| Library / Tipiṭaka / တိပိဋက • Tipiṭaka / မဟာဝဂ္ဂ-အဋ္ဌကထာ • Mahāvagga-aṭṭhakathā |
ဥပောသထာဂာရာဒိကထာ
Uposathāgārādikathā
၁၄၁. အနုပရိဝေဏိယန္တိ ဧကသီမမဟာဝိဟာရေ တသ္မိံ တသ္မိံ ပရိဝေဏေ။ အသင္ကေတေနာတိ သင္ကေတံ အကတ္ဝာ။ ဧကံ သမူဟနိတ္ဝာတိ ကမ္မဝာစာယ သမူဟနိတ္ဝာ။
141.Anupariveṇiyanti ekasīmamahāvihāre tasmiṃ tasmiṃ pariveṇe. Asaṅketenāti saṅketaṃ akatvā. Ekaṃ samūhanitvāti kammavācāya samūhanitvā.
၁၄၂. ယတော ပာတိမောက္ခံ သုဏာတီတိ ယတ္ထ ကတ္ထစိ ဘိက္ခူနံ ဟတ္ထပာသေ နိသိန္နော ယသ္မာ ပာတိမောက္ခံ သုဏာတိ; ကတောဝသ္သ ဥပောသထောတိ အတ္ထော။ ဣဒဉ္စ ဝတ္ထုဝသေန ဝုတ္တံ, ဟတ္ထပာသေ နိသိန္နသ္သ ပန အသုဏန္တသ္သာပိ ကတောဝ ဟောတိ ဥပောသထော။ နိမိတ္တာ ကိတ္တေတဗ္ဗာတိ ဥပောသထပမုခသ္သ ခုဒ္ဒကာနိ ဝာ မဟန္တာနိ ဝာ ပာသာဏဣဋ္ဌကဒာရုခဏ္ဍဒဏ္ဍကာဒီနိ ယာနိ ကာနိစိ နိမိတ္တာနိ အဗ္ဘောကာသေ ဝာ မာဠကာဒီသု ဝာ ယတ္ထ ကတ္ထစိ သညံ ကတ္ဝာ ကိတ္တေတုံ ဝဋ္ဋတိ။ အထ ဝာ နိမိတ္တာ ကိတ္တေတဗ္ဗာတိ နိမိတ္တုပဂာ ဝာ အနိမိတ္တုပဂာ ဝာ ပရိစ္ဆေဒဇာနနတ္ထံ ကိတ္တေတဗ္ဗာ။
142.Yato pātimokkhaṃ suṇātīti yattha katthaci bhikkhūnaṃ hatthapāse nisinno yasmā pātimokkhaṃ suṇāti; katovassa uposathoti attho. Idañca vatthuvasena vuttaṃ, hatthapāse nisinnassa pana asuṇantassāpi katova hoti uposatho. Nimittā kittetabbāti uposathapamukhassa khuddakāni vā mahantāni vā pāsāṇaiṭṭhakadārukhaṇḍadaṇḍakādīni yāni kānici nimittāni abbhokāse vā māḷakādīsu vā yattha katthaci saññaṃ katvā kittetuṃ vaṭṭati. Atha vā nimittā kittetabbāti nimittupagā vā animittupagā vā paricchedajānanatthaṃ kittetabbā.
ထေရေဟိ ဘိက္ခူဟိ ပဌမတရံ သန္နိပတိတုန္တိ ဧတ္ထ သစေ မဟာထေရော ပဌမတရံ န အာဂစ္ဆတိ, ဒုက္ကဋံ။ သဗ္ဗေဟေဝ ဧကဇ္ဈံ သန္နိပတိတ္ဝာ ဥပောသထော ကာတဗ္ဗောတိ ဧတ္ထ သစေ ပောရာဏကော အာဝာသော မဇ္ဈေ ဝိဟာရသ္သ ဟောတိ, ပဟောတိ စေတ္ထ ဘိက္ခူနံ နိသဇ္ဇဋ္ဌာနံ, တတ္ထ သန္နိပတိတ္ဝာ ဥပောသထော ကာတဗ္ဗော။ သစေ ပောရာဏကော ပရိဒုဗ္ဗလော စေဝ သမ္ဗာဓော စ အညော ပစ္ဆာ ဥဋ္ဌိတာဝာသော အသမ္ဗာဓော, တတ္ထ ဥပောသထော ကာတဗ္ဗော။
Therehi bhikkhūhi paṭhamataraṃ sannipatitunti ettha sace mahāthero paṭhamataraṃ na āgacchati, dukkaṭaṃ. Sabbeheva ekajjhaṃ sannipatitvā uposatho kātabboti ettha sace porāṇako āvāso majjhe vihārassa hoti, pahoti cettha bhikkhūnaṃ nisajjaṭṭhānaṃ, tattha sannipatitvā uposatho kātabbo. Sace porāṇako paridubbalo ceva sambādho ca añño pacchā uṭṭhitāvāso asambādho, tattha uposatho kātabbo.
ယတ္ထ ဝာ ပန ထေရော ဘိက္ခု ဝိဟရတီတိ ဧတ္ထာပိ သစေ ထေရသ္သ ဝိဟာရော သဗ္ဗေသံ ပဟောတိ, ဖာသုကော ဟောတိ, တတ္ထ ဥပောသထော ကာတဗ္ဗော။ သစေ ပန သော ပစ္စန္တေ ဝိသမပ္ပဒေသေ ဟောတိ, ထေရသ္သ ဝတ္တဗ္ဗံ – ‘‘ဘန္တေ, တုမ္ဟာကံ ဝိဟာရော အဖာသုကဒေသော, နတ္ထိ ဧတ္ထ သဗ္ဗေသံ ဩကာသော , အသုကသ္မိံ နာမ အာဝာသေ ဩကာသော အတ္ထိ, တတ္ထ ဂန္တုံ ဝဋ္ဋတီ’’တိ။ သစေ ထေရော နာဂစ္ဆတိ, တသ္သ ဆန္ဒပာရိသုဒ္ဓိံ အာနေတ္ဝာ သဗ္ဗေသံ ပဟောနကေ ဖာသုကဋ္ဌာနေ ဥပောသထော ကာတဗ္ဗော။
Yattha vā pana thero bhikkhu viharatīti etthāpi sace therassa vihāro sabbesaṃ pahoti, phāsuko hoti, tattha uposatho kātabbo. Sace pana so paccante visamappadese hoti, therassa vattabbaṃ – ‘‘bhante, tumhākaṃ vihāro aphāsukadeso, natthi ettha sabbesaṃ okāso , asukasmiṃ nāma āvāse okāso atthi, tattha gantuṃ vaṭṭatī’’ti. Sace thero nāgacchati, tassa chandapārisuddhiṃ ānetvā sabbesaṃ pahonake phāsukaṭṭhāne uposatho kātabbo.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝဂ္ဂပာဠိ • Mahāvaggapāḷi
၇၂. ဥပောသထာဂာရကထာ • 72. Uposathāgārakathā
၇၃. ဥပောသထပ္ပမုခာနုဇာနနာ • 73. Uposathappamukhānujānanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ဥပောသထာဂာရာဒိကထာဝဏ္ဏနာ • Uposathāgārādikathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ဥပောသထာဂာရာဒိကထာဝဏ္ဏနာ • Uposathāgārādikathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ဥပောသထာဂာရာဒိကထာဝဏ္ဏနာ • Uposathāgārādikathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၇၂. ဥပောသထာဂာရာဒိကထာ • 72. Uposathāgārādikathā
