| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
4. சதுத்த²பாராஜிகங்
4. Catutthapārājikaṃ
சதுஸச்சவிதூ³தி சத்தாரி ஸச்சானி ஸமாஹடானி சதுஸச்சங், தங் அவேதி³ படிவிஜ்ஜீ²தி சதுஸச்சவிதூ³. ஸதிபி ஸாவகானங் பச்சேகபு³த்³தா⁴னஞ்ச சதுஸச்சவிது³பா⁴வே அனஞ்ஞபுப்³ப³கத்தா ப⁴க³வதோ சதுஸச்சத³ஸ்ஸனஸ்ஸ தத்த² ச ஸப்³ப³ஞ்ஞுதாய ப³லேஸு ச வஸீபா⁴வஸ்ஸ பத்திதோ பரஸந்தானேஸு பஸாரிதபா⁴வேன பாகடத்தா ச ப⁴க³வாவ விஸேஸேன ‘‘சதுஸச்சவிதூ³’’தி தோ²மனங் அரஹதி.
Catusaccavidūti cattāri saccāni samāhaṭāni catusaccaṃ, taṃ avedi paṭivijjhīti catusaccavidū. Satipi sāvakānaṃ paccekabuddhānañca catusaccavidubhāve anaññapubbakattā bhagavato catusaccadassanassa tattha ca sabbaññutāya balesu ca vasībhāvassa pattito parasantānesu pasāritabhāvena pākaṭattā ca bhagavāva visesena ‘‘catusaccavidū’’ti thomanaṃ arahati.
வக்³கு³முதா³தீரியபி⁴க்கு²வத்து²வண்ணனா
Vaggumudātīriyabhikkhuvatthuvaṇṇanā
193. அதி⁴ட்டே²மாதி ஸங்வித³ஹாம. தூ³தகம்மந்தி கி³ஹீனங் பண்ணங் வா ஸாஸனங் வா க³ஹெத்வா தத்த² தத்த² க³மனங். இரியாபத²ங் ஸண்ட²பெத்வாதி பதா⁴னானுரூபங் கத்வா. புச்ச²ந்தானங் வாதி ‘‘அய்யா ஸந்தஇரியாபதா² அதிவிய உபஸந்தா, கதரங் விஸேஸமதி⁴க³ச்சி²ங்ஸூ’’தி புச்ச²ந்தானங். அனாக³தஸம்ப³ந்தே⁴ பன அஸதீதி ‘‘பா⁴ஸிதோ ப⁴விஸ்ஸதீ’’தி பாட²ஸேஸங் கத்வா அனாக³தஸம்ப³ந்தே⁴ அஸதி. ‘‘பா⁴ஸிதோ’’தி அதீதவசனங் கத²ங் அனாக³தவசனேன ஸம்ப³ந்த⁴முபக³ச்ச²தீதி ஆஹ ‘‘லக்க²ணங் பன ஸத்³த³ஸத்த²தோ பரியேஸிதப்³ப³’’ந்தி. ஈதி³ஸே ஹி டா²னே ‘‘தா⁴துஸம்ப³ந்தே⁴ பச்சயா’’தி இமினா லக்க²ணேன தா⁴த்வத்த²ஸம்ப³ந்தே⁴ ஸதி அயதா²காலவிஹிதாபி பச்சயா ஸாத⁴வோ ப⁴வந்தீதி ஸத்³த³ஸத்த²விதூ³ வத³ந்தி.
193.Adhiṭṭhemāti saṃvidahāma. Dūtakammanti gihīnaṃ paṇṇaṃ vā sāsanaṃ vā gahetvā tattha tattha gamanaṃ. Iriyāpathaṃ saṇṭhapetvāti padhānānurūpaṃ katvā. Pucchantānaṃ vāti ‘‘ayyā santairiyāpathā ativiya upasantā, kataraṃ visesamadhigacchiṃsū’’ti pucchantānaṃ. Anāgatasambandhe pana asatīti ‘‘bhāsito bhavissatī’’ti pāṭhasesaṃ katvā anāgatasambandhe asati. ‘‘Bhāsito’’ti atītavacanaṃ kathaṃ anāgatavacanena sambandhamupagacchatīti āha ‘‘lakkhaṇaṃ pana saddasatthato pariyesitabba’’nti. Īdise hi ṭhāne ‘‘dhātusambandhe paccayā’’ti iminā lakkhaṇena dhātvatthasambandhe sati ayathākālavihitāpi paccayā sādhavo bhavantīti saddasatthavidū vadanti.
194. வண்ணவாதி இமினா ஸகலஸரீரானுக³தவண்ணஸ்ஸ மனாபதா வுத்தா. பஸன்னமுக²வண்ணாதி இமினா ஸகலஸரீரவண்ணதோபி அதி⁴கதரங் முக²வண்ணஸ்ஸ மனாபதா வுத்தா. விப்பஸன்னச²விவண்ணாதி இமினா பன விஜ்ஜமானஸ்ஸேவ ஸரீரவண்ணஸ்ஸ அதிவிய பஸன்னதா வுத்தா. யஸ்மா இந்த்³ரியானங் ஊனத்தங் வா பூரணத்தங் வா நத்தி², தஸ்மா ‘‘அபி⁴னிவிட்டோ²காஸஸ்ஸ பரிபுண்ணத்தா’’தி வுத்தங். ச²ட்ட²ஸ்ஸ அபி⁴னிவிட்டோ²காஸோ ஹத³யவத்து², பஞ்சபஸாதா³னங் அபி⁴னிவிட்டோ²காஸஸ்ஸ பரிபுண்ணதாவசனேனேவ ஹத³யவத்து²ஆதி³ஸகலஸரீரஸ்ஸ பரிபுண்ணதா த³ஸ்ஸிதாயேவ ஹோதீதி ஆஹ – ‘‘மனச்ச²ட்டா²னங் இந்த்³ரியான’’ந்தி. யதா² தந்தி எத்த² தந்தி நிபாதமத்தங். ப⁴ந்தமிக³ப்படிபா⁴கா³தி கத்தப்³பா³கத்தப்³ப³ஸ்ஸ அஜானநதோ ப⁴ந்தமிக³ஸதி³ஸா. சதுசக்கந்தி சதுஇரியாபத²ங். இரியாபதோ² ஹி இத⁴ பவத்தனட்டே²ன ‘‘சக்க’’ந்தி அதி⁴ப்பேதோ. நவத்³வாரந்தி நவஹி வணமுகே²ஹி நவத்³வாரங். து³க்க²ந்தி ஸீஸரோகா³தி³து³க்க²ங். ஸப்³ப³கிச்சேஸூதி பத்தபசனசீவரரஜனயோக³ட்டா²னாதி³கிச்சேஸு. யாபேதுந்தி வஹிதுங் பவத்தேதுங். தேனாஹ ‘‘க³மேது’’ந்தி.
194.Vaṇṇavāti iminā sakalasarīrānugatavaṇṇassa manāpatā vuttā. Pasannamukhavaṇṇāti iminā sakalasarīravaṇṇatopi adhikataraṃ mukhavaṇṇassa manāpatā vuttā. Vippasannachavivaṇṇāti iminā pana vijjamānasseva sarīravaṇṇassa ativiya pasannatā vuttā. Yasmā indriyānaṃ ūnattaṃ vā pūraṇattaṃ vā natthi, tasmā ‘‘abhiniviṭṭhokāsassa paripuṇṇattā’’ti vuttaṃ. Chaṭṭhassa abhiniviṭṭhokāso hadayavatthu, pañcapasādānaṃ abhiniviṭṭhokāsassa paripuṇṇatāvacaneneva hadayavatthuādisakalasarīrassa paripuṇṇatā dassitāyeva hotīti āha – ‘‘manacchaṭṭhānaṃindriyāna’’nti. Yathā tanti ettha tanti nipātamattaṃ. Bhantamigappaṭibhāgāti kattabbākattabbassa ajānanato bhantamigasadisā. Catucakkanti catuiriyāpathaṃ. Iriyāpatho hi idha pavattanaṭṭhena ‘‘cakka’’nti adhippeto. Navadvāranti navahi vaṇamukhehi navadvāraṃ. Dukkhanti sīsarogādidukkhaṃ. Sabbakiccesūti pattapacanacīvararajanayogaṭṭhānādikiccesu. Yāpetunti vahituṃ pavattetuṃ. Tenāha ‘‘gametu’’nti.
195. ஸந்தோதி இமினா தேஸங் விஜ்ஜமானதங் த³ஸ்ஸேதி, ஸங்விஜ்ஜமானாதி இமினா பன தேஸங் உபலப்³ப⁴மானதங் த³ஸ்ஸேதி. தேனாஹ – ‘‘அத்தி² சேவ உபலப்³ப⁴ந்தி சா’’தி. உபலப்³ப⁴ந்தீதி தி³ஸ்ஸந்தி, ஞாயந்தீதி அத்தோ². பந்த²தூ³ஹனகம்மந்தி பந்த²கா⁴தனகம்மங். ஹனந்தோதி மாரெந்தோ. கா⁴தெந்தோதி மாராபெந்தோ. அத² வா ஹனந்தோதி ப³ந்த⁴னதாளனாதீ³ஹி ஹிங்ஸந்தோ. கா⁴தெந்தோதி மாரெந்தோ. சி²ந்த³ந்தோதி பரேஸங் ஹத்தா²தீ³னி சி²ந்த³ந்தோ. பசந்தோதி த³ண்டே³ன உப்பீளெந்தோ. பசனஞ்ஹெத்த² த³ஹனங் விபா³த⁴னங் அதி⁴ப்பேதங். பசந்தோதி வா தஜ்ஜெந்தோ தாஸெந்தோ. அத² வா பசந்தோதி கா³மேஸு அக்³கி³பாதனவஸேன கே³ஹாதீ³னி ஜா²பெத்வா தத்த² அஜேளகாதீ³னி பசந்தோ.
195.Santoti iminā tesaṃ vijjamānataṃ dasseti, saṃvijjamānāti iminā pana tesaṃ upalabbhamānataṃ dasseti. Tenāha – ‘‘atthi ceva upalabbhanti cā’’ti. Upalabbhantīti dissanti, ñāyantīti attho. Panthadūhanakammanti panthaghātanakammaṃ. Hanantoti mārento. Ghātentoti mārāpento. Atha vā hanantoti bandhanatāḷanādīhi hiṃsanto. Ghātentoti mārento. Chindantoti paresaṃ hatthādīni chindanto. Pacantoti daṇḍena uppīḷento. Pacanañhettha dahanaṃ vibādhanaṃ adhippetaṃ. Pacantoti vā tajjento tāsento. Atha vā pacantoti gāmesu aggipātanavasena gehādīni jhāpetvā tattha ajeḷakādīni pacanto.
யே ஸிக்கா²பதே³ஸு ப³ஹுலகா³ரவா ந ஹொந்தி ஆபத்திவீதிக்கமப³ஹுலா, தே ஸிக்கா²பதே³ஸு அதிப்³ப³கா³ரவா. உத்³த⁴தேதி அகப்பியே கப்பியஸஞ்ஞிதாய கப்பியே அகப்பியஸஞ்ஞிதாய அவஜ்ஜே வஜ்ஜஸஞ்ஞிதாய வஜ்ஜே அவஜ்ஜஸஞ்ஞிதாய ச உத்³த⁴ச்சபகதிகே. உன்னளேதி உக்³க³தனளே, உட்டி²ததுச்ச²மானேதி வுத்தங் ஹோதி. சபலேதி பத்தசீவரமண்ட³னாதி³னா சாபல்லேன யுத்தே. முக²ரேதி முக²க²ரே , க²ரவசனேதி வுத்தங் ஹோதி. விகிண்ணவாசேதி அஸங்யதவசனே தி³வஸம்பி நிரத்த²கவசனப்பலாபினே. முட்டா² நட்டா² ஸதி ஏதேஸந்தி முட்ட²ஸ்ஸதீ, ஸதிவிரஹிதேதி வுத்தங் ஹோதி. அஸம்பஜானேதி நிப்பஞ்ஞே. பாகதிந்த்³ரியேதி ஸங்வராபா⁴வேன கி³ஹிகாலே விய விவடஇந்த்³ரியே. ஆசரியுபஜ்ஜா²யேஹி பரிச்சத்தகேதி த⁴ம்மேன ஆமிஸேன ச அஸங்க³ஹெத்வா ஆசரியுபஜ்ஜா²யேஹி பரிச்சத்தே அனாதே² அப்பதிட்டே². லாப⁴க³ருகேதி பச்சயக³ருகே.
Ye sikkhāpadesu bahulagāravā na honti āpattivītikkamabahulā, te sikkhāpadesu atibbagāravā. Uddhateti akappiye kappiyasaññitāya kappiye akappiyasaññitāya avajje vajjasaññitāya vajje avajjasaññitāya ca uddhaccapakatike. Unnaḷeti uggatanaḷe, uṭṭhitatucchamāneti vuttaṃ hoti. Capaleti pattacīvaramaṇḍanādinā cāpallena yutte. Mukhareti mukhakhare , kharavacaneti vuttaṃ hoti. Vikiṇṇavāceti asaṃyatavacane divasampi niratthakavacanappalāpine. Muṭṭhā naṭṭhā sati etesanti muṭṭhassatī, sativirahiteti vuttaṃ hoti. Asampajāneti nippaññe. Pākatindriyeti saṃvarābhāvena gihikāle viya vivaṭaindriye. Ācariyupajjhāyehi pariccattaketi dhammena āmisena ca asaṅgahetvā ācariyupajjhāyehi pariccatte anāthe appatiṭṭhe. Lābhagaruketi paccayagaruke.
இரியாபத²ஸண்ட²பனாதீ³னீதி ஆதி³-ஸத்³தே³ன பச்சயபடிஸேவனஸாமந்தஜப்பானங் க³ஹணங் வேதி³தப்³ப³ங். மஹானித்³தே³ஸே (மஹானி॰ 87) ஹி இரியாபத²ஸண்ட²பனபச்சயபடிஸேவனஸாமந்தஜப்பனவஸேன திவித⁴ங் குஹகவத்து² ஆக³தங். தத்த² பாபிச்ச²ஸ்ஸேவ ஸதோ ஸம்பா⁴வனாதி⁴ப்பாயகதேன இரியாபதே²ன விம்ஹாபனங் இரியாபத²ஸண்ட²பனஸங்கா²தங் குஹகவத்து². ததா² சீவராதீ³ஹி நிமந்திதஸ்ஸ தத³த்தி²கஸ்ஸேவ ஸதோ பாபிச்ச²தங் நிஸ்ஸாய படிக்கே²பனேன தே ச க³ஹபதிகே அத்தனி ஸுப்பதிட்டி²தஸத்³தே⁴ ஞத்வா புன தேஸங் ‘‘அஹோ அய்யோ அப்பிச்சோ², ந கிஞ்சி படிக்³க³ண்ஹிதுங் இச்ச²தி, ஸுலத்³த⁴ங் வத நோ அஸ்ஸ, ஸசே அப்பமத்தகம்பி கிஞ்சி படிக்³க³ண்ஹெய்யா’’தி நானாவிதே⁴ஹி உபாயேஹி பணீதானி சீவராதீ³னி உபனெந்தானங் தத³னுக்³க³ஹகாமதங்யேவ ஆவிகத்வா படிக்³க³ஹணேன ச ததோ பபு⁴தி அஸீதிஸகடபா⁴ரேஹி உபனாமனஹேதுபூ⁴தங் விம்ஹாபனங் பச்சயபடிஸேவனஸங்கா²தங் குஹகவத்தூ²தி வேதி³தப்³ப³ங். பாபிச்ச²ஸ்ஸேவ பன ஸதோ உத்தரிமனுஸ்ஸத⁴ம்மாதி⁴க³மபரிதீ³பனவாசாய ததா² ததா² விம்ஹாபனங் ஸாமந்தஜப்பனஸங்கா²தங் குஹகவத்தூ²தி வேதி³தப்³ப³ங். சித்தலபப்³ப³தாதி³விஹாரோ லோகஸம்மதஸேனாஸனங் நாம. லோகஸம்மத …பே॰… உபாயேஹி ஸங்வண்ணியமானகு³ணோதி ஸம்ப³ந்தோ⁴. பரிபாசேதுந்தி பரிணாமேதுங். ஸுத்³த⁴சித்தேன அத்தனோ க³ந்த²து⁴ராதி³கம்மங் கத்வா விசரந்தானங் தம்மூலகபச்சயபரிபோ⁴கே³ தோ³ஸாபா⁴வங் த³ஸ்ஸேதுங் ‘‘யே பனா’’திஆதி³ வுத்தங். பி⁴க்கா²சாரே அஸம்பஜ்ஜமானேதி கோ³சரகா³மே பி⁴க்கா²ய சரித்வா லபி⁴தப்³ப³பிண்ட³பாதே அஸம்பஜ்ஜந்தே. தே ச வத்தஸீஸேன ஸப்³ப³ம்பேதங் கரொந்தி, ந லாப⁴னிமித்தங். தேன வுத்தங் ‘‘தந்திபவேணிக⁴டனகா ஸாஸனஜோதகா’’தி.
Iriyāpathasaṇṭhapanādīnīti ādi-saddena paccayapaṭisevanasāmantajappānaṃ gahaṇaṃ veditabbaṃ. Mahāniddese (mahāni. 87) hi iriyāpathasaṇṭhapanapaccayapaṭisevanasāmantajappanavasena tividhaṃ kuhakavatthu āgataṃ. Tattha pāpicchasseva sato sambhāvanādhippāyakatena iriyāpathena vimhāpanaṃ iriyāpathasaṇṭhapanasaṅkhātaṃ kuhakavatthu. Tathā cīvarādīhi nimantitassa tadatthikasseva sato pāpicchataṃ nissāya paṭikkhepanena te ca gahapatike attani suppatiṭṭhitasaddhe ñatvā puna tesaṃ ‘‘aho ayyo appiccho, na kiñci paṭiggaṇhituṃ icchati, suladdhaṃ vata no assa, sace appamattakampi kiñci paṭiggaṇheyyā’’ti nānāvidhehi upāyehi paṇītāni cīvarādīni upanentānaṃ tadanuggahakāmataṃyeva āvikatvā paṭiggahaṇena ca tato pabhuti asītisakaṭabhārehi upanāmanahetubhūtaṃ vimhāpanaṃ paccayapaṭisevanasaṅkhātaṃ kuhakavatthūti veditabbaṃ. Pāpicchasseva pana sato uttarimanussadhammādhigamaparidīpanavācāya tathā tathā vimhāpanaṃ sāmantajappanasaṅkhātaṃ kuhakavatthūti veditabbaṃ. Cittalapabbatādivihāro lokasammatasenāsanaṃ nāma. Lokasammata …pe… upāyehi saṃvaṇṇiyamānaguṇoti sambandho. Paripācetunti pariṇāmetuṃ. Suddhacittena attano ganthadhurādikammaṃ katvā vicarantānaṃ tammūlakapaccayaparibhoge dosābhāvaṃ dassetuṃ ‘‘ye panā’’tiādi vuttaṃ. Bhikkhācāre asampajjamāneti gocaragāme bhikkhāya caritvā labhitabbapiṇḍapāte asampajjante. Te ca vattasīsena sabbampetaṃ karonti, na lābhanimittaṃ. Tena vuttaṃ ‘‘tantipaveṇighaṭanakā sāsanajotakā’’ti.
கிச்சே²னாதி ந து³க்கா²ய படிபதா³ய. பு³த்³தா⁴னஞ்ஹி சத்தாரோபி மக்³கா³ ஸுகா²படிபதா³வ ஹொந்தி, பாரமீபூரணகாலே பன ஸராக³தோ³ஸமோஹஸ்ஸேவ ஸதோ ஆக³தானங் யாசகானங் அலங்கதப்படியத்தங் ஸீஸங் கந்தித்வா க³லலோஹிதங் நீஹரித்வா ஸுஅஞ்ஜிதானி அக்கீ²னி உப்பாடெத்வா குலவங்ஸப்பதிட்டா²பகங் புத்தங் மனாபசாரினிங் ப⁴ரியந்தி ஏவமாதீ³னி தெ³ந்தஸ்ஸ அஞ்ஞானிபி க²ந்திவாதீ³ஸதி³ஸேஸு அத்தபா⁴வேஸு சே²ஜ்ஜபே⁴ஜ்ஜாதீ³னி பாபுணந்தஸ்ஸ ஆக³மனீயபடிபத³ங் ஸந்தா⁴யேதங் வுத்தங். கஸிரேனாதி தஸ்ஸேவ வேவசனங்.
Kicchenāti na dukkhāya paṭipadāya. Buddhānañhi cattāropi maggā sukhāpaṭipadāva honti, pāramīpūraṇakāle pana sarāgadosamohasseva sato āgatānaṃ yācakānaṃ alaṅkatappaṭiyattaṃ sīsaṃ kantitvā galalohitaṃ nīharitvā suañjitāni akkhīni uppāṭetvā kulavaṃsappatiṭṭhāpakaṃ puttaṃ manāpacāriniṃ bhariyanti evamādīni dentassa aññānipi khantivādīsadisesu attabhāvesu chejjabhejjādīni pāpuṇantassa āgamanīyapaṭipadaṃ sandhāyetaṃ vuttaṃ. Kasirenāti tasseva vevacanaṃ.
ஏகஸ்ஸேவ தா³துங் அஸக்குணெய்யதாய க³ருபா⁴வதோ ‘‘க³ருப⁴ண்டா³னீ’’தி வுத்தங், ஸப்³பே³ஸங் பா⁴ஜெத்வாபி க³ஹேதுங் அஸக்குணெய்யதாய ‘‘க³ருபரிக்கா²ரானீ’’தி வுத்தங். ஸாதா⁴ரணபரிக்கா²ரபா⁴வேனாதி ஸங்கி⁴கத்தா ஸப்³ப³பி⁴க்கு²ஸாதா⁴ரணபரிக்கா²ரபா⁴வேன. ஸங்க³ண்ஹாதி உபலாபேதீதி இத³ங் அதெ²ய்யசித்தங் ஸந்தா⁴ய வுத்தங். தேனேவாஹ – ‘‘ததா²பா⁴வதோ தே²னெத்வா’’தி, அவிஸ்ஸஜ்ஜியஅவேப⁴ங்கி³யபா⁴வதோ தே²னெத்வாதி அத்தோ². க³ருப⁴ண்ட³ஞ்ஹி குலஸங்க³ஹத்தா²ய விஸ்ஸஜ்ஜெந்தோ விப⁴ஜந்தோ ச தஸ்ஸ அவிஸ்ஸஜ்ஜியஅவஏப⁴ங்கி³யபா⁴வங் தே²னேதி. குலதூ³ஸகது³க்கடங் ஆபஜ்ஜதீதி எத்த² ‘‘யோ விஸ்ஸஜ்ஜெய்ய, ஆபத்தி து²ல்லச்சயஸ்ஸா’’தி வுத்தத்தா விஸ்ஸஜ்ஜனபச்சயா து²ல்லச்சயேனபி ந முச்சதி.
Ekasseva dātuṃ asakkuṇeyyatāya garubhāvato ‘‘garubhaṇḍānī’’ti vuttaṃ, sabbesaṃ bhājetvāpi gahetuṃ asakkuṇeyyatāya ‘‘garuparikkhārānī’’ti vuttaṃ. Sādhāraṇaparikkhārabhāvenāti saṅghikattā sabbabhikkhusādhāraṇaparikkhārabhāvena. Saṅgaṇhāti upalāpetīti idaṃ atheyyacittaṃ sandhāya vuttaṃ. Tenevāha – ‘‘tathābhāvato thenetvā’’ti, avissajjiyaavebhaṅgiyabhāvato thenetvāti attho. Garubhaṇḍañhi kulasaṅgahatthāya vissajjento vibhajanto ca tassa avissajjiyaavaebhaṅgiyabhāvaṃ theneti. Kuladūsakadukkaṭaṃ āpajjatīti ettha ‘‘yo vissajjeyya, āpatti thullaccayassā’’ti vuttattā vissajjanapaccayā thullaccayenapi na muccati.
அஸந்தந்தி அவிஜ்ஜமானங். அபூ⁴தந்தி அனுப்பன்னங். அனுப்பன்னத்தா ஹி தஸ்ஸ தங் அஸந்தந்தி. புரிமஸ்ஸ பச்சி²மங் காரணவசனங். உல்லபதீதி உக்³க³தாயுகோ லபதி. ஸீலஞ்ஹி பி⁴க்கு²னோ ஆயு, தங் தஸ்ஸ ததா²லபனஸமகாலமேவ விக³ச்ச²தி. அஸந்தஸம்பா⁴வனாயாதி அத்தனோ அவிஜ்ஜமானகு³ணேஹி ஸம்பா⁴வனாய. ஏவஞ்ஹி க³ண்ஹதா…பே॰… தே²னெத்வா க³ஹிதா ஹொந்தீதி எத்த² அஸந்தஸம்பா⁴வனாய ரட்ட²பிண்ட³ஸ்ஸ தே²னெத்வா க³ஹிதத்தா லோகுத்தரத⁴ம்மோபி தே²னிதோயேவ ஹோதி. கிதவஸ்ஸேவாதி கிதவஸ்ஸ ஸகுணக்³க³ஹணமிவ. கேராடிகஸ்ஸாதி ஸட²ஸ்ஸ. கொ³த்தங் வுச்சதி ஸாதா⁴ரணனாமங், மத்த-ஸத்³தோ³ லுத்தனித்³தி³ட்டோ², தஸ்மா ஸமணாதி கொ³த்தமத்தங் அனுப⁴வந்தி தா⁴ரெந்தீதி கொ³த்ரபு⁴னோ, நாமமத்தஸமணாதி வுத்தங் ஹோதி.
Asantanti avijjamānaṃ. Abhūtanti anuppannaṃ. Anuppannattā hi tassa taṃ asantanti. Purimassa pacchimaṃ kāraṇavacanaṃ. Ullapatīti uggatāyuko lapati. Sīlañhi bhikkhuno āyu, taṃ tassa tathālapanasamakālameva vigacchati. Asantasambhāvanāyāti attano avijjamānaguṇehi sambhāvanāya. Evañhi gaṇhatā…pe… thenetvā gahitā hontīti ettha asantasambhāvanāya raṭṭhapiṇḍassa thenetvā gahitattā lokuttaradhammopi thenitoyeva hoti. Kitavassevāti kitavassa sakuṇaggahaṇamiva. Kerāṭikassāti saṭhassa. Gottaṃ vuccati sādhāraṇanāmaṃ, matta-saddo luttaniddiṭṭho, tasmā samaṇāti gottamattaṃ anubhavanti dhārentīti gotrabhuno, nāmamattasamaṇāti vuttaṃ hoti.
வக்³கு³முதா³தீரியபி⁴க்கு²வத்து²வண்ணனா நிட்டி²தா.
Vaggumudātīriyabhikkhuvatthuvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 4. சதுத்த²பாராஜிகங் • 4. Catutthapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 4. சதுத்த²பாராஜிகங் • 4. Catutthapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / வக்³கு³முதா³தீரியபி⁴க்கு²வத்து²வண்ணனா • Vaggumudātīriyabhikkhuvatthuvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / வக்³கு³முதா³தீரியபி⁴க்கு²வத்து²வண்ணனா • Vaggumudātīriyabhikkhuvatthuvaṇṇanā
