| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
4. சதுத்த²பாராஜிகங்
4. Catutthapārājikaṃ
வக்³கு³முதா³தீரியபி⁴க்கு²வத்து²வண்ணனா
Vaggumudātīriyabhikkhuvatthuvaṇṇanā
193. அதி⁴ட்டே²மாதி ஸங்வித³ஹாம. இரியாபத²ங் ஸண்ட²பெத்வாதி பதா⁴னானுரூபங் கத்வா. அனாக³தஸம்ப³ந்தே⁴ பன அஸதீதி பா⁴ஸிதோ ப⁴விஸ்ஸதீதி பாட²ஸேஸங் கத்வா அனாக³தஸம்ப³ந்தே⁴ அஸதி. பா⁴ஸிதோதி அதீதவசனங் கத²ங் அனாக³தவசனேன ஸம்ப³ந்த⁴முபக³ச்ச²தீதி ஆஹ லக்க²ணங் பனாதிஆதி³. ஈதி³ஸே ஹி டா²னே தா⁴துஸம்ப³ந்தே⁴ பச்சயாதி இமினா லக்க²ணேன தா⁴த்வத்த²ஸம்ப³ந்தே⁴ ஸதி அயதா²காலவிஹிதாபி பச்சயா ஸாத⁴வோ ப⁴வந்தீதி ஸத்³த³ஸத்த²விதூ³ வத³ந்தி.
193.Adhiṭṭhemāti saṃvidahāma. Iriyāpathaṃ saṇṭhapetvāti padhānānurūpaṃ katvā. Anāgatasambandhe pana asatīti bhāsito bhavissatīti pāṭhasesaṃ katvā anāgatasambandhe asati. Bhāsitoti atītavacanaṃ kathaṃ anāgatavacanena sambandhamupagacchatīti āha lakkhaṇaṃ panātiādi. Īdise hi ṭhāne dhātusambandhe paccayāti iminā lakkhaṇena dhātvatthasambandhe sati ayathākālavihitāpi paccayā sādhavo bhavantīti saddasatthavidū vadanti.
194. வண்ணவாதி இமினா அபி⁴னவுப்பன்னவண்ணதா வுத்தா. பஸன்னமுக²வண்ணாதி இமினா முக²வண்ணஸ்ஸ அதிபணீததா வுத்தா. விப்பஸன்னச்ச²விவண்ணாதி இமினா பகதிஸரீரவண்ணஸ்ஸேவ யதா²வுத்தனயேன விப்பஸன்னதா வுத்தா. யஸ்மா இந்த்³ரியானங் உபாதா³ரூபத்தா நிஸ்ஸயவஸேனேவ பீணனந்தி ஆஹ ‘‘அபி⁴னிவிட்டோ²காஸஸ்ஸ பரிபுண்ணத்தா’’தி. பஞ்சப்பஸாதா³னங் விய ஹத³யரூபஸ்ஸாபி பரிபுண்ணதா வுத்தாயேவாதி ஆஹ ‘‘மனச்ச²ட்டா²னங் இந்த்³ரியான’’ந்தி. உத்³தே³ஸங் பரிபுச்ச²ங் அனுயுஞ்ஜந்தா இமங் ஸரீரஸோப⁴ங் நேவ பாபுணிங்ஸூதி ஸம்ப³ந்தோ⁴. யதா² தந்தி எத்த² தந்தி நிபாதமத்தங். சதுசக்கந்தி எத்த² பவத்தனட்டே²ன இரியாபதோ²வ சக்கந்தி வுத்தோ.
194.Vaṇṇavāti iminā abhinavuppannavaṇṇatā vuttā. Pasannamukhavaṇṇāti iminā mukhavaṇṇassa atipaṇītatā vuttā. Vippasannacchavivaṇṇāti iminā pakatisarīravaṇṇasseva yathāvuttanayena vippasannatā vuttā. Yasmā indriyānaṃ upādārūpattā nissayavaseneva pīṇananti āha ‘‘abhiniviṭṭhokāsassa paripuṇṇattā’’ti. Pañcappasādānaṃ viya hadayarūpassāpi paripuṇṇatā vuttāyevāti āha ‘‘manacchaṭṭhānaṃ indriyāna’’nti. Uddesaṃ paripucchaṃ anuyuñjantā imaṃ sarīrasobhaṃ neva pāpuṇiṃsūti sambandho. Yathā tanti ettha tanti nipātamattaṃ. Catucakkanti ettha pavattanaṭṭhena iriyāpathova cakkanti vutto.
195. உபலப்³ப⁴ந்தீதி தி³ஸ்ஸந்தி, ஞாயந்தீதி அத்தோ². பசந்தோதி பீளெந்தோ, கே³ஹாதீ³னி வா ஸயங் ட³ஹந்தோ, அஞ்ஞேஹி வா பாசெந்தோ. உத்³த⁴தேதி உத்³த⁴ச்சபகதிகே. உன்னளேதி உக்³க³தனளஸதி³ஸேன உக்³க³ததுச்ச²மானேன ஸஹிதே. சபலேதி பத்தசீவரமண்ட³னாதி³னா சாபல்லேன யுத்தே. முக²ரேதி க²ரவசனே. பாகதிந்த்³ரியேதி அஸங்வுதத்தா கி³ஹிகாலே விய பகதியங் டி²திந்த்³ரியே. இரியாபத²ஸண்ட²பனாதீ³னீதி ஆதி³-ஸத்³தே³ன பச்சயபடிஸேவனஸாமந்தஜப்பானங் க³ஹணங் வேதி³தப்³ப³ங். பரமஸல்லேக²வுத்தீஹி மஹாஅரியவங்ஸேஹி பி⁴க்கூ²ஹி நிவுத்த²ஸேனாஸனானி லோகஸம்மதஸேனாஸனானி நாம. பரிபாசேதுந்தி விம்ஹாபனவஸேன பரிணாமேதுங். பி⁴க்கா²சாரே அஸம்பஜ்ஜமானேதி இத³ங் ஜனபத³சாரிகங் சரந்தீதி இமினா ஸம்ப³ந்தி⁴தப்³ப³ங், ந பன பாளிங் வாசெந்தோதிஆதீ³ஹி, தானி பன பதா³னி அத்தனோ நிரந்தரவாஸட்டா²னேபி ஜனபதே³ஸுபி கத்தப்³ப³கிச்சத³ஸ்ஸனவஸேன வுத்தானி, தானி ச தே வத்தஸீஸேன கரொந்தி, ந லாப⁴னிமித்தங், தேனாஹ தந்தீதிஆதி³. கிச்சே²னாதி இமஸ்ஸேவ வேவசனங் கஸிரேனாதி. தது³ப⁴யம்பி பாரமீபூரணவாயாமங் ஸந்தா⁴ய வுத்தங். ஸாதா⁴ரணபரிக்கா²ரபா⁴வேனாதி ஸங்கி⁴கபரிக்கா²ரபா⁴வேன. ததா²பா⁴வதோ தே²னெத்வாதி அவிஸ்ஸஜ்ஜியஅவேப⁴ங்கி³யபா⁴வதோ தே²னெத்வா, ந டா²னாசாவனவஸேனாதி அதி⁴ப்பாயோ, தேனாஹ ‘‘குலதூ³ஸகது³க்கடங் ஆபஜ்ஜதீ’’தி. அஸந்தந்தி இமஸ்ஸ அபூ⁴தந்தி இத³ங் காரணவசனங், அனுப்பன்னத்தா அவிஜ்ஜமானந்தி அத்தோ². கிதவஸ்ஸேவாதி கிதவஸ்ஸ ஸகுணக³ஹணமிவ. கேராடிகஸ்ஸாதி ஸட²ஸ்ஸ. ஸமணோதி கொ³த்தமத்தங் அனுபொ⁴ந்தி தா⁴ரெந்தீதி கொ³த்ரபு⁴னோ, நாமமத்தஸமணாதி அத்தோ². து³ஜ்ஜானபரிச்சே²த³ந்தி அனந்தது³க்க²த்தா ‘‘எத்தகங் து³க்க²’’ந்தி ஸங்க்²யாவஸேன பரிச்சி²ந்தி³த்வா ஞாதுங் ஸப்³ப³ஞ்ஞுதஞ்ஞாணேனாபி து³க்கரங், ந பன ஸரூபவஸேன ஞாதுங் பு³த்³த⁴ஞாணஸ்ஸ அவிஸயபா⁴வா.
195.Upalabbhantīti dissanti, ñāyantīti attho. Pacantoti pīḷento, gehādīni vā sayaṃ ḍahanto, aññehi vā pācento. Uddhateti uddhaccapakatike. Unnaḷeti uggatanaḷasadisena uggatatucchamānena sahite. Capaleti pattacīvaramaṇḍanādinā cāpallena yutte. Mukhareti kharavacane. Pākatindriyeti asaṃvutattā gihikāle viya pakatiyaṃ ṭhitindriye. Iriyāpathasaṇṭhapanādīnīti ādi-saddena paccayapaṭisevanasāmantajappānaṃ gahaṇaṃ veditabbaṃ. Paramasallekhavuttīhi mahāariyavaṃsehi bhikkhūhi nivutthasenāsanāni lokasammatasenāsanāni nāma. Paripācetunti vimhāpanavasena pariṇāmetuṃ. Bhikkhācāre asampajjamāneti idaṃ janapadacārikaṃcarantīti iminā sambandhitabbaṃ, na pana pāḷiṃ vācentotiādīhi, tāni pana padāni attano nirantaravāsaṭṭhānepi janapadesupi kattabbakiccadassanavasena vuttāni, tāni ca te vattasīsena karonti, na lābhanimittaṃ, tenāha tantītiādi. Kicchenāti imasseva vevacanaṃ kasirenāti. Tadubhayampi pāramīpūraṇavāyāmaṃ sandhāya vuttaṃ. Sādhāraṇaparikkhārabhāvenāti saṅghikaparikkhārabhāvena. Tathābhāvato thenetvāti avissajjiyaavebhaṅgiyabhāvato thenetvā, na ṭhānācāvanavasenāti adhippāyo, tenāha ‘‘kuladūsakadukkaṭaṃ āpajjatī’’ti. Asantanti imassa abhūtanti idaṃ kāraṇavacanaṃ, anuppannattā avijjamānanti attho. Kitavassevāti kitavassa sakuṇagahaṇamiva. Kerāṭikassāti saṭhassa. Samaṇoti gottamattaṃ anubhonti dhārentīti gotrabhuno, nāmamattasamaṇāti attho. Dujjānaparicchedanti anantadukkhattā ‘‘ettakaṃ dukkha’’nti saṅkhyāvasena paricchinditvā ñātuṃ sabbaññutaññāṇenāpi dukkaraṃ, na pana sarūpavasena ñātuṃ buddhañāṇassa avisayabhāvā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 4. சதுத்த²பாராஜிகங் • 4. Catutthapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 4. சதுத்த²பாராஜிகங் • 4. Catutthapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / வக்³கு³முதா³தீரியபி⁴க்கு²வத்து²வண்ணனா • Vaggumudātīriyabhikkhuvatthuvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / வக்³கு³முதா³தீரியபி⁴க்கு²வத்து²வண்ணனா • Vaggumudātīriyabhikkhuvatthuvaṇṇanā
