| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
2. வஸ்ஸகாரஸுத்தவண்ணனா
2. Vassakārasuttavaṇṇanā
22. து³தியே அபி⁴யாதுகாமோதி அபி⁴ப⁴வனத்தா²ய யாதுகாமோ. வஜ்ஜீதி வஜ்ஜிராஜானோ. ஏவங்மஹித்³தி⁴கேதி ஏவங் மஹதியா ராஜித்³தி⁴யா ஸமன்னாக³தே. ஏதேன நேஸங் ஸமக்³க³பா⁴வங் கதே²தி. ஏவங்மஹானுபா⁴வேதி ஏவங் மஹந்தேன ராஜானுபா⁴வேன ஸமன்னாக³தே . ஏதேன நேஸங் ஹத்தி²ஸிப்பாதீ³ஸு கதஸிக்க²தங் கதே²தி, யங் ஸந்தா⁴ய வுத்தங் – ‘‘ஸிக்கி²தா வதிமே லிச்ச²விகுமாரகா, ஸுஸிக்கி²தா வதிமே லிச்ச²விகுமாரகா, யத்ர ஹி நாம ஸுகு²மேன தாளச்சி²க்³க³ளேன அஸனங் அதிபாதயிஸ்ஸந்தி பொங்கா²னுபொங்க²ங் அவிராதி⁴த’’ந்தி (ஸங்॰ நி॰ 5.1115). உச்செ²ச்சா²மீதி உச்சி²ந்தி³ஸ்ஸாமி. வினாஸெஸ்ஸாமீதி அத³ஸ்ஸனங் நயிஸ்ஸாமி. அனயப்³யஸனந்தி அவட்³டி⁴ஞ்சேவ, ஞாதிப்³யஸனஞ்ச. ஆபாதெ³ஸ்ஸாமீதி பாபயிஸ்ஸாமி.
22. Dutiye abhiyātukāmoti abhibhavanatthāya yātukāmo. Vajjīti vajjirājāno. Evaṃmahiddhiketi evaṃ mahatiyā rājiddhiyā samannāgate. Etena nesaṃ samaggabhāvaṃ katheti. Evaṃmahānubhāveti evaṃ mahantena rājānubhāvena samannāgate . Etena nesaṃ hatthisippādīsu katasikkhataṃ katheti, yaṃ sandhāya vuttaṃ – ‘‘sikkhitā vatime licchavikumārakā, susikkhitā vatime licchavikumārakā, yatra hi nāma sukhumena tāḷacchiggaḷena asanaṃ atipātayissanti poṅkhānupoṅkhaṃ avirādhita’’nti (saṃ. ni. 5.1115). Ucchecchāmīti ucchindissāmi. Vināsessāmīti adassanaṃ nayissāmi. Anayabyasananti avaḍḍhiñceva, ñātibyasanañca. Āpādessāmīti pāpayissāmi.
இதி கிர ஸோ டா²னநிஸஜ்ஜாதீ³ஸு இமங் யுத்³த⁴கத²மேவ கதே²தி, ‘‘க³மனஸஜ்ஜா ஹோதா²’’தி ச ப³லகாயங் ஆணாபேதி. கஸ்மா? க³ங்கா³ய கிர ஏகங் பட்டனகா³மங் நிஸ்ஸாய அத்³த⁴யோஜனங் அஜாதஸத்துனோ விஜிதங், அத்³த⁴யோஜனங் லிச்ச²வீனங். தத்ர பப்³ப³தபாத³தோ மஹக்³க⁴ப⁴ண்ட³ங் ஓதரதி. தங் ஸுத்வா ‘‘அஜ்ஜ யாமி, ஸ்வே யாமீ’’தி அஜாதஸத்துனோ ஸங்வித³ஹந்தஸ்ஸேவ லிச்ச²வினோ ஸமக்³கா³ ஸம்மோத³மானா புரேதரங் ஆக³ந்த்வா ஸப்³ப³ங் க³ண்ஹந்தி. அஜாதஸத்து பச்சா² ஆக³ந்த்வா தங் பவத்திங் ஞத்வா குஜ்ஜி²த்வா க³ச்ச²தி. தே புனஸங்வச்ச²ரேபி ததே²வ கரொந்தி. அத² ஸோ ப³லவாகா⁴தஜாதோ, ததா³ ஏவமகாஸி.
Iti kira so ṭhānanisajjādīsu imaṃ yuddhakathameva katheti, ‘‘gamanasajjā hothā’’ti ca balakāyaṃ āṇāpeti. Kasmā? Gaṅgāya kira ekaṃ paṭṭanagāmaṃ nissāya addhayojanaṃ ajātasattuno vijitaṃ, addhayojanaṃ licchavīnaṃ. Tatra pabbatapādato mahagghabhaṇḍaṃ otarati. Taṃ sutvā ‘‘ajja yāmi, sve yāmī’’ti ajātasattuno saṃvidahantasseva licchavino samaggā sammodamānā puretaraṃ āgantvā sabbaṃ gaṇhanti. Ajātasattu pacchā āgantvā taṃ pavattiṃ ñatvā kujjhitvā gacchati. Te punasaṃvaccharepi tatheva karonti. Atha so balavāghātajāto, tadā evamakāsi.
ததோ சிந்தேஸி – ‘‘க³ணேன ஸத்³தி⁴ங் யுத்³த⁴ங் நாம பா⁴ரியங், ஏகோபி மோக⁴ப்பஹாரோ நாம நத்தி². ஏகேன கோ² பன பண்டி³தேன ஸத்³தி⁴ங் மந்தெத்வா கரொந்தோ நிரபராதோ⁴ ஹோதி, பண்டி³தோ ச ஸத்தா²ரா ஸதி³ஸோ நத்தி², ஸத்தா² ச அவிதூ³ரே து⁴ரவிஹாரே வஸதி, ஹந்தா³ஹங் பேஸெத்வா புச்சா²மி. ஸசே மே க³தேன கோசி அத்தோ² ப⁴விஸ்ஸதி, ஸத்தா² துண்ஹீ ப⁴விஸ்ஸதி. அனத்தே² பன ஸதி ‘கிங் ரஞ்ஞோ தத்த² க³தேனா’தி வக்க²தீ’’தி. ஸோ வஸ்ஸகாரங் ப்³ராஹ்மணங் பேஸேஸி. ப்³ராஹ்மணோ க³ந்த்வா ப⁴க³வதோ தமத்த²ங் ஆரோசேஸி. தேன வுத்தங் – அத² கோ² ராஜா…பே॰… ஆபாதெ³ஸ்ஸாமி வஜ்ஜீதி.
Tato cintesi – ‘‘gaṇena saddhiṃ yuddhaṃ nāma bhāriyaṃ, ekopi moghappahāro nāma natthi. Ekena kho pana paṇḍitena saddhiṃ mantetvā karonto niraparādho hoti, paṇḍito ca satthārā sadiso natthi, satthā ca avidūre dhuravihāre vasati, handāhaṃ pesetvā pucchāmi. Sace me gatena koci attho bhavissati, satthā tuṇhī bhavissati. Anatthe pana sati ‘kiṃ rañño tattha gatenā’ti vakkhatī’’ti. So vassakāraṃ brāhmaṇaṃ pesesi. Brāhmaṇo gantvā bhagavato tamatthaṃ ārocesi. Tena vuttaṃ – atha kho rājā…pe… āpādessāmi vajjīti.
ப⁴க³வந்தங் பீ³ஜயமானோதி தே²ரோ வத்தஸீஸே ட²த்வா ப⁴க³வந்தங் பீ³ஜதி, ப⁴க³வதோ பன ஸீதங் வா உண்ஹங் வா நத்தி². ப⁴க³வா ப்³ராஹ்மணஸ்ஸ வசனங் ஸுத்வா தேன ஸத்³தி⁴ங் அமந்தெத்வா தே²ரேன ஸத்³தி⁴ங் மந்தேதுகாமோ கிந்தி தே, ஆனந்த³, ஸுதந்திஆதி³மாஹ. தங் வுத்தத்த²மேவ.
Bhagavantaṃ bījayamānoti thero vattasīse ṭhatvā bhagavantaṃ bījati, bhagavato pana sītaṃ vā uṇhaṃ vā natthi. Bhagavā brāhmaṇassa vacanaṃ sutvā tena saddhiṃ amantetvā therena saddhiṃ mantetukāmo kinti te, ānanda, sutantiādimāha. Taṃ vuttatthameva.
ஏகமிதா³ஹந்தி இத³ங் ப⁴க³வா புப்³பே³ வஜ்ஜீனங் இமஸ்ஸ வஜ்ஜிஸத்தகஸ்ஸ தே³ஸிதபா⁴வப்பகாஸனத்த²ங் ஆஹ. அகரணீயாதி அகத்தப்³பா³, அக்³க³ஹேதப்³பா³தி அத்தோ². யதி³த³ந்தி நிபாதமத்தங். யுத்³த⁴ஸ்ஸாதி கரணத்தே² ஸாமிவசனங், அபி⁴முக²ங் யுத்³தே⁴ன க³ஹேதுங் ந ஸக்காதி அத்தோ². அஞ்ஞத்ர உபலாபனாயாதி ட²பெத்வா உபலாபனங். உபலாபனா நாம ‘‘அலங் விவாதே³ன, இதா³னி ஸமக்³கா³ ஹோமா’’தி ஹத்தி²அஸ்ஸரத²ஹிரஞ்ஞஸுவண்ணாதீ³னி பேஸெத்வா ஸங்க³ஹகரணங், ஏவஞ்ஹி ஸங்க³ஹங் கத்வா கேவலங் விஸ்ஸாஸேன ஸக்கா க³ண்ஹிதுந்தி அத்தோ². அஞ்ஞத்ர மிது²பே⁴தா³தி ட²பெத்வா மிது²பே⁴த³ங். இமினா ‘‘அஞ்ஞமஞ்ஞபே⁴த³ங் கத்வாபி ஸக்கா ஏதே க³ஹேது’’ந்தி த³ஸ்ஸேதி. இத³ங் ப்³ராஹ்மணோ ப⁴க³வதோ கதா²ய நயங் லபி⁴த்வா ஆஹ. கிங் பன ப⁴க³வா ப்³ராஹ்மணஸ்ஸ இமாய கதா²ய நயலாப⁴ங் ஜானாதீதி? ஆம ஜானாதி. ஜானந்தோ கஸ்மா கதே²ஸி? அனுகம்பாய. ஏவங் கிரஸ்ஸ அஹோஸி – ‘‘மயா அகதி²தேபி கதிபாஹேன க³ந்த்வா ஸப்³பே³ க³ண்ஹிஸ்ஸதி, கதி²தே பன ஸமக்³கே³ பி⁴ந்த³ந்தோ தீஹி ஸங்வச்ச²ரேஹி க³ண்ஹிஸ்ஸதி. எத்தகம்பி ஜீவிதமேவ வரங். எத்தகஞ்ஹி ஜீவந்தா அத்தனோ பதிட்டா²பூ⁴தங் புஞ்ஞங் கரிஸ்ஸந்தீ’’தி. அபி⁴னந்தி³த்வாதி சித்தேன நந்தி³த்வா. அனுமோதி³த்வாதி ‘‘யாவ ஸுபா⁴ஸிதமித³ங் போ⁴தா கோ³தமேனா’’தி வாசாய அனுமோதி³த்வா. பக்காமீதி ரஞ்ஞோ ஸந்திகங் க³தோ. ராஜாபி தமேவ பேஸெத்வா ஸப்³பே³ பி⁴ந்தி³த்வா க³ந்த்வா அனயப்³யஸனங் பாபேஸி.
Ekamidāhanti idaṃ bhagavā pubbe vajjīnaṃ imassa vajjisattakassa desitabhāvappakāsanatthaṃ āha. Akaraṇīyāti akattabbā, aggahetabbāti attho. Yadidanti nipātamattaṃ. Yuddhassāti karaṇatthe sāmivacanaṃ, abhimukhaṃ yuddhena gahetuṃ na sakkāti attho. Aññatra upalāpanāyāti ṭhapetvā upalāpanaṃ. Upalāpanā nāma ‘‘alaṃ vivādena, idāni samaggā homā’’ti hatthiassarathahiraññasuvaṇṇādīni pesetvā saṅgahakaraṇaṃ, evañhi saṅgahaṃ katvā kevalaṃ vissāsena sakkā gaṇhitunti attho. Aññatra mithubhedāti ṭhapetvā mithubhedaṃ. Iminā ‘‘aññamaññabhedaṃ katvāpi sakkā ete gahetu’’nti dasseti. Idaṃ brāhmaṇo bhagavato kathāya nayaṃ labhitvā āha. Kiṃ pana bhagavā brāhmaṇassa imāya kathāya nayalābhaṃ jānātīti? Āma jānāti. Jānanto kasmā kathesi? Anukampāya. Evaṃ kirassa ahosi – ‘‘mayā akathitepi katipāhena gantvā sabbe gaṇhissati, kathite pana samagge bhindanto tīhi saṃvaccharehi gaṇhissati. Ettakampi jīvitameva varaṃ. Ettakañhi jīvantā attano patiṭṭhābhūtaṃ puññaṃ karissantī’’ti. Abhinanditvāti cittena nanditvā. Anumoditvāti ‘‘yāva subhāsitamidaṃ bhotā gotamenā’’ti vācāya anumoditvā. Pakkāmīti rañño santikaṃ gato. Rājāpi tameva pesetvā sabbe bhinditvā gantvā anayabyasanaṃ pāpesi.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 2. வஸ்ஸகாரஸுத்தங் • 2. Vassakārasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 2. வஸ்ஸகாரஸுத்தவண்ணனா • 2. Vassakārasuttavaṇṇanā
