| Library / Tipiṭaka / तिपिटक • Tipiṭaka / कङ्खावितरणी-पुराण-टीका • Kaṅkhāvitaraṇī-purāṇa-ṭīkā |
८. उपस्सुतिसिक्खापदवण्णना
8. Upassutisikkhāpadavaṇṇanā
उपस्सुतिन्ति यथा उपकुज्झं ‘‘समीपकुज्झ’’न्ति वुच्चति, तथा उपस्सुति ‘‘समीपस्सुती’’ति वेदितब्बा। यत्थ ठितो सुणाति, तं ठानन्ति अत्थो। सुतीति पनेत्थ परेसं वचनसद्दो च। सो हि सुय्यतीति सुति नाम। उपसुय्यति वा एत्थाति उपस्सुति। ओकासो हि सुति नाम। इमेसं सुत्वाति एत्थ ‘‘वचन’’न्ति पाठसेसो।
Upassutinti yathā upakujjhaṃ ‘‘samīpakujjha’’nti vuccati, tathā upassuti ‘‘samīpassutī’’ti veditabbā. Yattha ṭhito suṇāti, taṃ ṭhānanti attho. Sutīti panettha paresaṃ vacanasaddo ca. So hi suyyatīti suti nāma. Upasuyyati vā etthāti upassuti. Okāso hi suti nāma. Imesaṃ sutvāti ettha ‘‘vacana’’nti pāṭhaseso.
समुट्ठानादीनि अतीतद्वयसदिसानीति न गहेतब्बानि। थेय्यसत्थसमुट्ठानं। सिया किरियं गन्त्वा सवने। सिया अकिरियं ठितट्ठानं आगन्त्वा वदन्तानं अजानापनवसेन समुट्ठानतो। ‘‘सञ्ञाविमोक्खं, सचित्तकं, लोकवज्जं, कायकम्मं, वचीकम्मं, अकुसलचित्तं, दुक्खवेदन’’न्ति लिखितं।
Samuṭṭhānādīni atītadvayasadisānīti na gahetabbāni. Theyyasatthasamuṭṭhānaṃ. Siyā kiriyaṃ gantvā savane. Siyā akiriyaṃ ṭhitaṭṭhānaṃ āgantvā vadantānaṃ ajānāpanavasena samuṭṭhānato. ‘‘Saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, dukkhavedana’’nti likhitaṃ.
उपस्सुतिसिक्खापदवण्णना निट्ठिता।
Upassutisikkhāpadavaṇṇanā niṭṭhitā.
