| Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) |
༣. ཝམྨིཀསུཏྟཝཎྞནཱ
3. Vammikasuttavaṇṇanā
༢༤༩. པིཡཝཙནནྟི པིཡསམུདཱཙཱརོ། ཝིཉྙུཛཱཏིཀཱ ཧི པརཾ པིཡེན སམུདཱཙརནྟཱ ‘‘བྷཝ’’ནྟི ཝཱ, ‘‘དེཝཱནཾ པིཡོ’’ཏི ཝཱ, ‘‘ཨཱཡསྨཱ’’ཏི ཝཱ སམུདཱཙརནྟི, ཏསྨཱ སམྨུཁཱ སམྦོདྷནཝསེན ‘‘ཨཱཝུསོ’’ཏི, ཏིརོཀྑཾ ‘‘ཨཱཡསྨཱ’’ཏི ཨཡམྤི སམུདཱཙཱརོ། མཧཱཀསྶཔཨུརུཝེལཀསྶཔཱདཡོ ཨཉྙེཔི ཀསྶཔནཱམཀཱ ཨཏྠཱིཏི ‘‘ཀཏརསྶ ཀསྶཔསྶཱ’’ཏི པུཙྪནྟི། རཉྙཱཏི ཀོསལརཉྙཱ། ‘‘སཉྫཱནིཾསཱུ’’ཏི སངྑེཔཏོ ཝུཏྟམཏྠཾ ཝིཝརིཏུཾ ‘‘ཨཡཾ པནཱ’’ཏིཨཱདི ཨཱརདྡྷཾ། ཨསྶཱཏི ཀུམཱརཀསྶཔསྶ, ‘‘སཉྫཱནིཾསཱུ’’ཏི ཝུཏྟསཉྫཱནནསྶ ཝཱ། པུཉྙཱནི ཀརོནྟོཏི ཀཔྤསཏསཧསྶཾ དེཝེསུ ཙ མནུསྶེསུ ཙ ནིབྦཏྟིཏྭཱ དཱནཱདཱིནི པུཉྙཱནི བྷཱཝེནྟོ། ཨོསཀྐནྟེཏི པརིཧཱཡམཱནེ། པཋམནྟི ཀུམཱརིཀཱཀཱལེ། སཏྠཱ ཨུཔཱལིཏྠེརཾ པཊིཙྪཱཔེསི ཏཾ ཨདྷིཀརཎཾ ཝིནཡཀམྨེནེཝསྶཱ བྷིཀྑུནིཡཱ པབྦཛྫཱཡ ཨརོགབྷཱཝཾ།
249.Piyavacananti piyasamudācāro. Viññujātikā hi paraṃ piyena samudācarantā ‘‘bhava’’nti vā, ‘‘devānaṃ piyo’’ti vā, ‘‘āyasmā’’ti vā samudācaranti, tasmā sammukhā sambodhanavasena ‘‘āvuso’’ti, tirokkhaṃ ‘‘āyasmā’’ti ayampi samudācāro. Mahākassapauruvelakassapādayo aññepi kassapanāmakā atthīti ‘‘katarassa kassapassā’’ti pucchanti. Raññāti kosalaraññā. ‘‘Sañjāniṃsū’’ti saṅkhepato vuttamatthaṃ vivarituṃ ‘‘ayaṃ panā’’tiādi āraddhaṃ. Assāti kumārakassapassa, ‘‘sañjāniṃsū’’ti vuttasañjānanassa vā. Puññāni karontoti kappasatasahassaṃ devesu ca manussesu ca nibbattitvā dānādīni puññāni bhāvento. Osakkanteti parihāyamāne. Paṭhamanti kumārikākāle. Satthā upālittheraṃ paṭicchāpesi taṃ adhikaraṇaṃ vinayakammenevassā bhikkhuniyā pabbajjāya arogabhāvaṃ.
པཉྙཏྟིཝིབྷཱཝནཱཏི ‘‘ཨནྡྷཝན’’ནྟྭེཝ པཉྙཱཡམཱནསྶ ཝིབྷཱཝནཱ། ཨོལཱིཡཏཱིཏི སངྐུཙཏི སཎིཀཾ ཝཏྟཏི། བྷཱཎཀོཏི སརབྷཱཎཀོ། ཡཾ ཨཏྠི, ཏཾ གཧེཏྭཱཏི ཨིདཱནི པརིཡེསིཏབྦཊྛཱནཾ ནཏྠི, ཡཐཱགཏཾ པན ཡཾ ཨཏྠི, ཏཾ གཧེཏྭཱ། བལཝགུཎེཏི ཨདྷིམཏྟགུཎེ། ཀསྶཔབྷགཝཏོ ཀཱལེ ནིརུལ༹ྷསམཉྙཱཝསེན ཝཙནསནྟཏིཡཱ ཨཝིཙྪེདེན ཙ ཨིམསྨིམྤི བུདྡྷུཔྤཱདེ ཏཾ ‘‘ཨནྡྷཝན’’ནྟྭེཝ པཉྙཱཡིཏྠ, ཨུཔརཱུཔརིཝཌྜྷམཱནཱཡ པཐཝིཡཱ ཨུཔརི རུཀྑགཙྪཱདཱིསུ སཉྫཱཡནྟེསུཔཱིཏི། སེཀྑཔཊིཔདནྟི སེཀྑབྷཱཝཱཝཧཾ ཝིསུདྡྷིཔཊིཔཏྟིཾ།
Paññattivibhāvanāti ‘‘andhavana’’ntveva paññāyamānassa vibhāvanā. Olīyatīti saṅkucati saṇikaṃ vattati. Bhāṇakoti sarabhāṇako. Yaṃ atthi, taṃ gahetvāti idāni pariyesitabbaṭṭhānaṃ natthi, yathāgataṃ pana yaṃ atthi, taṃ gahetvā. Balavaguṇeti adhimattaguṇe. Kassapabhagavato kāle niruḷhasamaññāvasena vacanasantatiyā avicchedena ca imasmimpi buddhuppāde taṃ ‘‘andhavana’’ntveva paññāyittha, uparūparivaḍḍhamānāya pathaviyā upari rukkhagacchādīsu sañjāyantesupīti. Sekkhapaṭipadanti sekkhabhāvāvahaṃ visuddhipaṭipattiṃ.
ཨཉྙཏར-སདྡོ ཨཔཱཀཊེ ཝིཡ པཱཀཊེཔི ཝཏྟཏི ཨེཀ-སདྡེན སམཱནཏྠཏྟཱཏི དསྶེཏུཾ ‘‘ཨབྷིཛཱནཱཏཱི’’ཏིཨཱདི ཝུཏྟཾ། བྷཡབྷེརཝདསྶིཏམྤི ཨབྷིཀྐནྟ-སདྡསྶ ཨཏྠུདྡྷཱརཾ ཨིདྷ དསྶེནྟོ ཨེཝཾ ཧེཊྛཱ ཏཏྠ ཏཏྠ ཀཏཱ ཨཏྠསཾཝཎྞནཱ པརཏོ ཏསྨིཾ ཏསྨིཾ སུཏྟཔདེསེ ཡཐཱརཧཾ ཝཏྟབྦཱཏི ནཡདསྶནཾ ཀརོཏི། ཀཉྩནསནྣིབྷཏྟཙཏཱ སུཝཎྞཝཎྞགྒཧཎེན གཧིཏཱཏི ཨདྷིཔྤཱཡེནཱཧ ‘‘ཚཝིཡ’’ནྟི། ཚཝིགཏཱ པན ཝཎྞདྷཱཏུ ཨེཝ ‘‘སུཝཎྞཝཎྞོ’’ཏི ཨེཏྠ ཝཎྞགྒཧཎེན གཧིཏཱཏི ཨཔརེ། ཝཎྞཱིཡཏི ཀིཏྟཱིཡཏི ཨུགྒྷོསནནྟི ཝཎྞོ, ཐུཏི། ཝཎྞཱིཡཏི ཨསངྐརཏོ ཝཝཏྠཔཱིཡཏཱིཏི ཝཎྞོ, ཀུལཝགྒོ། ཝཎྞཱིཡཏི ཕལཾ ཨེཏེན ཡཐཱསབྷཱཝཏོ ཝིབྷཱཝཱིཡཏཱིཏི ཝཎྞོ, ཀཱརཎཾ། ཝཎྞནཾ དཱིགྷརསྶཱདིཝསེན སཎྛཧནནྟི ཝཎྞོ, སཎྛཱནཾ། ཝཎྞཱིཡཏི ཨཎུམཧནྟཱདིཝསེན པམཱིཡཏཱིཏི ཝཎྞོ, པམཱཎཾ། ཝཎྞེཏི ཝིཀཱརམཱཔཛྫམཱནཾ ཧདཡངྒཏབྷཱཝཾ པཀཱསེཏཱིཏི ཝཎྞོ, རཱུཔཱཡཏནཾ། ཨེཝཾ ཏེན ཏེན པཝཏྟིནིམིཏྟེན ཝཎྞ-སདྡསྶ ཏསྨིཾ ཏསྨིཾ ཨཏྠེ པཝཏྟི ཝེདིཏབྦཱ།
Aññatara-saddo apākaṭe viya pākaṭepi vattati eka-saddena samānatthattāti dassetuṃ ‘‘abhijānātī’’tiādi vuttaṃ. Bhayabheravadassitampi abhikkanta-saddassa atthuddhāraṃ idha dassento evaṃ heṭṭhā tattha tattha katā atthasaṃvaṇṇanā parato tasmiṃ tasmiṃ suttapadese yathārahaṃ vattabbāti nayadassanaṃ karoti. Kañcanasannibhattacatā suvaṇṇavaṇṇaggahaṇena gahitāti adhippāyenāha ‘‘chaviya’’nti. Chavigatā pana vaṇṇadhātu eva ‘‘suvaṇṇavaṇṇo’’ti ettha vaṇṇaggahaṇena gahitāti apare. Vaṇṇīyati kittīyati ugghosananti vaṇṇo, thuti. Vaṇṇīyati asaṅkarato vavatthapīyatīti vaṇṇo, kulavaggo. Vaṇṇīyati phalaṃ etena yathāsabhāvato vibhāvīyatīti vaṇṇo, kāraṇaṃ. Vaṇṇanaṃ dīgharassādivasena saṇṭhahananti vaṇṇo, saṇṭhānaṃ. Vaṇṇīyati aṇumahantādivasena pamīyatīti vaṇṇo, pamāṇaṃ. Vaṇṇeti vikāramāpajjamānaṃ hadayaṅgatabhāvaṃ pakāsetīti vaṇṇo, rūpāyatanaṃ. Evaṃ tena tena pavattinimittena vaṇṇa-saddassa tasmiṃ tasmiṃ atthe pavatti veditabbā.
ཨནཝསེསཏྟཾ སཀལཏཱ ཀེཝལཏཱ། ཀེཝལཀཔྤཱཏི ཨེཏྠ ཀེཙི ཨཱིསཾ ཨསམཏྟཱ ཀེཝལཱ ཀེཝལཀཔྤཱཏི ཝདནྟི, ཨེཝཾ སཏི ཨནཝསེསཏྠོ ཨེཝ ཀེཝལ-སདྡོ སིཡཱ། ཨནཏྠནྟརེན པན ཀཔྤ-སདྡེན པདཝཌྜྷནཾ ཀཏྭཱ ཀེཝལཱ ཨེཝ ཀེཝལཀཔྤཱ། ཏཐཱ ཝཱ ཀཔྤནཱིཡཏྟཱ པཉྙཔེཏབྦཏྟཱ ཀེཝལཀཔྤཱ། ཡེབྷུཡྻཏཱ བཧུལབྷཱཝོ། ཨབྱཱམིསྶཏཱ ཝིཛཱཏིཡེན ཨསངྐརོ སུདྡྷཏཱ། ཨནཏིརེཀཏཱ ཏཾམཏྟཏཱ ཝིསེསཱབྷཱཝོ། ཀེཝལཀཔྤནྟི ཀེཝལཾ དལ༹ྷཾ ཀཏྭཱཏི ཨཏྠོ། ཀེཝལཾ ཝུཙྩཏི ནིབྦཱནཾ སབྦསངྑཏཝིཝིཏྟཏྟཱ། ཏེནཱཧ ‘‘ཝིསཾཡོགཱདིཨནེཀཏྠོ’’ཏི། ཀེཝལཾ ཨེཏསྶ ཨདྷིགཏཾ ཨཏྠཱིཏི ཀེཝལཱི, སཙྪིཀཏནིརོདྷོ ཁཱིཎཱསཝོ།
Anavasesattaṃ sakalatā kevalatā. Kevalakappāti ettha keci īsaṃ asamattā kevalā kevalakappāti vadanti, evaṃ sati anavasesattho eva kevala-saddo siyā. Anatthantarena pana kappa-saddena padavaḍḍhanaṃ katvā kevalā eva kevalakappā. Tathā vā kappanīyattā paññapetabbattā kevalakappā. Yebhuyyatā bahulabhāvo. Abyāmissatā vijātiyena asaṅkaro suddhatā. Anatirekatā taṃmattatā visesābhāvo. Kevalakappanti kevalaṃ daḷhaṃ katvāti attho. Kevalaṃ vuccati nibbānaṃ sabbasaṅkhatavivittattā. Tenāha ‘‘visaṃyogādianekattho’’ti. Kevalaṃ etassa adhigataṃ atthīti kevalī, sacchikatanirodho khīṇāsavo.
ཀཔྤ-སདྡོ པནཱཡཾ སཨུཔསགྒོ ཨནུཔསགྒོ ཙཱཏི ཨདྷིཔྤཱཡེན ཨོཀཔྤནཱིཡཔདེ ལབྦྷམཱནཾ ཨོཀཔྤསདྡམཏྟཾ ནིདསྶེཏི, ཨཉྙཐཱ ཀཔྤ-སདྡསྶ ཨཏྠུདྡྷཱརེ ཨོཀཔྤནཱིཡཔདཾ ཨནིདསྶནམེཝ སིཡཱ། སམཎཀཔྤེཧཱིཏི ཝིནཡསིདྡྷེཧི སམཎཝོཧཱརེཧི། ནིཙྩཀཔྤནྟི ནིཙྩཀཱལཾ། པཉྙཏྟཱིཏི ནཱམཾ། ནཱམཉྷེཏཾ ཏསྶ ཨཱཡསྨཏོ, ཡདིདཾ ཀཔྤོཏི། ཀཔྤིཏཀེསམསྶཱུཏི ཀཏྟརིཀཱཡ ཚེདིཏཀེསམསྶུ། དྭངྒུལཀཔྤོཏི མཛ྄ཛྷནྷིཀཝེལཱཡ ཝཱིཏིཀྐནྟཱཡ དྭངྒུལཏཱཝིཀཔྤོ། ལེསོཏི ཨཔདེསོ། ཨནཝསེསཾ ཕརིཏུཾ སམཏྠསྶཔི ཨོབྷཱསསྶ ཀེནཙི ཀཱརཎེན ཨེཀདེསཕརཎམྤི སིཡཱ, ཨཡཾ པན སབྦསོཝ ཕརཱིཏི དསྶེཏུཾ སམནྟཏྠོ ཀཔྤ-སདྡོ གཧིཏོཏི ཨཱཧ ‘‘ཨནཝསེསཾ སམནྟཏོ’’ཏི།
Kappa-saddo panāyaṃ saupasaggo anupasaggo cāti adhippāyena okappanīyapade labbhamānaṃ okappasaddamattaṃ nidasseti, aññathā kappa-saddassa atthuddhāre okappanīyapadaṃ anidassanameva siyā. Samaṇakappehīti vinayasiddhehi samaṇavohārehi. Niccakappanti niccakālaṃ. Paññattīti nāmaṃ. Nāmañhetaṃ tassa āyasmato, yadidaṃ kappoti. Kappitakesamassūti kattarikāya cheditakesamassu. Dvaṅgulakappoti majjhanhikavelāya vītikkantāya dvaṅgulatāvikappo. Lesoti apadeso. Anavasesaṃ pharituṃ samatthassapi obhāsassa kenaci kāraṇena ekadesapharaṇampi siyā, ayaṃ pana sabbasova pharīti dassetuṃ samantattho kappa-saddo gahitoti āha ‘‘anavasesaṃ samantato’’ti.
སམཎསཉྙཱསམུདཱཙཱརེནཱཏི ‘‘ཨཧཾ སམཎོ’’ཏི ཨེཝཾ ཨུཔྤནྣསཉྙཱསམུཊྛིཏེན སམུདཱཙཱརེན, ཏནྣིམིཏྟེན ཝཱ ཏབྦོཧཱརེན། པུབྦཡོགེཏི པུབྦཡོགཀཐཱཡཾ། པཔཉྩོ ཨེསཱཏི ཨེསོ ཏུམྷེསུ ཨཱགཏེསུ ཡཐཱཔཝཏྟོ པཊིསནྠཱརོ ཀཐཱསམུདཱཙཱརོ ཙ ཨམྷཱཀཾ པཔཉྩོ། ཨེཏྟཀམྤི ཨཀཏྭཱ སམཎདྷམྨམེཝ ཀརོམཱཏི ཨདྷིཔྤཱཡོ།
Samaṇasaññāsamudācārenāti ‘‘ahaṃ samaṇo’’ti evaṃ uppannasaññāsamuṭṭhitena samudācārena, tannimittena vā tabbohārena. Pubbayogeti pubbayogakathāyaṃ. Papañco esāti eso tumhesu āgatesu yathāpavatto paṭisanthāro kathāsamudācāro ca amhākaṃ papañco. Ettakampi akatvā samaṇadhammameva karomāti adhippāyo.
ཨརིཡབྷཱུམིཾ པཏྟོཏི ཨནཱགཱམིཕལཾ ཨདྷིགཏོ། པཀྐུསཱཏིཀུལཔུཏྟཾ སནྡྷཱཡ ཝདཏི། ཝིབྷཛིཏྭཱཏི ཝིབྷཱགཾ ཀཏྭཱ། ཏུརིཏཱལཔནཝསེནཱཏི ཏུརིཏཾ ཨཱལཔནཝསེན། ཏེན དུལླབྷོ ཨཡཾ སམཎོ, ཏསྨཱ སཱིགྷམསྶ པཉྷོ ཀཐེཏབྦོ, ཨིམིནཱ ཙ སཱིགྷཾ གནྟྭཱ སཏྠཱ པུཙྪིཏབྦོཏི ཏུརིཏཾ ཨཱལཔཱིཏི དསྶེཏི། ‘‘ཡཐཱ ཝཱ’’ཏིཨཱདིནཱ པན ཝཙནཱལངྐཱརཝསེན དྭིཀྑཏྟུཾ ཨཱལཔཏི། ཨེཝམཱཧཱཏི ‘‘བྷིཀྑུ བྷིཀྑཱུ’’ཏི ཨེཝཾ དྭིཀྑཏྟུཾ ཨཝོཙ།
Ariyabhūmiṃ pattoti anāgāmiphalaṃ adhigato. Pakkusātikulaputtaṃ sandhāya vadati. Vibhajitvāti vibhāgaṃ katvā. Turitālapanavasenāti turitaṃ ālapanavasena. Tena dullabho ayaṃ samaṇo, tasmā sīghamassa pañho kathetabbo, iminā ca sīghaṃ gantvā satthā pucchitabboti turitaṃ ālapīti dasseti. ‘‘Yathā vā’’tiādinā pana vacanālaṅkāravasena dvikkhattuṃ ālapati. Evamāhāti ‘‘bhikkhu bhikkhū’’ti evaṃ dvikkhattuṃ avoca.
ཝམྨིཀཔརིཡཱཡེན ཀརཛཀཱཡཾ པཙྩཀྑཾ ཀཏྭཱ དསྶེནྟཱི དེཝཏཱ ‘‘ཨཡཾ ཝམྨིཀོ’’ཏི ཨཱཧ། ཏཱཡ པན བྷཱཝཏྠསྶ ཨབྷཱསིཏཏྟཱ སདྡཏྠམེཝ དསྶེནྟོ ‘‘པུརཏོ ཋིཏཾ…པེ॰… ཨཡནྟི ཨཱཧཱ’’ཏི ཨཝོཙ། སེསེསུཔི ཨེསེཝ ནཡོ། མཎྜཱུཀནྟི ཐལམཎྜཱུཀཾ། སོ ཧི ཨུདྡྷུམཱཡིཀཱཏི ཝུཙྩཏི, ན ཨུདཀམཎྜཱུཀོ། ཏསྶ ནིཝཱསཏོ ཝཱཏོ མཱ ཁོ བཱདྷཡིཏྠཱཏི ‘‘ཨུཔརིཝཱཏཏོ ཨཔགམྨཱ’’ཏི ཝུཏྟཾ། ཀཐཾ པནཱཡཾ དེཝཏཱ ཨིམིནཱ ནཱིཧཱརེན ཨིམེ པཉྷེ ཐེརསྶ ཨཱཙིཀྑཱིཏི? ཀེཙི ཏཱཝ ཨཱཧུ – ཡཐཱསུཏམཏྠཾ ཨུཔམཱབྷཱཝེན གཧེཏྭཱ ཨཏྟནོ པཊིབྷཱནེན ཨུཔམེཡྻཏྠཾ མནསཱ ཙིནྟེཏྭཱ ཏཾ བྷགཝཱཝ ཨིམསྶ ཨཱཙིཀྑིསྶཏི། སཱ ཙ དེསནཱ ཨཏྠཱཡ ཧིཏཱཡ སུཁཱཡ ཧོཏཱིཏི ‘‘ཨཡཾ ཝམྨིཀོ’’ཏིཨཱདིནཱ ཨུཔམཱཝསེནེཝ པནྣརས པཉྷེ ཐེརསྶ ཨཱཙིཀྑི། ཀསྶཔསམྨཱསམྦུདྡྷཀཱལེ ཀིར བཱརཱཎསིཡཾ ཨེཀོ སེཊྛི ཨཌྜྷོ མཧདྡྷནོ མཧནྟཾ ནིདྷཱནཾ ནིདཧིཏྭཱ པལིགྷཱདིཨཱཀཱརཱནི ཀཱནིཙིཔི ལངྒཱནི ཏཏྠ ཋཔེསི། སོ མརཎཀཱལེ ཨཏྟནོ སཧཱཡསྶ བྲཱཧྨཎསྶ ཨཱརོཙེསི – ‘‘ཨིམསྨིཾ ཋཱནེ མཡཱ ནིདྷཱནཾ ནིདཧིཏཾ, ཏཾ མམ པུཏྟསྶ ཝིཉྙུཏཾ པཏྟསྶ དསྶེཏཱི’’ཏི ཝཏྭཱ ཀཱལམཀཱསི། བྲཱཧྨཎོ སཧཱཡཀཔུཏྟསྶ ཝིཉྙུཏཾ པཏྟཀཱལེ ཏཾ ཋཱནཾ དསྶེསི། སོ ནིཁནིཏྭཱ སབྦཔཙྪཱ ནཱགཾ པསྶི, ནཱགོ ཨཏྟནོ པུཏྟཾ དིསྭཱ ‘‘སུཁེནེཝ དྷནཾ གཎྷཏཱུ’’ཏི ཨཔགཙྪི། སྭཱཡམཏྠོ ཏདཱ ལོཀེ པཱཀཊོ ཛཱཏོ། ཨཡཾ པན དེཝཏཱ ཏདཱ བཱརཱཎསིཡཾ གཧཔཏིཀུལེ ནིབྦཏྟིཏྭཱ ཝིཉྙུཏཾ པཏྟོ སཏྠརི པརིནིབྦུཏེ ཨུརཾ དཏྭཱ སཱསནེ པབྦཛིཏོ པཉྩཧི སཧཱཡཀབྷིཀྑཱུཧི སདྡྷིཾ སམཎདྷམྨམཀཱསི། ཡེ སནྡྷཱཡ ཝུཏྟཾ ‘‘པཉྩ བྷིཀྑཱུ ནིསྶེཎིཾ བནྡྷིཏྭཱ’’ཏིཨཱདི། ཏེན ཝུཏྟཾ ‘‘ཡཐཱསུཏམཏྠཾ ཨུཔམཱབྷཱཝེན གཧེཏྭཱ’’ཏིཨཱདི། ཨཔརེ པན ‘‘དེཝཏཱ ཨཏྟནོ པཊིབྷཱནེན ཨིམེ པཉྷེ ཨེཝཾ ཨབྷིསངྑརིཏྭཱ ཐེརསྶ ཨཱཙིཀྑཱི’’ཏི ཝདནྟི། དེཝཔུཏྟེ ནིསྶཀྐཾ དེཝཔུཏྟཔཉྷཏྟཱ ཏསྶ ཨཏྠསྶ།
Vammikapariyāyena karajakāyaṃ paccakkhaṃ katvā dassentī devatā ‘‘ayaṃ vammiko’’ti āha. Tāya pana bhāvatthassa abhāsitattā saddatthameva dassento ‘‘purato ṭhitaṃ…pe… ayanti āhā’’ti avoca. Sesesupi eseva nayo. Maṇḍūkanti thalamaṇḍūkaṃ. So hi uddhumāyikāti vuccati, na udakamaṇḍūko. Tassa nivāsato vāto mā kho bādhayitthāti ‘‘uparivātato apagammā’’ti vuttaṃ. Kathaṃ panāyaṃ devatā iminā nīhārena ime pañhe therassa ācikkhīti? Keci tāva āhu – yathāsutamatthaṃ upamābhāvena gahetvā attano paṭibhānena upameyyatthaṃ manasā cintetvā taṃ bhagavāva imassa ācikkhissati. Sā ca desanā atthāya hitāya sukhāya hotīti ‘‘ayaṃ vammiko’’tiādinā upamāvaseneva pannarasa pañhe therassa ācikkhi. Kassapasammāsambuddhakāle kira bārāṇasiyaṃ eko seṭṭhi aḍḍho mahaddhano mahantaṃ nidhānaṃ nidahitvā palighādiākārāni kānicipi laṅgāni tattha ṭhapesi. So maraṇakāle attano sahāyassa brāhmaṇassa ārocesi – ‘‘imasmiṃ ṭhāne mayā nidhānaṃ nidahitaṃ, taṃ mama puttassa viññutaṃ pattassa dassetī’’ti vatvā kālamakāsi. Brāhmaṇo sahāyakaputtassa viññutaṃ pattakāle taṃ ṭhānaṃ dassesi. So nikhanitvā sabbapacchā nāgaṃ passi, nāgo attano puttaṃ disvā ‘‘sukheneva dhanaṃ gaṇhatū’’ti apagacchi. Svāyamattho tadā loke pākaṭo jāto. Ayaṃ pana devatā tadā bārāṇasiyaṃ gahapatikule nibbattitvā viññutaṃ patto satthari parinibbute uraṃ datvā sāsane pabbajito pañcahi sahāyakabhikkhūhi saddhiṃ samaṇadhammamakāsi. Ye sandhāya vuttaṃ ‘‘pañca bhikkhū nisseṇiṃ bandhitvā’’tiādi. Tena vuttaṃ ‘‘yathāsutamatthaṃ upamābhāvena gahetvā’’tiādi. Apare pana ‘‘devatā attano paṭibhānena ime pañhe evaṃ abhisaṅkharitvā therassa ācikkhī’’ti vadanti. Devaputte nissakkaṃ devaputtapañhattā tassa atthassa.
༢༥༡. ཙཏཱུཧི མཧཱབྷཱུཏེཧི ནིབྦཏྟོཏི ཙཱཏུམཧཱབྷཱུཏིཀོ། ཏེནཱཧ ‘‘ཙཏུམཧཱབྷཱུཏམཡསྶཱ’’ཏི། ཝམཏི ཨུགྒིརནྟོ ཝིཡ ཧོཏཱིཏི ཨཏྠོ། ཝནྟཀོཏི ཨུཙྪཌྜཀོ། ཝནྟུསྶཡོཏི ཨུཔཙིཀཱཧི ཝནྟསྶ མཏྟིཀཱཔིཎྜསྶ ཨུསྶཡབྷཱུཏོ། ཝནྟསིནེཧསམྦདྡྷོཏི ཝནྟེན ཁེལ༹སིནེཧེན སམྤིཎྜིཏོ། ཨསུཙིཀལིམལཾ ཝམཏཱིཏི ཨེཏྠ མུཁཱདཱིཧི པཱཎཀཱནཾ ནིགྒམནཏོ པཱཎཀེ ཝམཏཱིཏི ཨཡམྤི ཨཏྠོ ལབྦྷཏེཝ། ཨརིཡེཧི ཝནྟཀོཏི ཀཱཡབྷཱཝསཱམཉྙེན ཝུཏྟཾ། དུཀྑསཙྩཔརིཉྙཱཡ ཝཱ སབྦསྶཔི ཏེབྷཱུམཀདྷམྨཛཱཏསྶ པརིཉྙཱཏཏྟཱ སབྦོཔི ཀཱཡོ ཨརིཡེཧི ཚནྡརཱགཔྤཧཱནེན ཝནྟོ ཨེཝ། ཏཾ སབྦནྟི ཡེཧི ཏཱིཧི ཨཊྛིསཏེཧི ཨུསྶིཏོ, ཡེཧི ནྷཱརཱུཧི སམྦདྡྷོ, ཡེཧི མཾསེཧི ཨཝལིཏྟོ, ཡེན ཨལླཙམྨེན པརིཡོནདྡྷོ, ཡཱཡ ཚཝིཡཱ རཉྫིཏོ, ཏཾ ཨཊྛིཨཱདིསབྦཾ ཨཙྩནྟམེཝ ཛིགུཙྪིཏྭཱ ཝིརཏྟཏཱཡཝནྟམེཝ། ‘‘ཡཐཱ ཙཱ’’ཏིཨཱདིནཱ ཝཏྟབྦོཔམཏོཔི ཝམྨིཀོ ཝིཡ ཝམྨིཀོཏི ཨིམམཏྠཾ དསྶེཏི།
251. Catūhi mahābhūtehi nibbattoti cātumahābhūtiko. Tenāha ‘‘catumahābhūtamayassā’’ti. Vamati uggiranto viya hotīti attho. Vantakoti ucchaḍḍako. Vantussayoti upacikāhi vantassa mattikāpiṇḍassa ussayabhūto. Vantasinehasambaddhoti vantena kheḷasinehena sampiṇḍito. Asucikalimalaṃ vamatīti ettha mukhādīhi pāṇakānaṃ niggamanato pāṇake vamatīti ayampi attho labbhateva. Ariyehi vantakoti kāyabhāvasāmaññena vuttaṃ. Dukkhasaccapariññāya vā sabbassapi tebhūmakadhammajātassa pariññātattā sabbopi kāyo ariyehi chandarāgappahānena vanto eva. Taṃ sabbanti yehi tīhi aṭṭhisatehi ussito, yehi nhārūhi sambaddho, yehi maṃsehi avalitto, yena allacammena pariyonaddho, yāya chaviyā rañjito, taṃ aṭṭhiādisabbaṃ accantameva jigucchitvā virattatāyavantameva. ‘‘Yathā cā’’tiādinā vattabbopamatopi vammiko viya vammikoti imamatthaṃ dasseti.
སམྦྷཝཏི ཨེཏསྨཱཏི སམྦྷཝོ, མཱཏཱཔེཏྟིཀོ སམྦྷཝོ ཨེཏསྶཱཏི མཱཏཱཔེཏྟིཀསམྦྷཝོ། ཏསྶ། ཨུཔཙིཡཏི ཨེཏེནཱཏི ཨུཔཙཡོ’ ཨོདནཀུམྨཱསཾ ཨུཔཙཡོ ཨེཏསྶཱཏི ཨོདནཀུམྨཱསཱུཔཙཡོ། ཏསྶ། ཨདྷུཝསབྷཱཝཏཱཡ ཨནིཙྩདྷམྨསྶ, སེདགཱུཐ-པིཏྟ-སེམྷཱདི-དྷཱཏུཀྑོབྷ-གརུབྷཱཝདུགྒནྡྷཱནཾ ཝིནོདནཱཡ ཨུཙྪཱདེཏབྦདྷམྨསྶ, པརིཏོ སམྦཱཧནེན པརིམདྡིཏབྦདྷམྨསྶ, ཁཎེ ཁཎེ བྷིཛྫནསབྷཱཝཏཱཡ བྷེདནདྷམྨསྶ, ཏཏོ ཨེཝ ཝིཀིརཎསབྷཱཝཏཱཡ ཝིདྡྷཾསནདྷམྨསྶཱཏི དྷམྨ-སདྡོ པཙྩེཀཾ ཡོཛེཏབྦོ། ཏནུཝིལེཔནེནཱཏི ཀཱཡཱཝལེཔནེན ཨུཙྪཱདནཝིལེཔནེན། ཨངྒཔཙྩངྒཱབཱདྷཝིནོདནཏྠཱཡཱཏི ཏཱདིསསམུཊྛཱན-སརཱིརཝིཀཱརཝིགམཱཡ། ཡསྨཱ སུཀྐསོཎིཏཾ ཨཱཧཱརོ, ཨུཙྪཱདནཾ པརིམདྡནཉྩ ཡཐཱརཧཾ ཨུཔྤཱདསྶ, ཝུཌྜྷིཡཱ ཙ པཙྩཡོ, ཏསྨཱ ཨཱཧ ‘‘མཱཏཱཔེཏྟིཀ…པེ॰… ཀཐིཏོ’’ཏི། ཨུཙྩཱཝཙབྷཱཝོཏི ཡཐཱརཧཾ ཡོཛེཏབྦོ – ཨོདནཀུམྨཱསཱུཔཙཡ-ཨུཙྪཱདནཔརིམདྡནགྒཧཎེཧི ཨུཙྩབྷཱཝོ, ཝཌྜྷཱི། མཱཏཱཔེཏྟིཀསམྦྷཝགྒཧཎེན སམུདཡོ། ཨིཏརེཧི ཨཝཙབྷཱཝོ, པརིཧཱནི, ཨཏྠངྒམོ པཀཱསིཏོ། ཨངྒཔཙྩངྒཱནཾ སཎྛཔནམྤི ཧི ཝཊྚཔཙྩཡཏྟཱ ཝཊྚནྟི།
Sambhavati etasmāti sambhavo, mātāpettiko sambhavo etassāti mātāpettikasambhavo. Tassa. Upaciyati etenāti upacayo’ odanakummāsaṃ upacayo etassāti odanakummāsūpacayo. Tassa. Adhuvasabhāvatāya aniccadhammassa, sedagūtha-pitta-semhādi-dhātukkhobha-garubhāvaduggandhānaṃ vinodanāya ucchādetabbadhammassa, parito sambāhanena parimadditabbadhammassa, khaṇe khaṇe bhijjanasabhāvatāya bhedanadhammassa, tato eva vikiraṇasabhāvatāya viddhaṃsanadhammassāti dhamma-saddo paccekaṃ yojetabbo. Tanuvilepanenāti kāyāvalepanena ucchādanavilepanena. Aṅgapaccaṅgābādhavinodanatthāyāti tādisasamuṭṭhāna-sarīravikāravigamāya. Yasmā sukkasoṇitaṃ āhāro, ucchādanaṃ parimaddanañca yathārahaṃ uppādassa, vuḍḍhiyā ca paccayo, tasmā āha ‘‘mātāpettika…pe… kathito’’ti. Uccāvacabhāvoti yathārahaṃ yojetabbo – odanakummāsūpacaya-ucchādanaparimaddanaggahaṇehi uccabhāvo, vaḍḍhī. Mātāpettikasambhavaggahaṇena samudayo. Itarehi avacabhāvo, parihāni, atthaṅgamo pakāsito. Aṅgapaccaṅgānaṃ saṇṭhapanampi hi vaṭṭapaccayattā vaṭṭanti.
ཀོདྷོ དྷཱུམོཏི ཨེཏྠ དྷཱུམཔརིཡཱཡེན ཀོདྷསྶ ཝུཏྟཏྟཱ དྷཱུམ-སདྡོ ཀོདྷེ ཝཏྟཏཱིཏི ཝུཏྟཾ ‘‘དྷཱུམོ ཝིཡ དྷཱུམོ’’ཏི། བྷསྨནཱིཏི བྷསྨཾ། མོསཝཛྫནྟི མུསཱཝཱདོ། དྷཱུམོ ཨེཝ དྷཱུམཱཡིཏཾ། ཨིཙྪཱ དྷཱུམཱཡིཏཾ ཨེཏིསྶཱཏི ཨིཙྪཱདྷཱུམཱཡིཏཱ, པཛཱ། ཨིཙྪཱདྷཱུམཱཡིཏསདྡསྶ ཏཎྷཱཡ ཝུཏྟི ཝུཏྟནཡོ ཨེཝ། དྷཱུམཱཡནྟོཏི ཝིཏཀྐསནྟཱཔེན སཾཏཔྤེནྟོ, ཝིཏཀྐེནྟོཏི ཨཏྠོ། པལིཔོཏི དུཀྐརམཧཱཀདྡམཾ། ཏིམཱུལནྟི ཏཱིཧི མཱུལེཧི པཏིཊྛིཏཾ ཝིཡ ཨཙལཾ པཝཏྟནྟི ཝུཏྟཾ། རཛོ ཙ དྷཱུམོ ཙ མཡཱ པཀཱསིཏཱཏི རཛསབྷཱཝཀརཎཊྛེན ‘‘རཛོ’’ཏི ཙ དྷཱུམསབྷཱཝཀརཎཊྛེན ‘‘དྷཱུམོ’’ཏི ཙ མཡཱ པཀཱསིཏཱ། པཀཏིདྷཱུམོ ཝིཡ ཨགྒིསྶ ཀིལེསགྒིཛཱལསྶ པཉྙཱཎབྷཱཝཏོ། དྷམྨདེསནཱདྷཱུམོ ཉཱཎགྒིསནྡྷཱིཔནསྶ པུབྦངྒམབྷཱཝཏོ། ཨཡཾ རཏྟིཾ དྷཱུམཱཡནཱཏི ཡཱ དིཝཱ ཀཏྟབྦཀམྨནྟེ ཨུདྡིསྶ རཏྟིཡཾ ཨནུཝིཏཀྐནཱ, ཨཡཾ རཏྟིཾ དྷཱུམཱཡནཱ།
Kodho dhūmoti ettha dhūmapariyāyena kodhassa vuttattā dhūma-saddo kodhe vattatīti vuttaṃ ‘‘dhūmo viya dhūmo’’ti. Bhasmanīti bhasmaṃ. Mosavajjanti musāvādo. Dhūmo eva dhūmāyitaṃ. Icchā dhūmāyitaṃ etissāti icchādhūmāyitā, pajā. Icchādhūmāyitasaddassa taṇhāya vutti vuttanayo eva. Dhūmāyantoti vitakkasantāpena saṃtappento, vitakkentoti attho. Palipoti dukkaramahākaddamaṃ. Timūlanti tīhi mūlehi patiṭṭhitaṃ viya acalaṃ pavattanti vuttaṃ. Rajo ca dhūmo ca mayā pakāsitāti rajasabhāvakaraṇaṭṭhena ‘‘rajo’’ti ca dhūmasabhāvakaraṇaṭṭhena ‘‘dhūmo’’ti ca mayā pakāsitā. Pakatidhūmo viya aggissa kilesaggijālassa paññāṇabhāvato. Dhammadesanādhūmo ñāṇaggisandhīpanassa pubbaṅgamabhāvato. Ayaṃ rattiṃ dhūmāyanāti yā divā kattabbakammante uddissa rattiyaṃ anuvitakkanā, ayaṃ rattiṃ dhūmāyanā.
སཏྟནྣཾ དྷམྨཱནནྟི ཨིདཾ སུཏྟེ (ཙཱུལ༹ནི॰ མེཏྟགཱུམཱཎཝཔུཙྪཱནིདྡེས ༢༨) ཨཱགཏནཡེན ཝུཏྟཾ། སུཏྟཉྩ ཏཐཱ ཨཱརཱདྷནཝེནེཡྻཛ྄ཛྷཱསཡཝསེན། ཏདེཀཊྛཏཱཡ ཝཱ ཏདཉྙཀིལེསཱནཾ། སུནྡརཔཉྙོཏི ཉཱཏཏཱིརཎཔཧཱནཔརིཉྙཱཡ པཉྙཱཡ སུནྡརཔཉྙོ།
Sattannaṃ dhammānanti idaṃ sutte (cūḷani. mettagūmāṇavapucchāniddesa 28) āgatanayena vuttaṃ. Suttañca tathā ārādhanaveneyyajjhāsayavasena. Tadekaṭṭhatāya vā tadaññakilesānaṃ. Sundarapaññoti ñātatīraṇapahānapariññāya paññāya sundarapañño.
ཨེཏནྟི ‘‘སཏྠ’’ནྟི ཨེཏཾ ཨདྷིཝཙནཾ སཾཀིལེསདྷམྨཱནཾ སསནཏོ སམུཙྪིནྡནཏོ། ནྟི ཝཱིརིཡཾ། པཉྙཱགཏིཀམེཝ པཉྙཱཡ ཧིཏསྶེཝ ཨདྷིཔྤེཏཏྟཱ། ལོཀིཡཱཡ པཉྙཱཡ ཨཱརམྦྷཀཱལེ ལོཀིཡཝཱིརིཡཾ གཧེཏབྦཾ, ལོཀུཏྟརཱཡ པཉྙཱཡ པཝཏྟིཀྑཎེ ལོཀུཏྟརཝཱིརིཡཾ གཧེཏབྦནྟི ཡོཛནཱ། ཨཏྠདཱིཔནཱཏི ཨུཔམེཡྻཏྠདཱིཔནཱི ཨུཔམཱ།
Etanti ‘‘sattha’’nti etaṃ adhivacanaṃ saṃkilesadhammānaṃ sasanato samucchindanato. Nti vīriyaṃ. Paññāgatikameva paññāya hitasseva adhippetattā. Lokiyāya paññāya ārambhakāle lokiyavīriyaṃ gahetabbaṃ, lokuttarāya paññāya pavattikkhaṇe lokuttaravīriyaṃ gahetabbanti yojanā. Atthadīpanāti upameyyatthadīpanī upamā.
གཱམཏོཏི ཨཏྟནོ ཝསནགཱམཏོ། མནྟེཏི ཨཱཐབྦནམནྟེ། ཏེ ཧི བྲཱཧྨཎཱ ཨརཉྙེ ཨེཝ ཝཱཙེནྟི ‘‘མཱ ཨཉྙེ ཨསྶོསུ’’ནྟི། ཏཐཱ ཨཀཱསཱིཏི ཙཏྟཱརོ ཀོཊྛཱསེ ཨཀཱསི། ཨེཝམེཏྠ ཝམྨིཀཔཉྷསྶེཝ ཝསེན ཨུཔམཱ ཨཱགཏཱ, སེསཱནཾ ཝསེན ཧེཊྛཱ ཝུཏྟནཡེན ཝེདིཏབྦཱ།
Gāmatoti attano vasanagāmato. Manteti āthabbanamante. Te hi brāhmaṇā araññe eva vācenti ‘‘mā aññe assosu’’nti. Tathā akāsīti cattāro koṭṭhāse akāsi. Evamettha vammikapañhasseva vasena upamā āgatā, sesānaṃ vasena heṭṭhā vuttanayena veditabbā.
ལངྒནཊྛེན ནིཝཱརཎཊྛེན ལངྒཱི, པལིགྷོ། ཉཱཎམུཁེཏི ཝིཔསྶནཱཉཱཎཝཱིཐིཡཾ། པཏཏཱིཏི པཝཏྟཏི། ཀམྨཊྛཱནཨུགྒཧཔརིཔུཙྪཱཝསེནཱཏི ཙཏུསཙྩཀམྨཊྛཱནསྶ ཨུགྒཎྷནེན ཏསྶ ཨཏྠཔརིཔུཙྪཱཝསེན ཙེཝ ཝིཔསྶནཱསངྑཱཏ-ཨཏྠཝིནིཙྪཡ-པརིཔུཙྪཱཝསེན ཙ། སབྦསོ ཉཱཏུཾ ཨིཙྪཱ ཧི པརིཔུཙྪཱ། ཝིཔསྶནཱ ཙ ཨནིཙྩཱདིཏོ སབྦཏེབྷཱུམཀདྷམྨཱནཾ ཉཱཏུཾ ཨིཙྪཏི། ཨེཝཾ ཝིཔསྶནཱཝསེན ཨཝིཛྫཱཔཧཱནམཱཧ, ཨུཔརིཀཏྟབྦསབྦྷཱཝཏོ ན ཏཱཝ མགྒཝསེན།
Laṅganaṭṭhena nivāraṇaṭṭhena laṅgī, paligho. Ñāṇamukheti vipassanāñāṇavīthiyaṃ. Patatīti pavattati. Kammaṭṭhānauggahaparipucchāvasenāti catusaccakammaṭṭhānassa uggaṇhanena tassa atthaparipucchāvasena ceva vipassanāsaṅkhāta-atthavinicchaya-paripucchāvasena ca. Sabbaso ñātuṃ icchā hi paripucchā. Vipassanā ca aniccādito sabbatebhūmakadhammānaṃ ñātuṃ icchati. Evaṃ vipassanāvasena avijjāpahānamāha, uparikattabbasabbhāvato na tāva maggavasena.
ཝལླིཨནྟརེ ཝཱཏི ཝཱ-སདྡོ པཾསུཨནྟརེ ཝཱ མཏྟིཀནྟརེ ཝཱཏི ཨཝུཏྟཝིཀཔྤཏྠོ། ཙིཏྟཱཝིལམཏྟཀོཝཱཏི ཙིཏྟཀྑོབྷམཏྟཀོཝ། ཨནིགྒཧིཏོཏི པཊིསངྑཱནབལེན ཨནིཝཱརིཏོ། མུཁཝིཀུལནཾ མུཁསངྐོཙོ། ཧནུསཉྩོཔནཾ པཱཔེཏི ཨནྟོཛཔྤནཱཝཏྠཱཡཾ། དིསཱ ཝིལོཀནཾ པཱཔེཏི ཡཏྠ བཱདྷེཏབྦོ ཋིཏོ, ཏཾདསྶནཏྠཾ ནིཝཱརཀཔརིཝཱརཎཏྠཾ། དཎྜསཏྠཱབྷིནིཔཱཏནྟི དཎྜསཏྠཱནཾ པརསྶ ཨུཔརི ནིཔཱཏནཱཝཏྠཾ། ཡེན ཀོདྷེན ཨནིགྒཧིཏེན མཱཏཱདིཀཾ ཨགྷཱཏེཏབྦཾ ཨུགྒྷཱཏེཏྭཱ ‘‘ཨཡུཏྟཾ ཝཏ མཡཱ ཀཏ’’ནྟི ཨཏྟཱནམྤི ཧནཏི, ཏཾ སནྡྷཱཡེཏཾ ཝུཏྟཾ ‘‘པརགྷཱཏནམྤི ཨཏྟགྷཱཏནམྤི པཱཔེཏཱི’’ཏི། ཡེན ཝཱ པརསྶ ཧཉྙམཱནསྶ ཝསེན གྷཱཏཀོཔི གྷཱཏནཾ པཱཔུཎཱཏི, ཏཱདིསསྶ ཝསེནཱཡམཏྠོ ཝེདིཏབྦོ། ཀོདྷསཱམཉྙེན ཧེཏཾ ཝུཏྟཾ ‘‘པརཾ གྷཱཏེཏྭཱ ཨཏྟཱནཾ གྷཱཏེཏཱི’’ཏི། པརམུསྶདགཏོཏི པརམུཀྐཾསགཏོ། དལ༹ྷཾ པརིསྶཡམཱཝཧཏཱཡ ཀོདྷོཝ ཀོདྷཱུཔཱཡཱསོ། ཏེནཱཧ ‘‘བལཝཔྤཏྟོ’’ཏིཨཱདི།
Valliantare vāti vā-saddo paṃsuantare vā mattikantare vāti avuttavikappattho. Cittāvilamattakovāti cittakkhobhamattakova. Aniggahitoti paṭisaṅkhānabalena anivārito. Mukhavikulanaṃ mukhasaṅkoco. Hanusañcopanaṃ pāpeti antojappanāvatthāyaṃ. Disā vilokanaṃ pāpeti yattha bādhetabbo ṭhito, taṃdassanatthaṃ nivārakaparivāraṇatthaṃ. Daṇḍasatthābhinipātanti daṇḍasatthānaṃ parassa upari nipātanāvatthaṃ. Yena kodhena aniggahitena mātādikaṃ aghātetabbaṃ ugghātetvā ‘‘ayuttaṃ vata mayā kata’’nti attānampi hanati, taṃ sandhāyetaṃ vuttaṃ ‘‘paraghātanampi attaghātanampi pāpetī’’ti. Yena vā parassa haññamānassa vasena ghātakopi ghātanaṃ pāpuṇāti, tādisassa vasenāyamattho veditabbo. Kodhasāmaññena hetaṃ vuttaṃ ‘‘paraṃ ghātetvā attānaṃ ghātetī’’ti. Paramussadagatoti paramukkaṃsagato. Daḷhaṃ parissayamāvahatāya kodhova kodhūpāyāso. Tenāha ‘‘balavappatto’’tiādi.
དྭེདྷཱཔཐསམཱ ཧོཏི ཨཔྤཊིཔཏྟིཧེཏུབྷཱཝཏོ།
Dvedhāpathasamāhoti appaṭipattihetubhāvato.
ཀུསལདྷམྨོ ན ཏིཊྛཏི ནཱིཝརཎེཧི ནིཝཱརིཏཔརམཏྟཱ། སམཐཔུབྦངྒམཾ ཝིཔསྶནཾ བྷཱཝཡཏོ པཋམཾ སམཐེན ནཱིཝརཎཝིཀྑམྦྷནཾ ཧོཏི, ཝིཔསྶནཱ པན ཏདངྒཝསེནེཝ ཏཱནི ནཱིཧརཏཱིཏི ཝུཏྟཾ ‘‘ཝིཀྑམྦྷནཏདངྒཝསེནཱ’’ཏི།
Kusaladhammo na tiṭṭhati nīvaraṇehi nivāritaparamattā. Samathapubbaṅgamaṃ vipassanaṃ bhāvayato paṭhamaṃ samathena nīvaraṇavikkhambhanaṃ hoti, vipassanā pana tadaṅgavaseneva tāni nīharatīti vuttaṃ ‘‘vikkhambhanatadaṅgavasenā’’ti.
‘‘ཀུམྨོཝ ཨངྒཱནི སཀེ ཀཔཱལེ’’ཏིཨཱདཱིསུ (སཾ॰ ནི॰ ༡.༡༧) ཀུམྨསྶ ཨངྒབྷཱཝེན ཝིསེསཏོ པཱདསཱིསཱནི ཨེཝ ཝུཙྩནྟཱིཏི ཨཱཧ ‘‘པཉྩེཝ ཨངྒཱནི ཧོནྟཱི’’ཏི། ཝིཔསྶནཱཙཱརསྶ ཝུཙྩམཱནཏྟཱ ཨདྷིཀཱརཏོ སམྨསནཱིཡཱནམེཝ དྷམྨཱནཾ ཨིདྷ གཧཎནྟི ‘‘སབྦེཔི སངྑཏཱ དྷམྨཱ’’ཏི ཝིསེསཾ ཀཏྭཱཝ ཝུཏྟཾ། ཏེནཱཧ བྷགཝཱ ‘‘པཉྩནྣེཏཾ ཨུཔཱདཱནཀྑནྡྷཱནཾ ཨདྷིཝཙན’’ནྟི།
‘‘Kummova aṅgāni sake kapāle’’tiādīsu (saṃ. ni. 1.17) kummassa aṅgabhāvena visesato pādasīsāni eva vuccantīti āha ‘‘pañceva aṅgāni hontī’’ti. Vipassanācārassa vuccamānattā adhikārato sammasanīyānameva dhammānaṃ idha gahaṇanti ‘‘sabbepi saṅkhatā dhammā’’ti visesaṃ katvāva vuttaṃ. Tenāha bhagavā ‘‘pañcannetaṃ upādānakkhandhānaṃ adhivacana’’nti.
སུནནྟི ཀོཊྚནྟི ཨེཏྠཱཏི སཱུནཱ, ཨདྷིཀུཊྚནནྟི ཨཱཧ ‘‘སཱུནཱཡ ཨུཔརཱི’’ཏི། ཨསིནཱཏི མཾསཀནྟནེན། གྷཱཏིཡམཱནཱཏི ཧཉྙམཱནཱ ཝིབཱདྷིཡམཱནཱ། ཝཏྠུཀཱམཱནཾ ཨུཔརི ཀཏྭཱཏི ཝཏྠུཀཱམེསུ ཋཔེཏྭཱ ཏེ ཨཙྩཱདྷཱནཾ ཀཏྭཱ། ཀནྟིཏཱཏི ཚིནྡིཏཱ། ཀོཊྚིཏཱཏི བིལསོ ཝིབྷཛིཏཱ། ཚནྡརཱགཔྤཧཱནནྟི ཚནྡརཱགསྶ ཝིཀྑམྦྷནཔྤཧཱནཾ།
Sunanti koṭṭanti etthāti sūnā, adhikuṭṭananti āha ‘‘sūnāya uparī’’ti. Asināti maṃsakantanena. Ghātiyamānāti haññamānā vibādhiyamānā. Vatthukāmānaṃ upari katvāti vatthukāmesu ṭhapetvā te accādhānaṃ katvā. Kantitāti chinditā. Koṭṭitāti bilaso vibhajitā. Chandarāgappahānanti chandarāgassa vikkhambhanappahānaṃ.
སམྨཏྟཱཏི མུཙྪིཏཱ སམྨཱུལ༹ྷཱ། ནནྡཱིརཱགཾ ཨུཔགམྨ ཝཊྚཾ ཝཌྜྷེནྟཱིཏི སམྨཱུལ༹ྷཏྟཱ ཨེཝཨཱདཱིནཝཾ ཨཔསྶནྟཱ ནནྡཱིརཱགསྶ ཨཱརམྨཎཾ ཨུཔགནྟྭཱ ཏཾ པརིབྲཱུཧེནྟི། ནནྡཱིརཱགབདྡྷཱཏི ནནྡཱིརཱགེ ལགྒཏྟཱ ཏེན བདྡྷཱ། ཝཊྚེ ལགྒནྟཱིཏི ཏེབྷཱུམཀེ ཝཊྚེ སཛྫནྟི། ཏཏྠ སཛྫཏྟཱ ཨེཝ དུཀྑཾ པཏྭཱཔི ན ཨུཀྐཎྛནྟི ན ནིབྦིནྡནྟི། ཨིདྷ ཨནཝསེསཔྤཧཱནཾ ཨདྷིཔྤེཏནྟི ཨཱཧ ‘‘ཙཏུཏྠམགྒེན ནནྡཱིརཱགཔྤཧཱནཾ ཀཐིཏ’’ནྟི།
Sammattāti mucchitā sammūḷhā. Nandīrāgaṃ upagamma vaṭṭaṃ vaḍḍhentīti sammūḷhattā evaādīnavaṃ apassantā nandīrāgassa ārammaṇaṃ upagantvā taṃ paribrūhenti. Nandīrāgabaddhāti nandīrāge laggattā tena baddhā. Vaṭṭe laggantīti tebhūmake vaṭṭe sajjanti. Tattha sajjattā eva dukkhaṃ patvāpi na ukkaṇṭhanti na nibbindanti. Idha anavasesappahānaṃ adhippetanti āha ‘‘catutthamaggena nandīrāgappahānaṃ kathita’’nti.
ཨནངྒཎསུཏྟེ (མ॰ ནི॰ ཨཊྛ॰ ༡.༦༣) པཀཱསིཏོ ཨེཝ ‘‘ཚནྡཱདཱིཧི ན གཙྪནྟཱི’’ཏིཨཱདིནཱ། ‘‘བུདྡྷོ སོ བྷགཝཱ’’ཏིཨཱདི ‘‘ནམོ ཀརོཧཱི’’ཏི (མ॰ ནི॰ ༡.༢༤༩, ༢༥༡) ཝུཏྟནམཀྐཱརསྶ ཀརཎཱཀཱརདསྶནཾ། བོདྷཱཡཱཏི ཙཏུསཙྩསམྦོདྷཱཡ། ཏཐཱ དམཐསམཐཏརཎཔརིནིབྦཱནཱནི ཨརིཡམགྒཝསེན ཝེདིཏབྦཱནི། སམཐཔརིནིབྦཱནཱནི པན ཨནུཔཱདིསེསཝསེནཔི ཡོཛེཏབྦཱནི། ཀམྨཊྛཱནཾ ཨཧོསཱིཏི ཝིཔསྶནཱཀམྨཊྛཱནཾ ཨཧོསི། ཨེཏསྶ པཉྷསྶཱཏི ཨེཏསྶ པནྣརསམསྶ པཉྷསྶ ཨཏྠོ། ཨེཝཾ ཨིཏརེསུཔི ཝཏྟབྦཾ ཝིཔསྶནཱཀམྨཊྛཱནཾ ཁཱིཎཱསཝགུཎེཧི མཏྠཀཾ པཱཔེནྟོ ཡཐཱནུསནྡྷིནཱཝ དེསནཾ ནིཊྛཔེསི, ན པུཙྪིཏཱནུསནྡྷིནཱཏི ཨདྷིཔྤཱཡོ། ནནུ ཙ པུཙྪཱཝསེནཱཡཾ དེསནཱ ཨཱརདྡྷཱཏི? སཙྩཾ ཨཱརདྡྷཱ, ཨེཝཾ པན ‘‘པུཙྪཱཝསིཀོ ནིཀྑེཔོ’’ཏི ཝཏྟབྦཾ, ན ‘‘པུཙྪཱནུསནྡྷིཝསེན ནིཊྛཔིཏཱ’’ཏི། ཨནྟརཔུཙྪཱཝསེན དེསནཱཡ ཨཔརིཝཏྟིཏཏྟཱ ཨཱརམྦྷཱནུརཱུཔམེཝ པན དེསནཱ ནིཊྛཔིཏཱ།
Anaṅgaṇasutte (ma. ni. aṭṭha. 1.63) pakāsito eva ‘‘chandādīhi na gacchantī’’tiādinā. ‘‘Buddho so bhagavā’’tiādi ‘‘namo karohī’’ti (ma. ni. 1.249, 251) vuttanamakkārassa karaṇākāradassanaṃ. Bodhāyāti catusaccasambodhāya. Tathā damathasamathataraṇaparinibbānāni ariyamaggavasena veditabbāni. Samathaparinibbānāni pana anupādisesavasenapi yojetabbāni. Kammaṭṭhānaṃ ahosīti vipassanākammaṭṭhānaṃ ahosi. Etassa pañhassāti etassa pannarasamassa pañhassa attho. Evaṃ itaresupi vattabbaṃ vipassanākammaṭṭhānaṃ khīṇāsavaguṇehi matthakaṃ pāpento yathānusandhināva desanaṃ niṭṭhapesi, na pucchitānusandhināti adhippāyo. Nanu ca pucchāvasenāyaṃ desanā āraddhāti? Saccaṃ āraddhā, evaṃ pana ‘‘pucchāvasiko nikkhepo’’ti vattabbaṃ, na ‘‘pucchānusandhivasena niṭṭhapitā’’ti. Antarapucchāvasena desanāya aparivattitattā ārambhānurūpameva pana desanā niṭṭhapitā.
ཝམྨིཀསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ།
Vammikasuttavaṇṇanāya līnatthappakāsanā samattā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / མཛྫྷིམནིཀཱཡ • Majjhimanikāya / ༣. ཝམྨིཀསུཏྟཾ • 3. Vammikasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) / ༣. ཝམྨིཀསུཏྟཝཎྞནཱ • 3. Vammikasuttavaṇṇanā
