| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၇. ဝေဒနာပဉ္ဟာသုတ္တံ
7. Vedanāpañhāsuttaṃ
၃၂၀. ‘‘‘ဝေဒနာ, ဝေဒနာ’တိ, အာဝုသော သာရိပုတ္တ, ဝုစ္စတိ။ ကတမာ နု ခော, အာဝုသော, ဝေဒနာ’’တိ? ‘‘တိသ္သော ဣမာဝုသော, ဝေဒနာ။ ကတမာ တိသ္သော? သုခာ ဝေဒနာ, ဒုက္ခာ ဝေဒနာ, အဒုက္ခမသုခာ ဝေဒနာ – ဣမာ ခော, အာဝုသော, တိသ္သော ဝေဒနာ’’တိ။ ‘‘အတ္ထိ ပနာဝုသော, မဂ္ဂော အတ္ထိ ပဋိပဒာ, ဧတာသံ တိသ္သန္နံ ဝေဒနာနံ ပရိညာယာ’’တိ? ‘‘အတ္ထိ ခော, အာဝုသော, မဂ္ဂော အတ္ထိ ပဋိပဒာ, ဧတာသံ တိသ္သန္နံ ဝေဒနာနံ ပရိညာယာ’’တိ။ ‘‘ကတမော ပနာဝုသော, မဂ္ဂော ကတမာ ပဋိပဒာ, ဧတာသံ တိသ္သန္နံ ဝေဒနာနံ ပရိညာယာ’’တိ? ‘‘အယမေဝ ခော, အာဝုသော, အရိယော အဋ္ဌင္ဂိကော မဂ္ဂော, ဧတာသံ တိသ္သန္နံ ဝေဒနာနံ ပရိညာယ, သေယ္ယထိဒံ – သမ္မာဒိဋ္ဌိ သမ္မာသင္ကပ္ပော သမ္မာဝာစာ သမ္မာကမ္မန္တော သမ္မာအာဇီဝော သမ္မာဝာယာမော သမ္မာသတိ သမ္မာသမာဓိ။ အယံ ခော, အာဝုသော, မဂ္ဂော အယံ ပဋိပဒာ, ဧတာသံ တိသ္သန္နံ ဝေဒနာနံ ပရိညာယာ’’တိ။ ‘‘ဘဒ္ဒကော, အာဝုသော, မဂ္ဂော ဘဒ္ဒိကာ ပဋိပဒာ, ဧတာသံ တိသ္သန္နံ ဝေဒနာနံ ပရိညာယ။ အလဉ္စ ပနာဝုသော သာရိပုတ္တ, အပ္ပမာဒာယာ’’တိ။ သတ္တမံ။
320. ‘‘‘Vedanā, vedanā’ti, āvuso sāriputta, vuccati. Katamā nu kho, āvuso, vedanā’’ti? ‘‘Tisso imāvuso, vedanā. Katamā tisso? Sukhā vedanā, dukkhā vedanā, adukkhamasukhā vedanā – imā kho, āvuso, tisso vedanā’’ti. ‘‘Atthi panāvuso, maggo atthi paṭipadā, etāsaṃ tissannaṃ vedanānaṃ pariññāyā’’ti? ‘‘Atthi kho, āvuso, maggo atthi paṭipadā, etāsaṃ tissannaṃ vedanānaṃ pariññāyā’’ti. ‘‘Katamo panāvuso, maggo katamā paṭipadā, etāsaṃ tissannaṃ vedanānaṃ pariññāyā’’ti? ‘‘Ayameva kho, āvuso, ariyo aṭṭhaṅgiko maggo, etāsaṃ tissannaṃ vedanānaṃ pariññāya, seyyathidaṃ – sammādiṭṭhi sammāsaṅkappo sammāvācā sammākammanto sammāājīvo sammāvāyāmo sammāsati sammāsamādhi. Ayaṃ kho, āvuso, maggo ayaṃ paṭipadā, etāsaṃ tissannaṃ vedanānaṃ pariññāyā’’ti. ‘‘Bhaddako, āvuso, maggo bhaddikā paṭipadā, etāsaṃ tissannaṃ vedanānaṃ pariññāya. Alañca panāvuso sāriputta, appamādāyā’’ti. Sattamaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၃-၁၅. ဓမ္မဝာဒီပဉ္ဟာသုတ္တာဒိဝဏ္ဏနာ • 3-15. Dhammavādīpañhāsuttādivaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၃-၁၅. ဓမ္မဝာဒီပဉ္ဟသုတ္တာဒိဝဏ္ဏနာ • 3-15. Dhammavādīpañhasuttādivaṇṇanā
