| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೪. ವೇರಸುತ್ತಂ
4. Verasuttaṃ
೧೭೪. ಅಥ ಖೋ ಅನಾಥಪಿಣ್ಡಿಕೋ ಗಹಪತಿ ಯೇನ ಭಗವಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ। ಏಕಮನ್ತಂ ನಿಸಿನ್ನಂ ಖೋ ಅನಾಥಪಿಣ್ಡಿಕಂ ಗಹಪತಿಂ ಭಗವಾ ಏತದವೋಚ –
174. Atha kho anāthapiṇḍiko gahapati yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho anāthapiṇḍikaṃ gahapatiṃ bhagavā etadavoca –
‘‘ಪಞ್ಚ, ಗಹಪತಿ, ಭಯಾನಿ ವೇರಾನಿ ಅಪ್ಪಹಾಯ ‘ದುಸ್ಸೀಲೋ’ ಇತಿ ವುಚ್ಚತಿ, ನಿರಯಞ್ಚ ಉಪಪಜ್ಜತಿ। ಕತಮಾನಿ ಪಞ್ಚ? ಪಾಣಾತಿಪಾತಂ, ಅದಿನ್ನಾದಾನಂ, ಕಾಮೇಸುಮಿಚ್ಛಾಚಾರಂ, ಮುಸಾವಾದಂ, ಸುರಾಮೇರಯಮಜ್ಜಪಮಾದಟ್ಠಾನಂ – ಇಮಾನಿ ಖೋ, ಗಹಪತಿ, ಪಞ್ಚ ಭಯಾನಿ ವೇರಾನಿ ಅಪ್ಪಹಾಯ ‘ದುಸ್ಸೀಲೋ’ ಇತಿ ವುಚ್ಚತಿ, ನಿರಯಞ್ಚ ಉಪಪಜ್ಜತಿ।
‘‘Pañca, gahapati, bhayāni verāni appahāya ‘dussīlo’ iti vuccati, nirayañca upapajjati. Katamāni pañca? Pāṇātipātaṃ, adinnādānaṃ, kāmesumicchācāraṃ, musāvādaṃ, surāmerayamajjapamādaṭṭhānaṃ – imāni kho, gahapati, pañca bhayāni verāni appahāya ‘dussīlo’ iti vuccati, nirayañca upapajjati.
‘‘ಪಞ್ಚ, ಗಹಪತಿ, ಭಯಾನಿ ವೇರಾನಿ ಪಹಾಯ ‘ಸೀಲವಾ’ ಇತಿ ವುಚ್ಚತಿ, ಸುಗತಿಞ್ಚ ಉಪಪಜ್ಜತಿ । ಕತಮಾನಿ ಪಞ್ಚ? ಪಾಣಾತಿಪಾತಂ, ಅದಿನ್ನಾದಾನಂ, ಕಾಮೇಸುಮಿಚ್ಛಾಚಾರಂ, ಮುಸಾವಾದಂ, ಸುರಾಮೇರಯಮಜ್ಜಪಮಾದಟ್ಠಾನಂ – ಇಮಾನಿ ಖೋ, ಗಹಪತಿ, ಪಞ್ಚ ಭಯಾನಿ ವೇರಾನಿ ಪಹಾಯ ‘ಸೀಲವಾ’ ಇತಿ ವುಚ್ಚತಿ, ಸುಗತಿಞ್ಚ ಉಪಪಜ್ಜತಿ।
‘‘Pañca, gahapati, bhayāni verāni pahāya ‘sīlavā’ iti vuccati, sugatiñca upapajjati . Katamāni pañca? Pāṇātipātaṃ, adinnādānaṃ, kāmesumicchācāraṃ, musāvādaṃ, surāmerayamajjapamādaṭṭhānaṃ – imāni kho, gahapati, pañca bhayāni verāni pahāya ‘sīlavā’ iti vuccati, sugatiñca upapajjati.
‘‘ಯಂ, ಗಹಪತಿ, ಪಾಣಾತಿಪಾತೀ ಪಾಣಾತಿಪಾತಪಚ್ಚಯಾ ದಿಟ್ಠಧಮ್ಮಿಕಮ್ಪಿ ಭಯಂ ವೇರಂ ಪಸವತಿ, ಸಮ್ಪರಾಯಿಕಮ್ಪಿ ಭಯಂ ವೇರಂ ಪಸವತಿ, ಚೇತಸಿಕಮ್ಪಿ ದುಕ್ಖಂ ದೋಮನಸ್ಸಂ ಪಟಿಸಂವೇದೇತಿ, ಪಾಣಾತಿಪಾತಾ ಪಟಿವಿರತೋ ನೇವ ದಿಟ್ಠಧಮ್ಮಿಕಂ ಭಯಂ ವೇರಂ ಪಸವತಿ, ನ ಸಮ್ಪರಾಯಿಕಂ ಭಯಂ ವೇರಂ ಪಸವತಿ, ನ ಚೇತಸಿಕಂ ದುಕ್ಖಂ ದೋಮನಸ್ಸಂ ಪಟಿಸಂವೇದೇತಿ। ಪಾಣಾತಿಪಾತಾ ಪಟಿವಿರತಸ್ಸ ಏವಂ ತಂ ಭಯಂ ವೇರಂ ವೂಪಸನ್ತಂ ಹೋತಿ।
‘‘Yaṃ, gahapati, pāṇātipātī pāṇātipātapaccayā diṭṭhadhammikampi bhayaṃ veraṃ pasavati, samparāyikampi bhayaṃ veraṃ pasavati, cetasikampi dukkhaṃ domanassaṃ paṭisaṃvedeti, pāṇātipātā paṭivirato neva diṭṭhadhammikaṃ bhayaṃ veraṃ pasavati, na samparāyikaṃ bhayaṃ veraṃ pasavati, na cetasikaṃ dukkhaṃ domanassaṃ paṭisaṃvedeti. Pāṇātipātā paṭiviratassa evaṃ taṃ bhayaṃ veraṃ vūpasantaṃ hoti.
‘‘ಯಂ, ಗಹಪತಿ, ಅದಿನ್ನಾದಾಯೀ…ಪೇ॰…।
‘‘Yaṃ, gahapati, adinnādāyī…pe….
‘‘ಯಂ, ಗಹಪತಿ, ಕಾಮೇಸುಮಿಚ್ಛಾಚಾರೀ…ಪೇ॰…।
‘‘Yaṃ, gahapati, kāmesumicchācārī…pe….
‘‘ಯಂ, ಗಹಪತಿ, ಮುಸಾವಾದೀ…ಪೇ॰…।
‘‘Yaṃ, gahapati, musāvādī…pe….
‘‘ಯಂ, ಗಹಪತಿ, ಸುರಾಮೇರಯಮಜ್ಜಪಮಾದಟ್ಠಾಯೀ ಸುರಾಮೇರಯಮಜ್ಜಪಮಾದಟ್ಠಾನಪಚ್ಚಯಾ ದಿಟ್ಠಧಮ್ಮಿಕಮ್ಪಿ ಭಯಂ ವೇರಂ ಪಸವತಿ, ಸಮ್ಪರಾಯಿಕಮ್ಪಿ ಭಯಂ ವೇರಂ ಪಸವತಿ, ಚೇತಸಿಕಮ್ಪಿ ದುಕ್ಖಂ ದೋಮನಸ್ಸಂ ಪಟಿಸಂವೇದೇತಿ, ಸುರಾಮೇರಯಮಜ್ಜಪಮಾದಟ್ಠಾನಾ ಪಟಿವಿರತೋ ನೇವ ದಿಟ್ಠಧಮ್ಮಿಕಂ ಭಯಂ ವೇರಂ ಪಸವತಿ, ನ ಸಮ್ಪರಾಯಿಕಂ ಭಯಂ ವೇರಂ ಪಸವತಿ, ನ ಚೇತಸಿಕಂ ದುಕ್ಖಂ ದೋಮನಸ್ಸಂ ಪಟಿಸಂವೇದೇತಿ। ಸುರಾಮೇರಯಮಜ್ಜಪಮಾದಟ್ಠಾನಾ ಪಟಿವಿರತಸ್ಸ ಏವಂ ತಂ ಭಯಂ ವೇರಂ ವೂಪಸನ್ತಂ ಹೋತೀ’’ತಿ।
‘‘Yaṃ, gahapati, surāmerayamajjapamādaṭṭhāyī surāmerayamajjapamādaṭṭhānapaccayā diṭṭhadhammikampi bhayaṃ veraṃ pasavati, samparāyikampi bhayaṃ veraṃ pasavati, cetasikampi dukkhaṃ domanassaṃ paṭisaṃvedeti, surāmerayamajjapamādaṭṭhānā paṭivirato neva diṭṭhadhammikaṃ bhayaṃ veraṃ pasavati, na samparāyikaṃ bhayaṃ veraṃ pasavati, na cetasikaṃ dukkhaṃ domanassaṃ paṭisaṃvedeti. Surāmerayamajjapamādaṭṭhānā paṭiviratassa evaṃ taṃ bhayaṃ veraṃ vūpasantaṃ hotī’’ti.
‘‘ಯೋ ಪಾಣಮತಿಪಾತೇತಿ, ಮುಸಾವಾದಞ್ಚ ಭಾಸತಿ।
‘‘Yo pāṇamatipāteti, musāvādañca bhāsati;
ಲೋಕೇ ಅದಿನ್ನಂ ಆದಿಯತಿ, ಪರದಾರಞ್ಚ ಗಚ್ಛತಿ।
Loke adinnaṃ ādiyati, paradārañca gacchati;
ಸುರಾಮೇರಯಪಾನಞ್ಚ, ಯೋ ನರೋ ಅನುಯುಞ್ಜತಿ॥
Surāmerayapānañca, yo naro anuyuñjati.
‘‘ಅಪ್ಪಹಾಯ ಪಞ್ಚ ವೇರಾನಿ, ದುಸ್ಸೀಲೋ ಇತಿ ವುಚ್ಚತಿ।
‘‘Appahāya pañca verāni, dussīlo iti vuccati;
ಕಾಯಸ್ಸ ಭೇದಾ ದುಪ್ಪಞ್ಞೋ, ನಿರಯಂ ಸೋಪಪಜ್ಜತಿ॥
Kāyassa bhedā duppañño, nirayaṃ sopapajjati.
‘‘ಯೋ ಪಾಣಂ ನಾತಿಪಾತೇತಿ, ಮುಸಾವಾದಂ ನ ಭಾಸತಿ।
‘‘Yo pāṇaṃ nātipāteti, musāvādaṃ na bhāsati;
ಲೋಕೇ ಅದಿನ್ನಂ ನಾದಿಯತಿ, ಪರದಾರಂ ನ ಗಚ್ಛತಿ।
Loke adinnaṃ nādiyati, paradāraṃ na gacchati;
ಸುರಾಮೇರಯಪಾನಞ್ಚ , ಯೋ ನರೋ ನಾನುಯುಞ್ಜತಿ॥
Surāmerayapānañca , yo naro nānuyuñjati.
‘‘ಪಹಾಯ ಪಞ್ಚ ವೇರಾನಿ, ಸೀಲವಾ ಇತಿ ವುಚ್ಚತಿ।
‘‘Pahāya pañca verāni, sīlavā iti vuccati;
ಕಾಯಸ್ಸ ಭೇದಾ ಸಪ್ಪಞ್ಞೋ, ಸುಗತಿಂ ಸೋಪಪಜ್ಜತೀ’’ತಿ॥ ಚತುತ್ಥಂ।
Kāyassa bhedā sappañño, sugatiṃ sopapajjatī’’ti. catutthaṃ;
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೪. ವೇರಸುತ್ತವಣ್ಣನಾ • 4. Verasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೧-೬. ಸಾರಜ್ಜಸುತ್ತಾದಿವಣ್ಣನಾ • 1-6. Sārajjasuttādivaṇṇanā
