| Library / Tipiṭaka / д̇ибидага • Tipiṭaka / махааваг̇г̇а-адтагат̇аа • Mahāvagga-aṭṭhakathā |
убананд̣̇асагяабуд̇д̇авад̇т̇угат̇аа
Upanandasakyaputtavatthukathā
364. г̇аамагааваасам̣ аг̇амаасийд̇и аббзва наама жийвараани бхааж̇знд̇аа маяхамби сан̇г̇ахам̣ гарзяяунд̇и жийварабхааж̇анагаалам̣ саллагкзд̇ваава аг̇амааси. саад̣̇ияиссасийд̇и г̇ан̣хиссаси. зд̇т̇а жа гин̃жааби д̇асса бхааг̇о на баабун̣аад̇и. ат̇а ко ‘‘наг̇араваасиго аяам̣ мукаро д̇хаммагат̇иго’’д̇и д̇з бхигкуу ‘‘саад̣̇ияиссасий’’д̇и аахам̣су. яо саад̣̇иязяяа аабад̇д̇и д̣̇уггадассаад̇и зд̇т̇а бана гин̃жааби лахугаа аабад̇д̇и, ат̇а ко г̇ахид̇аани г̇ахид̇адтаанз д̣̇аад̇аб̣б̣аани. сажзби надтаани ваа ж̇ин̣н̣аани ваа хонд̇и, д̇ассзва г̇ийваа. д̣̇зхийд̇и вуд̇д̇з ад̣̇знд̇о д̇хуранигкзбз бхан̣д̣аг̇гхзна гаарзд̇аб̣б̣о.
364.Gāmakāvāsaṃagamāsīti appeva nāma cīvarāni bhājentā mayhampi saṅgahaṃ kareyyunti cīvarabhājanakālaṃ sallakkhetvāva agamāsi. Sādiyissasīti gaṇhissasi. Ettha ca kiñcāpi tassa bhāgo na pāpuṇāti. Atha kho ‘‘nagaravāsiko ayaṃ mukharo dhammakathiko’’ti te bhikkhū ‘‘sādiyissasī’’ti āhaṃsu. Yo sādiyeyya āpatti dukkaṭassāti ettha pana kiñcāpi lahukā āpatti, atha kho gahitāni gahitaṭṭhāne dātabbāni. Sacepi naṭṭhāni vā jiṇṇāni vā honti, tasseva gīvā. Dehīti vutte adento dhuranikkhepe bhaṇḍagghena kāretabbo.
згаад̇хиббааяанд̇и згам̣ ад̇хиббааяам̣; згам̣ буг̇г̇алабадивийсамзва д̣̇зт̇аад̇и ад̇т̇о. ид̣̇аани яат̇аа со д̣̇аад̇аб̣б̣о, д̇ам̣ д̣̇ассзд̇ум̣ д̇анд̇им̣ табзнд̇о ид̇ха банаад̇иаад̣̇имааха. д̇ад̇т̇а сажз амуд̇ра убад̣дхам̣ амуд̇ра убад̣дханд̇и згзгасмим̣ згаахамзгаахам̣ ваа сад̇д̇аахам̣ сад̇д̇аахам̣ ваа сажз васад̇и, згзгасмим̣ вихаарз яам̣ зго буг̇г̇ало лабхад̇и, д̇ад̇о д̇ад̇о убад̣дхам̣ убад̣дхам̣ д̣̇аад̇аб̣б̣ам̣. звам̣ згаад̇хиббааяо д̣̇инно ход̇и. яад̇т̇а ваа бана б̣ахуд̇аранд̇и сажз згасмим̣ вихаарз васанд̇о ид̇арасмим̣ сад̇д̇аахаваарзна арун̣амзва удтаабзд̇и, звам̣ буримасмим̣ б̣ахуд̇арам̣ васад̇и наама. д̇асмаа д̇ад̇о б̣ахуд̇арам̣ васид̇авихаарад̇о д̇асса бадивийсо д̣̇аад̇аб̣б̣о. звамби згаад̇хиббааяо д̣̇инно ход̇и. ид̣̇ан̃жа наанаалаабхзхи наануубажаарзхи згасиймавихаарзхи гат̇ид̇ам̣, наанаасиймавихаарз бана сзнаасанаг̇г̇аахо бадиббассамбхад̇и. д̇асмаа д̇ад̇т̇а жийварабадивийсо на баабун̣аад̇и. сзсам̣ бана аамисабхзсаж̇ж̇аад̣̇и саб̣б̣ам̣ саб̣б̣ад̇т̇а анд̇осиймаг̇ад̇асса баабун̣аад̇и.
Ekādhippāyanti ekaṃ adhippāyaṃ; ekaṃ puggalapaṭivīsameva dethāti attho. Idāni yathā so dātabbo, taṃ dassetuṃ tantiṃ ṭhapento idha panātiādimāha. Tattha sace amutra upaḍḍhaṃ amutra upaḍḍhanti ekekasmiṃ ekāhamekāhaṃ vā sattāhaṃ sattāhaṃ vā sace vasati, ekekasmiṃ vihāre yaṃ eko puggalo labhati, tato tato upaḍḍhaṃ upaḍḍhaṃ dātabbaṃ. Evaṃ ekādhippāyo dinno hoti. Yattha vā pana bahutaranti sace ekasmiṃ vihāre vasanto itarasmiṃ sattāhavārena aruṇameva uṭṭhāpeti, evaṃ purimasmiṃ bahutaraṃ vasati nāma. Tasmā tato bahutaraṃ vasitavihārato tassa paṭivīso dātabbo. Evampi ekādhippāyo dinno hoti. Idañca nānālābhehi nānūpacārehi ekasīmavihārehi kathitaṃ, nānāsīmavihāre pana senāsanaggāho paṭippassambhati. Tasmā tattha cīvarapaṭivīso na pāpuṇāti. Sesaṃ pana āmisabhesajjādi sabbaṃ sabbattha antosīmagatassa pāpuṇāti.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махааваг̇г̇абаал̣и • Mahāvaggapāḷi / 223. убананд̣̇асагяабуд̇д̇авад̇т̇у • 223. Upanandasakyaputtavatthu
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / убананд̣̇асагяабуд̇д̇авад̇т̇угат̇ааван̣н̣анаа • Upanandasakyaputtavatthukathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / убананд̣̇асагяабуд̇д̇авад̇т̇угат̇ааван̣н̣анаа • Upanandasakyaputtavatthukathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / убананд̣̇асагяабуд̇д̇авад̇т̇угат̇ааван̣н̣анаа • Upanandasakyaputtavatthukathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 223. убананд̣̇асагяабуд̇д̇авад̇т̇угат̇аа • 223. Upanandasakyaputtavatthukathā
