| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[118] 8. ваддаж̇аад̇агаван̣н̣анаа
[118] 8. Vaṭṭajātakavaṇṇanā
наажинд̇аяанд̇о бурисод̇и ид̣̇ам̣ сад̇т̇аа ж̇зд̇аванз вихаранд̇о уд̇д̇арасздтибуд̇д̇ам̣ аараб̣бха гат̇зси. саавад̇т̇ияам̣ гира уд̇д̇арасздти наама ахоси махаавибхаво. д̇асса бхарияааяа гужчияам̣ зго бун̃н̃аваа сад̇д̇о б̣рахмалогаа жавид̇ваа бадисанд̇хим̣ г̇ахзд̇ваа ваяаббад̇д̇о абхируубо баасаад̣̇иго ахоси б̣рахмаван̣н̣ий. ат̇а згад̣̇ивасам̣ саавад̇т̇ияам̣ гад̇д̇игачан̣з нагкад̇д̇з гхудтз саб̣б̣о лого нагкад̇д̇аниссид̇о ахоси. д̇асса сахааяагаа ан̃н̃з сздтибуд̇д̇аа сабаж̇аабад̇игаа ахзсум̣. уд̇д̇арасздтибуд̇д̇асса бана д̣̇ийгхарад̇д̇ам̣ б̣рахмалогз васид̇ад̇д̇аа гилзсзсу жид̇д̇ам̣ на аллийяад̇и. ат̇асса сахааяагаа ‘‘уд̇д̇арасздтибуд̇д̇ассаби згам̣ ид̇т̇им̣ аанзд̇ваа нагкад̇д̇ам̣ гийл̣иссаамаа’’д̇и самманд̇аяид̇ваа д̇ам̣ убасан̇гамид̇ваа ‘‘самма, имасмим̣ наг̇арз гад̇д̇игачан̣о гхудто, д̇уяхамби згам̣ ид̇т̇им̣ аанзд̇ваа нагкад̇д̇ам̣ гийл̣иссаамаа’’д̇и аахам̣су. ‘‘на мз ад̇т̇о ид̇т̇ияаа’’д̇и жа вуд̇д̇зби бунаббунам̣ ниб̣анд̇хид̇ваа самбадижчаабзд̇ваа згам̣ ван̣н̣ад̣̇аасим̣ саб̣б̣аалан̇гаарабадиман̣д̣ид̇ам̣ гад̇ваа д̇асса гхарам̣ нзд̇ваа ‘‘д̇вам̣ сздтибуд̇д̇асса санд̇игам̣ г̇ажчаа’’д̇и саяанигхарам̣ бзсзд̇ваа нигкамим̣су. д̇ам̣ саяанигхарам̣ бавидтамби сздтибуд̇д̇о нзва ологзд̇и, наалабад̇и. саа жинд̇зси ‘‘аяам̣ звам̣ руубасобхаг̇г̇аббад̇д̇ам̣ уд̇д̇амавилаасасамбаннам̣ мам̣ нзва ологзд̇и, наалабад̇и, ид̣̇аани нам̣ ад̇д̇ано ид̇т̇игуд̇д̇алийлааяа ологаабзссаамий’’д̇и ид̇т̇илийлам̣ д̣̇ассзнд̇ий бахадтаагаарзна аг̇г̇ад̣̇анд̇з виварид̇ваа хасид̇ам̣ агааси. сздтибуд̇д̇о ологзд̇ваа д̣̇анд̇адтигз нимид̇д̇ам̣ г̇ан̣хи. ат̇асса адтигасан̃н̃аа уббаж̇ж̇и, сагаламби д̇ам̣ сарийрам̣ адтигасан̇калигаа вияа бан̃н̃ааяи. со д̇ассаа бариб̣б̣аяам̣ д̣̇ад̇ваа ‘‘г̇ажчаа’’д̇и уяяож̇зси.
Nācintayantopurisoti idaṃ satthā jetavane viharanto uttaraseṭṭhiputtaṃ ārabbha kathesi. Sāvatthiyaṃ kira uttaraseṭṭhi nāma ahosi mahāvibhavo. Tassa bhariyāya kucchiyaṃ eko puññavā satto brahmalokā cavitvā paṭisandhiṃ gahetvā vayappatto abhirūpo pāsādiko ahosi brahmavaṇṇī. Atha ekadivasaṃ sāvatthiyaṃ kattikachaṇe nakkhatte ghuṭṭhe sabbo loko nakkhattanissito ahosi. Tassa sahāyakā aññe seṭṭhiputtā sapajāpatikā ahesuṃ. Uttaraseṭṭhiputtassa pana dīgharattaṃ brahmaloke vasitattā kilesesu cittaṃ na allīyati. Athassa sahāyakā ‘‘uttaraseṭṭhiputtassapi ekaṃ itthiṃ ānetvā nakkhattaṃ kīḷissāmā’’ti sammantayitvā taṃ upasaṅkamitvā ‘‘samma, imasmiṃ nagare kattikachaṇo ghuṭṭho, tuyhampi ekaṃ itthiṃ ānetvā nakkhattaṃ kīḷissāmā’’ti āhaṃsu. ‘‘Na me attho itthiyā’’ti ca vuttepi punappunaṃ nibandhitvā sampaṭicchāpetvā ekaṃ vaṇṇadāsiṃ sabbālaṅkārapaṭimaṇḍitaṃ katvā tassa gharaṃ netvā ‘‘tvaṃ seṭṭhiputtassa santikaṃ gacchā’’ti sayanigharaṃ pesetvā nikkhamiṃsu. Taṃ sayanigharaṃ paviṭṭhampi seṭṭhiputto neva oloketi, nālapati. Sā cintesi ‘‘ayaṃ evaṃ rūpasobhaggappattaṃ uttamavilāsasampannaṃ maṃ neva oloketi, nālapati, idāni naṃ attano itthikuttalīlāya olokāpessāmī’’ti itthilīlaṃ dassentī pahaṭṭhākārena aggadante vivaritvā hasitaṃ akāsi. Seṭṭhiputto oloketvā dantaṭṭhike nimittaṃ gaṇhi. Athassa aṭṭhikasaññā uppajji, sakalampi taṃ sarīraṃ aṭṭhikasaṅkhalikā viya paññāyi. So tassā paribbayaṃ datvā ‘‘gacchā’’ti uyyojesi.
д̇ам̣ д̇асса гхараа од̇ин̣н̣ам̣ зго иссаро анд̇аравийт̇ияам̣ д̣̇исваа бариб̣б̣аяам̣ д̣̇ад̇ваа ад̇д̇ано гхарам̣ нзси, сад̇д̇аахз вийд̇ивад̇д̇з нагкад̇д̇ам̣ осид̇ам̣. ван̣н̣ад̣̇аасияаа маад̇аа д̇хийд̇у ааг̇аманам̣ ад̣̇исваа сздтибуд̇д̇аанам̣ санд̇игам̣ г̇анд̇ваа ‘‘гахам̣ саа’’д̇и бужчи. д̇з уд̇д̇арасздтибуд̇д̇асса гхарам̣ г̇анд̇ваа ‘‘гахам̣ саа’’д̇и бужчим̣су. ‘‘д̇ан̇кан̣ан̃н̃зва д̇ассаа бариб̣б̣аяам̣ д̣̇ад̇ваа уяяож̇зси’’нд̇и. ат̇ассаа маад̇аа род̣̇анд̇ий ‘‘д̇хийд̇арам̣ мз на бассаами, д̇хийд̇арам̣ мз самаанзт̇аа’’д̇и уд̇д̇арасздтибуд̇д̇ам̣ аад̣̇ааяа ран̃н̃о санд̇игам̣ аг̇амааси. рааж̇аа аддам̣ винижчинанд̇о ‘‘имз д̇з сздтибуд̇д̇аа ван̣н̣ад̣̇аасим̣ аанзд̇ваа д̇уяхам̣ ад̣̇ам̣суу’’д̇и бужчи. ‘‘аама, д̣̇зваа’’д̇и. ‘‘ид̣̇аани саа гаха’’нд̇и? ‘‘на ж̇аанаами, д̇ан̇кан̣ан̃н̃зва нам̣ уяяож̇зси’’нд̇и. ‘‘ид̣̇аани д̇ам̣ самаанзд̇ум̣ саггосий’’д̇и? ‘‘на саггоми, д̣̇зваа’’д̇и. рааж̇аа ‘‘сажз самаанзд̇ум̣ на саггод̇и, рааж̇аан̣амасса гарот̇аа’’д̇и ааха. ат̇а нам̣ бажчааб̣аахам̣ б̣анд̇хид̇ваа ‘‘рааж̇аан̣ам̣ гариссаамаа’’д̇и г̇ахзд̇ваа баггамим̣су. ‘‘сздтибуд̇д̇ам̣ гира ван̣н̣ад̣̇аасим̣ самаанзд̇ум̣ асаггонд̇ам̣ рааж̇аа рааж̇аан̣ам̣ гаарзд̇ий’’д̇и сагаланаг̇арам̣ згаголаахалам̣ ахоси. махааж̇ано урз хад̇т̇з табзд̇ваа ‘‘гим̣ наамзд̇ам̣, саами, ад̇д̇ано д̇з ананужчавигам̣ лад̣̇д̇ха’’нд̇и барид̣̇звад̇и. сздтиби буд̇д̇асса бажчад̇о бажчад̇о барид̣̇званд̇о г̇ажчад̇и.
Taṃ tassa gharā otiṇṇaṃ eko issaro antaravīthiyaṃ disvā paribbayaṃ datvā attano gharaṃ nesi, sattāhe vītivatte nakkhattaṃ ositaṃ. Vaṇṇadāsiyā mātā dhītu āgamanaṃ adisvā seṭṭhiputtānaṃ santikaṃ gantvā ‘‘kahaṃ sā’’ti pucchi. Te uttaraseṭṭhiputtassa gharaṃ gantvā ‘‘kahaṃ sā’’ti pucchiṃsu. ‘‘Taṅkhaṇaññeva tassā paribbayaṃ datvā uyyojesi’’nti. Athassā mātā rodantī ‘‘dhītaraṃ me na passāmi, dhītaraṃ me samānethā’’ti uttaraseṭṭhiputtaṃ ādāya rañño santikaṃ agamāsi. Rājā aṭṭaṃ vinicchinanto ‘‘ime te seṭṭhiputtā vaṇṇadāsiṃ ānetvā tuyhaṃ adaṃsū’’ti pucchi. ‘‘Āma, devā’’ti. ‘‘Idāni sā kaha’’nti? ‘‘Na jānāmi, taṅkhaṇaññeva naṃ uyyojesi’’nti. ‘‘Idāni taṃ samānetuṃ sakkosī’’ti? ‘‘Na sakkomi, devā’’ti. Rājā ‘‘sace samānetuṃ na sakkoti, rājāṇamassa karothā’’ti āha. Atha naṃ pacchābāhaṃ bandhitvā ‘‘rājāṇaṃ karissāmā’’ti gahetvā pakkamiṃsu. ‘‘Seṭṭhiputtaṃ kira vaṇṇadāsiṃ samānetuṃ asakkontaṃ rājā rājāṇaṃ kāretī’’ti sakalanagaraṃ ekakolāhalaṃ ahosi. Mahājano ure hatthe ṭhapetvā ‘‘kiṃ nāmetaṃ, sāmi, attano te ananucchavikaṃ laddha’’nti paridevati. Seṭṭhipi puttassa pacchato pacchato paridevanto gacchati.
сздтибуд̇д̇о жинд̇зси ‘‘ид̣̇ам̣ маяхам̣ зваруубам̣ д̣̇угкам̣ аг̇аарз васанабхаавзна уббаннам̣. сажз ид̇о мужжиссаами, махааг̇од̇амасаммаасамб̣уд̣̇д̇хасса санд̇игз баб̣б̣аж̇иссаамий’’д̇и. сааби ко ван̣н̣ад̣̇аасий д̇ам̣ голаахаласад̣̇д̣̇ам̣ суд̇ваа ‘‘гим̣сад̣̇д̣̇о наамзсо’’д̇и бужчид̇ваа д̇ам̣ бавад̇д̇им̣ суд̇ваа взг̇зна од̇арид̇ваа ‘‘уссарат̇а, уссарат̇а, саамий, мам̣ рааж̇абурисаанам̣ д̣̇адтум̣ д̣̇зт̇аа’’д̇и ад̇д̇аанам̣ д̣̇ассзси. рааж̇абурисаа д̇ам̣ д̣̇исваа маад̇арам̣ бадижчаабзд̇ваа сздтибуд̇д̇ам̣ мун̃жид̇ваа баггамим̣су. со сахааяагабаривуд̇ова над̣̇им̣ г̇анд̇ваа сасийсам̣ нхааяид̇ваа г̇зхам̣ г̇анд̇ваа бхуд̇д̇абаад̇араасо маад̇аабид̇аро ванд̣̇ид̇ваа баб̣б̣аж̇ж̇ам̣ ануж̇аанаабзд̇ваа жийварасаадагз аад̣̇ааяа маханд̇зна бариваарзна сад̇т̇у санд̇игам̣ г̇анд̇ваа ванд̣̇ид̇ваа баб̣б̣аж̇ж̇ам̣ яаажид̇ваа баб̣б̣аж̇ж̇ан̃жа убасамбад̣̇ан̃жа лабхид̇ваа ависсадтагаммадтаано вибассанам̣ вад̣дхзд̇ваа на жирассзва арахад̇д̇з бад̇идтааси.
Seṭṭhiputto cintesi ‘‘idaṃ mayhaṃ evarūpaṃ dukkhaṃ agāre vasanabhāvena uppannaṃ. Sace ito muccissāmi, mahāgotamasammāsambuddhassa santike pabbajissāmī’’ti. Sāpi kho vaṇṇadāsī taṃ kolāhalasaddaṃ sutvā ‘‘kiṃsaddo nāmeso’’ti pucchitvā taṃ pavattiṃ sutvā vegena otaritvā ‘‘ussaratha, ussaratha, sāmī, maṃ rājapurisānaṃ daṭṭhuṃ dethā’’ti attānaṃ dassesi. Rājapurisā taṃ disvā mātaraṃ paṭicchāpetvā seṭṭhiputtaṃ muñcitvā pakkamiṃsu. So sahāyakaparivutova nadiṃ gantvā sasīsaṃ nhāyitvā gehaṃ gantvā bhuttapātarāso mātāpitaro vanditvā pabbajjaṃ anujānāpetvā cīvarasāṭake ādāya mahantena parivārena satthu santikaṃ gantvā vanditvā pabbajjaṃ yācitvā pabbajjañca upasampadañca labhitvā avissaṭṭhakammaṭṭhāno vipassanaṃ vaḍḍhetvā na cirasseva arahatte patiṭṭhāsi.
ат̇згад̣̇ивасам̣ д̇хаммасабхааяам̣ саннибад̇ид̇аа бхигкуу ‘‘аавусо, уд̇д̇арасздтибуд̇д̇о ад̇д̇ано бхаяз уббаннз саасанасса г̇ун̣ам̣ ж̇аанид̇ваа ‘имамхаа д̣̇угкаа мужжамаано баб̣б̣аж̇иссаамий’д̇и жинд̇зд̇ваа д̇зна сужинд̇ид̇зна маран̣амуд̇д̇о жзва, баб̣б̣аж̇ид̇о жа аг̇г̇апалз бад̇идтид̇о’’д̇и д̇асса г̇ун̣агат̇ам̣ гат̇зсум̣. сад̇т̇аа ааг̇анд̇ваа ‘‘гааяа нуд̇т̇а, бхигкавз, зд̇арахи гат̇ааяа саннисиннаа’’д̇и бужчид̇ваа ‘‘имааяа наамаа’’д̇и вуд̇д̇з ‘‘на, бхигкавз, уд̇д̇арасздтибуд̇д̇ова ад̇д̇ано бхаяз уббаннз ‘иминаа убааязна имамхаа д̣̇угкаа мужжиссаамий’д̇и жинд̇зд̇ваа маран̣абхаяаа муд̇д̇о, ад̇ийд̇з бан̣д̣ид̇ааби ад̇д̇ано бхаяз уббаннз ‘иминаа убааязна имамхаа д̣̇угкаа мужжиссаамаа’д̇и жинд̇зд̇ваа маран̣абхаяад̇о мужжим̣суязваа’’д̇и вад̇ваа ад̇ийд̇ам̣ аахари.
Athekadivasaṃ dhammasabhāyaṃ sannipatitā bhikkhū ‘‘āvuso, uttaraseṭṭhiputto attano bhaye uppanne sāsanassa guṇaṃ jānitvā ‘imamhā dukkhā muccamāno pabbajissāmī’ti cintetvā tena sucintitena maraṇamutto ceva, pabbajito ca aggaphale patiṭṭhito’’ti tassa guṇakathaṃ kathesuṃ. Satthā āgantvā ‘‘kāya nuttha, bhikkhave, etarahi kathāya sannisinnā’’ti pucchitvā ‘‘imāya nāmā’’ti vutte ‘‘na, bhikkhave, uttaraseṭṭhiputtova attano bhaye uppanne ‘iminā upāyena imamhā dukkhā muccissāmī’ti cintetvā maraṇabhayā mutto, atīte paṇḍitāpi attano bhaye uppanne ‘iminā upāyena imamhā dukkhā muccissāmā’ti cintetvā maraṇabhayato mucciṃsuyevā’’ti vatvā atītaṃ āhari.
ад̇ийд̇з б̣аараан̣асияам̣ б̣рахмад̣̇ад̇д̇з раж̇ж̇ам̣ гаарзнд̇з б̣од̇хисад̇д̇о жуд̇ибадисанд̇хивасзна баривад̇д̇анд̇о ваддагаяонияам̣ ниб̣б̣ад̇д̇и. д̇ад̣̇аа зго ваддагалуд̣̇д̣̇аго аран̃н̃аа б̣ахуу ваддагз аахарид̇ваа г̇зхз табзд̇ваа г̇ожарам̣ д̣̇ад̇ваа муулам̣ г̇ахзд̇ваа ааг̇ад̇ааг̇ад̇аанам̣ хад̇т̇з ваддагз виггин̣анд̇о ж̇ийвигам̣ габбзд̇и. со згад̣̇ивасам̣ б̣ахуухи ваддагзхи сад̣̇д̇хим̣ б̣од̇хисад̇д̇амби г̇ахзд̇ваа аанзси. б̣од̇хисад̇д̇о жинд̇зси ‘‘сажаахам̣ иминаа д̣̇иннам̣ г̇ожаран̃жа баанийяан̃жа барибхун̃ж̇иссаами, аяам̣ мам̣ г̇ахзд̇ваа ааг̇ад̇аанам̣ мануссаанам̣ д̣̇ассад̇и. сажз бана на барибхун̃ж̇иссаами, ахам̣ милааяиссаами, ат̇а мам̣ милааяанд̇ам̣ д̣̇исваа мануссаа на г̇ан̣хиссанд̇и. звам̣ мз сод̇т̇и бхависсад̇и, имам̣ убааяам̣ гариссаамий’’д̇и. со д̇ат̇аа гаронд̇о милааяид̇ваа адтижаммамад̇д̇о ахоси. мануссаа д̇ам̣ д̣̇исваа на г̇ан̣хим̣су. луд̣̇д̣̇аго б̣од̇хисад̇д̇ам̣ табзд̇ваа сзсзсу ваддагзсу баригкийн̣зсу бажчим̣ нийхарид̇ваа д̣̇ваарз табзд̇ваа б̣од̇хисад̇д̇ам̣ хад̇т̇ад̇алз гад̇ваа ‘‘гим̣ ну ко аяам̣ ваддаго’’д̇и жинд̇зд̇ваа ологзд̇ум̣ аарад̣̇д̇хо. ат̇асса бамад̇д̇абхаавам̣ н̃ад̇ваа б̣од̇хисад̇д̇о багкз басаарзд̇ваа уббад̇ид̇ваа аран̃н̃амзва г̇ад̇о. ан̃н̃з ваддагаа д̇ам̣ д̣̇исваа ‘‘гим̣ ну ко на бан̃н̃ааяаси, гахам̣ г̇ад̇осий’’д̇и бужчид̇ваа ‘‘луд̣̇д̣̇агзна г̇ахид̇омхий’’д̇и вуд̇д̇з ‘‘гинд̇и гад̇ваа муд̇д̇осий’’д̇и бужчим̣су. б̣од̇хисад̇д̇о ‘‘ахам̣ д̇зна д̣̇иннам̣ г̇ожарам̣ аг̇г̇ахзд̇ваа баанийяам̣ абивид̇ваа убааяажинд̇ааяа муд̇д̇о’’д̇и вад̇ваа имам̣ г̇аат̇амааха –
Atīte bārāṇasiyaṃ brahmadatte rajjaṃ kārente bodhisatto cutipaṭisandhivasena parivattanto vaṭṭakayoniyaṃ nibbatti. Tadā eko vaṭṭakaluddako araññā bahū vaṭṭake āharitvā gehe ṭhapetvā gocaraṃ datvā mūlaṃ gahetvā āgatāgatānaṃ hatthe vaṭṭake vikkiṇanto jīvikaṃ kappeti. So ekadivasaṃ bahūhi vaṭṭakehi saddhiṃ bodhisattampi gahetvā ānesi. Bodhisatto cintesi ‘‘sacāhaṃ iminā dinnaṃ gocarañca pānīyañca paribhuñjissāmi, ayaṃ maṃ gahetvā āgatānaṃ manussānaṃ dassati. Sace pana na paribhuñjissāmi, ahaṃ milāyissāmi, atha maṃ milāyantaṃ disvā manussā na gaṇhissanti. Evaṃ me sotthi bhavissati, imaṃ upāyaṃ karissāmī’’ti. So tathā karonto milāyitvā aṭṭhicammamatto ahosi. Manussā taṃ disvā na gaṇhiṃsu. Luddako bodhisattaṃ ṭhapetvā sesesu vaṭṭakesu parikkhīṇesu pacchiṃ nīharitvā dvāre ṭhapetvā bodhisattaṃ hatthatale katvā ‘‘kiṃ nu kho ayaṃ vaṭṭako’’ti cintetvā oloketuṃ āraddho. Athassa pamattabhāvaṃ ñatvā bodhisatto pakkhe pasāretvā uppatitvā araññameva gato. Aññe vaṭṭakā taṃ disvā ‘‘kiṃ nu kho na paññāyasi, kahaṃ gatosī’’ti pucchitvā ‘‘luddakena gahitomhī’’ti vutte ‘‘kinti katvā muttosī’’ti pucchiṃsu. Bodhisatto ‘‘ahaṃ tena dinnaṃ gocaraṃ aggahetvā pānīyaṃ apivitvā upāyacintāya mutto’’ti vatvā imaṃ gāthamāha –
118.
118.
‘‘наажинд̇аяанд̇о бурисо, висзсамад̇хиг̇ажчад̇и;
‘‘Nācintayanto puriso, visesamadhigacchati;
жинд̇ид̇асса палам̣ басса, муд̇д̇осми вад̇хаб̣анд̇ханаа’’д̇и.
Cintitassa phalaṃ passa, muttosmi vadhabandhanā’’ti.
д̇ад̇т̇ааяам̣ бин̣д̣ад̇т̇о – бурисо д̣̇угкам̣ бад̇ваа ‘‘иминаа наама убааязна имамхаа д̣̇угкаа мужжиссаамий’’д̇и ажинд̇аяанд̇о ад̇д̇ано д̣̇угкаа могкасан̇каад̇ам̣ висзсам̣ наад̇хиг̇ажчад̇и. ид̣̇аани бана маяаа жинд̇ид̇агаммасса палам̣ басса. д̇знзва убааязна муд̇д̇осми вад̇хаб̣анд̇ханаа, маран̣ад̇о жа б̣анд̇ханад̇о жа муд̇д̇осми аханд̇и. звам̣ б̣од̇хисад̇д̇о ад̇д̇анаа гад̇агааран̣ам̣ аажигки.
Tatthāyaṃ piṇḍattho – puriso dukkhaṃ patvā ‘‘iminā nāma upāyena imamhā dukkhā muccissāmī’’ti acintayanto attano dukkhā mokkhasaṅkhātaṃ visesaṃ nādhigacchati. Idāni pana mayā cintitakammassa phalaṃ passa. Teneva upāyena muttosmi vadhabandhanā, maraṇato ca bandhanato ca muttosmi ahanti. Evaṃ bodhisatto attanā katakāraṇaṃ ācikkhi.
сад̇т̇аа имам̣ д̇хаммад̣̇зсанам̣ аахарид̇ваа ж̇аад̇агам̣ самод̇хаанзси – ‘‘д̇ад̣̇аа маран̣амуд̇д̇о ваддаго ахамзва ахоси’’нд̇и.
Satthā imaṃ dhammadesanaṃ āharitvā jātakaṃ samodhānesi – ‘‘tadā maraṇamutto vaṭṭako ahameva ahosi’’nti.
ваддаж̇аад̇агаван̣н̣анаа адтамаа.
Vaṭṭajātakavaṇṇanā aṭṭhamā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 118. ваддагаж̇аад̇агам̣ • 118. Vaṭṭakajātakaṃ
