| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
4. உபாதி³ன்னத்திகவண்ணனா
4. Upādinnattikavaṇṇanā
51. உபாதி³ன்னுபாதா³னியத்திகஸ்ஸ பஞ்ஹாவாரே வத்து² உபாதா³னியானங் க²ந்தா⁴னங் புரேஜாதபச்சயேன பச்சயோதி பவத்திங் ஸந்தா⁴ய வுத்தங். படிஸந்தி⁴யங் பன தங் புரேஜாதங் ந ஹோதி.
51. Upādinnupādāniyattikassa pañhāvāre vatthu upādāniyānaṃ khandhānaṃ purejātapaccayena paccayoti pavattiṃ sandhāya vuttaṃ. Paṭisandhiyaṃ pana taṃ purejātaṃ na hoti.
72. உபாதி³ன்னுபாதா³னியோ கப³ளீகாரோ ஆஹாரோ உபாதி³ன்னுபாதா³னியஸ்ஸ காயஸ்ஸ ஆஹாரபச்சயேன பச்சயோதி எத்த² உபாதி³ன்னுபாதா³னியோ கப³ளீகாராஹாரோ நாம கம்மஸமுட்டா²னானங் ரூபானங் அப்³ப⁴ந்தரக³தா ஓஜா. உபாதி³ன்னுபாதா³னியஸ்ஸ காயஸ்ஸாதி தஸ்ஸேவ கம்மஸமுட்டா²னரூபகாயஸ்ஸ ஆஹாரபச்சயேன பச்சயோ. ரூபஜீவிதிந்த்³ரியங் விய கடத்தாரூபானங் அனுபாலனஉபத்த²ம்ப⁴னவஸேன பச்சயோ, ந ஜனகவஸேன. யங் பன மண்டூ³காத³யோ கி³லித்வா டி²தானங் அஹிஆதீ³னங் காயஸ்ஸ ஜீவமானகமண்டூ³காதி³ஸரீரே ஓஜா ஆஹாரபச்சயேன பச்சயோதி வத³ந்தி, தங் ந க³ஹேதப்³ப³ங். ந ஹி ஜீவமானகஸரீரே ஓஜா அஞ்ஞஸ்ஸ ஸரீரஸ்ஸ ஆஹாரபச்சயதங் ஸாதே⁴தி. அனுபாதி³ன்னுபாதா³னியஸ்ஸ காயஸ்ஸாதி எத்த² பன ஜனகவஸேனாபி லப்³ப⁴தி. உபாதி³ன்னுபாதா³னியஸ்ஸ ச அனுபாதி³ன்னுபாதா³னியஸ்ஸ சாதி எத்த² ஏகஸ்ஸ உபத்த²ம்ப⁴கவஸேன, ஏகஸ்ஸ ஜனகவஸேன, உபி⁴ன்னம்பி வா உபத்த²ம்ப⁴கவஸேனேவ வுத்தோ. த்³வே பன ஆஹாரா ஏகதோ பச்சயா ஹொந்தா உபத்த²ம்ப⁴காவ ஹொந்தி, ந ஜனகா. ஸேஸமெத்த² பாளிமேவ ஸாது⁴கங் ஓலோகெத்வா வேதி³தப்³ப³ங்.
72. Upādinnupādāniyo kabaḷīkāro āhāro upādinnupādāniyassa kāyassa āhārapaccayena paccayoti ettha upādinnupādāniyo kabaḷīkārāhāro nāma kammasamuṭṭhānānaṃ rūpānaṃ abbhantaragatā ojā. Upādinnupādāniyassa kāyassāti tasseva kammasamuṭṭhānarūpakāyassa āhārapaccayena paccayo. Rūpajīvitindriyaṃ viya kaṭattārūpānaṃ anupālanaupatthambhanavasena paccayo, na janakavasena. Yaṃ pana maṇḍūkādayo gilitvā ṭhitānaṃ ahiādīnaṃ kāyassa jīvamānakamaṇḍūkādisarīre ojā āhārapaccayena paccayoti vadanti, taṃ na gahetabbaṃ. Na hi jīvamānakasarīre ojā aññassa sarīrassa āhārapaccayataṃ sādheti. Anupādinnupādāniyassa kāyassāti ettha pana janakavasenāpi labbhati. Upādinnupādāniyassa ca anupādinnupādāniyassa cāti ettha ekassa upatthambhakavasena, ekassa janakavasena, ubhinnampi vā upatthambhakavaseneva vutto. Dve pana āhārā ekato paccayā hontā upatthambhakāva honti, na janakā. Sesamettha pāḷimeva sādhukaṃ oloketvā veditabbaṃ.
உபாதி³ன்னத்திகவண்ணனா.
Upādinnattikavaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / பட்டா²னபாளி • Paṭṭhānapāḷi / 4. உபாதி³ன்னத்திகங் • 4. Upādinnattikaṃ
