| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၄. ဥပာဒာနပရိပဝတ္တသုတ္တဝဏ္ဏနာ
4. Upādānaparipavattasuttavaṇṇanā
၅၆. စတုတ္ထေ စတုပရိဝဋ္ဋန္တိ ဧကေကသ္မိံ ခန္ဓေ စတုန္နံ ပရိဝဋ္ဋနဝသေန။ ရူပံ အဗ္ဘညာသိန္တိ ရူပံ ဒုက္ခသစ္စန္တိ အဘိညာသိံ။ ဧဝံ သဗ္ဗပဒေသု စတုသစ္စဝသေနေဝ အတ္ထော ဝေဒိတဗ္ဗော။ အာဟာရသမုဒယာတိ ဧတ္ထ သစ္ဆန္ဒရာဂော ကဗဠီကာရာဟာရော အာဟာရော နာမ။ ပဋိပန္နာတိ သီလတော ပဋ္ဌာယ ယာဝ အရဟတ္တမဂ္ဂာ ပဋိပန္နာ ဟောန္တိ။ ဂာဓန္တီတိ ပတိဋ္ဌဟန္တိ။ ဧတ္တာဝတာ သေက္ခဘူမိံ ကထေတ္ဝာ ဣဒာနိ အသေက္ခဘူမိံ ကထေန္တော ယေ စ ခော ကေစိ, ဘိက္ခဝေတိအာဒိမာဟ။ သုဝိမုတ္တာတိ အရဟတ္တဖလဝိမုတ္တိယာ သုဋ္ဌု ဝိမုတ္တာ။ ကေဝလိနောတိ သကလိနော ကတသဗ္ဗကိစ္စာ။ ဝဋ္ဋံ တေသံ နတ္ထိ ပညာပနာယာတိ ယေန တေ အဝသိဋ္ဌေန ဝဋ္ဋေန ပညာပေယ္ယုံ, တံ နေသံ ဝဋ္ဋံ နတ္ထိ ပညာပနာယ။ အထ ဝာ ဝဋ္ဋန္တိ ကာရဏံ, ပညာပနာယ ကာရဏံ နတ္ထီတိ။ ဧတ္တာဝတာ အသေက္ခဘူမိဝာရော ကထိတော။ စတုတ္ထံ။
56. Catutthe catuparivaṭṭanti ekekasmiṃ khandhe catunnaṃ parivaṭṭanavasena. Rūpaṃ abbhaññāsinti rūpaṃ dukkhasaccanti abhiññāsiṃ. Evaṃ sabbapadesu catusaccavaseneva attho veditabbo. Āhārasamudayāti ettha sacchandarāgo kabaḷīkārāhāro āhāro nāma. Paṭipannāti sīlato paṭṭhāya yāva arahattamaggā paṭipannā honti. Gādhantīti patiṭṭhahanti. Ettāvatā sekkhabhūmiṃ kathetvā idāni asekkhabhūmiṃ kathento ye ca kho keci, bhikkhavetiādimāha. Suvimuttāti arahattaphalavimuttiyā suṭṭhu vimuttā. Kevalinoti sakalino katasabbakiccā. Vaṭṭaṃ tesaṃ natthi paññāpanāyāti yena te avasiṭṭhena vaṭṭena paññāpeyyuṃ, taṃ nesaṃ vaṭṭaṃ natthi paññāpanāya. Atha vā vaṭṭanti kāraṇaṃ, paññāpanāya kāraṇaṃ natthīti. Ettāvatā asekkhabhūmivāro kathito. Catutthaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၄. ဥပာဒာနပရိပဝတ္တသုတ္တံ • 4. Upādānaparipavattasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၄. ဥပာဒာနပရိပဝတ္တသုတ္တဝဏ္ဏနာ • 4. Upādānaparipavattasuttavaṇṇanā
