| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
5. உத்தியஸுத்தவண்ணனா
5. Uttiyasuttavaṇṇanā
95. பஞ்சமே துண்ஹீ அஹோஸீதி ஸத்தூபலத்³தி⁴யங் ட²த்வா அபுச்ச²ங் புச்ச²தீதி துண்ஹீ அஹோஸி. ஸப்³ப³ஸாமுக்கங்ஸிகங் வத மேதி மயா ஸப்³ப³புச்சா²னங் உத்தமபுச்ச²ங் புச்சி²தோ ஸமணோ கோ³தமோ ஸங்ஸாதே³தி நோ விஸ்ஸஜ்ஜேதி, நூன ந விஸஹதி ந ஸக்கோதி விஸ்ஸஜ்ஜேதுந்தி ஏவங் பாபிகங் தி³ட்டி²ங் மா படிலபீ⁴தி. தத³ஸ்ஸாதி தங் ஏவங் உப்பன்னங் தி³ட்டி²க³தங் ப⁴வெய்ய. பச்சந்திமந்தி யஸ்மா மஜ்ஜி²மதே³ஸே நக³ரஸ்ஸ உத்³தா⁴பாதீ³னி தி²ரானி வா ஹொந்து து³ப்³ப³லானி வா, ஸப்³ப³ஸோ வா பன மா ஹொந்து, சோராஸங்கா ந ஹோதி. தஸ்மா தங் அக்³க³ஹெத்வா ‘‘பச்சந்திமங் நக³ர’’ந்தி ஆஹ. த³ள்ஹுத்³தா⁴பந்தி தி²ரபாகாரபாத³ங். த³ள்ஹபாகாரதோரணந்தி தி²ரபாகாரஞ்சேவ தி²ரபிட்டி²ஸங்கா⁴டஞ்ச. ஏகத்³வாரந்தி கஸ்மா ஆஹ? ப³ஹுத்³வாரஸ்மிஞ்ஹி நக³ரே ப³ஹூஹி பண்டி³ததோ³வாரிகேஹி ப⁴விதப்³ப³ங், ஏகத்³வாரே ஏகோவ வட்டதி. ததா²க³தஸ்ஸ ச பஞ்ஞாய அஞ்ஞோ ஸதி³ஸோ நத்தி². தஸ்மா ஸத்து² பண்டி³தபா⁴வஸ்ஸ ஓபம்மத்த²ங் ஏகங்யேவ தோ³வாரிகங் த³ஸ்ஸேதுங் ‘‘ஏகத்³வார’’ந்தி ஆஹ. பண்டி³தோதி பண்டி³ச்சேன ஸமன்னாக³தோ. ப்³யத்தோதி வெய்யத்தியேன ஸமன்னாக³தோ. மேதா⁴வீதி டா²னுப்பத்தியபஞ்ஞாஸங்கா²தாய மேதா⁴ய ஸமன்னாக³தோ. அனுபரியாயபத²ந்தி அனுபரியாயனாமகங் மக்³க³ங். பாகாரஸந்தி⁴ந்தி த்³வின்னங் இட்ட²கானங் அபக³தட்டா²னங். பாகாரவிவரந்தி பாகாரஸ்ஸ சி²ன்னட்டா²னங். ததே³வேதங் பஞ்ஹந்தி தங்யேவ ‘‘ஸஸ்ஸதோ லோகோ’’திஆதி³னா நயேன புட்ட²ங் ட²பனீயபஞ்ஹங் புனபி புச்சி². ஸப்³போ³ ச தேன லோகோதி ஸத்தூபலத்³தி⁴யங்யேவ ட²த்வா அஞ்ஞேனாகாரேன புச்ச²தீதி த³ஸ்ஸேதி.
95. Pañcame tuṇhī ahosīti sattūpaladdhiyaṃ ṭhatvā apucchaṃ pucchatīti tuṇhī ahosi. Sabbasāmukkaṃsikaṃ vata meti mayā sabbapucchānaṃ uttamapucchaṃ pucchito samaṇo gotamo saṃsādeti no vissajjeti, nūna na visahati na sakkoti vissajjetunti evaṃ pāpikaṃ diṭṭhiṃ mā paṭilabhīti. Tadassāti taṃ evaṃ uppannaṃ diṭṭhigataṃ bhaveyya. Paccantimanti yasmā majjhimadese nagarassa uddhāpādīni thirāni vā hontu dubbalāni vā, sabbaso vā pana mā hontu, corāsaṅkā na hoti. Tasmā taṃ aggahetvā ‘‘paccantimaṃ nagara’’nti āha. Daḷhuddhāpanti thirapākārapādaṃ. Daḷhapākāratoraṇanti thirapākārañceva thirapiṭṭhisaṅghāṭañca. Ekadvāranti kasmā āha? Bahudvārasmiñhi nagare bahūhi paṇḍitadovārikehi bhavitabbaṃ, ekadvāre ekova vaṭṭati. Tathāgatassa ca paññāya añño sadiso natthi. Tasmā satthu paṇḍitabhāvassa opammatthaṃ ekaṃyeva dovārikaṃ dassetuṃ ‘‘ekadvāra’’nti āha. Paṇḍitoti paṇḍiccena samannāgato. Byattoti veyyattiyena samannāgato. Medhāvīti ṭhānuppattiyapaññāsaṅkhātāya medhāya samannāgato. Anupariyāyapathanti anupariyāyanāmakaṃ maggaṃ. Pākārasandhinti dvinnaṃ iṭṭhakānaṃ apagataṭṭhānaṃ. Pākāravivaranti pākārassa chinnaṭṭhānaṃ. Tadevetaṃ pañhanti taṃyeva ‘‘sassato loko’’tiādinā nayena puṭṭhaṃ ṭhapanīyapañhaṃ punapi pucchi. Sabbo ca tena lokoti sattūpaladdhiyaṃyeva ṭhatvā aññenākārena pucchatīti dasseti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 5. உத்தியஸுத்தங் • 5. Uttiyasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 5. உத்தியஸுத்தவண்ணனா • 5. Uttiyasuttavaṇṇanā
