| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
5. உபஞ்ஞாதஸுத்தவண்ணனா
5. Upaññātasuttavaṇṇanā
5. பஞ்சமே த்³வின்னாஹந்தி த்³வின்னங் அஹங். உபஞ்ஞாஸிந்தி உபக³ந்த்வா கு³ணங் அஞ்ஞாஸிங், ஜானிங் படிவிஜ்ஜி²ந்தி அத்தோ². இதா³னி தே த⁴ம்மே த³ஸ்ஸெந்தோ யா ச அஸந்துட்டி²தாதிஆதி³மாஹ. இமஞ்ஹி த⁴ம்மத்³வயங் நிஸ்ஸாய ஸத்தா² ஸப்³ப³ஞ்ஞுதங் பத்தோ, தஸ்மா தஸ்ஸானுபா⁴வங் த³ஸ்ஸெந்தோ ஏவமாஹ. தத்த² அஸந்துட்டி²தா குஸலேஸு த⁴ம்மேஸூதி இமினா இமங் தீ³பேதி – ‘‘அஹங் ஜா²னமத்தகேன வா ஓபா⁴ஸனிமித்தமத்தகேன வா அஸந்துட்டோ² ஹுத்வா அரஹத்தமக்³க³மேவ உப்பாதே³ஸிங். யாவ ஸோ ந உப்பஜ்ஜி, ந தாவாஹங் ஸந்துட்டோ² அஹோஸிங். பதா⁴னஸ்மிங் ச அனுக்கண்டி²தோ ஹுத்வா அனோஸக்கனாய ட²த்வாயேவ பதா⁴னகிரியங் அகாஸி’’ந்தி இமமத்த²ங் த³ஸ்ஸெந்தோ யா ச அப்படிவானிதாதிஆதி³மாஹ. தத்த² அப்படிவானிதாதி அப்படிக்கமனா அனோஸக்கனா. அப்படிவானீ ஸுதா³ஹங் , பி⁴க்க²வே, பத³ஹாமீதி எத்த² ஸுத³ந்தி நிபாதமத்தங். அஹங், பி⁴க்க²வே, அனோஸக்கனாயங் டி²தோ போ³தி⁴ஸத்தகாலே ஸப்³ப³ஞ்ஞுதங் பத்தெ²ந்தோ பதா⁴னமகாஸிந்தி அயமெத்த² அத்தோ².
5. Pañcame dvinnāhanti dvinnaṃ ahaṃ. Upaññāsinti upagantvā guṇaṃ aññāsiṃ, jāniṃ paṭivijjhinti attho. Idāni te dhamme dassento yā ca asantuṭṭhitātiādimāha. Imañhi dhammadvayaṃ nissāya satthā sabbaññutaṃ patto, tasmā tassānubhāvaṃ dassento evamāha. Tattha asantuṭṭhitā kusalesu dhammesūti iminā imaṃ dīpeti – ‘‘ahaṃ jhānamattakena vā obhāsanimittamattakena vā asantuṭṭho hutvā arahattamaggameva uppādesiṃ. Yāva so na uppajji, na tāvāhaṃ santuṭṭho ahosiṃ. Padhānasmiṃ ca anukkaṇṭhito hutvā anosakkanāya ṭhatvāyeva padhānakiriyaṃ akāsi’’nti imamatthaṃ dassento yā ca appaṭivānitātiādimāha. Tattha appaṭivānitāti appaṭikkamanā anosakkanā. Appaṭivānī sudāhaṃ, bhikkhave, padahāmīti ettha sudanti nipātamattaṃ. Ahaṃ, bhikkhave, anosakkanāyaṃ ṭhito bodhisattakāle sabbaññutaṃ patthento padhānamakāsinti ayamettha attho.
இதா³னி யதா² தேன தங் பதா⁴னங் கதங், தங் த³ஸ்ஸெந்தோ காமங் தசோ சாதிஆதி³மாஹ. தத்த² பத்தப்³ப³ந்தி இமினா பத்தப்³ப³ங் கு³ணஜாதங் த³ஸ்ஸேதி. புரிஸதா²மேனாதிஆதி³னா புரிஸஸ்ஸ ஞாணதா²மோ ஞாணவீரியங் ஞாணபரக்கமோ ச கதி²தோ. ஸண்டா²னந்தி ட²பனா அப்பவத்தனா ஓஸக்கனா, படிப்பஸ்ஸத்³தீ⁴தி அத்தோ². எத்தாவதா தேன சதுரங்க³ஸமன்னாக³தங் வீரியாதி⁴ட்டா²னங் நாம கதி²தங். எத்த² ஹி காமங் தசோ சாதி ஏகங் அங்க³ங், ந்ஹாரு சாதி ஏகங், அட்டி² சாதி ஏகங், மங்ஸலோஹிதந்தி ஏகங், இமானி சத்தாரி அங்கா³னி. புரிஸதா²மேனாதிஆதீ³னி அதி⁴மத்தவீரியாதி⁴வசனானி. இதி புரிமேஹி சதூஹி அங்கே³ஹி ஸமன்னாக³தேன ஹுத்வா ஏவங் அதி⁴ட்டி²தங் வீரியங் சதுரங்க³ஸமன்னாக³தங் வீரியாதி⁴ட்டா²னங் நாமாதி வேதி³தப்³ப³ங். எத்தாவதா தேன போ³தி⁴பல்லங்கே அத்தனோ ஆக³மனீயபடிபதா³ கதி²தா.
Idāni yathā tena taṃ padhānaṃ kataṃ, taṃ dassento kāmaṃ taco cātiādimāha. Tattha pattabbanti iminā pattabbaṃ guṇajātaṃ dasseti. Purisathāmenātiādinā purisassa ñāṇathāmo ñāṇavīriyaṃ ñāṇaparakkamo ca kathito. Saṇṭhānanti ṭhapanā appavattanā osakkanā, paṭippassaddhīti attho. Ettāvatā tena caturaṅgasamannāgataṃ vīriyādhiṭṭhānaṃ nāma kathitaṃ. Ettha hi kāmaṃ taco cāti ekaṃ aṅgaṃ, nhāru cāti ekaṃ, aṭṭhi cāti ekaṃ, maṃsalohitanti ekaṃ, imāni cattāri aṅgāni. Purisathāmenātiādīni adhimattavīriyādhivacanāni. Iti purimehi catūhi aṅgehi samannāgatena hutvā evaṃ adhiṭṭhitaṃ vīriyaṃ caturaṅgasamannāgataṃ vīriyādhiṭṭhānaṃ nāmāti veditabbaṃ. Ettāvatā tena bodhipallaṅke attano āgamanīyapaṭipadā kathitā.
இதா³னி தாய படிபதா³ய படிலத்³த⁴கு³ணங் கதே²துங் தஸ்ஸ மய்ஹங், பி⁴க்க²வேதிஆதி³மாஹ. தத்த² அப்பமாதா³தி⁴க³தாதி ஸதிஅவிப்பவாஸஸங்கா²தேன அப்பமாதே³ன அதி⁴க³தா, ந ஸுத்தப்பமத்தேன லத்³தா⁴. ஸம்போ³தீ⁴தி சதுமக்³க³ஞாணஞ்சேவ ஸப்³ப³ஞ்ஞுதஞ்ஞாணஞ்ச. ந ஹி ஸக்கா ஏதங் ஸுத்தப்பமத்தேன அதி⁴க³ந்துந்தி. தேனாஹ – ‘‘அப்பமாதா³தி⁴க³தா ஸம்போ³தீ⁴’’தி. அனுத்தரோ யோக³க்கே²மோதி ந கேவலங் போ³தி⁴யேவ, அரஹத்தப²லனிப்³பா³னஸங்கா²தோ அனுத்தரோ யோக³க்கே²மோபி அப்பமாதா³தி⁴க³தோவ.
Idāni tāya paṭipadāya paṭiladdhaguṇaṃ kathetuṃ tassa mayhaṃ, bhikkhavetiādimāha. Tattha appamādādhigatāti satiavippavāsasaṅkhātena appamādena adhigatā, na suttappamattena laddhā. Sambodhīti catumaggañāṇañceva sabbaññutaññāṇañca. Na hi sakkā etaṃ suttappamattena adhigantunti. Tenāha – ‘‘appamādādhigatā sambodhī’’ti. Anuttaro yogakkhemoti na kevalaṃ bodhiyeva, arahattaphalanibbānasaṅkhāto anuttaro yogakkhemopi appamādādhigatova.
இதா³னி அத்தனா படிலத்³த⁴கு³ணேஸு பி⁴க்கு²ஸங்க⁴ங் ஸமாத³பெந்தோ தும்ஹே சேபி பி⁴க்க²வேதிஆதி³மாஹ. தத்த² யஸ்ஸத்தா²யாதி யஸ்ஸ அத்தா²ய, யங் உபஸம்பஜ்ஜ விஹரிதுகாமா ஹுத்வாதி அத்தோ². தத³னுத்தரந்தி தங் அனுத்தரங். ப்³ரஹ்மசரியபரியோஸானந்தி மக்³க³ப்³ரஹ்மசரியஸ்ஸ பரியோஸானபூ⁴தங் அரியப²லங். அபி⁴ஞ்ஞா ஸச்சி²கத்வாதி அபி⁴ஞ்ஞாய உத்தமபஞ்ஞாய பச்சக்க²ங் கத்வா. உபஸம்பஜ்ஜ விஹரிஸ்ஸதா²தி படிலபி⁴த்வா பாபுணித்வா விஹரிஸ்ஸத². தஸ்மாதி யஸ்மா அப்படிவானபதா⁴னங் நாமேதங் ப³ஹூபகாரங் உத்தமத்த²ஸாத⁴கங், தஸ்மா. பஞ்சமங்.
Idāni attanā paṭiladdhaguṇesu bhikkhusaṅghaṃ samādapento tumhe cepi bhikkhavetiādimāha. Tattha yassatthāyāti yassa atthāya, yaṃ upasampajja viharitukāmā hutvāti attho. Tadanuttaranti taṃ anuttaraṃ. Brahmacariyapariyosānanti maggabrahmacariyassa pariyosānabhūtaṃ ariyaphalaṃ. Abhiññā sacchikatvāti abhiññāya uttamapaññāya paccakkhaṃ katvā. Upasampajja viharissathāti paṭilabhitvā pāpuṇitvā viharissatha. Tasmāti yasmā appaṭivānapadhānaṃ nāmetaṃ bahūpakāraṃ uttamatthasādhakaṃ, tasmā. Pañcamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 5. உபஞ்ஞாதஸுத்தங் • 5. Upaññātasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 5. உபஞ்ஞாதஸுத்தவண்ணனா • 5. Upaññātasuttavaṇṇanā
