| Library / Tipiṭaka / ཏིཔིཊཀ • Tipiṭaka / ཁུདྡསིཀྑཱ-མཱུལསིཀྑཱ • Khuddasikkhā-mūlasikkhā |
༣༠. ཝཏྟནིདྡེསཝཎྞནཱ
30. Vattaniddesavaṇṇanā
༢༡༣. ཨིདཱནི ཨཱགནྟུཀཝཏྟཱདཱིནི དསྶེཏུཾ ‘‘ཝཏྟ’’ནྟི མཱཏིཀཱཔདཾ ཨུདྡྷཊཾ། པརིཀྑིཏྟསྶ (ཙཱུལ༹ཝ॰ ༣༥༦ ཨཱདཡོ; ཙཱུལ༹ཝ॰ ཨཊྛ॰ ༣༥༧ ཨཱདཡོ) ཝིཧཱརསྶ པརིཀྑེཔཾ, ཨཔརིཀྑིཏྟསྶ དྭཱིཧི ལེཌྜུཔཱཏེཧི པརིཙྪིནྣཊྛཱནཾ པཏྭཱ ཨུཔཱཧནཾ ཨོམུཉྩིཏྭཱ ནཱིཙཾ ཀཏྭཱ པཔྥོཊེཏྭཱ ཨུཔཱཧནཾ དཎྜཀེན གཧེཏྭཱ ཚཏྟཾ ཨཔནཱམེཏྭཱ སཱིསཾ ཝིཝརིཏྭཱ སཱིསེ ཙཱིཝརཾ ཁནྡྷེ ཀརིཏྭཱ སཱདྷུཀཾ ཨཏརམཱནེན ཨཱརཱམོ པཝིསིཏབྦོཏི ཨཏྠོ།
213. Idāni āgantukavattādīni dassetuṃ ‘‘vatta’’nti mātikāpadaṃ uddhaṭaṃ. Parikkhittassa (cūḷava. 356 ādayo; cūḷava. aṭṭha. 357 ādayo) vihārassa parikkhepaṃ, aparikkhittassa dvīhi leḍḍupātehi paricchinnaṭṭhānaṃ patvā upāhanaṃ omuñcitvā nīcaṃ katvā papphoṭetvā upāhanaṃ daṇḍakena gahetvā chattaṃ apanāmetvā sīsaṃ vivaritvā sīse cīvaraṃ khandhe karitvā sādhukaṃ ataramānena ārāmo pavisitabboti attho.
༢༡༤. པུཙྪེཡྻ སཡནཱསནནྟི ‘‘ཀཏམཾ མེ སེནཱསནཾ པཱཔུཎཱཏི, ཀིཾ ཨཛ྄ཛྷཱཝུཏྠཾ ཝཱ ཨནཛ྄ཛྷཱཝུཏྠཾ ཝཱ’’ཏི ཨེཝཾ པུཙྪིཏབྦནྟི ཨཏྠོ།
214.Puccheyyasayanāsananti ‘‘katamaṃ me senāsanaṃ pāpuṇāti, kiṃ ajjhāvutthaṃ vā anajjhāvutthaṃ vā’’ti evaṃ pucchitabbanti attho.
༢༡༥-༦. མཉྩཔཱིཋཱདིདཱརུབྷཎྜཉྩ (ཙཱུལ༹ཝ॰ ༣༦༠; ཙཱུལ༹ཝ॰ ཨཊྛ॰ ༣༦༠) རཛནབྷཱཛནཱདིམཏྟིཀཱབྷཎྜཉྩ། ཨཱཔུཙྪཱཏི བྷིཀྑུསྶ ཝཱ སཱམཎེརསྶ ཝཱ ཨཱརཱམིཀསྶ ཝཱ ‘‘ཨཱཝུསོ ཨིམཾ ཛགྒཱཧཱི’’ཏི ཨཱརོཙེཏྭཱཏི ཨཏྠོ། ཨཉྙཐཱཏི ཨེཝཾ ཨཀཏྭཱཏི ཨཏྠོ།
215-6. Mañcapīṭhādidārubhaṇḍañca (cūḷava. 360; cūḷava. aṭṭha. 360) rajanabhājanādimattikābhaṇḍañca. Āpucchāti bhikkhussa vā sāmaṇerassa vā ārāmikassa vā ‘‘āvuso imaṃ jaggāhī’’ti ārocetvāti attho. Aññathāti evaṃ akatvāti attho.
༢༡༧-༨. ཝུཌྜྷཱགནྟུཀསྶཱཏི ཨེཏྠ (ཙཱུལ༹ཝ॰ ༣༥༨ ཨཱདཡོ; ཙཱུལ༹ཝ॰ ཨཊྛ॰ ༣༥༩ ཨཱདཡོ) དཱུརཏོཝ དིསྭཱ ཡདི ‘‘ཝུཌྜྷོ’’ཏི ཛཱནཱཏི, ཏསྨིཾ ཨནཱགཏེ ཨེཝ ཨཱསནཔཉྙཱཔནཱདིཝཏྟཾ ཀཱཏབྦནྟི ཨཏྠོ། པཱདོདཔྤབྷུཏིནྟི པཱདོདཀཾ པཱདཔཱིཋཾ པཱདཀཐལིཀཾ ཨུཔནིཀྑིཔིཏབྦནྟི ཨཏྠོ། པཱནཱིཡེན ཨཱཔུཙྪནྟེན སཙེ སཀིཾ ཨཱནཱིཏཾ པཱནཱིཡཾ སབྦཾ པིཝཏི, པུནཔི ཨཱཔུཙྪིཏབྦོ ཨེཝ། པཉྙཔེཏི ‘‘ཨེཏཾ ཏུམྷཱཀཾ སེནཱསནཾ པཱཔུཎཱཏཱི’’ཏི ཨེཝཾ ཨཱཙིཀྑིཏབྦནྟི ཨཏྠོ།
217-8.Vuḍḍhāgantukassāti ettha (cūḷava. 358 ādayo; cūḷava. aṭṭha. 359 ādayo) dūratova disvā yadi ‘‘vuḍḍho’’ti jānāti, tasmiṃ anāgate eva āsanapaññāpanādivattaṃ kātabbanti attho. Pādodappabhutinti pādodakaṃ pādapīṭhaṃ pādakathalikaṃ upanikkhipitabbanti attho. Pānīyena āpucchantena sace sakiṃ ānītaṃ pānīyaṃ sabbaṃ pivati, punapi āpucchitabbo eva. Paññapeti ‘‘etaṃ tumhākaṃ senāsanaṃ pāpuṇātī’’ti evaṃ ācikkhitabbanti attho.
༢༡༩-༢༠. ‘‘བྷིཀྑཱཙཱརགཱམོ ཨིཏོ དཱུརེ’’ཏི ཝཱ ‘‘སནྟིཀེ’’ཏི ཝཱ ‘‘ཀཱལསྶེཝ པིཎྜཱཡ ཙརིཏབྦ’’ནྟི ཝཱ ‘‘ཨུཔཊྛཱཀེ ཙརིཏབྦ’’ནྟི ཝཱ གོཙརོ ཨཱཙིཀྑིཏབྦོ། ཨགོཙརོཏི མིཙྪཱདིཊྛིཀཱནཾ ཝཱ གཱམོ, པརིཙྪིནྣབྷིཀྑཀོ ཝཱ གཱམོ, ཡཏྠ ཨེཀསྶ ཝཱ དྭིནྣཾ ཝཱ བྷིཀྑཱ དཱིཡཏི, སོ ཨཱཙིཀྑིཏབྦོཏི ཨཏྠོ། ཀཏིཀནྟི སངྒྷསྶ ཀཏིཀཊྛཱནཾ། ‘‘ཨིམཾ ཀཱལཾ པཝིསིཏབྦཾ, ཨིམཾ ཀཱལཾ ནིཀྑམིཏབྦ’’ནྟི ཨེཝཾ པཝེསནནིཀྑམནཀཱལཾ ཨཱཙིཀྑིཏབྦཾ། ཀེསུཙི ཋཱནེསུ ཨམནུསྶཱ ཝཱ ཝཱལཱ༹ ཝཱ ཧོནྟི, ཏསྨཱ ཨེཝཾ ཨཱཙིཀྑིཏབྦམེཝ། ནིསིནྣོཝཱཏི ཨིདཾ ཨཱཔཏྟིཨབྷཱཝམཏྟདཱིཔཀཾ, ཨུཊྛཧིཏྭཱཔི སབྦཾ ཀཱཏུཾ ཝཊྚཏེཝ། ཝཏྟཝིནིཙྪཡོ།
219-20. ‘‘Bhikkhācāragāmo ito dūre’’ti vā ‘‘santike’’ti vā ‘‘kālasseva piṇḍāya caritabba’’nti vā ‘‘upaṭṭhāke caritabba’’nti vā gocaro ācikkhitabbo. Agocaroti micchādiṭṭhikānaṃ vā gāmo, paricchinnabhikkhako vā gāmo, yattha ekassa vā dvinnaṃ vā bhikkhā dīyati, so ācikkhitabboti attho. Katikanti saṅghassa katikaṭṭhānaṃ. ‘‘Imaṃ kālaṃ pavisitabbaṃ, imaṃ kālaṃ nikkhamitabba’’nti evaṃ pavesananikkhamanakālaṃ ācikkhitabbaṃ. Kesuci ṭhānesu amanussā vā vāḷā vā honti, tasmā evaṃ ācikkhitabbameva. Nisinnovāti idaṃ āpattiabhāvamattadīpakaṃ, uṭṭhahitvāpi sabbaṃ kātuṃ vaṭṭateva. Vattavinicchayo.
ཝཏྟནིདྡེསཝཎྞནཱ ནིཊྛིཏཱ།
Vattaniddesavaṇṇanā niṭṭhitā.
