| Library / Tipiṭaka / တိပိဋက • Tipiṭaka / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā |
၈. ဥပသ္သုတိသိက္ခာပဒဝဏ္ဏနာ
8. Upassutisikkhāpadavaṇṇanā
၄၇၁. အဋ္ဌမေ – အဓိကရဏဇာတာနန္တိ ဧတေဟိ ဘဏ္ဍနာဒီဟိ ဥပ္ပန္နဝိဝာဒာဓိကရဏာနံ။ ဥပသ္သုတိန္တိ သုတိသမီပံ; ယတ္ထ ဌတ္ဝာ သက္ကာ ဟောတိ တေသံ ဝစနံ သောတုံ, တတ္ထာတိ အတ္ထော။ ဂစ္ဆတိ အာပတ္တိ ဒုက္ကဋသ္သာတိ ဧတ္ထ ပဒဝာရေ ပဒဝာရေ ဒုက္ကဋံ။ မန္တေန္တန္တိ အညေန သဒ္ဓိံ အညသ္မိံ မန္တယမာနေ; ‘‘မန္တေန္တေ’’တိ ဝာ ပာဌော, အယမေဝတ္ထော။
471. Aṭṭhame – adhikaraṇajātānanti etehi bhaṇḍanādīhi uppannavivādādhikaraṇānaṃ. Upassutinti sutisamīpaṃ; yattha ṭhatvā sakkā hoti tesaṃ vacanaṃ sotuṃ, tatthāti attho. Gacchati āpatti dukkaṭassāti ettha padavāre padavāre dukkaṭaṃ. Mantentanti aññena saddhiṃ aññasmiṃ mantayamāne; ‘‘mantente’’ti vā pāṭho, ayamevattho.
၄၇၃. ဝူပသမိသ္သာမီတိ ဥပသမံ ဂမိသ္သာမိ, ကလဟံ န ကရိသ္သာမိ။ အတ္တာနံ ပရိမောစေသ္သာမီတိ မမ အကာရကဘာဝံ ကထေတ္ဝာ အတ္တာနံ မောစေသ္သာမိ။ သေသမေတ္ထ ဥတ္တာနမေဝ။
473.Vūpasamissāmīti upasamaṃ gamissāmi, kalahaṃ na karissāmi. Attānaṃ parimocessāmīti mama akārakabhāvaṃ kathetvā attānaṃ mocessāmi. Sesamettha uttānameva.
ထေယ္ယသတ္ထသမုဋ္ဌာနံ – ကာယစိတ္တတော ကာယဝာစာစိတ္တတော စ သမုဋ္ဌာတိ, သိယာ ကိရိယံ သောတုကာမတာယ ဂမနဝသေန, သိယာ အကိရိယံ ဌိတဋ္ဌာနံ အာဂန္တ္ဝာ မန္တယမာနာနံ အဇာနာပနဝသေန, ရူပိယံ အညဝာဒကံ ဥပသ္သုတီတိ ဣမာနိ ဟိ တီဏိ သိက္ခာပဒာနိ ဧကပရိစ္ဆေဒာနိ, သညာဝိမောက္ခံ, သစိတ္တကံ, လောကဝဇ္ဇံ, ကာယကမ္မံ, ဝစီကမ္မံ, အကုသလစိတ္တံ, ဒုက္ခဝေဒနန္တိ။
Theyyasatthasamuṭṭhānaṃ – kāyacittato kāyavācācittato ca samuṭṭhāti, siyā kiriyaṃ sotukāmatāya gamanavasena, siyā akiriyaṃ ṭhitaṭṭhānaṃ āgantvā mantayamānānaṃ ajānāpanavasena, rūpiyaṃ aññavādakaṃ upassutīti imāni hi tīṇi sikkhāpadāni ekaparicchedāni, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, dukkhavedananti.
ဥပသ္သုတိသိက္ခာပဒံ အဋ္ဌမံ။
Upassutisikkhāpadaṃ aṭṭhamaṃ.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝိဘင္ဂ • Mahāvibhaṅga / ၈. သဟဓမ္မိကဝဂ္ဂော • 8. Sahadhammikavaggo
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၈. ဥပသ္သုတိသိက္ခာပဒဝဏ္ဏနာ • 8. Upassutisikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ၈. ဥပသ္သုတိသိက္ခာပဒဝဏ္ဏနာ • 8. Upassutisikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၈. ဥပသ္သုတိသိက္ခာပဒဝဏ္ဏနာ • 8. Upassutisikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၈. ဥပသ္သုတိသိက္ခာပဒံ • 8. Upassutisikkhāpadaṃ
