| Library / Tipiṭaka / તિપિટક • Tipiṭaka / અઙ્ગુત્તરનિકાય (ટીકા) • Aṅguttaranikāya (ṭīkā) |
૭. વચ્છગોત્તસુત્તવણ્ણના
7. Vacchagottasuttavaṇṇanā
૫૮. સત્તમે મહાવિપાકન્તિ ઉળારફલં બહુવિપાકં. ધમ્મો નામ કથિતકથા ‘‘અત્થં દહતિ વિદહતી’’તિ કત્વા. અનુધમ્મો નામ પટિકથનં ‘‘તં અનુગતો ધમ્મો’’તિ કત્વા. સહ ધમ્મેનાતિ સહધમ્મો, સો એવ સહધમ્મિકો. ધમ્મસદ્દો ચેત્થ કારણપરિયાયોતિ આહ ‘‘સકારણો’’તિ. વાદસ્સાતિ વચનસ્સ. અનુપાતો અનુપચ્છા પવત્તિ.
58. Sattame mahāvipākanti uḷāraphalaṃ bahuvipākaṃ. Dhammo nāma kathitakathā ‘‘atthaṃ dahati vidahatī’’ti katvā. Anudhammo nāma paṭikathanaṃ ‘‘taṃ anugato dhammo’’ti katvā. Saha dhammenāti sahadhammo, so eva sahadhammiko. Dhammasaddo cettha kāraṇapariyāyoti āha ‘‘sakāraṇo’’ti. Vādassāti vacanassa. Anupāto anupacchā pavatti.
પરિપન્થે તિટ્ઠતીતિ પારિપન્થિકો. પન્થે ઠત્વા પરેસં સાપતેય્યં છિન્દનતો પન્થદૂહનચોરો. યદિ પચ્ચવેક્ખણઞાણં, કથં તં અસેક્ખન્તિ આહ ‘‘અસેક્ખસ્સ પવત્તત્તા’’તિ. ઇતરાનીતિ સીલક્ખન્ધાદીનિ. સયમ્પીતિ પિ-સદ્દો ‘‘અસેક્ખસ્સ પવત્તા ચા’’તિ ઇમમત્થં સમ્પિણ્ડેતિ.
Paripanthe tiṭṭhatīti pāripanthiko. Panthe ṭhatvā paresaṃ sāpateyyaṃ chindanato panthadūhanacoro. Yadi paccavekkhaṇañāṇaṃ, kathaṃ taṃ asekkhanti āha ‘‘asekkhassa pavattattā’’ti. Itarānīti sīlakkhandhādīni. Sayampīti pi-saddo ‘‘asekkhassa pavattā cā’’ti imamatthaṃ sampiṇḍeti.
નિબ્બિસેવનોતિ વિસેવનરહિતો વિગતવિલોમભાવો. ન ઉપપરિક્ખન્તીતિ ન વિચારેન્તિ. જાતિં નિબ્બત્તિં યાતિ ઉપગચ્છતીતિ જાતિયો, જાતોતિ અત્થો. તેનાહ ‘‘યત્થ કત્થચિ કુલજાતે’’તિ.
Nibbisevanoti visevanarahito vigatavilomabhāvo. Na upaparikkhantīti na vicārenti. Jātiṃ nibbattiṃ yāti upagacchatīti jātiyo, jātoti attho. Tenāha ‘‘yattha katthaci kulajāte’’ti.
કેવલીતિ કેવલવા, પારિપૂરિમાતિ અત્થો. તેનાહ ‘‘પરિપુણ્ણભાવેન યુત્તો’’તિ. એતં કેવલીતિ પદં. અભિઞ્ઞાપારન્તિ અભિજાનસ્સ પારં. પરિયન્તં ગતત્તા પારગૂ. એસ નયો સેસપદેસુપિ. ખેત્તવિનિચ્છયસવનેનાતિ ‘‘ઇમેહિ સીલાદિગુણસમ્પન્ના સદેવકે લોકે પુઞ્ઞસ્સ ખેત્તં, તદઞ્ઞો ન ખેત્ત’’ન્તિ એવં ખેત્તવિનિચ્છયસવનેન રહિતા.
Kevalīti kevalavā, pāripūrimāti attho. Tenāha ‘‘paripuṇṇabhāvena yutto’’ti. Etaṃ kevalīti padaṃ. Abhiññāpāranti abhijānassa pāraṃ. Pariyantaṃ gatattā pāragū. Esa nayo sesapadesupi. Khettavinicchayasavanenāti ‘‘imehi sīlādiguṇasampannā sadevake loke puññassa khettaṃ, tadañño na khetta’’nti evaṃ khettavinicchayasavanena rahitā.
વચ્છગોત્તસુત્તવણ્ણના નિટ્ઠિતા.
Vacchagottasuttavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / અઙ્ગુત્તરનિકાય • Aṅguttaranikāya / ૭. વચ્છગોત્તસુત્તં • 7. Vacchagottasuttaṃ
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) / ૭. વચ્છગોત્તસુત્તવણ્ણના • 7. Vacchagottasuttavaṇṇanā
