| Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) |
༨. ཨུཔཀྐིལེསསུཏྟཝཎྞནཱ
8. Upakkilesasuttavaṇṇanā
༢༣༦. ཏསྨཱཏི ཨཏྠཀཱམཏྟཱ ཨེཝམཱཧ, ན བྷགཝཏོ ཝཙནཾ ཨནཱདིཡནྟོ། ཡེ པན ཏདཱ སཏྠུཝཙནཾ ན གཎྷིཾསུ, ཏེ ཀིཉྩི ཨཝཏྭཱ ཏུཎྷཱིབྷཱུཏཱ མངྐུབྷཱུཏཱ ཨཊྛཾསུ, ཏསྨཱ ཨུབྷཡེསམྤི སཏྠརི ཨགཱརཝཔཊིཔཏྟི ནཱཧོསི།
236.Tasmāti atthakāmattā evamāha, na bhagavato vacanaṃ anādiyanto. Ye pana tadā satthuvacanaṃ na gaṇhiṃsu, te kiñci avatvā tuṇhībhūtā maṅkubhūtā aṭṭhaṃsu, tasmā ubhayesampi satthari agāravapaṭipatti nāhosi.
ཡེནཔི ཛནེན ན དིཊྛོཏི ཡེན ཨུབྷཡཛནེན ཨཉྙཝིཧིཏཏཱཡ ཀུཌྜཀཝཱཊཱདིཨནྟརིཀཏཱཡ ཝཱ ན དིཊྛོ། དམནཏྠནྟི ཏེཧི ཨུཔཱསཀེཧི ནིམྨདབྷཱཝཾ ཨཱཔཱདིཏཱནཾ ཏེསཾ བྷིཀྑཱུནཾ དམནཏྠཾ། ཋཔཡིཾསཱུཏི ཡོ ཨིམེསཾ བྷིཀྑཱུནཾ དེཏི, ཏསྶ སཏཾ དཎྜོཏི, སཧསྶནྟི ཙ ཝདནྟི།
Yenapi janena na diṭṭhoti yena ubhayajanena aññavihitatāya kuḍḍakavāṭādiantarikatāya vā na diṭṭho. Damanatthanti tehi upāsakehi nimmadabhāvaṃ āpāditānaṃ tesaṃ bhikkhūnaṃ damanatthaṃ. Ṭhapayiṃsūti yo imesaṃ bhikkhūnaṃ deti, tassa sataṃ daṇḍoti, sahassanti ca vadanti.
༢༣༧. ཝགྒབྷཱཝེནེཝ (སཱརཏྠ॰ ཊཱི॰ མཧཱཝགྒོ ༣.༤༦༤) ནཱནཱསདྡོ ཨསྶཱཏི པུཐུསདྡོ། སམཛནོཏི བྷཎྜནེ སམཛ྄ཛྷཱསཡོ ཛནོ། བཱལལཀྑཎེ ཋིཏོཔི ‘‘ཨཧཾ བཱལོ’’ཏི ན མཉྙཏི། བྷིཡྻོ ཙཱཏི ཨཏྟནོ བཱལབྷཱཝསྶ ཨཛཱནནཏོཔི བྷིཡྻོ ཙ བྷཎྜནསྶ ཨུཔརི ཕོཊོ ཝིཡ སངྒྷབྷེདསྶ ཨཏྟནོ ཀཱརཎབྷཱཝམྤི ཨུཔྤཛྫམཱནཾ ན མཉྙི ནཉྙཱསི།
237. Vaggabhāveneva (sārattha. ṭī. mahāvaggo 3.464) nānāsaddo assāti puthusaddo. Samajanoti bhaṇḍane samajjhāsayo jano. Bālalakkhaṇe ṭhitopi ‘‘ahaṃ bālo’’ti na maññati. Bhiyyo cāti attano bālabhāvassa ajānanatopi bhiyyo ca bhaṇḍanassa upari phoṭo viya saṅghabhedassa attano kāraṇabhāvampi uppajjamānaṃ na maññi naññāsi.
ཀལཧཝསེན པཝཏྟཝཱཙཱཡེཝ གོཙརོ ཨེཏེསནྟི ཝཱཙཱགོཙརཱ ཧུཏྭཱ། མུཁཱཡཱམནྟི ཝིཝཱདཝསེན མུཁཾ ཨཱཡམེཏྭཱ བྷཱཎིནོ། ན ཏཾ ཛཱནནྟཱིཏི ཏཾ ཀལཧཾ ན ཛཱནནྟི། ཀལཧཾ ཀརོནྟོ ཙ ཏཾ ན ཛཱནནྟོ ནཱམ ནཏྠི། ཡཐཱ པན ན ཛཱནནྟི, ཏཾ དསྶེཏུཾ ཨཱཧ – ‘‘ཨེཝཾ སཱདཱིནཝོ ཨཡ’’ནྟི། ཨཡཾ ཀལཧོ ནཱམ ཨཏྟནོ པརེསཉྩ ཨཏྠཛཱཔནཏོ ཨནཏྠུཔྤཱདནཏོ དིཊྛེཝ དྷམྨེ སམྤརཱཡེ ཙ སཱདཱིནཝོ, སདོསོཏི ཨཏྠོ།
Kalahavasena pavattavācāyeva gocaro etesanti vācāgocarā hutvā. Mukhāyāmanti vivādavasena mukhaṃ āyametvā bhāṇino. Na taṃ jānantīti taṃ kalahaṃ na jānanti. Kalahaṃ karonto ca taṃ na jānanto nāma natthi. Yathā pana na jānanti, taṃ dassetuṃ āha – ‘‘evaṃ sādīnavo aya’’nti. Ayaṃ kalaho nāma attano paresañca atthajāpanato anatthuppādanato diṭṭheva dhamme samparāye ca sādīnavo, sadosoti attho.
ཨུཔནཡ྄ཧནྟཱིཏི ཨུཔནཱཧཝསེན ཨནུབནྡྷནྟི། པོརཱཎོཏི པུརིམེཧི བུདྡྷཱདཱིཧི ཨཱཙིཎྞསམཱཙིཎྞཏཱཡ པུརཱཏནོ།
Upanayhantīti upanāhavasena anubandhanti. Porāṇoti purimehi buddhādīhi āciṇṇasamāciṇṇatāya purātano.
ན ཛཱནནྟཱིཏི ཨནིཙྩསཉྙཾ ན པཙྩུཔཊྛཱཔེནྟི།
Na jānantīti aniccasaññaṃ na paccupaṭṭhāpenti.
ཏཐཱ པཝཏྟཝེརཱནནྟི ཨཊྛིཚིནྣཱདིབྷཱཝཾ ནིསྶཱཡ ཨུཔནཡཝསེན ཙིརཀཱལཾ པཝཏྟཝེརཱནཾ།
Tathā pavattaverānanti aṭṭhichinnādibhāvaṃ nissāya upanayavasena cirakālaṃ pavattaverānaṃ.
བཱལསཧཱཡཏཱཡ ཨིམེ བྷིཀྑཱུ ཀལཧཔསུཏཱ, པཎྜིཏསཧཱཡཱནཾ པན ཨིདཾ ན སིཡཱཏི པཎྜིཏསཧཱཡསྶ བཱལསཧཱཡསྶ ཙ ཝཎྞཱཝཎྞདཱིཔནཏྠཾ ཝུཏྟཱ། སཱིཧབྱགྒྷཱདིཀེ པཱཀཊཔརིསྶཡེ རཱགདོསཱདིཀེ པཊིཙྪནྣཔརིསྶཡེ ཙ ཨབྷིབྷཝིཏྭཱ།
Bālasahāyatāya ime bhikkhū kalahapasutā, paṇḍitasahāyānaṃ pana idaṃ na siyāti paṇḍitasahāyassa bālasahāyassa ca vaṇṇāvaṇṇadīpanatthaṃ vuttā. Sīhabyagghādike pākaṭaparissaye rāgadosādike paṭicchannaparissaye ca abhibhavitvā.
མཱཏངྒོ ཨརཉྙེ མཱཏངྒརཉྙེཏི སརལོཔེན སནྡྷི། མཱཏངྒསདྡེནེཝ ཧཏྠིབྷཱཝསྶ ཝུཏྟཏྟཱ ནཱགཝཙནཾ ཏསྶ མཧཏྟཝིབྷཱཝནཏྠནྟི ཨཱཧ – ‘‘ནཱགོཏི མཧནྟཱདྷིཝཙནམེཏ’’ནྟི། མཧནྟཔརིཡཱཡོཔི ཧི ནཱག-སདྡོ ཧོཏི ‘‘ཨེཝཾ ནཱགསྶ ནཱགེན, ཨཱིསཱདནྟསྶ ཧཏྠིནོ’’ཏིཨཱདཱིསུ (ཨུདཱ॰ ༢༥; མཧཱཝ॰ ༤༦༧)།
Mātaṅgo araññe mātaṅgaraññeti saralopena sandhi. Mātaṅgasaddeneva hatthibhāvassa vuttattā nāgavacanaṃ tassa mahattavibhāvanatthanti āha – ‘‘nāgoti mahantādhivacanameta’’nti. Mahantapariyāyopi hi nāga-saddo hoti ‘‘evaṃ nāgassa nāgena, īsādantassa hatthino’’tiādīsu (udā. 25; mahāva. 467).
༢༣༨. ཀིརསདྡོ ཨནུསྶཝསཱུཙནཏྠོ ནིཔཱཏོ། ཏེན ཨཡམེཏྠ སུཏིཔརམྤརཱཏི དསྶེཏི། བྷགཝཏཱ ཧི སོ ཨཱདཱིནཝོ པགེཝ པརིཉྙཱཏོ, ན ཏེན སཏྠཱ ནིབྦིཎྞོ ཧོཏི; ཏསྨིཾ པན ཨནྟོཝསྶེ ཀེཙི བུདྡྷཝེནེཡྻཱ ནཱཧེསུཾ; ཏེན ཨཉྙཏྠ གམནཾ ཏེསཾ བྷིཀྑཱུནཾ དམནུཔཱཡོཏི པཱལིལེཡྻཀཾ ཨུདྡིསྶ གཙྪནྟོ ཨེཀཝིཧཱརིཾ ཨཱཡསྨནྟཾ བྷགུཾ, སམགྒཝཱསཾ ཝསནྟེ ཙ ཨནུརུདྡྷཏྠེརཱདིཀེ སམྤཧཾསེཏུཾ ཨནུརུདྡྷཏྠེརསྶ ཙ། ཨིམཾ ཨུཔཀྐིལེསོཝཱདཾ དཱཏུཾ ཏཏྠ གཏོ, ཏསྨཱ ཀལཧཀཱརཀེ ཀིརསྶཱཏི ཨེཏྠཱཔི ཀིརསདྡགྒཧཎེ ཨེསེཝ ནཡོ། ཝུཏྟནཡམེཝ གོསིངྒསཱལསུཏྟེ (མ॰ ནི॰ ༡.༣༢༥ ཨཱདཡོ)།
238.Kirasaddo anussavasūcanattho nipāto. Tena ayamettha sutiparamparāti dasseti. Bhagavatā hi so ādīnavo pageva pariññāto, na tena satthā nibbiṇṇo hoti; tasmiṃ pana antovasse keci buddhaveneyyā nāhesuṃ; tena aññattha gamanaṃ tesaṃ bhikkhūnaṃ damanupāyoti pālileyyakaṃ uddissa gacchanto ekavihāriṃ āyasmantaṃ bhaguṃ, samaggavāsaṃ vasante ca anuruddhattherādike sampahaṃsetuṃ anuruddhattherassa ca. Imaṃ upakkilesovādaṃ dātuṃ tattha gato, tasmā kalahakārake kirassāti etthāpi kirasaddaggahaṇe eseva nayo. Vuttanayameva gosiṅgasālasutte (ma. ni. 1.325 ādayo).
༢༤༡. ‘‘ཡཐཱ ཀཐཾ པནཱ’’ཏི ཝུཏྟཔུཙྪཱནཾ པཙྪིམབྷཱཝཏོ ‘‘ཨཏྠི པན ཝོཏི པཙྪིམཔུཙྪཱཡཱ’’ཏི ཝུཏྟཾ, ན པུན ‘‘ཨཏྠི པན ཝོ’’ཏི པཝཏྟནསྶ པུཙྪནསྶ ཨཏྠིབྷཱཝཏོ། སོ པན ལོཀུཏྟརདྷམྨོ། ཐེརཱནནྟི ཨནུརུདྡྷཏྠེརཱདཱིནཾ ནཏྠི། པརིཀམྨོབྷཱསཾ པུཙྪཏཱིཏི དིབྦཙཀྑུཉཱཎེ ཀཏཱདྷིཀཱརཏྟཱ ཏསྶ ཨུཔྤཱདནཏྠཾ པརིཀམྨོབྷཱསཾ པུཙྪཏི། པརིཀམྨོབྷཱསནྟི པརིཀམྨསམཱདྷིནིབྦཏྟཾ ཨོབྷཱསཾ, ཨུཔཙཱརཛ྄ཛྷཱནསཉྫནིཏཾ ཨོབྷཱསནྟི ཨཏྠོ། ཙཏུཏྠཛ྄ཛྷཱནལཱབྷཱི ཧི དིབྦཙཀྑུཔརིཀམྨཏྠཾ ཨོབྷཱསཀསིཎཾ བྷཱཝེཏྭཱ ཨུཔཙཱརེ ཋཔིཏོ སམཱདྷི པརིཀམྨསམཱདྷི, ཏཏྠ ཨོབྷཱསོ པརིཀམྨོབྷཱསོཏི ཝུཏྟོ། ཏཾ སནྡྷཱཡཱཧ – ‘‘ཨོབྷཱསཉྩེཝ སཉྫཱནཱམཱཏི པརིཀམྨོབྷཱསཾ སཉྫཱནཱམཱ’’ཏི། ཡཏྟཀེ ཧི ཋཱནེ དིབྦཙཀྑུནཱ རཱུཔགཏཾ དཊྛུཀཱམོ, ཏཏྟཀཾ ཋཱནཾ ཨོབྷཱསཀསིཎཾ ཕརིཏྭཱ ཋིཏོ། ཏཾ ཨོབྷཱསཾ ཏཏྠ ཙ རཱུཔགཏཾ དིབྦཙཀྑུཉཱཎེན པསྶཏི, ཐེརཱ ཙ ཏཐཱ པཊིཔཛྫིཾསུ། ཏེན ཝུཏྟཾ – ‘‘ཨོབྷཱསཉྩེཝ སཉྫཱནཱམ དསྶནཉྩ རཱུཔཱན’’ནྟི། ཡསྨཱ པན ཏེསཾ རཱུཔགཏཾ པསྶནྟཱནཾ པརིཀམྨཝཱརོ ཨཏིཀྐམི, ཏཏོ ཨོབྷཱསོ ཨནྟརདྷཱཡི, ཏསྨིཾ ཨནྟརཧིཏེ རཱུཔགཏམྤི ན པཉྙཱཡཏི། པརིཀམྨནྟི ཧི ཡཐཱཝུཏྟཀསིཎཱརམྨཎཾ ཨུཔཙཱརཛ྄ཛྷཱནཾ, རཱུཔགཏཾ པསྶནྟཱནཾ ཀསིཎོབྷཱསཝསེན རཱུཔགཏདསྶནཾ, ཀསིཎོབྷཱསོ ཙ པརིཀམྨཝསེནཱཏི ཏདུབྷཡམྤི པརིཀམྨསྶ ཨཔྤཝཏྟིཡཱ ནཱཧོསི, ཏཡིདཾ ཀཱརཎཾ ཨཱདིཀམྨིཀབྷཱཝཏོ ཐེརཱ ན མཉྙིཾསུ, ཏསྨཱ ཝུཏྟཾ ‘‘ནཔྤཊིཝིཛ྄ཛྷཱམཱ’’ཏི།
241. ‘‘Yathā kathaṃ panā’’ti vuttapucchānaṃ pacchimabhāvato ‘‘atthi pana voti pacchimapucchāyā’’ti vuttaṃ, na puna ‘‘atthi pana vo’’ti pavattanassa pucchanassa atthibhāvato. So pana lokuttaradhammo. Therānanti anuruddhattherādīnaṃ natthi. Parikammobhāsaṃ pucchatīti dibbacakkhuñāṇe katādhikārattā tassa uppādanatthaṃ parikammobhāsaṃ pucchati. Parikammobhāsanti parikammasamādhinibbattaṃ obhāsaṃ, upacārajjhānasañjanitaṃ obhāsanti attho. Catutthajjhānalābhī hi dibbacakkhuparikammatthaṃ obhāsakasiṇaṃ bhāvetvā upacāre ṭhapito samādhi parikammasamādhi, tattha obhāso parikammobhāsoti vutto. Taṃ sandhāyāha – ‘‘obhāsañceva sañjānāmāti parikammobhāsaṃ sañjānāmā’’ti. Yattake hi ṭhāne dibbacakkhunā rūpagataṃ daṭṭhukāmo, tattakaṃ ṭhānaṃ obhāsakasiṇaṃ pharitvā ṭhito. Taṃ obhāsaṃ tattha ca rūpagataṃ dibbacakkhuñāṇena passati, therā ca tathā paṭipajjiṃsu. Tena vuttaṃ – ‘‘obhāsañceva sañjānāma dassanañca rūpāna’’nti. Yasmā pana tesaṃ rūpagataṃ passantānaṃ parikammavāro atikkami, tato obhāso antaradhāyi, tasmiṃ antarahite rūpagatampi na paññāyati. Parikammanti hi yathāvuttakasiṇārammaṇaṃ upacārajjhānaṃ, rūpagataṃ passantānaṃ kasiṇobhāsavasena rūpagatadassanaṃ, kasiṇobhāso ca parikammavasenāti tadubhayampi parikammassa appavattiyā nāhosi, tayidaṃ kāraṇaṃ ādikammikabhāvato therā na maññiṃsu, tasmā vuttaṃ ‘‘nappaṭivijjhāmā’’ti.
ནིམིཏྟཾ པཊིཝིཛ྄ཛྷིཏབྦནྟི ཀཱརཎཾ པཙྩཀྑཏོ དསྶེཏྭཱ སུཝིསུདྡྷདིབྦཙཀྑུཉཱཎེ ཐེརཾ པཏིཊྛཱཔེཏུཀཱམོ སཏྠཱ ཝདཏི། ཀིཾ ན ཨཱལུ༹ལེསྶནྟཱིཏི ཀིཾ ན བྱཱམོཧེསྶནྟི, བྱཱམོཧེསྶནྟི ཨེཝཱཏི ཨཏྠོ། ཝིཙིཀིཙྪཱ ཨུདཔཱདཱིཏི དིབྦཙཀྑུནོ ཡཐཱཨུཔཊྛིཏེསུ རཱུཔགཏེསུ ཨཔུབྦཏཱཡ, ‘‘ཨིདཾ ནུ ཁོ རཱུཔགཏཾ ཀིཾ, ཨིདཾ ནུ ཁོ ཀི’’ནྟི མགྒེན ཨསམུཙྪིནྣཏྟཱ ཝིཙིཀིཙྪཱ སཾསཡོ ཨུཔྤཛྫི། སམཱདྷི ཙཝཱིཏི ཝིཙིཀིཙྪཱཡ ཨུཔྤནྣཏྟཱ པརིཀམྨསམཱདྷི ཝིགཙྪི། ཏཏོ ཨེཝ ཧི པརིཀམྨོབྷཱསོཔི ཨནྟརདྷཱཡི, དིབྦཙཀྑུནཱཔི རཱུཔཾ ན པསྶི། ན མནསི ཀརིསྶཱམཱིཏི མནསིཀཱརཝསེན མེ རཱུཔཱནི ཨུཔཊྛཧིཾསུ, རཱུཔཱནི པསྶཏོ ཝིཙིཀིཙྪཱ ཨུཔྤཛྫཏི, ཏསྨཱ ཨིདཱནི ཀིཉྩི ན མནསི ཀརིསྶཱམཱིཏི ཏུཎྷཱི ཨཧོསི ཏཾ པན ཏུཎྷཱིབྷཱཝཔྤཏྟིཾ སནྡྷཱཡཱཧ ‘‘ཨམནསིཀཱརོ ཨུདཔཱདཱི’’ཏི།
Nimittaṃ paṭivijjhitabbanti kāraṇaṃ paccakkhato dassetvā suvisuddhadibbacakkhuñāṇe theraṃ patiṭṭhāpetukāmo satthā vadati. Kiṃ na āḷulessantīti kiṃ na byāmohessanti, byāmohessanti evāti attho. Vicikicchā udapādīti dibbacakkhuno yathāupaṭṭhitesu rūpagatesu apubbatāya, ‘‘idaṃ nu kho rūpagataṃ kiṃ, idaṃ nu kho ki’’nti maggena asamucchinnattā vicikicchā saṃsayo uppajji. Samādhi cavīti vicikicchāya uppannattā parikammasamādhi vigacchi. Tato eva hi parikammobhāsopi antaradhāyi, dibbacakkhunāpi rūpaṃ na passi. Na manasi karissāmīti manasikāravasena me rūpāni upaṭṭhahiṃsu, rūpāni passato vicikicchā uppajjati, tasmā idāni kiñci na manasi karissāmīti tuṇhī ahosi taṃ pana tuṇhībhāvappattiṃ sandhāyāha ‘‘amanasikāro udapādī’’ti.
ཏཐཱབྷཱུཏསྶ ཨམནསིཀཱརསྶ ཨབྷཱཝཾ ཨཱགམྨ ཨུཔྤིལཾ ཨུདཔཱདི། ཝཱིརིཡཾ གཱལ༹ྷཾ པགྒཧིཏནྟི ཐིནམིདྡྷཚམྦྷིཏཏྟཱནཾ ཝཱུཔསམནཏྠཾ ཨཙྩཱརདྡྷཝཱིརིཡཾ ཨཧོསི, ཏེན ཙིཏྟེ སམཱདྷིདཱུསིཀཱ གེཧསྶིཏཱ བལཝཔཱིཏི ཨུཔྤནྣཱ། ཏེནཱཧ ‘‘ཨུཔྤིལཾ ཨུཔྤནྣ’’ནྟི། ཏཏོཏི སིཐིལཝཱིརིཡཏྟཱ། པཏམེཡྻཱཏི ཨཏིཝིཡ ཁིནྣཾ བྷཝེཡྻ། ཏཾ མམཱཏི པཏྠནཱཨབྷིབྷཝནཱིཡམནསཱིསེན ཛཔྤེཏཱིཏི ཨབྷིཛཔྤཱ, ཏཎྷཱ། ནཱནཏྟཱ ནཱནཱསབྷཱཝཱ སཉྙཱ ནཱནཏྟསཉྙཱ། ཨཏིཝིཡ ཨུཔརི ཀཏྭཱ ནིཛ྄ཛྷཱནཾ པེཀྑནཾ ཨཏིནིཛ྄ཛྷཱཡིཏཏྟཾ།
Tathābhūtassa amanasikārassa abhāvaṃ āgamma uppilaṃ udapādi. Vīriyaṃ gāḷhaṃ paggahitanti thinamiddhachambhitattānaṃ vūpasamanatthaṃ accāraddhavīriyaṃ ahosi, tena citte samādhidūsikā gehassitā balavapīti uppannā. Tenāha ‘‘uppilaṃ uppanna’’nti. Tatoti sithilavīriyattā. Patameyyāti ativiya khinnaṃ bhaveyya. Taṃ mamāti patthanāabhibhavanīyamanasīsena jappetīti abhijappā, taṇhā. Nānattā nānāsabhāvā saññā nānattasaññā. Ativiya upari katvā nijjhānaṃ pekkhanaṃ atinijjhāyitattaṃ.
༢༤༣. པརིཀམྨོབྷཱསམེཝཱཏི པརིཀམྨསམུཊྛིཏཾ ཨོབྷཱསམེཝ། ན ཙ རཱུཔཱནི པསྶཱམཱིཏི ཨོབྷཱསམནསིཀཱརཔསུཏཏཱཡ དིབྦཙཀྑུནཱ རཱུཔཱནི ན པསྶཱམི། ཝིསཡརཱུཔམེཝཱཏི ཏེན ཕརིཏྭཱ ཋིཏཊྛཱནེཝ དིབྦཙཀྑུནོ ཝིསཡབྷཱུཏཾ རཱུཔགཏམེཝ མནསི ཀརོམི།
243.Parikammobhāsamevāti parikammasamuṭṭhitaṃ obhāsameva. Na ca rūpāni passāmīti obhāsamanasikārapasutatāya dibbacakkhunā rūpāni na passāmi. Visayarūpamevāti tena pharitvā ṭhitaṭṭhāneva dibbacakkhuno visayabhūtaṃ rūpagatameva manasi karomi.
ཀསིཎརཱུཔཱནཾ ཝསེནེཏྠ ཨོབྷཱསསྶ པརིཏྟཏཱཏི ཨཱཧ ‘‘པརིཏྟཊྛཱནེ ཨོབྷཱས’’ནྟི། པརིཏྟཱནི རཱུཔཱནཱིཏི ཀཏིཔཡཱནི, སཱ ཙ ནེསཾ པརིཏྟཏཱ ཋཱནཝསེནེཝཱཏི ཨཱཧ ‘‘པརིཏྟཀཊྛཱནེ རཱུཔཱནཱི’’ཏི། ‘‘ཨཔྤམཱཎཉྩེཝཱ’’ཏིཨཱདིནཱ ཝུཏྟོ དུཏིཡཝཱརོ། ཨོབྷཱསཔརིཏྟཏཾ སནྡྷཱཡ པརིཀམྨསམཱདྷི ‘‘པརིཏྟོ’’ཏི ཝུཏྟོ ཏསྶེཝ ཨོབྷཱསསྶ ཨཔྤམཱཎཏཱཡ ཨཔྤམཱཎསམཱདྷཱིཏི ཝཙནཏོ། ཏསྨིཾ སམཡེཏི ཏསྨིཾ པརིཏྟསམཱདྷིནོ ཨུཔྤནྣསམཡེ། དིབྦཙཀྑུཔི པརིཏྟཀཾ ཧོཏི པརིཏྟརཱུཔགཏདསྶནཏོ།
Kasiṇarūpānaṃ vasenettha obhāsassa parittatāti āha ‘‘parittaṭṭhāne obhāsa’’nti. Parittāni rūpānīti katipayāni, sā ca nesaṃ parittatā ṭhānavasenevāti āha ‘‘parittakaṭṭhāne rūpānī’’ti. ‘‘Appamāṇañcevā’’tiādinā vutto dutiyavāro. Obhāsaparittataṃ sandhāya parikammasamādhi ‘‘paritto’’ti vutto tasseva obhāsassa appamāṇatāya appamāṇasamādhīti vacanato. Tasmiṃ samayeti tasmiṃ parittasamādhino uppannasamaye. Dibbacakkhupi parittakaṃ hoti parittarūpagatadassanato.
༢༤༥. དུཀཏིཀཛ྄ཛྷཱནསམཱདྷིནྟི ཙཏུཀྐནཡེ དུཀཛ྄ཛྷཱནསམཱདྷིཾ, པཉྩཀནཡེ ཏིཀཛ྄ཛྷཱནསམཱདྷིནྟི ཡོཛནཱ། དུཀཛ྄ཛྷཱནསམཱདྷིནྟི ཙཏུཀྐནཡེ ཏཏིཡཙཏུཏྠཝསེན དུཀཛ྄ཛྷཱནསམཱདྷིཾ, པཉྩཀནཡེ ཙཏུཏྠཔཉྩམཝསེན དུཀཛ྄ཛྷཱནསམཱདྷིཾ། ཏིཀཙཏུཀྐཛ྄ཛྷཱནསམཱདྷིནྟི ཙཏུཀྐནཡེ ཏིཀཛ྄ཛྷཱནསམཱདྷིཾ, པཉྩཀནཡེ ཙཏུཀྐཛ྄ཛྷཱནསམཱདྷིནྟི ཡོཛནཱ།
245.Dukatikajjhānasamādhinti catukkanaye dukajjhānasamādhiṃ, pañcakanaye tikajjhānasamādhinti yojanā. Dukajjhānasamādhinti catukkanaye tatiyacatutthavasena dukajjhānasamādhiṃ, pañcakanaye catutthapañcamavasena dukajjhānasamādhiṃ. Tikacatukkajjhānasamādhinti catukkanaye tikajjhānasamādhiṃ, pañcakanaye catukkajjhānasamādhinti yojanā.
ཏིཝིདྷནྟི སཔྤཱིཏིཀཝསེན ཏིཔྤཀཱརཾ སམཱདྷིཾ། ཏདནྟོགདྷཱཏི སཔྤཱིཏིཀཱདིསབྷཱཝཱ། ཀཱམཾ བྷགཝཱ པུརིམཡཱམེ པུབྦེནིཝཱསཱནུསྶཏིཉཱཎཾ, པཙྪིམཡཱམེ དིབྦཙཀྑུཉཱཎཾ ནིབྦཏྟེནྟོཔི ཨིམཱནི ཉཱཎཱནི བྷཱཝེསིཡེཝ། ཝིཔསྶནཱཔཱདཀཱནི པན ཉཱཎཱནི སནྡྷཱཡ, ‘‘པཙྪིམཡཱམེ’’ཏི ཝུཏྟཾ, ཏེནཱཧ ‘‘བྷགཝཏོ ཧཱི’’ཏིཨཱདི། པཉྩམཛ྄ཛྷཱནསྶཱཏི པཉྩམཛ྄ཛྷཱནིཀསྶ ཝསེན པཋམཛ྄ཛྷཱནིཀོ མགྒོ ནཏྠི། སོཏི པཉྩཀནཡོ བྷགཝཏོ ལོཀིཡོ ཨཧོསི། ཨེཏནྟི ཨེཏཾ, ‘‘སཝིཏཀྐམྤི སཝིཙཱརཾ སམཱདྷིཾ བྷཱཝེམཱི’’ཏིཨཱདིཝཙནཾ། ལོཀིཡལོཀུཏྟརམིསྶཀཾ སནྡྷཱཡ ཝུཏྟཾ, ན ‘‘ལོཀིཡཾ ཝཱ ལོཀུཏྟརམེཝ ཝཱ’’ཏི། སེསཾ སུཝིཉྙེཡྻམེཝཱཏི།
Tividhanti sappītikavasena tippakāraṃ samādhiṃ. Tadantogadhāti sappītikādisabhāvā. Kāmaṃ bhagavā purimayāme pubbenivāsānussatiñāṇaṃ, pacchimayāme dibbacakkhuñāṇaṃ nibbattentopi imāni ñāṇāni bhāvesiyeva. Vipassanāpādakāni pana ñāṇāni sandhāya, ‘‘pacchimayāme’’ti vuttaṃ, tenāha ‘‘bhagavato hī’’tiādi. Pañcamajjhānassāti pañcamajjhānikassa vasena paṭhamajjhāniko maggo natthi. Soti pañcakanayo bhagavato lokiyo ahosi. Etanti etaṃ, ‘‘savitakkampi savicāraṃ samādhiṃ bhāvemī’’tiādivacanaṃ. Lokiyalokuttaramissakaṃ sandhāya vuttaṃ, na ‘‘lokiyaṃ vā lokuttarameva vā’’ti. Sesaṃ suviññeyyamevāti.
ཨུཔཀྐིལེསསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ།
Upakkilesasuttavaṇṇanāya līnatthappakāsanā samattā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / མཛྫྷིམནིཀཱཡ • Majjhimanikāya / ༨. ཨུཔཀྐིལེསསུཏྟཾ • 8. Upakkilesasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) / ༨. ཨུཔཀྐིལེསསུཏྟཝཎྞནཱ • 8. Upakkilesasuttavaṇṇanā
