇ам̣ ваа, бхавзяяам̣ абхибаараго;

Ekarattaṃ dirattaṃ vā, bhaveyyaṃ abhipārako;

уммаад̣̇анд̇яаа рамид̇ваана, сивирааж̇аа д̇ад̇о сияа’’нд̇и.

Ummādantyā ramitvāna, sivirājā tato siya’’nti.

д̇ад̇т̇а бун̣н̣амаасзд̇и бун̣н̣ажанд̣̇ааяа рад̇д̇ияаа. миг̇аманд̣̇аложанаад̇и ган̣д̣асанд̇аасзна балааяид̇ваа вананд̇арз тад̇ваа луд̣̇д̣̇ам̣ ологзнд̇ияаа миг̇ияаа вияа манд̣̇аани ложанаани ассаад̇и миг̇аманд̣̇аложанаа. убаависийд̇и бад̣̇умаван̣н̣зна гарад̇алзна бубпаани кибид̇ваа мам̣ ологзнд̇ий ваад̇абаанз нисийд̣̇и. бун̣д̣арийгад̇д̇ажан̇г̇ийд̇и рад̇д̇абад̣̇умаван̣н̣асарийраа. д̣̇вз бун̣н̣амааяод̇и ахам̣ д̇ад̣̇аху д̇асмим̣ чан̣ад̣̇ивасз д̇ам̣ баараавад̇абаад̣̇асамаанаван̣н̣арад̇д̇авад̇т̇анивад̇т̇ам̣ д̣̇исваа д̇ассаа мукасобхам̣ ологзнд̇о згасса баажийналогад̇хаад̇уд̇о згасса абхибаарагасса сзнаабад̇ино нивзсанзд̇и д̣̇виннам̣ бун̣н̣ажанд̣̇аанам̣ уг̇г̇ад̇ад̇д̇аа д̣̇вз бун̣н̣амааяо аман̃н̃им̣. ал̣аарабамхзхийд̇и висаалабакумзхи. субхзхийд̇и барисуд̣̇д̇хзхи. ваг̇г̇убхийд̇и мад̇хураагаарзхи. уд̣̇игкад̇ийд̇и зваруубзхи нзд̇д̇зхи яасмим̣ кан̣з ологзд̇и. баб̣б̣ад̇зд̇и яат̇аа химаванд̇абаб̣б̣ад̇з субубпид̇аванз вийн̣ам̣ аад̣̇ааяа д̇анд̇иссарзна ад̇д̇ано сарам̣ сам̣санд̣̇анд̇ий гимбурисий гимбурисасса манам̣ харад̇и, звам̣ харад̇зва мз манод̇и виббалабад̇и.

Tattha puṇṇamāseti puṇṇacandāya rattiyā. Migamandalocanāti kaṇḍasantāsena palāyitvā vanantare ṭhatvā luddaṃ olokentiyā migiyā viya mandāni locanāni assāti migamandalocanā. Upāvisīti padumavaṇṇena karatalena pupphāni khipitvā maṃ olokentī vātapāne nisīdi. Puṇḍarīkattacaṅgīti rattapadumavaṇṇasarīrā. Dve puṇṇamāyoti ahaṃ tadahu tasmiṃ chaṇadivase taṃ pārāvatapādasamānavaṇṇarattavatthanivatthaṃ disvā tassā mukhasobhaṃ olokento ekassa pācīnalokadhātuto ekassa abhipārakassa senāpatino nivesaneti dvinnaṃ puṇṇacandānaṃ uggatattā dve puṇṇamāyo amaññiṃ. Aḷārapamhehīti visālapakhumehi. Subhehīti parisuddhehi. Vaggubhīti madhurākārehi. Udikkhatīti evarūpehi nettehi yasmiṃ khaṇe oloketi. Pabbateti yathā himavantapabbate supupphitavane vīṇaṃ ādāya tantissarena attano saraṃ saṃsandantī kimpurisī kimpurisassa manaṃ harati, evaṃ harateva me manoti vippalapati.

б̣рахад̇ийд̇и ул̣аараа. саамаад̇и суван̣н̣аван̣н̣асаамаа. згажжавасанаад̇и згажжигавасанаа, згавад̇т̇анивад̇т̇аад̇и ад̇т̇о. бханд̇аавуд̣̇игкад̇ийд̇и сан̣хагзсаа бут̇уналаадаа ааяад̇абхамуу висаалагкий д̇ун̇г̇анаасаа рад̇д̇одтаа сзд̇ад̣̇анд̇аа д̇икин̣ад̣̇аатаа суваддид̇аг̇ийваа суд̇ануб̣ааху сусан̣тид̇абаяод̇хараа гарамид̇амаж̇жхаа висааласон̣ий суван̣н̣агад̣̇алисамаанору саа уд̇д̇амид̇т̇ий д̇асмим̣ кан̣з мам̣ уд̣̇игканд̇ий бхаязна ванам̣ бависид̇ваа буна нивад̇д̇ид̇ваа луд̣̇д̣̇ам̣ уд̣̇игканд̇ий бханд̇аа миг̇ийва мам̣ уд̣̇игкад̇ийд̇и вад̣̇ад̇и. б̣аахаамуд̣̇ууд̇и муд̣̇уб̣аахаа. саннад̇ад̇хийрагуд̇д̇ияаад̇и супусид̇ачзгагаран̣аа. убан̃н̃иссад̇и манд̇и саа субхаа наарий гад̣̇аа ну мам̣ д̇зхи д̇амб̣анакзхи сийсад̇о бадтааяа саннад̇зна д̇хийрзна гаран̣зна барид̇осзссад̇ийд̇и бад̇т̇знд̇о вилабад̇и.

Brahatīti uḷārā. Sāmāti suvaṇṇavaṇṇasāmā. Ekaccavasanāti ekaccikavasanā, ekavatthanivatthāti attho. Bhantāvudikkhatīti saṇhakesā puthunalāṭā āyatabhamū visālakkhī tuṅganāsā rattoṭṭhā setadantā tikhiṇadāṭhā suvaṭṭitagīvā sutanubāhu susaṇṭhitapayodharā karamitamajjhā visālasoṇī suvaṇṇakadalisamānoru sā uttamitthī tasmiṃ khaṇe maṃ udikkhantī bhayena vanaṃ pavisitvā puna nivattitvā luddaṃ udikkhantī bhantā migīva maṃ udikkhatīti vadati. Bāhāmudūti mudubāhā. Sannatadhīrakuttiyāti suphusitachekakaraṇā. Upaññissatimanti sā subhā nārī kadā nu maṃ tehi tambanakhehi sīsato paṭṭhāya sannatena dhīrena karaṇena paritosessatīti patthento vilapati.

ган̃жанаж̇аалуражчад̣̇аад̇и ган̃жанамаяауражчад̣̇аалан̇гаараа. вилаг̇г̇амаж̇жхаад̇и вилаг̇г̇асарийраа д̇анумаж̇жхимаа. б̣рахааванзд̇и махааванз. лаакаарасарад̇д̇асужчавийд̇и хад̇т̇абаад̣̇ад̇алааг̇г̇анакаодтамам̣сзсу лаакаарасарад̇д̇аман̣ибаваалаван̣н̣аа. б̣инд̣̇уд̇т̇анийд̇и уд̣̇агабубпул̣абариман̣д̣алад̇т̇аний. д̇ад̇од̇и яад̣̇аа д̇ам̣ д̇идтанд̇им̣ ад̣̇д̣̇асам̣, д̇ад̇о бадтааяа. сагасса жид̇д̇ассаад̇и ад̇д̇ано жид̇д̇асса аниссаро ж̇аад̇омхийд̇и ад̇хиббааяо. ган̃жинанд̇и ган̃жи ‘‘аяам̣ асуго наамаа’’д̇и на ж̇аанаами, уммад̇д̇аго ж̇аад̇омхийд̇и вад̣̇ад̇и. д̣̇адтаад̇и д̣̇исваа. на субаамийд̇и нзва рад̇д̇им̣, на д̣̇иваа нид̣̇д̣̇ам̣ лабхаами. со жа лаб̣бхзт̇аад̇и яам̣ мз сагго варам̣ д̣̇ад̣̇зяяа, со жа мз варо лаб̣бхзт̇а, лабхзяяаахам̣ д̇ам̣ варанд̇и ад̇т̇о.

Kañcanajāluracchadāti kañcanamayauracchadālaṅkārā. Vilaggamajjhāti vilaggasarīrā tanumajjhimā. Brahāvaneti mahāvane. Lākhārasarattasucchavīti hatthapādatalaagganakhaoṭṭhamaṃsesu lākhārasarattamaṇipavālavaṇṇā. Bindutthanīti udakapupphuḷaparimaṇḍalatthanī. Tatoti yadā taṃ tiṭṭhantiṃ addasaṃ, tato paṭṭhāya. Sakassa cittassāti attano cittassa anissaro jātomhīti adhippāyo. Kañcinanti kañci ‘‘ayaṃ asuko nāmā’’ti na jānāmi, ummattako jātomhīti vadati. Daṭṭhāti disvā. Na supāmīti neva rattiṃ, na divā niddaṃ labhāmi. So ca labbhethāti yaṃ me sakko varaṃ dadeyya, so ca me varo labbhetha, labheyyāhaṃ taṃ varanti attho.

ат̇а д̇з амажжаа абхибаарагассаби аарожаяим̣су – ‘‘саами рааж̇аа, наг̇арам̣ бад̣̇агкин̣ам̣ гаронд̇о д̇умхаагам̣ гхарад̣̇ваарам̣ бад̇ваа нивад̇д̇ид̇ваа баасаад̣̇ам̣ абхирухий’’д̇и. со ад̇д̇ано г̇зхам̣ г̇анд̇ваа уммаад̣̇анд̇им̣ ааманд̇зд̇ваа ‘‘бхад̣̇д̣̇з, гажжи ран̃н̃о ад̇д̇аанам̣ д̣̇ассзсий’’д̇и бужчи. ‘‘саами, зго маход̣̇аро махаад̣̇аатиго рат̇з тад̇ваа ааг̇ад̇о бурисо ад̇т̇и, ахам̣ д̇ам̣ рааж̇аа ваа арааж̇аа ваад̇и на ж̇аанаами, зго иссарод̇и бана вуд̇д̇з ваад̇абаанз тад̇ваа бубпаани кибим̣, со д̇аавад̣̇зва нивад̇д̇ид̇ваа г̇ад̇о’’д̇и. со д̇ам̣ суд̇ваа ‘‘наасид̇омхи д̇аяаа’’д̇и бунад̣̇ивасз баад̇ова рааж̇анивзсанам̣ ааруяха сириг̇аб̣бхад̣̇ваарз тад̇ваа ран̃н̃о уммаад̣̇анд̇им̣ ниссааяа виббалаабам̣ суд̇ваа ‘‘аяам̣ уммаад̣̇анд̇ияаа бадиб̣ад̣̇д̇хажид̇д̇о ж̇аад̇о, д̇ам̣ алабханд̇о мариссад̇и, ран̃н̃о жа мама жа аг̇ун̣ам̣ можзд̇ваа имасса маяаа ж̇ийвид̇ам̣ д̣̇аад̇ум̣ ваддад̇ий’’д̇и ад̇д̇ано нивзсанам̣ г̇анд̇ваа згам̣ д̣̇ал̣хаманд̇ам̣ убадтаагам̣ баггосаабзд̇ваа, ‘‘д̇аад̇а, асугадтаанз сусиражзд̇ияаругко ад̇т̇и, д̇вам̣ ган̃жи аж̇аанаабзд̇ваа ад̇т̇ан̇г̇ад̇з суурияз д̇ад̇т̇а г̇анд̇ваа анд̇оругкз нисийд̣̇а, ахам̣ д̇ад̇т̇а б̣алигаммам̣ гаронд̇о д̇ам̣ таанам̣ бад̇ваа д̣̇звад̇аа намассанд̇о, ‘саами д̣̇зварааж̇а, амхаагам̣ рааж̇аа наг̇арамхи чан̣з вад̇д̇амаанз агийл̣ид̇ваа сириг̇аб̣бхам̣ бависид̇ваа виббалабанд̇ова нибанно, маяам̣ д̇ад̇т̇а гааран̣ам̣ на ж̇аанаама, рааж̇аа д̣̇звад̇аанам̣ б̣ахуубагааро, анусам̣важчарам̣ сахассам̣ виссаж̇ж̇зд̇ваа б̣алигаммам̣ гарод̇и, ид̣̇ам̣ наама ниссааяа рааж̇аа виббалабад̇ийд̇и аажигкат̇а, ран̃н̃о но ж̇ийвид̇ад̣̇аанам̣ д̣̇зт̇аа’д̇и яаажиссаами, д̇вам̣ д̇асмим̣ кан̣з сад̣̇д̣̇ам̣ баривад̇д̇ид̇ваа, ‘сзнаабад̇и, д̇умхаагам̣ ран̃н̃о б̣яаад̇хи наама над̇т̇и, со бана д̇ава бхарияааяа уммаад̣̇анд̇ияаа бадиб̣ад̣̇д̇хажид̇д̇о. сажз нам̣ лабхиссад̇и, ж̇ийвиссад̇и, но жз, мариссад̇и. сажз д̇асса ж̇ийвид̇ам̣ ижчаси, уммаад̣̇анд̇имасса д̣̇зхий’д̇и вад̣̇зяяаасий’’д̇и звам̣ д̇ам̣ уг̇г̇ан̣хаабзд̇ваа уяяож̇зси.

Atha te amaccā abhipārakassapi ārocayiṃsu – ‘‘sāmi rājā, nagaraṃ padakkhiṇaṃ karonto tumhākaṃ gharadvāraṃ patvā nivattitvā pāsādaṃ abhiruhī’’ti. So attano gehaṃ gantvā ummādantiṃ āmantetvā ‘‘bhadde, kacci rañño attānaṃ dassesī’’ti pucchi. ‘‘Sāmi, eko mahodaro mahādāṭhiko rathe ṭhatvā āgato puriso atthi, ahaṃ taṃ rājā vā arājā vāti na jānāmi, eko issaroti pana vutte vātapāne ṭhatvā pupphāni khipiṃ, so tāvadeva nivattitvā gato’’ti. So taṃ sutvā ‘‘nāsitomhi tayā’’ti punadivase pātova rājanivesanaṃ āruyha sirigabbhadvāre ṭhatvā rañño ummādantiṃ nissāya vippalāpaṃ sutvā ‘‘ayaṃ ummādantiyā paṭibaddhacitto jāto, taṃ alabhanto marissati, rañño ca mama ca aguṇaṃ mocetvā imassa mayā jīvitaṃ dātuṃ vaṭṭatī’’ti attano nivesanaṃ gantvā ekaṃ daḷhamantaṃ upaṭṭhākaṃ pakkosāpetvā, ‘‘tāta, asukaṭṭhāne susiracetiyarukkho atthi, tvaṃ kañci ajānāpetvā atthaṅgate sūriye tattha gantvā antorukkhe nisīda, ahaṃ tattha balikammaṃ karonto taṃ ṭhānaṃ patvā devatā namassanto, ‘sāmi devarāja, amhākaṃ rājā nagaramhi chaṇe vattamāne akīḷitvā sirigabbhaṃ pavisitvā vippalapantova nipanno, mayaṃ tattha kāraṇaṃ na jānāma, rājā devatānaṃ bahūpakāro, anusaṃvaccharaṃ sahassaṃ vissajjetvā balikammaṃ karoti, idaṃ nāma nissāya rājā vippalapatīti ācikkhatha, rañño no jīvitadānaṃ dethā’ti yācissāmi, tvaṃ tasmiṃ khaṇe saddaṃ parivattitvā, ‘senāpati, tumhākaṃ rañño byādhi nāma natthi, so pana tava bhariyāya ummādantiyā paṭibaddhacitto. Sace naṃ labhissati, jīvissati, no ce, marissati. Sace tassa jīvitaṃ icchasi, ummādantimassa dehī’ti vadeyyāsī’’ti evaṃ taṃ uggaṇhāpetvā uyyojesi.

со г̇анд̇ваа д̇асмим̣ ругкз нисийд̣̇ид̇ваа бунад̣̇ивасз сзнаабад̇инаа амажжаг̇ан̣абаривуд̇зна д̇ам̣ таанам̣ г̇анд̇ваа яаажид̇о д̇ат̇аа абхааси. сзнаабад̇и ‘‘саад̇хуу’’д̇и вад̇ваа д̣̇звад̇ам̣ ванд̣̇ид̇ваа амажжз ж̇аанаабзд̇ваа наг̇арам̣ бависид̇ваа рааж̇анивзсанам̣ ааруяха сириг̇аб̣бхад̣̇ваарам̣ аагодзси. рааж̇аа сад̇им̣ убадтабзд̇ваа ‘‘го зсо’’д̇и бужчи. ахам̣, д̣̇зва, абхибаарагод̇и. ат̇асса рааж̇аа д̣̇ваарам̣ вивари. со бависид̇ваа рааж̇аанам̣ ванд̣̇ид̇ваа г̇аат̇амааха –

So gantvā tasmiṃ rukkhe nisīditvā punadivase senāpatinā amaccagaṇaparivutena taṃ ṭhānaṃ gantvā yācito tathā abhāsi. Senāpati ‘‘sādhū’’ti vatvā devataṃ vanditvā amacce jānāpetvā nagaraṃ pavisitvā rājanivesanaṃ āruyha sirigabbhadvāraṃ ākoṭesi. Rājā satiṃ upaṭṭhapetvā ‘‘ko eso’’ti pucchi. Ahaṃ, deva, abhipārakoti. Athassa rājā dvāraṃ vivari. So pavisitvā rājānaṃ vanditvā gāthamāha –

71.

‘‘бхууд̇аани мз бхууд̇абад̇ий намассад̇о, ааг̇амма яагко ид̣̇амзд̇ад̣̇аб̣рави;

‘‘Bhūtāni me bhūtapatī namassato, āgamma yakkho idametadabravi;

ран̃н̃о мано уммад̣̇анд̇яаа нивидто, д̣̇ад̣̇аами д̇з д̇ам̣ барижаараяассуу’’д̇и.

Rañño mano ummadantyā niviṭṭho, dadāmi te taṃ paricārayassū’’ti.

д̇ад̇т̇а намассад̇од̇и д̇умхаагам̣ виббалаабагааран̣аж̇аананад̇т̇ам̣ б̣алигаммам̣ гад̇ваа намассанд̇асса. д̇анд̇и ахам̣ д̇ам̣ уммаад̣̇анд̇им̣ д̇умхаагам̣ барижааригам̣ гад̇ваа д̣̇ад̣̇аамийд̇и.

Tattha namassatoti tumhākaṃ vippalāpakāraṇajānanatthaṃ balikammaṃ katvā namassantassa. Tanti ahaṃ taṃ ummādantiṃ tumhākaṃ paricārikaṃ katvā dadāmīti.

ат̇а нам̣ рааж̇аа, ‘‘самма абхибаарага, мама уммаад̣̇анд̇ияаа бадиб̣ад̣̇д̇хажид̇д̇ад̇ааяа виббалабид̇абхаавам̣ яагкааби ж̇аананд̇ий’’д̇и бужчи. аама, д̣̇зваад̇и. со ‘‘саб̣б̣алогзна гира мз лаамагабхааво н̃аад̇о’’д̇и лаж̇ж̇ид̇хаммз бад̇идтааяа ананд̇арам̣ г̇аат̇амааха –

Atha naṃ rājā, ‘‘samma abhipāraka, mama ummādantiyā paṭibaddhacittatāya vippalapitabhāvaṃ yakkhāpi jānantī’’ti pucchi. Āma, devāti. So ‘‘sabbalokena kira me lāmakabhāvo ñāto’’ti lajjidhamme patiṭṭhāya anantaraṃ gāthamāha –

72.

‘‘бун̃н̃аа жа д̇хам̣сз амаро на жамхи, ж̇ано жа мз баабамид̣̇ан̃жа ж̇ан̃н̃аа;

‘‘Puññā ca dhaṃse amaro na camhi, jano ca me pāpamidañca jaññā;

бхусо жа д̇яасса манасо вигхаад̇о, д̣̇ад̇ваа бияам̣ уммад̣̇анд̇им̣ ад̣̇адтаа’’д̇и.

Bhuso ca tyassa manaso vighāto, datvā piyaṃ ummadantiṃ adaṭṭhā’’ti.

д̇ад̇т̇а д̇хам̣сзд̇и, самма абхибаарага, ахам̣ д̇ааяа сад̣̇д̇хим̣ гилзсавасзна барижаарзнд̇о бун̃н̃ад̇о жа д̇хам̣сзяяам̣, д̇ааяа сад̣̇д̇хим̣ барижаарид̇амад̇д̇зна амаро жа на хоми, махааж̇ано жа мз имам̣ лаамагабхаавам̣ ж̇аанзяяа, д̇ад̇о ‘‘аяуд̇д̇ам̣ ран̃н̃аа гад̇а’’нд̇и г̇арахзяяа, д̇ан̃жа мама д̣̇ад̇ваа бажчаа бияабхарияам̣ ад̣̇адтаа д̇ава манасо вигхаад̇о жассаад̇и ад̇т̇о.

Tattha dhaṃseti, samma abhipāraka, ahaṃ tāya saddhiṃ kilesavasena paricārento puññato ca dhaṃseyyaṃ, tāya saddhiṃ paricāritamattena amaro ca na homi, mahājano ca me imaṃ lāmakabhāvaṃ jāneyya, tato ‘‘ayuttaṃ raññā kata’’nti garaheyya, tañca mama datvā pacchā piyabhariyaṃ adaṭṭhā tava manaso vighāto cassāti attho.

сзсаа убхиннамби важанабадиважанаг̇аат̇аа хонд̇и –

Sesā ubhinnampi vacanapaṭivacanagāthā honti –

73.

‘‘ж̇анинд̣̇а наан̃н̃ад̇ра д̇аяаа маяаа ваа, саб̣б̣ааби гаммасса гад̇асса ж̇ан̃н̃аа;

‘‘Janinda nāññatra tayā mayā vā, sabbāpi kammassa katassa jaññā;

яам̣ д̇з маяаа уммад̣̇анд̇ий бад̣̇иннаа, бхусзхи рааж̇аа ванат̇ам̣ саж̇аахи.

Yaṃ te mayā ummadantī padinnā, bhusehi rājā vanathaṃ sajāhi.

74.

‘‘яо баабагам̣ гаммагарам̣ мануссо, со ман̃н̃ад̇и мааяид̣̇а ман̃н̃им̣су ан̃н̃з;

‘‘Yo pāpakaṃ kammakaraṃ manusso, so maññati māyida maññiṃsu aññe;

бассанд̇и бхууд̇аани гаронд̇амзд̇ам̣, яуд̇д̇аа жа яз хонд̇и нараа бат̇аб̣яаа.

Passanti bhūtāni karontametaṃ, yuttā ca ye honti narā pathabyā.

75.

‘‘ан̃н̃о ну д̇з гожи наро бат̇аб̣яаа, сад̣̇д̇хзяяа логасми на мз бияаад̇и;

‘‘Añño nu te koci naro pathabyā, saddheyya lokasmi na me piyāti;

бхусо жа д̇яасса манусо вигхаад̇о, д̣̇ад̇ваа бияам̣ уммад̣̇анд̇им̣ ад̣̇адтаа.

Bhuso ca tyassa manuso vighāto, datvā piyaṃ ummadantiṃ adaṭṭhā.

76.

‘‘ад̣̇д̇хаа бияаа маяха ж̇анинд̣̇а зсаа, на саа мамам̣ аббияаа бхуумибаала;

‘‘Addhā piyā mayha janinda esā, na sā mamaṃ appiyā bhūmipāla;

г̇ажчзва д̇вам̣ уммад̣̇анд̇им̣ бхад̣̇анд̇з, сийхова сзласса г̇ухам̣ убзд̇и.

Gaccheva tvaṃ ummadantiṃ bhadante, sīhova selassa guhaṃ upeti.

77.

‘‘на бийл̣ид̇аа ад̇д̇ад̣̇укзна д̇хийраа, сукабпалам̣ гамма барижжаж̇анд̇и;

‘‘Na pīḷitā attadukhena dhīrā, sukhapphalaṃ kamma pariccajanti;

саммохид̇аа вааби сукзна мад̇д̇аа, на баабагамман̃жа самаажаранд̇и.

Sammohitā vāpi sukhena mattā, na pāpakammañca samācaranti.

78.

‘‘д̇уван̃хи маад̇аа жа бид̇аа жа маяхам̣, бхад̇д̇аа бад̇ий босаго д̣̇звад̇аа жа;

‘‘Tuvañhi mātā ca pitā ca mayhaṃ, bhattā patī posako devatā ca;

д̣̇аасо ахам̣ д̇уяха сабуд̇д̇ад̣̇ааро, яат̇аасукам̣ саами гарохи гаамам̣.

Dāso ahaṃ tuyha saputtadāro, yathāsukhaṃ sāmi karohi kāmaṃ.

79.

‘‘яо ‘иссаромхий’д̇и гарод̇и баабам̣, гад̇ваа жа со нуд̇д̇асад̇з барзсам̣;

‘‘Yo ‘issaromhī’ti karoti pāpaṃ, katvā ca so nuttasate paresaṃ;

на д̇зна со ж̇ийвад̇и д̣̇ийгхамааяу, д̣̇звааби баабзна самзгкарз нам̣.

Na tena so jīvati dīghamāyu, devāpi pāpena samekkhare naṃ.

80.

‘‘ан̃н̃аад̇агам̣ саамигзхий бад̣̇иннам̣, д̇хаммз тид̇аа яз бадижчанд̇и д̣̇аанам̣;

‘‘Aññātakaṃ sāmikehī padinnaṃ, dhamme ṭhitā ye paṭicchanti dānaṃ;

бадижчагаа д̣̇ааяагаа жааби д̇ад̇т̇а, сукабпалан̃н̃зва гаронд̇и гаммам̣.

Paṭicchakā dāyakā cāpi tattha, sukhapphalaññeva karonti kammaṃ.

81.

‘‘ан̃н̃о ну д̇з гожи наро бат̇аб̣яаа, сад̣̇д̇хзяяа логасми на мз бияаад̇и;

‘‘Añño nu te koci naro pathabyā, saddheyya lokasmi na me piyāti;

бхусо жа д̇яасса манасо вигхаад̇о, д̣̇ад̇ваа бияам̣ уммад̣̇анд̇им̣ ад̣̇адтаа.

Bhuso ca tyassa manaso vighāto, datvā piyaṃ ummadantiṃ adaṭṭhā.

82.

‘‘ад̣̇д̇хаа бияаа маяха ж̇анинд̣̇а зсаа, на саа мамам̣ аббияаа бхуумибаала;

‘‘Addhā piyā mayha janinda esā, na sā mamaṃ appiyā bhūmipāla;

яам̣ д̇з маяаа уммад̣̇анд̇ий бад̣̇иннаа, бхусзхи рааж̇аа ванат̇ам̣ саж̇аахи.

Yaṃ te mayā ummadantī padinnā, bhusehi rājā vanathaṃ sajāhi.

83.

‘‘яо ад̇д̇ад̣̇угкзна барасса д̣̇угкам̣, сукзна ваа ад̇д̇асукам̣ д̣̇ахаад̇и;

‘‘Yo attadukkhena parassa dukkhaṃ, sukhena vā attasukhaṃ dahāti;

яат̇звид̣̇ам̣ маяха д̇ат̇аа барзсам̣, яо звам̣ ж̇аанаад̇и са взд̣̇и д̇хаммам̣.

Yathevidaṃ mayha tathā paresaṃ, yo evaṃ jānāti sa vedi dhammaṃ.

84.

‘‘ан̃н̃о ну д̇з гожи наро бат̇аб̣яаа, сад̣̇д̇хзяяа логасми на мз бияаад̇и;

‘‘Añño nu te koci naro pathabyā, saddheyya lokasmi na me piyāti;

бхусо жа д̇яасса манасо вигхаад̇о, д̣̇ад̇ваа бияам̣ уммад̣̇анд̇им̣ ад̣̇адтаа.

Bhuso ca tyassa manaso vighāto, datvā piyaṃ ummadantiṃ adaṭṭhā.

85.

‘‘ж̇анинд̣̇а ж̇аанааси бияаа мамзсаа, на саа мамам̣ аббияаа бхуумибаала;

‘‘Janinda jānāsi piyā mamesā, na sā mamaṃ appiyā bhūmipāla;

биязна д̇з д̣̇амми бияам̣ ж̇анинд̣̇а, бияад̣̇ааяино д̣̇зва бияам̣ лабханд̇и.

Piyena te dammi piyaṃ janinda, piyadāyino deva piyaṃ labhanti.

86.

‘‘со нуунаахам̣ вад̇хиссаами, ад̇д̇аанам̣ гаамахзд̇угам̣;

‘‘So nūnāhaṃ vadhissāmi, attānaṃ kāmahetukaṃ;

на хи д̇хаммам̣ ад̇хаммзна, ахам̣ вад̇хид̇умуссахз.

Na hi dhammaṃ adhammena, ahaṃ vadhitumussahe.

87.

‘‘сажз д̇увам̣ маяха сад̇им̣ ж̇анинд̣̇а, на гаамаяааси наравийра сздта;

‘‘Sace tuvaṃ mayha satiṃ janinda, na kāmayāsi naravīra seṭṭha;

жаж̇аами нам̣ саб̣б̣аж̇анасса сиб̣яаа, маяаа бамуд̇д̇ам̣ д̇ад̇о авхаязси нам̣.

Cajāmi naṃ sabbajanassa sibyā, mayā pamuttaṃ tato avhayesi naṃ.

88.

‘‘ад̣̇уусияам̣ жз абхибаарага д̇вам̣, жаж̇ааси гад̇д̇з ахид̇ааяа д̇яасса;

‘‘Adūsiyaṃ ce abhipāraka tvaṃ, cajāsi katte ahitāya tyassa;

махаа жа д̇з убаваад̣̇оби асса, на жааби д̇яасса наг̇арамхи багко.

Mahā ca te upavādopi assa, na cāpi tyassa nagaramhi pakkho.

89.

‘‘ахам̣ сахиссам̣ убаваад̣̇амзд̇ам̣, нинд̣̇ам̣ басам̣сам̣ г̇арахан̃жа саб̣б̣ам̣;

‘‘Ahaṃ sahissaṃ upavādametaṃ, nindaṃ pasaṃsaṃ garahañca sabbaṃ;

мамзд̇амааг̇ажчад̇у бхуумибаала, яат̇аасукам̣ сиви гарохи гаамам̣.

Mametamāgacchatu bhūmipāla, yathāsukhaṃ sivi karohi kāmaṃ.

90.

‘‘яо нзва нинд̣̇ам̣ на банаббасам̣сам̣, аад̣̇ияад̇и г̇арахам̣ ноби бууж̇ам̣;

‘‘Yo neva nindaṃ na panappasaṃsaṃ, ādiyati garahaṃ nopi pūjaṃ;

сирий жа лагкий жа абзд̇и д̇амхаа, аабо сувудтийва яат̇аа т̇аламхаа.

Sirī ca lakkhī ca apeti tamhā, āpo suvuṭṭhīva yathā thalamhā.

91.

‘‘яам̣ гин̃жи д̣̇угкан̃жа сукан̃жа зд̇д̇о, д̇хаммаад̇исааран̃жа мановигхаад̇ам̣;

‘‘Yaṃ kiñci dukkhañca sukhañca etto, dhammātisārañca manovighātaṃ;

урасаа ахам̣ бажжуд̇д̇ариссаами саб̣б̣ам̣, бат̇авий яат̇аа т̇аавараанам̣ д̇асаанам̣.

Urasā ahaṃ paccuttarissāmi sabbaṃ, pathavī yathā thāvarānaṃ tasānaṃ.

92.

‘‘д̇хаммаад̇исааран̃жа мановигхаад̇ам̣, д̣̇угкан̃жа нижчаами ахам̣ барзсам̣;

‘‘Dhammātisārañca manovighātaṃ, dukkhañca nicchāmi ahaṃ paresaṃ;

зговимам̣ хаараяиссаами бхаарам̣, д̇хаммз тид̇о гин̃жи ахаабаяанд̇о.

Ekovimaṃ hārayissāmi bhāraṃ, dhamme ṭhito kiñci ahāpayanto.

93.

‘‘саг̇г̇уубаг̇ам̣ бун̃н̃агаммам̣ ж̇анинд̣̇а, маа мз д̇увам̣ анд̇арааяам̣ агааси;

‘‘Saggūpagaṃ puññakammaṃ janinda, mā me tuvaṃ antarāyaṃ akāsi;

д̣̇ад̣̇аами д̇з уммад̣̇анд̇им̣ басанно, рааж̇аава яан̃н̃з д̇ханам̣ б̣раахман̣аанам̣.

Dadāmi te ummadantiṃ pasanno, rājāva yaññe dhanaṃ brāhmaṇānaṃ.

94.

‘‘ад̣̇д̇хаа д̇увам̣ гад̇д̇з хид̇зси маяхам̣, сакаа мамам̣ уммад̣̇анд̇ий д̇уван̃жа;

‘‘Addhā tuvaṃ katte hitesi mayhaṃ, sakhā mamaṃ ummadantī tuvañca;

нинд̣̇зяяу д̣̇зваа бид̇аро жа саб̣б̣з, баабан̃жа бассам̣ абхисамбарааяам̣.

Nindeyyu devā pitaro ca sabbe, pāpañca passaṃ abhisamparāyaṃ.

95.

‘‘на хзд̇ад̇хаммам̣ сивирааж̇а важ̇ж̇ум̣, санзг̇амаа ж̇аанабад̣̇аа жа саб̣б̣з;

‘‘Na hetadhammaṃ sivirāja vajjuṃ, sanegamā jānapadā ca sabbe;

яам̣ д̇з маяаа уммад̣̇анд̇ий бад̣̇иннаа, бхусзхи рааж̇аа ванат̇ам̣ саж̇аахи.

Yaṃ te mayā ummadantī padinnā, bhusehi rājā vanathaṃ sajāhi.

96.

‘‘ад̣̇д̇хаа д̇увам̣ гад̇д̇з хид̇зси маяхам̣, сакаа мамам̣ уммад̣̇анд̇ий д̇уван̃жа;

‘‘Addhā tuvaṃ katte hitesi mayhaṃ, sakhā mamaṃ ummadantī tuvañca;

сад̇ан̃жа д̇хаммаани сугид̇д̇ид̇аани, самуд̣̇д̣̇авзлаава д̣̇уражжаяаани.

Satañca dhammāni sukittitāni, samuddavelāva duraccayāni.

97.

‘‘аахунзяяо мзси хид̇аанугамбий, д̇хаад̇аа вид̇хаад̇аа жаси гаамабаало;

‘‘Āhuneyyo mesi hitānukampī, dhātā vidhātā casi kāmapālo;

д̇аяий худ̇аа рааж̇а махабпалаа хи, гаамзна мз уммад̣̇анд̇им̣ бадижча.

Tayī hutā rāja mahapphalā hi, kāmena me ummadantiṃ paṭiccha.

98.

‘‘ад̣̇д̇хаа хи саб̣б̣ам̣ абхибаарага д̇вам̣, д̇хаммам̣ ажаарий мама гад̇д̇убуд̇д̇а;

‘‘Addhā hi sabbaṃ abhipāraka tvaṃ, dhammaṃ acārī mama kattuputta;

ан̃н̃о ну д̇з го ид̇ха сод̇т̇игад̇д̇аа, д̣̇вибад̣̇о наро арун̣з ж̇ийвалогз.

Añño nu te ko idha sotthikattā, dvipado naro aruṇe jīvaloke.

99.

‘‘д̇увам̣ ну сздто д̇вамануд̇д̇ароси, д̇вам̣ д̇хаммаг̇уд̇д̇о д̇хаммавид̣̇уу сумзд̇хо;

‘‘Tuvaṃ nu seṭṭho tvamanuttarosi, tvaṃ dhammagutto dhammavidū sumedho;

со д̇хаммаг̇уд̇д̇о жирамзва ж̇ийва, д̇хамман̃жа мз д̣̇зсаяа д̇хаммабаала.

So dhammagutto cirameva jīva, dhammañca me desaya dhammapāla.

100.

‘‘д̇ад̣̇ин̇гха абхибаарага, сун̣охи важанам̣ мама;

‘‘Tadiṅgha abhipāraka, suṇohi vacanaṃ mama;

д̇хаммам̣ д̇з д̣̇зсаяиссаами, сад̇ам̣ аасзвид̇ам̣ ахам̣.

Dhammaṃ te desayissāmi, sataṃ āsevitaṃ ahaṃ.

101.

‘‘саад̇ху д̇хаммаружий рааж̇аа, саад̇ху бан̃н̃аан̣аваа наро;

‘‘Sādhu dhammarucī rājā, sādhu paññāṇavā naro;

саад̇ху мид̇д̇аанамад̣̇д̣̇уб̣бхо, баабассаагаран̣ам̣ сукам̣.

Sādhu mittānamaddubbho, pāpassākaraṇaṃ sukhaṃ.

102.

‘‘аггод̇ханасса виж̇ид̇з, тид̇ад̇хаммасса рааж̇ино;

‘‘Akkodhanassa vijite, ṭhitadhammassa rājino;

сукам̣ мануссаа аасзт̇а, сийд̇ажчааяааяа сан̇гхарз.

Sukhaṃ manussā āsetha, sītacchāyāya saṅghare.

103.

‘‘на жаахамзд̇ам̣ абхирожаяаами, гаммам̣ асамзгкагад̇ам̣ асаад̇ху;

‘‘Na cāhametaṃ abhirocayāmi, kammaṃ asamekkhakataṃ asādhu;

яз вааби н̃ад̇ваана саяам̣ гаронд̇и, убамаа имаа маяхам̣ д̇увам̣ сун̣охи.

Ye vāpi ñatvāna sayaṃ karonti, upamā imā mayhaṃ tuvaṃ suṇohi.

104.

‘‘г̇авам̣ жз д̇арамаанаанам̣, ж̇имхам̣ г̇ажчад̇и бун̇г̇аво;

‘‘Gavaṃ ce taramānānaṃ, jimhaṃ gacchati puṅgavo;

саб̣б̣аа д̇аа ж̇имхам̣ г̇ажчанд̇и, нзд̇д̇з ж̇имхам̣ г̇ад̇з сад̇и.

Sabbā tā jimhaṃ gacchanti, nette jimhaṃ gate sati.

105.

‘‘звамзва мануссзсу, яо ход̇и сздтасаммад̇о;

‘‘Evameva manussesu, yo hoti seṭṭhasammato;

со жз ад̇хаммам̣ жарад̇и, баг̇зва ид̇араа баж̇аа;

So ce adhammaṃ carati, pageva itarā pajā;

саб̣б̣ам̣ радтам̣ д̣̇укам̣ сзд̇и, рааж̇аа жз ход̇и ад̇хаммиго.

Sabbaṃ raṭṭhaṃ dukhaṃ seti, rājā ce hoti adhammiko.

106.

‘‘г̇авам̣ жз д̇арамаанаанам̣, уж̇ум̣ г̇ажчад̇и бун̇г̇аво;

‘‘Gavaṃ ce taramānānaṃ, ujuṃ gacchati puṅgavo;

саб̣б̣аа г̇аавий уж̇ум̣ яанд̇и, нзд̇д̇з уж̇ум̣ г̇ад̇з сад̇и.

Sabbā gāvī ujuṃ yanti, nette ujuṃ gate sati.

107.

‘‘звамзва мануссзсу, яо ход̇и сздтасаммад̇о;

‘‘Evameva manussesu, yo hoti seṭṭhasammato;

со сажз д̇хаммам̣ жарад̇и, баг̇зва ид̇араа баж̇аа;

So sace dhammaṃ carati, pageva itarā pajā;

саб̣б̣ам̣ радтам̣ сукам̣ сзд̇и, рааж̇аа жз ход̇и д̇хаммиго.

Sabbaṃ raṭṭhaṃ sukhaṃ seti, rājā ce hoti dhammiko.

108.

‘‘на жаабаахам̣ ад̇хаммзна, амарад̇д̇амабхибад̇т̇аяз;

‘‘Na cāpāhaṃ adhammena, amarattamabhipatthaye;

имам̣ ваа бат̇авим̣ саб̣б̣ам̣, виж̇зд̇ум̣ абхибаарага.

Imaṃ vā pathaviṃ sabbaṃ, vijetuṃ abhipāraka.

109.

‘‘яан̃хи гин̃жи мануссзсу, рад̇анам̣ ид̇ха виж̇ж̇ад̇и;

‘‘Yañhi kiñci manussesu, ratanaṃ idha vijjati;

г̇ааво д̣̇аасо хиран̃н̃ан̃жа, вад̇т̇ияам̣ харижанд̣̇анам̣.

Gāvo dāso hiraññañca, vatthiyaṃ haricandanaṃ.

110.

‘‘ассид̇т̇ияо рад̇анам̣ ман̣иган̃жа, яан̃жааби мз жанд̣̇имасуурияаа абхибаалаяанд̇и;

‘‘Assitthiyo ratanaṃ maṇikañca, yañcāpi me candimasūriyā abhipālayanti;

на д̇асса хзд̇у висамам̣ жарзяяам̣, маж̇жхз сивийнам̣ усабхомхи ж̇аад̇о.

Na tassa hetu visamaṃ careyyaṃ, majjhe sivīnaṃ usabhomhi jāto.

111.

‘‘нзд̇аа хид̇аа уг̇г̇ад̇о радтабаало, д̇хаммам̣ сивийнам̣ абажааяамаано;

‘‘Netā hitā uggato raṭṭhapālo, dhammaṃ sivīnaṃ apacāyamāno;

со д̇хаммамзваанувижинд̇аяанд̇о, д̇асмаа сагз жид̇д̇авасз на вад̇д̇о.

So dhammamevānuvicintayanto, tasmā sake cittavase na vatto.

112.

‘‘ад̣̇д̇хаа д̇увам̣ махаарааж̇а, нижжам̣ аб̣яасанам̣ сивам̣;

‘‘Addhā tuvaṃ mahārāja, niccaṃ abyasanaṃ sivaṃ;

гариссаси жирам̣ раж̇ж̇ам̣, бан̃н̃аа хи д̇ава д̇аад̣̇исий.

Karissasi ciraṃ rajjaṃ, paññā hi tava tādisī.

113.

‘‘зд̇ам̣ д̇з анумод̣̇аама, яам̣ д̇хаммам̣ наббамаж̇ж̇аси;

‘‘Etaṃ te anumodāma, yaṃ dhammaṃ nappamajjasi;

д̇хаммам̣ бамаж̇ж̇а кад̇д̇ияо, радтаа жавад̇и иссаро.

Dhammaṃ pamajja khattiyo, raṭṭhā cavati issaro.

114.

‘‘д̇хаммам̣ жара махаарааж̇а, маад̇аабид̇уусу кад̇д̇ияа;

‘‘Dhammaṃ cara mahārāja, mātāpitūsu khattiya;

ид̇ха д̇хаммам̣ жарид̇ваана, рааж̇а саг̇г̇ам̣ г̇амиссаси.