| Library / Tipiṭaka / તિપિટક • Tipiṭaka / અઙ્ગુત્તરનિકાય • Aṅguttaranikāya |
૭. વસ્સસુત્તં
7. Vassasuttaṃ
૧૯૭. ‘‘પઞ્ચિમે , ભિક્ખવે, વસ્સસ્સ અન્તરાયા, યં નેમિત્તા 1 ન જાનન્તિ, યત્થ નેમિત્તાનં ચક્ખુ ન કમતિ. કતમે પઞ્ચ? ઉપરિ, ભિક્ખવે, આકાસે તેજોધાતુ પકુપ્પતિ. તેન ઉપ્પન્ના મેઘા પટિવિગચ્છન્તિ. અયં, ભિક્ખવે, પઠમો વસ્સસ્સ અન્તરાયો, યં નેમિત્તા ન જાનન્તિ, યત્થ નેમિત્તાનં ચક્ખુ ન કમતિ.
197. ‘‘Pañcime , bhikkhave, vassassa antarāyā, yaṃ nemittā 2 na jānanti, yattha nemittānaṃ cakkhu na kamati. Katame pañca? Upari, bhikkhave, ākāse tejodhātu pakuppati. Tena uppannā meghā paṭivigacchanti. Ayaṃ, bhikkhave, paṭhamo vassassa antarāyo, yaṃ nemittā na jānanti, yattha nemittānaṃ cakkhu na kamati.
‘‘પુન ચપરં, ભિક્ખવે, ઉપરિ આકાસે વાયોધાતુ પકુપ્પતિ. તેન ઉપ્પન્ના મેઘા પટિવિગચ્છન્તિ. અયં, ભિક્ખવે, દુતિયો વસ્સસ્સ અન્તરાયો, યં નેમિત્તા ન જાનન્તિ, યત્થ નેમિત્તાનં ચક્ખુ ન કમતિ.
‘‘Puna caparaṃ, bhikkhave, upari ākāse vāyodhātu pakuppati. Tena uppannā meghā paṭivigacchanti. Ayaṃ, bhikkhave, dutiyo vassassa antarāyo, yaṃ nemittā na jānanti, yattha nemittānaṃ cakkhu na kamati.
‘‘પુન ચપરં, ભિક્ખવે, રાહુ અસુરિન્દો પાણિના ઉદકં સમ્પટિચ્છિત્વા મહાસમુદ્દે છડ્ડેતિ. અયં, ભિક્ખવે, તતિયો વસ્સસ્સ અન્તરાયો, યં નેમિત્તા ન જાનન્તિ, યત્થ નેમિત્તાનં ચક્ખુ ન કમતિ.
‘‘Puna caparaṃ, bhikkhave, rāhu asurindo pāṇinā udakaṃ sampaṭicchitvā mahāsamudde chaḍḍeti. Ayaṃ, bhikkhave, tatiyo vassassa antarāyo, yaṃ nemittā na jānanti, yattha nemittānaṃ cakkhu na kamati.
‘‘પુન ચપરં, ભિક્ખવે, વસ્સવલાહકા દેવા પમત્તા હોન્તિ. અયં, ભિક્ખવે, ચતુત્થો વસ્સસ્સ અન્તરાયો, યં નેમિત્તા ન જાનન્તિ, યત્થ નેમિત્તાનં ચક્ખુ ન કમતિ.
‘‘Puna caparaṃ, bhikkhave, vassavalāhakā devā pamattā honti. Ayaṃ, bhikkhave, catuttho vassassa antarāyo, yaṃ nemittā na jānanti, yattha nemittānaṃ cakkhu na kamati.
‘‘પુન ચપરં, ભિક્ખવે, મનુસ્સા અધમ્મિકા હોન્તિ. અયં, ભિક્ખવે, પઞ્ચમો વસ્સસ્સ અન્તરાયો, યં નેમિત્તા ન જાનન્તિ, યત્થ નેમિત્તાનં ચક્ખુ ન કમતિ. ઇમે ખો, ભિક્ખવે, પઞ્ચ વસ્સસ્સ અન્તરાયા, યં નેમિત્તા ન જાનન્તિ, યત્થ નેમિત્તાનં ચક્ખુ ન કમતી’’તિ. સત્તમં.
‘‘Puna caparaṃ, bhikkhave, manussā adhammikā honti. Ayaṃ, bhikkhave, pañcamo vassassa antarāyo, yaṃ nemittā na jānanti, yattha nemittānaṃ cakkhu na kamati. Ime kho, bhikkhave, pañca vassassa antarāyā, yaṃ nemittā na jānanti, yattha nemittānaṃ cakkhu na kamatī’’ti. Sattamaṃ.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) / ૭. વસ્સસુત્તવણ્ણના • 7. Vassasuttavaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૭. વસ્સસુત્તવણ્ણના • 7. Vassasuttavaṇṇanā
