| Library / Tipiṭaka / తిపిటక • Tipiṭaka / అఙ్గుత్తరనికాయ (అట్ఠకథా) • Aṅguttaranikāya (aṭṭhakathā) |
౩. ఉపక్కిలేససుత్తవణ్ణనా
3. Upakkilesasuttavaṇṇanā
౨౩. తతియే న చ పభస్సరన్తి న చ పభావన్తం. పభఙ్గు చాతి పభిజ్జనసభావం. అయోతి కాళలోహం. లోహన్తి ఠపేత్వా ఇధ వుత్తాని చత్తారి అవసేసం లోహం. సజ్ఝన్తి రజతం. చిత్తస్సాతి చాతుభూమకకుసలచిత్తస్స. తేభూమకస్స తావ ఉపక్కిలేసా హోన్తు, లోకుత్తరస్స కథం హోన్తీతి? ఉప్పజ్జితుం అప్పదానేన. యదగ్గేన హి ఉప్పజ్జితుం న దేన్తి, తదగ్గేనేవ తే లోకియస్సపి లోకుత్తరస్సపి ఉపక్కిలేసా నామ హోన్తి. పభఙ్గు చాతి ఆరమ్మణే చుణ్ణవిచుణ్ణభావూపగమనేన భిజ్జనసభావం. సమ్మా సమాధియతి ఆసవానం ఖయాయాతి ఆసవానం ఖయసఙ్ఖాతస్స అరహత్తస్స అత్థాయ హేతునా కారణేన సమాధియతి. ఏత్తావతా చిత్తం విసోధేత్వా అరహత్తే పతిట్ఠితం ఖీణాసవం దస్సేతి. ఇదానిస్స అభిఞ్ఞాపటివేధం దస్సేన్తో యస్స యస్స చాతిఆదిమాహ. తం ఉత్తానత్థమేవాతి.
23. Tatiye na ca pabhassaranti na ca pabhāvantaṃ. Pabhaṅgu cāti pabhijjanasabhāvaṃ. Ayoti kāḷalohaṃ. Lohanti ṭhapetvā idha vuttāni cattāri avasesaṃ lohaṃ. Sajjhanti rajataṃ. Cittassāti cātubhūmakakusalacittassa. Tebhūmakassa tāva upakkilesā hontu, lokuttarassa kathaṃ hontīti? Uppajjituṃ appadānena. Yadaggena hi uppajjituṃ na denti, tadaggeneva te lokiyassapi lokuttarassapi upakkilesā nāma honti. Pabhaṅgu cāti ārammaṇe cuṇṇavicuṇṇabhāvūpagamanena bhijjanasabhāvaṃ. Sammāsamādhiyati āsavānaṃ khayāyāti āsavānaṃ khayasaṅkhātassa arahattassa atthāya hetunā kāraṇena samādhiyati. Ettāvatā cittaṃ visodhetvā arahatte patiṭṭhitaṃ khīṇāsavaṃ dasseti. Idānissa abhiññāpaṭivedhaṃ dassento yassa yassa cātiādimāha. Taṃ uttānatthamevāti.
Related texts:
తిపిటక (మూల) • Tipiṭaka (Mūla) / సుత్తపిటక • Suttapiṭaka / అఙ్గుత్తరనికాయ • Aṅguttaranikāya / ౩. ఉపక్కిలేససుత్తం • 3. Upakkilesasuttaṃ
టీకా • Tīkā / సుత్తపిటక (టీకా) • Suttapiṭaka (ṭīkā) / అఙ్గుత్తరనికాయ (టీకా) • Aṅguttaranikāya (ṭīkā) / ౩-౪. ఉపక్కిలేససుత్తాదివణ్ణనా • 3-4. Upakkilesasuttādivaṇṇanā
