Library / Tipiṭaka / တိပိဋက • Tipiṭaka / ခုဒ္ဒသိက္ခာ-မူလသိက္ခာ • Khuddasikkhā-mūlasikkhā |
၁၅. ဥပဇ္ဈာစရိယဝတ္တနိဒ္ဒေသဝဏ္ဏနာ
15. Upajjhācariyavattaniddesavaṇṇanā
၁၄၅. ဥပဇ္ဈာစရိယေတိ ဧတ္ထ (မဟာဝ. ၆၄, ၆၇, ၇၄, ၇၈-၇၉; စူဠဝ. ၃၇၅, ၃၇၇; ၃၇၉-၃၈၂; မဟာဝ. အဋ္ဌ. ၆၄, ၆၇, ၇၅, ၇၆, ၇၇) အာစရိယော နာမ နိသ္သယာစရိယော ပဗ္ဗဇ္ဇာစရိယော ဥပသမ္ပဒာစရိယော ဓမ္မာစရိယောတိ စတုဗ္ဗိဓော။ ဧတေသု ဟိ နိသ္သယန္တေဝာသိကေန ယာဝ အာစရိယံ နိသ္သာယ ဝသတိ, တာဝ သဗ္ဗမာစရိယဝတ္တံ ကာတဗ္ဗံ။ ပဗ္ဗဇ္ဇာဥပသမ္ပဒာဓမ္မန္တေဝာသိကေဟိ ပန နိသ္သယမုတ္တကေဟိပိ အာဒိတော ပဋ္ဌာယ ယာဝ စီဝရရဇနံ, တာဝ ဝတ္တံ ကာတဗ္ဗံ။ အနာပုစ္ဆိတ္ဝာ ပတ္တဒာနာဒိမ္ဟိ ပန ဧတေသံ အနာပတ္တိ။ ဧတေသု စ ပဗ္ဗဇ္ဇန္တေဝာသိကော စ ဥပသမ္ပဒန္တေဝာသိကော စ အာစရိယသ္သ ယာဝဇီဝံ ဘာရော, နိသ္သယန္တေဝာသိကော စ ဓမ္မန္တေဝာသိကော စ ယာဝ သမီပေ ဝသတိ, တာဝဒေဝ။ သုဋ္ဌု ပိယသီလော သုပေသလော, သိက္ခာကာမောတိ အတ္ထော။ ဒန္တကဋ္ဌံ ဒေန္တေန ဧကံသံ ဥတ္တရာသင္ဂံ ကရိတ္ဝာ မဟန္တံ မဇ္ဈိမံ ခုဒ္ဒကန္တိ တီဏိ ဒန္တကဋ္ဌာနိ ဥပနေတဗ္ဗာနိ။ တေသု ယံ တီဏိ ဒိဝသာနိ ဂဏ္ဟာတိ, တံ သလ္လက္ခေတ္ဝာ စတုတ္ထဒိဝသတော ပဋ္ဌာယ တာဒိသံယေဝ သမ္မာ ဥဘောဟိ ဟတ္ထေဟိ ဒာတဗ္ဗံ။ သစေ ယံ ဝာ တံ ဝာ ဂဏ္ဟာတိ, ယထာလဒ္ဓံ ဥပနေတဗ္ဗံ။ တောယန္တိ သီတဉ္စ ဥဏ္ဟဉ္စ ဥဒကံ ဥပနေတ္ဝာ ယံ တီဏိ ဒိဝသာနိ ဝဠဉ္ဇေတိ, စတုတ္ထဒိဝသတော ပဋ္ဌာယ တာဒိသံ ဥပနေတဗ္ဗံ။ သစေ ဒ္ဝေပိ ဝဠဉ္ဇေတိ, ဒုဝိဓမ္ပိ ဥပနေတဗ္ဗံ။ သစေ ယာဂု ဟောတိ, ဘာဇနံ ဓောဝိတ္ဝာ ဥပနေတဗ္ဗံ။
145.Upajjhācariyeti ettha (mahāva. 64, 67, 74, 78-79; cūḷava. 375, 377; 379-382; mahāva. aṭṭha. 64, 67, 75, 76, 77) ācariyo nāma nissayācariyo pabbajjācariyo upasampadācariyo dhammācariyoti catubbidho. Etesu hi nissayantevāsikena yāva ācariyaṃ nissāya vasati, tāva sabbamācariyavattaṃ kātabbaṃ. Pabbajjāupasampadādhammantevāsikehi pana nissayamuttakehipi ādito paṭṭhāya yāva cīvararajanaṃ, tāva vattaṃ kātabbaṃ. Anāpucchitvā pattadānādimhi pana etesaṃ anāpatti. Etesu ca pabbajjantevāsiko ca upasampadantevāsiko ca ācariyassa yāvajīvaṃ bhāro, nissayantevāsiko ca dhammantevāsiko ca yāva samīpe vasati, tāvadeva. Suṭṭhu piyasīlo supesalo, sikkhākāmoti attho. Dantakaṭṭhaṃ dentena ekaṃsaṃ uttarāsaṅgaṃ karitvā mahantaṃ majjhimaṃ khuddakanti tīṇi dantakaṭṭhāni upanetabbāni. Tesu yaṃ tīṇi divasāni gaṇhāti, taṃ sallakkhetvā catutthadivasato paṭṭhāya tādisaṃyeva sammā ubhohi hatthehi dātabbaṃ. Sace yaṃ vā taṃ vā gaṇhāti, yathāladdhaṃ upanetabbaṃ. Toyanti sītañca uṇhañca udakaṃ upanetvā yaṃ tīṇi divasāni vaḷañjeti, catutthadivasato paṭṭhāya tādisaṃ upanetabbaṃ. Sace dvepi vaḷañjeti, duvidhampi upanetabbaṃ. Sace yāgu hoti, bhājanaṃ dhovitvā upanetabbaṃ.
၁၄၆. ပတ္တေ ဝတ္တံ စရေတိ ‘‘ယာဂုံ ပီတသ္သ ဥဒကံ ဒတ္ဝာ ဘာဇနံ ပဋိဂ္ဂဟေတ္ဝာ နီစံ ကတ္ဝာ သာဓုကံ အပရိဃံသန္တေန ဓောဝိတ္ဝာ ပဋိသာမေတဗ္ဗ’’န္တိ (မဟာဝ. ၆၆, ၇၈; စူဠဝ. ၃၇၆, ၃၈၀) ဝုတ္တံ ပတ္တေ ဝတ္တံ စရေတိ အတ္ထော။ ဂာမပ္ပဝေသေ ဝတ္တံ စရေတိ ဧဝံ သဗ္ဗတ္ထ။ ‘‘သစေ ဥပဇ္ဈာယော ဝာ အာစရိယော ဝာ ဂာမံ ပဝိသိတုကာမော ဟောတိ, နိဝာသနံ ဒာတဗ္ဗံ, ပဋိနိဝာသနံ ပဋိဂ္ဂဟေတဗ္ဗံ, ကာယဗန္ဓနံ ဒာတဗ္ဗံ, သဂုဏံ ကတ္ဝာ သင္ဃာဋိယော ဒာတဗ္ဗာ, ဓောဝိတ္ဝာ ပတ္တော သောဒကော ဒာတဗ္ဗော’’တိ (မဟာဝ. ၆၆, ၇၈; စူဠဝ. ၃၇၆, ၃၈၀) ဣဒံ ဂာမပ္ပဝေသနေ ဝတ္တံ နာမ။ ‘‘သစေ ဥပဇ္ဈာယော ဝာ အာစရိယော ဝာ ပစ္ဆာသမဏံ အာကင္ခတိ, တိမဏ္ဍလံ ပဋိစ္ဆာဒေန္တေန ပရိမဏ္ဍလံ နိဝာသေတ္ဝာ ကာယဗန္ဓနံ ဗန္ဓိတ္ဝာ သဂုဏံ ကတ္ဝာ သင္ဃာဋိယော ပာရုပိတ္ဝာ ဂဏ္ဌိကံ ပဋိမုဉ္စိတ္ဝာ ဓောဝိတ္ဝာ ပတ္တံ ဂဟေတ္ဝာ ဥပဇ္ဈာယသ္သ ဝာ အာစရိယသ္သ ဝာ ပစ္ဆာသမဏေန ဟောတဗ္ဗ’’န္တိအာဒိနာ (မဟာဝ. ၆၆, ၇၈; စူဠဝ. ၃၇၆, ၃၈၀) နယေန ဝုတ္တံ ဂမနေ ဝတ္တံ နာမ။ ‘‘နိဝတ္တန္တေန ပဌမတရံ အာဂန္တ္ဝာ အာသနံ ပညာပေတဗ္ဗ’’န္တိအာဒိနာ (မဟာဝ. ၆၆, ၇၈; စူဠဝ. ၃၇၆, ၃၈၀) နယေန ဝုတ္တံ အာဂမေ ဝတ္တံ နာမ။ ‘‘ဥပဇ္ဈာယမ္ဟိ ဝုဋ္ဌိတေ အာသနံ ဥဒ္ဓရိတဗ္ဗံ, ပာဒောဒကံ ပာဒပီဌံ ပာဒကထလိကံ ပဋိသာမေတဗ္ဗ’’န္တိ (မဟာဝ. ၆၆, ၇၈; စူဠဝ. ၃၇၆, ၃၈၀) ဧဝံ ဝုတ္တံ အာသနာဒီသု ဝတ္တံ နာမ။ ဥပာဟနာယ ဝတ္တံ နာမ ‘‘ဥပာဟနာ ပုဉ္ဆိတဗ္ဗာ, ဥပာဟနာ ပုဉ္ဆန္တေန ပဌမံ သုက္ခေန စောဠကေန ပုဉ္ဆိတဗ္ဗာ, ပစ္ဆာ အလ္လေနာ’’တိအာဒိနာ (စူဠဝ. ၃၅၇, ၃၅၉) ဝုတ္တံ။ စီဝရေ ဝတ္တံ နာမ ‘‘သစေ စီဝရံ သိန္နံ ဟောတိ, မုဟုတ္တံ ဥဏ္ဟေ ဩတာပေတဗ္ဗံ, န စ ဥဏ္ဟေ စီဝရံ နိဒဟိတဗ္ဗ’’န္တိအာဒိနာ (မဟာဝ. ၆၆, ၇၈; စူဠဝ. ၃၇၆, ၃၈၀) ဝုတ္တံ။
146.Patte vattaṃ careti ‘‘yāguṃ pītassa udakaṃ datvā bhājanaṃ paṭiggahetvā nīcaṃ katvā sādhukaṃ aparighaṃsantena dhovitvā paṭisāmetabba’’nti (mahāva. 66, 78; cūḷava. 376, 380) vuttaṃ patte vattaṃ careti attho. Gāmappavese vattaṃ careti evaṃ sabbattha. ‘‘Sace upajjhāyo vā ācariyo vā gāmaṃ pavisitukāmo hoti, nivāsanaṃ dātabbaṃ, paṭinivāsanaṃ paṭiggahetabbaṃ, kāyabandhanaṃ dātabbaṃ, saguṇaṃ katvā saṅghāṭiyo dātabbā, dhovitvā patto sodako dātabbo’’ti (mahāva. 66, 78; cūḷava. 376, 380) idaṃ gāmappavesane vattaṃ nāma. ‘‘Sace upajjhāyo vā ācariyo vā pacchāsamaṇaṃ ākaṅkhati, timaṇḍalaṃ paṭicchādentena parimaṇḍalaṃ nivāsetvā kāyabandhanaṃ bandhitvā saguṇaṃ katvā saṅghāṭiyo pārupitvā gaṇṭhikaṃ paṭimuñcitvā dhovitvā pattaṃ gahetvā upajjhāyassa vā ācariyassa vā pacchāsamaṇena hotabba’’ntiādinā (mahāva. 66, 78; cūḷava. 376, 380) nayena vuttaṃ gamane vattaṃ nāma. ‘‘Nivattantena paṭhamataraṃ āgantvā āsanaṃ paññāpetabba’’ntiādinā (mahāva. 66, 78; cūḷava. 376, 380) nayena vuttaṃ āgame vattaṃ nāma. ‘‘Upajjhāyamhi vuṭṭhite āsanaṃ uddharitabbaṃ, pādodakaṃ pādapīṭhaṃ pādakathalikaṃ paṭisāmetabba’’nti (mahāva. 66, 78; cūḷava. 376, 380) evaṃ vuttaṃ āsanādīsu vattaṃ nāma. Upāhanāya vattaṃ nāma ‘‘upāhanā puñchitabbā, upāhanā puñchantena paṭhamaṃ sukkhena coḷakena puñchitabbā, pacchā allenā’’tiādinā (cūḷava. 357, 359) vuttaṃ. Cīvare vattaṃ nāma ‘‘sace cīvaraṃ sinnaṃ hoti, muhuttaṃ uṇhe otāpetabbaṃ, na ca uṇhe cīvaraṃ nidahitabba’’ntiādinā (mahāva. 66, 78; cūḷava. 376, 380) vuttaṃ.
၁၄၇. ပရိဘောဇနီယပာနီယ-ဝစ္စပ္ပသ္သာဝဌာနိသူတိ ဧတ္ထ သစေ ပာနီယံ န ဟောတိ, ပာနီယံ ဥပဋ္ဌာပေတဗ္ဗံ။ သစေ ပရိဘောဇနီယံ န ဟောတိ, ပရိဘောဇနီယံ ဥပဋ္ဌာပေတဗ္ဗံ။ သစေ ဝစ္စကုဋိ ဥက္လာပာ ဟောတိ, ဝစ္စကုဋိ သမ္မဇ္ဇိတဗ္ဗာ။ တထာ ပသ္သာဝဋ္ဌာနေ ဧဝံ ဝတ္တံ စရိတဗ္ဗန္တိ အတ္ထော။ ‘‘ဝိဟာရံ သောဓေန္တေန ပဌမံ ပတ္တစီဝရံ နီဟရိတ္ဝာ ဧကမန္တံ နိက္ခိပိတဗ္ဗ’’န္တိအာဒိနာ နယေန ဝုတ္တံ ဝိဟာရသောဓနေ ဝတ္တံ နာမ။ ‘‘ဘူမတ္ထရဏံ ဩတာပေတ္ဝာ သောဓေတ္ဝာ ပပ္ဖောဋေတ္ဝာ အတိဟရိတ္ဝာ ယထာပညတ္တံ ပညာပေတဗ္ဗ’’န္တိအာဒိနာ (မဟာဝ. ၆၆, ၇၈; စူဠဝ. ၃၇၆, ၃၈၀) ဝုတ္တံ ပုန ပညာပနေ ဝတ္တံ နာမ။
147.Paribhojanīyapānīya-vaccappassāvaṭhānisūti ettha sace pānīyaṃ na hoti, pānīyaṃ upaṭṭhāpetabbaṃ. Sace paribhojanīyaṃ na hoti, paribhojanīyaṃ upaṭṭhāpetabbaṃ. Sace vaccakuṭi uklāpā hoti, vaccakuṭi sammajjitabbā. Tathā passāvaṭṭhāne evaṃ vattaṃ caritabbanti attho. ‘‘Vihāraṃ sodhentena paṭhamaṃ pattacīvaraṃ nīharitvā ekamantaṃ nikkhipitabba’’ntiādinā nayena vuttaṃ vihārasodhane vattaṃ nāma. ‘‘Bhūmattharaṇaṃ otāpetvā sodhetvā papphoṭetvā atiharitvā yathāpaññattaṃ paññāpetabba’’ntiādinā (mahāva. 66, 78; cūḷava. 376, 380) vuttaṃ puna paññāpane vattaṃ nāma.
၁၄၈. ဣဒာနိ ဝိဟာရံ သောဓေန္တေန ဧဝံ သောဓေတဗ္ဗန္တိ တံ ဒသ္သေတုံ ‘‘န ပပ္ဖောဋေယ္ယာ’’တိအာဒိမာဟ ။ တသ္သတ္ထော – ဝိဟာရံ သောဓေန္တော ဘိက္ခု ဘူမတ္ထရဏာဒိသယနာသနံ ပဋိဝာတေ ဝာ ပင္ဂဏေ ဝာ ပာနီယသာမန္တာ ဝာ န ပပ္ဖောဋေယ္ယာတိ။ ပင္ဂဏေတိ ဗဟူနံ သန္နိပာတေ ဌာနေ။
148. Idāni vihāraṃ sodhentena evaṃ sodhetabbanti taṃ dassetuṃ ‘‘na papphoṭeyyā’’tiādimāha . Tassattho – vihāraṃ sodhento bhikkhu bhūmattharaṇādisayanāsanaṃ paṭivāte vā paṅgaṇe vā pānīyasāmantā vā na papphoṭeyyāti. Paṅgaṇeti bahūnaṃ sannipāte ṭhāne.
၁၄၉. န္ဟာနေတိ ‘‘သစေ ဥပဇ္ဈာယော နဟာယိတုကာမော ဟောတိ, နဟာနံ ပဋိယာဒေတဗ္ဗံ။ သစေ သီတေန အတ္ထော ဟောတိ, သီတံ ပဋိယာဒေတဗ္ဗ’’န္တိအာဒိနာ (မဟာဝ. ၆၆; စူဠဝ. ၃၇၆) ဝုတ္တံ နဟာနေ ဝတ္တံ နာမ, ‘‘ဥပဇ္ဈာယသ္သ ဂတ္တတော ဥဒကံ သမ္မဇ္ဇိတဗ္ဗံ, နိဝာသနံ ဒာတဗ္ဗ’’န္တိအာဒိနာ (မဟာဝ. ၆၆; စူဠဝ. ၃၇၆) ဝုတ္တံ နဟာတသ္သ ကာတဗ္ဗံ နာမ။ ရင္ဂပာကေတိ ‘‘သစေ ဥပဇ္ဈာယသ္သ အာစရိယသ္သ ရဇနံ ပစိတဗ္ဗံ ဟောတိ, သဒ္ဓိဝိဟာရိကေန အန္တေဝာသိကေန ပစိတဗ္ဗ’’န္တိ (မဟာဝ. ၆၆, ၇၈; စူဠဝ. ၃၇၆, ၃၈၀) ဝုတ္တံ။ ဓောဝနေတိ ‘‘သစေ ဥပဇ္ဈာယသ္သ အာစရိယသ္သ စီဝရံ ဓောဝိတဗ္ဗံ ဟောတိ, သဒ္ဓိဝိဟာရိကေန အန္တေဝာသိကေန ဓောဝိတဗ္ဗံ, ဥသ္သုက္ကံ ဝာ ကာတဗ္ဗ’’န္တိ (မဟာဝ. ၆၆, ၇၈; စူဠဝ. ၃၇၆, ၃၈၀) ဝုတ္တံ။ သိဗ္ဗနေတိ ‘‘သစေ ဥပဇ္ဈာယေန အာစရိယေန စီဝရံ ကာတဗ္ဗံ ဟောတိ, သဒ္ဓိဝိဟာရိကေန အန္တေဝာသိကေန ကာတဗ္ဗ’’န္တိ (မဟာဝ. ၆၆, ၇၈; စူဠဝ. ၃၇၆, ၃၈၀) ဝုတ္တံ။ စီဝရေ ထေဝေ ဌိတေ ရဇန္တော န ဝဇေ န ပက္ကမေယ္ယာတိ အတ္ထော။ ‘‘စီဝရံ ရဇန္တေန သာဓုကံ သမ္ပရိဝတ္တကံ သမ္ပရိဝတ္တကံ ရဇိတဗ္ဗံ, န စ အစ္ဆိန္နေ ထေဝေ ပက္ကမိတဗ္ဗ’’န္တိ (မဟာဝ. ၆၆, ၇၈; စူဠဝ. ၃၇၆, ၃၈၀) ဟိ ဝုတ္တံ။
149.Nhāneti ‘‘sace upajjhāyo nahāyitukāmo hoti, nahānaṃ paṭiyādetabbaṃ. Sace sītena attho hoti, sītaṃ paṭiyādetabba’’ntiādinā (mahāva. 66; cūḷava. 376) vuttaṃ nahāne vattaṃ nāma, ‘‘upajjhāyassa gattato udakaṃ sammajjitabbaṃ, nivāsanaṃ dātabba’’ntiādinā (mahāva. 66; cūḷava. 376) vuttaṃ nahātassa kātabbaṃ nāma. Raṅgapāketi ‘‘sace upajjhāyassa ācariyassa rajanaṃ pacitabbaṃ hoti, saddhivihārikena antevāsikena pacitabba’’nti (mahāva. 66, 78; cūḷava. 376, 380) vuttaṃ. Dhovaneti ‘‘sace upajjhāyassa ācariyassa cīvaraṃ dhovitabbaṃ hoti, saddhivihārikena antevāsikena dhovitabbaṃ, ussukkaṃ vā kātabba’’nti (mahāva. 66, 78; cūḷava. 376, 380) vuttaṃ. Sibbaneti ‘‘sace upajjhāyena ācariyena cīvaraṃ kātabbaṃ hoti, saddhivihārikena antevāsikena kātabba’’nti (mahāva. 66, 78; cūḷava. 376, 380) vuttaṃ. Cīvare theve ṭhite rajanto na vaje na pakkameyyāti attho. ‘‘Cīvaraṃ rajantena sādhukaṃ samparivattakaṃ samparivattakaṃ rajitabbaṃ, na ca acchinne theve pakkamitabba’’nti (mahāva. 66, 78; cūḷava. 376, 380) hi vuttaṃ.
၁၅၀. ဧကစ္စသ္သာတိ အာစရိယုပဇ္ဈာယာနံ ဝိသဘာဂသ္သ အနတ္ထကာမသ္သ ဝေရိပုဂ္ဂလသ္သ။ အနာပုစ္ဆာတိ အာစရိယုပဇ္ဈာယာနံ အနာရောစေတ္ဝာ။ ကိဉ္စနန္တိ ယံ ကိဉ္စိ။
150.Ekaccassāti ācariyupajjhāyānaṃ visabhāgassa anatthakāmassa veripuggalassa. Anāpucchāti ācariyupajjhāyānaṃ anārocetvā. Kiñcananti yaṃ kiñci.
၁၅၁-၂. တသ္သာတိ ဧကစ္စသ္သ။ နိန္နေတုန္တိ နီဟရိတုံ။ ကိစ္စယံ ပရိကမ္မံ ဝာတိ ဝေယ္ယာဝစ္စံ ဝာ ပိဋ္ဌိပရိကမ္မာဒိပရိကမ္မံ ဝာ အတ္တနာ တသ္သ ကာတုံ ဝာ တေန အတ္တနော ကာရာပေတုံ ဝာတိ ဧဝမတ္ထော ဝေဒိတဗ္ဗော။
151-2.Tassāti ekaccassa. Ninnetunti nīharituṃ. Kiccayaṃ parikammaṃ vāti veyyāvaccaṃ vā piṭṭhiparikammādiparikammaṃ vā attanā tassa kātuṃ vā tena attano kārāpetuṃ vāti evamattho veditabbo.
၁၅၃. သစေ အာစရိယုပဇ္ဈာယာ အညတ္ထ ဂတာ ဟောန္တိ, ပရိဝေဏံ ဂန္တ္ဝာ အပသ္သန္တေဟိ ဂာမံ ပဝိသိတုံ ဝဋ္ဋတိ။ ဂာမံ ပဝိသန္တော သစေ ပသ္သတိ, အာပုစ္ဆိတဗ္ဗမေဝာတိ ဝဒန္တိ။ ‘‘ဥပဇ္ဈာယံ အနာပုစ္ဆာ န ဒိသာ ပက္ကမိတဗ္ဗာ’’တိ (မဟာဝ. ၆၆, စူဠဝ. ၃၇၆) ဟိ ဝုတ္တံ။ အတ္တနော ကိစ္စယံ နာမ အန္တောဝိဟာရေပိ အတ္တနော ပတ္တပစနစီဝရကမ္မကေသစ္ဆေဒနာဒိ။
153. Sace ācariyupajjhāyā aññattha gatā honti, pariveṇaṃ gantvā apassantehi gāmaṃ pavisituṃ vaṭṭati. Gāmaṃ pavisanto sace passati, āpucchitabbamevāti vadanti. ‘‘Upajjhāyaṃ anāpucchā na disā pakkamitabbā’’ti (mahāva. 66, cūḷava. 376) hi vuttaṃ. Attano kiccayaṃ nāma antovihārepi attano pattapacanacīvarakammakesacchedanādi.
၁၅၄. သင္ဃာယတ္တကမ္မာနိ နာမ ပရိဝာသမာနတ္တအဗ္ဘာနတဇ္ဇနီယနိယသ္သပဗ္ဗာဇနီယပဋိသာရဏီယဥက္ခေပနာဒယော။
154.Saṅghāyattakammāni nāma parivāsamānattaabbhānatajjanīyaniyassapabbājanīyapaṭisāraṇīyaukkhepanādayo.
၁၅၅. ဝုဋ္ဌာနံ နေသမာဂမေတိ ‘‘သစေ ဥပဇ္ဈာယော ဝာ အာစရိယော ဝာ ဂိလာနော ဟောတိ, ယာဝဇီဝံ ဥပဋ္ဌာတဗ္ဗော, ဝုဋ္ဌာနမသ္သ အာဂမေတဗ္ဗ’’န္တိ (မဟာဝ. ၆၆; စူဠဝ. ၃၇၆) ဟိ ဝုတ္တံ။ ဥပဇ္ဈာစရိယဝတ္တဝိနိစ္ဆယော။
155.Vuṭṭhānaṃ nesamāgameti ‘‘sace upajjhāyo vā ācariyo vā gilāno hoti, yāvajīvaṃ upaṭṭhātabbo, vuṭṭhānamassa āgametabba’’nti (mahāva. 66; cūḷava. 376) hi vuttaṃ. Upajjhācariyavattavinicchayo.
ဥပဇ္ဈာစရိယဝတ္တနိဒ္ဒေသဝဏ္ဏနာ နိဋ္ဌိတာ။
Upajjhācariyavattaniddesavaṇṇanā niṭṭhitā.