| Library / Tipiṭaka / д̇ибидага • Tipiṭaka / винаяаалан̇гаара-дийгаа • Vinayālaṅkāra-ṭīkā |
26. вассуубанааяигавинижчаяагат̇аа
26. Vassūpanāyikavinicchayakathā
179. звам̣ убосат̇абавааран̣аавинижчаяам̣ гат̇зд̇ваа ид̣̇аани вассуубанааяигавинижчаяам̣ гат̇зд̇ум̣ ‘‘вассуубанааяигаад̇и зд̇т̇а’’д̇яаад̣̇имааха. д̇ад̇т̇а васанам̣ вассам̣. гим̣ д̇ам̣? васанагирияаа бхаавад̇т̇з н̣яа-бажжаяавасзна. убанаяанам̣ убанаяо. го со? убаг̇аманагирияаа, вассасса убанаяо вассуубанаяо, со зд̇иссаа бан̃н̃ад̇д̇ияаа ад̇т̇и, д̇асмим̣ ваа виж̇ж̇ад̇ийд̇и вассуубанааяигаа. гаа саа? вассуубанааяигабан̃н̃ад̇д̇и. ат̇а ваа убанаяад̇и зд̇ааяаад̇и убанааяигаа маж̇жхз д̣̇ийгхавасзна. вассасса убанааяигаа вассуубанааяигаа, саа зва бурз бхаваа буримаа бхавад̇т̇з има-бажжаяавасзна, саа зва буримигаа сагад̇т̇з га-бажжаяавасзна, д̇асмим̣ барз ид̇т̇илин̇г̇з а-гаарасса и-гаараад̣̇зсо. бажчаа бхаваа бажчимаа, саава бажчимигаа.
179. Evaṃ uposathapavāraṇāvinicchayaṃ kathetvā idāni vassūpanāyikavinicchayaṃ kathetuṃ ‘‘vassūpanāyikāti ettha’’tyādimāha. Tattha vasanaṃ vassaṃ. Kiṃ taṃ? Vasanakiriyā bhāvatthe ṇya-paccayavasena. Upanayanaṃ upanayo. Ko so? Upagamanakiriyā, vassassa upanayo vassūpanayo, so etissā paññattiyā atthi, tasmiṃ vā vijjatīti vassūpanāyikā. Kā sā? Vassūpanāyikapaññatti. Atha vā upanayati etāyāti upanāyikā majjhe dīghavasena. Vassassa upanāyikā vassūpanāyikā, sā eva pure bhavā purimā bhavatthe ima-paccayavasena, sā eva purimikā sakatthe ka-paccayavasena, tasmiṃ pare itthiliṅge a-kārassa i-kārādeso. Pacchā bhavā pacchimā, sāva pacchimikā.
ассад̇ияаа бана вассам̣ на убзд̇ийд̇и ‘‘имасмим̣ вихаарз имам̣ д̇змаасам̣ вассам̣ убзмий’’д̇и важийбхзд̣̇ам̣ гад̇ваа на убзд̇и. ‘‘на, бхигкавз, асзнаасанигзна вассам̣ убаг̇анд̇аб̣б̣ам̣, яо убаг̇ажчзяяа, аабад̇д̇и д̣̇уггадассаа’’д̇и (махаава. 204) важийбхзд̣̇ам̣ гад̇ваа вассуубаг̇аманам̣ санд̇хааяа бадигкзбо, на аалаяагаран̣авасзна убаг̇аманам̣ санд̇хааяаад̇и вад̣̇анд̇и. баал̣ияам̣ бана ависзсзна вуд̇д̇ад̇д̇аа адтагат̇ааяан̃жа д̣̇уд̇ияабаарааж̇игасам̣ван̣н̣анааяам̣ (баараа. адта. 1.84) ‘‘вассам̣ убаг̇ажчанд̇зна хи наалагабадибад̣̇ам̣ бадибаннзнаби бан̃жаннам̣ чад̣̇анаанам̣ ан̃н̃ад̇арзна чаннзязва сад̣̇ваараб̣анд̇хз сзнаасанз убаг̇анд̇аб̣б̣ам̣, д̇асмаа вассагаалз сажз сзнаасанам̣ лабхад̇и, ижжзд̇ам̣ гусалам̣. но жз лабхад̇и, хад̇т̇агаммам̣ бариязсид̇вааби гаад̇аб̣б̣ам̣. хад̇т̇агаммам̣ алабханд̇зна саамамби гаад̇аб̣б̣ам̣, на д̇взва асзнаасанигзна вассам̣ убаг̇анд̇аб̣б̣а’’нд̇и (махаава. 204) д̣̇ал̣хам̣ гад̇ваа вуд̇д̇ад̇д̇аа асзнаасанигасса нааваад̣̇им̣ винаа ан̃н̃ад̇т̇а аалаяамад̇д̇зна убаг̇анд̇ум̣ на ваддад̇ийд̇и амхаагам̣ канд̇и. нааваасад̇т̇аваж̇зсуязва хи ‘‘ануж̇аанаами, бхигкавз, наавааяа вассам̣ убаг̇анд̇у’’нд̇иаад̣̇инаа (махаава. 203) сад̇и, асад̇и ваа сзнаасанз вассуубаг̇аманасса висум̣ анун̃н̃аад̇ад̇д̇аа ‘‘на, бхигкавз, асзнаасанигзна вассам̣ убаг̇анд̇аб̣б̣а’’нд̇и (махаава. 204) аяам̣ бадигкзбо. д̇ад̇т̇а на лабхад̇ийд̇и асад̇и сзнаасанз аалаяавасзнаби нааваад̣̇ийсу убаг̇аманам̣ вуд̇д̇ам̣. жад̇уусу хи сзнаасанзсу вихаарасзнаасанам̣ ид̇хаад̇хиббзд̇ам̣, на ид̇арад̇д̇аяам̣.
Assatiyā pana vassaṃ na upetīti ‘‘imasmiṃ vihāre imaṃ temāsaṃ vassaṃ upemī’’ti vacībhedaṃ katvā na upeti. ‘‘Na, bhikkhave, asenāsanikena vassaṃ upagantabbaṃ, yo upagaccheyya, āpatti dukkaṭassā’’ti (mahāva. 204) vacībhedaṃ katvā vassūpagamanaṃ sandhāya paṭikkhepo, na ālayakaraṇavasena upagamanaṃ sandhāyāti vadanti. Pāḷiyaṃ pana avisesena vuttattā aṭṭhakathāyañca dutiyapārājikasaṃvaṇṇanāyaṃ (pārā. aṭṭha. 1.84) ‘‘vassaṃ upagacchantena hi nālakapaṭipadaṃ paṭipannenapi pañcannaṃ chadanānaṃ aññatarena channeyeva sadvārabandhe senāsane upagantabbaṃ, tasmā vassakāle sace senāsanaṃ labhati, iccetaṃ kusalaṃ. No ce labhati, hatthakammaṃ pariyesitvāpi kātabbaṃ. Hatthakammaṃ alabhantena sāmampi kātabbaṃ, na tveva asenāsanikena vassaṃ upagantabba’’nti (mahāva. 204) daḷhaṃ katvā vuttattā asenāsanikassa nāvādiṃ vinā aññattha ālayamattena upagantuṃ na vaṭṭatīti amhākaṃ khanti. Nāvāsatthavajesuyeva hi ‘‘anujānāmi, bhikkhave, nāvāya vassaṃ upagantu’’ntiādinā (mahāva. 203) sati, asati vā senāsane vassūpagamanassa visuṃ anuññātattā ‘‘na, bhikkhave, asenāsanikena vassaṃ upagantabba’’nti (mahāva. 204) ayaṃ paṭikkhepo. Tattha na labhatīti asati senāsane ālayavasenapi nāvādīsu upagamanaṃ vuttaṃ. Catūsu hi senāsanesu vihārasenāsanaṃ idhādhippetaṃ, na itarattayaṃ.
дан̇гид̇аман̃жаад̣̇ибхзд̣̇аа гудийд̇и зд̇т̇а дан̇гид̇аман̃жо наама д̣̇ийгхз ман̃жабаад̣̇з маж̇жхз виж̇жхид̇ваа аданияо бавзсзд̇ваа гад̇о ман̃жо, д̇асса ид̣̇ам̣ убари, ид̣̇ам̣ хздтаад̇и над̇т̇и. баривад̇д̇зд̇ваа ад̇т̇ад̇оби д̇аад̣̇исова ход̇и, д̇ам̣ сусаанз д̣̇звадтаанз жа табзнд̇и, жад̇уннам̣ баасаан̣аанам̣ убари баасаан̣ам̣ ад̇т̇арид̇ваа гад̇ам̣ г̇зхамби ‘‘дан̇гид̇аман̃жо’’д̇и вужжад̇и.
Ṭaṅkitamañcādibhedā kuṭīti ettha ṭaṅkitamañco nāma dīghe mañcapāde majjhe vijjhitvā aṭaniyo pavesetvā kato mañco, tassa idaṃ upari, idaṃ heṭṭhāti natthi. Parivattetvā atthatopi tādisova hoti, taṃ susāne devaṭṭhāne ca ṭhapenti, catunnaṃ pāsāṇānaṃ upari pāsāṇaṃ attharitvā kataṃ gehampi ‘‘ṭaṅkitamañco’’ti vuccati.
‘‘ид̇ха вассам̣ убзмий’’д̇и д̇игкад̇д̇ум̣ вад̇д̇аб̣б̣анд̇и сад̇т̇асса авихаарад̇д̇аа ‘‘имасмим̣ вихаарз’’д̇и авад̇ваа ‘‘ид̇ха вассам̣ убзмий’’д̇и зд̇д̇агамзва вад̇д̇аб̣б̣ам̣. сад̇т̇з бана вассам̣ убаг̇анд̇ум̣ на ваддад̇ийд̇и гудигаад̣̇ийнам̣ абхаавзна ‘‘ид̇ха вассам̣ убзмий’’д̇и важийбхзд̣̇ам̣ гад̇ваа убаг̇анд̇ум̣ на ваддад̇и, аалаяагаран̣амад̇д̇знзва ваддад̇ийд̇и ад̇хиббааяо. виббагирад̇ийд̇и висум̣ висум̣ г̇ажчад̇и. д̇ийсу таанзсу над̇т̇и вассажчзд̣̇з аабад̇д̇ийд̇и д̇зхи сад̣̇д̇хим̣ г̇ажчанд̇ассзва над̇т̇и аабад̇д̇и, д̇зхи вияуж̇ж̇ид̇ваа г̇аманз бана аабад̇д̇иязва, баваарзд̇ун̃жа на лабхад̇и.
‘‘Idha vassaṃ upemī’’ti tikkhattuṃ vattabbanti satthassa avihārattā ‘‘imasmiṃ vihāre’’ti avatvā ‘‘idha vassaṃ upemī’’ti ettakameva vattabbaṃ. Satthe pana vassaṃ upagantuṃ na vaṭṭatīti kuṭikādīnaṃ abhāvena ‘‘idha vassaṃ upemī’’ti vacībhedaṃ katvā upagantuṃ na vaṭṭati, ālayakaraṇamatteneva vaṭṭatīti adhippāyo. Vippakiratīti visuṃ visuṃ gacchati. Tīsuṭhānesu natthi vassacchede āpattīti tehi saddhiṃ gacchantasseva natthi āpatti, tehi viyujjitvā gamane pana āpattiyeva, pavāretuñca na labhati.
бависанад̣̇ваарам̣ яож̇зд̇ваад̇и сагаваадаб̣ад̣̇д̇хамзва яож̇зд̇ваа. буримигааяа…бз… на баггамид̇аб̣б̣аад̇и иминаа аасаал̣хийбун̣н̣амааяа ананд̇арз баадибад̣̇ад̣̇ивасз буримавассам̣ убаг̇анд̇ваа вассаанауд̇уно жад̇уусу маасзсу саб̣б̣абажчимамаасам̣ табзд̇ваа буримам̣ д̇змаасам̣ васид̇аб̣б̣ам̣. сааван̣абун̣н̣амияаа ананд̇арз баадибад̣̇ад̣̇ивасз бажчимавассам̣ убаг̇анд̇ваа саб̣б̣абатамамаасам̣ табзд̇ваа бажчимам̣ д̇змаасам̣ васид̇аб̣б̣ам̣. звам̣ авасид̇ваа буримигааяа вассам̣ убаг̇ад̇зна бхигкунаа махаабавааран̣ааяа анд̇о арун̣ам̣ анудтаабзд̇ваа бажчимигааяа убаг̇ад̇зна жаад̇умаасинибавааран̣ааяа анд̇о арун̣ам̣ анудтаабзд̇ваа анд̇араа жааригам̣ баггамзяяа, убажаарасиймаад̇иггамзязва д̇асса бхигкуно д̣̇уггадаабад̇д̇и ход̇ийд̇и д̣̇ассзд̇и. имамад̇т̇ам̣ баал̣ияаа самад̇т̇зд̇ум̣ ‘‘на бхигкавз…бз… важанад̇о’’д̇и вуд̇д̇ам̣. яад̣̇и звам̣ вассам̣ убаг̇анд̇ваа сад̇и гаран̣ийяз баггаманд̇асса саб̣б̣ат̇ааби аабад̇д̇иязва сияаад̇и жод̣̇анам̣ санд̇хааяааха ‘‘вассам̣ убаг̇анд̇ваа банаа’’д̇иаад̣̇и. звам̣ санд̇з д̇ад̣̇ахзва сад̇д̇аахагаран̣ийязна баггаманд̇ассзва анаабад̇д̇и сияаа, на д̣̇вийхад̇ийхам̣ васид̇ваа баггаманд̇ассаад̇и ааха ‘‘го бана ваад̣̇о’’д̇иаад̣̇и.
Pavisanadvāraṃ yojetvāti sakavāṭabaddhameva yojetvā. Purimikāya…pe… na pakkamitabbāti iminā āsāḷhīpuṇṇamāya anantare pāṭipadadivase purimavassaṃ upagantvā vassānautuno catūsu māsesu sabbapacchimamāsaṃ ṭhapetvā purimaṃ temāsaṃ vasitabbaṃ. Sāvaṇapuṇṇamiyā anantare pāṭipadadivase pacchimavassaṃ upagantvā sabbapaṭhamamāsaṃ ṭhapetvā pacchimaṃ temāsaṃ vasitabbaṃ. Evaṃ avasitvā purimikāya vassaṃ upagatena bhikkhunā mahāpavāraṇāya anto aruṇaṃ anuṭṭhāpetvā pacchimikāya upagatena cātumāsinipavāraṇāya anto aruṇaṃ anuṭṭhāpetvā antarā cārikaṃ pakkameyya, upacārasīmātikkameyeva tassa bhikkhuno dukkaṭāpatti hotīti dasseti. Imamatthaṃ pāḷiyā samatthetuṃ ‘‘na bhikkhave…pe… vacanato’’ti vuttaṃ. Yadi evaṃ vassaṃ upagantvā sati karaṇīye pakkamantassa sabbathāpi āpattiyeva siyāti codanaṃ sandhāyāha ‘‘vassaṃ upagantvā panā’’tiādi. Evaṃ sante tadaheva sattāhakaraṇīyena pakkamantasseva anāpatti siyā, na dvīhatīhaṃ vasitvā pakkamantassāti āha ‘‘ko pana vādo’’tiādi.
180. ид̣̇аани сад̇д̇аахагаран̣ийяалагкан̣ам̣ вид̇т̇аарад̇о д̣̇ассзд̇ум̣ ‘‘ануж̇аанаами бхигкавз’’д̇иаад̣̇имааха. д̇ад̇т̇а ‘‘ануж̇аанаами, бхигкавз, сад̇д̇аннам̣ сад̇д̇аахагаран̣ийязна бахид̇з г̇анд̇ум̣, на д̇взва аббахид̇з, бхигкусса бхигкунияаа сигкамаанааяа сааман̣зрасса сааман̣зрияаа убаасагасса убаасигааяаа’’д̇и (махаава. 187) згам̣, ‘‘ануж̇аанаами, бхигкавз, сад̇д̇аннам̣ сад̇д̇аахагаран̣ийязна аббахид̇зби г̇анд̇ум̣, баг̇зва бахид̇з, бхигкусса бхигкунияаа сигкамаанааяа сааман̣зрасса сааман̣зрияаа маад̇уяаа жа бид̇усса жаа’’д̇и (махаава. 198) згам̣, ‘‘сажз бана бхигкуно бхаад̇аа ваа ан̃н̃о ваа н̃аад̇аго г̇илаано ход̇ий’’д̇и згам̣, ‘‘згасмим̣ вихаарз бхигкуухи сад̣̇д̇хим̣ васанд̇о бхигкубхад̇д̇иго’’д̇и згам̣, ‘‘сажз бхигкусса…бз… анабхирад̇и ваа гуггужжам̣ ваа д̣̇идтиг̇ад̇ам̣ ваа уббаннам̣ ход̇ий’’д̇и згам̣, ‘‘гожи бхигку г̇аруд̇хаммам̣ аж̇жхаабанно ход̇и бариваасаарахо’’д̇и згам̣, ‘‘бхигкунияааби маанад̇д̇аарахааяаа’’д̇и згам̣, ‘‘сааман̣зро убасамбаж̇ж̇ид̇угаамо…бз… сигкамаанаа ваа…бз… сааман̣зрий ваа’’д̇и згам̣, ‘‘бхигкусса бхигкунияаа ваа сан̇гхо гаммам̣ гад̇д̇угаамо д̇аж̇ж̇анийяам̣ ваа’’д̇и згам̣, ‘‘сажзби гад̇ам̣язва ход̇и гамма’’нд̇и згам̣, ‘‘ануж̇аанаами, бхигкавз, сан̇гхагаран̣ийязна г̇анд̇у’’нд̇и (махаава. 199) зганд̇и згаад̣̇аса таанаани хонд̇и. д̇ад̇т̇а батамад̇ад̇ияажад̇уд̇т̇авасзна д̇ийсу таанзсу бахид̇з зва г̇анд̇аб̣б̣ам̣, но аббахид̇з. сзсзсу адтасу аббахид̇зби г̇анд̇аб̣б̣ам̣, баг̇зва бахид̇з. вуд̇д̇ан̃хи вимад̇ивинод̣̇анияам̣ (ви. ви. дий. махааваг̇г̇а 2.199) ‘‘г̇анд̇аб̣б̣анд̇и сан̇гхагаран̣ийязна аббахид̇зби г̇анд̇аб̣б̣а’’нд̇и. зд̇т̇а жа анубаасагзхиби саасанабхаавам̣ н̃аад̇угаамзхи бахид̇з д̇зсам̣ басаад̣̇авад̣дхисамбад̇д̇зхиби сад̇д̇аахагаран̣ийязна г̇анд̇ум̣ ваддад̇ийд̇и г̇ахзд̇аб̣б̣ам̣. бхигкубхад̇д̇игод̇и бхигкуниссид̇аго. со бана яасмаа бхигкуухи сад̣̇д̇хим̣ васад̇и, д̇асмаа вуд̇д̇ам̣ ‘‘бхигкуухи сад̣̇д̇хим̣ васанд̇о’’д̇и.
180. Idāni sattāhakaraṇīyalakkhaṇaṃ vitthārato dassetuṃ ‘‘anujānāmi bhikkhave’’tiādimāha. Tattha ‘‘anujānāmi, bhikkhave, sattannaṃ sattāhakaraṇīyena pahite gantuṃ, na tveva appahite, bhikkhussa bhikkhuniyā sikkhamānāya sāmaṇerassa sāmaṇeriyā upāsakassa upāsikāyā’’ti (mahāva. 187) ekaṃ, ‘‘anujānāmi, bhikkhave, sattannaṃ sattāhakaraṇīyena appahitepi gantuṃ, pageva pahite, bhikkhussa bhikkhuniyā sikkhamānāya sāmaṇerassa sāmaṇeriyā mātuyā ca pitussa cā’’ti (mahāva. 198) ekaṃ, ‘‘sace pana bhikkhuno bhātā vā añño vā ñātako gilāno hotī’’ti ekaṃ, ‘‘ekasmiṃ vihāre bhikkhūhi saddhiṃ vasanto bhikkhubhattiko’’ti ekaṃ, ‘‘sace bhikkhussa…pe… anabhirati vā kukkuccaṃ vā diṭṭhigataṃ vā uppannaṃ hotī’’ti ekaṃ, ‘‘koci bhikkhu garudhammaṃ ajjhāpanno hoti parivāsāraho’’ti ekaṃ, ‘‘bhikkhuniyāpi mānattārahāyā’’ti ekaṃ, ‘‘sāmaṇero upasampajjitukāmo…pe… sikkhamānā vā…pe… sāmaṇerī vā’’ti ekaṃ, ‘‘bhikkhussa bhikkhuniyā vā saṅgho kammaṃ kattukāmo tajjanīyaṃ vā’’ti ekaṃ, ‘‘sacepi kataṃyeva hoti kamma’’nti ekaṃ, ‘‘anujānāmi, bhikkhave, saṅghakaraṇīyena gantu’’nti (mahāva. 199) ekanti ekādasa ṭhānāni honti. Tattha paṭhamatatiyacatutthavasena tīsu ṭhānesu pahite eva gantabbaṃ, no appahite. Sesesu aṭṭhasu appahitepi gantabbaṃ, pageva pahite. Vuttañhi vimativinodaniyaṃ (vi. vi. ṭī. mahāvagga 2.199) ‘‘gantabbanti saṅghakaraṇīyena appahitepi gantabba’’nti. Ettha ca anupāsakehipi sāsanabhāvaṃ ñātukāmehi pahite tesaṃ pasādavaḍḍhisampattehipi sattāhakaraṇīyena gantuṃ vaṭṭatīti gahetabbaṃ. Bhikkhubhattikoti bhikkhunissitako. So pana yasmā bhikkhūhi saddhiṃ vasati, tasmā vuttaṃ ‘‘bhikkhūhi saddhiṃ vasanto’’ti.
181. абижзд̇т̇аад̇и абижа зд̇т̇аад̇и чзд̣̇о, зд̇т̇а зд̇асмим̣ сад̇д̇аахагаран̣ийяавинижчаяз абижа абаро аяам̣ ийд̣̇исо баал̣имуд̇д̇аганаяо вассуубанааяигагканд̇хагабаал̣ид̇о муд̇д̇о наяо взд̣̇ид̇аб̣б̣од̇и яож̇анаа. саманд̇абаасаад̣̇игааяам̣ (махаава. адта. 199) бана ‘‘баал̣имуд̇д̇агарад̇д̇ижчзд̣̇авинижчаяо’’д̇и д̣̇иссад̇и. д̇ат̇аа хи вимад̇ивинод̣̇анияам̣ (ви. ви. дий. махааваг̇г̇а 2.199) ‘‘рад̇д̇ижчзд̣̇авинижчаяод̇и сад̇д̇аахагаран̣ийязна г̇анд̇ваа б̣ахид̣̇д̇хаа арун̣удтаабанасан̇каад̇асса рад̇д̇ижчзд̣̇асса винижчаяо’’д̇и. саарад̇т̇ад̣̇ийбанияамби (саарад̇т̇а. дий. махааваг̇г̇а 3.199) ‘‘сад̇д̇аахагаран̣ийязна г̇анд̇ваа б̣ахид̣̇д̇хаа арун̣удтаабанам̣ рад̇д̇ижчзд̣̇о’’д̇и. аниманд̇ид̇зна г̇анд̇ум̣ на ваддад̇ийд̇и зд̇т̇а аниманд̇ид̇ад̇д̇аа сад̇д̇аахагижжам̣ ад̇хидтахид̇ваа г̇ажчанд̇ассаби вассажчзд̣̇о жзва д̣̇уггадан̃жа ход̇ийд̇и взд̣̇ид̇аб̣б̣ам̣. яат̇аавуд̇д̇ан̃хи рад̇д̇ижчзд̣̇агааран̣ам̣ винаа д̇ировихаарз васид̇ваа ааг̇амиссаамийд̇и г̇ажчад̇о вассажчзд̣̇ам̣ вад̣̇анд̇и. г̇анд̇ум̣ ваддад̇ийд̇и анд̇оубажаарасиймааяам̣ тид̇знзва сад̇д̇аахагаран̣ийяанимид̇д̇ам̣ саллагкзд̇ваа иминаа нимид̇д̇зна г̇анд̇ваа ‘‘сад̇д̇аахаб̣бханд̇арз ааг̇ажчиссаамий’’д̇и аабхог̇ам̣ гад̇ваа г̇анд̇ум̣ ваддад̇и. буримагкан̣з аабхог̇ам̣ гад̇ваа г̇аманагкан̣з висарид̇ваа г̇ад̇зби д̣̇осо над̇т̇и, ‘‘сагаран̣ийяо баггамад̇ий’’д̇и (махаава. 207) вуд̇д̇ад̇д̇аа саб̣б̣ат̇аа аабхог̇ам̣ агад̇ваа г̇ад̇асса вассажчзд̣̇од̇и вад̣̇анд̇и. яо бана сад̇д̇аахагаран̣ийяанимид̇д̇аабхаавзби ‘‘сад̇д̇аахаб̣бханд̇арз ааг̇амиссаамий’’д̇и аабхог̇ам̣ гад̇ваа г̇анд̇ваа сад̇д̇аахаб̣бханд̇арз ааг̇ажчад̇и, д̇асса аабад̇д̇иязва, вассажчзд̣̇о над̇т̇и сад̇д̇аахасса саннивад̇д̇ад̇д̇аад̇и вад̣̇анд̇и, виймам̣сид̇ваа г̇ахзд̇аб̣б̣ам̣.
181.Apicetthāti apica etthāti chedo, ettha etasmiṃ sattāhakaraṇīyavinicchaye apica aparo ayaṃ īdiso pāḷimuttakanayo vassūpanāyikakkhandhakapāḷito mutto nayo veditabboti yojanā. Samantapāsādikāyaṃ (mahāva. aṭṭha. 199) pana ‘‘pāḷimuttakaratticchedavinicchayo’’ti dissati. Tathā hi vimativinodaniyaṃ (vi. vi. ṭī. mahāvagga 2.199) ‘‘ratticchedavinicchayoti sattāhakaraṇīyena gantvā bahiddhā aruṇuṭṭhāpanasaṅkhātassa ratticchedassa vinicchayo’’ti. Sāratthadīpaniyampi (sārattha. ṭī. mahāvagga 3.199) ‘‘sattāhakaraṇīyena gantvā bahiddhā aruṇuṭṭhāpanaṃ ratticchedo’’ti. Animantitena gantuṃ na vaṭṭatīti ettha animantitattā sattāhakiccaṃ adhiṭṭhahitvā gacchantassapi vassacchedo ceva dukkaṭañca hotīti veditabbaṃ. Yathāvuttañhi ratticchedakāraṇaṃ vinā tirovihāre vasitvā āgamissāmīti gacchato vassacchedaṃ vadanti. Gantuṃ vaṭṭatīti antoupacārasīmāyaṃ ṭhiteneva sattāhakaraṇīyanimittaṃ sallakkhetvā iminā nimittena gantvā ‘‘sattāhabbhantare āgacchissāmī’’ti ābhogaṃ katvā gantuṃ vaṭṭati. Purimakkhaṇe ābhogaṃ katvā gamanakkhaṇe visaritvā gatepi doso natthi, ‘‘sakaraṇīyo pakkamatī’’ti (mahāva. 207) vuttattā sabbathā ābhogaṃ akatvā gatassa vassacchedoti vadanti. Yo pana sattāhakaraṇīyanimittābhāvepi ‘‘sattāhabbhantare āgamissāmī’’ti ābhogaṃ katvā gantvā sattāhabbhantare āgacchati, tassa āpattiyeva, vassacchedo natthi sattāhassa sannivattattāti vadanti, vīmaṃsitvā gahetabbaṃ.
бхан̣д̣аганд̇и жийварабхан̣д̣ам̣. бахин̣анд̇ийд̇и жийварад̇хованаад̣̇игаммзна бахин̣анд̇и. самбаабун̣ид̇ум̣ на саггод̇и, ваддад̇ийд̇и зд̇т̇а ‘‘аж̇ж̇зва ааг̇амиссаамий’’д̇и сааманд̇авихаарам̣ г̇анд̇ваа буна ааг̇ажчанд̇асса анд̇араамаг̇г̇з сажз арун̣уг̇г̇аманам̣ ход̇и, вассажчзд̣̇оби на ход̇и, рад̇д̇ижчзд̣̇ад̣̇уггадан̃жа над̇т̇ийд̇и вад̣̇анд̇и, д̇ад̣̇ахзва ааг̇аманз сауссаахад̇д̇аа вассажчзд̣̇о ваа аабад̇д̇и ваа на ход̇ийд̇и ад̇хиббааяо. аажарияам̣ бассиссаамийд̇и бана г̇анд̇ум̣ лабхад̇ийд̇и ‘‘аг̇илаанамби аажарияам̣, убаж̇жхааяам̣ ваа бассиссаамий’’д̇и сад̇д̇аахагаран̣ийязна г̇анд̇ум̣ лабхад̇и, ниссаяаажарияам̣ д̇хаммаажарияан̃жа, баг̇зва убасамбад̣̇аажарияаубаж̇жхааяз. сажз нам̣ аажарияо ‘‘аж̇ж̇а маа г̇ажчаа’’д̇и вад̣̇ад̇и, ваддад̇ийд̇и звам̣ сад̇д̇аахагаран̣ийязна ааг̇ад̇аанам̣ анд̇осад̇д̇аахзязва буна ааг̇ажчанд̇ам̣ сажз аажарияо, убаж̇жхааяо ваа ‘‘аж̇ж̇а маа г̇ажчаа’’д̇и вад̣̇ад̇и, ваддад̇и, сад̇д̇аахаад̇иггамзби анаабад̇д̇ийд̇и ад̇хиббааяо. вассажчзд̣̇о бана ход̇иязваад̇и д̣̇адтаб̣б̣ам̣ сад̇д̇аахасса б̣ахид̣̇д̇хаа вийд̇инаамид̇ад̇д̇аа.
Bhaṇḍakanti cīvarabhaṇḍaṃ. Pahiṇantīti cīvaradhovanādikammena pahiṇanti. Sampāpuṇituṃ na sakkoti, vaṭṭatīti ettha ‘‘ajjeva āgamissāmī’’ti sāmantavihāraṃ gantvā puna āgacchantassa antarāmagge sace aruṇuggamanaṃ hoti, vassacchedopi na hoti, ratticchedadukkaṭañca natthīti vadanti, tadaheva āgamane saussāhattā vassacchedo vā āpatti vā na hotīti adhippāyo. Ācariyaṃ passissāmīti pana gantuṃ labhatīti ‘‘agilānampi ācariyaṃ, upajjhāyaṃ vā passissāmī’’ti sattāhakaraṇīyena gantuṃ labhati, nissayācariyaṃ dhammācariyañca, pageva upasampadācariyaupajjhāye. Sace naṃ ācariyo ‘‘ajja mā gacchā’’ti vadati, vaṭṭatīti evaṃ sattāhakaraṇīyena āgatānaṃ antosattāheyeva puna āgacchantaṃ sace ācariyo, upajjhāyo vā ‘‘ajja mā gacchā’’ti vadati, vaṭṭati, sattāhātikkamepi anāpattīti adhippāyo. Vassacchedo pana hotiyevāti daṭṭhabbaṃ sattāhassa bahiddhā vītināmitattā.
сажз д̣̇уурам̣ г̇ад̇о сад̇д̇аахаваарзна арун̣о удтаабзд̇аб̣б̣од̇и иминаа вассажчзд̣̇агааран̣з сад̇и сад̇д̇аахагаран̣ийязна г̇анд̇умби ваддад̇ийд̇и д̣̇ийбзд̇и. зд̇т̇а ча д̣̇ивасаани б̣ахид̣̇д̇хаа вийд̇инаамзд̇ваа сад̇д̇амз д̣̇ивасз бураарун̣аа зва анд̇оубажаарасиймааяам̣ бависид̇ваа арун̣ам̣ удтаабзд̇ваа бунад̣̇ивасз сад̇д̇аахам̣ ад̇хидтааяа г̇анд̇аб̣б̣анд̇и ад̇хиббааяо. гзжи бана ‘‘сад̇д̇амз д̣̇ивасз ааг̇анд̇ваа арун̣ам̣ анудтаабзд̇ваа д̇ад̣̇ахзва д̣̇ивасабхааг̇зби г̇анд̇ум̣ ваддад̇ий’’д̇и вад̣̇анд̇и, д̇ам̣ на г̇ахзд̇аб̣б̣ам̣ ‘‘арун̣о удтаабзд̇аб̣б̣о’’д̇и вуд̇д̇ад̇д̇аа. сад̇д̇амз д̣̇ивасз д̇ад̇т̇а арун̣удтаабанамзва хи санд̇хааяа баал̣ияам̣ (махаава. 199) ‘‘сад̇д̇аахам̣ саннивад̇д̇о гаад̇аб̣б̣о’’д̇и вуд̇д̇ам̣. арун̣ам̣ анудтаабзд̇ваа г̇ажчанд̇о жа анд̇о аббависид̇ваа б̣ахид̣̇д̇хаава сад̇д̇аахам̣ вийд̇инаамзнд̇о жа самужчиннавассо зва бхависсад̇и арун̣асса б̣ахи зва удтаабид̇ад̇д̇аа. ид̇арат̇аа ‘‘арун̣о удтаабзд̇аб̣б̣о’’д̇и важанам̣ нирад̇т̇агам̣ сияаа. ‘‘сад̇д̇аахаваарзна анд̇овихаарз бависид̇ваа арун̣ам̣ анудтаабзд̇ваа г̇анд̇аб̣б̣а’’нд̇и вад̇д̇аб̣б̣ад̇о ан̃н̃зсу жа таанзсу арун̣удтаабанамзва вужжад̇и. вагкад̇и хи жийварагканд̇хагз (махаава. адта. 364) ‘‘згасмим̣ вихаарз васанд̇о ид̇арасмим̣ сад̇д̇аахаваарзна арун̣амзва удтаабзд̇ий’’д̇и.
Sace dūraṃ gato sattāhavārena aruṇo uṭṭhāpetabboti iminā vassacchedakāraṇe sati sattāhakaraṇīyena gantumpi vaṭṭatīti dīpeti. Ettha cha divasāni bahiddhā vītināmetvā sattame divase purāruṇā eva antoupacārasīmāyaṃ pavisitvā aruṇaṃ uṭṭhāpetvā punadivase sattāhaṃ adhiṭṭhāya gantabbanti adhippāyo. Keci pana ‘‘sattame divase āgantvā aruṇaṃ anuṭṭhāpetvā tadaheva divasabhāgepi gantuṃ vaṭṭatī’’ti vadanti, taṃ na gahetabbaṃ ‘‘aruṇo uṭṭhāpetabbo’’ti vuttattā. Sattame divase tattha aruṇuṭṭhāpanameva hi sandhāya pāḷiyaṃ (mahāva. 199) ‘‘sattāhaṃ sannivatto kātabbo’’ti vuttaṃ. Aruṇaṃ anuṭṭhāpetvā gacchanto ca anto appavisitvā bahiddhāva sattāhaṃ vītināmento ca samucchinnavasso eva bhavissati aruṇassa bahi eva uṭṭhāpitattā. Itarathā ‘‘aruṇo uṭṭhāpetabbo’’ti vacanaṃ niratthakaṃ siyā. ‘‘Sattāhavārena antovihāre pavisitvā aruṇaṃ anuṭṭhāpetvā gantabba’’nti vattabbato aññesu ca ṭhānesu aruṇuṭṭhāpanameva vuccati. Vakkhati hi cīvarakkhandhake (mahāva. aṭṭha. 364) ‘‘ekasmiṃ vihāre vasanto itarasmiṃ sattāhavārena aruṇameva uṭṭhāpetī’’ti.
ат̇ааби яам̣ д̇з вад̣̇зяяум̣ ‘‘сад̇д̇амз д̣̇ивасз яад̣̇аа гад̣̇аажи бавидтзна д̇ам̣д̣̇ивасаниссид̇о ад̇ийд̇аарун̣о удтаабид̇о наама ход̇ийд̇и имамад̇т̇ам̣ санд̇хааяа адтагат̇ааяам̣ вуд̇д̇а’’нд̇и, д̇ам̣ сад̣̇д̣̇аг̇ад̇ияааби на самзд̇и. на хи удтид̇з арун̣з бажчаа бавидто д̇асса баяож̇аго удтаабаго бхавид̇умарахад̇и. яад̣̇и бхавзяяа, ‘‘вассам̣ убаг̇анд̇ваа бана арун̣ам̣ анудтаабзд̇ваа д̇ад̣̇ахзва сад̇д̇аахагаран̣ийязна баггаманд̇ассаа’’бийд̇и (махаава. адта. 207) зд̇т̇а ‘‘арун̣ам̣ анудтаабзд̇ваа’’д̇и важанам̣ вируж̇жхзяяа. д̇знаби д̇ам̣д̣̇ивасаниссид̇асса арун̣асса удтаабид̇ад̇д̇аа ааран̃н̃агассаби бхигкуно сааяанхасамаяз ан̇г̇аяуд̇д̇ам̣ аран̃н̃ам̣ г̇анд̇ваа д̇ад̣̇аа зва нивад̇д̇анд̇асса арун̣о удтаабид̇о д̇худ̇ан̇г̇ан̃жа висод̇хид̇ам̣ сияаа, на жзд̇ам̣ яуд̇д̇ам̣ арун̣уг̇г̇аманагаалз зва арун̣удтаабанасса вуд̇д̇ад̇д̇аа. вуд̇д̇ан̃хи ‘‘гаалассзва бана нигкамид̇ваа ан̇г̇аяуд̇д̇з таанз арун̣ам̣ удтаабзд̇аб̣б̣ам̣. сажз арун̣удтаанавзлааяам̣ д̇зсам̣ ааб̣аад̇хо вад̣дхад̇и, д̇зсам̣ зва гижжам̣ гаад̇аб̣б̣ам̣, на д̇худ̇ан̇г̇ависуд̣̇д̇хигзна бхавид̇аб̣б̣а’’нд̇и (висуд̣̇д̇хи. 1.31). д̇ат̇аа баариваасигаад̣̇ийнамби арун̣ам̣ анудтаабзд̇ваа вад̇д̇ам̣ нигкибанд̇аанам̣ рад̇д̇ижчзд̣̇о вуд̇д̇о. ‘‘уг̇г̇ад̇з арун̣з нигкибид̇аб̣б̣а’’нд̇и (жуул̣ава. адта. 97) хи вуд̇д̇ам̣. сахасзяяасигкаабад̣̇зби анубасамбаннзхи саха нивуд̇т̇абхаавабариможанад̇т̇ам̣ ‘‘бураарун̣аа нигкамид̇ваа’’д̇иаад̣̇и (баажи. 54) вуд̇д̇ам̣. звам̣ жийваравиббаваасаад̣̇ийсу жа саб̣б̣ад̇т̇а рад̇д̇ибарияосаанз ааг̇аамиарун̣авасзнзва арун̣удтаанам̣ д̣̇ассид̇ам̣, на ад̇ийд̇аарун̣авасзна, д̇асмаа вуд̇д̇анаязнзвзд̇т̇а арун̣удтаабанам̣ взд̣̇ид̇аб̣б̣ам̣ ан̃н̃ат̇аа вассажчзд̣̇ад̇д̇аа.
Athāpi yaṃ te vadeyyuṃ ‘‘sattame divase yadā kadāci paviṭṭhena taṃdivasanissito atītāruṇo uṭṭhāpito nāma hotīti imamatthaṃ sandhāya aṭṭhakathāyaṃ vutta’’nti, taṃ saddagatiyāpi na sameti. Na hi uṭṭhite aruṇe pacchā paviṭṭho tassa payojako uṭṭhāpako bhavitumarahati. Yadi bhaveyya, ‘‘vassaṃ upagantvā pana aruṇaṃ anuṭṭhāpetvā tadaheva sattāhakaraṇīyena pakkamantassā’’pīti (mahāva. aṭṭha. 207) ettha ‘‘aruṇaṃ anuṭṭhāpetvā’’ti vacanaṃ virujjheyya. Tenapi taṃdivasanissitassa aruṇassa uṭṭhāpitattā āraññakassapi bhikkhuno sāyanhasamaye aṅgayuttaṃ araññaṃ gantvā tadā eva nivattantassa aruṇo uṭṭhāpito dhutaṅgañca visodhitaṃ siyā, na cetaṃ yuttaṃ aruṇuggamanakāle eva aruṇuṭṭhāpanassa vuttattā. Vuttañhi ‘‘kālasseva pana nikkhamitvā aṅgayutte ṭhāne aruṇaṃ uṭṭhāpetabbaṃ. Sace aruṇuṭṭhānavelāyaṃ tesaṃ ābādho vaḍḍhati, tesaṃ eva kiccaṃ kātabbaṃ, na dhutaṅgavisuddhikena bhavitabba’’nti (visuddhi. 1.31). Tathā pārivāsikādīnampi aruṇaṃ anuṭṭhāpetvā vattaṃ nikkhipantānaṃ ratticchedo vutto. ‘‘Uggate aruṇe nikkhipitabba’’nti (cūḷava. aṭṭha. 97) hi vuttaṃ. Sahaseyyasikkhāpadepi anupasampannehi saha nivutthabhāvaparimocanatthaṃ ‘‘purāruṇā nikkhamitvā’’tiādi (pāci. 54) vuttaṃ. Evaṃ cīvaravippavāsādīsu ca sabbattha rattipariyosāne āgāmiaruṇavaseneva aruṇuṭṭhānaṃ dassitaṃ, na atītāruṇavasena, tasmā vuttanayenevettha aruṇuṭṭhāpanaṃ veditabbaṃ aññathā vassacchedattā.
яам̣ бана вассам̣ убаг̇ад̇асса д̇ад̣̇ахзва арун̣ам̣ анудтаабзд̇ваа сагаран̣ийяасса баггаманаважанам̣, д̇ам̣ вассам̣ убаг̇ад̇агаалад̇о бадтааяа яад̣̇аа гад̣̇аажи нимид̇д̇з сад̇и г̇аманасса анун̃н̃аад̇ад̇д̇аа яуд̇д̇ам̣, на бана сад̇д̇аахаваарзна г̇ад̇асса арун̣ам̣ анудтаабзд̇ваа д̇ад̣̇ахзваг̇аманам̣ ‘‘арун̣о удтаабзд̇аб̣б̣о’’д̇и вуд̇д̇ад̇д̇аа. яат̇аа ваа ‘‘сад̇д̇аахаанааг̇ад̇ааяа бавааран̣ааяа сагаран̣ийяо баггамад̇и, ааг̇ажчзяяа ваа со, бхигкавз, бхигку д̇ам̣ ааваасам̣ на ваа ааг̇ажчзяяаа’’д̇иаад̣̇инаа (махаава. 207) бажчимасад̇д̇аахз анааг̇аманз анун̃н̃аад̇зби ан̃н̃асад̇д̇аахзсу д̇ам̣ на ваддад̇и. звам̣ батамасад̇д̇аахз арун̣ам̣ анудтаабзд̇ваа г̇аманз анун̃н̃аад̇зби д̇ад̇о барзсу сад̇д̇аахзсу ааг̇ад̇асса арун̣ам̣ анудтаабзд̇ваа г̇аманам̣ на ваддад̇и зваад̇и нидтамзд̇т̇а г̇анд̇аб̣б̣ам̣.
Yaṃ pana vassaṃ upagatassa tadaheva aruṇaṃ anuṭṭhāpetvā sakaraṇīyassa pakkamanavacanaṃ, taṃ vassaṃ upagatakālato paṭṭhāya yadā kadāci nimitte sati gamanassa anuññātattā yuttaṃ, na pana sattāhavārena gatassa aruṇaṃ anuṭṭhāpetvā tadahevagamanaṃ ‘‘aruṇo uṭṭhāpetabbo’’ti vuttattā. Yathā vā ‘‘sattāhānāgatāya pavāraṇāya sakaraṇīyo pakkamati, āgaccheyya vā so, bhikkhave, bhikkhu taṃ āvāsaṃ na vā āgaccheyyā’’tiādinā (mahāva. 207) pacchimasattāhe anāgamane anuññātepi aññasattāhesu taṃ na vaṭṭati. Evaṃ paṭhamasattāhe aruṇaṃ anuṭṭhāpetvā gamane anuññātepi tato paresu sattāhesu āgatassa aruṇaṃ anuṭṭhāpetvā gamanaṃ na vaṭṭati evāti niṭṭhamettha gantabbaṃ.
сажз баваарид̇агаалз вассааваасигам̣ д̣̇знд̇ийд̇иаад̣̇инаа вассааваасигажийварамби гат̇инажийварам̣ вияа вассам̣вуд̇т̇авихаарабадиб̣ад̣̇д̇ханд̇и вин̃н̃ааяад̇и. ‘‘яад̣̇и сад̇д̇аахаваарзна арун̣ам̣ удтаабаяим̣су, г̇ахзд̇аб̣б̣а’’нд̇и бана вуд̇д̇ад̇д̇аа сад̇д̇аахагаран̣ийязна г̇анд̇ваа сад̇д̇аахаб̣бханд̇арз ааг̇ад̇аа лабханд̇и. гат̇инаанисам̣сажийварам̣ бана сан̇гхам̣ анаабужчаа д̇з на лабханд̇и. вагкад̇и хи ‘‘сад̇д̇аахагаран̣ийязна г̇ад̇ааби бхааж̇анийяабхан̣д̣ам̣ лабханд̇ууд̇и ваа зваруубам̣ ад̇хаммигавад̇д̇ам̣ на гаад̇аб̣б̣а’’нд̇и (ви. сан̇г̇а. адта. 182). ид̇ха аахаданд̇и вихаарад̇о б̣ахи ааг̇ад̇адтаанз аанийд̇ам̣.
Sace pavāritakāle vassāvāsikaṃ dentītiādinā vassāvāsikacīvarampi kathinacīvaraṃ viya vassaṃvutthavihārapaṭibaddhanti viññāyati. ‘‘Yadi sattāhavārena aruṇaṃ uṭṭhāpayiṃsu, gahetabba’’nti pana vuttattā sattāhakaraṇīyena gantvā sattāhabbhantare āgatā labhanti. Kathinānisaṃsacīvaraṃ pana saṅghaṃ anāpucchā te na labhanti. Vakkhati hi ‘‘sattāhakaraṇīyena gatāpi bhājanīyabhaṇḍaṃ labhantūti vā evarūpaṃ adhammikavattaṃ na kātabba’’nti (vi. saṅga. aṭṭha. 182). Idha āhaṭanti vihārato bahi āgataṭṭhāne ānītaṃ.
ваал̣зхи уб̣б̣аал̣хаа хонд̇и, г̇ан̣ханд̇иби барибаад̇знд̇ибийд̇и зд̇т̇а г̇ан̣ханд̇ийд̇и г̇ахзд̇ваа каад̣̇анд̇и. барибаад̇знд̇ийд̇и балаабзнд̇и, ануб̣анд̇ханд̇ийд̇и ад̇т̇о. имзсу ‘‘г̇аал̣зхи уб̣б̣аал̣хаа хонд̇ий’’д̇иаад̣̇ийсу сан̇гхабхзд̣̇абарияанд̇зсу вад̇т̇уусу гзвалам̣ анаабад̇д̇и ход̇и, баваарзд̇ум̣ бана на лабхад̇ийд̇и д̣̇адтаб̣б̣ам̣. сажз банаад̇иаад̣̇ийсу яасмаа наанаасиймааяам̣ д̣̇вийсу ааваасзсу вассам̣ убаг̇ажчанд̇асса ‘‘д̣̇уд̇ияз васиссаамий’’д̇и убажаарад̇о нигканд̇амад̇д̇з батамо сзнаасанаг̇г̇аахо бадиббассамбхад̇и, д̇асмаа баал̣ияам̣ (махаава. 207) ‘‘д̇асса, бхигкавз, бхигкуно буримигаа жа на бан̃н̃ааяад̇ий’’д̇и батамам̣ сзнаасанаг̇г̇аахам̣ санд̇хааяа вуд̇д̇ам̣. д̣̇уд̇ияасзнаасанаг̇г̇аахз бана буримигаа бан̃н̃ааяад̇зва, д̇ад̇т̇зва д̇змаасам̣ васанд̇о буримавассам̣вуд̇т̇о зва ход̇и. д̇ад̇о ваа бана д̣̇уд̇ияад̣̇ивасаад̣̇ийсу ‘‘батамасзнаасанз васиссаамий’’д̇и убажаараад̇иггамз буримигааби на бан̃н̃ааяад̇ийд̇и д̣̇адтаб̣б̣ам̣.
Vāḷehi ubbāḷhā honti, gaṇhantipi paripātentipīti ettha gaṇhantīti gahetvā khādanti. Paripātentīti palāpenti, anubandhantīti attho. Imesu ‘‘gāḷehi ubbāḷhā hontī’’tiādīsu saṅghabhedapariyantesu vatthūsu kevalaṃ anāpatti hoti, pavāretuṃ pana na labhatīti daṭṭhabbaṃ. Sace panātiādīsu yasmā nānāsīmāyaṃ dvīsu āvāsesu vassaṃ upagacchantassa ‘‘dutiye vasissāmī’’ti upacārato nikkhantamatte paṭhamo senāsanaggāho paṭippassambhati, tasmā pāḷiyaṃ (mahāva. 207) ‘‘tassa, bhikkhave, bhikkhuno purimikā ca na paññāyatī’’ti paṭhamaṃ senāsanaggāhaṃ sandhāya vuttaṃ. Dutiyasenāsanaggāhe pana purimikā paññāyateva, tattheva temāsaṃ vasanto purimavassaṃvuttho eva hoti. Tato vā pana dutiyadivasādīsu ‘‘paṭhamasenāsane vasissāmī’’ti upacārātikkame purimikāpi na paññāyatīti daṭṭhabbaṃ.
бадиссавасса висам̣ваад̣̇анабажжаяаа хонд̇амби д̣̇уггадам̣ сад̇иязва бадиссавз ход̇ийд̇и ааха ‘‘д̇асса д̇асса бадиссавасса висам̣ваад̣̇з д̣̇уггада’’нд̇и. д̇знзвааха ‘‘д̇ан̃жа ко…бз… висам̣ваад̣̇анабажжаяаа’’д̇и. баал̣ияам̣ (махаава. 207) ‘‘со сад̇д̇аахаанааг̇ад̇ааяа бавааран̣ааяа сагаран̣ийяо баггамад̇ий’’д̇и вуд̇д̇ад̇д̇аа бавааран̣аад̣̇ивасзби сад̇д̇аахагаран̣ийяам̣ винаа г̇анд̇ум̣ на ваддад̇ийд̇и д̣̇адтаб̣б̣ам̣. имасмим̣ таанз ‘‘навамид̇о бадтааяа г̇анд̇ум̣ ваддад̇ий’’д̇и адтагат̇ааважанам̣ гажжи убосат̇ад̣̇ивасад̇о убанид̇хааяа навамий ижчид̇аб̣б̣аа, уд̣̇ааху логияад̇ит̇ивасзнаад̇и аасан̇ганд̇и. д̇ад̇рзвам̣ винижчид̇аб̣б̣ам̣ – буримабхад̣̇д̣̇абад̣̇амаасагаал̣абагкаубосат̇ад̣̇ивасам̣ убанид̇хааяа ижчид̇аб̣б̣аа, на логияад̇ит̇ивасзна. бхад̣̇д̣̇абад̣̇амаасасса хи гаал̣абагкаубосат̇ад̣̇ивасам̣ марияаад̣̇ам̣ гад̇ваа д̇ад̣̇ананд̇арабаадибад̣̇ад̣̇ивасад̇о бадтааяа г̇ан̣ияамаанз сад̇и яо д̣̇ивасо навамо ход̇и, д̇ад̇о бадтааяаад̇и вуд̇д̇ам̣ ход̇и. д̇ит̇ибзгкааяа бана ид̇т̇илин̇г̇авохааро, д̇ад̇о навамид̇о бадтааяа анааг̇ад̇асад̇д̇аахз бавааран̣аа ход̇и.
Paṭissavassa visaṃvādanapaccayā hontampi dukkaṭaṃ satiyeva paṭissave hotīti āha ‘‘tassa tassa paṭissavassa visaṃvāde dukkaṭa’’nti. Tenevāha ‘‘tañca kho…pe… visaṃvādanapaccayā’’ti. Pāḷiyaṃ (mahāva. 207) ‘‘so sattāhānāgatāya pavāraṇāya sakaraṇīyo pakkamatī’’ti vuttattā pavāraṇādivasepi sattāhakaraṇīyaṃ vinā gantuṃ na vaṭṭatīti daṭṭhabbaṃ. Imasmiṃ ṭhāne ‘‘navamito paṭṭhāya gantuṃ vaṭṭatī’’ti aṭṭhakathāvacanaṃ kacci uposathadivasato upanidhāya navamī icchitabbā, udāhu lokiyatithivasenāti āsaṅkanti. Tatrevaṃ vinicchitabbaṃ – purimabhaddapadamāsakāḷapakkhauposathadivasaṃ upanidhāya icchitabbā, na lokiyatithivasena. Bhaddapadamāsassa hi kāḷapakkhauposathadivasaṃ mariyādaṃ katvā tadanantarapāṭipadadivasato paṭṭhāya gaṇiyamāne sati yo divaso navamo hoti, tato paṭṭhāyāti vuttaṃ hoti. Tithipekkhāya pana itthiliṅgavohāro, tato navamito paṭṭhāya anāgatasattāhe pavāraṇā hoti.
сад̇д̇аахам̣ анааг̇ад̇ааяа ассаад̇и сад̇д̇аахаанааг̇ад̇аа. гаа саа? бавааран̣аа. ассаяуж̇амаасасса суггабагканавамияам̣ сад̇д̇аахагаран̣ийяам̣ ад̇хидтааяа г̇ажчанд̇о бхигку анд̇овассасса сад̇д̇аахамад̇д̇аавасидтад̇д̇аа сад̇д̇амаарун̣з уг̇г̇ад̇амад̇д̇з вуд̇т̇авассо ход̇и, д̣̇асамияам̣ чаахамад̇д̇ам̣, згаад̣̇асамияам̣ бан̃жаахамад̇д̇ам̣, д̣̇ваад̣̇асияам̣ жад̇ураахамад̇д̇ам̣, д̇зрасияам̣ д̇ийхамад̇д̇ам̣, жуд̣̇д̣̇асияам̣ д̣̇вийхамад̇д̇ам̣, баннарасияам̣ згаахамад̇д̇ам̣ авасидтам̣ ход̇и, д̇асмаа бавааран̣аад̣̇ивасасса барияосаанабхууд̇аарун̣асмим̣ уг̇г̇ад̇з вуд̇т̇авассо ход̇и, д̇асмаа д̇зсам̣ бхигкуунам̣ гуггужжавинод̣̇анад̇т̇ам̣ бхаг̇аваа д̇хаммассаамий ‘‘со сад̇д̇аахаанааг̇ад̇ааяа бавааран̣ааяа сагаран̣ийяо баггамад̇и, ааг̇ажчзяяа ваа со, бхигкавз, бхигку д̇ам̣ ааваасам̣ на ваа ааг̇ажчзяяа, д̇асса, бхигкавз, бхигкуно буримигаа жа бан̃н̃ааяад̇и, бадиссавз жа анаабад̇д̇ий’’д̇и (махаава. 207) ааха. сад̇д̇аахаанааг̇ад̇ааяа гомуд̣̇ияаа жаад̇умаасинияаад̇и зд̇т̇ааби зсзва наяо. д̇ад̇т̇а гомуд̣̇ияаа жаад̇умаасинияаад̇и бажчимагад̇д̇игабун̣н̣амааяам̣. саа хи гумуд̣̇аанам̣ ад̇т̇ид̇ааяа гомуд̣̇ий, жад̇уннам̣ вассигамаасаанам̣ барияосаанад̇д̇аа жаад̇умаасинийд̇и вужжад̇и. д̇ад̣̇аа хи гумуд̣̇аани субубпид̇аани хонд̇и, д̇асмаа гумуд̣̇аа зд̇т̇а бубпанд̇ийд̇и гомуд̣̇ийд̇и вужжад̇и, гумуд̣̇авад̇ийд̇и вуд̇д̇ам̣ ход̇и.
Sattāhaṃ anāgatāya assāti sattāhānāgatā. Kā sā? Pavāraṇā. Assayujamāsassa sukkapakkhanavamiyaṃ sattāhakaraṇīyaṃ adhiṭṭhāya gacchanto bhikkhu antovassassa sattāhamattāvasiṭṭhattā sattamaaruṇe uggatamatte vutthavasso hoti, dasamiyaṃ chāhamattaṃ, ekādasamiyaṃ pañcāhamattaṃ, dvādasiyaṃ caturāhamattaṃ, terasiyaṃ tīhamattaṃ, cuddasiyaṃ dvīhamattaṃ, pannarasiyaṃ ekāhamattaṃ avasiṭṭhaṃ hoti, tasmā pavāraṇādivasassa pariyosānabhūtaaruṇasmiṃ uggate vutthavasso hoti, tasmā tesaṃ bhikkhūnaṃ kukkuccavinodanatthaṃ bhagavā dhammassāmī ‘‘so sattāhānāgatāya pavāraṇāya sakaraṇīyo pakkamati, āgaccheyya vā so, bhikkhave, bhikkhu taṃ āvāsaṃ na vā āgaccheyya, tassa, bhikkhave, bhikkhuno purimikā ca paññāyati, paṭissave ca anāpattī’’ti (mahāva. 207) āha. Sattāhānāgatāya komudiyā cātumāsiniyāti etthāpi eseva nayo. Tattha komudiyā cātumāsiniyāti pacchimakattikapuṇṇamāyaṃ. Sā hi kumudānaṃ atthitāya komudī, catunnaṃ vassikamāsānaṃ pariyosānattā cātumāsinīti vuccati. Tadā hi kumudāni supupphitāni honti, tasmā kumudā ettha pupphantīti komudīti vuccati, kumudavatīti vuttaṃ hoti.
182. анд̇овассавад̇д̇агат̇ааяам̣ ниб̣ад̣̇д̇хавад̇д̇ам̣ табзд̇ваад̇и саж̇жхааяаманасигаараад̣̇ийсу ниранд̇арагаран̣ийязсу гад̇д̇аб̣б̣ам̣ гад̇игавад̇д̇ам̣ гад̇ваа. гасаавабарибхан̣д̣анд̇и гасаавзхи бхуумибаригаммам̣. вад̇д̇анд̇и гад̇игавад̇д̇ам̣.
182. Antovassavattakathāyaṃ nibaddhavattaṃ ṭhapetvāti sajjhāyamanasikārādīsu nirantarakaraṇīyesu kattabbaṃ katikavattaṃ katvā. Kasāvaparibhaṇḍanti kasāvehi bhūmiparikammaṃ. Vattanti katikavattaṃ.
зваруубам̣ ад̇хаммигавад̇д̇ам̣ на гаад̇аб̣б̣анд̇и наанаавзраж̇ж̇агаа хи бхигкуу саннибад̇анд̇и, д̇ад̇т̇а гзжи д̣̇уб̣б̣алаа аббат̇аамаа зваруубам̣ вад̇д̇ам̣ анубаалзд̇ум̣ на саггонд̇и, д̇асмаа ид̇ха ааг̇ад̇ан̃жа жад̇уд̇т̇абаарааж̇игаван̣н̣анааяам̣ (баараа. адта. 2.227) ааг̇ад̇ам̣ ааваасам̣ ваа ман̣д̣абам̣ ваа сиймам̣ ваа яам̣ гин̃жи таанам̣ барижчинд̣̇ид̇ваа ‘‘яо имамхаа ааваасаа батамам̣ баггамиссад̇и, д̇ам̣ ‘арахаа’д̇и ж̇ааниссаамаа’’д̇и гад̇ааяа гад̇игааяа яо ‘‘мам̣ ‘арахаа’д̇и ж̇аананд̇уу’’д̇и д̇амхаа таанаа батамам̣ баггамад̇и, баарааж̇иго ход̇и. яо бана аажарияубаж̇жхааяаанам̣ ваа гижжзна маад̇аабид̇уунам̣ ваа гзнажид̣̇зва гаран̣ийязна бхигкаажааравад̇д̇ам̣ ваа уд̣̇д̣̇зсабарибужчаад̣̇ийнам̣ ад̇т̇ааяа ан̃н̃зна ваа д̇аад̣̇исзна гаран̣ийязна д̇ам̣ таанам̣ ад̇иггамид̇ваа г̇ажчад̇и, анаабад̇д̇и. сажзбисса звам̣ г̇ад̇асса бажчаа ижчаажааро уббаж̇ж̇ад̇и ‘‘на д̣̇аанаахам̣ д̇ад̇т̇а г̇амиссаами, звам̣ мам̣ арахаад̇и самбхаавзссанд̇ий’’д̇и, анаабад̇д̇иязва.
Evarūpaṃ adhammikavattaṃ na kātabbanti nānāverajjakā hi bhikkhū sannipatanti, tattha keci dubbalā appathāmā evarūpaṃ vattaṃ anupāletuṃ na sakkonti, tasmā idha āgatañca catutthapārājikavaṇṇanāyaṃ (pārā. aṭṭha. 2.227) āgataṃ āvāsaṃ vā maṇḍapaṃ vā sīmaṃ vā yaṃ kiñci ṭhānaṃ paricchinditvā ‘‘yo imamhā āvāsā paṭhamaṃ pakkamissati, taṃ ‘arahā’ti jānissāmā’’ti katāya katikāya yo ‘‘maṃ ‘arahā’ti jānantū’’ti tamhā ṭhānā paṭhamaṃ pakkamati, pārājiko hoti. Yo pana ācariyupajjhāyānaṃ vā kiccena mātāpitūnaṃ vā kenacideva karaṇīyena bhikkhācāravattaṃ vā uddesaparipucchādīnaṃ atthāya aññena vā tādisena karaṇīyena taṃ ṭhānaṃ atikkamitvā gacchati, anāpatti. Sacepissa evaṃ gatassa pacchā icchācāro uppajjati ‘‘na dānāhaṃ tattha gamissāmi, evaṃ maṃ arahāti sambhāvessantī’’ti, anāpattiyeva.
яоби гзнажид̣̇зва гаран̣ийязна д̇ам̣ таанам̣ бад̇ваа саж̇жхааяаманасигаараад̣̇ивасзна ан̃н̃авихид̇о ваа худ̇ваа жораад̣̇ийхи ваа ануб̣ад̣̇д̇хо мзгхам̣ ваа удтид̇ам̣ д̣̇исваа ановассагам̣ бависид̇угаамо д̇ам̣ таанам̣ ад̇иггамад̇и, анаабад̇д̇и, яаанзна ваа ид̣̇д̇хияаа ваа г̇ажчанд̇оби баарааж̇игам̣ наабаж̇ж̇ад̇и, бад̣̇аг̇аманзнзва аабаж̇ж̇ад̇и. д̇амби язхи саха гад̇игаа гад̇аа, д̇зхи сад̣̇д̇хим̣ абуб̣б̣ам̣ ажаримам̣ г̇ажчанд̇о наабаж̇ж̇ад̇и. звам̣ г̇ажчанд̇аа хи саб̣б̣зби ан̃н̃аман̃н̃ам̣ рагканд̇и. сажзби ман̣д̣абаругкамуулаад̣̇ийсу гин̃жи таанам̣ барижчинд̣̇анд̇и ‘‘яо зд̇т̇а нисийд̣̇ад̇и ваа жан̇гамад̇и ваа, д̇ам̣ ‘арахаа’д̇и ж̇ааниссаама’’, бубпаани ваа табзд̇ваа, ‘‘яо имаани г̇ахзд̇ваа бууж̇ам̣ гариссад̇и, д̇ам̣ ‘арахаа’д̇и ж̇ааниссаамаа’’д̇иаад̣̇инаа наязна гад̇игаа гад̇аа ход̇и, д̇ад̇рааби ижчаажааравасзна д̇ат̇аа гаронд̇асса баарааж̇игамзва. сажзби убаасагзна анд̇араамаг̇г̇з вихааро ваа гад̇о ход̇и, жийвараад̣̇ийни ваа табид̇аани хонд̇и ‘‘яз араханд̇о, д̇з имасмим̣ вихаарз васанд̇у, жийвараад̣̇ийни ваа г̇ан̣ханд̇уу’’д̇и, д̇ад̇рааби ижчаажааравасзна васанд̇асса ваа д̇аани ваа г̇ан̣ханд̇асса баарааж̇игамзва, зд̇ам̣ бана ад̇хаммигагад̇игавад̇д̇ам̣, д̇асмаа на гаад̇аб̣б̣ам̣, ан̃н̃ам̣ ваа зваруубам̣ ‘‘имасмим̣ д̇змаасаб̣бханд̇арз саб̣б̣зва ааран̃н̃агаа хонд̇у бин̣д̣абаад̇игад̇худ̇ан̇г̇аад̣̇иавасзсад̇худ̇ан̇г̇ад̇хараа ваа, ат̇а ваа саб̣б̣зва кийн̣аасаваа хонд̇уу’’д̇и звамаад̣̇и. наанаавзраж̇ж̇агаа хи бхигкуу саннибад̇анд̇и. д̇ад̇т̇а гзжи д̣̇уб̣б̣алаа аббат̇аамаа зваруубам̣ вад̇д̇ам̣ анубаалзд̇ум̣ на саггонд̇и, д̇асмаа зваруубамби вад̇д̇ам̣ на гаад̇аб̣б̣ам̣. ‘‘имам̣ д̇змаасам̣ саб̣б̣зхзва на уд̣̇д̣̇исид̇аб̣б̣ам̣, на барибужчид̇аб̣б̣ам̣, на баб̣б̣ааж̇зд̇аб̣б̣ам̣, мууг̇аб̣б̣ад̇ам̣ г̇ан̣хид̇аб̣б̣ам̣, б̣ахисиймадтассаби сан̇гхалаабхо д̣̇аад̇аб̣б̣о’’д̇и звамаад̣̇игамби на гад̇д̇аб̣б̣амзва.
Yopi kenacideva karaṇīyena taṃ ṭhānaṃ patvā sajjhāyamanasikārādivasena aññavihito vā hutvā corādīhi vā anubaddho meghaṃ vā uṭṭhitaṃ disvā anovassakaṃ pavisitukāmo taṃ ṭhānaṃ atikkamati, anāpatti, yānena vā iddhiyā vā gacchantopi pārājikaṃ nāpajjati, padagamaneneva āpajjati. Tampi yehi saha katikā katā, tehi saddhiṃ apubbaṃ acarimaṃ gacchanto nāpajjati. Evaṃ gacchantā hi sabbepi aññamaññaṃ rakkhanti. Sacepi maṇḍaparukkhamūlādīsu kiñci ṭhānaṃ paricchindanti ‘‘yo ettha nisīdati vā caṅkamati vā, taṃ ‘arahā’ti jānissāma’’, pupphāni vā ṭhapetvā, ‘‘yo imāni gahetvā pūjaṃ karissati, taṃ ‘arahā’ti jānissāmā’’tiādinā nayena katikā katā hoti, tatrāpi icchācāravasena tathā karontassa pārājikameva. Sacepi upāsakena antarāmagge vihāro vā kato hoti, cīvarādīni vā ṭhapitāni honti ‘‘ye arahanto, te imasmiṃ vihāre vasantu, cīvarādīni vā gaṇhantū’’ti, tatrāpi icchācāravasena vasantassa vā tāni vā gaṇhantassa pārājikameva, etaṃ pana adhammikakatikavattaṃ, tasmā na kātabbaṃ, aññaṃ vā evarūpaṃ ‘‘imasmiṃ temāsabbhantare sabbeva āraññakā hontu piṇḍapātikadhutaṅgādiavasesadhutaṅgadharā vā, atha vā sabbeva khīṇāsavā hontū’’ti evamādi. Nānāverajjakā hi bhikkhū sannipatanti. Tattha keci dubbalā appathāmā evarūpaṃ vattaṃ anupāletuṃ na sakkonti, tasmā evarūpampi vattaṃ na kātabbaṃ. ‘‘Imaṃ temāsaṃ sabbeheva na uddisitabbaṃ, na paripucchitabbaṃ, na pabbājetabbaṃ, mūgabbataṃ gaṇhitabbaṃ, bahisīmaṭṭhassapi saṅghalābho dātabbo’’ti evamādikampi na kattabbameva.
д̇ивид̇хамбийд̇и барияад̇д̇ибадибад̇д̇ибадивзд̇хавасзна д̇ивид̇хамби. сод̇хзд̇ваа баб̣б̣ааж̇зт̇аад̇и бхаб̣б̣з аажаарагулабуд̇д̇з убабаригкид̇ваа баб̣б̣ааж̇зт̇а. бхассз мад̇д̇ам̣ ж̇аанид̇ваад̇и важанз бамаан̣ам̣ н̃ад̇ваа. д̣̇асагат̇аавад̇т̇у наама аббижчаагат̇аа санд̇удтигат̇аа бавивзгагат̇аа асам̣саг̇г̇агат̇аа вийрияаарамбхагат̇аа сийлагат̇аа самаад̇хигат̇аа бан̃н̃аагат̇аа вимуд̇д̇игат̇аа вимуд̇д̇ин̃аан̣ад̣̇ассанагат̇аад̇и.
Tividhampīti pariyattipaṭipattipaṭivedhavasena tividhampi. Sodhetvā pabbājethāti bhabbe ācārakulaputte upaparikkhitvā pabbājetha. Bhasse mattaṃ jānitvāti vacane pamāṇaṃ ñatvā. Dasakathāvatthu nāma appicchākathā santuṭṭhikathā pavivekakathā asaṃsaggakathā vīriyārambhakathā sīlakathā samādhikathā paññākathā vimuttikathā vimuttiñāṇadassanakathāti.
виг̇г̇ахасам̣вад̇д̇анигам̣ важанам̣ виг̇г̇аахигам̣. жад̇ураарагкам̣ ахаабзнд̇аад̇и б̣уд̣̇д̇хаануссад̇и мзд̇д̇аа асубхам̣ маран̣аануссад̇ийд̇и имам̣ жад̇ураарагкам̣ ахаабзнд̇аа. д̣̇анд̇агадтакаад̣̇анавад̇д̇ам̣ аажигкид̇аб̣б̣анд̇и зд̇т̇а ид̣̇ам̣ д̣̇анд̇агадтакаад̣̇анавад̇д̇ам̣ – яо д̣̇звасигам̣ сан̇гхамаж̇жхз осарад̇и, д̇зна сааман̣зраад̣̇ийхи аахарид̇ваа бхигкуунам̣ яат̇аасукам̣ бхун̃ж̇анад̇т̇ааяа д̣̇анд̇агадтамаал̣агз нигкид̇д̇зсу д̣̇анд̇агадтзсу д̣̇ивасз д̣̇ивасз згамзва д̣̇анд̇агадтам̣ г̇ахзд̇аб̣б̣ам̣. яо бана д̣̇звасигам̣ на осарад̇и, бад̇хаанагхарз васид̇ваа д̇хаммассаванз ваа убосат̇аг̇г̇з ваа д̣̇иссад̇и, д̇зна бамаан̣ам̣ саллагкзд̇ваа жад̇д̇аари бан̃жа д̣̇анд̇агадтаани ад̇д̇ано васанадтаанз табзд̇ваа каад̣̇ид̇аб̣б̣аани. д̇зсу кийн̣зсу сажз бунаби д̣̇анд̇агадтамаал̣агз б̣ахууни хонд̇иязва, бунаби аахарид̇ваа каад̣̇ид̇аб̣б̣аани. яад̣̇и бана бамаан̣ам̣ асаллагкзд̇ваа аахарад̇и, д̇зсу акийн̣зсуязва маал̣агз кийяад̇и, д̇ад̇о гзжи т̇зраа ‘‘язхи г̇ахид̇аани, д̇з бадихаранд̇уу’’д̇и вад̣̇зяяум̣, гзжи ‘‘каад̣̇анд̇у, буна сааман̣зраа аахариссанд̇ий’’д̇и, д̇асмаа виваад̣̇абарихаарад̇т̇ам̣ бамаан̣ам̣ саллагкзд̇аб̣б̣ам̣, г̇ахан̣з бана д̣̇осо над̇т̇и. маг̇г̇ам̣ г̇ажчанд̇знаби згам̣ ваа д̣̇вз ваа т̇авигааяа багкибид̇ваа г̇анд̇аб̣б̣анд̇и. бхигкаажааравад̇д̇ам̣ бин̣д̣абаад̇игавад̇д̇з аавибхависсад̇и.
Viggahasaṃvattanikaṃ vacanaṃ viggāhikaṃ. Caturārakkhaṃ ahāpentāti buddhānussati mettā asubhaṃ maraṇānussatīti imaṃ caturārakkhaṃ ahāpentā. Dantakaṭṭhakhādanavattaṃ ācikkhitabbanti ettha idaṃ dantakaṭṭhakhādanavattaṃ – yo devasikaṃ saṅghamajjhe osarati, tena sāmaṇerādīhi āharitvā bhikkhūnaṃ yathāsukhaṃ bhuñjanatthāya dantakaṭṭhamāḷake nikkhittesu dantakaṭṭhesu divase divase ekameva dantakaṭṭhaṃ gahetabbaṃ. Yo pana devasikaṃ na osarati, padhānaghare vasitvā dhammassavane vā uposathagge vā dissati, tena pamāṇaṃ sallakkhetvā cattāri pañca dantakaṭṭhāni attano vasanaṭṭhāne ṭhapetvā khāditabbāni. Tesu khīṇesu sace punapi dantakaṭṭhamāḷake bahūni hontiyeva, punapi āharitvā khāditabbāni. Yadi pana pamāṇaṃ asallakkhetvā āharati, tesu akhīṇesuyeva māḷake khīyati, tato keci therā ‘‘yehi gahitāni, te paṭiharantū’’ti vadeyyuṃ, keci ‘‘khādantu, puna sāmaṇerā āharissantī’’ti, tasmā vivādaparihāratthaṃ pamāṇaṃ sallakkhetabbaṃ, gahaṇe pana doso natthi. Maggaṃ gacchantenapi ekaṃ vā dve vā thavikāya pakkhipitvā gantabbanti. Bhikkhācāravattaṃ piṇḍapātikavatte āvibhavissati.
анд̇ог̇аамз…бз… на гат̇зд̇аб̣б̣аад̇и зд̇т̇а жад̇уусу бажжаязсу жийварз жа бин̣д̣абаад̇з жа вин̃н̃ад̇д̇иби на ваддад̇и нимид̇д̇обхаасабаригат̇ааби. сзнаасанз вин̃н̃ад̇д̇имзва на ваддад̇и, сзсаани д̇ийн̣и вадданд̇и. г̇илаанабажжаяз саб̣б̣амби ваддад̇и. звам̣ санд̇зби ааж̇ийвам̣ сод̇хзнд̇зхи бхигкуухи судту рагкид̇аб̣б̣аад̇и. иминаа ааж̇ийвабаарисуд̣̇д̇хисийлам̣ д̣̇ассид̇ам̣. рагкид̇инд̣̇риязхи бхавид̇аб̣б̣анд̇и инд̣̇рияасам̣варасийлам̣. канд̇хагавад̇д̇ан̃жа сзкияавад̇д̇ан̃жа буурзд̇аб̣б̣анд̇и баад̇имогкасам̣варасийлам̣. бажжаяасанниссид̇асийлам̣ бана д̇ийхиби саамад̇т̇ияад̇о д̣̇ассид̇ам̣. ид̇и жад̇убаарисуд̣̇д̇хисийлабадисам̣яуд̇д̇аа зваруубаа нияяаанигагат̇аа б̣ахугааби вад̇д̇аб̣б̣аад̇и ад̇хиббааяо.
Antogāme…pe… na kathetabbāti ettha catūsu paccayesu cīvare ca piṇḍapāte ca viññattipi na vaṭṭati nimittobhāsaparikathāpi. Senāsane viññattimeva na vaṭṭati, sesāni tīṇi vaṭṭanti. Gilānapaccaye sabbampi vaṭṭati. Evaṃ santepi ājīvaṃ sodhentehi bhikkhūhi suṭṭhu rakkhitabbāti. Iminā ājīvapārisuddhisīlaṃ dassitaṃ. Rakkhitindriyehi bhavitabbanti indriyasaṃvarasīlaṃ. Khandhakavattañca sekhiyavattañca pūretabbanti pātimokkhasaṃvarasīlaṃ. Paccayasannissitasīlaṃ pana tīhipi sāmatthiyato dassitaṃ. Iti catupārisuddhisīlapaṭisaṃyuttā evarūpā niyyānikakathā bahukāpi vattabbāti adhippāyo.
имасмим̣ вассуубанааяигависаяз д̇зсу д̇зсу наг̇арзсу д̇асмим̣ д̇асмим̣ рааж̇агаалз абарияанд̇аа виваад̣̇агат̇аа ход̇и. гат̇ам̣? вассуубанааяигагканд̇хагз (махаава. 186) ‘‘д̇зна ко бана самаязна рааж̇аа мааг̇ад̇хо сзнияо б̣имб̣исааро вассам̣ уггад̣дхид̇угаамо бхигкуунам̣ санд̇игз д̣̇ууд̇ам̣ баахзси ‘яад̣̇и банааяяаа ааг̇амз ж̇ун̣хз вассам̣ убаг̇ажчзяяу’нд̇и. бхаг̇авад̇о зд̇амад̇т̇ам̣ аарожзсум̣, ‘ануж̇аанаами, бхигкавз, рааж̇уунам̣ анувад̇д̇ид̇у’’’нд̇и важанам̣ ниссааяа бхаг̇авад̇аа ад̇химаасам̣ бан̃н̃ад̇д̇анд̇и ман̃н̃амаанаа взд̣̇асамаязна сам̣санд̣̇ид̇ваа г̇аяхамаанаа анзгавихид̇ам̣ виваад̣̇ам̣ гаронд̇и. взд̣̇асамаяз гира д̣̇вз ад̇химаасаани яаажаад̇химаасан̃жа бад̇д̇аад̇химаасан̃жа. д̇ад̇т̇а галияуг̇аг̇ан̣анз згуунавийсад̇иг̇ан̣анзна бхааж̇ид̇з д̣̇взбан̃жадтад̣̇асад̇зрасасол̣асадтаарасавасзна сад̇д̇ад̇хаа сзсо ход̇и, д̇зсам̣ васзна жаммаад̇химааса бан̃жаад̇химааса басваад̇химааса д̣̇асаад̇химааса д̇зрасаад̇химааса сол̣асаад̇химааса адтаарасаад̇химаасаад̇и вохаранд̇и. адтаарасаад̇химаасам̣ бана авасаанаад̇химаасанд̇иби вохаранд̇и. д̇зсу басусол̣асаани абад̇д̇зязва ад̇химаасабад̇анагалияуг̇з сам̣важчарамаасаад̣̇ивисамабхаязна яаажид̇ваа маасасса аагад̣дхид̇аб̣б̣ад̇о яаажаад̇химаасанд̇и вохаранд̇и, сзсаани бана бан̃жамад̇д̇зязва ад̇химаасабад̇анагалияуг̇з маасасса аагад̣дхид̇аб̣б̣ад̇о бад̇д̇аад̇химаасанд̇и. д̇ад̇рзд̇ам̣ яаажаад̇химаасалагкан̣ам̣ – д̇ат̇ад̇о аж̇аананд̇аа баал̣ияаа сам̣санд̣̇ид̇ваа б̣имб̣исаараран̃н̃аа бхаг̇авад̇о яаажид̇аад̇химаасад̇д̇аа яаажаад̇химаасам̣ наама бхавад̇и, д̇асмаа д̣̇вийсу зва яаажаад̇химаасзсу д̣̇ивасзна саха маасо аагад̣дхид̇аб̣б̣о, на ид̇арзсууд̇и вад̣̇анд̇и, ан̃н̃з бана бан̃жасу бад̇д̇аад̇химаасзсу зва саха д̣̇ивасзна маасо аагад̣дхид̇аб̣б̣о, на яаажаад̇химаасзсууд̇и.
Imasmiṃ vassūpanāyikavisaye tesu tesu nagaresu tasmiṃ tasmiṃ rājakāle apariyantā vivādakathā hoti. Kathaṃ? Vassūpanāyikakkhandhake (mahāva. 186) ‘‘tena kho pana samayena rājā māgadho seniyo bimbisāro vassaṃ ukkaḍḍhitukāmo bhikkhūnaṃ santike dūtaṃ pāhesi ‘yadi panāyyā āgame juṇhe vassaṃ upagaccheyyu’nti. Bhagavato etamatthaṃ ārocesuṃ, ‘anujānāmi, bhikkhave, rājūnaṃ anuvattitu’’’nti vacanaṃ nissāya bhagavatā adhimāsaṃ paññattanti maññamānā vedasamayena saṃsanditvā gayhamānā anekavihitaṃ vivādaṃ karonti. Vedasamaye kira dve adhimāsāni yācādhimāsañca pattādhimāsañca. Tattha kaliyugagaṇane ekūnavīsatigaṇanena bhājite dvepañcaṭṭhadasaterasasoḷasaṭṭhārasavasena sattadhā seso hoti, tesaṃ vasena cammādhimāsa pañcādhimāsa pasvādhimāsa dasādhimāsa terasādhimāsa soḷasādhimāsa aṭṭhārasādhimāsāti voharanti. Aṭṭhārasādhimāsaṃ pana avasānādhimāsantipi voharanti. Tesu pasusoḷasāni apatteyeva adhimāsapatanakaliyuge saṃvaccharamāsādivisamabhayena yācitvā māsassa ākaḍḍhitabbato yācādhimāsanti voharanti, sesāni pana pañcamatteyeva adhimāsapatanakaliyuge māsassa ākaḍḍhitabbato pattādhimāsanti. Tatretaṃ yācādhimāsalakkhaṇaṃ – tathato ajānantā pāḷiyā saṃsanditvā bimbisāraraññā bhagavato yācitādhimāsattā yācādhimāsaṃ nāma bhavati, tasmā dvīsu eva yācādhimāsesu divasena saha māso ākaḍḍhitabbo, na itaresūti vadanti, aññe pana pañcasu pattādhimāsesu eva saha divasena māso ākaḍḍhitabbo, na yācādhimāsesūti.
абарз бана – ‘‘д̣̇взмаа, бхигкавз, вассуубанааяигаа буримигаа бажчимигаад̇и, абараж̇ж̇уг̇ад̇ааяа аасаал̣хияаа буримигаа убаг̇анд̇аб̣б̣аа, маасаг̇ад̇ааяа аасаал̣хияаа бажчимигаа убаг̇анд̇аб̣б̣аа’’д̇и д̇асмим̣язва вассуубанааяигагканд̇хагз (махаава. 184) ааг̇ад̇ааяа баал̣ияаа ад̇т̇ам̣ аяонисо г̇ахзд̇ваа д̇ит̇инагкад̇д̇аяог̇з зва вассуубаг̇аманам̣ бхаг̇авад̇аа анун̃н̃аад̇ам̣, д̇асмаа аасаал̣хибун̣н̣амааяа ананд̇арабхууд̇о баадибад̣̇ад̣̇ивасо бун̣н̣аад̇ит̇ияаа жа яуд̇д̇о ход̇у, буб̣б̣аасаал̣хауд̇д̇араасаал̣хасан̇каад̇зсу д̣̇вийсу нагкад̇д̇зсу згзгзна яуд̇д̇о жа, звам̣бхууд̇о гаало яад̣̇и винаа д̣̇ивасзна маасагад̣дханз самбаж̇ж̇ад̇и, д̇ат̇аа жа сад̇и маасамад̇д̇аагад̣дханамзва гаад̇аб̣б̣ам̣, яад̣̇и на самбаж̇ж̇ад̇и, саха д̣̇ивасзна маасаагад̣дханам̣, аяам̣ бидагзна жа взд̣̇зна жа ануломо винижчаяод̇и вад̣̇анд̇и.
Apare pana – ‘‘dvemā, bhikkhave, vassūpanāyikā purimikā pacchimikāti, aparajjugatāya āsāḷhiyā purimikā upagantabbā, māsagatāya āsāḷhiyā pacchimikā upagantabbā’’ti tasmiṃyeva vassūpanāyikakkhandhake (mahāva. 184) āgatāya pāḷiyā atthaṃ ayoniso gahetvā tithinakkhattayoge eva vassūpagamanaṃ bhagavatā anuññātaṃ, tasmā āsāḷhipuṇṇamāya anantarabhūto pāṭipadadivaso puṇṇātithiyā ca yutto hotu, pubbāsāḷhauttarāsāḷhasaṅkhātesu dvīsu nakkhattesu ekekena yutto ca, evaṃbhūto kālo yadi vinā divasena māsakaḍḍhane sampajjati, tathā ca sati māsamattākaḍḍhanameva kātabbaṃ, yadi na sampajjati, saha divasena māsākaḍḍhanaṃ, ayaṃ piṭakena ca vedena ca anulomo vinicchayoti vadanti.
д̇ад̇раабязгз вад̣̇анд̇и – ‘‘маа ид̇и жанд̣̇о вужжад̇и д̇асса г̇ад̇ияаа д̣̇ивасасса минид̇аб̣б̣ад̇о, со зд̇т̇а саб̣б̣агалаабаарибуурияаа бун̣н̣од̇и бун̣н̣амаа’’д̇иаад̣̇инаа винаяад̇т̇аман̃ж̇уусаад̣̇ийсу (ган̇каа. абхи. дий. нид̣̇аанаван̣н̣анаа) ааг̇аманад̇о бун̣н̣аад̇ит̇ияог̇оби бун̣н̣амияаа зва ижчид̇аб̣б̣о, на баадибад̣̇з, д̇ат̇аа нагкад̇д̇аяог̇оби аасаал̣хисуггабагкасса баннарасз убосат̇з ‘‘уд̇д̇араасаал̣ханагкад̇д̇з, звам̣ д̇хаад̇у бад̇идтид̇аа’’д̇и махаавам̣сз важанад̇од̇и. д̇ад̇т̇а буримаа вад̣̇анд̇и – звам̣ санд̇з убосат̇ад̣̇ивасзязва жанд̣̇аг̇г̇аахо жа суурияаг̇г̇аахо жа бхавзяяа, ид̣̇аани бана гаал̣абагкабаадибад̣̇аад̣̇ийсуязва жанд̣̇аг̇г̇аахо, суггабагкабаадибад̣̇аад̣̇ийсуязва суурияаг̇г̇аахо бан̃н̃ааяад̇и, д̇асмаа баадибад̣̇зязва д̇ит̇инагкад̇д̇аяог̇о ижчид̇аб̣б̣од̇и. бажчимааби вад̣̇анд̇и – д̇умхаад̣̇исаанам̣ ваад̣̇ийнам̣ важанзна буб̣б̣з аагад̣дхид̇аб̣б̣ад̣̇ивасаанам̣ анаагад̣дхид̇ад̇д̇аа д̣̇ивасабун̃ж̇абхаавзна звам̣ ход̇и, сажжад̇о бана убосат̇ад̣̇ивасзязва жанд̣̇аг̇г̇аахо суурияаг̇г̇аахо жа ижчид̇аб̣б̣од̇и. ход̇у, яат̇аа ижчат̇а, д̇ат̇аа вад̣̇ат̇а, звам̣ бхууд̇абуб̣б̣о саадтагат̇з д̇збидагз б̣уд̣̇д̇хаважанз ад̇т̇ийд̇и? ад̇т̇и. г̇анд̇хаараж̇аад̇агз (ж̇аа. адта. 3.7.75 г̇анд̇хаараж̇аад̇агаван̣н̣анаа) хи убосат̇ад̣̇ивасз жанд̣̇аг̇г̇аахо д̣̇вигкад̇д̇ум̣ ааг̇ад̇о. д̇ан̃хи ж̇аад̇агам̣ д̇ийсу бидагзсу суд̇д̇абарияаабаннам̣, бан̃жасу нигааязсу куд̣̇д̣̇аганигааяабарияаабаннам̣, навасу саасанан̇г̇зсу ж̇аад̇агабарияаабаннанд̇и. звам̣ вуд̇д̇з буримагаа бадиважанам̣ д̣̇аад̇ум̣ на саггун̣зяяунд̇и.
Tatrāpyeke vadanti – ‘‘mā iti cando vuccati tassa gatiyā divasassa minitabbato, so ettha sabbakalāpāripūriyā puṇṇoti puṇṇamā’’tiādinā vinayatthamañjūsādīsu (kaṅkhā. abhi. ṭī. nidānavaṇṇanā) āgamanato puṇṇātithiyogopi puṇṇamiyā eva icchitabbo, na pāṭipade, tathā nakkhattayogopi āsāḷhisukkapakkhassa pannarase uposathe ‘‘uttarāsāḷhanakkhatte, evaṃ dhātu patiṭṭhitā’’ti mahāvaṃse vacanatoti. Tattha purimā vadanti – evaṃ sante uposathadivaseyeva candaggāho ca sūriyaggāho ca bhaveyya, idāni pana kāḷapakkhapāṭipadādīsuyeva candaggāho, sukkapakkhapāṭipadādīsuyeva sūriyaggāho paññāyati, tasmā pāṭipadeyeva tithinakkhattayogo icchitabboti. Pacchimāpi vadanti – tumhādisānaṃ vādīnaṃ vacanena pubbe ākaḍḍhitabbadivasānaṃ anākaḍḍhitattā divasapuñjabhāvena evaṃ hoti, saccato pana uposathadivaseyeva candaggāho sūriyaggāho ca icchitabboti. Hotu, yathā icchatha, tathā vadatha, evaṃ bhūtapubbo sāṭṭhakathe tepiṭake buddhavacane atthīti? Atthi. Gandhārajātake (jā. aṭṭha. 3.7.75 gandhārajātakavaṇṇanā) hi uposathadivase candaggāho dvikkhattuṃ āgato. Tañhi jātakaṃ tīsu piṭakesu suttapariyāpannaṃ, pañcasu nikāyesu khuddakanikāyapariyāpannaṃ, navasu sāsanaṅgesu jātakapariyāpannanti. Evaṃ vutte purimakā paṭivacanaṃ dātuṃ na sakkuṇeyyunti.
ат̇згажжз ‘‘бидагад̇д̇аяз ад̇хигамаасааязва санд̇и, на ад̇хигад̣̇ивасаа саарад̇т̇ад̣̇ийбанияам̣ (саарад̇т̇а. дий. баажид̇д̇ияа 3.404) ‘яам̣ бана вуд̇д̇ам̣ д̇ийсуби г̇ан̣тибад̣̇зсу адтаарасаннам̣язва вассаанам̣ ад̇хигамаасз г̇ахзд̇ваа г̇ан̣ид̇ад̇д̇аа сзсавассад̣̇ваяассаби ад̇хигаани д̣̇ивасаани хонд̇зва, д̇аани ад̇хигад̣̇ивасаани санд̇хааяа нигган̇каа худ̇ваад̇и вуд̇д̇анд̇и, д̇ам̣ на г̇ахзд̇аб̣б̣ам̣. на хи д̣̇вийсу вассзсу ад̇хигад̣̇ивасаа наама висум̣ убалаб̣бханд̇и д̇ад̇ияз вассз вассуггад̣дханавасзна ад̇хигамаасз барижжад̇д̇зязва ад̇хигамаасасамбхавад̇о, д̇асмаа д̣̇вийсу вассзсу ад̇ирзгад̣̇ивасаа наама висум̣ на самбхаванд̇ий’д̇и важанад̇о’’д̇и вад̣̇анд̇и. ат̇ан̃н̃з вад̣̇анд̇и – бидагад̇д̇аяз ад̇хигад̣̇ивасаад̇и ааг̇ад̇аа ад̇т̇и важ̇ираб̣уд̣̇д̇хидийгааяам̣ (важ̇ира. дий. баажид̇д̇ияа 404) ‘‘авасзсаанам̣ д̣̇виннам̣ вассаанам̣ ад̇хигад̣̇ивасаани хонд̇зва, д̇асмаа нигган̇каа худ̇ваа убасамбаад̣̇знд̇ий’’д̇и важанад̇од̇и. ид̇о барамби вивид̇хзна аагаарзна гат̇знд̇и. суд̣̇д̇хавзд̣̇игааби звам̣ вад̣̇анд̇и, винаяад̇хараа бхигкуу винаяасамаяавасзна вад̣̇анд̇и. амхаагам̣ бана взд̣̇асамаяз хад̇т̇аг̇ад̇аг̇ан̣анавасзнзва ж̇аанид̇аб̣б̣анд̇и аламад̇ибабан̃жзна. ад̇т̇игзхи д̇ивассаад̇хигасахассагалияуг̇з д̇хаммарааж̇зна бужчид̇ад̇д̇аа гад̇ам̣ ад̇химаасабагаран̣ам̣ ологзд̇ваа ж̇аанид̇аб̣б̣ам̣.
Athekacce ‘‘piṭakattaye adhikamāsāyeva santi, na adhikadivasā sāratthadīpaniyaṃ (sārattha. ṭī. pācittiya 3.404) ‘yaṃ pana vuttaṃ tīsupi gaṇṭhipadesu aṭṭhārasannaṃyeva vassānaṃ adhikamāse gahetvā gaṇitattā sesavassadvayassapi adhikāni divasāni honteva, tāni adhikadivasāni sandhāya nikkaṅkhā hutvāti vuttanti, taṃ na gahetabbaṃ. Na hi dvīsu vassesu adhikadivasā nāma visuṃ upalabbhanti tatiye vasse vassukkaḍḍhanavasena adhikamāse pariccatteyeva adhikamāsasambhavato, tasmā dvīsu vassesu atirekadivasā nāma visuṃ na sambhavantī’ti vacanato’’ti vadanti. Athaññe vadanti – piṭakattaye adhikadivasāti āgatā atthi vajirabuddhiṭīkāyaṃ (vajira. ṭī. pācittiya 404) ‘‘avasesānaṃ dvinnaṃ vassānaṃ adhikadivasāni honteva, tasmā nikkaṅkhā hutvā upasampādentī’’ti vacanatoti. Ito parampi vividhena ākārena kathenti. Suddhavedikāpi evaṃ vadanti, vinayadharā bhikkhū vinayasamayavasena vadanti. Amhākaṃ pana vedasamaye hatthagatagaṇanavaseneva jānitabbanti alamatipapañcena. Atthikehi tivassādhikasahassakaliyuge dhammarājena pucchitattā kataṃ adhimāsapakaraṇaṃ oloketvā jānitabbaṃ.
ид̇ха бана ад̇хиббзд̇авинижчаяамзва гат̇аяаама. батамад̣̇уд̇ияаваад̣̇зсу на б̣имб̣исаарарааж̇аа бхаг̇аванд̇ам̣ ад̇химаасабан̃н̃аабанам̣ яаажад̇и, на жа бхаг̇аваа бан̃н̃абзд̇и, на ‘‘д̇асмим̣ вассз ид̣̇ам̣ наама ад̇химаасам̣ ход̇ий’’д̇и ваа ‘‘маасамад̇д̇ам̣ ваа сахад̣̇ивасам̣ ваа аагад̣дхид̇аб̣б̣а’’нд̇и ваа баал̣ияам̣ адтагат̇аадийгаасу жа ад̇т̇и, рааж̇аа бана убагадтааяа вассуубанааяигааяа взд̣̇асамаяз вассуггад̣дханасамбхавад̇о бхигкуунам̣ батамааасаал̣хамаасз вассам̣ анубаг̇анд̇ваа д̣̇уд̇ияааасаал̣хамаасз убаг̇аманад̇т̇ам̣ ‘‘яад̣̇и банааяяаа ааг̇амз ж̇ун̣хз вассам̣ убаг̇ажчзяяу’’нд̇и д̣̇ууд̇ам̣ баахзси. яад̣̇и бана убаг̇ажчзяяум̣, саад̇ху вад̇аад̇и самб̣анд̇хид̇аб̣б̣ам̣. бхигкуу бана ран̃н̃о бахид̇асаасанам̣ бхаг̇авад̇о аарожзсум̣. бхаг̇аваа бана вассуггад̣дханз бхигкуунам̣ г̇ун̣абарихаанияаа абхаавад̇о ‘‘ануж̇аанаами, бхигкавз, рааж̇уунам̣ анувад̇д̇ид̇у’’нд̇и (махаава. 186) авожа. д̇зна вуд̇д̇ам̣ адтагат̇ааяам̣ (махаава. адта. 185) ‘‘ануж̇аанаами бхигкавз рааж̇уунам̣ анувад̇д̇ид̇унд̇и зд̇т̇а вассуггад̣дханабхигкуунам̣ гаажи барихаани наама над̇т̇ийд̇ианувад̇д̇ид̇ум̣ анун̃н̃аад̇а’’нд̇и. вимад̇ивинод̣̇анияан̃жа (ви. ви. дий. махааваг̇г̇а 2.185) вуд̇д̇ам̣ ‘‘барихаанийд̇и г̇ун̣абарихааний’’д̇и, д̇асмаа яаажаад̇химаасо ваа ход̇у бад̇д̇аад̇химаасо ваа, яасмим̣ яасмим̣ гаалз анувад̇д̇анзна бхигкуунам̣ сийлаад̣̇иг̇ун̣амби барихаани над̇т̇и, д̇асмим̣ д̇асмим̣ гаалз анувад̇д̇ид̇аб̣б̣ам̣.
Idha pana adhippetavinicchayameva kathayāma. Paṭhamadutiyavādesu na bimbisārarājā bhagavantaṃ adhimāsapaññāpanaṃ yācati, na ca bhagavā paññapeti, na ‘‘tasmiṃ vasse idaṃ nāma adhimāsaṃ hotī’’ti vā ‘‘māsamattaṃ vā sahadivasaṃ vā ākaḍḍhitabba’’nti vā pāḷiyaṃ aṭṭhakathāṭīkāsu ca atthi, rājā pana upakaṭṭhāya vassūpanāyikāya vedasamaye vassukkaḍḍhanasambhavato bhikkhūnaṃ paṭhamaāsāḷhamāse vassaṃ anupagantvā dutiyaāsāḷhamāse upagamanatthaṃ ‘‘yadi panāyyā āgame juṇhe vassaṃ upagaccheyyu’’nti dūtaṃ pāhesi. Yadi pana upagaccheyyuṃ, sādhu vatāti sambandhitabbaṃ. Bhikkhū pana rañño pahitasāsanaṃ bhagavato ārocesuṃ. Bhagavā pana vassukkaḍḍhane bhikkhūnaṃ guṇaparihāniyā abhāvato ‘‘anujānāmi, bhikkhave, rājūnaṃ anuvattitu’’nti (mahāva. 186) avoca. Tena vuttaṃ aṭṭhakathāyaṃ (mahāva. aṭṭha. 185) ‘‘anujānāmi bhikkhave rājūnaṃ anuvattitunti ettha vassukkaḍḍhanabhikkhūnaṃ kāci parihāni nāma natthītianuvattituṃ anuññāta’’nti. Vimativinodaniyañca (vi. vi. ṭī. mahāvagga 2.185) vuttaṃ ‘‘parihānīti guṇaparihānī’’ti, tasmā yācādhimāso vā hotu pattādhimāso vā, yasmiṃ yasmiṃ kāle anuvattanena bhikkhūnaṃ sīlādiguṇampi parihāni natthi, tasmiṃ tasmiṃ kāle anuvattitabbaṃ.
гат̇ам̣ бана анувад̇д̇ид̇аб̣б̣ам̣, гат̇ам̣ на анувад̇д̇ид̇аб̣б̣ам̣? яад̣̇и анувад̇д̇анд̇з буб̣б̣з убавуд̇т̇ад̣̇ивасад̇о ид̣̇аани убавасид̇аб̣б̣аубосат̇ад̣̇ивасо жаад̇уд̣̇д̣̇асо ваа баннарасо ваа ход̇и, д̇ат̇аа сад̇и анувад̇д̇ид̇аб̣б̣ам̣. яад̣̇и бана д̇зрасамо ваа сол̣асамо ваа ход̇и, на анувад̇д̇ид̇аб̣б̣ам̣. анувад̇д̇анд̇о хи анубосат̇з убосат̇агад̇о ход̇и, д̇ад̇о ‘‘на, бхигкавз, анубосат̇з убосат̇о гаад̇аб̣б̣о, яо гарзяяа, аабад̇д̇и д̣̇уггадассаа’’д̇и (махаава. 183) вуд̇д̇ад̣̇уггадам̣ аабаж̇ж̇ад̇и, д̇асмаа сийлаг̇ун̣абарихаанисамбхавад̇о на анувад̇д̇ид̇аб̣б̣ам̣. вуд̇д̇ан̃хи вимад̇ивинод̣̇анияам̣ (ви. ви. дий. махааваг̇г̇а 2.240) ‘‘ануж̇аанаами, бхигкавз, рааж̇уунам̣ анувад̇д̇ид̇унд̇и важанад̇о банзд̇т̇а логияаанам̣ д̇ит̇им̣ анувад̇д̇анд̇зхиби ад̇д̇ано убосат̇аггамзна жаад̇уд̣̇д̣̇асим̣ баннарасим̣ ваа, баннарасим̣ жаад̇уд̣̇д̣̇асим̣ ваа гаронд̇зхзва анувад̇д̇ид̇аб̣б̣ам̣, на бана сол̣асамад̣̇ивасам̣ ваа д̇зрасамад̣̇ивасам̣ ваа убосат̇ад̣̇ивасам̣ гаронд̇зхий’’д̇и.
Kathaṃ pana anuvattitabbaṃ, kathaṃ na anuvattitabbaṃ? Yadi anuvattante pubbe upavutthadivasato idāni upavasitabbauposathadivaso cātuddaso vā pannaraso vā hoti, tathā sati anuvattitabbaṃ. Yadi pana terasamo vā soḷasamo vā hoti, na anuvattitabbaṃ. Anuvattanto hi anuposathe uposathakato hoti, tato ‘‘na, bhikkhave, anuposathe uposatho kātabbo, yo kareyya, āpatti dukkaṭassā’’ti (mahāva. 183) vuttadukkaṭaṃ āpajjati, tasmā sīlaguṇaparihānisambhavato na anuvattitabbaṃ. Vuttañhi vimativinodaniyaṃ (vi. vi. ṭī. mahāvagga 2.240) ‘‘anujānāmi, bhikkhave, rājūnaṃ anuvattitunti vacanato panettha lokiyānaṃ tithiṃ anuvattantehipi attano uposathakkamena cātuddasiṃ pannarasiṃ vā, pannarasiṃ cātuddasiṃ vā karonteheva anuvattitabbaṃ, na pana soḷasamadivasaṃ vā terasamadivasaṃ vā uposathadivasaṃ karontehī’’ti.
д̇ад̇ияажад̇уд̇т̇аваад̣̇зби ‘‘гад̇и вассуубанааяигаа’’д̇и сам̣саяанд̇аанам̣ сам̣саяавинод̣̇анад̇т̇ам̣ ‘‘д̣̇взмаа, бхигкавз, вассуубанааяигаа буримигаа бажчимигаа’’д̇и (махаава. 184) бхаг̇аваа авожа. д̇ад̇о д̇аасам̣ д̣̇виннам̣ вассуубанааяигаанам̣ убаг̇аманагаалам̣ д̣̇ассзд̇ум̣ ‘‘абараж̇ж̇уг̇ад̇ааяа аасаал̣хияаа буримигаа убаг̇анд̇аб̣б̣аа, маасаг̇ад̇ааяа аасаал̣хияаа бажчимигаа убаг̇анд̇аб̣б̣аа’’д̇и вуд̇д̇ам̣. д̇ад̇рааяам̣ бин̣д̣ад̇т̇о – аасаал̣хибун̣н̣амияаа ананд̇арз баадибад̣̇ад̣̇ивасз буримигаа убаг̇анд̇аб̣б̣аа, сааван̣абун̣н̣амияаа ананд̇арз баадибад̣̇ад̣̇ивасз бажчимигаа убаг̇анд̇аб̣б̣аад̇и. д̇зна вуд̇д̇ам̣ адтагат̇ааяам̣ (махаава. адта. 184) ‘‘д̇асмаа аасаал̣хибун̣н̣амааяа ананд̇арз баадибад̣̇ад̣̇ивасз, аасаал̣хибун̣н̣амид̇о ваа абарааяа бун̣н̣амааяа ананд̇арз баадибад̣̇ад̣̇ивасзязва вихаарам̣ бадиж̇аг̇г̇ид̇ваа баанийяам̣ барибхож̇анийяам̣ убадтаабзд̇ваа саб̣б̣ам̣ жзд̇ияаванд̣̇анаад̣̇исаамийжигаммам̣ нидтаабзд̇ваа ‘имасмим̣ вихаарз имам̣ д̇змаасам̣ вассам̣ убзмий’д̇и сагим̣ ваа д̣̇вад̇д̇игкад̇д̇ум̣ ваа ваажам̣ нижчаарзд̇ваа вассам̣ убаг̇анд̇аб̣б̣а’’нд̇и , саарад̇т̇ад̣̇ийбанияамби (саарад̇т̇а. дий. махааваг̇г̇а 3.184) ‘‘абараж̇ж̇ууд̇и аасаал̣хид̇о абарам̣ д̣̇инам̣, баадибад̣̇анд̇и ад̇т̇о’’д̇и, вимад̇ивинод̣̇анияамби (ви. ви. дий. махааваг̇г̇а 2.184) ‘‘абарасмим̣ д̣̇ивасзд̇и д̣̇уд̇ияз баадибад̣̇ад̣̇ивасз’’д̇и звам̣ баал̣иадтагат̇аадийгаасу баадибад̣̇ад̣̇ивасзязва вассуубаг̇аманам̣ вуд̇д̇ам̣, на вуд̇д̇ам̣ ‘‘амугад̇ит̇ияог̇з’’д̇и ваа ‘‘амуганагкад̇д̇аяог̇з’’д̇и ваа, д̇асмаа баадибад̣̇ад̣̇ивасз баад̇о арун̣уг̇г̇аманад̇о бадтааяа сагалад̣̇ивасам̣ сагаларад̇д̇и яаава д̣̇уд̇ияаарун̣уг̇г̇аманаа яат̇ааружид̇з гаалз вассам̣ убаг̇анд̇аб̣б̣анд̇и д̣̇адтаб̣б̣ам̣. д̇ад̇о зва вассуубанааяигагаалз бун̣н̣аад̇ит̇ияаа яог̇о, уд̇д̇араасаал̣ханагкад̇д̇зна яог̇о ход̇ууд̇и вад̣̇анд̇аанам̣ важанам̣ винаяавируд̣̇д̇хам̣ ход̇и, д̇ам̣ важанам̣ г̇ахзд̇ваа бун̣н̣аад̇ит̇ияог̇ам̣ уд̇д̇араасаал̣ханагкад̇д̇аяог̇ан̃жа ааг̇амзд̇ваа вассам̣ убаг̇анд̇вааби д̇ат̇ааг̇ад̇зна абан̃н̃ад̇д̇ам̣ бан̃н̃абзд̇и наамаад̇и д̣̇адтаб̣б̣ам̣.
Tatiyacatutthavādepi ‘‘kati vassūpanāyikā’’ti saṃsayantānaṃ saṃsayavinodanatthaṃ ‘‘dvemā, bhikkhave, vassūpanāyikā purimikā pacchimikā’’ti (mahāva. 184) bhagavā avoca. Tato tāsaṃ dvinnaṃ vassūpanāyikānaṃ upagamanakālaṃ dassetuṃ ‘‘aparajjugatāya āsāḷhiyā purimikā upagantabbā, māsagatāya āsāḷhiyā pacchimikā upagantabbā’’ti vuttaṃ. Tatrāyaṃ piṇḍattho – āsāḷhipuṇṇamiyā anantare pāṭipadadivase purimikā upagantabbā, sāvaṇapuṇṇamiyā anantare pāṭipadadivase pacchimikā upagantabbāti. Tena vuttaṃ aṭṭhakathāyaṃ (mahāva. aṭṭha. 184) ‘‘tasmā āsāḷhipuṇṇamāya anantare pāṭipadadivase, āsāḷhipuṇṇamito vā aparāya puṇṇamāya anantare pāṭipadadivaseyeva vihāraṃ paṭijaggitvā pānīyaṃ paribhojanīyaṃ upaṭṭhāpetvā sabbaṃ cetiyavandanādisāmīcikammaṃ niṭṭhāpetvā ‘imasmiṃ vihāre imaṃ temāsaṃ vassaṃ upemī’ti sakiṃ vā dvattikkhattuṃ vā vācaṃ nicchāretvā vassaṃ upagantabba’’nti , sāratthadīpaniyampi (sārattha. ṭī. mahāvagga 3.184) ‘‘aparajjūti āsāḷhito aparaṃ dinaṃ, pāṭipadanti attho’’ti, vimativinodaniyampi (vi. vi. ṭī. mahāvagga 2.184) ‘‘aparasmiṃ divaseti dutiye pāṭipadadivase’’ti evaṃ pāḷiaṭṭhakathāṭīkāsu pāṭipadadivaseyeva vassūpagamanaṃ vuttaṃ, na vuttaṃ ‘‘amukatithiyoge’’ti vā ‘‘amukanakkhattayoge’’ti vā, tasmā pāṭipadadivase pāto aruṇuggamanato paṭṭhāya sakaladivasaṃ sakalaratti yāva dutiyaaruṇuggamanā yathārucite kāle vassaṃ upagantabbanti daṭṭhabbaṃ. Tato eva vassūpanāyikakāle puṇṇātithiyā yogo, uttarāsāḷhanakkhattena yogo hotūti vadantānaṃ vacanaṃ vinayaviruddhaṃ hoti, taṃ vacanaṃ gahetvā puṇṇātithiyogaṃ uttarāsāḷhanakkhattayogañca āgametvā vassaṃ upagantvāpi tathāgatena apaññattaṃ paññapeti nāmāti daṭṭhabbaṃ.
звам̣ баал̣иадтагат̇аадийгаасу жа бун̣н̣аад̇ит̇ияог̇з зва вассам̣ убаг̇анд̇аб̣б̣ам̣, на згааяа д̇ит̇ияаа яуд̇д̇зд̇и ваа уд̇д̇араасаал̣ханагкад̇д̇аяог̇зязва, на сааван̣анагкад̇д̇аяог̇зд̇и ваа анааг̇ад̇амзва чааяам̣ г̇ахзд̇ваа д̇ат̇ааг̇ад̇зна бан̃н̃ад̇д̇ам̣ вияа бод̇т̇агзсу ликид̇ваа гзхижи табид̇ад̇д̇аа сагалам̣ винаяабидагам̣ абассанд̇аа взд̣̇асаамаяигаа д̇ам̣ важанам̣ сад̣̇д̣̇ахид̇ваа вассуубаг̇аманагаалз бун̣н̣аад̇ит̇иуд̇д̇араасаал̣хаяог̇амзва г̇авзсанд̇аа маасад̣̇ивасзна саха аагад̣дхид̇аб̣б̣агаалзби маасамад̇д̇амзва аагад̣дханд̇и, маасамад̇д̇амзва аагад̣дхид̇аб̣б̣агаалзби саха д̣̇ивасзна аагад̣дханд̇и, д̇асмаа звам̣ваад̣̇ино бхигкуу ‘‘абан̃н̃ад̇д̇ам̣ д̇ат̇ааг̇ад̇зна бан̃н̃ад̇д̇ам̣ д̇ат̇ааг̇ад̇знаад̇и д̣̇ийбзд̇ий’’д̇и вад̇д̇аб̣б̣ад̇ам̣ аабаж̇ж̇анд̇и, д̇асмаа бхаг̇авад̇и г̇ааравасахид̇аа лаж̇ж̇ино бан̣д̣ид̇аа звам̣ на г̇ан̣ханд̇ийд̇и. д̇ит̇инагкад̇д̇аяог̇о бана убосат̇ад̣̇ивасзязва б̣ахуд̇хаа бидагад̇д̇аяз ааг̇ад̇о, бораан̣авзд̣̇аг̇ант̇зсу жа басам̣сид̇о, гад̣̇аажи бана вохаарагаало д̇ит̇ияаа нагкад̇д̇зна жа висамо ход̇и, д̇асмаа д̇ам̣ самзд̇ум̣ ад̇химаасабад̇анагаалз маасамби д̣̇ивасамби аагад̣дханд̇и, д̇асмаа ан̃н̃асмим̣ гаалз висамзби аагад̣дханагаалз самаабзд̇аб̣б̣ам̣. звам̣ сад̇и маасауд̇усам̣важчараанам̣ самабхааво ход̇ийд̇и д̣̇адтаб̣б̣ам̣.
Evaṃ pāḷiaṭṭhakathāṭīkāsu ca puṇṇātithiyoge eva vassaṃ upagantabbaṃ, na ekāya tithiyā yutteti vā uttarāsāḷhanakkhattayogeyeva, na sāvaṇanakkhattayogeti vā anāgatameva chāyaṃ gahetvā tathāgatena paññattaṃ viya potthakesu likhitvā kehici ṭhapitattā sakalaṃ vinayapiṭakaṃ apassantā vedasāmayikā taṃ vacanaṃ saddahitvā vassūpagamanakāle puṇṇātithiuttarāsāḷhayogameva gavesantā māsadivasena saha ākaḍḍhitabbakālepi māsamattameva ākaḍḍhanti, māsamattameva ākaḍḍhitabbakālepi saha divasena ākaḍḍhanti, tasmā evaṃvādino bhikkhū ‘‘apaññattaṃ tathāgatena paññattaṃ tathāgatenāti dīpetī’’ti vattabbataṃ āpajjanti, tasmā bhagavati gāravasahitā lajjino paṇḍitā evaṃ na gaṇhantīti. Tithinakkhattayogo pana uposathadivaseyeva bahudhā piṭakattaye āgato, porāṇavedaganthesu ca pasaṃsito, kadāci pana vohārakālo tithiyā nakkhattena ca visamo hoti, tasmā taṃ sametuṃ adhimāsapatanakāle māsampi divasampi ākaḍḍhanti, tasmā aññasmiṃ kāle visamepi ākaḍḍhanakāle samāpetabbaṃ. Evaṃ sati māsautusaṃvaccharānaṃ samabhāvo hotīti daṭṭhabbaṃ.
бан̃жамачадтаваад̣̇зсу ад̇химаасод̇и адтаарасавассад̇о ад̇хигамаасам̣ г̇ахзд̇ваа вуд̇д̇о, д̇асмаа ‘‘ад̇хиго маасо ад̇химаасо’’д̇и гаммад̇хаараяасамаасад̇д̇аа буллин̇г̇ам̣ гад̇ваа вуд̇д̇о. буб̣б̣з бана маасабун̃ж̇ад̇о ад̇хигагхадияо г̇ахзд̇ваа вуд̇д̇о, д̇асмаа ‘‘маасад̇о ад̇хигам̣ ад̇химааса’’нд̇и аб̣яаяийбхаавасамаасад̇д̇аа набум̣сагалин̇г̇ам̣ гад̇ваа вуд̇д̇ам̣. ид̇ха бана ‘‘бораан̣агад̇т̇зраа згуунавийсад̇ивассам̣ сааман̣зрам̣ нигкаманийяабун̣н̣амаасим̣ ад̇иггамма баадибад̣̇ад̣̇ивасз убасамбаад̣̇знд̇и, д̇ам̣ гасмаад̇и? вужжад̇з – згасмим̣ вассз ча жаад̇уд̣̇д̣̇асигаубосат̇ад̣̇ивасаа хонд̇и, ид̇и вийсад̇ияаа вассзсу жад̇д̇ааро маасаа барихааяанд̇и, рааж̇аано д̇ад̇ияз д̇ад̇ияз вассз вассам̣ убагад̣дханд̇и, ид̇и адтаарасасу вассзсу ча маасаа вад̣дханд̇и, д̇ад̇о убосат̇авасзна барихийнз жад̇д̇ааро маасз абанзд̇ваа д̣̇вз маасаа авасзсаа хонд̇и, д̇з д̣̇вз маасз г̇ахзд̇ваа вийсад̇и вассаани барибун̣н̣аани хонд̇ийд̇и нигган̇каа худ̇ваа нигкаманийяабун̣н̣амаасим̣ ад̇иггамма баадибад̣̇з убасамбаад̣̇знд̇ий’’д̇и адтагат̇ааважанз (баажи. адта. 404) ‘‘нигган̇каа худ̇ваад̇и ад̇хигамаасзхи сад̣̇д̇хим̣ барибун̣н̣авийсад̇ивассад̇д̇аа ниб̣б̣змад̇игаа худ̇ваа’’д̇и ад̇т̇о саарад̇т̇ад̣̇ийбанияам̣ (саарад̇т̇а. дий. баажид̇д̇ияа 3.404) вуд̇д̇о.
Pañcamachaṭṭhavādesu adhimāsoti aṭṭhārasavassato adhikamāsaṃ gahetvā vutto, tasmā ‘‘adhiko māso adhimāso’’ti kammadhārayasamāsattā pulliṅgaṃ katvā vutto. Pubbe pana māsapuñjato adhikaghaṭiyo gahetvā vutto, tasmā ‘‘māsato adhikaṃ adhimāsa’’nti abyayībhāvasamāsattā napuṃsakaliṅgaṃ katvā vuttaṃ. Idha pana ‘‘porāṇakattherā ekūnavīsativassaṃ sāmaṇeraṃ nikkhamanīyapuṇṇamāsiṃ atikkamma pāṭipadadivase upasampādenti, taṃ kasmāti? Vuccate – ekasmiṃ vasse cha cātuddasikauposathadivasā honti, iti vīsatiyā vassesu cattāro māsā parihāyanti, rājāno tatiye tatiye vasse vassaṃ upakaḍḍhanti, iti aṭṭhārasasu vassesu cha māsā vaḍḍhanti, tato uposathavasena parihīne cattāro māse apanetvā dve māsā avasesā honti, te dve māse gahetvā vīsati vassāni paripuṇṇāni hontīti nikkaṅkhā hutvā nikkhamanīyapuṇṇamāsiṃ atikkamma pāṭipade upasampādentī’’ti aṭṭhakathāvacane (pāci. aṭṭha. 404) ‘‘nikkaṅkhā hutvāti adhikamāsehi saddhiṃ paripuṇṇavīsativassattā nibbematikā hutvā’’ti attho sāratthadīpaniyaṃ (sārattha. ṭī. pācittiya 3.404) vutto.
д̇ад̇ра нану жа ‘‘д̇ийсуби г̇ан̣тибад̣̇зсу адтаарасаннам̣…бз… вуд̇д̇а’’нд̇и вуд̇д̇ам̣, д̇ам̣ гат̇анд̇и жод̣̇анам̣ санд̇хааяа ‘‘яам̣ бана вуд̇д̇ам̣…бз… д̇ам̣ на г̇ахзд̇аб̣б̣а’’нд̇и гин̃жааби вуд̇д̇ам̣, д̇ат̇ааби д̇ам̣ г̇ан̣тибад̣̇зсу вуд̇д̇аважанам̣ на г̇ахзд̇аб̣б̣анд̇и ад̇т̇о, гасмаа на г̇ахзд̇аб̣б̣анд̇и ааха ‘‘на хий’’д̇иаад̣̇и. хи яасмаа на убалаб̣бханд̇и, д̇асмаа на г̇ахзд̇аб̣б̣анд̇и яож̇анаа. гат̇ам̣ вин̃н̃ааяад̇ийд̇и ааха ‘‘д̇ад̇ияз’’д̇иаад̣̇и. барижжад̇д̇зязва самбхавад̇о, абарижжад̇д̇з асамбхавад̇о на убалаб̣бханд̇ийд̇и б̣яад̇ирзгавасзна хзд̇упалаяож̇анаа. д̇асмаад̇иаад̣̇и лад̣̇д̇хаг̇ун̣ам̣.
Tatra nanu ca ‘‘tīsupi gaṇṭhipadesu aṭṭhārasannaṃ…pe… vutta’’nti vuttaṃ, taṃ kathanti codanaṃ sandhāya ‘‘yaṃ pana vuttaṃ…pe… taṃ na gahetabba’’nti kiñcāpi vuttaṃ, tathāpi taṃ gaṇṭhipadesu vuttavacanaṃ na gahetabbanti attho, kasmā na gahetabbanti āha ‘‘na hī’’tiādi. Hi yasmā na upalabbhanti, tasmā na gahetabbanti yojanā. Kathaṃ viññāyatīti āha ‘‘tatiye’’tiādi. Pariccatteyeva sambhavato, apariccatte asambhavato na upalabbhantīti byatirekavasena hetuphalayojanā. Tasmātiādi laddhaguṇaṃ.
важ̇ираб̣уд̣̇д̇хидийгааяам̣ бана г̇ан̣тибад̣̇зсу вуд̇д̇амзва г̇ахзд̇ваа вад̣̇ад̇и. зд̇аани важанаани сааман̣зраанам̣ вийсад̇ивассабарибун̣н̣абхаавасаад̇хагааниязва хонд̇и, на ад̇химаасабад̇анаваарзсу сад̣̇ивасамаасаагад̣дханабхаавасаад̇хагаани, д̇асмаа имаани аахарид̇ваа д̇ам̣ ад̇хигаран̣ам̣ винижчид̇ум̣ на саггонд̇и. бхигкуу бана б̣ахуунам̣ саннибаад̇з гин̃жи баатам̣ аахарид̇ваа гат̇зд̇ум̣ самад̇т̇о собхад̇ийд̇и гад̇ваа ийд̣̇исам̣ баатам̣ аахаранд̇и. суд̇асаннижаяабан̣д̣ид̇аа бана ижчид̇ад̇т̇асса асаад̇хагад̇д̇аа зваруубам̣ на аахаранд̇и. суд̣̇д̇хавзд̣̇игаанамби важанз винаяад̇хараа винаяамзва ж̇аананд̇и, на б̣аахирасамаяам̣. аяам̣ бана гат̇аа б̣аахирасамаяз бавад̇д̇аа, д̇асмаа винаяад̇хараанам̣ ависаяод̇и ман̃н̃анд̇аа вад̣̇анд̇и.
Vajirabuddhiṭīkāyaṃ pana gaṇṭhipadesu vuttameva gahetvā vadati. Etāni vacanāni sāmaṇerānaṃ vīsativassaparipuṇṇabhāvasādhakāniyeva honti, na adhimāsapatanavāresu sadivasamāsākaḍḍhanabhāvasādhakāni, tasmā imāni āharitvā taṃ adhikaraṇaṃ vinicchituṃ na sakkonti. Bhikkhū pana bahūnaṃ sannipāte kiñci pāṭhaṃ āharitvā kathetuṃ samattho sobhatīti katvā īdisaṃ pāṭhaṃ āharanti. Sutasannicayapaṇḍitā pana icchitatthassa asādhakattā evarūpaṃ na āharanti. Suddhavedikānampi vacane vinayadharā vinayameva jānanti, na bāhirasamayaṃ. Ayaṃ pana kathā bāhirasamaye pavattā, tasmā vinayadharānaṃ avisayoti maññantā vadanti.
винаяад̇хараа бана згажжз винаяамзва ж̇аананд̇и, згажжз сагалам̣ бидагад̇д̇аяам̣ ж̇аананд̇и, згажжз саб̣аахирасамаяам̣ бидагад̇д̇аяам̣ ж̇аананд̇и, д̇асмаа гат̇зд̇ум̣ самад̇т̇абхаавоязва бамаан̣ам̣. взд̣̇игаанамби важанам̣ взд̣̇аббагаран̣ааг̇ад̇амзва бамаан̣ам̣. на яам̣ гин̃жи хад̇т̇аг̇ад̇аг̇ан̣анамад̇д̇ам̣, д̇асмаа яад̣̇аа бат̇ависсаро рааж̇аа сад̣̇ивасам̣ маасам̣ аагад̣дхид̇угаамо ‘‘ж̇здтамаасагаал̣абагкаубосат̇ам̣ баннарасияам̣ гаронд̇уу’’д̇и яаажиссад̇и, д̇ад̣̇аа ‘‘сагим̣ багкасса жаад̇уд̣̇д̣̇асз ваа баннарасз ваа’’д̇и важанад̇о баннарасияам̣ убосат̇агаран̣з д̣̇осо над̇т̇и, яад̣̇аа суд̣̇д̇хамаасамзва аагад̣дхид̇угаамо ‘‘жаад̇уд̣̇д̣̇асияам̣ гаронд̇уу’’д̇и яаажиссад̇и, звам̣ сад̇и багад̇ияааби ж̇здтамаасагаал̣абагкубосат̇о жаад̇уд̣̇д̣̇асоязваад̇и гад̇ваа д̣̇осо над̇т̇и, убхаяат̇ааби убосат̇о сугад̇оязва ход̇и, д̇асмаа анувад̇д̇ид̇аб̣б̣о. д̇ад̇о барам̣ батамаасаал̣хамаасасса ж̇ун̣хабагкзби гаал̣абагкзби д̣̇уд̇ияаасаал̣хамаасасса ж̇ун̣хабагкзби баннарасийубосат̇ам̣ гад̇ваа баадибад̣̇ад̣̇ивасз д̇ит̇ияог̇ам̣ ваа нагкад̇д̇аяог̇ам̣ ваа анологзд̇ваа баад̇о арун̣уг̇г̇аманаананд̇арад̇о бадтааяа яаава буна арун̣уг̇г̇аманаа сагалад̣̇ивасарад̇д̇ияам̣ яат̇ааж̇жхаасаяам̣ вассам̣ убаг̇ажчанд̇о суубаг̇ад̇ова ход̇и, над̇т̇и гожи д̣̇осод̇и д̣̇адтаб̣б̣о. бхавад̇взвам̣, баад̇ова вассам̣ убаг̇ажчанд̇о ад̇т̇ийд̇и? ад̇т̇и. вуд̇д̇ан̃хзд̇ам̣ сзнаасанагканд̇хагаван̣н̣анааяам̣ (жуул̣ава. адта. 318) ‘‘сажз баад̇ова г̇аахид̇з сзнаасанз ан̃н̃о вид̇аггажаариго бхигку ааг̇анд̇ваа сзнаасанам̣ яаажад̇и, ‘г̇ахид̇ам̣, бханд̇з, сзнаасанам̣, вассуубаг̇ад̇о сан̇гхо, раман̣ийяо вихааро, ругкамуулаад̣̇ийсу яад̇т̇а ижчат̇а, д̇ад̇т̇а васат̇аа’д̇и вад̇д̇аб̣б̣о’’д̇и.
Vinayadharā pana ekacce vinayameva jānanti, ekacce sakalaṃ piṭakattayaṃ jānanti, ekacce sabāhirasamayaṃ piṭakattayaṃ jānanti, tasmā kathetuṃ samatthabhāvoyeva pamāṇaṃ. Vedikānampi vacanaṃ vedappakaraṇāgatameva pamāṇaṃ. Na yaṃ kiñci hatthagatagaṇanamattaṃ, tasmā yadā pathavissaro rājā sadivasaṃ māsaṃ ākaḍḍhitukāmo ‘‘jeṭṭhamāsakāḷapakkhauposathaṃ pannarasiyaṃ karontū’’ti yācissati, tadā ‘‘sakiṃ pakkhassa cātuddase vā pannarase vā’’ti vacanato pannarasiyaṃ uposathakaraṇe doso natthi, yadā suddhamāsameva ākaḍḍhitukāmo ‘‘cātuddasiyaṃ karontū’’ti yācissati, evaṃ sati pakatiyāpi jeṭṭhamāsakāḷapakkhuposatho cātuddasoyevāti katvā doso natthi, ubhayathāpi uposatho sukatoyeva hoti, tasmā anuvattitabbo. Tato paraṃ paṭhamāsāḷhamāsassa juṇhapakkhepi kāḷapakkhepi dutiyāsāḷhamāsassa juṇhapakkhepi pannarasīuposathaṃ katvā pāṭipadadivase tithiyogaṃ vā nakkhattayogaṃ vā anoloketvā pāto aruṇuggamanānantarato paṭṭhāya yāva puna aruṇuggamanā sakaladivasarattiyaṃ yathājjhāsayaṃ vassaṃ upagacchanto sūpagatova hoti, natthi koci dosoti daṭṭhabbo. Bhavatvevaṃ, pātova vassaṃ upagacchanto atthīti? Atthi. Vuttañhetaṃ senāsanakkhandhakavaṇṇanāyaṃ (cūḷava. aṭṭha. 318) ‘‘sace pātova gāhite senāsane añño vitakkacāriko bhikkhu āgantvā senāsanaṃ yācati, ‘gahitaṃ, bhante, senāsanaṃ, vassūpagato saṅgho, ramaṇīyo vihāro, rukkhamūlādīsu yattha icchatha, tattha vasathā’ti vattabbo’’ti.
ид̇и винаяасан̇г̇ахасам̣ван̣н̣анаабхууд̇з винаяаалан̇гаарз
Iti vinayasaṅgahasaṃvaṇṇanābhūte vinayālaṅkāre
вассуубанааяигавинижчаяагат̇аалан̇гааро наама
Vassūpanāyikavinicchayakathālaṅkāro nāma
чаб̣б̣ийсад̇имо барижчзд̣̇о.
Chabbīsatimo paricchedo.
батамо бхааг̇о нидтид̇о.
Paṭhamo bhāgo niṭṭhito.
