| Library / Tipiṭaka / ਤਿਪਿਟਕ • Tipiṭaka / ਜਾਤਕ-ਅਟ੍ਠਕਥਾ • Jātaka-aṭṭhakathā |
[੧੫੪] ੪. ਉਰਗਜਾਤਕવਣ੍ਣਨਾ
[154] 4. Uragajātakavaṇṇanā
ਇਧੂਰਗਾਨਂ ਪવਰੋ ਪવਿਟ੍ਠੋਤਿ ਇਦਂ ਸਤ੍ਥਾ ਜੇਤવਨੇ વਿਹਰਨ੍ਤੋ ਸੇਣਿਭਣ੍ਡਨਂ ਆਰਬ੍ਭ ਕਥੇਸਿ। ਕੋਸਲਰਞ੍ਞੋ ਕਿਰ ਸੇવਕਾ ਸੇਣਿਪਮੁਖਾ ਦ੍વੇ ਮਹਾਮਤ੍ਤਾ ਅਞ੍ਞਮਞ੍ਞਂ ਦਿਟ੍ਠਟ੍ਠਾਨੇ ਕਲਹਂ ਕਰੋਨ੍ਤਿ, ਤੇਸਂ વੇਰਿਭਾવੋ ਸਕਲਨਗਰੇ ਪਾਕਟੋ ਜਾਤੋ। ਤੇ ਨੇવ ਰਾਜਾ, ਨ ਞਾਤਿਮਿਤ੍ਤਾ ਸਮਗ੍ਗੇ ਕਾਤੁਂ ਸਕ੍ਖਿਂਸੁ। ਅਥੇਕਦਿવਸਂ ਸਤ੍ਥਾ ਪਚ੍ਚੂਸਸਮਯੇ ਬੋਧਨੇਯ੍ਯਬਨ੍ਧવੇ ਓਲੋਕੇਨ੍ਤੋ ਤੇਸਂ ਉਭਿਨ੍ਨਮ੍ਪਿ ਸੋਤਾਪਤ੍ਤਿਮਗ੍ਗਸ੍ਸ ਉਪਨਿਸ੍ਸਯਂ ਦਿਸ੍વਾ ਪੁਨਦਿવਸੇ ਏਕਕੋવ ਸਾવਤ੍ਥਿਯਂ ਪਿਣ੍ਡਾਯ ਪવਿਸਿਤ੍વਾ ਤੇਸੁ ਏਕਸ੍ਸ ਗੇਹਦ੍વਾਰੇ ਅਟ੍ਠਾਸਿ। ਸੋ ਨਿਕ੍ਖਮਿਤ੍વਾ ਪਤ੍ਤਂ ਗਹੇਤ੍વਾ ਸਤ੍ਥਾਰਂ ਅਨ੍ਤੋਨਿવੇਸਨਂ ਪવੇਸੇਤ੍વਾ ਆਸਨਂ ਪਞ੍ਞਪੇਤ੍વਾ ਨਿਸੀਦਾਪੇਸਿ। ਸਤ੍ਥਾ ਨਿਸੀਦਿਤ੍વਾ ਤਸ੍ਸ ਮੇਤ੍ਤਾਭਾવਨਾਯ ਆਨਿਸਂਸਂ ਕਥੇਤ੍વਾ ਕਲ੍ਲਚਿਤ੍ਤਤਂ ਞਤ੍વਾ ਸਚ੍ਚਾਨਿ ਪਕਾਸੇਸਿ, ਸੋ ਸਚ੍ਚਪਰਿਯੋਸਾਨੇ ਸੋਤਾਪਤ੍ਤਿਫਲੇ ਪਤਿਟ੍ਠਹਿ।
Idhūragānaṃ pavaro paviṭṭhoti idaṃ satthā jetavane viharanto seṇibhaṇḍanaṃ ārabbha kathesi. Kosalarañño kira sevakā seṇipamukhā dve mahāmattā aññamaññaṃ diṭṭhaṭṭhāne kalahaṃ karonti, tesaṃ veribhāvo sakalanagare pākaṭo jāto. Te neva rājā, na ñātimittā samagge kātuṃ sakkhiṃsu. Athekadivasaṃ satthā paccūsasamaye bodhaneyyabandhave olokento tesaṃ ubhinnampi sotāpattimaggassa upanissayaṃ disvā punadivase ekakova sāvatthiyaṃ piṇḍāya pavisitvā tesu ekassa gehadvāre aṭṭhāsi. So nikkhamitvā pattaṃ gahetvā satthāraṃ antonivesanaṃ pavesetvā āsanaṃ paññapetvā nisīdāpesi. Satthā nisīditvā tassa mettābhāvanāya ānisaṃsaṃ kathetvā kallacittataṃ ñatvā saccāni pakāsesi, so saccapariyosāne sotāpattiphale patiṭṭhahi.
ਸਤ੍ਥਾ ਤਸ੍ਸ ਸੋਤਾਪਨ੍ਨਭਾવਂ ਞਤ੍વਾ ਤਮੇવ ਪਤ੍ਤਂ ਗਾਹਾਪੇਤ੍વਾ ਉਟ੍ਠਾਯ ਇਤਰਸ੍ਸ ਗੇਹਦ੍વਾਰਂ ਅਗਮਾਸਿ। ਸੋਪਿ ਨਿਕ੍ਖਮਿਤ੍વਾ ਸਤ੍ਥਾਰਂ વਨ੍ਦਿਤ੍વਾ ‘‘ਪવਿਸਥ, ਭਨ੍ਤੇ’’ਤਿ ਘਰਂ ਪવੇਸੇਤ੍વਾ ਨਿਸੀਦਾਪੇਸਿ। ਇਤਰੋਪਿ ਪਤ੍ਤਂ ਗਹੇਤ੍વਾ ਸਤ੍ਥਾਰਾ ਸਦ੍ਧਿਂਯੇવ ਪਾવਿਸਿ। ਸਤ੍ਥਾ ਤਸ੍ਸ ਏਕਾਦਸ ਮੇਤ੍ਤਾਨਿਸਂਸੇ વਣ੍ਣੇਤ੍વਾ ਕਲ੍ਲਚਿਤ੍ਤਤਂ ਞਤ੍વਾ ਸਚ੍ਚਾਨਿ ਪਕਾਸੇਸਿ, ਸਚ੍ਚਪਰਿਯੋਸਾਨੇ ਸੋਪਿ ਸੋਤਾਪਤ੍ਤਿਫਲੇ ਪਤਿਟ੍ਠਹਿ। ਇਤਿ ਤੇ ਉਭੋਪਿ ਸੋਤਾਪਨ੍ਨਾ ਹੁਤ੍વਾ ਅਞ੍ਞਮਞ੍ਞਂ ਅਚ੍ਚਯਂ ਦਸ੍ਸੇਤ੍વਾ ਖਮਾਪੇਤ੍વਾ ਸਮਗ੍ਗਾ ਸਮ੍ਮੋਦਮਾਨਾ ਏਕਜ੍ਝਾਸਯਾ ਅਹੇਸੁਂ। ਤਂ ਦਿવਸਞ੍ਞੇવ ਚ ਭਗવਤੋ ਸਮ੍ਮੁਖਾવ ਏਕਤੋ ਭੁਞ੍ਜਿਂਸੁ। ਸਤ੍ਥਾ ਭਤ੍ਤਕਿਚ੍ਚਂ ਨਿਟ੍ਠਾਪੇਤ੍વਾ વਿਹਾਰਂ ਅਗਮਾਸਿ। ਤੇ ਬਹੂਨਿ ਮਾਲਾਗਨ੍ਧવਿਲੇਪਨਾਨਿ ਚੇવ ਸਪ੍ਪਿਮਧੁਫਾਣਿਤਾਦੀਨਿ ਚ ਆਦਾਯ ਸਤ੍ਥਾਰਾ ਸਦ੍ਧਿਂਯੇવ ਨਿਕ੍ਖਮਿਂਸੁ। ਸਤ੍ਥਾ ਭਿਕ੍ਖੁਸਙ੍ਘੇਨ વਤ੍ਤੇ ਦਸ੍ਸਿਤੇ ਸੁਗਤੋવਾਦਂ ਦਤ੍વਾ ਗਨ੍ਧਕੁਟਿਂ ਪਾવਿਸਿ।
Satthā tassa sotāpannabhāvaṃ ñatvā tameva pattaṃ gāhāpetvā uṭṭhāya itarassa gehadvāraṃ agamāsi. Sopi nikkhamitvā satthāraṃ vanditvā ‘‘pavisatha, bhante’’ti gharaṃ pavesetvā nisīdāpesi. Itaropi pattaṃ gahetvā satthārā saddhiṃyeva pāvisi. Satthā tassa ekādasa mettānisaṃse vaṇṇetvā kallacittataṃ ñatvā saccāni pakāsesi, saccapariyosāne sopi sotāpattiphale patiṭṭhahi. Iti te ubhopi sotāpannā hutvā aññamaññaṃ accayaṃ dassetvā khamāpetvā samaggā sammodamānā ekajjhāsayā ahesuṃ. Taṃ divasaññeva ca bhagavato sammukhāva ekato bhuñjiṃsu. Satthā bhattakiccaṃ niṭṭhāpetvā vihāraṃ agamāsi. Te bahūni mālāgandhavilepanāni ceva sappimadhuphāṇitādīni ca ādāya satthārā saddhiṃyeva nikkhamiṃsu. Satthā bhikkhusaṅghena vatte dassite sugatovādaṃ datvā gandhakuṭiṃ pāvisi.
ਭਿਕ੍ਖੂ ਸਾਯਨ੍ਹਸਮਯੇ ਧਮ੍ਮਸਭਾਯਂ ਸਤ੍ਥੁ ਗੁਣਕਥਂ ਸਮੁਟ੍ਠਾਪੇਸੁਂ ‘‘ਆવੁਸੋ, ਸਤ੍ਥਾ ਅਦਨ੍ਤਦਮਕੋ, ਯੇ ਨਾਮ ਦ੍વੇ ਮਹਾਮਤ੍ਤੇ ਚਿਰਂ વਾਯਮਮਾਨੋਪਿ ਨੇવ ਰਾਜਾ ਸਮਗ੍ਗੇ ਕਾਤੁਂ ਸਕ੍ਖਿ, ਨ ਞਾਤਿਮਿਤ੍ਤਾਦਯੋ ਸਕ੍ਖਿਂਸੁ, ਤੇ ਏਕਦਿવਸੇਨੇવ ਤਥਾਗਤੇਨ ਦਮਿਤਾ’’ਤਿ। ਸਤ੍ਥਾ ਆਗਨ੍ਤ੍વਾ ‘‘ਕਾਯ ਨੁਤ੍ਥ, ਭਿਕ੍ਖવੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍વਾ ‘‘ਇਮਾਯ ਨਾਮਾ’’ਤਿ વੁਤ੍ਤੇ ‘‘ਨ, ਭਿਕ੍ਖવੇ, ਇਦਾਨੇવਾਹਂ ਇਮੇ ਦ੍વੇ ਜਨੇ ਸਮਗ੍ਗੇ ਅਕਾਸਿਂ, ਪੁਬ੍ਬੇਪੇਤੇ ਮਯਾ ਸਮਗ੍ਗਾ ਕਤਾਯੇવਾ’’ਤਿ વਤ੍વਾ ਅਤੀਤਂ ਆਹਰਿ।
Bhikkhū sāyanhasamaye dhammasabhāyaṃ satthu guṇakathaṃ samuṭṭhāpesuṃ ‘‘āvuso, satthā adantadamako, ye nāma dve mahāmatte ciraṃ vāyamamānopi neva rājā samagge kātuṃ sakkhi, na ñātimittādayo sakkhiṃsu, te ekadivaseneva tathāgatena damitā’’ti. Satthā āgantvā ‘‘kāya nuttha, bhikkhave, etarahi kathāya sannisinnā’’ti pucchitvā ‘‘imāya nāmā’’ti vutte ‘‘na, bhikkhave, idānevāhaṃ ime dve jane samagge akāsiṃ, pubbepete mayā samaggā katāyevā’’ti vatvā atītaṃ āhari.
ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬਾਰਾਣਸਿਯਂ ਉਸ੍ਸવੇ ਘੋਸਿਤੇ ਮਹਾਸਮਜ੍ਜਂ ਅਹੋਸਿ। ਬਹੂ ਮਨੁਸ੍ਸਾ ਚੇવ ਦੇવਨਾਗਸੁਪਣ੍ਣਾਦਯੋ ਚ ਸਮਜ੍ਜਦਸ੍ਸਨਤ੍ਥਂ ਸਨ੍ਨਿਪਤਿਂਸੁ। ਤਤ੍ਰੇਕਸ੍ਮਿਂ ਠਾਨੇ ਏਕੋ ਨਾਗੋ ਚ ਸੁਪਣ੍ਣੋ ਚ ਸਮਜ੍ਜਂ ਪਸ੍ਸਮਾਨਾ ਏਕਤੋ ਅਟ੍ਠਂਸੁ। ਨਾਗੋ ਸੁਪਣ੍ਣਸ੍ਸ ਸੁਪਣ੍ਣਭਾવਂ ਅਜਾਨਨ੍ਤੋ ਅਂਸੇ ਹਤ੍ਥਂ ਠਪੇਸਿ। ਸੁਪਣ੍ਣੋ ‘‘ਕੇਨ ਮੇ ਅਂਸੇ ਹਤ੍ਥੋ ਠਪਿਤੋ’’ਤਿ ਨਿવਤ੍ਤਿਤ੍વਾ ਓਲੋਕੇਨ੍ਤੋ ਨਾਗਂ ਸਞ੍ਜਾਨਿ। ਨਾਗੋਪਿ ਓਲੋਕੇਨ੍ਤੋ ਸੁਪਣ੍ਣਂ ਸਞ੍ਜਾਨਿਤ੍વਾ ਮਰਣਭਯਤਜ੍ਜਿਤੋ ਨਗਰਾ ਨਿਕ੍ਖਮਿਤ੍વਾ ਨਦੀਪਿਟ੍ਠੇਨ ਪਲਾਯਿ। ਸੁਪਣ੍ਣੋਪਿ ‘‘ਤਂ ਗਹੇਸ੍ਸਾਮੀ’’ਤਿ ਅਨੁਬਨ੍ਧਿ। ਤਸ੍ਮਿਂ ਸਮਯੇ ਬੋਧਿਸਤ੍ਤੋ ਤਾਪਸੋ ਹੁਤ੍વਾ ਤਸ੍ਸਾ ਨਦਿਯਾ ਤੀਰੇ ਪਣ੍ਣਸਾਲਾਯ વਸਮਾਨੋ ਦਿવਾ ਦਰਥਪਟਿਪ੍ਪਸ੍ਸਮ੍ਭਨਤ੍ਥਂ ਉਦਕਸਾਟਿਕਂ ਨਿવਾਸੇਤ੍વਾ વਕ੍ਕਲਂ ਬਹਿ ਠਪੇਤ੍વਾ ਨਦਿਂ ਓਤਰਿਤ੍વਾ ਨ੍ਹਾਯਤਿ। ਨਾਗੋ ‘‘ਇਮਂ ਪਬ੍ਬਜਿਤਂ ਨਿਸ੍ਸਾਯ ਜੀવਿਤਂ ਲਭਿਸ੍ਸਾਮੀ’’ਤਿ ਪਕਤਿવਣ੍ਣਂ વਿਜਹਿਤ੍વਾ ਮਣਿਕ੍ਖਨ੍ਧવਣ੍ਣਂ ਮਾਪੇਤ੍વਾ વਕ੍ਕਲਨ੍ਤਰਂ ਪਾવਿਸਿ। ਸੁਪਣ੍ਣੋ ਅਨੁਬਨ੍ਧਮਾਨੋ ਤਂ ਤਤ੍ਥ ਪવਿਟ੍ਠਂ ਦਿਸ੍વਾ વਕ੍ਕਲੇ ਗਰੁਭਾવੇਨ ਅਗ੍ਗਹੇਤ੍વਾ ਬੋਧਿਸਤ੍ਤਂ ਆਮਨ੍ਤੇਤ੍વਾ ‘‘ਭਨ੍ਤੇ, ਅਹਂ ਛਾਤੋ, ਤੁਮ੍ਹਾਕਂ વਕ੍ਕਲਂ ਗਣ੍ਹਥ, ਇਮਂ ਨਾਗਂ ਖਾਦਿਸ੍ਸਾਮੀ’’ਤਿ ਇਮਮਤ੍ਥਂ ਪਕਾਸੇਤੁਂ ਪਠਮਂ ਗਾਥਮਾਹ –
Atīte bārāṇasiyaṃ brahmadatte rajjaṃ kārente bārāṇasiyaṃ ussave ghosite mahāsamajjaṃ ahosi. Bahū manussā ceva devanāgasupaṇṇādayo ca samajjadassanatthaṃ sannipatiṃsu. Tatrekasmiṃ ṭhāne eko nāgo ca supaṇṇo ca samajjaṃ passamānā ekato aṭṭhaṃsu. Nāgo supaṇṇassa supaṇṇabhāvaṃ ajānanto aṃse hatthaṃ ṭhapesi. Supaṇṇo ‘‘kena me aṃse hattho ṭhapito’’ti nivattitvā olokento nāgaṃ sañjāni. Nāgopi olokento supaṇṇaṃ sañjānitvā maraṇabhayatajjito nagarā nikkhamitvā nadīpiṭṭhena palāyi. Supaṇṇopi ‘‘taṃ gahessāmī’’ti anubandhi. Tasmiṃ samaye bodhisatto tāpaso hutvā tassā nadiyā tīre paṇṇasālāya vasamāno divā darathapaṭippassambhanatthaṃ udakasāṭikaṃ nivāsetvā vakkalaṃ bahi ṭhapetvā nadiṃ otaritvā nhāyati. Nāgo ‘‘imaṃ pabbajitaṃ nissāya jīvitaṃ labhissāmī’’ti pakativaṇṇaṃ vijahitvā maṇikkhandhavaṇṇaṃ māpetvā vakkalantaraṃ pāvisi. Supaṇṇo anubandhamāno taṃ tattha paviṭṭhaṃ disvā vakkale garubhāvena aggahetvā bodhisattaṃ āmantetvā ‘‘bhante, ahaṃ chāto, tumhākaṃ vakkalaṃ gaṇhatha, imaṃ nāgaṃ khādissāmī’’ti imamatthaṃ pakāsetuṃ paṭhamaṃ gāthamāha –
੭.
7.
‘‘ਇਧੂਰਗਾਨਂ ਪવਰੋ ਪવਿਟ੍ਠੋ, ਸੇਲਸ੍ਸ વਣ੍ਣੇਨ ਪਮੋਕ੍ਖਮਿਚ੍ਛਂ।
‘‘Idhūragānaṃ pavaro paviṭṭho, selassa vaṇṇena pamokkhamicchaṃ;
ਬ੍ਰਹ੍ਮਞ੍ਚ વਣ੍ਣਂ ਅਪਚਾਯਮਾਨੋ, ਬੁਭੁਕ੍ਖਿਤੋ ਨੋ વਿਤਰਾਮਿ ਭੋਤ੍ਤੁ’’ਨ੍ਤਿ॥
Brahmañca vaṇṇaṃ apacāyamāno, bubhukkhito no vitarāmi bhottu’’nti.
ਤਤ੍ਥ ਇਧੂਰਗਾਨਂ ਪવਰੋ ਪવਿਟ੍ਠੋਤਿ ਇਮਸ੍ਮਿਂ વਕ੍ਕਲੇ ਉਰਗਾਨਂ ਪવਰੋ ਨਾਗਰਾਜਾ ਪવਿਟ੍ਠੋ। ਸੇਲਸ੍ਸ વਣ੍ਣੇਨਾਤਿ ਮਣਿવਣ੍ਣੇਨ, ਮਣਿਕ੍ਖਨ੍ਧੋ ਹੁਤ੍વਾ ਪવਿਟ੍ਠੋਤਿ ਅਤ੍ਥੋ। ਪਮੋਕ੍ਖਮਿਚ੍ਛਨ੍ਤਿ ਮਮ ਸਨ੍ਤਿਕਾ ਮੋਕ੍ਖਂ ਇਚ੍ਛਮਾਨੋ। ਬ੍ਰਹ੍ਮਞ੍ਚ વਣ੍ਣਂ ਅਪਚਾਯਮਾਨੋਤਿ ਅਹਂ ਪਨ ਤੁਮ੍ਹਾਕਂ ਬ੍ਰਹ੍ਮવਣ੍ਣਂ ਸੇਟ੍ਠવਣ੍ਣਂ ਪੂਜੇਨ੍ਤੋ ਗਰੁਂ ਕਰੋਨ੍ਤੋ। ਬੁਭੁਕ੍ਖਿਤੋ ਨੋ વਿਤਰਾਮਿ ਭੋਤ੍ਤੁਨ੍ਤਿ ਏਤਂ ਨਾਗਂ વਕ੍ਕਲਨ੍ਤਰਂ ਪવਿਟ੍ਠਂ ਛਾਤੋਪਿ ਸਮਾਨੋ ਭਕ੍ਖਿਤੁਂ ਨ ਸਕ੍ਕੋਮੀਤਿ।
Tattha idhūragānaṃ pavaro paviṭṭhoti imasmiṃ vakkale uragānaṃ pavaro nāgarājā paviṭṭho. Selassa vaṇṇenāti maṇivaṇṇena, maṇikkhandho hutvā paviṭṭhoti attho. Pamokkhamicchanti mama santikā mokkhaṃ icchamāno. Brahmañca vaṇṇaṃ apacāyamānoti ahaṃ pana tumhākaṃ brahmavaṇṇaṃ seṭṭhavaṇṇaṃ pūjento garuṃ karonto. Bubhukkhito no vitarāmi bhottunti etaṃ nāgaṃ vakkalantaraṃ paviṭṭhaṃ chātopi samāno bhakkhituṃ na sakkomīti.
ਬੋਧਿਸਤ੍ਤੋ ਉਦਕੇ ਠਿਤੋਯੇવ ਸੁਪਣ੍ਣਰਾਜਸ੍ਸ ਥੁਤਿਂ ਕਤ੍વਾ ਦੁਤਿਯਂ ਗਾਥਮਾਹ –
Bodhisatto udake ṭhitoyeva supaṇṇarājassa thutiṃ katvā dutiyaṃ gāthamāha –
੮.
8.
‘‘ਸੋ ਬ੍ਰਹ੍ਮਗੁਤ੍ਤੋ ਚਿਰਮੇવ ਜੀવ, ਦਿਬ੍ਯਾ ਚ ਤੇ ਪਾਤੁਭવਨ੍ਤੁ ਭਕ੍ਖਾ।
‘‘So brahmagutto cirameva jīva, dibyā ca te pātubhavantu bhakkhā;
ਯੋ ਬ੍ਰਹ੍ਮવਣ੍ਣਂ ਅਪਚਾਯਮਾਨੋ, ਬੁਭੁਕ੍ਖਿਤੋ ਨੋ વਿਤਰਾਸਿ ਭੋਤ੍ਤੁ’’ਨ੍ਤਿ॥
Yo brahmavaṇṇaṃ apacāyamāno, bubhukkhito no vitarāsi bhottu’’nti.
ਤਤ੍ਥ ਸੋ ਬ੍ਰਹ੍ਮਗੁਤ੍ਤੋਤਿ ਸੋ ਤ੍વਂ ਬ੍ਰਹ੍ਮਗੋਪਿਤੋ ਬ੍ਰਹ੍ਮਰਕ੍ਖਿਤੋ ਹੁਤ੍વਾ। ਦਿਬ੍ਯਾ ਚ ਤੇ ਪਾਤੁਭવਨ੍ਤੁ ਭਕ੍ਖਾਤਿ ਦੇવਤਾਨਂ ਪਰਿਭੋਗਾਰਹਾ ਭਕ੍ਖਾ ਚ ਤવ ਪਾਤੁਭવਨ੍ਤੁ, ਮਾ ਪਾਣਾਤਿਪਾਤਂ ਕਤ੍વਾ ਨਾਗਮਂਸਖਾਦਕੋ ਅਹੋਸਿ।
Tattha so brahmaguttoti so tvaṃ brahmagopito brahmarakkhito hutvā. Dibyā ca te pātubhavantu bhakkhāti devatānaṃ paribhogārahā bhakkhā ca tava pātubhavantu, mā pāṇātipātaṃ katvā nāgamaṃsakhādako ahosi.
ਇਤਿ ਬੋਧਿਸਤ੍ਤੋ ਉਦਕੇ ਠਿਤੋવ ਅਨੁਮੋਦਨਂ ਕਤ੍વਾ ਉਤ੍ਤਰਿਤ੍વਾ વਕ੍ਕਲਂ ਨਿવਾਸੇਤ੍વਾ ਤੇ ਉਭੋਪਿ ਗਹੇਤ੍વਾ ਅਸ੍ਸਮਪਦਂ ਗਨ੍ਤ੍વਾ ਮੇਤ੍ਤਾਭਾવਨਾਯ વਣ੍ਣਂ ਕਥੇਤ੍વਾ ਦ੍વੇਪਿ ਜਨੇ ਸਮਗ੍ਗੇ ਅਕਾਸਿ। ਤੇ ਤਤੋ ਪਟ੍ਠਾਯ ਸਮਗ੍ਗਾ ਸਮ੍ਮੋਦਮਾਨਾ ਸੁਖਂ વਸਿਂਸੁ।
Iti bodhisatto udake ṭhitova anumodanaṃ katvā uttaritvā vakkalaṃ nivāsetvā te ubhopi gahetvā assamapadaṃ gantvā mettābhāvanāya vaṇṇaṃ kathetvā dvepi jane samagge akāsi. Te tato paṭṭhāya samaggā sammodamānā sukhaṃ vasiṃsu.
ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍વਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਨਾਗੋ ਚ ਸੁਪਣ੍ਣੋ ਚ ਇਮੇ ਦ੍વੇ ਮਹਾਮਤ੍ਤਾ ਅਹੇਸੁਂ, ਤਾਪਸੋ ਪਨ ਅਹਮੇવ ਅਹੋਸਿ’’ਨ੍ਤਿ।
Satthā imaṃ dhammadesanaṃ āharitvā jātakaṃ samodhānesi – ‘‘tadā nāgo ca supaṇṇo ca ime dve mahāmattā ahesuṃ, tāpaso pana ahameva ahosi’’nti.
ਉਰਗਜਾਤਕવਣ੍ਣਨਾ ਚਤੁਤ੍ਥਾ।
Uragajātakavaṇṇanā catutthā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਖੁਦ੍ਦਕਨਿਕਾਯ • Khuddakanikāya / ਜਾਤਕਪਾਲ਼ਿ • Jātakapāḷi / ੧੫੪. ਉਰਗਜਾਤਕ • 154. Uragajātaka
