| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
7. விஹாரகாரஸிக்கா²பத³வண்ணனா
7. Vihārakārasikkhāpadavaṇṇanā
மஹந்தங் லாதி க³ண்ஹாதீதி மஹல்லகோ, தங் மஹல்லகங். யோ ச யங் க³ண்ஹாதி, ஸோ தஸ்ஸ அத்தீ²தி ஆஹ ‘‘மஹந்தபா⁴வோ ஏதஸ்ஸ அத்தீ²தி மஹல்லகோ’’தி. ஸோ ச மஹந்தபா⁴வோ கேன, குதோ சாதி ஆஹ ‘‘ஸஸாமிகபா⁴வேனா’’திஆதி³. ந கேவலங் ஸஸாமிகபா⁴வேனேவாதி ஆஹ ‘‘யஸ்மா வா’’திஆதி³. யதி³ ஏவங் அத² கஸ்மா ‘‘மஹல்லகோ நாம விஹாரோ ஸஸாமிகோ வுச்சதீ’’தி (பாரா॰ 367) எத்தகமேவ பத³பா⁴ஜனே வுத்தந்தி ஆஹ ‘‘யஸ்மா பனா’’திஆதி³. விஹரந்தி எத்தா²தி விஹாரோ, ஆவாஸோ. மாதிகாயங் பி⁴க்கூ² வா அனபி⁴னெய்யாதி எத்த² வா-ஸத்³தோ³ ‘‘அயங் வா ஸோ மஹானாகோ³’’திஆதீ³ஸு விய அவதா⁴ரணத்தோ².
Mahantaṃ lāti gaṇhātīti mahallako, taṃ mahallakaṃ. Yo ca yaṃ gaṇhāti, so tassa atthīti āha ‘‘mahantabhāvo etassa atthīti mahallako’’ti. So ca mahantabhāvo kena, kuto cāti āha ‘‘sasāmikabhāvenā’’tiādi. Na kevalaṃ sasāmikabhāvenevāti āha ‘‘yasmā vā’’tiādi. Yadi evaṃ atha kasmā ‘‘mahallako nāma vihāro sasāmiko vuccatī’’ti (pārā. 367) ettakameva padabhājane vuttanti āha ‘‘yasmā panā’’tiādi. Viharanti etthāti vihāro, āvāso. Mātikāyaṃ bhikkhū vā anabhineyyāti ettha vā-saddo ‘‘ayaṃ vā so mahānāgo’’tiādīsu viya avadhāraṇattho.
கோஸம்பி³யந்தி (ஸாரத்த²॰ டீ॰ 2.365) ஏவங்னாமகே நக³ரே. தஸ்ஸ கிர நக³ரஸ்ஸ ஆராமபொக்க²ரணிஆதீ³ஸு தேஸு தேஸு டா²னேஸு கோஸம்ப³ருக்கா²வ உஸ்ஸன்னா அஹேஸுங், தஸ்மா தங் ‘‘கோஸம்பீ³’’தி ஸங்க²ங் க³ச்ச²தி. ‘‘குஸும்ப³ஸ்ஸ நாம இஸினோ அஸ்ஸமதோ அவிதூ³ரே மாபிதத்தா’’தி ஏகே. ச²ன்னத்தே²ரங் ஆரப்³பா⁴தி யோ அபி⁴னிக்க²மனகாலே ஸத்³தி⁴ங் நிக்க²ந்தோ, யஸ்ஸ ச ஸத்தா²ரா பரினிப்³பா³னகாலே ப்³ரஹ்மத³ண்டோ³ (சூளவ॰ 445) ஆணத்தோ, தங் ச²ன்னத்தே²ரங் ஆரப்³ப⁴. சேதியருக்க²ந்தி சித்தீகதட்டே²ன சேதியங், பூஜாரஹானங் தே³வட்டா²னானமேதங் அதி⁴வசனங், ‘‘சேதிய’’ந்தி ஸம்மதங் ருக்க²ங் சேதியருக்க²ங். வத்து²னோ அதே³ஸனாய ஆபஜ்ஜனதோ ‘‘அகிரியமத்ததோ ஸமுட்டா²னபா⁴வோ’’தி வுத்தங். மத்த-ஸத்³தே³ன கிரியதோ ஸமுட்டா²னதங் படிக்கி²பதி. கேசி பன ‘‘வத்து²அதே³ஸனாய, குடிகரணேன ச ஸமுட்டா²னதோ கிரியாகிரியதோ ஸமுட்டா²தீ’’தி வத³ந்தி. பமாணனியமாபா⁴வோவ விஸேஸோ.
Kosambiyanti (sārattha. ṭī. 2.365) evaṃnāmake nagare. Tassa kira nagarassa ārāmapokkharaṇiādīsu tesu tesu ṭhānesu kosambarukkhāva ussannā ahesuṃ, tasmā taṃ ‘‘kosambī’’ti saṅkhaṃ gacchati. ‘‘Kusumbassa nāma isino assamato avidūre māpitattā’’ti eke. Channattheraṃ ārabbhāti yo abhinikkhamanakāle saddhiṃ nikkhanto, yassa ca satthārā parinibbānakāle brahmadaṇḍo (cūḷava. 445) āṇatto, taṃ channattheraṃ ārabbha. Cetiyarukkhanti cittīkataṭṭhena cetiyaṃ, pūjārahānaṃ devaṭṭhānānametaṃ adhivacanaṃ, ‘‘cetiya’’nti sammataṃ rukkhaṃ cetiyarukkhaṃ. Vatthuno adesanāya āpajjanato ‘‘akiriyamattato samuṭṭhānabhāvo’’ti vuttaṃ. Matta-saddena kiriyato samuṭṭhānataṃ paṭikkhipati. Keci pana ‘‘vatthuadesanāya, kuṭikaraṇena ca samuṭṭhānato kiriyākiriyato samuṭṭhātī’’ti vadanti. Pamāṇaniyamābhāvova viseso.
விஹாரகாரஸிக்கா²பத³வண்ணனா நிட்டி²தா.
Vihārakārasikkhāpadavaṇṇanā niṭṭhitā.
