| Library / Tipiṭaka / திபிடக • Tipiṭaka / ஸுத்தனிபாத-அட்ட²கதா² • Suttanipāta-aṭṭhakathā |
10. உட்டா²னஸுத்தவண்ணனா
10. Uṭṭhānasuttavaṇṇanā
334. உட்ட²ஹதா²தி உட்டா²னஸுத்தங். கா உப்பத்தி? ஏகங் ஸமயங் ப⁴க³வா ஸாவத்தி²யங் விஹரந்தோ ரத்திங் ஜேதவனவிஹாரே வஸித்வா புப்³ப³ண்ஹஸமயங் பி⁴க்கு²ஸங்க⁴பரிவுதோ ஸாவத்தி²யங் பிண்டா³ய சரித்வா பாசீனத்³வாரேன நக³ரா நிக்க²மித்வா மிகா³ரமாதுபாஸாத³ங் அக³மாஸி தி³வாவிஹாரத்தா²ய. ஆசிண்ணங் கிரேதங் ப⁴க³வதோ ரத்திங் ஜேதவனவிஹாரே வஸித்வா மிகா³ரமாதுபாஸாதே³ தி³வாவிஹாரூபக³மனங், ரத்திஞ்ச மிகா³ரமாதுபாஸாதே³ வஸித்வா ஜேதவனே தி³வாவிஹாரூபக³மனங். கஸ்மா? த்³வின்னங் குலானங் அனுக்³க³ஹத்தா²ய மஹாபரிச்சாக³கு³ணபரிதீ³பனத்தா²ய ச. மிகா³ரமாதுபாஸாத³ஸ்ஸ ச ஹெட்டா² பஞ்ச கூடாகா³ரக³ப்³ப⁴ஸதானி ஹொந்தி, யேஸு பஞ்சஸதா பி⁴க்கூ² வஸந்தி. தத்த² யதா³ ப⁴க³வா ஹெட்டா²பாஸாதே³ வஸதி, ததா³ பி⁴க்கூ² ப⁴க³வதோ கா³ரவேன உபரிபாஸாத³ங் நாருஹந்தி. தங் தி³வஸங் பன ப⁴க³வா உபரிபாஸாதே³ கூடாகா³ரக³ப்³ப⁴ங் பாவிஸி, தேன ஹெட்டா²பாஸாதே³ பஞ்சபி க³ப்³ப⁴ஸதானி பஞ்சஸதா பி⁴க்கூ² பவிஸிங்ஸு. தே ச ஸப்³பே³வ நவா ஹொந்தி அது⁴னாக³தா இமங் த⁴ம்மவினயங் உத்³த⁴தா உன்னளா பாகதிந்த்³ரியா. தே பவிஸித்வா தி³வாஸெய்யங் ஸுபித்வா ஸாயங் உட்டா²ய மஹாதலே ஸன்னிபதித்வா ‘‘அஜ்ஜ ப⁴த்தக்³கே³ துய்ஹங் கிங் அஹோஸி, த்வங் கத்த² அக³மாஸி, அஹங் ஆவுஸோ கோஸலரஞ்ஞோ க⁴ரங், அஹங் அனாத²பிண்டி³கஸ்ஸ, தத்த² ஏவரூபோ ச ஏவரூபோ ச போ⁴ஜனவிதி⁴ அஹோஸீ’’தி நானப்பகாரங் ஆமிஸகத²ங் கதெ²ந்தா உச்சாஸத்³த³மஹாஸத்³தா³ அஹேஸுங்.
334.Uṭṭhahathāti uṭṭhānasuttaṃ. Kā uppatti? Ekaṃ samayaṃ bhagavā sāvatthiyaṃ viharanto rattiṃ jetavanavihāre vasitvā pubbaṇhasamayaṃ bhikkhusaṅghaparivuto sāvatthiyaṃ piṇḍāya caritvā pācīnadvārena nagarā nikkhamitvā migāramātupāsādaṃ agamāsi divāvihāratthāya. Āciṇṇaṃ kiretaṃ bhagavato rattiṃ jetavanavihāre vasitvā migāramātupāsāde divāvihārūpagamanaṃ, rattiñca migāramātupāsāde vasitvā jetavane divāvihārūpagamanaṃ. Kasmā? Dvinnaṃ kulānaṃ anuggahatthāya mahāpariccāgaguṇaparidīpanatthāya ca. Migāramātupāsādassa ca heṭṭhā pañca kūṭāgāragabbhasatāni honti, yesu pañcasatā bhikkhū vasanti. Tattha yadā bhagavā heṭṭhāpāsāde vasati, tadā bhikkhū bhagavato gāravena uparipāsādaṃ nāruhanti. Taṃ divasaṃ pana bhagavā uparipāsāde kūṭāgāragabbhaṃ pāvisi, tena heṭṭhāpāsāde pañcapi gabbhasatāni pañcasatā bhikkhū pavisiṃsu. Te ca sabbeva navā honti adhunāgatā imaṃ dhammavinayaṃ uddhatā unnaḷā pākatindriyā. Te pavisitvā divāseyyaṃ supitvā sāyaṃ uṭṭhāya mahātale sannipatitvā ‘‘ajja bhattagge tuyhaṃ kiṃ ahosi, tvaṃ kattha agamāsi, ahaṃ āvuso kosalarañño gharaṃ, ahaṃ anāthapiṇḍikassa, tattha evarūpo ca evarūpo ca bhojanavidhi ahosī’’ti nānappakāraṃ āmisakathaṃ kathentā uccāsaddamahāsaddā ahesuṃ.
ப⁴க³வா தங் ஸத்³த³ங் ஸுத்வா ‘‘இமே மயா ஸத்³தி⁴ங் வஸந்தாபி ஏவங் பமத்தா, அஹோ அயுத்தகாரினோ’’தி மஹாமொக்³க³ல்லானத்தே²ரஸ்ஸ ஆக³மனங் சிந்தேஸி. தாவதே³வ ஆயஸ்மா மஹாமொக்³க³ல்லானோ ப⁴க³வதோ சித்தங் ஞத்வா இத்³தி⁴யா ஆக³ம்ம பாத³மூலே வந்த³மானோயேவ அஹோஸி. ததோ நங் ப⁴க³வா ஆமந்தேஸி – ‘‘ஏதே தே, மொக்³க³ல்லான, ஸப்³ரஹ்மசாரினோ பமத்தா, ஸாது⁴ நே ஸங்வேஜேஹீ’’தி. ‘‘ஏவங் ப⁴ந்தே’’தி கோ² ஸோ ஆயஸ்மா மஹாமொக்³க³ல்லானோ ப⁴க³வதோ படிஸ்ஸுணித்வா தாவதே³வ ஆபோகஸிணங் ஸமாபஜ்ஜித்வா கரீஸபூ⁴மியங் டி²தங் மஹாபாஸாத³ங் நாவங் விய மஹாவாதோ பாத³ங்கு³ட்ட²கேன கம்பேஸி ஸத்³தி⁴ங் பதிட்டி²தபத²விப்பதே³ஸேன. அத² தே பி⁴க்கூ² பீ⁴தா விஸ்ஸரங் கரொந்தா ஸகஸகசீவரானி ச²ட்³டெ³த்வா சதூஹி த்³வாரேஹி நிக்க²மிங்ஸு. ப⁴க³வா தேஸங் அத்தானங் த³ஸ்ஸெந்தோ அஞ்ஞேன த்³வாரேன க³ந்த⁴குடிங் பவிஸந்தோ விய அஹோஸி, தே ப⁴க³வந்தங் தி³ஸ்வா வந்தி³த்வா அட்ட²ங்ஸு . ப⁴க³வா ‘‘கிங், பி⁴க்க²வே, பீ⁴தத்தா²’’தி புச்சி², தே ‘‘அயங், ப⁴ந்தே, மிகா³ரமாதுபாஸாதோ³ கம்பிதோ’’தி ஆஹங்ஸு . ‘‘ஜானாத², பி⁴க்க²வே, கேனா’’தி? ‘‘ந ஜானாம, ப⁴ந்தே’’தி. அத² ப⁴க³வா ‘‘தும்ஹாதி³ஸானங், பி⁴க்க²வே, முட்ட²ஸ்ஸதீனங் அஸம்பஜானானங் பமாத³விஹாரீனங் ஸங்வேக³ஜனநத்த²ங் மொக்³க³ல்லானேன கம்பிதோ’’தி வத்வா தேஸங் பி⁴க்கூ²னங் த⁴ம்மதே³ஸனத்த²ங் இமங் ஸுத்தமபா⁴ஸி.
Bhagavā taṃ saddaṃ sutvā ‘‘ime mayā saddhiṃ vasantāpi evaṃ pamattā, aho ayuttakārino’’ti mahāmoggallānattherassa āgamanaṃ cintesi. Tāvadeva āyasmā mahāmoggallāno bhagavato cittaṃ ñatvā iddhiyā āgamma pādamūle vandamānoyeva ahosi. Tato naṃ bhagavā āmantesi – ‘‘ete te, moggallāna, sabrahmacārino pamattā, sādhu ne saṃvejehī’’ti. ‘‘Evaṃ bhante’’ti kho so āyasmā mahāmoggallāno bhagavato paṭissuṇitvā tāvadeva āpokasiṇaṃ samāpajjitvā karīsabhūmiyaṃ ṭhitaṃ mahāpāsādaṃ nāvaṃ viya mahāvāto pādaṅguṭṭhakena kampesi saddhiṃ patiṭṭhitapathavippadesena. Atha te bhikkhū bhītā vissaraṃ karontā sakasakacīvarāni chaḍḍetvā catūhi dvārehi nikkhamiṃsu. Bhagavā tesaṃ attānaṃ dassento aññena dvārena gandhakuṭiṃ pavisanto viya ahosi, te bhagavantaṃ disvā vanditvā aṭṭhaṃsu . Bhagavā ‘‘kiṃ, bhikkhave, bhītatthā’’ti pucchi, te ‘‘ayaṃ, bhante, migāramātupāsādo kampito’’ti āhaṃsu . ‘‘Jānātha, bhikkhave, kenā’’ti? ‘‘Na jānāma, bhante’’ti. Atha bhagavā ‘‘tumhādisānaṃ, bhikkhave, muṭṭhassatīnaṃ asampajānānaṃ pamādavihārīnaṃ saṃvegajananatthaṃ moggallānena kampito’’ti vatvā tesaṃ bhikkhūnaṃ dhammadesanatthaṃ imaṃ suttamabhāsi.
தத்த² உட்ட²ஹதா²தி ஆஸனா உட்ட²ஹத² க⁴டத² வாயமத², மா குஸீதா ஹோத². நிஸீத³தா²தி பல்லங்கங் ஆபு⁴ஜித்வா கம்மட்டா²னானுயோக³த்தா²ய நிஸீத³த². கோ அத்தோ² ஸுபிதேன வோதி கோ தும்ஹாகங் அனுபாதா³பரினிப்³பா³னத்தா²ய பப்³ப³ஜிதானங் ஸுபிதேன அத்தோ². ந ஹி ஸக்கா ஸுபந்தேன கோசி அத்தோ² பாபுணிதுங். ஆதுரானஞ்ஹி கா நித்³தா³, ஸல்லவித்³தா⁴ன ருப்பதந்தி யத்ர ச நாம அப்பகேபி ஸரீரப்பதே³ஸே உட்டி²தேன சக்கு²ரோகா³தி³னா ரோகே³ன ஆதுரானங் ஏகத்³வங்கு³லமத்தம்பி பவிட்டே²ன அயஸல்லஅட்டி²ஸல்லத³ந்தஸல்லவிஸாணஸல்லகட்ட²ஸல்லானங் அஞ்ஞதரேன ஸல்லேன ருப்பமானானங் மனுஸ்ஸானங் நித்³தா³ நத்தி², தத்த² தும்ஹாகங் ஸகலசித்தஸரீரஸந்தானங் ப⁴ஞ்ஜித்வா உப்பன்னேஹி நானப்பகாரகிலேஸரோகே³ஹி ஆதுரானஞ்ஹி கா நித்³தா³ ராக³ஸல்லாதீ³ஹி ச பஞ்சஹி ஸல்லேஹி அந்தோஹத³யங் பவிஸிய வித்³த⁴த்தா ஸல்லவித்³தா⁴னங் ருப்பதங்.
Tattha uṭṭhahathāti āsanā uṭṭhahatha ghaṭatha vāyamatha, mā kusītā hotha. Nisīdathāti pallaṅkaṃ ābhujitvā kammaṭṭhānānuyogatthāya nisīdatha. Ko attho supitena voti ko tumhākaṃ anupādāparinibbānatthāya pabbajitānaṃ supitena attho. Na hi sakkā supantena koci attho pāpuṇituṃ. Āturānañhi kā niddā, sallaviddhāna ruppatanti yatra ca nāma appakepi sarīrappadese uṭṭhitena cakkhurogādinā rogena āturānaṃ ekadvaṅgulamattampi paviṭṭhena ayasallaaṭṭhisalladantasallavisāṇasallakaṭṭhasallānaṃ aññatarena sallena ruppamānānaṃ manussānaṃ niddā natthi, tattha tumhākaṃ sakalacittasarīrasantānaṃ bhañjitvā uppannehi nānappakārakilesarogehi āturānañhi kā niddā rāgasallādīhi ca pañcahi sallehi antohadayaṃ pavisiya viddhattā sallaviddhānaṃ ruppataṃ.
335. ஏவங் வத்வா புன ப⁴க³வா பி⁴ய்யோஸோமத்தாய தே பி⁴க்கூ² உஸ்ஸாஹெந்தோ ஸங்வேஜெந்தோ ச ஆஹ – ‘‘உட்ட²ஹத²…பே॰… வஸானுகே³’’தி. தத்ராயங் ஸாதி⁴ப்பாயயோஜனா அத்த²வண்ணனா – ஏவங் கிலேஸஸல்லவித்³தா⁴னஞ்ஹி வோ, பி⁴க்க²வே, காலோ பபு³ஜ்ஜி²துங். கிங் காரணங்? மண்ட³பெய்யமித³ங், பி⁴க்க²வே, ப்³ரஹ்மசரியங், ஸத்தா² ஸம்முகீ²பூ⁴தோ, இதோ புப்³பே³ பன வோ தீ³க⁴ரத்தங் ஸுத்தங், கி³ரீஸு ஸுத்தங், நதீ³ஸு ஸுத்தங், ஸமேஸு ஸுத்தங், விஸமேஸு ஸுத்தங், ருக்க²க்³கே³ஸுபி ஸுத்தங் அத³ஸ்ஸனா அரியஸச்சானங், தஸ்மா தஸ்ஸா நித்³தா³ய அந்தகிரியத்த²ங் உட்ட²ஹத² நிஸீத³த² த³ள்ஹங் ஸிக்க²த² ஸந்தியா.
335. Evaṃ vatvā puna bhagavā bhiyyosomattāya te bhikkhū ussāhento saṃvejento ca āha – ‘‘uṭṭhahatha…pe… vasānuge’’ti. Tatrāyaṃ sādhippāyayojanā atthavaṇṇanā – evaṃ kilesasallaviddhānañhi vo, bhikkhave, kālo pabujjhituṃ. Kiṃ kāraṇaṃ? Maṇḍapeyyamidaṃ, bhikkhave, brahmacariyaṃ, satthā sammukhībhūto, ito pubbe pana vo dīgharattaṃ suttaṃ, girīsu suttaṃ, nadīsu suttaṃ, samesu suttaṃ, visamesu suttaṃ, rukkhaggesupi suttaṃ adassanā ariyasaccānaṃ, tasmā tassā niddāya antakiriyatthaṃ uṭṭhahatha nisīdatha daḷhaṃ sikkhatha santiyā.
தத்த² புரிமபாத³ஸ்ஸத்தோ² வுத்தனயோ ஏவ. து³தியபாதே³ பன ஸந்தீதி திஸ்ஸோ ஸந்தியோ – அச்சந்தஸந்தி, தத³ங்க³ஸந்தி, ஸம்முதிஸந்தீதி, நிப்³பா³னவிபஸ்ஸனாதி³ட்டி²க³தானமேதங் அதி⁴வசனங். இத⁴ பன அச்சந்தஸந்தி நிப்³பா³னமதி⁴ப்பேதங், தஸ்மா நிப்³பா³னத்த²ங் த³ள்ஹங் ஸிக்க²த², அஸிதி²லபரக்கமா ஹுத்வா ஸிக்க²தா²தி வுத்தங் ஹோதி. கிங் காரணங்? மா வோ பமத்தே விஞ்ஞாய, மச்சுராஜா அமோஹயித்த² வஸானுகே³ , மா தும்ஹே ‘‘பமத்தா ஏதே’’தி ஏவங் ஞத்வா மச்சுராஜபரியாயனாமோ மாரோ வஸானுகே³ அமோஹயித்த², யதா² தஸ்ஸ வஸங் க³ச்ச²த², ஏவங் வஸானுகே³ கரொந்தோ மா அமோஹயித்தா²தி வுத்தங் ஹோதி.
Tattha purimapādassattho vuttanayo eva. Dutiyapāde pana santīti tisso santiyo – accantasanti, tadaṅgasanti, sammutisantīti, nibbānavipassanādiṭṭhigatānametaṃ adhivacanaṃ. Idha pana accantasanti nibbānamadhippetaṃ, tasmā nibbānatthaṃ daḷhaṃ sikkhatha, asithilaparakkamā hutvā sikkhathāti vuttaṃ hoti. Kiṃ kāraṇaṃ? Mā vo pamatte viññāya, maccurājā amohayittha vasānuge, mā tumhe ‘‘pamattā ete’’ti evaṃ ñatvā maccurājapariyāyanāmo māro vasānuge amohayittha, yathā tassa vasaṃ gacchatha, evaṃ vasānuge karonto mā amohayitthāti vuttaṃ hoti.
336. யதோ தஸ்ஸ வஸங் அனுபக³ச்ச²ந்தா யாய தே³வா மனுஸ்ஸா ச…பே॰… ஸமப்பிதா, யாய தே³வா ச மனுஸ்ஸா ச அத்தி²கா ரூபஸத்³த³க³ந்த⁴ரஸபொ²ட்ட²ப்³ப³த்தி²கா, தங் ரூபாதி³ங் ஸிதா நிஸ்ஸிதா அல்லீனா ஹுத்வா திட்ட²ந்தி, தரத² ஸமதிக்கமத² ஏதங் நானப்பகாரேஸு விஸயேஸு விஸடவித்தி²ண்ணவிஸாலத்தா விஸத்திகங் ப⁴வபோ⁴க³தண்ஹங். க²ணோ வோ மா உபச்சகா³, அயங் தும்ஹாகங் ஸமணத⁴ம்மகரணக்க²ணோ மா அதிக்கமி. யேஸஞ்ஹி அயமேவரூபோ க²ணோ அதிக்கமதி, யே ச இமங் க²ணங் அதிக்கமந்தி, தே க²ணாதீதா ஹி ஸோசந்தி நிரயம்ஹி ஸமப்பிதா, நிரஸ்ஸாத³ட்டே²ன நிரயஸஞ்ஞிதே சதுப்³பி³தே⁴பி அபாயே பதிட்டி²தா ‘‘அகதங் வத நோ கல்யாண’’ந்திஆதி³னா நயேன ஸோசந்தி.
336. Yato tassa vasaṃ anupagacchantā yāya devā manussā ca…pe… samappitā, yāya devā ca manussā ca atthikā rūpasaddagandharasaphoṭṭhabbatthikā, taṃ rūpādiṃ sitā nissitā allīnā hutvā tiṭṭhanti, taratha samatikkamatha etaṃ nānappakāresu visayesu visaṭavitthiṇṇavisālattā visattikaṃ bhavabhogataṇhaṃ. Khaṇo vo mā upaccagā, ayaṃ tumhākaṃ samaṇadhammakaraṇakkhaṇo mā atikkami. Yesañhi ayamevarūpo khaṇo atikkamati, ye ca imaṃ khaṇaṃ atikkamanti, te khaṇātītā hi socanti nirayamhi samappitā, nirassādaṭṭhena nirayasaññite catubbidhepi apāye patiṭṭhitā ‘‘akataṃ vata no kalyāṇa’’ntiādinā nayena socanti.
337. ஏவங் ப⁴க³வா தே பி⁴க்கூ² உஸ்ஸாஹெத்வா ஸங்வேஜெத்வா ச இதா³னி தேஸங் தங் பமாத³விஹாரங் விக³ரஹித்வா ஸப்³பே³வ தே அப்பமாதே³ நியோஜெந்தோ ‘‘பமாதோ³ ரஜோ’’தி இமங் கா³த²மாஹ. தத்த² பமாதோ³தி ஸங்கே²பதோ ஸதிவிப்பவாஸோ, ஸோ சித்தமலினட்டே²ன ரஜோ. தங் பமாத³மனுபதிதோ பமாதா³னுபதிதோ, பமாதா³னுபதிதத்தா அபராபருப்பன்னோ பமாதோ³ ஏவ, ஸோபி ரஜோ. ந ஹி கதா³சி பமாதோ³ நாம அரஜோ அத்தி². தேன கிங் தீ³பேதி? மா தும்ஹே ‘‘த³ஹரா தாவ மயங் பச்சா² ஜானிஸ்ஸாமா’’தி விஸ்ஸாஸமாபஜ்ஜித்த². த³ஹரகாலேபி ஹி பமாதோ³ ரஜோ, மஜ்ஜி²மகாலேபி தே²ரகாலேபி பமாதா³னுபதிதத்தா மஹாரஜோ ஸங்காரகூடோ ஏவ ஹோதி, யதா² க⁴ரே ஏகத்³வேதி³வஸிகோ ரஜோ ரஜோ ஏவ, வட்³ட⁴மானோ பன க³ணவஸ்ஸிகோ ஸங்காரகூடோ ஏவ ஹோதி. ஏவங் ஸந்தேபி பன பட²மவயே பு³த்³த⁴வசனங் பரியாபுணித்வா இதரவயேஸு ஸமணத⁴ம்மங் கரொந்தோ, பட²மவயே வா பரியாபுணித்வா மஜ்ஜி²மவயே ஸுணித்வா பச்சி²மவயே ஸமணத⁴ம்மங் கரொந்தோபி பி⁴க்கு² பமாத³விஹாரீ ந ஹோதி அப்பமாதா³னுலோமபடிபத³ங் படிபன்னத்தா. யோ பன ஸப்³ப³வயேஸு பமாத³விஹாரீ தி³வாஸெய்யங் ஆமிஸகத²ஞ்ச அனுயுத்தோ, ஸெய்யதா²பி தும்ஹே, தஸ்ஸேவ ஸோ பட²மவயே பமாதோ³ ரஜோ, இதரவயேஸு பமாதா³னுபதிதோ மஹாபமாதோ³ ச மஹாரஜோ ஏவாதி.
337. Evaṃ bhagavā te bhikkhū ussāhetvā saṃvejetvā ca idāni tesaṃ taṃ pamādavihāraṃ vigarahitvā sabbeva te appamāde niyojento ‘‘pamādo rajo’’ti imaṃ gāthamāha. Tattha pamādoti saṅkhepato sativippavāso, so cittamalinaṭṭhena rajo. Taṃ pamādamanupatito pamādānupatito, pamādānupatitattā aparāparuppanno pamādo eva, sopi rajo. Na hi kadāci pamādo nāma arajo atthi. Tena kiṃ dīpeti? Mā tumhe ‘‘daharā tāva mayaṃ pacchā jānissāmā’’ti vissāsamāpajjittha. Daharakālepi hi pamādo rajo, majjhimakālepi therakālepi pamādānupatitattā mahārajo saṅkārakūṭo eva hoti, yathā ghare ekadvedivasiko rajo rajo eva, vaḍḍhamāno pana gaṇavassiko saṅkārakūṭo eva hoti. Evaṃ santepi pana paṭhamavaye buddhavacanaṃ pariyāpuṇitvā itaravayesu samaṇadhammaṃ karonto, paṭhamavaye vā pariyāpuṇitvā majjhimavaye suṇitvā pacchimavaye samaṇadhammaṃ karontopi bhikkhu pamādavihārī na hoti appamādānulomapaṭipadaṃ paṭipannattā. Yo pana sabbavayesu pamādavihārī divāseyyaṃ āmisakathañca anuyutto, seyyathāpi tumhe, tasseva so paṭhamavaye pamādo rajo, itaravayesu pamādānupatito mahāpamādo ca mahārajo evāti.
ஏவங் தேஸங் பமாத³விஹாரங் விக³ரஹித்வா அப்பமாதே³ நியோஜெந்தோ ஆஹ – ‘‘அப்பமாதே³ன விஜ்ஜாய, அப்³ப³ஹே ஸல்லமத்தனோ’’தி, தஸ்ஸத்தோ² – யஸ்மா ஏவமேஸோ ஸப்³ப³தா³பி பமாதோ³ ரஜோ, தஸ்மா ஸதிஅவிப்பவாஸஸங்கா²தேன அப்பமாதே³ன ஆஸவானங் க²யஞாணஸங்கா²தாய ச விஜ்ஜாய பண்டி³தோ குலபுத்தோ உத்³த⁴ரே அத்தனோ ஹத³யனிஸ்ஸிதங் ராகா³தி³பஞ்சவித⁴ங் ஸல்லந்தி அரஹத்தனிகூடேன தே³ஸனங் ஸமாபேஸி. தே³ஸனாபரியோஸானே ஸங்வேக³மாபஜ்ஜித்வா தமேவ த⁴ம்மதே³ஸனங் மனஸி கரித்வா பச்சவெக்க²மானா விபஸ்ஸனங் ஆரபி⁴த்வா பஞ்சஸதாபி தே பி⁴க்கூ² அரஹத்தே பதிட்ட²ஹிங்ஸூதி.
Evaṃ tesaṃ pamādavihāraṃ vigarahitvā appamāde niyojento āha – ‘‘appamādena vijjāya, abbahe sallamattano’’ti, tassattho – yasmā evameso sabbadāpi pamādo rajo, tasmā satiavippavāsasaṅkhātena appamādena āsavānaṃ khayañāṇasaṅkhātāya ca vijjāya paṇḍito kulaputto uddhare attano hadayanissitaṃ rāgādipañcavidhaṃ sallanti arahattanikūṭena desanaṃ samāpesi. Desanāpariyosāne saṃvegamāpajjitvā tameva dhammadesanaṃ manasi karitvā paccavekkhamānā vipassanaṃ ārabhitvā pañcasatāpi te bhikkhū arahatte patiṭṭhahiṃsūti.
பரமத்த²ஜோதிகாய கு²த்³த³க-அட்ட²கதா²ய
Paramatthajotikāya khuddaka-aṭṭhakathāya
ஸுத்தனிபாத-அட்ட²கதா²ய உட்டா²னஸுத்தவண்ணனா நிட்டி²தா.
Suttanipāta-aṭṭhakathāya uṭṭhānasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஸுத்தனிபாதபாளி • Suttanipātapāḷi / 10. உட்டா²னஸுத்தங் • 10. Uṭṭhānasuttaṃ
