| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၆. ဥမ္မဂ္ဂသုတ္တဝဏ္ဏနာ
6. Ummaggasuttavaṇṇanā
၁၈၆. ဆဋ္ဌေ ပရိကသ္သတီတိ အာကဍ္ဎိယတိ။ ဥမ္မဂ္ဂောတိ ဥမ္မုဇ္ဇနံ, ပညာဂမနန္တိ အတ္ထော။ ပညာ ဧဝ ဝာ ဥမ္မုဇ္ဇနဋ္ဌေန ဥမ္မဂ္ဂောတိ ဝုစ္စတိ။ သာဝ ပဋိဘာနဋ္ဌေန ပဋိဘာနံ။ စိတ္တသ္သ ဥပ္ပန္နသ္သ ဝသံ ဂစ္ဆတီတိ ယေ စိတ္တသ္သ ဝသံ ဂစ္ဆန္တိ, တေသံယေဝေတ္ထ ဂဟဏံ ဝေဒိတဗ္ဗံ။ အတ္ထမညာယ ဓမ္မမညာယာတိ အတ္ထဉ္စ ပာဠိဉ္စ ဇာနိတ္ဝာ။ ဓမ္မာနုဓမ္မပ္ပဋိပန္နော ဟောတီတိ လောကုတ္တရဓမ္မသ္သ အနုစ္ဆဝိကဓမ္မံ သဟ သီလေန ပုဗ္ဗဘာဂပ္ပဋိပဒံ ပဋိပန္နော ဟောတိ။ နိဗ္ဗေဓိကပညောတိ နိဗ္ဗိဇ္ဈနကပညော။ ဣဒံ ဒုက္ခန္တိ ဌပေတ္ဝာ တဏ္ဟံ သေသံ တေဘူမကက္ခန္ဓပဉ္စကံ ဒုက္ခန္တိ သုတံ ဟောတိ။ ပညာယာတိ မဂ္ဂပညာယ။ အယံ ဒုက္ခသမုဒယောတိ ဝဋ္ဋမူလကတဏ္ဟာ တသ္သ ဒုက္ခသ္သ သမုဒယောတိ သုတံ ဟောတိ။ ဣမိနာ ဥပာယေန သေသဒ္ဝယေပိ အတ္ထော ဝေဒိတဗ္ဗော။ စတုတ္ထပဉ္ဟဝိသ္သဇ္ဇနေန အရဟတ္တဖလံ ကထိတန္တိ ဝေဒိတဗ္ဗံ။
186. Chaṭṭhe parikassatīti ākaḍḍhiyati. Ummaggoti ummujjanaṃ, paññāgamananti attho. Paññā eva vā ummujjanaṭṭhena ummaggoti vuccati. Sāva paṭibhānaṭṭhena paṭibhānaṃ. Cittassauppannassa vasaṃ gacchatīti ye cittassa vasaṃ gacchanti, tesaṃyevettha gahaṇaṃ veditabbaṃ. Atthamaññāya dhammamaññāyāti atthañca pāḷiñca jānitvā. Dhammānudhammappaṭipanno hotīti lokuttaradhammassa anucchavikadhammaṃ saha sīlena pubbabhāgappaṭipadaṃ paṭipanno hoti. Nibbedhikapaññoti nibbijjhanakapañño. Idaṃ dukkhanti ṭhapetvā taṇhaṃ sesaṃ tebhūmakakkhandhapañcakaṃ dukkhanti sutaṃ hoti. Paññāyāti maggapaññāya. Ayaṃ dukkhasamudayoti vaṭṭamūlakataṇhā tassa dukkhassa samudayoti sutaṃ hoti. Iminā upāyena sesadvayepi attho veditabbo. Catutthapañhavissajjanena arahattaphalaṃ kathitanti veditabbaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၆. ဥမ္မဂ္ဂသုတ္တံ • 6. Ummaggasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၆. ဥမ္မဂ္ဂသုတ္တဝဏ္ဏနာ • 6. Ummaggasuttavaṇṇanā
