| Library / Tipiṭaka / तिपिटक • Tipiṭaka / अपदानपाळि • Apadānapāḷi |
७. वत्थदायकत्थेरअपदानं
7. Vatthadāyakattheraapadānaṃ
४५.
45.
‘‘पक्खिजातो तदा आसिं, सुपण्णो गरुळाधिपो।
‘‘Pakkhijāto tadā āsiṃ, supaṇṇo garuḷādhipo;
अद्दसं विरजं बुद्धं, गच्छन्तं गन्धमादनं॥
Addasaṃ virajaṃ buddhaṃ, gacchantaṃ gandhamādanaṃ.
४६.
46.
‘‘जहित्वा गरुळवण्णं, माणवकं अधारयिं।
‘‘Jahitvā garuḷavaṇṇaṃ, māṇavakaṃ adhārayiṃ;
एकं वत्थं मया दिन्नं, द्विपदिन्दस्स तादिनो॥
Ekaṃ vatthaṃ mayā dinnaṃ, dvipadindassa tādino.
४७.
47.
‘‘तञ्च दुस्सं पटिग्गय्ह, बुद्धो लोकग्गनायको।
‘‘Tañca dussaṃ paṭiggayha, buddho lokagganāyako;
अन्तलिक्खे ठितो सत्था, इमा गाथा अभासथ॥
Antalikkhe ṭhito satthā, imā gāthā abhāsatha.
४८.
48.
‘‘‘इमिना वत्थदानेन, चित्तस्स पणिधीहि च।
‘‘‘Iminā vatthadānena, cittassa paṇidhīhi ca;
पहाय गरुळं योनिं, देवलोके रमिस्सति’॥
Pahāya garuḷaṃ yoniṃ, devaloke ramissati’.
४९.
49.
‘‘अत्थदस्सी तु भगवा, लोकजेट्ठो नरासभो।
‘‘Atthadassī tu bhagavā, lokajeṭṭho narāsabho;
वत्थदानं पसंसित्वा, पक्कामि उत्तरामुखो॥
Vatthadānaṃ pasaṃsitvā, pakkāmi uttarāmukho.
५०.
50.
‘‘भवे निब्बत्तमानम्हि, होन्ति मे वत्थसम्पदा।
‘‘Bhave nibbattamānamhi, honti me vatthasampadā;
आकासे छदनं होति, वत्थदानस्सिदं फलं॥
Ākāse chadanaṃ hoti, vatthadānassidaṃ phalaṃ.
५१.
51.
छत्तिंसतिम्हि आसिंसु, कप्पम्हि मनुजाधिपा॥
Chattiṃsatimhi āsiṃsu, kappamhi manujādhipā.
५२.
52.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा वत्थदायको थेरो इमा गाथायो अभासित्थाति।
Itthaṃ sudaṃ āyasmā vatthadāyako thero imā gāthāyo abhāsitthāti.
वत्थदायकत्थेरस्सापदानं सत्तमं।
Vatthadāyakattherassāpadānaṃ sattamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / अपदान-अट्ठकथा • Apadāna-aṭṭhakathā / ७. वत्थदायकत्थेरअपदानवण्णना • 7. Vatthadāyakattheraapadānavaṇṇanā
