| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၂. ဥပာဒာနသုတ္တံ
2. Upādānasuttaṃ
၅၂. သာဝတ္ထိယံ ဝိဟရတိ။ပေ.။ ‘‘ဥပာဒာနိယေသု, ဘိက္ခဝေ, ဓမ္မေသု အသ္သာဒာနုပသ္သိနော ဝိဟရတော တဏ္ဟာ ပဝဍ္ဎတိ။ တဏ္ဟာပစ္စယာ ဥပာဒာနံ; ဥပာဒာနပစ္စယာ ဘဝော; ဘဝပစ္စယာ ဇာတိ; ဇာတိပစ္စယာ ဇရာမရဏံ သောကပရိဒေဝဒုက္ခဒောမနသ္သုပာယာသာ သမ္ဘဝန္တိ။ ဧဝမေတသ္သ ကေဝလသ္သ ဒုက္ခက္ခန္ဓသ္သ သမုဒယော ဟောတိ’’။
52. Sāvatthiyaṃ viharati…pe… ‘‘upādāniyesu, bhikkhave, dhammesu assādānupassino viharato taṇhā pavaḍḍhati. Taṇhāpaccayā upādānaṃ; upādānapaccayā bhavo; bhavapaccayā jāti; jātipaccayā jarāmaraṇaṃ sokaparidevadukkhadomanassupāyāsā sambhavanti. Evametassa kevalassa dukkhakkhandhassa samudayo hoti’’.
‘‘သေယ္ယထာပိ , ဘိက္ခဝေ, ဒသန္နံ ဝာ ကဋ္ဌဝာဟာနံ ဝီသာယ ဝာ ကဋ္ဌဝာဟာနံ တိံသာယ ဝာ ကဋ္ဌဝာဟာနံ စတ္တာရီသာယ ဝာ ကဋ္ဌဝာဟာနံ မဟာအဂ္ဂိက္ခန္ဓော ဇလေယ္ယ။ တတ္ရ ပုရိသော ကာလေန ကာလံ သုက္ခာနိ စေဝ တိဏာနိ ပက္ခိပေယ္ယ, သုက္ခာနိ စ ဂောမယာနိ ပက္ခိပေယ္ယ, သုက္ခာနိ စ ကဋ္ဌာနိ ပက္ခိပေယ္ယ။ ဧဝဉ္ဟိ သော, ဘိက္ခဝေ, မဟာအဂ္ဂိက္ခန္ဓော တဒာဟာရော တဒုပာဒာနော စိရံ ဒီဃမဒ္ဓာနံ ဇလေယ္ယ။ ဧဝမေဝ ခော, ဘိက္ခဝေ, ဥပာဒာနိယေသု ဓမ္မေသု အသ္သာဒာနုပသ္သိနော ဝိဟရတော တဏ္ဟာ ပဝဍ္ဎတိ။ တဏ္ဟာပစ္စယာ ဥပာဒာနံ။ပေ.။ ဧဝမေတသ္သ ကေဝလသ္သ ဒုက္ခက္ခန္ဓသ္သ သမုဒယော ဟောတိ။
‘‘Seyyathāpi , bhikkhave, dasannaṃ vā kaṭṭhavāhānaṃ vīsāya vā kaṭṭhavāhānaṃ tiṃsāya vā kaṭṭhavāhānaṃ cattārīsāya vā kaṭṭhavāhānaṃ mahāaggikkhandho jaleyya. Tatra puriso kālena kālaṃ sukkhāni ceva tiṇāni pakkhipeyya, sukkhāni ca gomayāni pakkhipeyya, sukkhāni ca kaṭṭhāni pakkhipeyya. Evañhi so, bhikkhave, mahāaggikkhandho tadāhāro tadupādāno ciraṃ dīghamaddhānaṃ jaleyya. Evameva kho, bhikkhave, upādāniyesu dhammesu assādānupassino viharato taṇhā pavaḍḍhati. Taṇhāpaccayā upādānaṃ…pe… evametassa kevalassa dukkhakkhandhassa samudayo hoti.
‘‘ဥပာဒာနိယေသု, ဘိက္ခဝေ, ဓမ္မေသု အာဒီနဝာနုပသ္သိနော ဝိဟရတော တဏ္ဟာ နိရုဇ္ဈတိ။ တဏ္ဟာနိရောဓာ ဥပာဒာနနိရောဓော; ဥပာဒာနနိရောဓာ ဘဝနိရောဓော; ဘဝနိရောဓာ ဇာတိနိရောဓော; ဇာတိနိရောဓာ ဇရာမရဏံ သောကပရိဒေဝဒုက္ခဒောမနသ္သုပာယာသာ နိရုဇ္ဈန္တိ။ ဧဝမေတသ္သ ကေဝလသ္သ ဒုက္ခက္ခန္ဓသ္သ နိရောဓော ဟောတိ။
‘‘Upādāniyesu, bhikkhave, dhammesu ādīnavānupassino viharato taṇhā nirujjhati. Taṇhānirodhā upādānanirodho; upādānanirodhā bhavanirodho; bhavanirodhā jātinirodho; jātinirodhā jarāmaraṇaṃ sokaparidevadukkhadomanassupāyāsā nirujjhanti. Evametassa kevalassa dukkhakkhandhassa nirodho hoti.
‘‘သေယ္ယထာပိ, ဘိက္ခဝေ, ဒသန္နံ ဝာ ကဋ္ဌဝာဟာနံ ဝီသာယ ဝာ တိံသာယ ဝာ စတ္တာရီသာယ ဝာ ကဋ္ဌဝာဟာနံ မဟာအဂ္ဂိက္ခန္ဓော ဇလေယ္ယ; တတ္ရ ပုရိသော န ကာလေန ကာလံ သုက္ခာနိ စေဝ တိဏာနိ ပက္ခိပေယ္ယ, န သုက္ခာနိ စ ဂောမယာနိ ပက္ခိပေယ္ယ, န သုက္ခာနိ စ ကဋ္ဌာနိ ပက္ခိပေယ္ယ။ ဧဝဉ္ဟိ သော, ဘိက္ခဝေ, မဟာအဂ္ဂိက္ခန္ဓော ပုရိမသ္သ စ ဥပာဒာနသ္သ ပရိယာဒာနာ အညသ္သ စ အနုပဟာရာ 1 အနာဟာရော နိဗ္ဗာယေယ္ယ။ ဧဝမေဝ ခော, ဘိက္ခဝေ, ဥပာဒာနိယေသု ဓမ္မေသု အာဒီနဝာနုပသ္သိနော ဝိဟရတော တဏ္ဟာ နိရုဇ္ဈတိ, တဏ္ဟာနိရောဓာ ဥပာဒာနနိရောဓော။ပေ.။ ဧဝမေတသ္သ ကေဝလသ္သ ဒုက္ခက္ခန္ဓသ္သ နိရောဓော ဟောတီ’’တိ။ ဒုတိယံ။
‘‘Seyyathāpi, bhikkhave, dasannaṃ vā kaṭṭhavāhānaṃ vīsāya vā tiṃsāya vā cattārīsāya vā kaṭṭhavāhānaṃ mahāaggikkhandho jaleyya; tatra puriso na kālena kālaṃ sukkhāni ceva tiṇāni pakkhipeyya, na sukkhāni ca gomayāni pakkhipeyya, na sukkhāni ca kaṭṭhāni pakkhipeyya. Evañhi so, bhikkhave, mahāaggikkhandho purimassa ca upādānassa pariyādānā aññassa ca anupahārā 2 anāhāro nibbāyeyya. Evameva kho, bhikkhave, upādāniyesu dhammesu ādīnavānupassino viharato taṇhā nirujjhati, taṇhānirodhā upādānanirodho…pe… evametassa kevalassa dukkhakkhandhassa nirodho hotī’’ti. Dutiyaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၂. ဥပာဒာနသုတ္တဝဏ္ဏနာ • 2. Upādānasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၂. ဥပာဒာနသုတ္တဝဏ္ဏနာ • 2. Upādānasuttavaṇṇanā
