| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೯. ವಜ್ಜಿಪುತ್ತಸುತ್ತವಣ್ಣನಾ
9. Vajjiputtasuttavaṇṇanā
೨೨೯. ವಜ್ಜಿರಟ್ಠೇ ರಾಜಪುತ್ತೋತಿ ವಜ್ಜಿರಟ್ಠೇ ಜಾತಸಂವದ್ಧೋ ವಜ್ಜಿರಾಜಪುತ್ತೋ। ಸಬ್ಬರತ್ತಿಚಾರೋತಿ ಛಣಸಮ್ಪತ್ತಿಯಾ ಇತೋ ಚಿತೋ ಚರನ್ತೇಹಿ ಅನುಭವಿತಬ್ಬನಕ್ಖತ್ತಮಹೋ। ತೇನಾಹ ‘‘ಕತ್ತಿಕನಕ್ಖತ್ತಂ ಘೋಸೇತ್ವಾ’’ ತಿಆದಿ। ಏಕಾಬದ್ಧಂ ಹೋತೀತಿ ಯಸ್ಮಾ ಚಾತುಮಹಾರಾಜಿಕದೇವಾ ತಸ್ಮಿಂ ದಿವಸೇ ನಕ್ಖತ್ತಂ ಘೋಸೇತ್ವಾ ಅತ್ತನೋ ಪುಞ್ಞಾನುಭಾವಸಿದ್ಧಾಯ ದಿಬ್ಬಸಮ್ಪತ್ತಿಯಾ ಮಹನ್ತಂ ನಕ್ಖತ್ತಕೀಳಾಸುಖಂ ಅನುಭವನ್ತಿ, ತಸ್ಮಾ ತಂ ತೇಹಿ ಏಕಾಬದ್ಧಂ ವಿಯ ಹೋತಿ। ಭೇರಿಆದಿತೂರಿಯಾನನ್ತಿ ಭೇರಿಮುದಿಙ್ಗಸಙ್ಖಪಣವವೀಣಾದಿತೂರಿಯಾನಂ। ತಾಳಿತಾನನ್ತಿ ಆರದ್ಧಲಯಾನುರೂಪಂ ಪಹಟಾನಂ। ವೀಣಾದೀನನ್ತಿ ವೀಣಾವೇಣುಗೋಮುಖೀಆದೀನಂ। ವಾದಿತಾನನ್ತಿ ಯಥಾರದ್ಧಮುಚ್ಛನಾನುರೂಪಂ ಸಙ್ಘಟ್ಟಿತಾನಂ। ಅಭಾಸೀತಿ ತೇನ ಸದ್ದೇನ ಆಕಡ್ಢಿಯಮಾನಹದಯೋ ಅಯೋನಿಸೋ ಉಮ್ಮುಜ್ಜಿತ್ವಾ ‘‘ಮಹತೀ ವತ ಮೇ ಜಾನೀ’’ತಿ ಅನುತ್ಥುನನ್ತೋ ಅಭಾಸಿ। ಛಡ್ಡಿತದಾರುಕಂ ವಿಯಾತಿ ವನೇ ಛಡ್ಡಿತನಿರತ್ಥಕಕಳಿಙ್ಗರಂ ವಿಯ। ಲಾಮಕತರೋತಿ ನಿಹೀನತರೋ। ದೇವತಾ ಪಠಮಪ್ಪಿತಂ ಆಣಿಂ ಪಟಾಣಿಯಾ ನೀಹರನ್ತೀ ವಿಯ ತೇನ ಭಿಕ್ಖುನಾ ವುತ್ತಮತ್ಥಂ ಅಪನೇನ್ತೀ ‘‘ತಸ್ಸ ತೇ ಬಹುಕಾ ಪಿಹಯನ್ತೀ’’ತಿ ಅವೋಚಾತಿ ವುತ್ತನ್ತಿ ದಸ್ಸೇನ್ತೋ ‘‘ಥೇರೋ’’ತಿಆದಿಮಾಹ। ಸಗ್ಗಂ ಗಚ್ಛನ್ತಾನಂ ಯಥಾ ನೇರಯಿಕಾ ಪಿಹಯನ್ತಿ, ಏವಂ ಸಮ್ಮಾಪಟಿಪನ್ನಸ್ಸ ತುಯ್ಹಂ ಬಹೂ ಪಿಹಯನ್ತಿ, ತಸ್ಮಾ ತ್ವಂ ‘‘ಪಾಪಿಯೋ’’ತಿ ಅತ್ತಾನಂ ಮಾ ಮಞ್ಞಿತ್ಥಾತಿ ಅಧಿಪ್ಪಾಯೋ।
229.Vajjiraṭṭhe rājaputtoti vajjiraṭṭhe jātasaṃvaddho vajjirājaputto. Sabbaratticāroti chaṇasampattiyā ito cito carantehi anubhavitabbanakkhattamaho. Tenāha ‘‘kattikanakkhattaṃ ghosetvā’’ tiādi. Ekābaddhaṃ hotīti yasmā cātumahārājikadevā tasmiṃ divase nakkhattaṃ ghosetvā attano puññānubhāvasiddhāya dibbasampattiyā mahantaṃ nakkhattakīḷāsukhaṃ anubhavanti, tasmā taṃ tehi ekābaddhaṃ viya hoti. Bheriāditūriyānanti bherimudiṅgasaṅkhapaṇavavīṇāditūriyānaṃ. Tāḷitānanti āraddhalayānurūpaṃ pahaṭānaṃ. Vīṇādīnanti vīṇāveṇugomukhīādīnaṃ. Vāditānanti yathāraddhamucchanānurūpaṃ saṅghaṭṭitānaṃ. Abhāsīti tena saddena ākaḍḍhiyamānahadayo ayoniso ummujjitvā ‘‘mahatī vata me jānī’’ti anutthunanto abhāsi. Chaḍḍitadārukaṃ viyāti vane chaḍḍitaniratthakakaḷiṅgaraṃ viya. Lāmakataroti nihīnataro. Devatā paṭhamappitaṃ āṇiṃ paṭāṇiyā nīharantī viya tena bhikkhunā vuttamatthaṃ apanentī ‘‘tassa te bahukā pihayantī’’ti avocāti vuttanti dassento ‘‘thero’’tiādimāha. Saggaṃ gacchantānaṃ yathā nerayikā pihayanti, evaṃ sammāpaṭipannassa tuyhaṃ bahū pihayanti, tasmā tvaṃ ‘‘pāpiyo’’ti attānaṃ mā maññitthāti adhippāyo.
ವಜ್ಜಿಪುತ್ತಸುತ್ತವಣ್ಣನಾ ನಿಟ್ಠಿತಾ।
Vajjiputtasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೯. ವಜ್ಜಿಪುತ್ತಸುತ್ತಂ • 9. Vajjiputtasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೯. ವಜ್ಜಿಪುತ್ತಸುತ್ತವಣ್ಣನಾ • 9. Vajjiputtasuttavaṇṇanā
