| Library / Tipiṭaka / ತಿಪಿಟಕ • Tipiṭaka / ಅಪದಾನಪಾಳಿ • Apadānapāḷi |
೯. ವನವಚ್ಛತ್ಥೇರಅಪದಾನಂ
9. Vanavacchattheraapadānaṃ
೨೫೧.
251.
‘‘ಇಮಮ್ಹಿ ಭದ್ದಕೇ ಕಪ್ಪೇ, ಬ್ರಹ್ಮಬನ್ಧು ಮಹಾಯಸೋ।
‘‘Imamhi bhaddake kappe, brahmabandhu mahāyaso;
ಕಸ್ಸಪೋ ನಾಮ ಗೋತ್ತೇನ, ಉಪ್ಪಜ್ಜಿ ವದತಂ ವರೋ॥
Kassapo nāma gottena, uppajji vadataṃ varo.
೨೫೨.
252.
‘‘ತದಾಹಂ ಪಬ್ಬಜಿತ್ವಾನ, ತಸ್ಸ ಬುದ್ಧಸ್ಸ ಸಾಸನೇ।
‘‘Tadāhaṃ pabbajitvāna, tassa buddhassa sāsane;
ಯಾವಜೀವಂ ಚರಿತ್ವಾನ, ಬ್ರಹ್ಮಚಾರಂ ತತೋ ಚುತೋ॥
Yāvajīvaṃ caritvāna, brahmacāraṃ tato cuto.
೨೫೩.
253.
‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ।
‘‘Tena kammena sukatena, cetanāpaṇidhīhi ca;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ॥
Jahitvā mānusaṃ dehaṃ, tāvatiṃsamagacchahaṃ.
೨೫೪.
254.
‘‘ತತೋ ಚುತೋ ಅರಞ್ಞಮ್ಹಿ, ಕಪೋತೋ ಆಸಹಂ ತಹಿಂ।
‘‘Tato cuto araññamhi, kapoto āsahaṃ tahiṃ;
ವಸತೇ ಗುಣಸಮ್ಪನ್ನೋ, ಭಿಕ್ಖು ಝಾನರತೋ ಸದಾ॥
Vasate guṇasampanno, bhikkhu jhānarato sadā.
೨೫೫.
255.
‘‘ಮೇತ್ತಚಿತ್ತೋ ಕಾರುಣಿಕೋ, ಸದಾ ಪಮುದಿತಾನನೋ।
‘‘Mettacitto kāruṇiko, sadā pamuditānano;
ಉಪೇಕ್ಖಕೋ ಮಹಾವೀರೋ, ಅಪ್ಪಮಞ್ಞಾಸು ಕೋವಿದೋ॥
Upekkhako mahāvīro, appamaññāsu kovido.
೨೫೬.
256.
‘‘ವಿನೀವರಣಸಙ್ಕಪ್ಪೇ, ಸಬ್ಬಸತ್ತಹಿತಾಸಯೇ।
‘‘Vinīvaraṇasaṅkappe, sabbasattahitāsaye;
ವಿಸಟ್ಠೋ ನಚಿರೇನಾಸಿಂ, ತಸ್ಮಿಂ ಸುಗತಸಾವಕೇ॥
Visaṭṭho nacirenāsiṃ, tasmiṃ sugatasāvake.
೨೫೭.
257.
‘‘ಉಪೇಚ್ಚ ಪಾದಮೂಲಮ್ಹಿ, ನಿಸಿನ್ನಸ್ಸ ತದಾಸ್ಸಮೇ।
‘‘Upecca pādamūlamhi, nisinnassa tadāssame;
ಕದಾಚಿ ಸಾಮಿಸಂ ದೇತಿ, ಧಮ್ಮಂ ದೇಸೇಸಿ ಚೇಕದಾ॥
Kadāci sāmisaṃ deti, dhammaṃ desesi cekadā.
೨೫೮.
258.
‘‘ತದಾ ವಿಪುಲಪೇಮೇನ, ಉಪಾಸಿತ್ವಾ ಜಿನತ್ರಜಂ।
‘‘Tadā vipulapemena, upāsitvā jinatrajaṃ;
ತತೋ ಚುತೋ ಗತೋ ಸಗ್ಗಂ, ಪವಾಸೋ ಸಘರಂ ಯಥಾ॥
Tato cuto gato saggaṃ, pavāso sagharaṃ yathā.
೨೫೯.
259.
‘‘ಸಗ್ಗಾ ಚುತೋ ಮನುಸ್ಸೇಸು, ನಿಬ್ಬತ್ತೋ ಪುಞ್ಞಕಮ್ಮುನಾ।
‘‘Saggā cuto manussesu, nibbatto puññakammunā;
ಅಗಾರಂ ಛಡ್ಡಯಿತ್ವಾನ, ಪಬ್ಬಜಿಂ ಬಹುಸೋ ಅಹಂ॥
Agāraṃ chaḍḍayitvāna, pabbajiṃ bahuso ahaṃ.
೨೬೦.
260.
‘‘ಸಮಣೋ ತಾಪಸೋ ವಿಪ್ಪೋ, ಪರಿಬ್ಬಜೋ ತಥೇವಹಂ।
‘‘Samaṇo tāpaso vippo, paribbajo tathevahaṃ;
ಹುತ್ವಾ ವಸಿಂ ಅರಞ್ಞಮ್ಹಿ, ಅನೇಕಸತಸೋ ಅಹಂ॥
Hutvā vasiṃ araññamhi, anekasataso ahaṃ.
೨೬೧.
261.
‘‘ಪಚ್ಛಿಮೇ ಚ ಭವೇ ದಾನಿ, ರಮ್ಮೇ ಕಪಿಲವತ್ಥವೇ।
‘‘Pacchime ca bhave dāni, ramme kapilavatthave;
ವಚ್ಛಗೋತ್ತೋ ದಿಜೋ ತಸ್ಸ, ಜಾಯಾಯ ಅಹಮೋಕ್ಕಮಿಂ॥
Vacchagotto dijo tassa, jāyāya ahamokkamiṃ.
೨೬೨.
262.
‘‘ಮಾತು ಮೇ ದೋಹಳೋ ಆಸಿ, ತಿರೋಕುಚ್ಛಿಗತಸ್ಸ ಮೇ।
‘‘Mātu me dohaḷo āsi, tirokucchigatassa me;
ಜಾಯಮಾನಸಮೀಪಮ್ಹಿ, ವನವಾಸಾಯ ನಿಚ್ಛಯೋ॥
Jāyamānasamīpamhi, vanavāsāya nicchayo.
೨೬೩.
263.
‘‘ತತೋ ಮೇ ಅಜನೀ ಮಾತಾ, ರಮಣೀಯೇ ವನನ್ತರೇ।
‘‘Tato me ajanī mātā, ramaṇīye vanantare;
ಗಬ್ಭತೋ ನಿಕ್ಖಮನ್ತಂ ಮಂ, ಕಾಸಾಯೇನ ಪಟಿಗ್ಗಹುಂ॥
Gabbhato nikkhamantaṃ maṃ, kāsāyena paṭiggahuṃ.
೨೬೪.
264.
‘‘ತತೋ ಕುಮಾರೋ ಸಿದ್ಧತ್ಥೋ, ಜಾತೋ ಸಕ್ಯಕುಲದ್ಧಜೋ।
‘‘Tato kumāro siddhattho, jāto sakyakuladdhajo;
ತಸ್ಸ ಮಿತ್ತೋ ಪಿಯೋ ಆಸಿಂ, ಸಂವಿಸಟ್ಠೋ ಸುಮಾನಿಯೋ॥
Tassa mitto piyo āsiṃ, saṃvisaṭṭho sumāniyo.
೨೬೫.
265.
‘‘ಸತ್ತಸಾರೇಭಿನಿಕ್ಖನ್ತೇ, ಓಹಾಯ ವಿಪುಲಂ ಯಸಂ।
‘‘Sattasārebhinikkhante, ohāya vipulaṃ yasaṃ;
ಅಹಮ್ಪಿ ಪಬ್ಬಜಿತ್ವಾನ, ಹಿಮವನ್ತಮುಪಾಗಮಿಂ॥
Ahampi pabbajitvāna, himavantamupāgamiṃ.
೨೬೬.
266.
‘‘ವನಾಲಯಂ ಭಾವನೀಯಂ, ಕಸ್ಸಪಂ ಧುತವಾದಿಕಂ।
‘‘Vanālayaṃ bhāvanīyaṃ, kassapaṃ dhutavādikaṃ;
ದಿಸ್ವಾ ಸುತ್ವಾ ಜಿನುಪ್ಪಾದಂ, ಉಪೇಸಿಂ ನರಸಾರಥಿಂ॥
Disvā sutvā jinuppādaṃ, upesiṃ narasārathiṃ.
೨೬೭.
267.
‘‘ಸೋ ಮೇ ಧಮ್ಮಮದೇಸೇಸಿ, ಸಬ್ಬತ್ಥಂ ಸಮ್ಪಕಾಸಯಂ।
‘‘So me dhammamadesesi, sabbatthaṃ sampakāsayaṃ;
೨೬೮.
268.
ಅಹೋ ಸುಲದ್ಧಲಾಭೋಮ್ಹಿ, ಸುಮಿತ್ತೇನಾನುಕಮ್ಪಿತೋ॥
Aho suladdhalābhomhi, sumittenānukampito.
೨೬೯.
269.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ॰… ವಿಹರಾಮಿ ಅನಾಸವೋ॥
‘‘Kilesā jhāpitā mayhaṃ…pe… viharāmi anāsavo.
೨೭೦.
270.
‘‘ಸ್ವಾಗತಂ ವತ ಮೇ ಆಸಿ…ಪೇ॰… ಕತಂ ಬುದ್ಧಸ್ಸ ಸಾಸನಂ॥
‘‘Svāgataṃ vata me āsi…pe… kataṃ buddhassa sāsanaṃ.
೨೭೧.
271.
‘‘ಪಟಿಸಮ್ಭಿದಾ ಚತಸ್ಸೋ…ಪೇ॰… ಕತಂ ಬುದ್ಧಸ್ಸ ಸಾಸನಂ’’॥
‘‘Paṭisambhidā catasso…pe… kataṃ buddhassa sāsanaṃ’’.
ಇತ್ಥಂ ಸುದಂ ಆಯಸ್ಮಾ ವನವಚ್ಛೋ ಥೇರೋ ಇಮಾ ಗಾಥಾಯೋ
Itthaṃ sudaṃ āyasmā vanavaccho thero imā gāthāyo
ಅಭಾಸಿತ್ಥಾತಿ।
Abhāsitthāti.
ವನವಚ್ಛತ್ಥೇರಸ್ಸಾಪದಾನಂ ನವಮಂ।
Vanavacchattherassāpadānaṃ navamaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಅಪದಾನ-ಅಟ್ಠಕಥಾ • Apadāna-aṭṭhakathā / ೯. ವನವಚ್ಛತ್ಥೇರಅಪದಾನವಣ್ಣನಾ • 9. Vanavacchattheraapadānavaṇṇanā
