| Library / Tipiṭaka / તિપિટક • Tipiṭaka / મિલિન્દપઞ્હપાળિ • Milindapañhapāḷi |
૯. વાયસઙ્ગપઞ્હો
9. Vāyasaṅgapañho
૯. ‘‘ભન્તે નાગસેન, ‘વાયસસ્સ દ્વે અઙ્ગાનિ ગહેતબ્બાની’તિ યં વદેસિ, કતમાનિ તાનિ દ્વે અઙ્ગાનિ ગહેતબ્બાની’’તિ? ‘‘યથા, મહારાજ, વાયસો આસઙ્કિતપરિસઙ્કિતો યત્તપ્પયત્તો ચરતિ, એવમેવ ખો, મહારાજ, યોગિના યોગાવચરેન આસઙ્કિતપરિસઙ્કિતેન યત્તપયત્તેન ઉપટ્ઠિતાય સતિયા સંવુતેહિ ઇન્દ્રિયેહિ ચરિતબ્બં. ઇદં, મહારાજ, વાયસસ્સ પઠમં અઙ્ગં ગહેતબ્બં.
9. ‘‘Bhante nāgasena, ‘vāyasassa dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti? ‘‘Yathā, mahārāja, vāyaso āsaṅkitaparisaṅkito yattappayatto carati, evameva kho, mahārāja, yoginā yogāvacarena āsaṅkitaparisaṅkitena yattapayattena upaṭṭhitāya satiyā saṃvutehi indriyehi caritabbaṃ. Idaṃ, mahārāja, vāyasassa paṭhamaṃ aṅgaṃ gahetabbaṃ.
‘‘પુન ચપરં, મહારાજ, વાયસો યં કિઞ્ચિ ભોજનં દિસ્વા ઞાતીહિ સંવિભજિત્વા ભુઞ્જતિ, એવમેવ ખો, મહારાજ, યોગિના યોગાવચરેન યે તે લાભા ધમ્મિકા ધમ્મલદ્ધા અન્તમસો પત્તપરિયાપન્નમત્તમ્પિ, તથારૂપેહિ લાભેહિ પટિવિભત્તભોગિના ભવિતબ્બં સીલવન્તેહિ સબ્રહ્મચારીહિ. ઇદં, મહારાજ, વાયસસ્સ દુતિયં અઙ્ગં ગહેતબ્બં. ભાસિતમ્પેતં, મહારાજ, થેરેન સારિપુત્તેન ધમ્મસેનાપતિના –
‘‘Puna caparaṃ, mahārāja, vāyaso yaṃ kiñci bhojanaṃ disvā ñātīhi saṃvibhajitvā bhuñjati, evameva kho, mahārāja, yoginā yogāvacarena ye te lābhā dhammikā dhammaladdhā antamaso pattapariyāpannamattampi, tathārūpehi lābhehi paṭivibhattabhoginā bhavitabbaṃ sīlavantehi sabrahmacārīhi. Idaṃ, mahārāja, vāyasassa dutiyaṃ aṅgaṃ gahetabbaṃ. Bhāsitampetaṃ, mahārāja, therena sāriputtena dhammasenāpatinā –
‘‘‘સચે મે ઉપનામેન્તિ, યથાલદ્ધં તપસ્સિનો;
‘‘‘Sace me upanāmenti, yathāladdhaṃ tapassino;
સબ્બે સંવિભજિત્વાન, તતો ભુઞ્જામિ ભોજન’’’ન્તિ.
Sabbe saṃvibhajitvāna, tato bhuñjāmi bhojana’’’nti.
વાયસઙ્ગપઞ્હો નવમો.
Vāyasaṅgapañho navamo.
