| Library / Tipiṭaka / તિપિટક • Tipiṭaka / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) |
૧૦. ઉપક્કિલેસસુત્તવણ્ણના
10. Upakkilesasuttavaṇṇanā
૫૦. દસમે ઉપક્કિલેસાતિ વિરોચિતું અદત્વા ઉપક્કિલિટ્ઠભાવકરણેન ઉપક્કિલેસા. મહિકાતિ હિમં. ધૂમો રજોતિ ધૂમો ચ રજો ચ. રાહૂતિ પુરિમા તયો અસમ્પત્તઉપક્કિલેસા, રાહુ પન સમ્પત્તઉપક્કિલેસવસેન કથિતોતિ વેદિતબ્બો. સમણબ્રાહ્મણા ન તપન્તિ ન ભાસન્તિ ન વિરોચન્તીતિ ગુણપ્પતાપેન ન તપન્તિ, ગુણોભાસેન ન ભાસન્તિ, ગુણવિરોચનેન ન વિરોચન્તિ. સુરામેરયપાના અપ્પટિવિરતાતિ પઞ્ચવિધાય સુરાય ચતુબ્બિધસ્સ મેરયસ્સ ચ પાનતો અવિરતા.
50. Dasame upakkilesāti virocituṃ adatvā upakkiliṭṭhabhāvakaraṇena upakkilesā. Mahikāti himaṃ. Dhūmo rajoti dhūmo ca rajo ca. Rāhūti purimā tayo asampattaupakkilesā, rāhu pana sampattaupakkilesavasena kathitoti veditabbo. Samaṇabrāhmaṇā na tapanti na bhāsanti na virocantīti guṇappatāpena na tapanti, guṇobhāsena na bhāsanti, guṇavirocanena na virocanti. Surāmerayapānā appaṭiviratāti pañcavidhāya surāya catubbidhassa merayassa ca pānato aviratā.
અવિજ્જાનિવુતાતિ અવિજ્જાય નિવારિતા પિહિતા. પિયરૂપાભિનન્દિનોતિ પિયરૂપં સાતરૂપં અભિનન્દમાના તુસ્સમાના. સાદિયન્તીતિ ગણ્હન્તિ. અવિદ્દસૂતિ અન્ધબાલા. સનેત્તિકાતિ તણ્હાયોત્તેનેવ સયોત્તા. કટસિન્તિ અત્તભાવં. ઘોરન્તિ કક્ખળં. ઇમસ્મિં સુત્તેપિ ગાથાસુપિ વટ્ટમેવ કથિતન્તિ.
Avijjānivutāti avijjāya nivāritā pihitā. Piyarūpābhinandinoti piyarūpaṃ sātarūpaṃ abhinandamānā tussamānā. Sādiyantīti gaṇhanti. Aviddasūti andhabālā. Sanettikāti taṇhāyotteneva sayottā. Kaṭasinti attabhāvaṃ. Ghoranti kakkhaḷaṃ. Imasmiṃ suttepi gāthāsupi vaṭṭameva kathitanti.
રોહિતસ્સવગ્ગો પઞ્ચમો.
Rohitassavaggo pañcamo.
પઠમપણ્ણાસકં નિટ્ઠિતં.
Paṭhamapaṇṇāsakaṃ niṭṭhitaṃ.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / અઙ્ગુત્તરનિકાય • Aṅguttaranikāya / ૧૦. ઉપક્કિલેસસુત્તં • 10. Upakkilesasuttaṃ
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૧૦. ઉપક્કિલેસસુત્તવણ્ણના • 10. Upakkilesasuttavaṇṇanā
