| Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) |
༧. ཝནཔཏྠཔརིཡཱཡསུཏྟཝཎྞནཱ
7. Vanapatthapariyāyasuttavaṇṇanā
༡༩༠. ཝནཱིཡཏི ཝིཝེཀཀཱམེཧི བྷཛཱིཡཏི, ཝནུཏེ ཝཱ ཏེ ཨཏྟསམྤཏྟིཡཱ ཝསནཏྠཱཡ ཡཱཙནྟོ ཝིཡ ཧོཏཱིཏི ཝནཾ, པཏིཊྛནྟི ཨེཏྠ ཝིཝེཀཀཱམཱ ཡཐཱདྷིཔྤེཏཝིསེསཱདྷིགམེནཱཏི པཏྠཾ, ཝནེསུ པཏྠཾ གཧནཊྛཱནེ སེནཱསནཾ ཝནཔཏྠཾ། པརིཡཱཡཏི ཨཏྟནོ ཕལཾ པརིགྒཧེཏྭཱ ཝཏྟཏཱིཏི པརིཡཱཡོ, ཀཱརཎནྟི ཨཱཧ ‘‘ཝནཔཏྠཔརིཡཱཡནྟི ཝནཔཏྠཀཱརཎ’’ནྟི། ཝནཔཏྠཉྷི ཏཾ ཨུཔནིསྶཱཡ ཝིཧརཏོ ཨུཔནིསྶཡཀཱརཎཾ། ཏེནཱཧ ‘‘ཝནཔཏྠཾ ཨུཔནིསྶཱཡ ཝིཧརཏཱི’’ཏི། པརིཡཱཡཏི དེསེཏབྦམཏྠཾ པཏིཊྛཔེཏཱིཏི པརིཡཱཡོ, དེསནཱ། ཝནཔཏྠཾ ཨཱརབྦྷ པཝཏྟཱ དེསནཱ ཝནཔཏྠདེསནཱ, ཏཾ, ཨུབྷཡཏྠཱཔི ཝནཔཏྠགྒཧཎཾ ལཀྑཎམཏྟཾ གཱམཱདཱིནམྤེཏྠ ཀཱརཎབྷཱཝསྶ, དེསནཱཡ ཝིསཡབྷཱཝསྶ ཙ ལབྦྷམཱནཏྟཱ།
190. Vanīyati vivekakāmehi bhajīyati, vanute vā te attasampattiyā vasanatthāya yācanto viya hotīti vanaṃ, patiṭṭhanti ettha vivekakāmā yathādhippetavisesādhigamenāti patthaṃ, vanesu patthaṃ gahanaṭṭhāne senāsanaṃ vanapatthaṃ. Pariyāyati attano phalaṃ pariggahetvā vattatīti pariyāyo, kāraṇanti āha ‘‘vanapatthapariyāyanti vanapatthakāraṇa’’nti. Vanapatthañhi taṃ upanissāya viharato upanissayakāraṇaṃ. Tenāha ‘‘vanapatthaṃ upanissāya viharatī’’ti. Pariyāyati desetabbamatthaṃ patiṭṭhapetīti pariyāyo, desanā. Vanapatthaṃ ārabbha pavattā desanā vanapatthadesanā, taṃ, ubhayatthāpi vanapatthaggahaṇaṃ lakkhaṇamattaṃ gāmādīnampettha kāraṇabhāvassa, desanāya visayabhāvassa ca labbhamānattā.
༡༩༡. ནིསྶཱཡཱཏི ཨཔསྶཱཡ, ཝིཝེཀཝཱསསྶ ཨཔསྶཡཾ ཀཏྭཱཏི ཨཏྠོ། ན ཨུཔཊྛཱཏཱིཏིཨཱདཱིཧི ཏསྨིཾ ཝནཔཏྠེ སེནཱསནསཔྤཱཡཱབྷཱཝཾ, ཨུཏུཔུགྒལདྷམྨསྶཝནསཔྤཱཡཱབྷཱཝམྤི ཝཱ དསྶེཏི། ཛཱིཝིཏསམྦྷཱརཱཏི (ཨ॰ ནི॰ ཊཱི॰ ༣.༩.༦) ཛཱིཝིཏཔྤཝཏྟིཡཱ སམྦྷཱརཱ པཙྩཡཱ། སམུདཱནེཏབྦཱཏི སམྨཱ ཉཱཡེན ཨནཝཛྫཨུཉྪཱཙརིཡཱདིནཱ ཨུདྡྷཾ ཨུདྡྷཾ ཨཱནེཏབྦཱ པཱཔུཎིཏབྦཱ། ཏེ པན ཏཐཱ སམུདཱནིཏཱ སམཱཧཊཱ ནཱམ ཧོནྟཱིཏི ཨཱཧ ‘‘སམཱཧརིཏབྦཱ’’ཏི། དུཀྑེན ཨུཔྤཛྫནྟཱིཏི སུལབྷུཔྤཱདཱ ན ཧོནྟི། ཨེཏེན བྷོཛནསཔྤཱཡཱདིཨབྷཱཝཾ དསྶེཏི། རཏྟིབྷཱགཾ ཝཱ དིཝསབྷཱགཾ ཝཱཏི བྷུམྨཏྠེ ཨུཔཡོགཝཙནནྟི ཨཱཧ ‘‘རཏྟིཀོཊྛཱསེ ཝཱ དིཝསཀོཊྛཱསེ ཝཱ’’ཏི། རཏྟིཾཡེཝ པཀྐམིཏབྦཾ སམཎདྷམྨསྶ ཏཏྠ ཨནིཔྥཛྫནཏོ།
191.Nissāyāti apassāya, vivekavāsassa apassayaṃ katvāti attho. Na upaṭṭhātītiādīhi tasmiṃ vanapatthe senāsanasappāyābhāvaṃ, utupuggaladhammassavanasappāyābhāvampi vā dasseti. Jīvitasambhārāti (a. ni. ṭī. 3.9.6) jīvitappavattiyā sambhārā paccayā. Samudānetabbāti sammā ñāyena anavajjauñchācariyādinā uddhaṃ uddhaṃ ānetabbā pāpuṇitabbā. Te pana tathā samudānitā samāhaṭā nāma hontīti āha ‘‘samāharitabbā’’ti. Dukkhena uppajjantīti sulabhuppādā na honti. Etena bhojanasappāyādiabhāvaṃ dasseti. Rattibhāgaṃ vā divasabhāgaṃ vāti bhummatthe upayogavacananti āha ‘‘rattikoṭṭhāse vā divasakoṭṭhāse vā’’ti. Rattiṃyeva pakkamitabbaṃ samaṇadhammassa tattha anipphajjanato.
༡༩༢-༣. སངྑཱཔཱིཏི ‘‘ཡདཏྠམཧཾ པབྦཛིཏོ, ན མེཏཾ ཨིདྷ ནིཔྥཛྫཏི, ཙཱིཝརཱདི པན སམུདཱགཙྪཏི, ནཱཧཾ ཏདཏྠཾ པབྦཛིཏོ, ཀིཾ མེ ཨིདྷ ཝཱསེནཱ’’ཏི པཊིསངྑཱཡཔི། ཨནནྟརཝཱརེ སངྑཱཔཱིཏི ‘‘ཡདཏྠམཧཾ པབྦཛིཏོ, ཏཾ མེ ཨིདྷ ནིཔྥཛྫཏི, ཙཱིཝརཱདི པན ན སམུདཱགཙྪཏི, ནཱཧཾ ཏདཏྠཾ པབྦཛིཏོ’’ཏི པཊིསངྑཱཡཔཱིཏི ཨཏྠོ། ཏེནཱཧ ‘‘སམཎདྷམྨསྶ ནིཔྥཛྫནབྷཱཝཾ ཛཱནིཏྭཱ’’ཏི།
192-3.Saṅkhāpīti ‘‘yadatthamahaṃ pabbajito, na metaṃ idha nipphajjati, cīvarādi pana samudāgacchati, nāhaṃ tadatthaṃ pabbajito, kiṃ me idha vāsenā’’ti paṭisaṅkhāyapi. Anantaravāre saṅkhāpīti ‘‘yadatthamahaṃ pabbajito, taṃ me idha nipphajjati, cīvarādi pana na samudāgacchati, nāhaṃ tadatthaṃ pabbajito’’ti paṭisaṅkhāyapīti attho. Tenāha ‘‘samaṇadhammassa nipphajjanabhāvaṃ jānitvā’’ti.
༡༩༥-༧. སོ པུགྒལོ ཨནཱཔུཙྪཱ པཀྐམིཏབྦཾ, ནཱནུབནྡྷིཏབྦོཏི ‘‘སོ པུགྒལོ’’ཏི པདསྶ ‘‘ནཱནུབནྡྷིཏབྦོ’’ཏི ཨིམིནཱ སམྦནྡྷོ། ཡསྶ ཡེན ཧི སམྦནྡྷོ, དཱུརཊྛེནཔི སོ བྷཝཏི ། ཏཾ པུགྒལནྟི ‘‘སོ པུགྒལོ’’ཏི པཙྩཏྟཝཙནཾ ཨུཔཡོགཝསེན པརིཎཱམེཏྭཱ ཏཾ པུགྒལཾ ཨནཱཔུཙྪཱ པཀྐམིཏབྦནྟི ཨཏྠོ། ཨཏྠཝསེན ཧི ཝིབྷཏྟིཝིཔརིཎཱམོཏི། ཏཾ ཨཱཔུཙྪཱ པཀྐམིཏབྦནྟི ཨེཏྠཱཔི ཨེསེཝ ནཡོ། ཨཱཔུཙྪཱ པཀྐམིཏབྦནྟི ཙ ཀཏཉྙུཏཀཏཝེདིཏཱཡ ནིཡོཛནཾ།
195-7.Sopuggalo anāpucchā pakkamitabbaṃ, nānubandhitabboti ‘‘so puggalo’’ti padassa ‘‘nānubandhitabbo’’ti iminā sambandho. Yassa yena hi sambandho, dūraṭṭhenapi so bhavati . Taṃ puggalanti ‘‘so puggalo’’ti paccattavacanaṃ upayogavasena pariṇāmetvā taṃ puggalaṃ anāpucchā pakkamitabbanti attho. Atthavasena hi vibhattivipariṇāmoti. Taṃ āpucchā pakkamitabbanti etthāpi eseva nayo. Āpucchā pakkamitabbanti ca kataññutakataveditāya niyojanaṃ.
༡༩༨. ཨེཝརཱུཔོཏི ཡཾ ནིསྶཱཡ བྷིཀྑུནོ གུཎེཧི ཝུདྡྷིཡེཝ པཱཊིཀངྑཱ, པཙྩཡེཧི ཙ ན པརིསྶམོ, ཨེཝརཱུཔོ དཎྜཀམྨཱདཱིཧི ནིགྒཎྷཱཏི ཙེཔི, ན པརིཙྩཛིཏབྦོཏི དསྶེཏི ‘‘སཙེཔཱི’’ཏིཨཱདིནཱ།
198.Evarūpoti yaṃ nissāya bhikkhuno guṇehi vuddhiyeva pāṭikaṅkhā, paccayehi ca na parissamo, evarūpo daṇḍakammādīhi niggaṇhāti cepi, na pariccajitabboti dasseti ‘‘sacepī’’tiādinā.
ཝནཔཏྠཔརིཡཱཡསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ།
Vanapatthapariyāyasuttavaṇṇanāya līnatthappakāsanā samattā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / མཛྫྷིམནིཀཱཡ • Majjhimanikāya / ༧. ཝནཔཏྠསུཏྟཾ • 7. Vanapatthasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) / ༧. ཝནཔཏྠཔརིཡཱཡསུཏྟཝཎྞནཱ • 7. Vanapatthapariyāyasuttavaṇṇanā
