| Library / Tipiṭaka / તિપિટક • Tipiṭaka / ખુદ્દસિક્ખા-મૂલસિક્ખા • Khuddasikkhā-mūlasikkhā |
૧૬. વચ્ચપ્પસ્સાવટ્ઠાનિકનિદ્દેસવણ્ણના
16. Vaccappassāvaṭṭhānikaniddesavaṇṇanā
૧૫૬. યથાવુડ્ઢં ન કરેય્ય વચ્ચન્તિ સમ્બન્ધો. યથાનુપુબ્બિયા લબ્ભતીતિ સમ્બન્ધો. ઇમેસુ પન તીસુ ઠાનેસુ યો યો પઠમં આગચ્છતિ વુડ્ઢો વા નવો વા, સો સો આગતપટિપાટિયા કાતુઞ્ચ નહાયિતુઞ્ચ લબ્ભતીતિ અધિપ્પાયો.
156. Yathāvuḍḍhaṃ na kareyya vaccanti sambandho. Yathānupubbiyā labbhatīti sambandho. Imesu pana tīsu ṭhānesu yo yo paṭhamaṃ āgacchati vuḍḍho vā navo vā, so so āgatapaṭipāṭiyā kātuñca nahāyituñca labbhatīti adhippāyo.
૧૫૭. ઉબ્ભજિત્વાતિ (ચૂળવ॰ ૩૭૩, ૩૭૪) નિવાસનં દૂરતોવ ઉક્ખિપિત્વા નો પવિસેય્ય. સહસા ચ નો પવિસેય્યાતિ સમ્બન્ધો. ‘‘બહિ ઠિતેન ઉક્કાસિતબ્બ’’ન્તિ ચ ‘‘સાધુકં અતરમાનેન વચ્ચકુટિ પવિસિતબ્બા’’તિ ચ વુત્તત્તા ઉક્કાસિત્વાવ અતરમાનો પવિસેય્યાતિ અત્થો. ‘‘ન ઉબ્ભજિત્વા પવિસિતબ્બા, વચ્ચપાદુકાય ઠિતેન ઉબ્ભજિતબ્બ’’ન્તિ (ચૂળવ॰ ૩૭૪) વચનતો ‘‘ઉબ્ભજેય્ય પાદુકાસ્વેવ સણ્ઠિતો’’તિ વુત્તં.
157.Ubbhajitvāti (cūḷava. 373, 374) nivāsanaṃ dūratova ukkhipitvā no paviseyya. Sahasā ca no paviseyyāti sambandho. ‘‘Bahi ṭhitena ukkāsitabba’’nti ca ‘‘sādhukaṃ ataramānena vaccakuṭi pavisitabbā’’ti ca vuttattā ukkāsitvāva ataramāno paviseyyāti attho. ‘‘Na ubbhajitvā pavisitabbā, vaccapādukāya ṭhitena ubbhajitabba’’nti (cūḷava. 374) vacanato ‘‘ubbhajeyya pādukāsveva saṇṭhito’’ti vuttaṃ.
૧૫૮. ન કરેય્ય ઉભયં ન કરેય્યુભયં.
158. Na kareyya ubhayaṃ na kareyyubhayaṃ.
૧૫૯. કૂપેતિ (ચૂળવ॰ ૩૭૪) વચ્ચકૂપે. કટ્ઠન્તિ અવલેખનકટ્ઠં. પસ્સાવદોણિયા ખેળં ન કાતબ્બન્તિ અત્થો. નાવલેખેય્ય ફરુસેનાતિ ફાલિતકટ્ઠેન વા ખરેન વા ગણ્ઠિકેન વા કણ્ટકેન વા સુસિરેન વા પૂતિના વા નાવલેખિતબ્બન્તિ અત્થો. ઉહતઞ્ચાપીતિ ગૂથમક્ખિતમ્પિ ધોવયે અત્તના વા પરેન વા કતન્તિ અધિપ્પાયો.
159.Kūpeti (cūḷava. 374) vaccakūpe. Kaṭṭhanti avalekhanakaṭṭhaṃ. Passāvadoṇiyā kheḷaṃ na kātabbanti attho. Nāvalekheyya pharusenāti phālitakaṭṭhena vā kharena vā gaṇṭhikena vā kaṇṭakena vā susirena vā pūtinā vā nāvalekhitabbanti attho. Uhatañcāpīti gūthamakkhitampi dhovaye attanā vā parena vā katanti adhippāyo.
૧૬૦. ઉબ્ભજિત્વા ન નિક્ખમેતિ એત્થ ‘‘વચ્ચપાદુકાય ઠિતેન પટિચ્છાદેતબ્બ’’ન્તિ (ચૂળવ॰ ૩૭૪) હિ વુત્તં, પુન ‘‘આચમનપાદુકાયં ઠિતેન ઉબ્ભજિતબ્બ’’ન્તિ (ચૂળવ॰ ૩૭૪) ચ વુત્તં. ‘‘ચપુ ચપૂ’’તિ સદ્દં કત્વા નાચમેય્યાતિ અત્થો. વચ્ચપ્પસ્સાવટ્ઠાનિકવિનિચ્છયો.
160.Ubbhajitvā na nikkhameti ettha ‘‘vaccapādukāya ṭhitena paṭicchādetabba’’nti (cūḷava. 374) hi vuttaṃ, puna ‘‘ācamanapādukāyaṃ ṭhitena ubbhajitabba’’nti (cūḷava. 374) ca vuttaṃ. ‘‘Capu capū’’ti saddaṃ katvā nācameyyāti attho. Vaccappassāvaṭṭhānikavinicchayo.
વચ્ચપ્પસ્સાવટ્ઠાનિકનિદ્દેસવણ્ણના નિટ્ઠિતા.
Vaccappassāvaṭṭhānikaniddesavaṇṇanā niṭṭhitā.
