Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā

    3-6. உபாலித்தே²ரஅபதா³னவண்ணனா

    3-6. Upālittheraapadānavaṇṇanā

    நக³ரே ஹங்ஸவதியாதிஆதி³கங் ஆயஸ்மதோ உபாலித்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ பது³முத்தரஸ்ஸ ப⁴க³வதோ காலே ஹங்ஸவதீனக³ரே விப⁴வஸம்பன்னே ப்³ராஹ்மணகுலே நிப்³ப³த்தோ. ஏகதி³வஸங் ஸத்து² ஸந்திகே த⁴ம்மகத²ங் ஸுணந்தோ ஸத்தா²ரங் ஏகங் பி⁴க்கு²ங் வினயத⁴ரானங் அக்³க³ட்டா²னே ட²பெந்தங் தி³ஸ்வா ஸத்து² அதி⁴காரகம்மங் கத்வா தங் டா²னந்தரங் பத்தே²ஸி.

    Nagarehaṃsavatiyātiādikaṃ āyasmato upālittherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle haṃsavatīnagare vibhavasampanne brāhmaṇakule nibbatto. Ekadivasaṃ satthu santike dhammakathaṃ suṇanto satthāraṃ ekaṃ bhikkhuṃ vinayadharānaṃ aggaṭṭhāne ṭhapentaṃ disvā satthu adhikārakammaṃ katvā taṃ ṭhānantaraṃ patthesi.

    ஸோ யாவஜீவங் குஸலங் கத்வா தே³வமனுஸ்ஸேஸு ஸங்ஸரந்தோ இமஸ்மிங் பு³த்³து⁴ப்பாதே³ கப்பககே³ஹே நிப்³ப³த்தோ. உபாலீதிஸ்ஸ நாமங் அகங்ஸு. ஸோ வயப்பத்தோ அனுருத்³தா⁴தீ³னங் ச²ன்னங் க²த்தியானங் பியஸஹாயோ ஹுத்வா ததா²க³தே அனுபியம்ப³வனே விஹரந்தே பப்³ப³ஜ்ஜாய நிக்க²மந்தேஹி ச²ஹி க²த்தியேஹி ஸத்³தி⁴ங் நிக்க²மித்வா பப்³ப³ஜி. தஸ்ஸ பப்³ப³ஜ்ஜாவிதா⁴னங் பாளியங் (சூளவ॰ 330 ஆத³யோ) ஆக³தமேவ. ஸோ பப்³ப³ஜித்வா உபஸம்பன்னோ ஹுத்வா ஸத்து² ஸந்திகே கம்மட்டா²னங் க³ஹெத்வா ‘‘மய்ஹங், ப⁴ந்தே, அரஞ்ஞவாஸங் அனுஜானாதா²’’தி ஆஹ. ‘‘பி⁴க்கு² அரஞ்ஞே வஸந்தஸ்ஸ ஏகமேவ து⁴ரங் வட்³டி⁴ஸ்ஸதி, மய்ஹங் பன ஸந்திகே வஸந்தஸ்ஸ விபஸ்ஸனாது⁴ரஞ்ச க³ந்த²து⁴ரஞ்ச பரிபூரெஸ்ஸதீ’’தி. ஸோ ஸத்து² வசனங் ஸம்படிச்சி²த்வா விபஸ்ஸனாய கம்மங் கரொந்தோ நசிரஸ்ஸேவ அரஹத்தங் பாபுணி. ஸத்தா²பி நங் ஸயமேவ ஸகலங் வினயபிடகங் உக்³க³ண்ஹாபேஸி. ஸோ அபரபா⁴கே³ பா⁴ருகச்ச²வத்து²ங் அஜ்ஜுகவத்து²ங் குமாரகஸ்ஸபவத்து²ந்தி இமானி தீணி வத்தூ²னி வினிச்சி²னி. ஸத்தா² ஏகேகஸ்மிங் வினிச்ச²யே ஸாது⁴காரங் த³த்வா தயோ வினிச்ச²யே அட்டு²ப்பத்திங் கத்வா தே²ரங் வினயத⁴ரானங் அக்³க³ட்டா²னே ட²பேஸி.

    So yāvajīvaṃ kusalaṃ katvā devamanussesu saṃsaranto imasmiṃ buddhuppāde kappakagehe nibbatto. Upālītissa nāmaṃ akaṃsu. So vayappatto anuruddhādīnaṃ channaṃ khattiyānaṃ piyasahāyo hutvā tathāgate anupiyambavane viharante pabbajjāya nikkhamantehi chahi khattiyehi saddhiṃ nikkhamitvā pabbaji. Tassa pabbajjāvidhānaṃ pāḷiyaṃ (cūḷava. 330 ādayo) āgatameva. So pabbajitvā upasampanno hutvā satthu santike kammaṭṭhānaṃ gahetvā ‘‘mayhaṃ, bhante, araññavāsaṃ anujānāthā’’ti āha. ‘‘Bhikkhu araññe vasantassa ekameva dhuraṃ vaḍḍhissati, mayhaṃ pana santike vasantassa vipassanādhurañca ganthadhurañca paripūressatī’’ti. So satthu vacanaṃ sampaṭicchitvā vipassanāya kammaṃ karonto nacirasseva arahattaṃ pāpuṇi. Satthāpi naṃ sayameva sakalaṃ vinayapiṭakaṃ uggaṇhāpesi. So aparabhāge bhārukacchavatthuṃ ajjukavatthuṃ kumārakassapavatthunti imāni tīṇi vatthūni vinicchini. Satthā ekekasmiṃ vinicchaye sādhukāraṃ datvā tayo vinicchaye aṭṭhuppattiṃ katvā theraṃ vinayadharānaṃ aggaṭṭhāne ṭhapesi.

    441. ஏவங் ஸோ ஏதத³க்³க³ட்டா²னங் பத்வா அத்தனோ புப்³ப³கம்மங் ஸரித்வா ஸோமனஸ்ஸப்பத்தோ தங் புப்³ப³சரிதாபதா³னங் பகாஸெந்தோ நக³ரே ஹங்ஸவதியாதிஆதி³மாஹ. தத்த² ஹங்ஸவதியாதி ஹங்ஸாவட்டஆகாரேன வதி பாகாரபரிக்கே²போ யஸ்மிங் நக³ரே, தங் நக³ரங் ஹங்ஸவதீ. அத² வா அனேகஸங்கா² ஹங்ஸா தளாகபொக்க²ரணீஸரபல்லலாதீ³ஸு நிவஸந்தா இதோ சிதோ ச விதா⁴வமானா வஸந்தி எத்தா²தி ஹங்ஸவதீ, தஸ்ஸா ஹங்ஸவதியா. ஸுஜாதோ நாம ப்³ராஹ்மணோதி ஸுட்டு² ஜாதோதி ஸுஜாதோ, ‘‘அக்கி²த்தோ அனுபகுட்டோ²’’தி வசனதோ அக³ரஹிதோ ஹுத்வா ஜாதோதி அத்தோ². அஸீதிகோடினிசயோதி அஸீதிகோடித⁴னராஸிகோ பஹூதத⁴னத⁴ஞ்ஞவா அஸங்க்²யெய்யத⁴னத⁴ஞ்ஞவா ப்³ராஹ்மணோ ஸுஜாதோ நாம அஹோஸிந்தி ஸம்ப³ந்தோ⁴.

    441. Evaṃ so etadaggaṭṭhānaṃ patvā attano pubbakammaṃ saritvā somanassappatto taṃ pubbacaritāpadānaṃ pakāsento nagare haṃsavatiyātiādimāha. Tattha haṃsavatiyāti haṃsāvaṭṭaākārena vati pākāraparikkhepo yasmiṃ nagare, taṃ nagaraṃ haṃsavatī. Atha vā anekasaṅkhā haṃsā taḷākapokkharaṇīsarapallalādīsu nivasantā ito cito ca vidhāvamānā vasanti etthāti haṃsavatī, tassā haṃsavatiyā. Sujāto nāma brāhmaṇoti suṭṭhu jātoti sujāto, ‘‘akkhitto anupakuṭṭho’’ti vacanato agarahito hutvā jātoti attho. Asītikoṭinicayoti asītikoṭidhanarāsiko pahūtadhanadhaññavā asaṅkhyeyyadhanadhaññavā brāhmaṇo sujāto nāma ahosinti sambandho.

    442. புனபி தஸ்ஸேவ மஹந்தபா⁴வங் த³ஸ்ஸெந்தோ அஜ்ஜா²யகோதிஆதி³மாஹ. தத்த² அஜ்ஜா²யகோதி பரேஸங் வேத³த்தயாதி³ங் வாசேதா. மந்தத⁴ரோதி மந்தா வுச்சதி பஞ்ஞா, அத²ப்³ப³னவேத³ப்³யாகரணாதி³ஜானநபஞ்ஞவாதி அத்தோ². திண்ணங் வேதா³ன பாரகூ³தி இருவேத³யஜுவேத³ஸாமவேத³ஸங்கா²தானங் திண்ணங் வேதா³னங் பரியோஸானங் பத்தோதி அத்தோ². லக்க²ணேதி லக்க²ணஸத்தே², பு³த்³த⁴பச்சேகபு³த்³த⁴சக்கவத்திஇத்தி²புரிஸானங் ஹத்த²பாதா³தீ³ஸு தி³ஸ்ஸமானலக்க²ணபகாஸனகக³ந்தே² சாதி அத்தோ². இதிஹாஸேதி ‘‘இதிஹ ஆஸ இதிஹ ஆஸா’’தி போராணகதா²ப்பகாஸகே க³ந்தே². ஸத⁴ம்மேதி ஸகத⁴ம்மே ப்³ராஹ்மணத⁴ம்மே பாரமிங் க³தோ பரியோஸானங் கோடிங் க³தோ பத்தோதி அத்தோ².

    442. Punapi tasseva mahantabhāvaṃ dassento ajjhāyakotiādimāha. Tattha ajjhāyakoti paresaṃ vedattayādiṃ vācetā. Mantadharoti mantā vuccati paññā, athabbanavedabyākaraṇādijānanapaññavāti attho. Tiṇṇaṃ vedāna pāragūti iruvedayajuvedasāmavedasaṅkhātānaṃ tiṇṇaṃ vedānaṃ pariyosānaṃ pattoti attho. Lakkhaṇeti lakkhaṇasatthe, buddhapaccekabuddhacakkavattiitthipurisānaṃ hatthapādādīsu dissamānalakkhaṇapakāsanakaganthe cāti attho. Itihāseti ‘‘itiha āsa itiha āsā’’ti porāṇakathāppakāsake ganthe. Sadhammeti sakadhamme brāhmaṇadhamme pāramiṃ gato pariyosānaṃ koṭiṃ gato pattoti attho.

    443. பரிப்³பா³ஜாதி யே நிக³ண்ட²ஸாவகா, தே ஸப்³பே³ நானாதி³ட்டி²கா ததா³ மஹியா பத²வீதலே சரந்தீதி ஸம்ப³ந்தோ⁴.

    443.Paribbājāti ye nigaṇṭhasāvakā, te sabbe nānādiṭṭhikā tadā mahiyā pathavītale carantīti sambandho.

    445. யாவ யத்தகங் காலங் ஜினோ நுப்பஜ்ஜதி, தாவ தத்தகங் காலங் பு³த்³தோ⁴தி வசனங் நத்தீ²தி அத்தோ².

    445. Yāva yattakaṃ kālaṃ jino nuppajjati, tāva tattakaṃ kālaṃ buddhoti vacanaṃ natthīti attho.

    446. அச்சயேன அஹோரத்தந்தி அஹோ ச ரத்தி ச அஹோரத்தங், ப³ஹூனங் ஸங்வச்ச²ரானங் அதிக்கமேனாதி அத்தோ². ஸேஸங் ஸுவிஞ்ஞெய்யமேவ.

    446.Accayena ahorattanti aho ca ratti ca ahorattaṃ, bahūnaṃ saṃvaccharānaṃ atikkamenāti attho. Sesaṃ suviññeyyameva.

    454. மந்தாணிபுத்தோதி மந்தாணீனாமாய கப்பகதீ⁴துயா புத்தோ, மாஸபுண்ணதாய தி³வஸபுண்ணதாய புண்ணோதி லத்³த⁴னாமோதி அத்தோ². தஸ்ஸ ஸத்து²ஸ்ஸ ஸாவகோ ஹெஸ்ஸதி ப⁴விஸ்ஸதீதி ஸம்ப³ந்தோ⁴.

    454.Mantāṇiputtoti mantāṇīnāmāya kappakadhītuyā putto, māsapuṇṇatāya divasapuṇṇatāya puṇṇoti laddhanāmoti attho. Tassa satthussa sāvako hessati bhavissatīti sambandho.

    455. ஏவங் கித்தயி ஸோ பு³த்³தோ⁴தி ஸோ பது³முத்தரோ ப⁴க³வா ஏவங் இமினா பகாரேன ஸுனந்த³ங் ஸுந்த³ராகாரேன ஸோமனஸ்ஸதா³யகங் கித்தயி ப்³யாகரணமதா³ஸீதி அத்தோ². ஸப்³ப³ங் ஜனங் ஸகலஜனஸமூஹங் ஸாது⁴கங் ஹாஸயந்தோ ஸோமனஸ்ஸங் கரொந்தோ ஸகங் ப³லங் அத்தனோ ப³லங் த³ஸ்ஸயந்தோ பாகடங் கரொந்தோதி ஸம்ப³ந்தோ⁴.

    455.Evaṃ kittayi so buddhoti so padumuttaro bhagavā evaṃ iminā pakārena sunandaṃ sundarākārena somanassadāyakaṃ kittayi byākaraṇamadāsīti attho. Sabbaṃ janaṃ sakalajanasamūhaṃ sādhukaṃ hāsayanto somanassaṃ karonto sakaṃ balaṃ attano balaṃ dassayanto pākaṭaṃ karontoti sambandho.

    456. ததோ அனந்தரங் அத்தனோ ஆனுபா⁴வங் அஞ்ஞாபதே³ஸேன த³ஸ்ஸெந்தோ கதஞ்ஜலீதிஆதி³மாஹ. ததா³ தஸ்மிங் பு³த்³து⁴ப்பாத³தோ புரிமகாலே ஸுனந்த³ங் தாபஸங் கதஞ்ஜலிபுடா ஸப்³பே³ ஜனா நமஸ்ஸந்தீதி ஸம்ப³ந்தோ⁴. பு³த்³தே⁴ காரங் கரித்வானாதி ஏவங் ஸோ ஸப்³ப³ஜனபூஜிதோபி ஸமானோ ‘‘பூஜிதொம்ஹீ’’தி மானங் அகத்வா பு³த்³த⁴ஸாஸனே அதி⁴கங் கிச்சங் கத்வா அத்தனோ க³திங் ஜாதிங் ஸோதே⁴ஸி பரிஸுத்³த⁴மகாஸீதி அத்தோ².

    456. Tato anantaraṃ attano ānubhāvaṃ aññāpadesena dassento katañjalītiādimāha. Tadā tasmiṃ buddhuppādato purimakāle sunandaṃ tāpasaṃ katañjalipuṭā sabbe janā namassantīti sambandho. Buddhe kāraṃ karitvānāti evaṃ so sabbajanapūjitopi samāno ‘‘pūjitomhī’’ti mānaṃ akatvā buddhasāsane adhikaṃ kiccaṃ katvā attano gatiṃ jātiṃ sodhesi parisuddhamakāsīti attho.

    457. ஸுத்வான முனினோ வசந்தி தஸ்ஸ ஸம்மாஸம்பு³த்³த⁴ஸ்ஸ வாசங், கா³தா²ப³ந்த⁴ஸுக²த்த²ங் ஆ-காரஸ்ஸ ரஸ்ஸங் கத்வா ‘‘வச’’ந்தி வுத்தங். ‘‘அனாக³தம்ஹி அத்³தா⁴னே கோ³தமோ நாம நாமேன ஸத்தா² லோகே ப⁴விஸ்ஸதீ’’தி இமங் முனினோ வசனங் ஸுத்வா யதா² யேன பகாரேன கோ³தமங் ப⁴க³வந்தங் பஸ்ஸாமி, ததா² தேன பகாரேன காரங் அதி⁴ககிச்சங் புஞ்ஞஸம்பா⁴ரங் கஸ்ஸாமி கரிஸ்ஸாமீதி மே மய்ஹங் ஸங்கப்போ சேதனாமனஸிகாரோ அஹு அஹோஸீதி ஸம்ப³ந்தோ⁴.

    457.Sutvāna munino vacanti tassa sammāsambuddhassa vācaṃ, gāthābandhasukhatthaṃ ā-kārassa rassaṃ katvā ‘‘vaca’’nti vuttaṃ. ‘‘Anāgatamhi addhāne gotamo nāma nāmena satthā loke bhavissatī’’ti imaṃ munino vacanaṃ sutvā yathā yena pakārena gotamaṃ bhagavantaṃ passāmi, tathā tena pakārena kāraṃ adhikakiccaṃ puññasambhāraṃ kassāmi karissāmīti me mayhaṃ saṅkappo cetanāmanasikāro ahu ahosīti sambandho.

    458. ஏவாஹங் சிந்தயித்வானாதி ‘‘அஹங் காரங் கரிஸ்ஸாமீ’’தி ஏவங் சிந்தெத்வா. கிரியங் சிந்தயிங் மமாதி ‘‘மயா கீதி³ஸங் புஞ்ஞங் கத்தப்³ப³ங் நு கோ²’’தி கிரியங் கத்தப்³ப³கிச்சங் சிந்தயிந்தி அத்தோ². க்யாஹங் கம்மங் ஆசராமீதி அஹங் கீதி³ஸங் புஞ்ஞகம்மங் ஆசராமி பூரேமி நு கோ²தி அத்தோ². புஞ்ஞக்கெ²த்தே அனுத்தரேதி உத்தரவிரஹிதே ஸகலபுஞ்ஞஸ்ஸ பா⁴ஜனபூ⁴தே ரதனத்தயேதி அத்தோ².

    458.Evāhaṃ cintayitvānāti ‘‘ahaṃ kāraṃ karissāmī’’ti evaṃ cintetvā. Kiriyaṃ cintayiṃ mamāti ‘‘mayā kīdisaṃ puññaṃ kattabbaṃ nu kho’’ti kiriyaṃ kattabbakiccaṃ cintayinti attho. Kyāhaṃ kammaṃ ācarāmīti ahaṃ kīdisaṃ puññakammaṃ ācarāmi pūremi nu khoti attho. Puññakkhette anuttareti uttaravirahite sakalapuññassa bhājanabhūte ratanattayeti attho.

    459. அயஞ்ச பாடி²கோ பி⁴க்கூ²தி அயங் பி⁴க்கு² ஸரப⁴ஞ்ஞவஸேன க³ந்த²பாட²பட²னதோ வாசனதோ ‘‘பாடி²கோ’’தி லத்³த⁴னாமோ பி⁴க்கு². பு³த்³த⁴ஸாஸனே ஸப்³பே³ஸங் பாடீ²னங் பாட²கவாசகானங் அந்தரே வினயே ச அக்³க³னிக்கி²த்தோ அக்³கோ³ இதி ட²பிதோ. தங் டா²னங் தேன பி⁴க்கு²னா பத்தட்டா²னந்தரங் அஹங் பத்த²யே பத்தே²மீதி அத்தோ².

    459.Ayañca pāṭhiko bhikkhūti ayaṃ bhikkhu sarabhaññavasena ganthapāṭhapaṭhanato vācanato ‘‘pāṭhiko’’ti laddhanāmo bhikkhu. Buddhasāsane sabbesaṃ pāṭhīnaṃ pāṭhakavācakānaṃ antare vinaye ca agganikkhitto aggo iti ṭhapito. Taṃ ṭhānaṃ tena bhikkhunā pattaṭṭhānantaraṃ ahaṃ patthaye patthemīti attho.

    460. ததோ பரங் அத்தனோ புஞ்ஞகரணூபாயங் த³ஸ்ஸெந்தோ இத³ங் மே அமிதங் போ⁴க³ந்திஆதி³மாஹ. மே மய்ஹங் அமிதங் பமாணவிரஹிதங் போ⁴க³ராஸிங் அக்கோ²ப⁴ங் கோ²பே⁴துங் அஸக்குணெய்யங் ஸாக³ரூபமங் ஸாக³ரஸதி³ஸங் தேன போ⁴கே³ன தாதி³ஸேன த⁴னேன பு³த்³த⁴ஸ்ஸ ஆராமங் மாபயேதி ஸம்ப³ந்தோ⁴. ஸேஸங் உத்தானத்த²மேவ.

    460. Tato paraṃ attano puññakaraṇūpāyaṃ dassento idaṃ me amitaṃ bhogantiādimāha. Me mayhaṃ amitaṃ pamāṇavirahitaṃ bhogarāsiṃ akkhobhaṃ khobhetuṃ asakkuṇeyyaṃ sāgarūpamaṃ sāgarasadisaṃ tena bhogena tādisena dhanena buddhassa ārāmaṃ māpayeti sambandho. Sesaṃ uttānatthameva.

    474. பி⁴க்கு²ஸங்கே⁴ நிஸீதி³த்வா ஸம்பு³த்³தோ⁴ தேன ஸுட்டு² மாபிதங் காரிதங் ஸங்கா⁴ராமங் படிக்³க³ஹெத்வா தஸ்ஸாராமஸ்ஸானிஸங்ஸதீ³பகங் இத³ங் வசனங் அப்³ரவி கதே²ஸீதி ஸம்ப³ந்தோ⁴.

    474. Bhikkhusaṅghe nisīditvā sambuddho tena suṭṭhu māpitaṃ kāritaṃ saṅghārāmaṃ paṭiggahetvā tassārāmassānisaṃsadīpakaṃ idaṃ vacanaṃ abravi kathesīti sambandho.

    475. கத²ங்? யோ ஸோதி யோ ஸங்கா⁴ராமதா³யகோ தாபஸோ ஸுமாபிதங் குடிலேணமண்ட³பபாஸாத³ஹம்மியபாகாராதி³னா ஸுட்டு² ஸஜ்ஜிதங் ஸங்கா⁴ராமங் பு³த்³த⁴ஸ்ஸ பாதா³ஸி ப-காரேன ஸோமனஸ்ஸஸம்பயுத்தசித்தேன அதா³ஸி. தமஹங் கித்தயிஸ்ஸாமீதி தங் தாபஸங் அஹங் பாகடங் கரிஸ்ஸாமி, உத்தானிங் கரிஸ்ஸாமீதி அத்தோ². ஸுணாத² மம பா⁴ஸதோதி பா⁴ஸந்தஸ்ஸ மய்ஹங் வசனங் ஸுணாத², ஓஹிதஸோதா அவிக்கி²த்தசித்தா மனஸி கரோதா²தி அத்தோ².

    475. Kathaṃ? Yo soti yo saṅghārāmadāyako tāpaso sumāpitaṃ kuṭileṇamaṇḍapapāsādahammiyapākārādinā suṭṭhu sajjitaṃ saṅghārāmaṃ buddhassa pādāsi pa-kārena somanassasampayuttacittena adāsi. Tamahaṃ kittayissāmīti taṃ tāpasaṃ ahaṃ pākaṭaṃ karissāmi, uttāniṃ karissāmīti attho. Suṇātha mama bhāsatoti bhāsantassa mayhaṃ vacanaṃ suṇātha, ohitasotā avikkhittacittā manasi karothāti attho.

    476. தேன தி³ன்னாராமஸ்ஸ ப²லங் த³ஸ்ஸெந்தோ ஹத்தீ² அஸ்ஸா ரதா² பத்தீதிஆதி³மாஹ. தங் ஸுவிஞ்ஞெய்யமேவ.

    476. Tena dinnārāmassa phalaṃ dassento hatthī assā rathā pattītiādimāha. Taṃ suviññeyyameva.

    477. ஸங்கா⁴ராமஸ்ஸித³ங் ப²லந்தி இத³ங் ஆயதிங் அனுப⁴விதப்³ப³ஸம்பத்திஸங்கா²தங் இட்ட²ப²லங் ஸங்கா⁴ராமதா³னஸ்ஸ ப²லங் விபாகந்தி அத்தோ².

    477.Saṅghārāmassidaṃ phalanti idaṃ āyatiṃ anubhavitabbasampattisaṅkhātaṃ iṭṭhaphalaṃ saṅghārāmadānassa phalaṃ vipākanti attho.

    478. ச²ளாஸீதிஸஹஸ்ஸானீதி ச²ஸஹஸ்ஸானி அஸீதிஸஹஸ்ஸானி ஸமலங்கதா ஸுட்டு² அலங்கதா ஸஜ்ஜிதா நாரியோ இத்தி²யோ விசித்தவத்தா²ப⁴ரணாதி விசித்தேஹி அனேகரூபேஹி வத்தே²ஹி ஆப⁴ரணேஹி ச ஸமன்னாக³தா. ஆமுத்தமணிகுண்ட³லாதி ஓலம்பி³தமுத்தாஹாரமணிகஞ்சிதகண்ணாதி அத்தோ².

    478.Chaḷāsītisahassānīti chasahassāni asītisahassāni samalaṅkatā suṭṭhu alaṅkatā sajjitā nāriyo itthiyo vicittavatthābharaṇāti vicittehi anekarūpehi vatthehi ābharaṇehi ca samannāgatā. Āmuttamaṇikuṇḍalāti olambitamuttāhāramaṇikañcitakaṇṇāti attho.

    479. தாஸங் இத்தீ²னங் ரூபஸோபா⁴திஸயங் வண்ணெந்தோ ஆளாரபம்ஹாதிஆதி³மாஹ. தத்த² ஆளாரானி மஹந்தானி அக்கீ²னி மணிகு³ளஸதி³ஸானி யாஸங் இத்தீ²னங் தா ஆளாரபம்ஹா ப⁴மரானமிவ மந்த³லோசனாதி அத்தோ². ஹஸுலா ஹாஸபகதி, லீலாவிலாஸாதி அத்தோ². ஸுஸஞ்ஞாதி ஸுந்த³ரஸஞ்ஞிதப்³ப³ஸரீராவயவா. தனுமஜ்ஜி²மாதி கு²த்³த³கஉத³ரபதே³ஸா. ஸேஸங் உத்தானமேவ.

    479. Tāsaṃ itthīnaṃ rūpasobhātisayaṃ vaṇṇento āḷārapamhātiādimāha. Tattha āḷārāni mahantāni akkhīni maṇiguḷasadisāni yāsaṃ itthīnaṃ tā āḷārapamhā bhamarānamiva mandalocanāti attho. Hasulā hāsapakati, līlāvilāsāti attho. Susaññāti sundarasaññitabbasarīrāvayavā. Tanumajjhimāti khuddakaudarapadesā. Sesaṃ uttānameva.

    484. தஸ்ஸ த⁴ம்மேஸு தா³யாதோ³தி தஸ்ஸ கோ³தமஸ்ஸ ப⁴க³வதோ த⁴ம்மேஸு தா³யாதோ³ த⁴ம்மகொட்டா²ஸபா⁴கீ³. ஓரஸோதி உரஸி ஜாதோ, ஸிதி²லத⁴னிதாதி³த³ஸவித⁴ப்³யஞ்ஜனபு³த்³தி⁴ஸம்பன்னங் கண்ட²தாலுஒட்டா²தி³பஞ்சட்டா²னே க⁴ட்டெத்வா தே³ஸிதத⁴ம்மங் ஸுத்வா ஸோதாபத்திமக்³கா³தி³மக்³க³படிபாடியா ஸப்³ப³கிலேஸே கே²பெத்வா அரஹத்தே டி²தபா⁴வேன உரஸி ஜாதபுத்தோதி அத்தோ². த⁴ம்மனிம்மிதோதி த⁴ம்மேன ஸமேன அத³ண்டே³ன அஸத்தே²ன நிம்மிதோ பாகடோ ப⁴விஸ்ஸஸீதி அத்தோ². உபாலி நாம நாமேனாதி கிஞ்சாபி ஸோ மாது நாமேன மந்தாணிபுத்தனாமோ, அனுருத்³தா⁴தீ³ஹி பன ஸஹ க³ந்த்வா பப்³ப³ஜிதத்தா க²த்தியானங் உபஸமீபே அல்லீனோ யுத்தோ காயசித்தேஹி ஸமங்கீ³பூ⁴தோதி உபாலீதி நாமேன ஸத்து² ஸாவகோ ஹெஸ்ஸதி ப⁴விஸ்ஸதீதி அத்தோ².

    484.Tassadhammesu dāyādoti tassa gotamassa bhagavato dhammesu dāyādo dhammakoṭṭhāsabhāgī. Orasoti urasi jāto, sithiladhanitādidasavidhabyañjanabuddhisampannaṃ kaṇṭhatāluoṭṭhādipañcaṭṭhāne ghaṭṭetvā desitadhammaṃ sutvā sotāpattimaggādimaggapaṭipāṭiyā sabbakilese khepetvā arahatte ṭhitabhāvena urasi jātaputtoti attho. Dhammanimmitoti dhammena samena adaṇḍena asatthena nimmito pākaṭo bhavissasīti attho. Upāli nāma nāmenāti kiñcāpi so mātu nāmena mantāṇiputtanāmo, anuruddhādīhi pana saha gantvā pabbajitattā khattiyānaṃ upasamīpe allīno yutto kāyacittehi samaṅgībhūtoti upālīti nāmena satthu sāvako hessati bhavissatīti attho.

    485. வினயே பாரமிங் பத்வாதி வினயபிடகே கோடிங் பரியோஸானங் பத்வா பாபுணித்வா. டா²னாட்டா²னே ச கோவிதோ³தி காரணாகாரணே ச த³க்கோ² சே²கோதி அத்தோ². ஜினஸாஸனங் தா⁴ரெந்தோதி ஜினேன வுத்தானுஸாஸனிங் ஜினஸ்ஸ பிடகத்தயங் வாசனஸவனசிந்தனதா⁴ரணாதி³வஸேன தா⁴ரெந்தோ, ஸல்லக்கெ²ந்தோதி அத்தோ². விஹரிஸ்ஸதினாஸவோதி நிக்கிலேஸோ சதூஹி இரியாபதே²ஹி அபரிபதந்தங் அத்தபா⁴வங் ஹரிஸ்ஸதி பவத்தெஸ்ஸதீதி அத்தோ².

    485.Vinaye pāramiṃ patvāti vinayapiṭake koṭiṃ pariyosānaṃ patvā pāpuṇitvā. Ṭhānāṭṭhāne ca kovidoti kāraṇākāraṇe ca dakkho chekoti attho. Jinasāsanaṃ dhārentoti jinena vuttānusāsaniṃ jinassa piṭakattayaṃ vācanasavanacintanadhāraṇādivasena dhārento, sallakkhentoti attho. Viharissatināsavoti nikkileso catūhi iriyāpathehi aparipatantaṃ attabhāvaṃ harissati pavattessatīti attho.

    487. அபரிமெய்யுபாதா³யாதி அனேகஸதஸஹஸ்ஸே ஆதி³ங் கத்வா. பத்தே²மி தவ ஸாஸனந்தி ‘‘கோ³தமஸ்ஸ ப⁴க³வதோ ஸாஸனே வினயத⁴ரானங் அக்³கோ³ ப⁴வெய்ய’’ந்தி துய்ஹங் ஸாஸனங் பத்தே²மி இச்சா²மீதி அத்தோ². ஸோ மே அத்தோ²தி ஸோ ஏதத³க்³க³ட்டா²னந்தரஸங்கா²தோ அத்தோ² மே மயா அனுப்பத்தோதி அத்தோ². ஸப்³ப³ஸங்யோஜனக்க²யோதி ஸப்³பே³ஸங் ஸங்யோஜனானங் க²யோ மயா அனுப்பத்தோதி ஸம்ப³ந்தோ⁴, நிப்³பா³னங் அதி⁴க³தந்தி அத்தோ².

    487.Aparimeyyupādāyāti anekasatasahasse ādiṃ katvā. Patthemi tava sāsananti ‘‘gotamassa bhagavato sāsane vinayadharānaṃ aggo bhaveyya’’nti tuyhaṃ sāsanaṃ patthemi icchāmīti attho. So me atthoti so etadaggaṭṭhānantarasaṅkhāto attho me mayā anuppattoti attho. Sabbasaṃyojanakkhayoti sabbesaṃ saṃyojanānaṃ khayo mayā anuppattoti sambandho, nibbānaṃ adhigatanti attho.

    488. ராஜத³ண்டே³ன தஜ்ஜிதோ பீளிதோ ஸூலாவுதோ ஸூலே ஆவுதோ ஆவுணிதோ போஸோ புரிஸோ ஸூலே ஸாதங் மது⁴ரஸுக²ங் அவிந்த³ந்தோ நானுப⁴வந்தோ பரிமுத்திங்வ பரிமோசனமேவ இச்ச²தி யதா²தி ஸம்ப³ந்தோ⁴.

    488. Rājadaṇḍena tajjito pīḷito sūlāvuto sūle āvuto āvuṇito poso puriso sūle sātaṃ madhurasukhaṃ avindanto nānubhavanto parimuttiṃva parimocanameva icchati yathāti sambandho.

    489-90. மஹாவீர வீரானமந்தரே வீருத்தம அஹங் ப⁴வத³ண்டே³ன ஜாதித³ண்டே³ன, தஜ்ஜிதோ பீளிதோ கம்மஸூலாவுதோ குஸலாகுஸலகம்மஸூலஸ்மிங் ஆவுதோ ஸந்தோ ஸங்விஜ்ஜமானோ, பிபாஸாவேத³னாய பிபாஸாதுரபா⁴வேன அட்டிதோ அபி⁴பூ⁴தோ து³க்கா²பிதோ ப⁴வே ஸாதங் ஸங்ஸாரே மது⁴ரங் ஸுக²ங் ந விந்தா³மி ந லபா⁴மி. ராக³க்³கி³தோ³ஸக்³கி³மோஹக்³கி³ஸங்கா²தேஹி, நரகக்³கி³கப்புட்டா²னக்³கி³து³க்க²க்³கி³ஸங்கா²தேஹி வா தீஹி அக்³கீ³ஹி ட³ய்ஹந்தோ பரிமுத்திங் பரிமுச்சனுபாயங் க³வேஸாமி பரியேஸாமி ததே²வாதி ஸம்ப³ந்தோ⁴. யதா² ராஜத³ண்ட³ங் இதோ க³தோ பத்தோ பரிமுத்திங் க³வேஸதி, ததா² அஹங் ப⁴வத³ண்ட³ப்பத்தோ பரிமுத்திங் க³வேஸாமீதி ஸம்ப³ந்தோ⁴.

    489-90.Mahāvīra vīrānamantare vīruttama ahaṃ bhavadaṇḍena jātidaṇḍena, tajjito pīḷito kammasūlāvuto kusalākusalakammasūlasmiṃ āvuto santo saṃvijjamāno, pipāsāvedanāya pipāsāturabhāvena aṭṭito abhibhūto dukkhāpito bhave sātaṃ saṃsāre madhuraṃ sukhaṃ na vindāmi na labhāmi. Rāgaggidosaggimohaggisaṅkhātehi, narakaggikappuṭṭhānaggidukkhaggisaṅkhātehi vā tīhi aggīhi ḍayhanto parimuttiṃ parimuccanupāyaṃ gavesāmi pariyesāmi tathevāti sambandho. Yathā rājadaṇḍaṃ ito gato patto parimuttiṃ gavesati, tathā ahaṃ bhavadaṇḍappatto parimuttiṃ gavesāmīti sambandho.

    491-2. புன ஸங்ஸாரதோ மோசனங் உபமோபமெய்யவஸேன த³ஸ்ஸெந்தோ யதா² விஸாதோ³திஆதி³மாஹ. தத்த² விஸேன ஸப்பவிஸேன ஆ ஸமந்ததோ த³ங்ஸீயித்த² த³ட்டோ² ஹோதீதி விஸாதோ³, ஸப்பத³ட்டோ²தி அத்தோ². அத² வா விஸங் ஹலாஹலவிஸங் அத³தி கி³லதீதி விஸாதோ³, விஸகா²த³கோதி அத்தோ². யோ புரிஸோ விஸாதோ³, தேன தாதி³ஸேன விஸேன பரிபீளிதோ, தஸ்ஸ விஸஸ்ஸ விகா⁴தாய வினாஸாய உபாயனங் உபாயபூ⁴தங் அக³த³ங் ஓஸத⁴ங் க³வேஸெய்ய பரியேஸெய்ய, தங் க³வேஸமானோ விஸகா⁴தகங் விஸனாஸகங் அக³த³ங் ஓஸத⁴ங் பஸ்ஸெய்ய த³க்கெ²ய்ய. ஸோ தங் அத்தனோ தி³ட்ட²ங் ஓஸத⁴ங் பிவித்வா விஸம்ஹா விஸதோ பரிமுத்தியா பரிமோசனகாரணா ஸுகீ² அஸ்ஸ ப⁴வெய்ய யதா²தி ஸம்ப³ந்தோ⁴.

    491-2. Puna saṃsārato mocanaṃ upamopameyyavasena dassento yathāvisādotiādimāha. Tattha visena sappavisena ā samantato daṃsīyittha daṭṭho hotīti visādo, sappadaṭṭhoti attho. Atha vā visaṃ halāhalavisaṃ adati gilatīti visādo, visakhādakoti attho. Yo puriso visādo, tena tādisena visena paripīḷito, tassa visassa vighātāya vināsāya upāyanaṃ upāyabhūtaṃ agadaṃ osadhaṃ gaveseyya pariyeseyya, taṃ gavesamāno visaghātakaṃ visanāsakaṃ agadaṃ osadhaṃ passeyya dakkheyya. So taṃ attano diṭṭhaṃ osadhaṃ pivitvā visamhā visato parimuttiyā parimocanakāraṇā sukhī assa bhaveyya yathāti sambandho.

    493. ததே²வாஹந்தி யதா² யேன பகாரேன ஸோ நரோ விஸஹதோ, ஸவிஸேன ஸப்பேன த³ட்டோ² விஸகா²த³கோ வா ஓஸத⁴ங் பிவித்வா ஸுகீ² ப⁴வெய்ய, ததே²வ தேன பகாரேன அஹங் அவிஜ்ஜாய மோஹேன ஸங் ஸுட்டு² பீளிதோ. ஸத்³த⁴ம்மாக³த³மேஸஹந்தி அஹங் ஸத்³த⁴ம்மஸங்கா²தங் ஓஸத⁴ங் ஏஸங் பரியேஸந்தோதி அத்தோ².

    493.Tathevāhanti yathā yena pakārena so naro visahato, savisena sappena daṭṭho visakhādako vā osadhaṃ pivitvā sukhī bhaveyya, tatheva tena pakārena ahaṃ avijjāya mohena saṃ suṭṭhu pīḷito. Saddhammāgadamesahanti ahaṃ saddhammasaṅkhātaṃ osadhaṃ esaṃ pariyesantoti attho.

    494-5. த⁴ம்மாக³த³ங் க³வேஸந்தோதி ஸங்ஸாரது³க்க²விஸஸ்ஸ வினாஸாய த⁴ம்மோஸத⁴ங் க³வேஸந்தோ. அத்³த³க்கி²ங் ஸக்யஸாஸனந்தி ஸக்யவங்ஸபப⁴வஸ்ஸ கோ³தமஸ்ஸ ஸாஸனங் ஸத்³த³க்கி²ந்தி அத்தோ². அக்³க³ங் ஸப்³போ³ஸதா⁴னங் தந்தி ஸப்³பே³ஸங் ஓஸதா⁴னங் அந்தரே தங் ஸக்யஸாஸனஸங்கா²தங் த⁴ம்மோஸத⁴ங் அக்³க³ங் உத்தமந்தி அத்தோ². ஸப்³ப³ஸல்லவினோத³னந்தி ராக³ஸல்லாதீ³னங் ஸப்³பே³ஸங் ஸல்லானங் வினோத³னங் வூபஸமகரங் த⁴ம்மோஸத⁴ங் த⁴ம்மஸங்கா²தங் ஓஸத⁴ங் பிவித்வா ஸப்³ப³ங் விஸங் ஸகலஸங்ஸாரது³க்க²விஸங் ஸமூஹனிங் நாஸேஸிந்தி ஸம்ப³ந்தோ⁴. அஜராமரந்தி தங் து³க்க²விஸங் ஸமூஹனித்வா அஜரங் ஜராவிரஹிதங் அமரங் மரணவிரஹிதங் ஸீதிபா⁴வங் ராக³பரிளாஹாதி³விரஹிதத்தா ஸீதலபூ⁴தங் நிப்³பா³னங் அஹங் ப²ஸ்ஸயிங் பச்சக்க²மகாஸிந்தி ஸம்ப³ந்தோ⁴.

    494-5.Dhammāgadaṃ gavesantoti saṃsāradukkhavisassa vināsāya dhammosadhaṃ gavesanto. Addakkhiṃ sakyasāsananti sakyavaṃsapabhavassa gotamassa sāsanaṃ saddakkhinti attho. Aggaṃ sabbosadhānaṃ tanti sabbesaṃ osadhānaṃ antare taṃ sakyasāsanasaṅkhātaṃ dhammosadhaṃ aggaṃ uttamanti attho. Sabbasallavinodananti rāgasallādīnaṃ sabbesaṃ sallānaṃ vinodanaṃ vūpasamakaraṃ dhammosadhaṃ dhammasaṅkhātaṃ osadhaṃ pivitvā sabbaṃ visaṃ sakalasaṃsāradukkhavisaṃ samūhaniṃ nāsesinti sambandho. Ajarāmaranti taṃ dukkhavisaṃ samūhanitvā ajaraṃ jarāvirahitaṃ amaraṃ maraṇavirahitaṃ sītibhāvaṃ rāgapariḷāhādivirahitattā sītalabhūtaṃ nibbānaṃ ahaṃ phassayiṃ paccakkhamakāsinti sambandho.

    496. புன கிலேஸதமஸ்ஸ உபமங் த³ஸ்ஸெந்தோ யதா² பூ⁴தட்டிதோதிஆதி³மாஹ. தத்த² யதா² யேன பகாரேன பூ⁴தட்டிதோ பூ⁴தேன யக்கே²ன அட்டிதோ பீளிதோ போஸோ புரிஸோ பூ⁴தக்³கா³ஹேன யக்க²க்³கா³ஹேன பீளிதோ து³க்கி²தோ பூ⁴தஸ்மா யக்க²க்³கா³ஹதோ பரிமுத்தியா மோசனத்தா²ய பூ⁴தவேஜ்ஜங் க³வேஸெய்ய.

    496. Puna kilesatamassa upamaṃ dassento yathā bhūtaṭṭitotiādimāha. Tattha yathā yena pakārena bhūtaṭṭito bhūtena yakkhena aṭṭito pīḷito poso puriso bhūtaggāhena yakkhaggāhena pīḷito dukkhito bhūtasmā yakkhaggāhato parimuttiyā mocanatthāya bhūtavejjaṃ gaveseyya.

    497. தங் க³வேஸமானோ ச பூ⁴தவிஜ்ஜாய ஸுட்டு² கோவித³ங் சே²கங் பூ⁴தவேஜ்ஜங் பஸ்ஸெய்ய, ஸோ பூ⁴தவேஜ்ஜோ தஸ்ஸ யக்க²க்³க³ஹிதஸ்ஸ புரிஸஸ்ஸ ஆவேஸபூ⁴தங் விஹனே வினாஸெய்ய, ஸமூலஞ்ச மூலேன ஸஹ ஆயதிங் அனாஸேவகங் கத்வா வினாஸயே வித்³த⁴ங்ஸெய்யாதி ஸம்ப³ந்தோ⁴.

    497. Taṃ gavesamāno ca bhūtavijjāya suṭṭhu kovidaṃ chekaṃ bhūtavejjaṃ passeyya, so bhūtavejjo tassa yakkhaggahitassa purisassa āvesabhūtaṃ vihane vināseyya, samūlañca mūlena saha āyatiṃ anāsevakaṃ katvā vināsaye viddhaṃseyyāti sambandho.

    498. மஹாவீர வீருத்தம தமக்³கா³ஹேன கிலேஸந்த⁴காரக்³கா³ஹேன பீளிதோ அஹங் ததே²வ தேன பகாரேனேவ தமதோ கிலேஸந்த⁴காரதோ பரிமுத்தியா மோசனத்தா²ய ஞாணாலோகங் பஞ்ஞாஆலோகங் க³வேஸாமீதி ஸம்ப³ந்தோ⁴.

    498.Mahāvīra vīruttama tamaggāhena kilesandhakāraggāhena pīḷito ahaṃ tatheva tena pakāreneva tamato kilesandhakārato parimuttiyā mocanatthāya ñāṇālokaṃ paññāālokaṃ gavesāmīti sambandho.

    499. அத² தத³னந்தரங் கிலேஸதமஸோத⁴னங் கிலேஸந்த⁴காரனாஸகங் ஸக்யமுனிங் அத்³த³ஸந்தி அத்தோ². ஸோ ஸக்யமுனி மே மய்ஹங் தமங் அந்த⁴காரங் கிலேஸதிமிரங் பூ⁴தவேஜ்ஜோவ பூ⁴தகங் யக்க²க்³க³ஹிதங் இவ வினோதே³ஸி தூ³ரீ அகாஸீதி ஸம்ப³ந்தோ⁴.

    499. Atha tadanantaraṃ kilesatamasodhanaṃ kilesandhakāranāsakaṃ sakyamuniṃ addasanti attho. So sakyamuni me mayhaṃ tamaṃ andhakāraṃ kilesatimiraṃ bhūtavejjova bhūtakaṃ yakkhaggahitaṃ iva vinodesi dūrī akāsīti sambandho.

    500. ஸோ அஹங் ஏவங் விமுத்தோ ஸங்ஸாரஸோதங் ஸங்ஸாரபவாஹங் ஸங் ஸுட்டு² சி²ந்தி³ங் சே²தே³ஸிங், தண்ஹாஸோதங் தண்ஹாமஹோக⁴ங் நிவாரயிங் நிரவஸேஸங் அப்பவத்திங் அகாஸிந்தி அத்தோ². ப⁴வங் உக்³கா⁴டயிங் ஸப்³ப³ந்தி காமப⁴வாதி³கங் ஸப்³ப³ங் நவப⁴வங் உக்³கா⁴டயிங் வினாஸேஸிந்தி அத்தோ². மூலதோ வினாஸெந்தோ பூ⁴தவேஜ்ஜோ இவ மூலதோ உக்³கா⁴டயிந்தி ஸம்ப³ந்தோ⁴.

    500. So ahaṃ evaṃ vimutto saṃsārasotaṃ saṃsārapavāhaṃ saṃ suṭṭhu chindiṃ chedesiṃ, taṇhāsotaṃ taṇhāmahoghaṃ nivārayiṃ niravasesaṃ appavattiṃ akāsinti attho. Bhavaṃ ugghāṭayiṃ sabbanti kāmabhavādikaṃ sabbaṃ navabhavaṃ ugghāṭayiṃ vināsesinti attho. Mūlato vināsento bhūtavejjo iva mūlato ugghāṭayinti sambandho.

    501. ததோ நிப்³பா³னபரியேஸனாய உபமங் த³ஸ்ஸெந்தோ யதா²திஆதி³மாஹ. தத்த² க³ருங் பா⁴ரியங் நாக³ங் கி³லதீதி க³ருளோ. க³ருங் வா நாக³ங் லாதி ஆத³தா³தீதி க³ருளோ, க³ருளராஜா. அத்தனோ ப⁴க்க²ங் ஸககோ³சரங் பன்னக³ங் பகாரேன பரஹத்த²ங் ந க³ச்ச²தீதி பன்னகோ³தி லத்³த⁴னாமங் நாக³ங் க³ஹணத்தா²ய ஓபததி அவபததி, ஸமந்தா ஸமந்ததோ யோஜனஸதங் ஸதயோஜனப்பமாணங் மஹாஸரங் மஹாஸமுத்³த³ங் அத்தனோ பக்க²வாதேஹி விக்கோ²பே⁴தி ஆலோளேதி யதா²தி ஸம்ப³ந்தோ⁴.

    501. Tato nibbānapariyesanāya upamaṃ dassento yathātiādimāha. Tattha garuṃ bhāriyaṃ nāgaṃ gilatīti garuḷo. Garuṃ vā nāgaṃ lāti ādadātīti garuḷo, garuḷarājā. Attano bhakkhaṃ sakagocaraṃ pannagaṃ pakārena parahatthaṃ na gacchatīti pannagoti laddhanāmaṃ nāgaṃ gahaṇatthāya opatati avapatati, samantā samantato yojanasataṃ satayojanappamāṇaṃ mahāsaraṃ mahāsamuddaṃ attano pakkhavātehi vikkhobheti āloḷeti yathāti sambandho.

    502. ஸோ ஸுபண்ணோ விஹங்க³மோ வேஹாஸக³மனஸீலோ பன்னக³ங் நாமங் க³ஹெத்வா அதோ⁴ஸீஸங் ஓலம்பெ³த்வா விஹேட²யங் தத்த² தத்த² விவிதே⁴ன ஹேட²னேன ஹேடெ²ந்தோ ஆதா³ய த³ள்ஹங் க³ஹெத்வா யேன காமங் யத்த² க³ந்துகாமோ, தத்த² பக்கமதி க³ச்ச²தீதி ஸம்ப³ந்தோ⁴.

    502.So supaṇṇo vihaṅgamo vehāsagamanasīlo pannagaṃ nāmaṃ gahetvā adhosīsaṃ olambetvā viheṭhayaṃ tattha tattha vividhena heṭhanena heṭhento ādāya daḷhaṃ gahetvā yena kāmaṃ yattha gantukāmo, tattha pakkamati gacchatīti sambandho.

    503. ப⁴ந்தே மஹாவீர, யதா² க³ருளோ ப³லீ ப³லவா பன்னக³ங் க³ஹெத்வா பக்கமதி, ததா² ஏவ அஹங் அஸங்க²தங் பச்சயேஹி அகதங் நிப்³பா³னங் க³வேஸந்தோ படிபத்திபூரணவஸேன பரியேஸந்தோ தோ³ஸே ஸகலதி³யட்³ட⁴கிலேஸஸஹஸ்ஸே விக்கா²லயிங் விஸேஸேன ஸமுச்சே²த³ப்பஹானேன ஸோதே⁴ஸிங் அஹந்தி ஸம்ப³ந்தோ⁴.

    503. Bhante mahāvīra, yathā garuḷo balī balavā pannagaṃ gahetvā pakkamati, tathā eva ahaṃ asaṅkhataṃ paccayehi akataṃ nibbānaṃ gavesanto paṭipattipūraṇavasena pariyesanto dose sakaladiyaḍḍhakilesasahasse vikkhālayiṃ visesena samucchedappahānena sodhesiṃ ahanti sambandho.

    504. யதா² க³ருளோ பன்னக³ங் க³ஹெத்வா பு⁴ஞ்ஜித்வா விஹரதி, ததா² அஹங் த⁴ம்மவரங் உத்தமத⁴ம்மங் தி³ட்டோ² பஸ்ஸந்தோ ஏதங் ஸந்திபத³ங் நிப்³பா³னபத³ங் அனுத்தரங் உத்தரவிரஹிதங் மக்³க³ப²லேஹி ஆதா³ய க³ஹெத்வா வளஞ்ஜெத்வா விஹராமீதி ஸம்ப³ந்தோ⁴.

    504. Yathā garuḷo pannagaṃ gahetvā bhuñjitvā viharati, tathā ahaṃ dhammavaraṃ uttamadhammaṃ diṭṭho passanto etaṃ santipadaṃ nibbānapadaṃ anuttaraṃ uttaravirahitaṃ maggaphalehi ādāya gahetvā vaḷañjetvā viharāmīti sambandho.

    505. இதா³னி நிப்³பா³னஸ்ஸ து³ல்லப⁴பா⁴வங் த³ஸ்ஸெந்தோ ஆஸாவதீ நாம லதாதிஆதி³மாஹ. தத்த² ஸப்³பே³ஸங் தே³வானங் ஆஸா இச்சா² ஏதிஸ்ஸங் லதாயங் அத்தீ²தி ஆஸாவதீ நாம லதா, சித்தலதாவனே அனேகவிசித்தாஹி லதாஹி க³ஹனீபூ⁴தே வனே உய்யானே ஜாதா நிப்³ப³த்தாதி அத்தோ². தஸ்ஸா லதாய வஸ்ஸஸஹஸ்ஸேன வஸ்ஸஸஹஸ்ஸச்சயேன ஏகங் ப²லங் நிப்³ப³த்ததே ஏகங் ப²லங் க³ண்ஹாதி.

    505. Idāni nibbānassa dullabhabhāvaṃ dassento āsāvatī nāma latātiādimāha. Tattha sabbesaṃ devānaṃ āsā icchā etissaṃ latāyaṃ atthīti āsāvatī nāma latā, cittalatāvane anekavicittāhi latāhi gahanībhūte vane uyyāne jātā nibbattāti attho. Tassā latāya vassasahassena vassasahassaccayena ekaṃ phalaṃ nibbattate ekaṃ phalaṃ gaṇhāti.

    506. தங் தே³வாதி தங் ஆஸாவதிங் லதங் தாவ தூ³ரப²லங் தத்தகங் சிரகாலங் அதிக்கமித்வா ப²லங் க³ண்ஹந்தங் ஸங்விஜ்ஜமானங் தே³வா தாவதிங்ஸதே³வதா பயிருபாஸந்தி ப⁴ஜந்தி, ஸா ஆஸாவதீ நாம லதுத்தமா லதானங் அந்தரே உத்தமலதா ஏவங் தே³வானங் பியா அஹோஸீதி ஸம்ப³ந்தோ⁴.

    506.Taṃ devāti taṃ āsāvatiṃ lataṃ tāva dūraphalaṃ tattakaṃ cirakālaṃ atikkamitvā phalaṃ gaṇhantaṃ saṃvijjamānaṃ devā tāvatiṃsadevatā payirupāsanti bhajanti, sā āsāvatī nāma latuttamā latānaṃ antare uttamalatā evaṃ devānaṃ piyā ahosīti sambandho.

    507. ஸதஸஹஸ்ஸுபாதா³யாதி ஸதஸஹஸ்ஸஸங்வச்ச²ரங் ஆதி³ங் கத்வா. தாஹங் பரிசரே முனீதி மோனங் வுச்சதி ஞாணங், ப⁴ந்தே, முனி ஞாணவந்த ஸப்³ப³ஞ்ஞு, அஹங் தங் ப⁴க³வந்தங் பரிசரே பயிருபாஸாமி. ஸாயங்பாதங் நமஸ்ஸாமீதி ஸாயன்ஹஸமயஞ்ச புப்³ப³ண்ஹஸமயஞ்சாதி த்³விக்க²த்துங் நமஸ்ஸாமி பணாமங் கரோமி. யதா² தே³வா தாவதிங்ஸா தே³வா விய ஆஸாவதீலதங் ஸாயங்பாதஞ்ச பயிருபாஸந்தீதி ஸம்ப³ந்தோ⁴.

    507.Satasahassupādāyāti satasahassasaṃvaccharaṃ ādiṃ katvā. Tāhaṃ paricare munīti monaṃ vuccati ñāṇaṃ, bhante, muni ñāṇavanta sabbaññu, ahaṃ taṃ bhagavantaṃ paricare payirupāsāmi. Sāyaṃpātaṃ namassāmīti sāyanhasamayañca pubbaṇhasamayañcāti dvikkhattuṃ namassāmi paṇāmaṃ karomi. Yathā devā tāvatiṃsā devā viya āsāvatīlataṃ sāyaṃpātañca payirupāsantīti sambandho.

    508. அவஞ்ஜா² பாரிசரியாதி யஸ்மா பு³த்³த⁴த³ஸ்ஸனஹேது நிப்³பா³னப்பத்தி அஹோஸி, தஸ்மா பு³த்³த⁴பாரிசரியா வத்தபடிபத்திகிரியா அவஞ்ஜா² அதுச்சா² நமஸ்ஸனா பணாமகிரியா ச அமோகா⁴ அதுச்சா². ததா² ஹி தூ³ராக³தங் தூ³ரதோ ஸங்ஸாரத்³தா⁴னதோ ஆக³தம்பி, ஸந்தங் ஸங்விஜ்ஜமானங் க²ணோயங் அயங் பு³த்³து⁴ப்பாத³க்க²ணோ ந விராத⁴யி நாதிக்கமி, மங் அதிக்கமித்வா ந க³தோதி அத்தோ².

    508.Avañjhā pāricariyāti yasmā buddhadassanahetu nibbānappatti ahosi, tasmā buddhapāricariyā vattapaṭipattikiriyā avañjhā atucchā namassanā paṇāmakiriyā ca amoghā atucchā. Tathā hi dūrāgataṃ dūrato saṃsāraddhānato āgatampi, santaṃ saṃvijjamānaṃ khaṇoyaṃ ayaṃ buddhuppādakkhaṇo na virādhayi nātikkami, maṃ atikkamitvā na gatoti attho.

    509. பு³த்³த⁴த³ஸ்ஸனஹேது நிப்³பா³னப்பத்தோ அஹங் ஆயதிங் உப்பஜ்ஜனகப⁴வே மம படிஸந்தி⁴ங் விசினந்தோ உபபரிக்க²ந்தோ ந பஸ்ஸாமீதி ஸம்ப³ந்தோ⁴. நிரூபதி⁴ க²ந்தூ⁴பதி⁴கிலேஸூபதீ⁴ஹி விரஹிதோ விப்பமுத்தோ ஸப்³ப³கிலேஸேஹி வினாபூ⁴தோ உபஸந்தோ கிலேஸபரிளாஹாபா⁴வேன ஸந்தமானஸோ சராமி அஹந்தி ஸம்ப³ந்தோ⁴.

    509. Buddhadassanahetu nibbānappatto ahaṃ āyatiṃ uppajjanakabhave mama paṭisandhiṃ vicinanto upaparikkhanto na passāmīti sambandho. Nirūpadhi khandhūpadhikilesūpadhīhi virahito vippamutto sabbakilesehi vinābhūto upasanto kilesapariḷāhābhāvena santamānaso carāmi ahanti sambandho.

    510. புன அத்தனோ பு³த்³த⁴த³ஸ்ஸனாய உபமங் த³ஸ்ஸெந்தோ யதா²பி பது³மங் நாமாதிஆதி³மாஹ. ஸூரியரங்ஸேன ஸூரியரங்ஸிஸம்ப²ஸ்ஸேன யதா² பது³மங் நாம அபி புப்ப²தி விகஸதி மஹாவீர வீருத்தம அஹங் ததா² ஏவ பு³த்³த⁴ரங்ஸேன பு³த்³தே⁴ன ப⁴க³வதா தே³ஸிதத⁴ம்மரங்ஸிப்பபா⁴வேன புப்பி²தோதி அத்தோ².

    510. Puna attano buddhadassanāya upamaṃ dassento yathāpi padumaṃ nāmātiādimāha. Sūriyaraṃsena sūriyaraṃsisamphassena yathā padumaṃ nāma api pupphati vikasati mahāvīra vīruttama ahaṃ tathā eva buddharaṃsena buddhena bhagavatā desitadhammaraṃsippabhāvena pupphitoti attho.

    511-12. புன பு³த்³த⁴த³ஸ்ஸனேன நிப்³பா³னத³ஸ்ஸனங் தீ³பெந்தோ யதா² ப³லாகாதிஆதி³மாஹ. தத்த² ப³லாகயோனிம்ஹி ப³லாகஜாதியங் ஸதா³ ஸப்³ப³ஸ்மிங் காலே புமா புரிஸோ யதா² ந விஜ்ஜதி. புமே அவிஜ்ஜமானே கத²ங் ப³லாகானங் க³ப்³ப⁴க்³க³ஹணங் ஹோதீதி சே? மேகே⁴ஸு க³ஜ்ஜமானேஸு ஸத்³த³ங் கரொந்தேஸு மேக⁴க³ஜ்ஜனங் ஸுத்வா தா ப³லாகினியோ ஸதா³ ஸப்³ப³காலே க³ப்³ப⁴ங் க³ண்ஹந்தி அண்ட³ங் தா⁴ரெந்தீதி அத்தோ². யாவ யத்தகங் காலங் மேகோ⁴ ந க³ஜ்ஜதி மேகோ⁴ ஸத்³த³ங் ந கரோதி, தாவ தத்தகங் காலங் சிரங் சிரகாலேன க³ப்³ப⁴ங் அண்ட³ங் தா⁴ரெந்தி. யதா³ யஸ்மிங் காலே மேகோ⁴ பவஸ்ஸதி பகாரேன க³ஜ்ஜித்வா வஸ்ஸதி வுட்டி²தா⁴ரங் பக்³க⁴ரதி, ததா³ தஸ்மிங் காலே பா⁴ரதோ க³ப்³ப⁴தா⁴ரணதோ பரிமுச்சந்தி அண்ட³ங் பாதெந்தீதி அத்தோ².

    511-12. Puna buddhadassanena nibbānadassanaṃ dīpento yathā balākātiādimāha. Tattha balākayonimhi balākajātiyaṃ sadā sabbasmiṃ kāle pumā puriso yathā na vijjati. Pume avijjamāne kathaṃ balākānaṃ gabbhaggahaṇaṃ hotīti ce? Meghesu gajjamānesu saddaṃ karontesu meghagajjanaṃ sutvā tā balākiniyo sadā sabbakāle gabbhaṃ gaṇhanti aṇḍaṃ dhārentīti attho. Yāva yattakaṃ kālaṃ megho na gajjati megho saddaṃ na karoti, tāva tattakaṃ kālaṃ ciraṃ cirakālena gabbhaṃ aṇḍaṃ dhārenti. Yadā yasmiṃ kāle megho pavassati pakārena gajjitvā vassati vuṭṭhidhāraṃ paggharati, tadā tasmiṃ kāle bhārato gabbhadhāraṇato parimuccanti aṇḍaṃ pātentīti attho.

    513. ததோ பரங் உபமெய்யஸம்பத³ங் த³ஸ்ஸெந்தோ பது³முத்தரபு³த்³த⁴ஸ்ஸாதிஆதி³மாஹ. பது³முத்தரஸ்ஸ பு³த்³த⁴ஸ்ஸ த⁴ம்மமேகே⁴ன வோஹாரபரமத்த²தே³ஸனாஸங்கா²தமேகே⁴ன க³ஜ்ஜதோ க³ஜ்ஜந்தஸ்ஸ தே³ஸெந்தஸ்ஸ த⁴ம்மமேக⁴ஸ்ஸ ஸத்³தே³ன கோ⁴ஸானுஸாரேன அஹங் ததா³ த⁴ம்மக³ப்³ப⁴ங் விவட்டூபனிஸ்ஸயங் தா³னஸீலாதி³புஞ்ஞஸம்பா⁴ரக³ப்³ப⁴ங் அக³ண்ஹிங் க³ஹேஸிங் ததா²தி ஸம்ப³ந்தோ⁴.

    513. Tato paraṃ upameyyasampadaṃ dassento padumuttarabuddhassātiādimāha. Padumuttarassa buddhassa dhammameghena vohāraparamatthadesanāsaṅkhātameghena gajjato gajjantassa desentassa dhammameghassa saddena ghosānusārena ahaṃ tadā dhammagabbhaṃ vivaṭṭūpanissayaṃ dānasīlādipuññasambhāragabbhaṃ agaṇhiṃ gahesiṃ tathāti sambandho.

    514. ஸதஸஹஸ்ஸுபாதா³ய கப்பஸதஸஹஸ்ஸங் ஆதி³ங் கத்வா புஞ்ஞக³ப்³ப⁴ங் தா³னஸீலாதி³புஞ்ஞஸம்பா⁴ரங் அஹங் த⁴ரேமி பூரேமி. யாவ த⁴ம்மமேகோ⁴ த⁴ம்மதே³ஸனா ந க³ஜ்ஜதி பு³த்³தே⁴ன ந தே³ஸீயதி, தாவ அஹங் பா⁴ரதோ ஸங்ஸாரக³ப்³ப⁴பா⁴ரதோ நப்பமுச்சாமி ந மோசேமி ந விஸுங் ப⁴வாமீதி ஸம்ப³ந்தோ⁴.

    514.Satasahassupādāya kappasatasahassaṃ ādiṃ katvā puññagabbhaṃ dānasīlādipuññasambhāraṃ ahaṃ dharemi pūremi. Yāva dhammamegho dhammadesanā na gajjati buddhena na desīyati, tāva ahaṃ bhārato saṃsāragabbhabhārato nappamuccāmi na mocemi na visuṃ bhavāmīti sambandho.

    515. ப⁴ந்தே, ஸக்யமுனி ஸக்யவங்ஸப்பப⁴வ யதா³ யஸ்மிங் காலே ஸுத்³தோ⁴த³னமஹாராஜஸ்ஸ தவ பிது ரம்மே ரமணீயே கபிலவத்த²வே கபிலவத்து²னாமகே நக³ரே துவங் த⁴ம்மமேகே⁴ன க³ஜ்ஜதி கோ⁴ஸேதி, ததா³ தஸ்மிங் காலே அஹங் பா⁴ரதோ ஸங்ஸாரக³ப்³ப⁴பா⁴ரதோ பரிமுச்சிங் முத்தோ அஹோஸிந்தி ஸம்ப³ந்தோ⁴.

    515. Bhante, sakyamuni sakyavaṃsappabhava yadā yasmiṃ kāle suddhodanamahārājassa tava pitu ramme ramaṇīye kapilavatthave kapilavatthunāmake nagare tuvaṃ dhammameghena gajjati ghoseti, tadā tasmiṃ kāle ahaṃ bhārato saṃsāragabbhabhārato parimucciṃ mutto ahosinti sambandho.

    516. ததோ பரங் அத்தனா அதி⁴க³தே மக்³க³ப²லே த³ஸ்ஸெந்தோ ஸுஞ்ஞதந்திஆதி³மாஹ. தத்த² அத்தஅத்தனியாதீ³னங் அபா⁴வதோ ஸுஞ்ஞதங் விமொக்க²ஞ்ச ராக³தோ³ஸமோஹஸப்³ப³கிலேஸனிமித்தானங் அபா⁴வதோ, அனிமித்தங் விமொக்க²ஞ்ச தண்ஹாபணிதி⁴ஸ்ஸ அபா⁴வதோ, அப்பணிஹிதங் விமொக்க²ஞ்ச அரியமக்³க³ங் அதி⁴க³ஞ்சி²ங் பா⁴வேஸிந்தி ஸம்ப³ந்தோ⁴. சதுரோ ச ப²லே ஸப்³பே³தி சத்தாரி ஸாமஞ்ஞப²லானி ஸப்³பா³னி ஸச்சி² அகாஸிந்தி அத்தோ². த⁴ம்மேவங் விஜடயிங் அஹந்தி அஹங் ஏவங் ஸப்³ப³த⁴ம்மே ஜடங் க³ஹனங் விஜடயிங் வித்³த⁴ங்ஸேஸிந்தி அத்தோ².

    516. Tato paraṃ attanā adhigate maggaphale dassento suññatantiādimāha. Tattha attaattaniyādīnaṃ abhāvato suññataṃ vimokkhañca rāgadosamohasabbakilesanimittānaṃ abhāvato, animittaṃ vimokkhañca taṇhāpaṇidhissa abhāvato, appaṇihitaṃ vimokkhañca ariyamaggaṃ adhigañchiṃ bhāvesinti sambandho. Caturo ca phale sabbeti cattāri sāmaññaphalāni sabbāni sacchi akāsinti attho. Dhammevaṃ vijaṭayiṃ ahanti ahaṃ evaṃ sabbadhamme jaṭaṃ gahanaṃ vijaṭayiṃ viddhaṃsesinti attho.

    து³தியபா⁴ணவாரவண்ணனா ஸமத்தா.

    Dutiyabhāṇavāravaṇṇanā samattā.

    517. ததோ பரங் அத்தனா அதி⁴க³தவிஸேஸமேவ த³ஸ்ஸெந்தோ அபரிமெய்யுபாதா³யாதிஆதி³மாஹ. தத்த² ந பரிமெய்யோதி அபரிமெய்யோ, ஸங்வச்ச²ரக³ணனவஸேன பமேதுங் ஸங்கா²துங் அஸக்குணெய்யோதி அத்தோ². தங் அபரிமெய்யங் கப்பங் உபாதா³ய ஆதி³ங் கத்வா தவ ஸாஸனங் துய்ஹங் ஸாஸனங் ‘‘அனாக³தே கோ³தமஸ்ஸ ப⁴க³வதோ ஸாஸனே வினயத⁴ரானங் அக்³கோ³ ப⁴வெய்ய’’ந்தி ஏவங் பத்தே²மி. அதீதத்தே² வத்தமானவசனங், பத்தே²ஸிந்தி அத்தோ². ஸோ மே அத்தோ²தி ஸோ பத்த²னாஸங்கா²தோ அத்தோ² மே மயா அனுப்பத்தோ நிப்பா²தி³தோதி அத்தோ². அனுத்தரங் ஸந்திபத³ங் நிப்³பா³னங் அனுப்பத்தங் அதி⁴க³தந்தி ஸம்ப³ந்தோ⁴.

    517. Tato paraṃ attanā adhigatavisesameva dassento aparimeyyupādāyātiādimāha. Tattha na parimeyyoti aparimeyyo, saṃvaccharagaṇanavasena pametuṃ saṅkhātuṃ asakkuṇeyyoti attho. Taṃ aparimeyyaṃ kappaṃ upādāya ādiṃ katvā tava sāsanaṃ tuyhaṃ sāsanaṃ ‘‘anāgate gotamassa bhagavato sāsane vinayadharānaṃ aggo bhaveyya’’nti evaṃ patthemi. Atītatthe vattamānavacanaṃ, patthesinti attho. So me atthoti so patthanāsaṅkhāto attho me mayā anuppatto nipphāditoti attho. Anuttaraṃ santipadaṃ nibbānaṃ anuppattaṃ adhigatanti sambandho.

    518. ஸோ அஹங் அதி⁴க³தத்தா வினயே வினயபிடகே பாரமிங் பத்தோ பரியோஸானப்பத்தோ. யதா²பி பாடி²கோ இஸீதி யதா² பது³முத்தரஸ்ஸ ப⁴க³வதோ ஸாஸனே வினயத⁴ரானங் அக்³கோ³ இஸி பி⁴க்கு² பாடி²கோ பாகடோ அஹோஸி, ததே²வாஹந்தி அத்தோ². ந மே ஸமஸமோ அத்தீ²தி வினயதா⁴ரிதாய மே மயா ஸமஸமோ ஸமானோ அஞ்ஞோ ந அத்தீ²தி அத்தோ². ஸாஸனங் ஓவாதா³னுஸாஸனீஸங்கா²தங் ஸாஸனங் தா⁴ரேமி பூரேமீதி அத்தோ².

    518. So ahaṃ adhigatattā vinaye vinayapiṭake pāramiṃ patto pariyosānappatto. Yathāpi pāṭhiko isīti yathā padumuttarassa bhagavato sāsane vinayadharānaṃ aggo isi bhikkhu pāṭhiko pākaṭo ahosi, tathevāhanti attho. Na me samasamo atthīti vinayadhāritāya me mayā samasamo samāno añño na atthīti attho. Sāsanaṃ ovādānusāsanīsaṅkhātaṃ sāsanaṃ dhāremi pūremīti attho.

    519. புனபி அத்தனோ விஸேஸங் த³ஸ்ஸெந்தோ வினயே க²ந்த⁴கே சாபீதிஆதி³மாஹ. தத்த² வினயேதி உப⁴தோவிப⁴ங்கே³. க²ந்த⁴கேதி மஹாவக்³க³சூளவக்³கே³. திகச்சே²தே³ சாதி திகஸங்கா⁴தி³ஸேஸதிகபாசித்தியாதி³கே ச. பஞ்சமேதி பரிவாரே ச. எத்த² ஏதஸ்மிங் ஸகலே வினயபிடகே மய்ஹங் விமதி த்³வெள்ஹகங் நத்தி² ந ஸங்விஜ்ஜதி. அக்க²ரேதி வினயபிடகபரியாபன்னே அ-காராதி³கே அக்க²ரே. ப்³யஞ்ஜனேதி க-காராதி³கே ப்³யஞ்ஜனே வா மே விமதி ஸங்ஸயோ நத்தீ²தி ஸம்ப³ந்தோ⁴.

    519. Punapi attano visesaṃ dassento vinaye khandhake cāpītiādimāha. Tattha vinayeti ubhatovibhaṅge. Khandhaketi mahāvaggacūḷavagge. Tikacchede cāti tikasaṅghādisesatikapācittiyādike ca. Pañcameti parivāre ca. Ettha etasmiṃ sakale vinayapiṭake mayhaṃ vimati dveḷhakaṃ natthi na saṃvijjati. Akkhareti vinayapiṭakapariyāpanne a-kārādike akkhare. Byañjaneti ka-kārādike byañjane vā me vimati saṃsayo natthīti sambandho.

    520. நிக்³க³ஹே படிகம்மே சாதி பாபபி⁴க்கூ²னங் நிக்³க³ஹே ச ஸாபத்திகானங் பி⁴க்கூ²னங் பரிவாஸதா³னாதி³கே படிகம்மே ச டா²னாட்டா²னே ச காரணே ச அகாரணே ச கோவிதோ³ சே²கோதி அத்தோ². ஓஸாரணே ச தஜ்ஜனீயாதி³கம்மஸ்ஸ படிப்பஸ்ஸத்³தி⁴வஸேன ஓஸாரணே பவேஸனே ச. வுட்டா²பனே ச ஆபத்திதோ வுட்டா²பனே நிராபத்திகரணே ச சே²கோதி ஸம்ப³ந்தோ⁴. ஸப்³ப³த்த² பாரமிங் க³தோதி ஸப்³ப³ஸ்மிங் வினயகம்மே பரியோஸானங் பத்தோ, த³க்கோ² சே²கோதி அத்தோ².

    520.Niggahepaṭikamme cāti pāpabhikkhūnaṃ niggahe ca sāpattikānaṃ bhikkhūnaṃ parivāsadānādike paṭikamme ca ṭhānāṭṭhāne ca kāraṇe ca akāraṇe ca kovido chekoti attho. Osāraṇe ca tajjanīyādikammassa paṭippassaddhivasena osāraṇe pavesane ca. Vuṭṭhāpane ca āpattito vuṭṭhāpane nirāpattikaraṇe ca chekoti sambandho. Sabbattha pāramiṃ gatoti sabbasmiṃ vinayakamme pariyosānaṃ patto, dakkho chekoti attho.

    521. வினயே க²ந்த⁴கே சாபீதி வுத்தப்பகாரே வினயே ச க²ந்த⁴கே ச, பத³ங் ஸுத்தபத³ங் நிக்கி²பித்வா பட்ட²பெத்வா. உப⁴தோ வினிவேடெ²த்வாதி வினயதோ க²ந்த⁴கதோ சாதி உப⁴யதோ நிப்³ப³த்தெத்வா விஜடெத்வா நயங் ஆஹரித்வா. ரஸதோதி கிச்சதோ. ஓஸரெய்யங் ஓஸாரணங் கரோமீதி அத்தோ².

    521.Vinaye khandhake cāpīti vuttappakāre vinaye ca khandhake ca, padaṃ suttapadaṃ nikkhipitvā paṭṭhapetvā. Ubhato viniveṭhetvāti vinayato khandhakato cāti ubhayato nibbattetvā vijaṭetvā nayaṃ āharitvā. Rasatoti kiccato. Osareyyaṃ osāraṇaṃ karomīti attho.

    522. நிருத்தியா ச குஸலோதி ‘‘ருக்கோ² படோ கும்போ⁴ மாலா சித்த’’ந்திஆதீ³ஸு வோஹாரேஸு சே²கோ. அத்தா²னத்தே² ச கோவிதோ³தி அத்தே² வட்³டி⁴யங் அனத்தே² ஹானியஞ்ச கோவிதோ³ த³க்கோ²தி அத்தோ². அனஞ்ஞாதங் மயா நத்தீ²தி வினயபிடகே ஸகலே வா பிடகத்தயே மயா அனஞ்ஞாதங் அவிதி³தங் அபாகடங் கிஞ்சி நத்தீ²தி அத்தோ². ஏகக்³கோ³ ஸத்து² ஸாஸனேதி பு³த்³த⁴ஸாஸனே அஹமேவ ஏகோ வினயத⁴ரானங் அக்³கோ³ ஸெட்டோ² உத்தமோதி அத்தோ².

    522.Niruttiyā ca kusaloti ‘‘rukkho paṭo kumbho mālā citta’’ntiādīsu vohāresu cheko. Atthānatthe ca kovidoti atthe vaḍḍhiyaṃ anatthe hāniyañca kovido dakkhoti attho. Anaññātaṃ mayā natthīti vinayapiṭake sakale vā piṭakattaye mayā anaññātaṃ aviditaṃ apākaṭaṃ kiñci natthīti attho. Ekaggo satthu sāsaneti buddhasāsane ahameva eko vinayadharānaṃ aggo seṭṭho uttamoti attho.

    523. ரூபத³க்கே² அஹங் அஜ்ஜாதி அஜ்ஜ ஏதரஹி காலே ஸக்யபுத்தஸ்ஸ ப⁴க³வதோ ஸாஸனே பாவசனே அஹங் ரூபத³க்கே² ரூபத³ஸ்ஸனே வினயவினிச்ச²யத³ஸ்ஸனே ஸப்³ப³ங் கங்க²ங் ஸகலங் ஸங்ஸயங் வினோதே³மி வினாஸேமீதி ஸம்ப³ந்தோ⁴. சி²ந்தா³மி ஸப்³ப³ஸங்ஸயந்தி ‘‘அஹோஸிங் நு கோ² அஹமதீதமத்³தா⁴ன’’ந்திஆதி³கங் (ம॰ நி॰ 1.18; ஸங்॰ நி॰ 2.20; மஹானி॰ 174) காலத்தயங் ஆரப்³ப⁴ உப்பன்னங் ஸப்³ப³ங் ஸோளஸவித⁴ங் கங்க²ங் சி²ந்தா³மி வூபஸமேமி ஸப்³ப³ஸோ வித்³த⁴ங்ஸேமீதி அத்தோ².

    523.Rūpadakkhe ahaṃ ajjāti ajja etarahi kāle sakyaputtassa bhagavato sāsane pāvacane ahaṃ rūpadakkhe rūpadassane vinayavinicchayadassane sabbaṃ kaṅkhaṃ sakalaṃ saṃsayaṃ vinodemi vināsemīti sambandho. Chindāmi sabbasaṃsayanti ‘‘ahosiṃ nu kho ahamatītamaddhāna’’ntiādikaṃ (ma. ni. 1.18; saṃ. ni. 2.20; mahāni. 174) kālattayaṃ ārabbha uppannaṃ sabbaṃ soḷasavidhaṃ kaṅkhaṃ chindāmi vūpasamemi sabbaso viddhaṃsemīti attho.

    524. பத³ங் அனுபத³ஞ்சாபீதி பத³ங் புப்³ப³பத³ஞ்ச அனுபத³ங் பரபத³ஞ்ச அக்க²ரங் ஏகேகமக்க²ரஞ்ச ப்³யஞ்ஜனங் ஸிதி²லத⁴னிதாதி³த³ஸவித⁴ங் ப்³யஞ்ஜனவிதா⁴னஞ்ச. நிதா³னேதி தேன ஸமயேனாதிஆதி³கே நிதா³னே ச. பரியோஸானேதி நிக³மனே. ஸப்³ப³த்த² கோவிதோ³தி ஸப்³பே³ஸு ச²ஸு டா²னேஸு சே²கோதி அத்தோ².

    524.Padaṃ anupadañcāpīti padaṃ pubbapadañca anupadaṃ parapadañca akkharaṃ ekekamakkharañca byañjanaṃ sithiladhanitādidasavidhaṃ byañjanavidhānañca. Nidāneti tena samayenātiādike nidāne ca. Pariyosāneti nigamane. Sabbattha kovidoti sabbesu chasu ṭhānesu chekoti attho.

    525. ததோ பரங் ப⁴க³வதோயேவ கு³ணே பகாஸெந்தோ யதா²பி ராஜா ப³லவாதிஆதி³மாஹ. தத்த² யதா² ப³லவா தா²மப³லஸம்பன்னோ ஸேனாப³லஸம்பன்னோ வா ராஜா, பரங் பரேஸங் படிராஜூனங் ஸேனங் நிக்³க³ண்ஹித்வா நிஸ்ஸேஸதோ க³ஹெத்வா பலாபெத்வா வா, தபே தபெய்ய ஸந்தபெய்ய து³க்கா²பெய்ய. விஜினித்வான ஸங்கா³மந்தி ஸங்கா³மங் பரஸேனாய ஸமாக³மங் யுத்³த⁴ங் விஜினித்வா விஸேஸேன ஜினித்வா ஜயங் பத்வா. நக³ரங் தத்த² மாபயேதி தத்த² தஸ்மிங் விஜிதட்டா²னே நக³ரங் பாஸாத³ஹம்மியாதி³விபூ⁴ஸிதங் வஸனட்டா²னங் மாபயே காராபெய்யாதி அத்தோ².

    525. Tato paraṃ bhagavatoyeva guṇe pakāsento yathāpi rājā balavātiādimāha. Tattha yathā balavā thāmabalasampanno senābalasampanno vā rājā, paraṃ paresaṃ paṭirājūnaṃ senaṃ niggaṇhitvā nissesato gahetvā palāpetvā vā, tape tapeyya santapeyya dukkhāpeyya. Vijinitvāna saṅgāmanti saṅgāmaṃ parasenāya samāgamaṃ yuddhaṃ vijinitvā visesena jinitvā jayaṃ patvā. Nagaraṃ tattha māpayeti tattha tasmiṃ vijitaṭṭhāne nagaraṃ pāsādahammiyādivibhūsitaṃ vasanaṭṭhānaṃ māpaye kārāpeyyāti attho.

    526. பாகாரங் பரிக²ஞ்சாபீதி தத்த² மாபிதனக³ரே பாகாரங் ஸுதா⁴த⁴வலஇட்ட²காமயபாகாரஞ்ச காரயேதி ஸம்ப³ந்தோ⁴. பரிக²ஞ்சாபி கத்³த³மபரிக²ங், உத³கபரிக²ங், ஸுக்க²பரிக²ஞ்ச அபி காரயே. ஏஸிகங் த்³வாரகொட்ட²கந்தி நக³ரஸோப⁴னத்த²ங் உஸ்ஸாபிதஏஸிகாத²ம்ப⁴ஞ்ச மஹந்தங் கொட்ட²கஞ்ச சதுபூ⁴மகாதி³த்³வாரகொட்ட²கஞ்ச காரயே. அட்டாலகே ச விவிதே⁴தி சதுபூ⁴மகாதி³பே⁴தே³ அதிஉச்சஅட்டாலகே ச விவிதே⁴ நானப்பகாரகே ப³ஹூ காரயே காராபெய்யாதி ஸம்ப³ந்தோ⁴.

    526.Pākāraṃ parikhañcāpīti tattha māpitanagare pākāraṃ sudhādhavalaiṭṭhakāmayapākārañca kārayeti sambandho. Parikhañcāpi kaddamaparikhaṃ, udakaparikhaṃ, sukkhaparikhañca api kāraye. Esikaṃ dvārakoṭṭhakanti nagarasobhanatthaṃ ussāpitaesikāthambhañca mahantaṃ koṭṭhakañca catubhūmakādidvārakoṭṭhakañca kāraye. Aṭṭālake ca vividheti catubhūmakādibhede atiuccaaṭṭālake ca vividhe nānappakārake bahū kāraye kārāpeyyāti sambandho.

    527. ஸிங்கா⁴டகங் சச்சரஞ்சாதி ந கேவலங் பாகாராத³யோ காரயே, ஸிங்கா⁴டகங் சதுமக்³க³ஸந்தி⁴ஞ்ச சச்சரங் அந்தராவீதி²ஞ்ச காரயேதி ஸம்ப³ந்தோ⁴. ஸுவிப⁴த்தந்தராபணந்தி ஸுட்டு² விப⁴த்தங் விபா⁴க³தோ கொட்டா²ஸவந்தங் அந்தராபணங் அனேகாபணஸஹஸ்ஸங் காராபெய்யாதி அத்தோ². காரயெய்ய ஸப⁴ங் தத்தா²தி தஸ்மிங் மாபிதனக³ரே ஸப⁴ங் த⁴ம்மாதி⁴கரணஸாலங் காரயே. அத்தா²னத்த²வினிச்ச²யங் வட்³டி⁴ஞ்ச அவட்³டி⁴ஞ்ச வினிச்ச²யகரணத்த²ங் வினிச்ச²யஸாலங் காரயேதி ஸம்ப³ந்தோ⁴.

    527.Siṅghāṭakaṃ caccarañcāti na kevalaṃ pākārādayo kāraye, siṅghāṭakaṃ catumaggasandhiñca caccaraṃ antarāvīthiñca kārayeti sambandho. Suvibhattantarāpaṇanti suṭṭhu vibhattaṃ vibhāgato koṭṭhāsavantaṃ antarāpaṇaṃ anekāpaṇasahassaṃ kārāpeyyāti attho. Kārayeyya sabhaṃ tatthāti tasmiṃ māpitanagare sabhaṃ dhammādhikaraṇasālaṃ kāraye. Atthānatthavinicchayaṃ vaḍḍhiñca avaḍḍhiñca vinicchayakaraṇatthaṃ vinicchayasālaṃ kārayeti sambandho.

    528. நிக்³கா⁴தத்த²ங் அமித்தானந்தி படிராஜூனங் படிபா³ஹனத்த²ங். சி²த்³தா³சி²த்³த³ஞ்ச ஜானிதுந்தி தோ³ஸஞ்ச அதோ³ஸஞ்ச ஜானிதுங். ப³லகாயஸ்ஸ ரக்கா²யாதி ஹத்தி²அஸ்ஸரத²பத்திஸங்கா²தஸ்ஸ ப³லகாயஸ்ஸ ஸேனாஸமூஹஸ்ஸ ஆரக்க²ணத்தா²ய ஸோ நக³ரஸாமிகோ ராஜா, ஸேனாபச்சங் ஸேனாபதிங் ஸேனானாயகங் மஹாமத்தங் ட²பேதி டா²னந்தரே பதிட்ட²பேதீதி அத்தோ².

    528.Nigghātatthaṃ amittānanti paṭirājūnaṃ paṭibāhanatthaṃ. Chiddāchiddañca jānitunti dosañca adosañca jānituṃ. Balakāyassa rakkhāyāti hatthiassarathapattisaṅkhātassa balakāyassa senāsamūhassa ārakkhaṇatthāya so nagarasāmiko rājā, senāpaccaṃ senāpatiṃ senānāyakaṃ mahāmattaṃ ṭhapeti ṭhānantare patiṭṭhapetīti attho.

    529. ஆரக்க²த்தா²ய ப⁴ண்ட³ஸ்ஸாதி ஜாதரூபரஜதமுத்தாமணிஆதி³ராஜப⁴ண்ட³ஸ்ஸ ஆரக்க²ணத்தா²ய ஸமந்ததோ கோ³பனத்தா²ய மே மய்ஹங் ப⁴ண்ட³ங் மா வினஸ்ஸீதி நிதா⁴னகுஸலங் ரக்க²ணே குஸலங் சே²கங் நரங் புரிஸங் ப⁴ண்ட³ரக்க²ங் ப⁴ண்ட³ரக்க²ந்தங் ஸோ ராஜா ப⁴ண்டா³கா³ரே ட²பேதீதி ஸம்ப³ந்தோ⁴.

    529.Ārakkhatthāyabhaṇḍassāti jātarūparajatamuttāmaṇiādirājabhaṇḍassa ārakkhaṇatthāya samantato gopanatthāya me mayhaṃ bhaṇḍaṃ mā vinassīti nidhānakusalaṃ rakkhaṇe kusalaṃ chekaṃ naraṃ purisaṃ bhaṇḍarakkhaṃ bhaṇḍarakkhantaṃ so rājā bhaṇḍāgāre ṭhapetīti sambandho.

    530. மமத்தோ ஹோதி யோ ரஞ்ஞோதி யோ பண்டி³தோ ரஞ்ஞோ மமத்தோ மாமகோ பக்க²பாதோ ஹோதி. வுத்³தி⁴ங் யஸ்ஸ ச இச்ச²தீதி அஸ்ஸ ரஞ்ஞோ வுத்³தி⁴ஞ்ச விரூள்ஹிங் யோ இச்ச²தி காமேதி, தஸ்ஸ இத்த²ம்பூ⁴தஸ்ஸ பண்டி³தஸ்ஸ ராஜா அதி⁴கரணங் வினிச்ச²யாதி⁴பச்சங் தே³தி மித்தஸ்ஸ மித்தபா⁴வஸ்ஸ படிபஜ்ஜிதுந்தி ஸம்ப³ந்தோ⁴.

    530.Mamatto hoti yo raññoti yo paṇḍito rañño mamatto māmako pakkhapāto hoti. Vuddhiṃ yassa ca icchatīti assa rañño vuddhiñca virūḷhiṃ yo icchati kāmeti, tassa itthambhūtassa paṇḍitassa rājā adhikaraṇaṃ vinicchayādhipaccaṃ deti mittassa mittabhāvassa paṭipajjitunti sambandho.

    531. உப்பாதேஸூதி உக்காபாததி³ஸாடா³ஹாதி³உப்பாதேஸு ச. நிமித்தேஸூதி மூஸிகச்சி²ன்னாதீ³ஸு ‘‘இத³ங் நிமித்தங் ஸுப⁴ங், இத³ங் நிமித்தங் அஸுப⁴’’ந்தி ஏவங் நிமித்தஜானநஸத்தே²ஸு ச. லக்க²ணேஸு சாதி இத்தி²புரிஸானங் ஹத்த²பாத³லக்க²ணஜானநஸத்தே²ஸு ச கோவித³ங் சே²கங் அஜ்ஜா²யகங் அனேகேஸங் ஸிஸ்ஸானங் ப்³யாகரணவாசகங் மந்தத⁴ரங் வேத³த்தயஸங்கா²தமந்ததா⁴ரகங் பண்டி³தங் ஸோ ராஜா போரோஹிச்சே புரோஹிதட்டா²னந்தரே ட²பேதீதி ஸம்ப³ந்தோ⁴.

    531.Uppātesūti ukkāpātadisāḍāhādiuppātesu ca. Nimittesūti mūsikacchinnādīsu ‘‘idaṃ nimittaṃ subhaṃ, idaṃ nimittaṃ asubha’’nti evaṃ nimittajānanasatthesu ca. Lakkhaṇesu cāti itthipurisānaṃ hatthapādalakkhaṇajānanasatthesu ca kovidaṃ chekaṃ ajjhāyakaṃ anekesaṃ sissānaṃ byākaraṇavācakaṃ mantadharaṃ vedattayasaṅkhātamantadhārakaṃ paṇḍitaṃ so rājā porohicce purohitaṭṭhānantare ṭhapetīti sambandho.

    532. ஏதேஹங்கே³ஹி ஸம்பன்னோதி ஏதேஹி வுத்தப்பகாரேஹி அங்கே³ஹி அவயவேஹி ஸம்பன்னோ ஸமங்கீ³பூ⁴தோ ஸோ ராஜா ‘‘க²த்தியோ’’தி பவுச்சதி கதீ²யதீதி ஸம்ப³ந்தோ⁴. ஸதா³ ரக்க²ந்தி ராஜானந்தி ஏதே ஸேனாபச்சாத³யோ அமச்சா ஸதா³ ஸப்³ப³காலங் தங் ராஜானங் ரக்க²ந்தி கோ³பெந்தி. கிமிவ? சக்கவாகோவ து³க்கி²தங் து³க்க²ப்பத்தங் ஸகஞாதிங் ரக்க²ந்தோ சக்கவாகோ பக்கீ² இவாதி அத்தோ².

    532.Etehaṅgehi sampannoti etehi vuttappakārehi aṅgehi avayavehi sampanno samaṅgībhūto so rājā ‘‘khattiyo’’ti pavuccati kathīyatīti sambandho. Sadā rakkhanti rājānanti ete senāpaccādayo amaccā sadā sabbakālaṃ taṃ rājānaṃ rakkhanti gopenti. Kimiva? Cakkavākova dukkhitaṃ dukkhappattaṃ sakañātiṃ rakkhanto cakkavāko pakkhī ivāti attho.

    533. ததே²வ த்வங் மஹாவீராதி வீருத்தம, யதா² ஸோ ராஜா ஸேனாபச்சாதி³அங்க³ஸம்பன்னோ நக³ரத்³வாரங் த²கெத்வா படிவஸதி, ததே²வ துவங் ஹதாமித்தோ நிஹதபச்சத்தி²கோ க²த்தியோ இவ ஸதே³வகஸ்ஸ லோகஸ்ஸ ஸஹ தே³வேஹி பவத்தமானஸ்ஸ லோகஸ்ஸ த⁴ம்மராஜா த⁴ம்மேன ஸமேன ராஜா த³ஸபாரமிதாத⁴ம்மபரிபூரணேன ராஜபூ⁴தத்தா ‘‘த⁴ம்மராஜா’’தி பவுச்சதி கதீ²யதீதி ஸம்ப³ந்தோ⁴.

    533.Tatheva tvaṃ mahāvīrāti vīruttama, yathā so rājā senāpaccādiaṅgasampanno nagaradvāraṃ thaketvā paṭivasati, tatheva tuvaṃ hatāmitto nihatapaccatthiko khattiyo iva sadevakassa lokassa saha devehi pavattamānassa lokassa dhammarājā dhammena samena rājā dasapāramitādhammaparipūraṇena rājabhūtattā ‘‘dhammarājā’’ti pavuccati kathīyatīti sambandho.

    534. தித்தி²யே நீஹரித்வானாதி த⁴ம்மராஜபா⁴வேன படிபக்க²பூ⁴தே ஸகலதித்தி²யே நீஹரித்வா நிஸ்ஸேஸேன ஹரித்வா நிப்³பி³ஸேவனங் கத்வா ஸஸேனகங் தா⁴ரஞ்சாபி ஸேனாய ஸஹ வஸவத்திமாரம்பி நீஹரித்வா . தமந்த⁴காரங் வித⁴மித்வாதி தமஸங்கா²தங் மோஹந்த⁴காரங் வித⁴மித்வா வித்³த⁴ங்ஸெத்வா. த⁴ம்மனக³ரங் ஸத்ததிங்ஸபோ³தி⁴பக்கி²யத⁴ம்மஸங்கா²தங், க²ந்தா⁴யதனதா⁴துபடிச்சஸமுப்பாத³ப³லபொ³ஜ்ஜ²ங்க³க³ம்பீ⁴ரனயஸமந்தபட்டா²னத⁴ம்மஸங்கா²தங் வா நக³ரங் அமாபயி நிம்மினி பதிட்டா²பேஸீதி அத்தோ².

    534.Titthiye nīharitvānāti dhammarājabhāvena paṭipakkhabhūte sakalatitthiye nīharitvā nissesena haritvā nibbisevanaṃ katvā sasenakaṃ dhārañcāpi senāya saha vasavattimārampi nīharitvā . Tamandhakāraṃvidhamitvāti tamasaṅkhātaṃ mohandhakāraṃ vidhamitvā viddhaṃsetvā. Dhammanagaraṃ sattatiṃsabodhipakkhiyadhammasaṅkhātaṃ, khandhāyatanadhātupaṭiccasamuppādabalabojjhaṅgagambhīranayasamantapaṭṭhānadhammasaṅkhātaṃ vā nagaraṃ amāpayi nimmini patiṭṭhāpesīti attho.

    535. ஸீலங் பாகாரகங் தத்தா²தி தஸ்மிங் பதிட்டா²பிதே த⁴ம்மனக³ரே சதுபாரிஸுத்³தி⁴ஸீலங் பாகாரங். ஞாணங் தே த்³வாரகொட்ட²கந்தி தே துய்ஹங் ஸப்³ப³ஞ்ஞுதஞ்ஞாணஆஸயானுஸயஞாணஅனாக³தங்ஸஞாணஅதீதங்ஸஞாணாதி³கமேவ ஞாணங் த்³வாரகொட்ட²கந்தி அத்தோ². ஸத்³தா⁴ தே ஏஸிகா வீராதி, ப⁴ந்தே, அஸிதி²லபரக்கம தே துய்ஹங் தீ³பங்கரபாத³மூலதோ பபு⁴தி ஸப்³ப³ஞ்ஞுதஞ்ஞாணகாரணா ஸத்³த³ஹனஸத்³தா⁴ உஸ்ஸாபிதஅலங்காரஅலங்கதத²ம்போ⁴தி அத்தோ². த்³வாரபாலோ ச ஸங்வரோதி தே துய்ஹங் ச²த்³வாரிகஸங்வரோ ரக்கா²வரணகு³த்தி த்³வாரபாலோ த்³வாரரக்க²கோதி அத்தோ².

    535.Sīlaṃ pākārakaṃ tatthāti tasmiṃ patiṭṭhāpite dhammanagare catupārisuddhisīlaṃ pākāraṃ. Ñāṇaṃ te dvārakoṭṭhakanti te tuyhaṃ sabbaññutaññāṇaāsayānusayañāṇaanāgataṃsañāṇaatītaṃsañāṇādikameva ñāṇaṃ dvārakoṭṭhakanti attho. Saddhā te esikā vīrāti, bhante, asithilaparakkama te tuyhaṃ dīpaṅkarapādamūlato pabhuti sabbaññutaññāṇakāraṇā saddahanasaddhā ussāpitaalaṅkāraalaṅkatathambhoti attho. Dvārapālo ca saṃvaroti te tuyhaṃ chadvārikasaṃvaro rakkhāvaraṇagutti dvārapālo dvārarakkhakoti attho.

    536. ஸதிபட்டா²னமட்டாலந்தி தே துய்ஹங் சதுஸதிபட்டா²னஅட்டாலமுண்ட³ச்ச²த³னங். பஞ்ஞா தே சச்சரங் முனேதி, ப⁴ந்தே, முனே ஞாணவந்த தே துய்ஹங் பாடிஹாரியாதி³அனேகவிதா⁴ பஞ்ஞா சச்சரங் மக்³க³ஸமோதா⁴னங் நக³ரவீதீ²தி அத்தோ². இத்³தி⁴பாத³ஞ்ச ஸிங்கா⁴டந்தி துய்ஹங் ச²ந்த³வீரியசித்தவீமங்ஸஸங்கா²தா சத்தாரோ இத்³தி⁴பாதா³ ஸிங்கா⁴டங் சதுமக்³க³ஸந்தி. த⁴ம்மவீதி² ஸுமாபிதந்தி ஸத்ததிங்ஸபோ³தி⁴பக்கி²யத⁴ம்மஸங்கா²தாய வீதி²யா ஸுட்டு² மாபிதங் ஸஜ்ஜிதங், தங் த⁴ம்மனக³ரந்தி அத்தோ².

    536.Satipaṭṭhānamaṭṭālanti te tuyhaṃ catusatipaṭṭhānaaṭṭālamuṇḍacchadanaṃ. Paññā te caccaraṃ muneti, bhante, mune ñāṇavanta te tuyhaṃ pāṭihāriyādianekavidhā paññā caccaraṃ maggasamodhānaṃ nagaravīthīti attho. Iddhipādañca siṅghāṭanti tuyhaṃ chandavīriyacittavīmaṃsasaṅkhātā cattāro iddhipādā siṅghāṭaṃ catumaggasanti. Dhammavīthi sumāpitanti sattatiṃsabodhipakkhiyadhammasaṅkhātāya vīthiyā suṭṭhu māpitaṃ sajjitaṃ, taṃ dhammanagaranti attho.

    537. ஸுத்தந்தங் அபி⁴த⁴ம்மஞ்சாதி தவ துய்ஹங் எத்த² த⁴ம்மனக³ரே ஸுத்தந்தங் அபி⁴த⁴ம்மங் வினயஞ்ச கேவலங் ஸகலங் ஸுத்தகெ³ய்யாதி³கங் நவங்க³ங் பு³த்³த⁴வசனங் த⁴ம்மஸபா⁴ த⁴ம்மாதி⁴கரணஸாலாதி அத்தோ².

    537.Suttantaṃ abhidhammañcāti tava tuyhaṃ ettha dhammanagare suttantaṃ abhidhammaṃ vinayañca kevalaṃ sakalaṃ suttageyyādikaṃ navaṅgaṃ buddhavacanaṃ dhammasabhā dhammādhikaraṇasālāti attho.

    538. ஸுஞ்ஞதங் அனிமித்தஞ்சாதி அனத்தானுபஸ்ஸனாவஸேன படிலத்³த⁴ங் ஸுஞ்ஞதவிஹாரஞ்ச, அனிச்சானுபஸ்ஸனாவஸேன படிலத்³த⁴ங் அனிமித்தவிஹாரஞ்ச. விஹாரஞ்சப்பணிஹிதந்தி து³க்கா²னுபஸ்ஸனாவஸேன படிலத்³த⁴ங் அப்பணிஹிதவிஹாரஞ்ச. ஆனேஞ்ஜஞ்சாதி அசலங் அப²ந்தி³தங் சதுஸாமஞ்ஞப²லஸங்கா²தங் ஆனேஞ்ஜவிஹாரஞ்ச. நிரோதோ⁴ சாதி ஸப்³ப³து³க்க²னிரோத⁴ங் நிப்³பா³னஞ்ச. ஏஸா த⁴ம்மகுடீ தவாதி ஏஸா ஸப்³ப³னவலோகுத்தரத⁴ம்மஸங்கா²தா தவ துய்ஹங் த⁴ம்மகுடி வஸனகே³ஹந்தி அத்தோ².

    538.Suññataṃ animittañcāti anattānupassanāvasena paṭiladdhaṃ suññatavihārañca, aniccānupassanāvasena paṭiladdhaṃ animittavihārañca. Vihārañcappaṇihitanti dukkhānupassanāvasena paṭiladdhaṃ appaṇihitavihārañca. Āneñjañcāti acalaṃ aphanditaṃ catusāmaññaphalasaṅkhātaṃ āneñjavihārañca. Nirodho cāti sabbadukkhanirodhaṃ nibbānañca. Esā dhammakuṭī tavāti esā sabbanavalokuttaradhammasaṅkhātā tava tuyhaṃ dhammakuṭi vasanagehanti attho.

    539. பஞ்ஞாய அக்³கோ³ நிக்கி²த்தோதி பஞ்ஞாவஸேன பஞ்ஞவந்தானங் அக்³கோ³. இதி ப⁴க³வதா நிக்கி²த்தோ ட²பிதோ தே²ரோ படிபா⁴னே ச பஞ்ஞாய கத்தப்³பே³ கிச்சே, யுத்தமுத்தபடிபா⁴னே வா கோவிதோ³ சே²கோ நாமேன ஸாரிபுத்தோதி பாகடோ தவ துய்ஹங் த⁴ம்மஸேனாபதி தயா தே³ஸிதஸ்ஸ பிடகத்தயத⁴ம்மஸமூஹஸ்ஸ தா⁴ரணதோ பதி பதா⁴னோ ஹுத்வா ஸேனாகிச்சங் கரோதீதி அத்தோ².

    539.Paññāyaaggo nikkhittoti paññāvasena paññavantānaṃ aggo. Iti bhagavatā nikkhitto ṭhapito thero paṭibhāne ca paññāya kattabbe kicce, yuttamuttapaṭibhāne vā kovido cheko nāmena sāriputtoti pākaṭo tava tuyhaṃ dhammasenāpati tayā desitassa piṭakattayadhammasamūhassa dhāraṇato pati padhāno hutvā senākiccaṃ karotīti attho.

    540. சுதூபபாதகுஸலோதி ப⁴ந்தே முனி, சுதூபபாதே சுதியா உபபத்தியா ச குஸலோ சே²கோ. இத்³தி⁴யா பாரமிங் க³தோதி ‘‘ஏகோபி ஹுத்வா ப³ஹுதா⁴ ஹோதி, ப³ஹுதா⁴பி ஹுத்வா ஏகோ ஹோதீ’’திஆதி³னா (தீ³॰ நி॰ 1.238; படி॰ ம॰ 1.102) வுத்தாய இத்³தி⁴ப்பபே⁴தா³ய பாரமிங் பரியோஸானங் க³தோ பத்தோ நாமேன கோலிதோ நாம மொக்³க³ல்லானத்தே²ரோ போரோஹிச்சோ தவ துய்ஹங் புரோஹிதோதி ஸம்ப³ந்தோ⁴.

    540.Cutūpapātakusaloti bhante muni, cutūpapāte cutiyā upapattiyā ca kusalo cheko. Iddhiyā pāramiṃ gatoti ‘‘ekopi hutvā bahudhā hoti, bahudhāpi hutvā eko hotī’’tiādinā (dī. ni. 1.238; paṭi. ma. 1.102) vuttāya iddhippabhedāya pāramiṃ pariyosānaṃ gato patto nāmena kolito nāma moggallānatthero porohicco tava tuyhaṃ purohitoti sambandho.

    541. போராணகவங்ஸத⁴ரோதி ப⁴ந்தே முனே, ஞாணவந்தங் போராணஸ்ஸ வங்ஸஸ்ஸ தா⁴ரகோ, பரம்பரஜானநகோ வா உக்³க³தேஜோ பாகடதேஜோ, து³ராஸதோ³ ஆஸாதே³துங் க⁴ட்டேதுங் து³க்கோ² அஸக்குணெய்யோதி அத்தோ². து⁴தவாதி³கு³ணேனக்³கோ³தி தேசீவரிகங்கா³தீ³னி தேரஸ து⁴தங்கா³னி வத³தி ஓவத³தீதி து⁴தவாதீ³கு³ணேன து⁴தங்க³கு³ணேன அக்³கோ³ ஸெட்டோ² மஹாகஸ்ஸபத்தே²ரோ தவ துய்ஹங் அக்க²த³ஸ்ஸோ வோஹாரகரணே பதா⁴னோதி அத்தோ².

    541.Porāṇakavaṃsadharoti bhante mune, ñāṇavantaṃ porāṇassa vaṃsassa dhārako, paramparajānanako vā uggatejo pākaṭatejo, durāsado āsādetuṃ ghaṭṭetuṃ dukkho asakkuṇeyyoti attho. Dhutavādiguṇenaggoti tecīvarikaṅgādīni terasa dhutaṅgāni vadati ovadatīti dhutavādīguṇena dhutaṅgaguṇena aggo seṭṭho mahākassapatthero tava tuyhaṃ akkhadasso vohārakaraṇe padhānoti attho.

    542. ப³ஹுஸ்ஸுதோ த⁴ம்மத⁴ரோதி ப⁴ந்தே முனே, ப³ஹூனங் சதுராஸீதித⁴ம்மக்க²ந்த⁴ஸஹஸ்ஸானங் ஸுதத்தா ப⁴க³வதா பி⁴க்கு²ஸங்க⁴தோ ச உக்³க³ஹிதத்தா ப³ஹுஸ்ஸுதோ அனேகேஸங் ச²ஸதஸஹஸ்ஸஸங்க்²யானங் ஆக³மத⁴ம்மானங் ஸதிபட்டா²னாதீ³னஞ்ச பரமத்த²த⁴ம்மானங் தா⁴ரணதோ த⁴ம்மத⁴ரோ ஆனந்தோ³. ஸப்³ப³பாடீ² ச ஸாஸனேதி பு³த்³த⁴ஸாஸனே ஸப்³பே³ஸங் பாடீ²னங் பட²ந்தானங் ஸஜ்ஜா²யந்தானங் பி⁴க்கூ²னங் அக்³கோ³ ஸெட்டோ²தி ஸப்³ப³பாடீ² நாமேன ஆனந்தோ³ நாம தே²ரோ. த⁴ம்மாரக்கோ² தவாதி தவ துய்ஹங் த⁴ம்மஸ்ஸ பிடகத்தயத⁴ம்மப⁴ண்ட³ஸ்ஸ ஆரக்கோ² ரக்க²கோ பாலகோ, த⁴ம்மப⁴ண்டா³கா³ரிகோதி அத்தோ².

    542.Bahussuto dhammadharoti bhante mune, bahūnaṃ caturāsītidhammakkhandhasahassānaṃ sutattā bhagavatā bhikkhusaṅghato ca uggahitattā bahussuto anekesaṃ chasatasahassasaṅkhyānaṃ āgamadhammānaṃ satipaṭṭhānādīnañca paramatthadhammānaṃ dhāraṇato dhammadharo ānando. Sabbapāṭhī ca sāsaneti buddhasāsane sabbesaṃ pāṭhīnaṃ paṭhantānaṃ sajjhāyantānaṃ bhikkhūnaṃ aggo seṭṭhoti sabbapāṭhī nāmena ānando nāma thero. Dhammārakkho tavāti tava tuyhaṃ dhammassa piṭakattayadhammabhaṇḍassa ārakkho rakkhako pālako, dhammabhaṇḍāgārikoti attho.

    543. ஏதே ஸப்³பே³ அதிக்கம்மாதி ப⁴க³வா ப⁴க்³யவா ஸம்மாஸம்பு³த்³தோ⁴ ஏதே ஸாரிபுத்தாத³யோ மஹானுபா⁴வேபி தே²ரே அதிக்கம்ம வஜ்ஜெத்வா மமங்யேவ பமேஸி பமாணங் அகாஸி, மனஸி அகாஸீதி அத்தோ². வினிச்ச²யங் மே பாதா³ஸீதி வினயஞ்ஞூஹி பண்டி³தேஹி தே³ஸிதங் பகாஸிதங் வினயே வினிச்ச²யங் தோ³ஸவிசாரணங் மே மய்ஹங் ப⁴க³வா பாதா³ஸி பகாரேன அதா³ஸி, மய்ஹமேவ பா⁴ரங் அகாஸீதி ஸம்ப³ந்தோ⁴.

    543.Etesabbe atikkammāti bhagavā bhagyavā sammāsambuddho ete sāriputtādayo mahānubhāvepi there atikkamma vajjetvā mamaṃyeva pamesi pamāṇaṃ akāsi, manasi akāsīti attho. Vinicchayaṃ me pādāsīti vinayaññūhi paṇḍitehi desitaṃ pakāsitaṃ vinaye vinicchayaṃ dosavicāraṇaṃ me mayhaṃ bhagavā pādāsi pakārena adāsi, mayhameva bhāraṃ akāsīti sambandho.

    544. யோ கோசி வினயே பஞ்ஹந்தி யோ கோசி பி⁴க்கு² பு³த்³த⁴ஸாவகோ வினயனிஸ்ஸிதங் பஞ்ஹங் மங் புச்ச²தி, தத்த² தஸ்மிங் புச்சி²தபஞ்ஹே மே மய்ஹங் சிந்தனா விமதி கங்கா² நத்தி². தஞ்ஹேவத்த²ங் தங் ஏவ புச்சி²தங் அத்த²ங் அஹங் கதே²மீதி ஸம்ப³ந்தோ⁴.

    544.Yo koci vinaye pañhanti yo koci bhikkhu buddhasāvako vinayanissitaṃ pañhaṃ maṃ pucchati, tattha tasmiṃ pucchitapañhe me mayhaṃ cintanā vimati kaṅkhā natthi. Tañhevatthaṃ taṃ eva pucchitaṃ atthaṃ ahaṃ kathemīti sambandho.

    545. யாவதா பு³த்³த⁴கெ²த்தம்ஹீதி யாவதா யத்தகே டா²னே பு³த்³த⁴ஸ்ஸ ஆணாகெ²த்தே தங் மஹாமுனிங் ஸம்மாஸம்பு³த்³த⁴ங் ட²பெத்வா வினயே வினயபிடகே வினயவினிச்ச²யகரணே வா மாதி³ஸோ மயா ஸதி³ஸோ நத்தி², அஹமேவ அக்³கோ³, பி⁴ய்யோ மமாதி⁴கோ குதோ ப⁴விஸ்ஸதீதி ஸம்ப³ந்தோ⁴.

    545.Yāvatā buddhakhettamhīti yāvatā yattake ṭhāne buddhassa āṇākhette taṃ mahāmuniṃ sammāsambuddhaṃ ṭhapetvā vinaye vinayapiṭake vinayavinicchayakaraṇe vā mādiso mayā sadiso natthi, ahameva aggo, bhiyyo mamādhiko kuto bhavissatīti sambandho.

    546. பி⁴க்கு²ஸங்கே⁴ நிஸீதி³த்வா பி⁴க்கு²ஸங்க⁴மஜ்ஜே² நிஸின்னோ கோ³தமோ ப⁴க³வா ஏவங் க³ஜ்ஜதி ஸீஹனாத³ங் கரோதி. கத²ங்? வினயே உப⁴தோவிப⁴ங்கே³, க²ந்த⁴கேஸு மஹாவக்³க³சூளவக்³கே³ஸு, ச-ஸத்³தே³ன பரிவாரே, உபாலிஸ்ஸ உபாலினா ஸமோ ஸதி³ஸோ நத்தீ²தி ஏவங் க³ஜ்ஜதி.

    546.Bhikkhusaṅghe nisīditvā bhikkhusaṅghamajjhe nisinno gotamo bhagavā evaṃ gajjati sīhanādaṃ karoti. Kathaṃ? Vinaye ubhatovibhaṅge, khandhakesu mahāvaggacūḷavaggesu, ca-saddena parivāre, upālissa upālinā samo sadiso natthīti evaṃ gajjati.

    547. யாவதாதி யத்தகங் பு³த்³த⁴ப⁴ணிதங் பு³த்³தே⁴ன தே³ஸிதங் நவங்க³ங் ஸுத்தகெ³ய்யாதி³ஸத்து²ஸாஸனங் ஸத்து²னா பகாஸிதங் ஸப்³ப³ங் வினயோக³த⁴ங் தங் வினயே அந்தோபவிட்ட²ங் வினயமூலகங் இச்சேவங் பஸ்ஸினோ பஸ்ஸந்தஸ்ஸ.

    547.Yāvatāti yattakaṃ buddhabhaṇitaṃ buddhena desitaṃ navaṅgaṃ suttageyyādisatthusāsanaṃ satthunā pakāsitaṃ sabbaṃ vinayogadhaṃ taṃ vinaye antopaviṭṭhaṃ vinayamūlakaṃ iccevaṃ passino passantassa.

    548. மம கம்மங் ஸரித்வானாதி கோ³தமோ ஸக்யபுங்க³வோ ஸக்யவங்ஸப்பதா⁴னோ, மம கம்மங் மய்ஹங் புப்³ப³பத்த²னாகம்மங் அதீதங்ஸஞாணேன ஸரித்வான பச்சக்க²தோ ஞத்வா பி⁴க்கு²ஸங்க⁴மஜ்ஜே² க³தோ ‘‘ஏதத³க்³க³ங், பி⁴க்க²வே, மம ஸாவகானங் பி⁴க்கூ²னங் வினயத⁴ரானங் யதி³த³ங் உபாலீ’’தி (அ॰ நி॰ 1.219, 228) மங் ஏதத³க்³கே³ டா²னே ட²பேஸீதி ஸம்ப³ந்தோ⁴.

    548.Mama kammaṃ saritvānāti gotamo sakyapuṅgavo sakyavaṃsappadhāno, mama kammaṃ mayhaṃ pubbapatthanākammaṃ atītaṃsañāṇena saritvāna paccakkhato ñatvā bhikkhusaṅghamajjhe gato ‘‘etadaggaṃ, bhikkhave, mama sāvakānaṃ bhikkhūnaṃ vinayadharānaṃ yadidaṃ upālī’’ti (a. ni. 1.219, 228) maṃ etadagge ṭhāne ṭhapesīti sambandho.

    549. ஸதஸஹஸ்ஸுபாதா³யாதி ஸதஸஹஸ்ஸகப்பே ஆதி³ங் கத்வா யங் இமங் டா²னங் அபத்த²யிங் பத்தே²ஸிங், ஸோ மே அத்தோ² மயா அனுப்பத்தோ அதி⁴க³தோ படிலத்³தோ⁴ வினயே பாரமிங் க³தோ கோடிங் பத்தோதி அத்தோ².

    549.Satasahassupādāyāti satasahassakappe ādiṃ katvā yaṃ imaṃ ṭhānaṃ apatthayiṃ patthesiṃ, so me attho mayā anuppatto adhigato paṭiladdho vinaye pāramiṃ gato koṭiṃ pattoti attho.

    550. ஸக்யானங் ஸக்யவங்ஸராஜூனங் நந்தி³ஜனநோ ஸோமனஸ்ஸகாரகோ அஹங் புரே புப்³பே³ கப்பகோ ஆஸிங் அஹோஸிங், தங் ஜாதிங் தங் குலங் தங் யோனிங் விஜஹித்வா விஸேஸேன ஜஹித்வா ச²ட்³டெ³த்வா மஹேஸினோ ஸம்மாஸம்பு³த்³த⁴ஸ்ஸ புத்தோ ஜாதோ ஸக்யபுத்தோதி ஸங்க்²யங் க³தோ ஸாஸனதா⁴ரணதோதி அத்தோ².

    550.Sakyānaṃ sakyavaṃsarājūnaṃ nandijanano somanassakārako ahaṃ pure pubbe kappako āsiṃ ahosiṃ, taṃ jātiṃ taṃ kulaṃ taṃ yoniṃ vijahitvā visesena jahitvā chaḍḍetvā mahesino sammāsambuddhassa putto jāto sakyaputtoti saṅkhyaṃ gato sāsanadhāraṇatoti attho.

    551. ததோ பரங் அத்தனோ தா³ஸகுலே நிப்³ப³த்தனாபதா³னங் த³ஸ்ஸெந்தோ இதோ து³தியகே கப்பேதிஆதி³மாஹ. தத்த² இதோ ப⁴த்³த³கப்பதோ ஹெட்டா² து³தியே கப்பே நாமேன அஞ்ஜஸோ நாம க²த்தியோ ஏகோ ராஜா அனந்ததேஜோ ஸங்க்²யாதிக்கந்ததேஜோ அமிதயஸோ பமாணாதிக்கந்தபரிவாரோ மஹத்³த⁴னோ அனேககோடிஸதஸஹஸ்ஸத⁴னவா பூ⁴மிபாலோ பத²வீபாலகோ ரக்க²கோ அஹோஸீதி ஸம்ப³ந்தோ⁴.

    551. Tato paraṃ attano dāsakule nibbattanāpadānaṃ dassento ito dutiyake kappetiādimāha. Tattha ito bhaddakappato heṭṭhā dutiye kappe nāmena añjaso nāma khattiyo eko rājā anantatejo saṅkhyātikkantatejo amitayaso pamāṇātikkantaparivāro mahaddhano anekakoṭisatasahassadhanavā bhūmipālo pathavīpālako rakkhako ahosīti sambandho.

    552. தஸ்ஸ ரஞ்ஞோதி தஸ்ஸ தாதி³ஸஸ்ஸ ராஜினோ புத்தோ அஹங் சந்த³னோ நாம க²த்தியோ க²த்தியகுமாரோ அஹோஸிந்தி ஸம்ப³ந்தோ⁴. ஸோ அஹங் ஜாதிமதே³ன ச யஸமதே³ன ச போ⁴க³மதே³ன ச உபத்த²த்³தோ⁴ த²ம்பி⁴தோ உன்னதோதி அத்தோ².

    552.Tassa raññoti tassa tādisassa rājino putto ahaṃ candano nāma khattiyo khattiyakumāro ahosinti sambandho. So ahaṃ jātimadena ca yasamadena ca bhogamadena ca upatthaddho thambhito unnatoti attho.

    553. நாக³ஸதஸஹஸ்ஸானீதி ஸதஸஹஸ்ஸஹத்தி²னோ மாதங்கா³ மாதங்க³குலே ஜாதா திதா⁴ பபி⁴ன்னா அக்கி²கண்ணகோஸஸங்கா²தேஹி தீஹி டா²னேஹி பபி⁴ன்னா மத³க³ளிதா ஸப்³பா³லங்காரபூ⁴ஸிதா ஸப்³பே³ஹி ஹத்தா²லங்காரேஹி அலங்கதா ஸதா³ ஸப்³ப³காலங் மங் பரிவாரெந்தீதி ஸம்ப³ந்தோ⁴.

    553.Nāgasatasahassānīti satasahassahatthino mātaṅgā mātaṅgakule jātā tidhā pabhinnā akkhikaṇṇakosasaṅkhātehi tīhi ṭhānehi pabhinnā madagaḷitā sabbālaṅkārabhūsitā sabbehi hatthālaṅkārehi alaṅkatā sadā sabbakālaṃ maṃ parivārentīti sambandho.

    554. ஸப³லேஹி பரேதோஹந்தி ததா³ தஸ்மிங் காலே அஹங் ஸப³லேஹி அத்தனோ ஸேனாப³லேஹி பரேதோ பரிவாரிதோ உய்யானங் க³ந்துகாமகோ இச்ச²ந்தோ ஸிரிகங் நாம நாக³ங் ஹத்தி²ங் ஆருய்ஹ அபி⁴ருஹித்வா நக³ரதோ நிக்க²மிந்தி ஸம்ப³ந்தோ⁴.

    554.Sabalehi paretohanti tadā tasmiṃ kāle ahaṃ sabalehi attano senābalehi pareto parivārito uyyānaṃ gantukāmako icchanto sirikaṃ nāma nāgaṃ hatthiṃ āruyha abhiruhitvā nagarato nikkhaminti sambandho.

    555. சரணேன ச ஸம்பன்னோதி ஸீலஸங்வராதி³பன்னரஸசரணத⁴ம்மேன ஸமன்னாக³தோ கு³த்தத்³வாரோ பிஹிதசக்கா²தி³ச²த்³வாரோ ஸுஸங்வுதோ ஸுட்டு² ரக்கி²தகாயசித்தோ தே³வலோ நாம ஸம்பு³த்³தோ⁴ பச்சேகஸம்பு³த்³தோ⁴, மம மய்ஹங் புரதோ ஸம்முகே² ஆக³ச்சி² பாபுணீதி அத்தோ².

    555.Caraṇena ca sampannoti sīlasaṃvarādipannarasacaraṇadhammena samannāgato guttadvāro pihitacakkhādichadvāro susaṃvuto suṭṭhu rakkhitakāyacitto devalo nāma sambuddho paccekasambuddho, mama mayhaṃ purato sammukhe āgacchi pāpuṇīti attho.

    556. பேஸெத்வா ஸிரிகங் நாக³ந்தி தங் ஆக³தங் பச்சேகபு³த்³த⁴ங் தி³ஸ்வா அஹங் ஸிரிகங் நாம நாக³ங் அபி⁴முக²ங் பேஸெத்வா பு³த்³த⁴ங் ஆஸாத³யிங் க⁴ட்டேஸிங் பது³ஸ்ஸேஸிந்தி அத்தோ². ததோ ஸஞ்ஜாதகோபோ ஸோதி ததோ தஸ்மா மயா அதீவ பீளெத்வா பேஸிதத்தா ஸோ ஹத்தி²னாகோ³ மயி ஸஞ்ஜாதகோபோ பத³ங் அத்தனோ பாத³ங் நுத்³த⁴ரதே ந உத்³த⁴ரதி, நிச்சலோவ ஹோதீதி அத்தோ².

    556.Pesetvāsirikaṃ nāganti taṃ āgataṃ paccekabuddhaṃ disvā ahaṃ sirikaṃ nāma nāgaṃ abhimukhaṃ pesetvā buddhaṃ āsādayiṃ ghaṭṭesiṃ padussesinti attho. Tato sañjātakopo soti tato tasmā mayā atīva pīḷetvā pesitattā so hatthināgo mayi sañjātakopo padaṃ attano pādaṃ nuddharate na uddharati, niccalova hotīti attho.

    557. நாக³ங் து³ட்ட²மனங் தி³ஸ்வாதி து³ட்ட²மனங் குத்³த⁴சித்தங் நாத³ங் தி³ஸ்வா அஹங் பு³த்³தே⁴ பச்சேகபு³த்³தே⁴ கோபங் அகாஸிங் தோ³ஸங் உப்பாதே³ஸிந்தி அத்தோ². விஹேஸயித்வா ஸம்பு³த்³த⁴ந்தி தே³வலங் பச்சேகஸம்பு³த்³த⁴ங் விஹேஸயித்வா விஹேடெ²த்வா அஹங் உய்யானங் அக³மாஸிந்தி ஸம்ப³ந்தோ⁴.

    557.Nāgaṃ duṭṭhamanaṃ disvāti duṭṭhamanaṃ kuddhacittaṃ nādaṃ disvā ahaṃ buddhe paccekabuddhe kopaṃ akāsiṃ dosaṃ uppādesinti attho. Vihesayitvā sambuddhanti devalaṃ paccekasambuddhaṃ vihesayitvā viheṭhetvā ahaṃ uyyānaṃ agamāsinti sambandho.

    558. ஸாதங் தத்த² ந விந்தா³மீதி தஸ்மிங் ஆஸாத³னே ஸாதங் ந விந்தா³மி. ஆஸாத³னநிமித்தங் மது⁴ரங் ஸுக²ங் ந லபா⁴மீதி அத்தோ². ஸிரோ பஜ்ஜலிதோ யதா²தி ஸிரோ மம ஸீஸங் பஜ்ஜலிதோ யதா² பஜ்ஜலமானங் விய ஹோதீதி அத்தோ². பரிளாஹேன ட³ய்ஹாமீதி பச்சேகபு³த்³தே⁴ கோபஸ்ஸ கதத்தா பச்சா²னுதாபபரிளாஹேன ட³ய்ஹாமி உண்ஹசித்தோ ஹோமீதி அத்தோ².

    558.Sātaṃ tattha na vindāmīti tasmiṃ āsādane sātaṃ na vindāmi. Āsādananimittaṃ madhuraṃ sukhaṃ na labhāmīti attho. Siro pajjalito yathāti siro mama sīsaṃ pajjalito yathā pajjalamānaṃ viya hotīti attho. Pariḷāhena ḍayhāmīti paccekabuddhe kopassa katattā pacchānutāpapariḷāhena ḍayhāmi uṇhacitto homīti attho.

    559. ஸஸாக³ரந்தாதி தேனேவ பாபகம்மப³லேன ஸஸாக³ரந்தா ஸாக³ரபரியோஸானா ஸகலமஹாபத²வீ மே மய்ஹங் ஆதி³த்தா விய ஜலிதா விய ஹோதி கா²யதீதி அத்தோ². பிது ஸந்திகுபாக³ம்மாதி ஏவங் ப⁴யே உப்பன்னே அஹங் அத்தனோ பிது ரஞ்ஞோ ஸந்திகங் உபாக³ம்ம உபக³ந்த்வா இத³ங் வசனங் அப்³ரவிங் கதே²ஸிந்தி அத்தோ².

    559.Sasāgarantāti teneva pāpakammabalena sasāgarantā sāgarapariyosānā sakalamahāpathavī me mayhaṃ ādittā viya jalitā viya hoti khāyatīti attho. Pitu santikupāgammāti evaṃ bhaye uppanne ahaṃ attano pitu rañño santikaṃ upāgamma upagantvā idaṃ vacanaṃ abraviṃ kathesinti attho.

    560. ஆஸீவிஸங்வ குபிதந்தி ஆஸீவிஸங் ஸப்³ப³ங் குபிதங் குத்³த⁴ங் இவ ஜலமானங் அக்³கி³க்க²ந்த⁴ங் இவ மத்தங் திதா⁴ பபி⁴ன்னங் த³ந்திங் த³ந்தவந்தங் குஞ்ஜரங் உத்தமங் ஹத்தி²ங் இவ ச ஆக³தங் யங் பச்சேகபு³த்³த⁴ங் ஸயம்பு⁴ங் ஸயமேவ பு³த்³த⁴பூ⁴தங் அஹங் ஆஸாத³யிங் க⁴ட்டேஸிந்தி ஸம்ப³ந்தோ⁴.

    560.Āsīvisaṃvakupitanti āsīvisaṃ sabbaṃ kupitaṃ kuddhaṃ iva jalamānaṃ aggikkhandhaṃ iva mattaṃ tidhā pabhinnaṃ dantiṃ dantavantaṃ kuñjaraṃ uttamaṃ hatthiṃ iva ca āgataṃ yaṃ paccekabuddhaṃ sayambhuṃ sayameva buddhabhūtaṃ ahaṃ āsādayiṃ ghaṭṭesinti sambandho.

    561. ஆஸாதி³தோ மயா பு³த்³தோ⁴தி ஸோ பச்சேகபு³த்³தோ⁴ மயா ஆஸாதி³தோ க⁴ட்டிதோ கோ⁴ரோ அஞ்ஞேஹி க⁴ட்டேதுங் அஸக்குணெய்யத்தா கோ⁴ரோ, உக்³க³தபோ பாகடதபோ ஜினோ பஞ்ச மாரே ஜிதவா ஏவங்கு³ணஸம்பன்னோ பச்சேகபு³த்³தோ⁴ மயா க⁴ட்டிதோதி அத்தோ². புரா ஸப்³பே³ வினஸ்ஸாமாதி தஸ்மிங் பச்சேகபு³த்³தே⁴ கதஅனாத³ரேன ஸப்³பே³ மயங் வினஸ்ஸாம விவிதே⁴னாகாரேன நஸ்ஸாம, ப⁴ஸ்மா விய ப⁴வாமாதி அத்தோ². க²மாபெஸ்ஸாம தங் முனிந்தி தங் பச்சேகபு³த்³த⁴ங் முனிங் யாவ ந வினஸ்ஸாம, தாவ க²மாபெஸ்ஸாமாதி ஸம்ப³ந்தோ⁴.

    561.Āsādito mayā buddhoti so paccekabuddho mayā āsādito ghaṭṭito ghoro aññehi ghaṭṭetuṃ asakkuṇeyyattā ghoro, uggatapo pākaṭatapo jino pañca māre jitavā evaṃguṇasampanno paccekabuddho mayā ghaṭṭitoti attho. Purā sabbe vinassāmāti tasmiṃ paccekabuddhe kataanādarena sabbe mayaṃ vinassāma vividhenākārena nassāma, bhasmā viya bhavāmāti attho. Khamāpessāma taṃ muninti taṃ paccekabuddhaṃ muniṃ yāva na vinassāma, tāva khamāpessāmāti sambandho.

    562. நோ சே தங் நிஜ்ஜா²பெஸ்ஸாமாதி அத்தத³ந்தங் த³மிதசித்தங் ஸமாஹிதங் ஏகக்³க³சித்தங் தங் பச்சேகபு³த்³த⁴ங் நோ சே நிஜ்ஜா²பெஸ்ஸாம க²மாபெஸ்ஸாம. ஓரேன ஸத்ததி³வஸா ஸத்ததி³வஸதோ ஓரபா⁴கே³ ஸத்ததி³வஸே அனதிக்கமித்வா ஸம்புண்ணங் ரட்ட²ங் மே ஸப்³ப³ங் வித⁴மிஸ்ஸதி வினஸ்ஸிஸ்ஸதி.

    562.No ce taṃ nijjhāpessāmāti attadantaṃ damitacittaṃ samāhitaṃ ekaggacittaṃ taṃ paccekabuddhaṃ no ce nijjhāpessāma khamāpessāma. Orena sattadivasā sattadivasato orabhāge sattadivase anatikkamitvā sampuṇṇaṃ raṭṭhaṃ me sabbaṃ vidhamissati vinassissati.

    563. ஸுமேக²லோ கோஸியோ சாதி ஏதே ஸுமேக²லாத³யோ சத்தாரோ ராஜானோ இஸயோ ஆஸாத³யித்வா க⁴ட்டெத்வா அனாத³ரங் கத்வா ஸரட்ட²கா ஸஹ ரட்ட²ஜனபத³வாஸீஹி து³க்³க³தா வினாஸங் க³தாதி அத்தோ².

    563.Sumekhalo kosiyo cāti ete sumekhalādayo cattāro rājāno isayo āsādayitvā ghaṭṭetvā anādaraṃ katvā saraṭṭhakā saha raṭṭhajanapadavāsīhi duggatā vināsaṃ gatāti attho.

    564. யதா³ குப்பந்தி இஸயோதி யதா³ யஸ்மிங் காலே ஸஞ்ஞதா காயஸஞ்ஞமாதீ³ஹி ஸஞ்ஞதா ஸந்தா ப்³ரஹ்மசாரினோ உத்தமசாரினோ ஸெட்ட²சாரினோ இஸயோ குப்பந்தி தோ³மனஸ்ஸா ப⁴வந்தி, ததா³ ஸஸாக³ரங் ஸபப்³ப³தங் ஸதே³வகங் லோகங் வினாஸெந்தீதி ஸம்ப³ந்தோ⁴.

    564.Yadākuppanti isayoti yadā yasmiṃ kāle saññatā kāyasaññamādīhi saññatā santā brahmacārino uttamacārino seṭṭhacārino isayo kuppanti domanassā bhavanti, tadā sasāgaraṃ sapabbataṃ sadevakaṃ lokaṃ vināsentīti sambandho.

    565. தியோஜனஸஹஸ்ஸம்ஹீதி தேஸங் இஸீனங் ஆனுபா⁴வங் ஞத்வா தே க²மாபேதுங் அச்சயங் அபராத⁴ங் தே³ஸனத்தா²ய பகாஸனத்தா²ய தியோஜனஸஹஸ்ஸப்பமாணே பதே³ஸே புரிஸே ஸன்னிபாதயிந்தி ஸம்ப³ந்தோ⁴. ஸயம்பு⁴ங் உபஸங்கமிந்தி ஸயம்பு⁴ங் பச்சேகபு³த்³த⁴ங் உபஸங்கமிங் ஸமீபங் அக³மாஸிந்தி அத்தோ².

    565.Tiyojanasahassamhīti tesaṃ isīnaṃ ānubhāvaṃ ñatvā te khamāpetuṃ accayaṃ aparādhaṃ desanatthāya pakāsanatthāya tiyojanasahassappamāṇe padese purise sannipātayinti sambandho. Sayambhuṃ upasaṅkaminti sayambhuṃ paccekabuddhaṃ upasaṅkamiṃ samīpaṃ agamāsinti attho.

    566. அல்லவத்தா²தி மயா ஸத்³தி⁴ங் ராஸிபூ⁴தா ஸப்³பே³ ஜனா அல்லவத்தா² உத³கேன திந்தவத்த²உத்தராஸங்கா³ அல்லஸிரா திந்தகேஸா பஞ்ஜலீகதா முத்³த⁴னி கதஅஞ்ஜலிபுடா பு³த்³த⁴ஸ்ஸ பச்சேகமுனினோ பாதே³ பாத³ஸமீபே நிபதித்வா நிபஜ்ஜித்வா இத³ங் வசனமப்³ரவுந்தி ‘‘க²மஸ்ஸு த்வங், மஹாவீரா’’திஆதி³கங் வசனங் அப்³ரவுங் கதே²ஸுந்தி அத்தோ².

    566.Allavatthāti mayā saddhiṃ rāsibhūtā sabbe janā allavatthā udakena tintavatthauttarāsaṅgā allasirā tintakesā pañjalīkatā muddhani kataañjalipuṭā buddhassa paccekamunino pāde pādasamīpe nipatitvā nipajjitvā idaṃ vacanamabravunti ‘‘khamassu tvaṃ, mahāvīrā’’tiādikaṃ vacanaṃ abravuṃ kathesunti attho.

    567. மஹாவீர வீருத்தம ப⁴ந்தே பச்சேகபு³த்³த⁴, மயா தும்ஹேஸு அஞ்ஞாணேன கதங் அபராத⁴ங் க²மஸ்ஸு த்வங் வினோதே³ஹி, மா மனஸி கரோஹீதி அத்தோ² . ஜனோ ஜனஸமூஹோ தங் ப⁴க³வந்தங் அபி⁴ விஸேஸேன யாசதி. பரிளாஹங் தோ³ஸமோஹேஹி கதசித்தது³க்க²பரிளாஹங் அம்ஹாகங் வினோதே³ஹி தனுங் கரோஹி, நோ அம்ஹாகங் ரட்ட²ங் ஸகலரட்ட²ஜனபத³வாஸினோ மா வினாஸய மா வினாஸேஹீதி அத்தோ².

    567.Mahāvīra vīruttama bhante paccekabuddha, mayā tumhesu aññāṇena kataṃ aparādhaṃ khamassu tvaṃ vinodehi, mā manasi karohīti attho . Jano janasamūho taṃ bhagavantaṃ abhi visesena yācati. Pariḷāhaṃ dosamohehi katacittadukkhapariḷāhaṃ amhākaṃ vinodehi tanuṃ karohi, no amhākaṃ raṭṭhaṃ sakalaraṭṭhajanapadavāsino mā vināsaya mā vināsehīti attho.

    568. ஸதே³வமானுஸா ஸப்³பே³தி ஸப்³பே³ மானுஸா ஸதே³வா ஸதா³னவா பஹாராதா³தீ³ஹி அஸுரேஹி ஸஹ ஸரக்க²ஸா அயோமயேன கூடேன மஹாமுக்³க³ரேன ஸதா³ ஸப்³ப³காலங் மே ஸிரங் மய்ஹங் மத்த²கங் பி⁴ந்தெ³ய்யுங் பதா³லெய்யுங்.

    568.Sadevamānusā sabbeti sabbe mānusā sadevā sadānavā pahārādādīhi asurehi saha sarakkhasā ayomayena kūṭena mahāmuggarena sadā sabbakālaṃ me siraṃ mayhaṃ matthakaṃ bhindeyyuṃ padāleyyuṃ.

    569. ததோ பரங் பு³த்³தா⁴னங் க²மிதபா⁴வஞ்ச கோபாபா⁴வஞ்ச பகாஸெந்தோ த³கே அக்³கி³ ந ஸண்டா²தீதிஆதி³மாஹ. தத்த² யதா² உத³கே அக்³கி³ ந ஸண்டா²தி ந பதிட்டா²தி, யதா² பீ³ஜங் ஸேலே ஸிலாமயே பப்³ப³தே ந விருஹதி, யதா² அக³தே³ ஓஸதே⁴ கிமி பாணகோ ந ஸண்டா²தி. ததா² கோபோ சித்தப்பகோபோ து³ம்மனதா பு³த்³தே⁴ படிவித்³த⁴ஸச்சே பச்சேகபு³த்³தே⁴ ந ஜாயதி ந உப்பஜ்ஜதீதி அத்தோ².

    569. Tato paraṃ buddhānaṃ khamitabhāvañca kopābhāvañca pakāsento dake aggi na saṇṭhātītiādimāha. Tattha yathā udake aggi na saṇṭhāti na patiṭṭhāti, yathā bījaṃ sele silāmaye pabbate na viruhati, yathā agade osadhe kimi pāṇako na saṇṭhāti. Tathā kopo cittappakopo dummanatā buddhe paṭividdhasacce paccekabuddhe na jāyati na uppajjatīti attho.

    570. புனபி பு³த்³தா⁴னங் ஆனுபா⁴வங் பகாஸெந்தோ யதா² ச பூ⁴மீதிஆதி³மாஹ. தத்த² யதா² ச பூ⁴மி பத²வீ அசலா நிச்சலா, ததா² பு³த்³தோ⁴ அசலோதி அத்தோ². யதா² ஸாக³ரோ மஹாஸமுத்³தோ³ அப்பமெய்யோ பமேதுங் பமாணங் க³ஹேதுங் அஸக்குணெய்யோ, ததா² பு³த்³தோ⁴ அப்பமெய்யோதி அத்தோ². யதா² ஆகாஸோ அபு²ட்டா²காஸோ அனந்தகோ பரியோஸானரஹிதோ, ஏவங் ததா² பு³த்³தோ⁴ அக்கோ²பி⁴யோ கோ²பே⁴துங் ஆலோளேதுங் அஸக்குணெய்யோதி அத்தோ².

    570. Punapi buddhānaṃ ānubhāvaṃ pakāsento yathā ca bhūmītiādimāha. Tattha yathā ca bhūmi pathavī acalā niccalā, tathā buddho acaloti attho. Yathā sāgaro mahāsamuddo appameyyo pametuṃ pamāṇaṃ gahetuṃ asakkuṇeyyo, tathā buddho appameyyoti attho. Yathā ākāso aphuṭṭhākāso anantako pariyosānarahito, evaṃ tathā buddho akkhobhiyo khobhetuṃ āloḷetuṃ asakkuṇeyyoti attho.

    571. ததோ பரங் பச்சேகபு³த்³த⁴ஸ்ஸ க²மனவசனங் த³ஸ்ஸெந்தோ ஸதா³ க²ந்தா மஹாவீராதிஆதி³மாஹ. தத்த² மஹாவீரா உத்தமவீரியவந்தா பு³த்³தா⁴ தபஸ்ஸினோ பாபானங் தபனதோ ‘‘தபோ’’தி லத்³த⁴னாமேன வீரியேன ஸமன்னாக³தா க²ந்தா ச க²ந்தியா ச ஸம்பன்னா க²மிதா ச பரேஸங் அபராத⁴ங் க²மிதா ஸஹிதா ஸதா³ ஸப்³ப³காலங் ப⁴வந்தீதி ஸம்ப³ந்தோ⁴. க²ந்தானங் க²மிதானஞ்சாதி தேஸங் பு³த்³தா⁴னங் க²ந்தானங் க²ந்தியா யுத்தானங் க²மிதானங் பராபராத⁴க²மிதானங் ஸஹிதானஞ்ச க³மனங் ச²ந்தா³தீ³ஹி அக³திக³மனங் ந விஜ்ஜதீதி அத்தோ².

    571. Tato paraṃ paccekabuddhassa khamanavacanaṃ dassento sadākhantā mahāvīrātiādimāha. Tattha mahāvīrā uttamavīriyavantā buddhā tapassino pāpānaṃ tapanato ‘‘tapo’’ti laddhanāmena vīriyena samannāgatā khantā ca khantiyā ca sampannā khamitā ca paresaṃ aparādhaṃ khamitā sahitā sadā sabbakālaṃ bhavantīti sambandho. Khantānaṃ khamitānañcāti tesaṃ buddhānaṃ khantānaṃ khantiyā yuttānaṃ khamitānaṃ parāparādhakhamitānaṃ sahitānañca gamanaṃ chandādīhi agatigamanaṃ na vijjatīti attho.

    572. இதி இத³ங் வசனங் வத்வா ஸம்பு³த்³தோ⁴ பச்சேகஸம்பு³த்³தோ⁴ பரிளாஹங் ஸத்தானங் உப்பன்னதா³ஹங் வினோத³யங் வினோத³யந்தோ மஹாஜனஸ்ஸ புரதோ ஸன்னிபதிதஸ்ஸ ஸராஜகஸ்ஸ மஹதோ ஜனகாயஸ்ஸ ஸம்முக²தோ ததா³ தஸ்மிங் காலே நப⁴ங் ஆகாஸங் அப்³பு⁴க்³க³மி உக்³க³ஞ்சீ²தி அத்தோ².

    572. Iti idaṃ vacanaṃ vatvā sambuddho paccekasambuddho pariḷāhaṃ sattānaṃ uppannadāhaṃ vinodayaṃ vinodayanto mahājanassa purato sannipatitassa sarājakassa mahato janakāyassa sammukhato tadā tasmiṃ kāle nabhaṃ ākāsaṃ abbhuggami uggañchīti attho.

    573. தேன கம்மேனஹங் தீ⁴ராதி தீ⁴ர தி⁴திஸம்பன்ன அஹங் தேன கம்மேன பச்சேகபு³த்³தே⁴ கதேன அனாத³ரகம்மேன இமஸ்மிங் பச்சி²மத்தப⁴வே ஹீனத்தங் லாமகபா⁴வங் ராஜூனங் கப்பககம்மகரணஜாதிங் அஜ்ஜு²பாக³தோ ஸம்பத்தோதி அத்தோ². ஸமதிக்கம்ம தங் ஜாதிந்தி தங் பராயத்தஜாதிங் ஸங் ஸுட்டு² அதிக்கம்ம அதிக்கமித்வா. பாவிஸிங் அப⁴யங் புரந்தி ப⁴யரஹிதங் நிப்³பா³னபுரங் நிப்³பா³னமஹானக³ரங் பாவிஸிங் பவிட்டோ² ஆஸிந்தி அத்தோ².

    573.Tena kammenahaṃ dhīrāti dhīra dhitisampanna ahaṃ tena kammena paccekabuddhe katena anādarakammena imasmiṃ pacchimattabhave hīnattaṃ lāmakabhāvaṃ rājūnaṃ kappakakammakaraṇajātiṃ ajjhupāgato sampattoti attho. Samatikkamma taṃ jātinti taṃ parāyattajātiṃ saṃ suṭṭhu atikkamma atikkamitvā. Pāvisiṃ abhayaṃ puranti bhayarahitaṃ nibbānapuraṃ nibbānamahānagaraṃ pāvisiṃ paviṭṭho āsinti attho.

    574. ததா³பி மங் மஹாவீராதி வீருத்தம ததா³பி தஸ்மிங் பச்சேகபு³த்³த⁴ஸ்ஸ ஆஸாத³னஸமயே அபி ஸயம்பூ⁴ பச்சேகபு³த்³தோ⁴ பரிளாஹங் ஆஸாத³னஹேது உப்பன்னங் காயசித்தத³ரத²ங் வினோதே³ஸி தூ³ரீஅகாஸி. ட³ய்ஹமானங் ததோ ஏவ பச்சா²னுதாபேன குக்குச்சேன ட³ய்ஹமானங் ஸந்தபந்தங் மங் ஸுஸண்டி²தங் தோ³ஸங் தோ³ஸதோ த³ஸ்ஸனே ஸுட்டு² ஸண்டி²தங் தி³ஸ்வா க²மாபயி தங் அபராத⁴ங் அதி⁴வாஸேஸீதி ஸம்ப³ந்தோ⁴.

    574.Tadāpi maṃ mahāvīrāti vīruttama tadāpi tasmiṃ paccekabuddhassa āsādanasamaye api sayambhū paccekabuddho pariḷāhaṃ āsādanahetu uppannaṃ kāyacittadarathaṃ vinodesi dūrīakāsi. Ḍayhamānaṃ tato eva pacchānutāpena kukkuccena ḍayhamānaṃ santapantaṃ maṃ susaṇṭhitaṃ dosaṃ dosato dassane suṭṭhu saṇṭhitaṃ disvā khamāpayi taṃ aparādhaṃ adhivāsesīti sambandho.

    575. அஜ்ஜாபி மங் மஹாவீராதி வீருத்தம, அஜ்ஜாபி துய்ஹங் ஸமாக³மகாலே அபி, திஹக்³கீ³பி⁴ ராக³க்³கி³தோ³ஸக்³கி³மோஹக்³கி³ஸங்கா²தேஹி வா நிரயக்³கி³பேதக்³கி³ஸங்ஸாரக்³கி³ஸங்கா²தேஹி வா தீஹி அக்³கீ³ஹி ட³ய்ஹமானங் து³க்க²மனுப⁴வந்தங் மங் ப⁴க³வா ஸீதிபா⁴வங் தோ³மனஸ்ஸவினாஸேன ஸந்தகாயசித்தஸங்கா²தங் ஸீதிபா⁴வங் நிப்³பா³னமேவ வா அபாபயி ஸம்பாபேஸி. தயோ அக்³கீ³ வுத்தப்பகாரே தே தயோ அக்³கீ³ நிப்³பா³பேஸி வூபஸமேஸீதி ஸம்ப³ந்தோ⁴.

    575.Ajjāpi maṃ mahāvīrāti vīruttama, ajjāpi tuyhaṃ samāgamakāle api, tihaggībhi rāgaggidosaggimohaggisaṅkhātehi vā nirayaggipetaggisaṃsāraggisaṅkhātehi vā tīhi aggīhi ḍayhamānaṃ dukkhamanubhavantaṃ maṃ bhagavā sītibhāvaṃ domanassavināsena santakāyacittasaṅkhātaṃ sītibhāvaṃ nibbānameva vā apāpayi sampāpesi. Tayo aggī vuttappakāre te tayo aggī nibbāpesi vūpasamesīti sambandho.

    576. ஏவங் அத்தனோ ஹீனாபதா³னங் ப⁴க³வதோ த³ஸ்ஸெத்வா இதா³னி அஞ்ஞேபி தஸ்ஸ ஸவனே நியோஜெத்வா ஓவத³ந்தோ ‘‘யேஸங் ஸோதாவதா⁴னத்தீ²’’திஆதி³மாஹ. தத்த² யேஸங் தும்ஹாகங் ஸோதாவதா⁴னங் ஸோதஸ்ஸ அவதா⁴னங் ட²பனங் அத்தி² விஜ்ஜதி, தே தும்ஹே பா⁴ஸதோ ஸாஸந்தஸ்ஸ மம வசனங் ஸுணாத² மனஸி கரோத². அத்த²ங் தும்ஹங் பவக்கா²மீதி யதா² யேன பகாரேன மம மயா தி³ட்ட²ங் பத³ங் நிப்³பா³னங், ததா² தேன பகாரேன நிப்³பா³னஸங்கா²தங் பரமத்த²ங் தும்ஹாகங் பவக்கா²மீதி ஸம்ப³ந்தோ⁴.

    576. Evaṃ attano hīnāpadānaṃ bhagavato dassetvā idāni aññepi tassa savane niyojetvā ovadanto ‘‘yesaṃ sotāvadhānatthī’’tiādimāha. Tattha yesaṃ tumhākaṃ sotāvadhānaṃ sotassa avadhānaṃ ṭhapanaṃ atthi vijjati, te tumhe bhāsato sāsantassa mama vacanaṃ suṇātha manasi karotha. Atthaṃ tumhaṃ pavakkhāmīti yathā yena pakārena mama mayā diṭṭhaṃ padaṃ nibbānaṃ, tathā tena pakārena nibbānasaṅkhātaṃ paramatthaṃ tumhākaṃ pavakkhāmīti sambandho.

    577. தங் த³ஸ்ஸெந்தோ ஸயம்பு⁴ங் தங் விமானெத்வாதிஆதி³மாஹ. தத்த² ஸயம்பு⁴ங் ஸயமேவ பூ⁴தங் அரியாய ஜாதியா ஜாதங் ஸந்தசித்தங் ஸமாஹிதங் பச்சேகபு³த்³த⁴ங் விமானெத்வா அனாத³ரங் கத்வா தேன கம்மேன கதேனாகுஸலேன அஜ்ஜ இமஸ்மிங் வத்தமானகாலே அஹங் நீசயோனியங் பராயத்தஜாதியங் கப்பகஜாதியங் ஜாதோ நிப்³ப³த்தோ அம்ஹி ப⁴வாமி.

    577. Taṃ dassento sayambhuṃ taṃ vimānetvātiādimāha. Tattha sayambhuṃ sayameva bhūtaṃ ariyāya jātiyā jātaṃ santacittaṃ samāhitaṃ paccekabuddhaṃ vimānetvā anādaraṃ katvā tena kammena katenākusalena ajja imasmiṃ vattamānakāle ahaṃ nīcayoniyaṃ parāyattajātiyaṃ kappakajātiyaṃ jāto nibbatto amhi bhavāmi.

    578. மா வோ க²ணங் விராதே⁴தா²தி பு³த்³து⁴ப்பாத³க்க²ணங் வோ தும்ஹே மா விராதே⁴த² க³ளிதங் மா கரோத², ஹி ஸச்சங் க²ணாதீதா பு³த்³து⁴ப்பாத³க்க²ணங் அதீதா அதிக்கந்தா ஸத்தா ஸோசரே ஸோசந்தி, ‘‘மயங் அலக்கி²கா து³ம்மேதா⁴ ப⁴வாமா’’தி ஏவங் ஸோசந்தீதி அத்தோ². ஸத³த்தே² அத்தனோ அத்தே² வுட்³டி⁴யங் வாயமெய்யாத² வீரியங் கரோத². வோ தும்ஹேஹி க²ணோ பு³த்³து⁴ப்பாத³க்க²ணோ ஸமயோ படிபாதி³தோ நிப்பா²தி³தோ பத்தோதி அத்தோ².

    578.Mā vo khaṇaṃ virādhethāti buddhuppādakkhaṇaṃ vo tumhe mā virādhetha gaḷitaṃ mā karotha, hi saccaṃ khaṇātītā buddhuppādakkhaṇaṃ atītā atikkantā sattā socare socanti, ‘‘mayaṃ alakkhikā dummedhā bhavāmā’’ti evaṃ socantīti attho. Sadatthe attano atthe vuḍḍhiyaṃ vāyameyyātha vīriyaṃ karotha. Vo tumhehi khaṇo buddhuppādakkhaṇo samayo paṭipādito nipphādito pattoti attho.

    579. ததோ பரங் ஸங்ஸாரக³தானங் ஆதீ³னவங் உபமாஉபமெய்யவஸேன த³ஸ்ஸெந்தோ ஏகச்சானஞ்ச வமனந்திஆதி³மாஹ. ஏகச்சானங் கேஸஞ்சி புக்³க³லானங் வமனங் உத்³த⁴ங் உக்³கி³ரணங் ஏகச்சானங் விரேசனங் அதோ⁴பக்³க⁴ரணங் ஏகே ஏகச்சானங் ஹலாஹலங் விஸங் முச்சா²கரணவிஸங், ஏகச்சானங் புக்³க³லானங் ஓஸத⁴ங் ரக்க²னுபாயங் ப⁴க³வா ஏவங் படிபாடியா அக்கா²ஸீதி ஸம்ப³ந்தோ⁴.

    579. Tato paraṃ saṃsāragatānaṃ ādīnavaṃ upamāupameyyavasena dassento ekaccānañca vamanantiādimāha. Ekaccānaṃ kesañci puggalānaṃ vamanaṃ uddhaṃ uggiraṇaṃ ekaccānaṃ virecanaṃ adhopaggharaṇaṃ eke ekaccānaṃ halāhalaṃ visaṃ mucchākaraṇavisaṃ, ekaccānaṃ puggalānaṃ osadhaṃ rakkhanupāyaṃ bhagavā evaṃ paṭipāṭiyā akkhāsīti sambandho.

    580. வமனங் படிபன்னானந்தி படிபன்னானங் மக்³க³ஸமங்கீ³னங் வமனங் ஸங்ஸாரச²ட்³ட³னங் ஸங்ஸாரமோசனங் ப⁴க³வா அக்கா²ஸீதி ஸம்ப³ந்தோ⁴. ப²லட்டா²னங் ப²லே டி²தானங் விரேசனங் ஸங்ஸாரபக்³க⁴ரணங் அக்கா²ஸி. ப²லலாபீ⁴னங் ப²லங் லபி⁴த்வா டி²தானங் நிப்³பா³னஓஸத⁴ங் அக்கா²ஸி. க³வேஸீனங் மனுஸ்ஸதே³வனிப்³பா³னஸம்பத்திங் க³வேஸீனங் பரியேஸந்தானங் புஞ்ஞகெ²த்தபூ⁴தங் ஸங்க⁴ங் அக்கா²ஸீதி ஸம்ப³ந்தோ⁴.

    580.Vamanaṃ paṭipannānanti paṭipannānaṃ maggasamaṅgīnaṃ vamanaṃ saṃsārachaḍḍanaṃ saṃsāramocanaṃ bhagavā akkhāsīti sambandho. Phalaṭṭhānaṃ phale ṭhitānaṃ virecanaṃ saṃsārapaggharaṇaṃ akkhāsi. Phalalābhīnaṃ phalaṃ labhitvā ṭhitānaṃ nibbānaosadhaṃ akkhāsi. Gavesīnaṃ manussadevanibbānasampattiṃ gavesīnaṃ pariyesantānaṃ puññakhettabhūtaṃ saṅghaṃ akkhāsīti sambandho.

    581. ஸாஸனேன விருத்³தா⁴னந்தி ஸாஸனஸ்ஸ படிபக்கா²னங் ஹலாஹலங் குதூஹலங் பாபங் அகுஸலங் அக்கா²ஸீதி ஸம்ப³ந்தோ⁴. யதா² ஆஸீவிஸோதி அஸ்ஸத்³தா⁴னங் கதபாபானங் புக்³க³லானங் ஸங்ஸாரே து³க்கா²வஹனதோ ஆஸீவிஸஸதி³ஸங் யதா² ஆஸீவிஸோ தி³ட்ட²மத்தேன ப⁴ஸ்மகரணதோ தி³ட்ட²விஸோ ஸப்போ அத்தனா த³ட்ட²ங் நரங் ஜா²பேதி ட³ய்ஹதி து³க்கா²பேதி. தங் நரங் தங் அஸ்ஸத்³த⁴ங் கதபாபங் நரங் ஹலாஹலவிஸங் ஏவங் ஜா²பேதி சதூஸு அபாயேஸு ட³ய்ஹதி ஸோஸேஸீதி ஸம்ப³ந்தோ⁴.

    581.Sāsanena viruddhānanti sāsanassa paṭipakkhānaṃ halāhalaṃ kutūhalaṃ pāpaṃ akusalaṃ akkhāsīti sambandho. Yathā āsīvisoti assaddhānaṃ katapāpānaṃ puggalānaṃ saṃsāre dukkhāvahanato āsīvisasadisaṃ yathā āsīviso diṭṭhamattena bhasmakaraṇato diṭṭhaviso sappo attanā daṭṭhaṃ naraṃ jhāpeti ḍayhati dukkhāpeti. Taṃ naraṃ taṃ assaddhaṃ katapāpaṃ naraṃ halāhalavisaṃ evaṃ jhāpeti catūsu apāyesu ḍayhati sosesīti sambandho.

    582. ஸகிங் பீதங் ஹலாஹலந்தி விஸங் ஹலாஹலங் பீதங் ஸகிங் ஏகவாரங் ஜீவிதங் உபருந்த⁴தி நாஸேதி. ஸாஸனேன ஸாஸனம்ஹி விரஜ்ஜி²த்வா அபராத⁴ங் கத்வா புக்³க³லோ கப்பகோடிம்ஹி கோடிஸங்க்²யே கப்பேபி ட³ய்ஹதி நிஜ்ஜா²யதீதி அத்தோ².

    582.Sakiṃpītaṃ halāhalanti visaṃ halāhalaṃ pītaṃ sakiṃ ekavāraṃ jīvitaṃ uparundhati nāseti. Sāsanena sāsanamhi virajjhitvā aparādhaṃ katvā puggalo kappakoṭimhi koṭisaṅkhye kappepi ḍayhati nijjhāyatīti attho.

    583. ஏவங் அஸ்ஸத்³தா⁴னங் புக்³க³லானங் ப²லவிபாகங் த³ஸ்ஸெத்வா இதா³னி பு³த்³தா⁴னங் ஆனுபா⁴வங் த³ஸ்ஸெந்தோ க²ந்தியாதிஆதி³மாஹ. தத்த² யோ பு³த்³தோ⁴ வமனாதீ³னி அக்கா²ஸி, ஸோ பு³த்³தோ⁴ க²ந்தியா க²மனேன ச அவிஹிங்ஸாய ஸத்தானங் அவிஹிங்ஸனேன ச மெத்தசித்தவதாய ச மெத்தசித்தவந்தபா⁴வேன ச ஸதே³வகங் ஸஹ தே³வேஹி வத்தமானங் லோகங் தாரேதி அதிக்கமாபேதி நிப்³பா³பேதி, தஸ்மா காரணா பு³த்³தா⁴ வோ தும்ஹேஹி அவிராதி⁴யா விருஜ்ஜி²துங் ந ஸக்குணெய்யா, பு³த்³த⁴ஸாஸனே படிபஜ்ஜெய்யாதா²தி அத்தோ².

    583. Evaṃ assaddhānaṃ puggalānaṃ phalavipākaṃ dassetvā idāni buddhānaṃ ānubhāvaṃ dassento khantiyātiādimāha. Tattha yo buddho vamanādīni akkhāsi, so buddho khantiyā khamanena ca avihiṃsāya sattānaṃ avihiṃsanena ca mettacittavatāya ca mettacittavantabhāvena ca sadevakaṃ saha devehi vattamānaṃ lokaṃ tāreti atikkamāpeti nibbāpeti, tasmā kāraṇā buddhā vo tumhehi avirādhiyā virujjhituṃ na sakkuṇeyyā, buddhasāsane paṭipajjeyyāthāti attho.

    584. லாபே⁴ ச அலாபே⁴ ச ந ஸஜ்ஜந்தி ந ப⁴ஜந்தி ந லக்³க³ந்தி. ஸம்மானநே ஆத³ரகரணே ச விமானநே அனாத³ரகரணே ச அசலா பத²வீஸதி³ஸா பு³த்³தா⁴ ப⁴வந்தி, தஸ்மா காரணா தே பு³த்³தா⁴ தும்ஹேஹி ந விரோதி⁴யா ந விரோதே⁴தப்³பா³ விருஜ்ஜி²துங் அஸக்குணெய்யாதி அத்தோ².

    584. Lābhe ca alābhe ca na sajjanti na bhajanti na lagganti. Sammānane ādarakaraṇe ca vimānane anādarakaraṇe ca acalā pathavīsadisā buddhā bhavanti, tasmā kāraṇā te buddhā tumhehi na virodhiyā na virodhetabbā virujjhituṃ asakkuṇeyyāti attho.

    585. பு³த்³தா⁴னங் மஜ்ஜ²த்ததங் த³ஸ்ஸெந்தோ தே³வத³த்தேதிஆதி³மாஹ. தத்த² வத⁴காவத⁴கேஸு ஸப்³பே³ஸு ஸத்தேஸு ஸமகோ ஸமமானஸோ முனி பு³த்³த⁴முனீதி அத்தோ².

    585. Buddhānaṃ majjhattataṃ dassento devadattetiādimāha. Tattha vadhakāvadhakesu sabbesu sattesu samako samamānaso muni buddhamunīti attho.

    586. ஏதேஸங் படிகோ⁴ நத்தீ²தி ஏதேஸங் பு³த்³தா⁴னங் படிகோ⁴ சண்டி³க்கங் தோ³ஸசித்ததங் நத்தி² ந ஸங்விஜ்ஜதி. ராகோ³மேஸங் ந விஜ்ஜதீதி இமேஸங் பு³த்³தா⁴னங் ராகோ³பி ரஜ்ஜனங் அல்லீயனங் ந விஜ்ஜதி, ந உபலப்³ப⁴தி, தஸ்மா காரணா, வத⁴கஸ்ஸ ச ஓரஸஸ்ஸ சாதி ஸப்³பே³ஸங் ஸமகோ ஸமசித்தோ பு³த்³தோ⁴ ஹோதீதி ஸம்ப³ந்தோ⁴.

    586.Etesaṃ paṭigho natthīti etesaṃ buddhānaṃ paṭigho caṇḍikkaṃ dosacittataṃ natthi na saṃvijjati. Rāgomesaṃ na vijjatīti imesaṃ buddhānaṃ rāgopi rajjanaṃ allīyanaṃ na vijjati, na upalabbhati, tasmā kāraṇā, vadhakassa ca orasassa cāti sabbesaṃ samako samacitto buddho hotīti sambandho.

    587. புனபி பு³த்³தா⁴னங்யேவ ஆனுபா⁴வங் த³ஸ்ஸெந்தோ பந்தே² தி³ஸ்வான காஸாவந்திஆதி³மாஹ. தத்த² மீள்ஹமக்கி²தங் கூ³த²ஸம்மிஸ்ஸங் காஸாவங் கஸாவேன ரஜிதங் சீவரங் இஸித்³த⁴ஜங் அரியானங் த⁴ஜங் பரிக்கா²ரங், பந்தே² மக்³கே³ ச²ட்³டி³தங் தி³ஸ்வான பஸ்ஸித்வா அஞ்ஜலிங் கத்வா த³ஸங்கு³லிஸமோதா⁴னங் அஞ்ஜலிபுடங் ஸிரஸி கத்வா ஸிரஸா ஸிரேன வந்தி³தப்³ப³ங் இஸித்³த⁴ஜங் அரஹத்தத்³த⁴ஜங் பு³த்³த⁴பச்சேகபு³த்³த⁴ஸாவகதீ³பகங் சீவரங் நமஸ்ஸிதப்³ப³ங் மானேதப்³ப³ங் பூஜேதப்³ப³ந்தி அத்தோ².

    587. Punapi buddhānaṃyeva ānubhāvaṃ dassento panthe disvāna kāsāvantiādimāha. Tattha mīḷhamakkhitaṃ gūthasammissaṃ kāsāvaṃ kasāvena rajitaṃ cīvaraṃ isiddhajaṃ ariyānaṃ dhajaṃ parikkhāraṃ, panthe magge chaḍḍitaṃ disvāna passitvā añjaliṃ katvā dasaṅgulisamodhānaṃ añjalipuṭaṃ sirasi katvā sirasā sirena vanditabbaṃ isiddhajaṃ arahattaddhajaṃ buddhapaccekabuddhasāvakadīpakaṃ cīvaraṃ namassitabbaṃ mānetabbaṃ pūjetabbanti attho.

    588. அப்³ப⁴தீதாதி அபி⁴ அத்த²ங்க³தா நிப்³பு³தா. யே ச பு³த்³தா⁴ வத்தமானா இதா³னி ஜாதா ச யே பு³த்³தா⁴ அனாக³தா அஜாதா அபூ⁴தா அனிப்³ப³த்தா அபாதுபூ⁴தா ச யே பு³த்³தா⁴. த⁴ஜேனானேன ஸுஜ்ஜ²ந்தீதி அனேன இஸித்³த⁴ஜேன சீவரேன ஏதே பு³த்³தா⁴ ஸுஜ்ஜ²ந்தி விஸுத்³தா⁴ ப⁴வந்தி ஸோப⁴ந்தி. தஸ்மா தேன காரணேன ஏதே பு³த்³தா⁴ நமஸ்ஸியா நமஸ்ஸிதப்³பா³ வந்தி³தப்³பா³தி அத்தோ². ‘‘ஏதங் நமஸ்ஸிய’’ந்திபி பாடோ², தஸ்ஸ ஏதங் இஸித்³த⁴ஜங் நமஸ்ஸிதப்³ப³ந்தி அத்தோ².

    588.Abbhatītāti abhi atthaṅgatā nibbutā. Ye ca buddhā vattamānā idāni jātā ca ye buddhā anāgatā ajātā abhūtā anibbattā apātubhūtā ca ye buddhā. Dhajenānena sujjhantīti anena isiddhajena cīvarena ete buddhā sujjhanti visuddhā bhavanti sobhanti. Tasmā tena kāraṇena ete buddhā namassiyā namassitabbā vanditabbāti attho. ‘‘Etaṃ namassiya’’ntipi pāṭho, tassa etaṃ isiddhajaṃ namassitabbanti attho.

    589. ததோ பரங் அத்தனோ கு³ணங் த³ஸ்ஸெந்தோ ஸத்து²கப்பந்திஆதி³மாஹ. தத்த² ஸத்து²கப்பங் பு³த்³த⁴ஸதி³ஸங் ஸுவினயங் ஸுந்த³ரவினயங் ஸுந்த³ராகாரேன த்³வாரத்தயத³மனங் ஹத³யேன சித்தேன அஹங் தா⁴ரேமி ஸவனதா⁴ரணாதி³னா பச்சவெக்கா²மீதி அத்தோ². வினயங் வினயபிடகங் நமஸ்ஸமானோ வந்த³மானோ வினயே ஆத³ரங் குருமானோ விஹரிஸ்ஸாமி ஸப்³ப³தா³ ஸப்³ப³ஸ்மிங் காலே வாஸங் கப்பேமீதி அத்தோ².

    589. Tato paraṃ attano guṇaṃ dassento satthukappantiādimāha. Tattha satthukappaṃ buddhasadisaṃ suvinayaṃ sundaravinayaṃ sundarākārena dvārattayadamanaṃ hadayena cittena ahaṃ dhāremi savanadhāraṇādinā paccavekkhāmīti attho. Vinayaṃ vinayapiṭakaṃ namassamāno vandamāno vinaye ādaraṃ kurumāno viharissāmi sabbadā sabbasmiṃ kāle vāsaṃ kappemīti attho.

    590. வினயோ ஆஸயோ மய்ஹந்தி வினயபிடகங் மய்ஹங் ஓகாஸபூ⁴தங் ஸவனதா⁴ரணமனஸிகரணஉக்³க³ஹபரிபுச்சா²பவத்தனவஸேன ஓகாஸபூ⁴தங் கே³ஹபூ⁴தந்தி அத்தோ². வினயோ டா²னசங்கமந்தி வினயோ மய்ஹங் ஸவனாதி³கிச்சகரணேன டி²தட்டா²னஞ்ச சங்கமனட்டா²னஞ்ச. கப்பேமி வினயே வாஸந்தி வினயபிடகே வினயதந்தியா ஸவனதா⁴ரணபவத்தனவஸேன வாஸங் ஸயனங் கப்பேமி கரோமி. வினயோ மம கோ³சரோதி வினயபிடகங் மய்ஹங் கோ³சரோ ஆஹாரோ போ⁴ஜனங் நிச்சங் தா⁴ரணமனஸிகரணவஸேனாதி அத்தோ².

    590.Vinayo āsayo mayhanti vinayapiṭakaṃ mayhaṃ okāsabhūtaṃ savanadhāraṇamanasikaraṇauggahaparipucchāpavattanavasena okāsabhūtaṃ gehabhūtanti attho. Vinayo ṭhānacaṅkamanti vinayo mayhaṃ savanādikiccakaraṇena ṭhitaṭṭhānañca caṅkamanaṭṭhānañca. Kappemi vinaye vāsanti vinayapiṭake vinayatantiyā savanadhāraṇapavattanavasena vāsaṃ sayanaṃ kappemi karomi. Vinayo mama gocaroti vinayapiṭakaṃ mayhaṃ gocaro āhāro bhojanaṃ niccaṃ dhāraṇamanasikaraṇavasenāti attho.

    591. வினயே பாரமிப்பத்தோதி ஸகலே வினயபிடகே பாரமிங் பரியோஸானங் பத்தோ. ஸமதே² சாபி கோவிதோ³தி பாராஜிகாதி³ஸத்தாபத்திக்க²ந்தா⁴னங் ஸமதே² வூபஸமே ச வுட்டா²னே ச கோவிதோ³ சே²கோ, அதி⁴கரணஸமதே² வா –

    591.Vinaye pāramippattoti sakale vinayapiṭake pāramiṃ pariyosānaṃ patto. Samathe cāpi kovidoti pārājikādisattāpattikkhandhānaṃ samathe vūpasame ca vuṭṭhāne ca kovido cheko, adhikaraṇasamathe vā –

    ‘‘விவாத³ங் அனுவாத³ஞ்ச, ஆபத்தாதி⁴கரணங் ததா²;

    ‘‘Vivādaṃ anuvādañca, āpattādhikaraṇaṃ tathā;

    கிச்சாதி⁴கரணஞ்சேவ, சதுராதி⁴கரணா மதா’’தி. –

    Kiccādhikaraṇañceva, caturādhikaraṇā matā’’ti. –

    வுத்தாதி⁴கரணேஸு ச –

    Vuttādhikaraṇesu ca –

    ‘‘ஸம்முகா² ஸதிவினயோ, அமூள்ஹபடிஞ்ஞாகரணங்;

    ‘‘Sammukhā sativinayo, amūḷhapaṭiññākaraṇaṃ;

    யேபு⁴ய்ய தஸ்ஸபாபிய்ய, திணவத்தா²ரகோ ததா²’’தி. –

    Yebhuyya tassapāpiyya, tiṇavatthārako tathā’’ti. –

    ஏவங் வுத்தேஸு ச ஸத்தஸு அதி⁴கரணஸமதே²ஸு அதிகோவிதோ³ சே²கோதி அத்தோ². உபாலி தங் மஹாவீராதி ப⁴ந்தே மஹாவீர, சதூஸு அஸங்க்²யெய்யேஸு கப்பஸதஸஹஸ்ஸேஸு ஸப்³ப³ஞ்ஞுதஞ்ஞாணாதி⁴க³மாய வீரியவந்த ஸத்து²னோ தே³வமனுஸ்ஸானங் அனுஸாஸகஸ்ஸ தங் தவ பாதே³ பாத³யுகே³ உபாலி பி⁴க்கு² வந்த³தி பணாமங் கரோதீதி அத்தோ².

    Evaṃ vuttesu ca sattasu adhikaraṇasamathesu atikovido chekoti attho. Upāli taṃ mahāvīrāti bhante mahāvīra, catūsu asaṅkhyeyyesu kappasatasahassesu sabbaññutaññāṇādhigamāya vīriyavanta satthuno devamanussānaṃ anusāsakassa taṃ tava pāde pādayuge upāli bhikkhu vandati paṇāmaṃ karotīti attho.

    592. ஸோ அஹங் பப்³ப³ஜித்வா ஸம்பு³த்³த⁴ங் நமஸ்ஸமானோ பணாமங் குருமானோ த⁴ம்மஸ்ஸ ச தேன ப⁴க³வதா தே³ஸிதஸ்ஸ நவலோகுத்தரத⁴ம்மஸ்ஸ ஸுத⁴ம்மதங் ஸுந்த³ரத⁴ம்மபா⁴வங் ஜானித்வா த⁴ம்மஞ்ச நமஸ்ஸமானோ கா³மதோ கா³மங் புரதோ புனங் நக³ரதோ நக³ரங் விசரிஸ்ஸாமீதி ஸம்ப³ந்தோ⁴.

    592. So ahaṃ pabbajitvā sambuddhaṃ namassamāno paṇāmaṃ kurumāno dhammassa ca tena bhagavatā desitassa navalokuttaradhammassa sudhammataṃ sundaradhammabhāvaṃ jānitvā dhammañca namassamāno gāmato gāmaṃ purato punaṃ nagarato nagaraṃ vicarissāmīti sambandho.

    593. கிலேஸா ஜா²பிதா மய்ஹந்தி மயா படிவித்³த⁴அரஹத்தமக்³க³ஞாணேன மய்ஹங் சித்தஸந்தானக³தா ஸப்³பே³ தி³யட்³ட⁴ஸஹஸ்ஸஸங்கா² கிலேஸா ஜா²பிதா ஸோஸிதா விஸோஸிதா வித்³த⁴ங்ஸிதா. ப⁴வா ஸப்³பே³ ஸமூஹதாதி காமப⁴வாத³யோ ஸப்³பே³ நவ ப⁴வா மயா ஸமூஹதா ஸங் ஸுட்டு² ஊஹதா கே²பிதா வித்³த⁴ங்ஸிதா. ஸப்³பா³ஸவா பரிக்கீ²ணாதி காமாஸவோ, ப⁴வாஸவோ, தி³ட்டா²ஸவோ, அவிஜ்ஜாஸவோதி ஸப்³பே³ சத்தாரோ ஆஸவா பரிக்கீ²ணா பரிஸமந்ததோ க²யங் பாபிதா. இதா³னி இமஸ்மிங் அரஹத்தப்பத்தகாலே புனப்³ப⁴வோ புனுப்பத்திஸங்கா²தோ ப⁴வோ ப⁴வனங் ஜாதி நத்தீ²தி அத்தோ².

    593.Kilesājhāpitā mayhanti mayā paṭividdhaarahattamaggañāṇena mayhaṃ cittasantānagatā sabbe diyaḍḍhasahassasaṅkhā kilesā jhāpitā sositā visositā viddhaṃsitā. Bhavā sabbe samūhatāti kāmabhavādayo sabbe nava bhavā mayā samūhatā saṃ suṭṭhu ūhatā khepitā viddhaṃsitā. Sabbāsavā parikkhīṇāti kāmāsavo, bhavāsavo, diṭṭhāsavo, avijjāsavoti sabbe cattāro āsavā parikkhīṇā parisamantato khayaṃ pāpitā. Idāni imasmiṃ arahattappattakāle punabbhavo punuppattisaṅkhāto bhavo bhavanaṃ jāti natthīti attho.

    594. உத்தரி ஸோமனஸ்ஸவஸேன உதா³னங் உதா³னெந்தோ ஸ்வாக³தந்திஆதி³மாஹ. தத்த² பு³த்³த⁴ஸெட்ட²ஸ்ஸ உத்தமபு³த்³த⁴ஸ்ஸ ஸந்திகே ஸமீபே ஏகனக³ரே வா மம ஆக³மனங் ஸ்வாக³தங் ஸுட்டு² ஆக³மனங் ஸுந்த³ராக³மனங் வத ஏகந்தேன ஆஸி அஹோஸீதி ஸம்ப³ந்தோ⁴. திஸ்ஸோ விஜ்ஜாதி புப்³பே³னிவாஸதி³ப்³ப³சக்கு²ஆஸவக்க²யவிஜ்ஜா அனுப்பத்தா ஸம்பத்தா, பச்சக்க²ங் கதாதி அத்தோ². கதங் பு³த்³த⁴ஸ்ஸ ஸாஸனந்தி பு³த்³தே⁴ன ப⁴க³வதா தே³ஸிதங் அனுஸிட்டி² ஸாஸனங் கதங் நிப்பா²தி³தங் வத்தபடிபத்திங் பூரெத்வா கம்மட்டா²னங் மனஸி கரித்வா அரஹத்தமக்³க³ஞாணாதி⁴க³மேன ஸம்பாதி³தந்தி அத்தோ².

    594. Uttari somanassavasena udānaṃ udānento svāgatantiādimāha. Tattha buddhaseṭṭhassa uttamabuddhassa santike samīpe ekanagare vā mama āgamanaṃ svāgataṃ suṭṭhu āgamanaṃ sundarāgamanaṃ vata ekantena āsi ahosīti sambandho. Tisso vijjāti pubbenivāsadibbacakkhuāsavakkhayavijjā anuppattā sampattā, paccakkhaṃ katāti attho. Kataṃ buddhassa sāsananti buddhena bhagavatā desitaṃ anusiṭṭhi sāsanaṃ kataṃ nipphāditaṃ vattapaṭipattiṃ pūretvā kammaṭṭhānaṃ manasi karitvā arahattamaggañāṇādhigamena sampāditanti attho.

    595. படிஸம்பி⁴தா³ சதஸ்ஸோதி அத்த²படிஸம்பி⁴தா³த³யோ சதஸ்ஸோ பஞ்ஞாயோ ஸச்சி²கதா பச்சக்க²ங் கதா. விமொக்கா²பி ச அட்டி²மேதி சத்தாரி மக்³க³ஞாணானி சத்தாரி ப²லஞாணானீதி இமே அட்ட² விமொக்கா² ஸங்ஸாரதோ முச்சனூபாயா ஸச்சி²கதாதி ஸம்ப³ந்தோ⁴. ச²ளபி⁴ஞ்ஞா ஸச்சி²கதாதி –

    595.Paṭisambhidā catassoti atthapaṭisambhidādayo catasso paññāyo sacchikatā paccakkhaṃ katā. Vimokkhāpi ca aṭṭhimeti cattāri maggañāṇāni cattāri phalañāṇānīti ime aṭṭha vimokkhā saṃsārato muccanūpāyā sacchikatāti sambandho. Chaḷabhiññā sacchikatāti –

    ‘‘இத்³தி⁴வித⁴ங் தி³ப்³ப³ஸோதங், சேதோபரியஞாணகங்;

    ‘‘Iddhividhaṃ dibbasotaṃ, cetopariyañāṇakaṃ;

    புப்³பே³னிவாஸஞாணஞ்ச, தி³ப்³ப³சக்கா²ஸவக்க²ய’’ந்தி. –

    Pubbenivāsañāṇañca, dibbacakkhāsavakkhaya’’nti. –

    இமா ச² அபி⁴ஞ்ஞா ஸச்சி²கதா பச்சக்க²ங் கதா. இமேஸங் ஞாணானங் ஸச்சி²கரணேன பு³த்³த⁴ஸ்ஸ ஸாஸனங் கதந்தி அத்தோ².

    Imā cha abhiññā sacchikatā paccakkhaṃ katā. Imesaṃ ñāṇānaṃ sacchikaraṇena buddhassa sāsanaṃ katanti attho.

    இத்த²ந்தி இமினா ஹெட்டா² வுத்தப்பகாரேன. ஸுத³ந்தி பத³பூரணமத்தே நிபாதோ. ஆயஸ்மா உபாலி தே²ரோதி தி²ரஸீலாதி³கு³ணயுத்தோ ஸாவகோ இமா புப்³ப³சரிதாபதா³னதீ³பிகா கா³தா²யோ அபா⁴ஸித்த² கத²யித்தா²தி அத்தோ².

    Itthanti iminā heṭṭhā vuttappakārena. Sudanti padapūraṇamatte nipāto. Āyasmā upāli theroti thirasīlādiguṇayutto sāvako imā pubbacaritāpadānadīpikā gāthāyo abhāsittha kathayitthāti attho.

    உபாலித்தே²ரஅபதா³னவண்ணனா ஸமத்தா.

    Upālittheraapadānavaṇṇanā samattā.




    Next: 3-7. அஞ்ஞாஸிகொண்ட³ஞ்ஞத்தே²ரஅபதா³னவண்ணனா • 3-7. Aññāsikoṇḍaññattheraapadānavaṇṇanā




    Related texts:



    திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 3-6. உபாலித்தே²ரஅபதா³னங் • 3-6. Upālittheraapadānaṃ


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact