Library / Tipiṭaka / తిపిటక • Tipiṭaka / సంయుత్తనికాయ • Saṃyuttanikāya

    ౪. విజయాసుత్తం

    4. Vijayāsuttaṃ

    ౧౬౫. సావత్థినిదానం. అథ ఖో విజయా భిక్ఖునీ పుబ్బణ్హసమయం నివాసేత్వా…పే॰… అఞ్ఞతరస్మిం రుక్ఖమూలే దివావిహారం నిసీది. అథ ఖో మారో పాపిమా విజయాయ భిక్ఖునియా భయం ఛమ్భితత్తం లోమహంసం ఉప్పాదేతుకామో సమాధిమ్హా చావేతుకామో యేన విజయా భిక్ఖునీ తేనుపసఙ్కమి; ఉపసఙ్కమిత్వా విజయం భిక్ఖునిం గాథాయ అజ్ఝభాసి –

    165. Sāvatthinidānaṃ. Atha kho vijayā bhikkhunī pubbaṇhasamayaṃ nivāsetvā…pe… aññatarasmiṃ rukkhamūle divāvihāraṃ nisīdi. Atha kho māro pāpimā vijayāya bhikkhuniyā bhayaṃ chambhitattaṃ lomahaṃsaṃ uppādetukāmo samādhimhā cāvetukāmo yena vijayā bhikkhunī tenupasaṅkami; upasaṅkamitvā vijayaṃ bhikkhuniṃ gāthāya ajjhabhāsi –

    ‘‘దహరా త్వం రూపవతీ, అహఞ్చ దహరో సుసు;

    ‘‘Daharā tvaṃ rūpavatī, ahañca daharo susu;

    పఞ్చఙ్గికేన తురియేన, ఏహయ్యేభిరమామసే’’తి 1.

    Pañcaṅgikena turiyena, ehayyebhiramāmase’’ti 2.

    అథ ఖో విజయాయ భిక్ఖునియా ఏతదహోసి – ‘‘కో ను ఖ్వాయం మనుస్సో వా అమనుస్సో వా గాథం భాసతీ’’తి? అథ ఖో విజయాయ భిక్ఖునియా ఏతదహోసి – ‘‘మారో ఖో అయం పాపిమా మమ భయం ఛమ్భితత్తం లోమహంసం ఉప్పాదేతుకామో సమాధిమ్హా చావేతుకామో గాథం భాసతీ’’తి. అథ ఖో విజయా భిక్ఖునీ ‘‘మారో అయం పాపిమా’’ ఇతి విదిత్వా మారం పాపిమన్తం గాథాహి పచ్చభాసి –

    Atha kho vijayāya bhikkhuniyā etadahosi – ‘‘ko nu khvāyaṃ manusso vā amanusso vā gāthaṃ bhāsatī’’ti? Atha kho vijayāya bhikkhuniyā etadahosi – ‘‘māro kho ayaṃ pāpimā mama bhayaṃ chambhitattaṃ lomahaṃsaṃ uppādetukāmo samādhimhā cāvetukāmo gāthaṃ bhāsatī’’ti. Atha kho vijayā bhikkhunī ‘‘māro ayaṃ pāpimā’’ iti viditvā māraṃ pāpimantaṃ gāthāhi paccabhāsi –

    ‘‘రూపా సద్దా రసా గన్ధా, ఫోట్ఠబ్బా చ మనోరమా;

    ‘‘Rūpā saddā rasā gandhā, phoṭṭhabbā ca manoramā;

    నియ్యాతయామి తుయ్హేవ, మార నాహం తేనత్థికా.

    Niyyātayāmi tuyheva, māra nāhaṃ tenatthikā.

    ‘‘ఇమినా పూతికాయేన, భిన్దనేన పభఙ్గునా;

    ‘‘Iminā pūtikāyena, bhindanena pabhaṅgunā;

    అట్టీయామి హరాయామి, కామతణ్హా సమూహతా.

    Aṭṭīyāmi harāyāmi, kāmataṇhā samūhatā.

    ‘‘యే చ రూపూపగా సత్తా, యే చ అరూపట్ఠాయినో 3;

    ‘‘Ye ca rūpūpagā sattā, ye ca arūpaṭṭhāyino 4;

    యా చ సన్తా సమాపత్తి, సబ్బత్థ విహతో తమో’’తి.

    Yā ca santā samāpatti, sabbattha vihato tamo’’ti.

    అథ ఖో మారో పాపిమా ‘‘జానాతి మం విజయా భిక్ఖునీ’’తి దుక్ఖీ దుమ్మనో తత్థేవన్తరధాయీతి.

    Atha kho māro pāpimā ‘‘jānāti maṃ vijayā bhikkhunī’’ti dukkhī dummano tatthevantaradhāyīti.







    Footnotes:
    1. ఏహి అయ్యే రమామసేతి (సీ॰)
    2. ehi ayye ramāmaseti (sī.)
    3. ఆరుప్పట్ఠాయినో (సీ॰ పీ॰)
    4. āruppaṭṭhāyino (sī. pī.)



    Related texts:



    అట్ఠకథా • Aṭṭhakathā / సుత్తపిటక (అట్ఠకథా) • Suttapiṭaka (aṭṭhakathā) / సంయుత్తనికాయ (అట్ఠకథా) • Saṃyuttanikāya (aṭṭhakathā) / ౪. విజయాసుత్తవణ్ణనా • 4. Vijayāsuttavaṇṇanā

    టీకా • Tīkā / సుత్తపిటక (టీకా) • Suttapiṭaka (ṭīkā) / సంయుత్తనికాయ (టీకా) • Saṃyuttanikāya (ṭīkā) / ౪. విజయాసుత్తవణ్ణనా • 4. Vijayāsuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact